အခန်း ၆၃ : သောက်ကျိုးနည်... မင်းမိသားစုက ဓားပျံတွေ ရောင်းစားနေတာလား
"သောက်ကျိုးနည်း... ငါ ဘယ်လိုလုပ် ဒီလိုကိစ္စမျိုး ကြုံရတာလဲ... ငါက ခရိုင်ရုံးကို ဖြည်းဖြည်းချင်း ထိန်းချုပ်ပြီး နန်းတော်က ငါ့ကို လိုက်မဖမ်းအောင် အရူးလုပ် လှည့်စားနိုင်မယ်လို့ ထင်ထားခဲ့တာ... နောက်ဆုံးကျမှ အခြေတည်အဆင့် ကျင့်ကြံသူ တစ်ယောက် လမ်းမှာ ပေါ်လာရတယ်လို့"
ညကောင်းကင်ယံ အောက်မှာ လူရိပ်တစ်ခုဟာ သနားစရာကောင်းတဲ့ အခြေအနေနဲ့ လေထဲမှာ ပျံသန်းနေခဲ့သည်။ သူ ထွက်ပြေးနေတဲ့အချိန်မှာ သူ့ရဲ့ ဂုဏ်သိက္ခာကို ဂရုစိုက်နေဖို့ မလိုချေ။
၎င်းက ခရိုင်ရုံးကနေ ထွက်ပြေးလာတဲ့ ခရိုင် ဒုတိယ အကြီးအကဲပင်။
လက်ရှိ သူ့မျက်နှာပေါ်က ရုပ်ဖျက်ထားတာတွေ ဆုတ်ဖြဲလိုက်ပြီးပြီ ဖြစ်ကာ အိုမင်းရင့်ရော်နေတဲ့ မျက်နှာတစ်ခု ပေါ်လာခဲ့သည်။ တစ်ကိုယ်လုံးက အလွန် ပိန်လှီနေခဲ့ပြီး မျက်လုံးတွေက နက်ရှိုင်းစွာ ချိုင့်ဝင်နေကာ ယုတ်မာတဲ့ အမူအရာတွေနဲ့ ပြည့်နှက်နေခဲ့၏။
သူက မြင့်မြတ်သောနှလုံးသား နန်းတော်ရဲ့ အခြေတည်အဆင့် (၁) မိစ္ဆာကျင့်ကြံသူ တစ်ယောက်ဖြစ်လေသည်။
ဟိုတုန်းက နန်းတော်က ကျွမ်းကျင်သူတွေ မြင့်မြတ်သောနှလုံးသား နန်းတော်ကို ဝိုင်းရံတိုက်ခိုက်ကြတုန်းက လူတွေ တိုက်ခိုက်နေကြတာကို အခွင့်ကောင်းယူပြီး မြင့်မြတ်သောနှလုံးသား နန်းတော်က လူတချို့နဲ့အတူ ထိုနေရာကနေ အမြန် ထွက်ခွာလာခဲ့တာပင်။
အဲဒီ အဆင့်တိုက်ပွဲမျိုးက သူတို့ ပါဝင်လို့ ရတဲ့အရာ မဟုတ်ချေ။
လမ်းခရီးမှာ မြင့်မြတ်သောနှလုံးသား နန်းတော်က မိစ္ဆာကျင့်ကြံသူ အမြောက်အမြား ထွက်ပြေး လွတ်မြောက်လာခဲ့ကြသည်။ ထို့နောက် သူတို့ဟာ လူစုခွဲလိုက်ကြပြီး လိုက်လံ ဖမ်းဆီးသူအများအပြားနဲ့ ကြုံတွေ့ခဲ့ရသည်။ ဒီကာလအတွင်းမှာ မြင့်မြတ်သော နှလုံးသား နန်းတော်က မရေမတွက်နိုင်တဲ့ မိစ္ဆာကျင့်ကြံသူတွေဟာ နန်းတော်ရဲ့ လိုက်လံ ဖမ်းဆီးမှုအောက်မှာ သေဆုံးခဲ့ကြရပေသည်။
သူကိုယ်တိုင်လည်း အတားအဆီးတွေနဲ့ လိုက်လံ ဖမ်းဆီးသူ တစ်ဒါဇင်ကျော်နဲ့ ကြုံတွေ့ခဲ့ရပြီး နန်းတော်က ကျင့်ကြံသူတွေနဲ့ တိုက်ခိုက်ရင်း ဒဏ်ရာ အတော်များများ ရရှိခဲ့သည်။
ကံကောင်းတာက... နောက်ဆုံးတော့ သူ လွတ်မြောက်လာနိုင်ခဲ့လေသည်။
ထို့နောက် သူညာ လက်အောက်ငယ်သား (၂) ယောက် (၃) ယောက်လောက် ခေါ်ပြီး ချင်းဟယ် ခရိုင်ကို ရောက်လာခဲ့သည်။
ချင်းဟယ် ခရိုင်ကို ရောက်လာတဲ့ သူဟာ သဘာဝကျကျပဲ ထိုင်ပြီး သေမယ့်ရက်ကို မစောင့်နိုင်ပေ။
......
