အခန်း ၆၂ : အဲ့လောက်သတ္တိရှိရင် အစထဲက ထွက်ပြေးခဲ့မှာမဟုတ်ဘူး ( သတ္တိရှိသော မိစ္ဆာကျင့်ကြံသူ )
အခုချိန်မှာ ပိရွှီလုပ်နိုင်တာကတော့ ခရိုင်ရုံး တစ်ခုလုံး မိစ္ဆာတွေနဲ့ ပြည့်မသွားခင်မှာ ချင်းဟယ် ခရိုင်ရုံးက လူတိုင်းကို စေ့စေ့စပ်စပ် စုံစမ်းစစ်ဆေးဖို့ပင်။
သူက ချင်းဟယ် ခရိုင်ရုံးရဲ့ ဧည့်သည်တော် ဝန်ကြီးတစ်ယောက်ပဲ ဖြစ်ပေမယ့် သူ့ရဲ့ အမိန့်တွေကို စတင် ထုတ်ပြန်လိုက်၏။
နန်းတော်က ကျင့်ကြံသူ ဆိုတဲ့ သူ့အဆင့်အတန်းကြောင့် ချင်းဟယ် ခရိုင်မှာ သူ့အာဏာက မြင့်မားရာ သူ့အမိန့်ကို မနာခံရဲတဲ့သူ မရှိခဲ့ပေ။
ညတာဝန်ကျနေတဲ့ အမှုထမ်း တစ်စုဟာ အပြင်ထွက်ပြီး လူတွေကို သွားခေါ်ခဲ့ကြသည်။ ထို့နောက် အိမ်ပြန် အနားယူနေကြတဲ့ ခရိုင်ရုံးက လူအားလုံးကို လှမ်းခေါ်လိုက်ကြသည်။
အချိန်များ ကုန်ဆုံးသွားပြီး သန်းခေါင်ယံအချိန်သို့ ရောက်ရှိလာခဲ့သည်။
ခရိုင် အုပ်ချုပ်ရေးမှူး၊ ခရိုင် တရားသူကြီး၊ မှတ်တမ်းအရာရှိ၊ ရာထူးကြီးတဲ့ ခရိုင် အရှင်သခင်တချို့တောင် ပိရွှီရဲ့ လူတွေ ခေါ်တာ ခံလိုက်ကြရသည်။
ခရိုင်ရုံး တစ်ခုလုံး ရုတ်တရက် လူတွေနဲ့ ပြည့်နှက်သွားပြီး လူဦးရေက အတော်လေး တုန်လှုပ်စရာ ကောင်းလောက်အောင် များပြားနေခဲ့လေသည်။
ခရိုင်တစ်ခုလုံးရဲ့ အရာရှိ ဦးရေက မနည်းပါးချေ။
......
ချင်းဟယ် ခရိုင်လို အတော်လေး စည်ကားတဲ့ ခရိုင်တစ်ခုက ခရိုင်ရုံးမှာ လူဦးရေက တစ်ထောင်ကျော် ရှိလေသည်။
ဒါပေမဲ့ ပိရွှီက ဒီလူတွေ အကုန်လုံးကို လှမ်းခေါ်နိုင်ရာ သူ့ရဲ့ အာဏာကို ပြသဖို့ လုံလောက်နေပေပြီ။
ချင်းဟယ် ခရိုင်ရဲ့ အုပ်ချုပ်ရေးမှူးက သူ့ရဲ့ အိပ်ချင်စိတ်ကို ကြိုးစား ဖိနှိပ်ထားခဲ့သည်။ သူက အသက် (၆၀) ပဲ ရှိသေးပြီး သိုင်းပညာရှင် မဟုတ်သလို မသေမျိုးကျင့်ကြံသူလည်း မဟုတ်ပဲ သူက သာမန်လူ တစ်ယောက်ဖြစ်ပေသည်။
သူ့ကို ညသန်းခေါင်ကြီး အပြင်ခေါ်ထုတ်ပြီး ခရိုင်ရုံးကို အမြန် ပြန်လာခိုင်းခဲ့ရာ ၎င်းက သူ့ကို တကယ် အိပ်ငိုက်စေပြီး သမ်းဝေစေခဲ့သည်။ သူ အလွန် ဇဝေဇဝါ ဖြစ်နေခဲ့ပြီး တော်တော်လေး မကျေမနပ်လည်း ဖြစ်နေခဲ့လေသည်။
"ဧည့်သည်တော် ဝန်ကြီးပိ... ဒါ ဘာသဘောလဲဗျ... ညသန်းခေါင်ကြီး ချင်းဟယ် ခရိုင်က လူအများကြီးကို ခရိုင်ရုံးဆီ ခေါ်လိုက်တာက တစ်ခုခု ဖြစ်လို့များလား" ခရိုင် အုပ်ချုပ်ရေးမှူး မမေးဘဲ မနေနိုင်တော့ပေ။