နန်းတော်က သူတို့ကို လွှတ်ပေးမှာ မဟုတ်ဘူး ဆိုတာကောင်းကောင်း သိနေခဲ့သည်။ ဒါ့အပြင် အကယ်၍ ဖြောင့်မတ်သော ဂိုဏ်းတွေသာ သူတို့ရဲ့ အစစ်အမှန်ကို သိသွားရင် သူတို့လည်း နန်းတော်ကို ကူညီကြမည်ပင်။
ဒါ့အပြင် သူ ဒီကို စမ်းတဝါးဝါးနည်း လာခဲ့တာမဟုတ်ပဲ မစ်ရှင်တစ်ခုကြောင့်လာခဲ့တာဖြစ်၏။
ဒါကြောင့် သူ့ကိုယ်သူ ပိုကောင်းကောင်း ဖုံးကွယ်နိုင်ဖို့ ချင်းဟယ် ခရိုင်ရုံးကို အသုံးပြုဖို့ စဉ်းစားခဲ့တာ ဖြစ်ပေသည်။
အန္တရာယ် အများဆုံး နေရာက အလုံခြုံဆုံး နေရာပဲ.... ဒါက အမိန့်မပေးခင် အကြီးအကဲ စစ်ထူ သူ့အား ပြောခဲ့တဲ့ စကားဖြစ်ရာ သူဟာလည်း အဲဒီအတိုင်း လုပ်တောင်ခဲ့သည်။
ပုန်းခိုတဲ့ နေရာက မူလက အဆင်ပြေပြီး နောက်ဆုံးတော့ နေ့ခင်းဘက်မှာ ကျင့်ကြံသူ တစ်ယောက်က သူတို့ရဲ့ ခြေရာကို ထောက်လှမ်းမိသွားတာကြောင့် ခရိုင်ဒုတိယအကြီးအကဲ တစ်ခုခု မှားနေပြီလို့ ခံစားလိုက်ရ၏။ အန္တရာယ်ကို အစကတည်းက ချေမှုန်းဖို့အတွက် သူတို့ဟာ နှုတ်ပိတ်ဖို့ လူလွှတ်လိုက်ရုံကလွဲပြီး ရွေးချယ်စရာ မရှိတော့ပေ။
ဒါပေမဲ့ သူ အံ့သြသွားရတာက အန္တရာယ်ကို မချေမှုန်းနိုင်ရုံတင် မကပဲ အန္တရာယ်ကို သူ့ရှေ့တည့်တည့် ခေါ်လာသလို ဖြစ်သွားစေခဲ့၏။
ခဏလောက် စဉ်းစားပြီးနောက် မိစ္ဆာကျင့်ကြံသူက သူ့အတွေးတွေကို စီစစ်လိုက်သည်။
ထို့နောက် ခရိုင်ရုံးထဲက ငယ်ရွယ်ပြီး စွမ်းအားကြီးတဲ့ ကျင့်ကြံသူက... နေ့ခင်းတုန်းက သူတို့ရဲ့ ခြေရာကို ဖွင့်ချလိုက်တဲ့ ကျင့်ကြံသူပဲ ဆိုတာ မှတ်မိလိုက်၏။
၎င်းက သူ လူလွှတ်ပြီး သတ်ခိုင်းခဲ့တဲ့ ကျင့်ကြံသူပင်။
သူဟာ တစ်ဖက်လူရဲ့ ခွန်အားကို အကဲခတ် မှားသွားပြီး သံပြားကို ကန်မ်လိုက်ရာ ပြဿနာက သူ့တံခါးဝကို ရောက်လာပေပြီ။
ခရိုင်ဒုတိယအကြီးအကဲဟာ သူ ဘယ်လောက်ကြာကြာ ပြေးခဲ့မိလဲ မသိတော့ချေ။ သူ့ခွန်အားနဲ့ ဆိုရင် သူက ပိုင်ယီရဲ့ ပြိုင်ဘက် လုံးဝ မဟုတ်ဘူးတာကြောင့် စစ်ကူ လိုပေသည်။ 'သူ တစ်ယောက်ယောက်ကို ရှာဖို့ လိုတယ်..'
"ချင်းဟယ် ခရိုင်မှာ လုပ်ဖို့ အကြီးအကဲ စစ်ထူ အမိန့်ပေးထားတဲ့ ကိစ္စတွေကို စီစဉ်ပြီးပြီ ဆိုပေမယ့် မပြီးသေးဘူး... ငါ ဒီကျင့်ကြံသူတွေ လက်ချက်နဲ့ ဒီလို အသေခံလို့ မဖြစ်ဘူး"
"ငါ သေရင်တောင် အကြီးအကဲ စစ်ထူ ပေးလိုက်တဲ့ မစ်ရှင်ကို အရင် ပြီးအောင် လုပ်ရမယ်... ဒါက မြင့်မြတ်သောနှလုံးသား နန်းတော်ရဲ့ ရှင်သန်ရပ်တည်ရေးနဲ့ သက်ဆိုင်နေတာ"
ခရိုင်ဒုတိယအကြီးအကဲရဲ့ ပုံရိပ်က ညကောင်းကင်ယံမှာ သရဲတစ်ကောင်လို ပျံသန်းနေခဲ့ပြီး သူ့မျက်နှာက အကြိမ်ကြိမ် ပြောင်းလဲနေခဲ့သည်။
သူ တိတ်တဆိတ် မကျိန်ဆဲဘဲ မနေနိုင်တော့ပေ။ "သောက်ကျိုးနည်း ကျင့်ကြံသူတွေ"
သူ ကျိန်ဆဲနေတဲ့ လူက သဘာဝကျကျပဲ ပိုင်ယီဖြစ်၏။
အကယ်၍ ပိုင်ယီသာ မရှိရင် သူ ရက်အနည်းငယ် အတွင်း အားလုံး စီစဉ်ပြီးလောက်ပေပြီ။
အချိန်တန်တဲ့အခါ ချင်းဟယ် ခရိုင် တစ်ခုလုံးက မြင့်မြတ်သောနှလုံးသား နန်းတော်ကို ပြန်လည် တည်ထောင်ဖို့အတွက် အာဟာရဖြစ်သွားပေလိမ့်မည်။
"ဟမ်.."
ရုတ်တရက် သေစေနိုင်လောက်တဲ့ ခြိမ်းခြောက်မှု အာရုံတစ်ခုကို ခံစားလိုက်ရပြီး သူ့နှလုံးကို တုန်ခါသွားစေခဲ့သည်။
"မကောင်းတော့ဘူး..."