ပိရွှီက အားအင်ပြည့်နေခဲ့ပြီး သူ့လို ကျင့်ကြံသူ တစ်ယောက်အတွက် အိပ်စက်ခြင်းက သိပ်အဓိပ္ပာယ် မရှိတော့ပေ။
သူ လေးနက်တဲ့ လေသံနဲ့ ပြန်ဖြေလိုက်သည်။ "အုပ်ချုပ်ရေးမှူး... နေ့ခင်းက ဆေးဆိုင် အမှုအကြောင်း အမှုနှိမ်နင်းရေးမှူး ဟယ် ဆီကနေ ကြားပြီးပြီ မဟုတ်လား"
အုပ်ချုပ်ရေးမှူး ကြောင်အသွားပြီး ခေါင်းငြိမ့်လိုက်သည်။ "အမှုနှိမ်နင်းရေးမှူး ဟယ် ပြောတာတော့ ဒါက မိစ္ဆာကျင့်ကြံသူတွေနဲ့ ပတ်သက်မှု ရှိဖို့ ဖြစ်နိုင်ချေ သိပ်များတယ်တဲ့"
"ဟေ" အုပ်ချုပ်ရေးမှူး ဖြစ်လာတဲ့ သူတွေက ဘာပဲဖြစ်ဖြစ် အရူးတွေ မဟုတ်ကြရာ သူ ချက်ချင်း တုံ့ပြန်လိုက်၏။
သူ့ရဲ့ အိပ်ချင်စိတ်တွေ ချက်ချင်း ပျောက်ကွယ်သွားပြီး မျက်လုံးများ ပြူးကျယ်သွားခဲ့သည်။
"မိစ္ဆာကျင့်ကြံသူတွေ..."
အလွန်အမင်း တုန်လှုပ်မှုအောက်မှာ သူ့အသံတောင် မြင့်တက်သွားခဲ့သည်။ "ချင်းဟယ် ခရိုင်မှာ မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေ တကယ် ရှိနေတာလား... ဧည့်သည်တော် ဝန်ကြီးပိ သူတို့ရဲ့ ခြေရာကို တွေ့ပြီလား"
ဒီစကားလုံးတွေက... ရေအိုင်နက်ကြီးထဲ ကျောက်တုံးကြီး တစ်တုံး ပစ်ချလိုက်သလို ခရိုင်ရုံးထဲမှာ ဂယက်ထောင်ပေါင်းများစွာ ထသွားစေခဲ့သည်။
လူတိုင်း စကားစပြောလာခဲ့ကြပြီး သက်ဝင်လှုပ်ရှားစွာ ဆွေးနွေးနေခဲ့ကြသည်။
"ချင်းဟယ် ခရိုင်မှာ မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေ ရှိနေတာလား... ရှူး... အဲဒါသာ ဆိုရင် ငါတို့က မိစ္ဆာကျင့်ကြံသူတွေနဲ့ အတူတူ နေနေကြတာ မဟုတ်ဘူးလား.... အကယ်၍ ဒီမိစ္ဆာကျင့်ကြံသူတွေ ပြဿနာရှာရင် ငါတို့က သေချာပေါက် ပထမဆုံး ခံရမယ့်သူတွေ ဖြစ်မှာပေါ့"
"ရှူး... ငါတို့ ချင်းဟယ် ခရိုင်ရုံး တစ်ခုတည်းနဲ့ မိစ္ဆာကျင့်ကြံသူတွေကို ဘယ်လိုလုပ် နိုင်မှာလဲ... သူတို့ အကုန်လုံးက ကျင့်ကြံသူတွေလေ"
"ဟုတ်တယ် ငါတို့ ခရိုင်ရုံးမှာ ဧည့်သည်တော် ဝန်ကြီးပိ၊ အမှုနှိမ်နင်းရေးမှူး ဟယ်၊ မှတ်တမ်းအရာရှိ လင်း နဲ့ တခြားလူနည်းစုကလွဲရင် ကျန်တဲ့လူတွေ အကုန်လုံးက သာမန်လူတွေပဲ"
"ငါတို့ ဘာလို့ ဒီကိစ္စကို ပြည်နယ် အစိုးရကို မကိုင်တွယ်ခိုင်းတာလဲ"
"ဟုတ်တယ်..."