ခရိုင်ဒုတိယအကြီးအကဲဟာ နီးကပ်လာတဲ့ အန္တရာယ်ကို အာရုံခံမိလိုက်၏။
သူ ဝိညာဉ်အဆောင်တစ်ရွက်ကို အမြန် ထုတ်လိုက်ပြီး ဝိညာဉ်စွမ်းအင် အမြောက်အမြား ထည့်သွင်းလိုက်ရာ ဝိညာဉ်အဆောင်က သွေးရောင် အလင်းတန်းတွေ ချက်ချင်း တောက်ပလာခဲ့သည်။
နောက်တစ်ခဏမှာပင် လေထုကို ထိုးခွဲလာတဲ့ ဓားပျံတစ်လက်ဟာ လေထဲမှာ ရုတ်တရက် ရပ်တန့်သွားခဲ့သည်။ ၎င်းက ခရိုင် တရားသူကြီးရဲ့ ကျောနဲ့ တစ်မီတာတောင် မဝေးတော့ချေ။
သူဟာ လန့်လွန်းလို့ ချွေးအေးတွေ ပြန်သွားခဲ့၏။
"ချီး... ဘယ်လိုလုပ် ဒီလောက် မြန်ရတာလဲ"
သူ့စိတ်ထဲ ကျိန်ဆဲလိုက်၏။
သူ အကုန် အားစိုက်ပြီး ထွက်ပြေးနေပြီး ဝိညာဉ်စွမ်းအင် ကုန်ဆုံးမှာကိုတောင် ဂရုမစိုက်ဘဲ လေထဲမှာ ပျံသန်းနေခဲ့တာပင်။ ဒါပေမဲ့ ထိုကောင်လေးက သူ့အား မီအောင် လိုက်နိုင်တုန်းပင်။
အကယ်၍ သူ ဝိညာဉ်အဆောင်သာ မသုံးလိုက်ရင် တိုက်ခိုက်လာတဲ့ အဲဒီဓားက သူ့ကို သတ်ဖို့ လုံလောက်နေပေပြီ။
ဆိုလိုတာ ပိုင်ယီရဲ့ ခွန်အားက သူ့ထက် အများကြီး သာလွန်နေပေပြီ။ သူက အခြေတည်အဆင့် (၁) မိစ္ဆာကျင့်ကြံသူဖြစ်ပေသည်။
"ဒီကောင်က အနည်းဆုံး အခြေတည်အဆင့် (၂) ရှိတယ်... မဟုတ်ဘူး... သူက အခြေတည်အဆင့် (၃) ဖြစ်ဖို့ သိပ်များတယ်... ဒါမှမဟုတ် အဆင့် (၄) တောင် ဖြစ်နိုင်တယ်"
ခရိုင်ဒုတိယအကြီးအကဲရဲ့ မျက်နှာက ပိုပြီး ကြည့်ရဆိုးလာခဲ့သည်။
သူ့နောက်မှာတော့ ပိုင်ယီဟာ ပြိုင်ဘက်ရဲ့ နောက်ကို အေးအေးလူလူ လိုက်လာနေခဲ့သည်။ သူ့ရဲ့ အဲဒီ ဓားချက်က ပြိုင်ဘက်ကို စမ်းသပ်ကြည့်ရုံတာဖြစ်ပြီး သူဟာ ဒီမိစ္ဆာကျင့်ကြံသူကို သတ်ဖို့ မလောခဲ့ပေ။
ဒီမြင့်မြတ်သောနှလုံးသား နန်းတော်က မိစ္ဆာကျင့်ကြံသူက နောက်ထပ် မိစ္ဆာကျင့်ကြံသူတွေကို မျှားခေါ်ပေးနိုင်မလား ဆိုတာ သူ ကြည့်ချင်သေးလေသည်။
အကောင်းဆုံးကတော့ ချင်းဟယ် ခရိုင်ထဲမှာ ပုန်းခိုနေတဲ့ မြင့်မြတ်သောနှလုံးသား နန်းတော်က မိစ္ဆာကျင့်ကြံသူ အားလုံးကို တစ်ခါတည်း ရှာတွေ့လိုက်ရင် ပိုကောင်းပေသည်။
'ဒါမှမဟုတ် ဒီကောင်က နောက်ဆုံး ကျန်တဲ့ကောင် ဖြစ်နေတာလား...'
ထွက်ပြေးနေတဲ့ ခရိုင်ဒုတိယအကြီးအကဲကို ကြည့်ရင်း ပိုင်ယီ အတွေးနက်သွားခဲ့သည်။
ဒါ့အပြင် ခရိုင်ဒုတိယအကြီးအကဲ ထွက်ပြေးနေတဲ့ ဘက်ကို ကြည့်လိုက်တော့ ပိုင်ယီရဲ့ မျက်နှာက ပိုပြီး ထူးဆန်းသွားခဲ့သည်။
"ငါ မှတ်မိတာ မမှားဘူး ဆိုရင်... ငါ့ရဲ့ ဒုတိယမြောက် ရွေးချယ်ခံက အဲဒီနားမှာ ရှိနေတယ် မဟုတ်လား" သူ ရေရွတ်လိုက်၏။
...
တစ်ချိန်တည်းမှာပင် ချင်းဟယ် ခရိုင် တည်းခိုခန်း တစ်ခုမှာ...