"..."
"တိတ်စမ်း" ပိရွှီ ရုတ်တရက် အော်လိုက်၏။ ၎င်းအသံကြောင့် ခေါင်မိုးတောင် တုန်ခါသွားပြီး အုတ်ကြွပ်စ အနည်းငယ် ပြုတ်ကျလာသည် အထိပင်။
သူဟာ လူတိုင်းကို တစ်ချက် ဝေ့ကြည့်လိုက်ပြီး လေးနက်သော အသံဖြင့် ပြောလိုက်သည်။ "ရန်သူကြီး ရှေ့ရောက်နေတာကို မင်းတို့ ဘာလို့ ဒီလောက် ကြောက်ရွံ့နေရတာလဲ... အကယ်၍ မိစ္ဆာကျင့်ကြံသူတွေ ပြဿနာရှာရင် မင်းတို့ထဲက ဘယ်သူ ထွက်ပြေးလို့ လွတ်မှာလဲ... လူတိုင်း စည်းလုံးညီညွတ်မှသာ ဒီအကျပ်အတည်းကို ငါတို့ ကိုင်တွယ်နိုင်မှာ"
"ဒီည မင်းတို့ကို ဒီခေါ်လိုက်တာက ခရိုင်ရုံးထဲထိ စိမ့်ဝင်နေတဲ့ မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေ ရှိနေပြီ မို့လို့ပဲ... မင်းတို့ထဲက အများစုက ခရိုင်ရုံးက မှုခင်းဆေးဆရာဝန်ကို သိကြတယ် မဟုတ်လား"
"သူ သေသွားပြီ... သူ့ကို မိစ္ဆာကျင့်ကြံသူတွေ သတ်လိုက်တာပဲ... ပြီးတော့ မိစ္ဆာကျင့်ကြံသူတွေက သူအဖြစ် ဟန်ဆောင်ပြီး ခရိုင်ရုံးထဲမှာ စိတ်ကြိုက် လျှောက်သွားနေခဲ့တာ"
"အကယ်၍ မိစ္ဆာကျင့်ကြံသူ တစ်ယောက် ခရိုင်ရုံးထဲ စိမ့်ဝင်နိုင်ခဲ့ရင် ဒုတိယ တစ်ယောက် သေချာပေါက် ရှိလိမ့်မယ်"
ပိရွှီရဲ့ စကားတွေက တုန်လှုပ်စရာ ကောင်းပြီး လူတိုင်းကို ကြောင်အသွားစေခဲ့သည်။
'မိစ္ဆာကျင့်ကြံသူက ခရိုင်ရုံးထဲထိ ခိုးဝင်လာခဲ့တာလား.... သူတို့က ခရိုင်ရုံးက လူတစ်ယောက် အဖြစ်တောင် ဟန်ဆောင်ထားတာလား....'
'ဆိုလိုတာက... ဒီမှာ ရှိနေတဲ့ လူတိုင်းက ငရဲတံခါးဝကို ဖြတ်သန်းခဲ့ကြတယ်ဆိုတဲ့ သဘောလား....'
သူတို့က မျက်တောင်မခတ်ဘဲ လူသတ်တတ်တဲ့ မိစ္ဆာကျင့်ကြံသူ တစ်ယောက်နဲ့ မသိလိုက်မသိဘာသာ ရက်ပေါင်းများစွာ တွဲလုပ်ခဲ့ကြပြီး ဒါမှမဟုတ် ပိုတောင် ကြာနိုင်သေးပေသည်။
ချင်းဟယ် ခရိုင် အုပ်ချုပ်ရေးမှူးလည်း မယုံကြည်နိုင် ဖြစ်နေခဲ့သည်။ "ဧည့်သည်တော် ဝန်ကြီးပိ... ခင်ဗျား ပြောတာက..."
ပိရွှီ လေးနက်စွာ ပြောလိုက်၏။"သဘာဝကျကျပဲ သက်သေရှိလို့ ကျွန်တော် ပြောတာပေါ့"
"ဂလု..."
ခရိုင် အုပ်ချုပ်ရေးမှူး တံတွေး မျိုချလိုက်မိပြီး သူ့ကျောရိုးတလျှောက် အေးစိမ့်သွားတာ ခံစားလိုက်ရလေသည်။ သူ့ခေါင်းကိုတောင် သူ ကာကွယ်နိုင်ပါ့မလားလို့ ခံစားလိုက်ရ၏။
ခရိုင် အကြီးအကဲ တစ်ယောက် အနေနဲ့ မိစ္ဆာကျင့်ကြံသူ တစ်ယောက် သူ့တံခါး လာခေါက်တဲ့အထိ ခွင့်ပြုပေးခဲ့တဲ့ တာဝန်ကို သူ သေချာပေါက် ယူရပေတော့မည်။။
"ဧည့်သည်တော် ဝန်ကြီးပိ... ခင်ဗျား... ခင်ဗျား ကျွန်တော့်ကို ကူညီရမယ်"
အုပ်ချုပ်ရေးမှူး အသံကို နှိမ့်ကာပြောလိုက်သည်။ သူ့အသံက အနည်းငယ် တုန်ရီနေခဲ့ပြီး လေသံက အနည်းငယ် တောင်းပန်တိုးလျှိုးသံပါနေခဲ့လေသည်။
ပိရွှီ ခေါင်းအနည်းငယ် ငြိမ့်ပြလိုက်ပြီး ထို့နောက် သူဟာ ပိုင်ယီကို ကြည့်လိုက်သည်။
"ကျင့်ကြံသူပိုင်... တစ်ခုခု ရှာတွေ့လား"
ဒီအချိန်မှာ ပိုင်ယီဟာ ခရိုင်ရုံးထဲ ပြည့်ကျပ်နေတဲ့ ထောင်ပေါင်းများစွာသော လူတွေကို သူ့ရဲ့ နတ်ဘုရား အာရုံနဲ့ အကြိမ်ကြိမ် အာရုံခံပြီးပေပြီ။ သူ့ရင်ထဲမှာ တိကျတဲ့ သတင်းအချက်အလက် ရရှိပြီးပြီ ဖြစ်ပေမဲ့လူသိရှင်ကြား ထုတ်မပြောခဲ့ပေ။ ထိုအစား သူ့ရဲ့ ဝိညာဉ်စွမ်းအင်ကို အသုံးပြုပြီး အသံလွှင့်လိုက်၏။ "ဘယ်ဘက်က သစ်ပင်အနောက်မှာ ရပ်နေတဲ့ တစ်ယောက် ခင်ဗျားရှေ့ (၇) လှမ်းလောက် အကွာမှာ ရပ်နေတဲ့ တစ်ယောက် ပြီးတော့ ခင်ဗျားဘေးက ခရိုင် ဒုတိယ အကြီးအကဲပဲ "
ပိုင်ယီရဲ့ အသံလွှင့်ပြီးတာနဲ့ ပိရွှီရဲ့ ဆံပင်တွေ ချက်ချင်း ထောင်မတ်သွားပြီး ချွေးအေးတွေ ပြန်လာခဲ့သည်။
သုံးယောက်....