"အဲဒါ... မိစ္ဆာကျင့်ကြံသူလား"
ချင်းကျောက်ဟာ ပြတင်းပေါက်ကို မှီပြီး အဝေးက ကောင်းကင်ယံမှာ တောက်ပနေတဲ့ သွေးရောင် အလင်းတန်းကို ကြည့်ရင်း မျက်လုံးကို အနည်းငယ် မှေးလိုက်၏။
အဝေးကနေ သွေးဆာတဲ့ အရှိန်ဝါတစ်ချို့ကို သူမ ခံစားလို့ ရနေပေသည်။
မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေ အကြောင်း သူမ ကြားထားတဲ့ သတင်းတွေကို ချင်းကျောက် ပြန်တွေးမိသွားခဲ့ပြီး သူမ မျက်ခုံးပင့်လိုက်ကာ အံ့အားသင့်သွားခဲ့သည်။
"တစ်ယောက်ယောက်က မိစ္ဆာကျင့်ကြံသူကို လိုက်ဖမ်းနေတာလား... ဒီလောက် ပေါ့ပေါ့ပါးပါး ပျံသန်းနိုင်တာ သူက အနည်းဆုံး အခြေတည်အဆင့် ဖြစ်ရမယ် မဟုတ်လား... အခြေတည်အဆင့် မိစ္ဆာကျင့်ကြံသူ တစ်ယောက်ကို ထိတ်လန့်တကြား ထွက်ပြေးအောင် ဖိအားပေးနိုင်တယ် ဆိုတော့..."
"မိစ္ဆာကျင့်ကြံသူကို လိုက်ဖမ်းနေတဲ့သူက ဘယ်သူလဲ... ချင်းဟယ် ခရိုင်မှာ ကြီးမားတဲ့ အဆင့်ချိုးဖျက်မှု လုပ်ခဲ့တဲ့ အဲဒီလူလား"
ချင်းကျောက် သူမရဲ့ ချောမွေ့တဲ့ မေးစေ့ကို ကိုင်ပြီး သူမ ဝင်ပါသင့်မလား စဉ်းစားလိုက်သည်။
ဘာပဲဖြစ်ဖြစ် မသေမျိုးကျင့်ကြံခြင်း သရုပ်ဖော် စနစ်ထဲမှာ သူမဟာ မိစ္ဆာဂိုဏ်းကို ဝင်ခဲ့သည် ဖြစ်စေ မဝင်ခဲ့သည် ဖြစ်စေ အနည်းဆုံးတော့ လက်တွေ့ဘဝမှာတော့ သူမက ကျင်းရှင်း နန်းတော်ရဲ့ တပည့်တစ်ယောက်ဖြစ်ပေသာ်။
ထို့အပြင် ကျင်းရှင်း နန်းတော် ဂိုဏ်းချုပ်က သူမအမေပင်။
"ကွက်တိပဲ" သူမက ချီစုစည်းမှု အဆင့် (၁၀) ပဲ ရှိသေးပေမယ့် ချင်းကျောက်ဟာ အခြေတည်အဆင့်ကို လုံးဝ မကြောက်ပဲ ပြုံးလိုက်၏။ "ငါ ဘယ်လောက် တိုးတက်လာလဲ သိချင်နေပြီ... မသေမျိုးကျင့်ကြံခြင်း သရုပ်ဖော် စနစ်ထဲမှာ အကြိမ်ကြိမ် လေ့ကျင့်ထားပြီးပြီပဲ"
'ဘာပဲဖြစ်ဖြစ် အဲဒီ မိစ္ဆာကျင့်ကြံသူက တစ်ယောက်ယောက်ရဲ့ လိုက်ဖမ်းတာ ခံနေရတာ... သူ အောက်ရောက်နေတုန်း သူမ နှိပ်ကွပ်လိုက်ရုံပေါ့.....
ပြဿနာ မရှိလောက်ပါဘူး... ဟုတ်တယ်မလား...'