အဲဒီ မှုခင်းဆေးဆရာဝန် အပါအဝင် ဆိုရင် ရက်အနည်းငယ် အတွင်းမှာတင် မိစ္ဆာကျင့်ကြံသူ (၄) ယောက် ခရိုင်ရုံးထဲ စိမ့်ဝင်နေခဲ့လေသည်။
ပြီးတော့ သူတို့ထဲက တစ်ယောက်က ချင်းဟယ် ခရိုင်ရဲ့ တရားသူကြီးတကယ် ဖြစ်နေတာပင်။
"ရှူး"
ပိရွှီဟာ ပိုင်ယီရဲ့ စကားကို နည်းနည်းလေးမှ သံသယ မဝင်ခဲ့ပေ။ သူ့ကို အတုန်လှုပ်ဆုံး ဖြစ်စေတာက မိစ္ဆာကျင့်ကြံသူက သူ့ဘေးနားမှာတင် ရပ်နေတာတောင် သူ သတိမထားမိခဲ့တာပင်။
သူ့ကို သတိပေးခဲ့တဲ့ ကျင့်ကြံသူပိုင်မရှိရင် မတွေးဝံ့စရာပင်။
ပိရွှီ သူ့သိုလှောင်အိတ်ထဲက ဓားရှည်တစ်လက်ကို ချက်ချင်း ဆင့်ခေါ်လိုက်၏။ ဓားရှည်က ထူးခြားပုံရပေမယ့် ဝိညာဉ်လက်နက်ဖြစ်ဖို့ အလှမ်းဝေးနေသေးပေသည်။ အကယ်၍ သိုင်းလောကမှာသာ ဆိုရင် ဒါက နတ်ဘုရားလက်နက်လို့ သတ်မှတ်လို့ ရပေသည်။
သူ စကားတစ်ခွန်းမှ မပြောပဲ ဓားဖြင့် သူ့ဘေးက ခရိုင် တရားသူကြီးကို တိုက်ခိုက်လိုက်ရာ သူ့ခန္ဓာကိုယ်ထဲက ဝိညာဉ်စွမ်းအင်တွေ ပေါက်ကွဲထွက်လာခဲ့သည်။ ဓားဖြတ်သန်းသွားတဲ့ နေရာတိုင်းမှာ ရက်စက်ကြမ်းကြုတ်တဲ့ နဂါးစပါးအုံးမြွေတစ်ကောင်ကို မြင်လိုက်ရသလိုပင်။
သို့ပေမဲ့ ခရိုင် တရားသူကြီးက လုံးဝ ထိတ်လန့်မသွားပဲ လက်ကို ဆန့်ထုတ်လိုက်ပြီး ဓားကို အလွယ်တကူ ဖမ်းဆုပ်လိုက်သည်။
သူဟာ ပိရွှီကိုတောင် လျစ်လျူရှုထားပြီး ပိုင်ယီကို အေးစက်ပြီး မှိုင်းညို့တဲ့ အကြည့်နဲ့ ကြည့်လိုက်၏။
"မင်း ဘယ်လို ရှာတွေ့တာလဲ" သူ့အသံက မှိုင်းညို့နေခဲ့သည်။
ပိုင်ယီ တည်ငြိမ်စွာ ပြောလိုက်၏။"ခင်ဗျားကိုယ်ပေါ်က အနံ့က မစင်ကျင်းထက်တောင် ပိုနံစော်နေတာကို ကျွန်တော် ဘယ်လိုလုပ် မတွေ့ဘဲ နေမလဲ"
သူ စကားပြောပြီးတာနဲ့ ပိုင်ဖျင်ဓားကို ဆင့်ခေါ်လိုက်ရာ ဓားက တစ်ခဏချင်း ပျောက်ကွယ်သွားခဲ့သည်။ ရှိနေတဲ့ လူတိုင်းဟာ အေးစက်ပြီး မှိုင်းညို့တဲ့ အရှိန်ဝါတစ်ခု သူတို့ဆီ လာနေတာကိုပဲ ခံစားလိုက်ရပြီး နောက်ခဏ၌ ပိုင်ဖျင် ဓား ပြန်ပေါ်လာခဲ့သည်။
"ဘုန်း.."
ခရိုင်ရုံးက အမှုထမ်း(၂) ယောက်ဟာ တိတ်ဆိတ်စွာ လဲကျသွားကြပြီး သူတို့က ပိုင်ယီ ထောက်ပြလိုက်တဲ့ လူတွေပင်။
သူတို့ ပေါ်သွားပြီ ဆိုတာ သိပြီး လူသတ်ဖို့ မပြင်ဆင်ခင်မှာပဲ ပိုင်ယီဟာ သူတို့အား အပြတ်ရှင်းလိုက်လေသည်။
သူ့အမြန်နှုန်းက တုန်လှုပ်စရာ ကောင်းလောက်အောင် မြန်ဆန်လွန်းနေခဲ့သည်။
ခရိုင် ဒုတိယ အကြီးအကဲ၏ မျက်နှာက အရုပ်ဆိုးနေခဲ့ပြီး ပိုင်ယီရဲ့ ကျင့်ကြံမှုကို သူ အကဲခတ်လို့ မရဘူး ဆိုတာ သဘောပေါက်လိုက်၏။ 'ချင်းဟယ် ခရိုင်မှာ ဒီလို ကျွမ်းကျင်သူမျိုး ဘယ်လိုလုပ် ရှိနေရတာလဲ..'
အကယ်၍ ခရိုင်ရုံးက ကျင့်ကြံသူတွေပဲ ဆိုရင် သူ့တစ်ယောက်တည်း ကိုင်တွယ်နိုင်ပြီး ယခု၌ ပိုင်ယီ ပါလာတော့ သူ့မှာ ယုံကြည်ချက် မရှိတော့ပေ။။
အတွေးတွေ သူ့ခေါင်းထဲ အမြန် ဖြတ်သန်းသွားခဲ့သည်။
ခရိုင်ဒုတိယအကြီးကဲက ဓားကို ကိုင်ထားတဲ့ လက်ချောင်းထိပ်ကို ပုတ်ထုတ်လိုက်၏။ ကြောက်မက်ဖွယ် ခွန်အားက ပိရွှီရဲ့ မျက်နှာကို ပြင်းထန်စွာ ပြောင်းလဲသွားစေပြီး သူအား နောက်ကို လွင့်ထွက်လုနီးပါး ဖြစ်သွားစေသည်။
သို့ပေမဲ့ ခရိုင် ဒုတိယအကြီးကဲက ပိရွှီကို ဂရုစိုက်ဖို့ အချိန် မရှိပေ။ ထို့နောက် သူ့လက်ကို ဝှေ့ယမ်းလိုက်ရာ အနက်ရောင် မြူခိုးတွေဟာ ကောင်းကင်ယံကို ဖုံးလွှမ်းသွားခဲ့ပြီး မျက်တောင်တစ်ခတ် အတွင်းမှာပဲ ခရိုင်ရုံး တစ်ခုလုံးကို လွှမ်းခြုံသွားခဲ့လေသည်။
၎င်းက လူတိုင်းအား အမှောင်ထုထဲ ကျရောက်သွားစေခဲ့ပြီး ဖရိုဖရဲ ဖြစ်သွားစေခဲ့သည်။
ထိုအခွင်အရေးကို ယူကာ သူဟာ ထွက်ပြေးသွားခဲ့လေသည်။
ကျင့်ကြံမှုကို အကဲခတ်လို့ မရနိုင်တဲ့ ကျင့်ကြံသူ တစ်ယောက်ကို ထိပ်တိုက်ရင်ဆိုင်ဖို့ ရွေးချယ်တာက အရူးပဲ လုပ်မယ့် အလုပ်ပင်။ အကယ်၍ မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေသာ အဲဒီလောက် သတ္တိရှိခဲ့ရင် နန်းတော်ရဲ့ ဝိုင်းရံပိတ်ဆို့မှုကနေ ထွက်ပြေးလာခဲ့ကြမှာ မဟုတ်ချေ......
…