တခြားသူတွေရဲ့ မျက်လုံးထဲမှာတော့ ကိုယ်နဲ့ မဆိုင်တဲ့ ကိစ္စကို ဝင်ပါတာက အကျိုးမရှိသလို သူများကိစ္စ ဝင်ပါဖြစ်ပြီးရင်လည်း ဘာအကျိုးအမြတ်မှ မရှိပေ။
ဒါပေမဲ့... ချင်းကျောက်က အဲဒီလို အကျိုးအမြတ်ကို မတွေးပဲ သူမ လုပ်နိုင်တယ်လို့ ခံစားရရင် သူမလုပ်ဆောင်မည်ပင်။
ထို့နောက် ချင်းကျောက်ဟာ တည်းခိုခန်း ခေါင်မိုးပေါ် တက်လိုက်၏။ အုတ်ကြွပ်ပြားတွေပေါ် နင်းပြီး သူမဟာ သိုလှောင်အိတ်ထဲက ဓားတွေ အကုန်လုံးကို ထုတ်လိုက်ရာ သူမရှေ့မှာ ပုံသွားခဲ့လေသည်။
ထို့နောက် သူမဟာ ဆေးပုလင်း နောက်တစ်ပုလင်း ထုတ်လိုက်ပြီး ပါးစပ်ထဲ အကုန် လောင်းထည့်လိုက်ရာ များပြားလှသည့် ဝိညာဉ်စွမ်းအင်တွေ ရုတ်တရက် ပေါက်ကွဲထွက်လာခဲ့သည်။
"နိုးထ"
ချင်းကျောက်ရဲ့ မျက်နှာလေး နီရဲသွားခဲ့သည်။ ထိုသို့ အော်လိုက်သည်နှင့် ဓား ဒါဇင်များစွာဟာ ယိုင်နဲ့စွာဖြင့် လေပေါ် ဝဲပျံတက်လာခဲ့ကြသည်။ ဆေးလုံးတွေကြောင့် ရလာတဲ့ ကြောက်မက်ဖွယ် ဝိညာဉ်စွမ်းအင်ကို အားကိုးပြီး သူမဟာ ဓား ဒါဇင်များစွာကို တစ်ပြိုင်နက်တည်း ထိန်းချုပ်လိုက်နိုင်ပေသည်။
"သွား"
တစ်ခဏအတွင်းမှာပင် ဓားပျံ ဒါဇင်များစွာက ငွေရောင် နဂါးတွေလို ကောင်းကင်ယံဆီ ပျံတက်သွားပြီး စူးရှတဲ့ လေခွင်းသံတွေနဲ့ လေထုကို ထိုးခွဲသွားခဲ့သည်။
ဝိညာဉ်စွမ်းအင် လိုအပ်ချက်ကို ဖြည့်ဆည်းဖို့အတွက် ချင်းကျောက်ဟာ နောက်ထပ် ဆေးပုလင်း တစ်ပုလင်းကို အမြန် မော့သောက်လိုက်၏။
...
"ဟမ်... မင့်အဘွား.... ဘာကြီးလဲ..."
လေထဲမှာ ခရိုင်ဒုတိယအကြီးအကဲဟာ ဓားပျံတွေ အရပ်မျက်နှာ အနှံ့ကနေ သူ့ဆီ ဝင်လာတာကို ကူကယ်ရာမဲ့စွာ ကြည့်နေလိုက်ရ၏။ထို့နောက် သူဟာ မရပ်တန့်ဘဲ မနေနိုင်တော့ပေ။ အံကြိတ်ပြီး သူ လက်ဝါးရိုက်ထုတ်လိုက်ရာ ဓားပျံ ဒါဇင်များစွာ လွင့်ထွက်သွားခဲ့သည်။
ဒါပေမဲ့ သူ့ဆီ ဆက်ပြီး ဝင်တိုက်လာတဲ့ ဓားပျံ (၃၀) (၄၀) လောက် ကျန်နေသေးလေသည်။ သူဟာ ဒေါသထွက်လွန်းလို့ မျက်နှာတောင် မည်းပုပ်သွားခဲ့ရပေသည်။
'သူ့ကို ချုံခိုတိုက်ခိုက်တဲ့ သူက ဘယ်သူလဲ...'
'ဒါ့အပြင် ဓားပျံတွေက အများကြီးပဲ... ယီးတဲ့မှ တစ်ဖက်လူရဲ့ မိသားစုက ဓားပျံတွေ ရောင်းစားနေတာများလား.....
ဓားပျံတွေက အလကား ရနေတာလား....'
…