အခန်း ၆၁ : ပိရွှီ၏ အကူညီတောင်းခံမှု
"ကျင့်ကြံသူပိုင်... ဖြစ်ပျက်ခဲ့တဲ့ အဖြစ်အပျက်ရဲ့ အစအဆုံးကို အတိုချုပ် ပြောပြပေးလို့ ရမလား"
ပိုင်ယီရဲ့ ခွန်အားက မရိုးရှင်းပဲ သူဟာ မြင့်မြတ်သောနှလုံးသား နန်းတော်ကို ရန်လိုနေသည်ဆိုတာကို သိရာနန်းတော်ကကျင့်ကြံသူ ဖြစ်တဲ့ ပိရွှီဟာ ထူးထူးခြားခြား ယဉ်ကျေးပျူငှာနေခဲ့လေသည်။
နားထောင်ပြီးနောက် ပိုင်ယီဟာ ဘာကိုမှ မဖုံးကွယ်ပဲ ဖြစ်ပျက်ခဲ့သမျှ အားလုံးကို သူတို့ကို ပြောပြလိုက်၏။
ခရိုင်ရုံးက လူတိုင်း တုန်လှုပ်သွားခဲ့ကြသည်။
မြင့်မြတ်သောနှလုံးသား နန်းတော်က မိစ္ဆာကျင့်ကြံသူ (၆) ယောက်ရဲ့ စေ့စပ်သေချာတဲ့ ချုံခိုတိုက်ခိုက်မှုက ပိုင်ယီကြောင့် အလွယ်တကူ ပျက်စီးသွားခဲ့သည်။ ဒါ့အပြင် သူက မိစ္ဆာကျင့်ကြံသူ အားလုံးကို အားစိုက်ထုတ်စရာ မလိုဘဲ ဖမ်းဆီး သတ်ဖြတ် နိုင်ခဲ့လေသည်။
'ဒါ... ဒါ..'
ဒီကျင့်ကြံသူပိုင်က ဘယ်ကျင့်ကြံမှု အဆင့်ကို ရောက်နေတာလဲ.... ချီစုစည်းမှု အဆင့် (၁၀)ဒါမှမဟုတ်...အခြေတည်အဆင့်လား...'
ချင်းဟယ် ခရိုင်ရုံးရဲ့ ဧည့်သည်တော် ဝန်ကြီးဖြစ်တဲ့ ပိရွှီဟာ သူက ချင်းဟယ် ခရိုင်ထဲက လက်ချိုးရေလို့ရတဲ့ ကျွမ်းကျင်သူတွေထဲက တစ်ယောက်လို့ ထင်ခဲ့လေသည်။
အကယ်၍ သူသာ မိစ္ဆာကျင့်ကြံသူ (၆) ယောက်ရဲ့ တိုက်ခိုက်မှုကို ကြုံတွေ့ရမယ် ဆိုရင် ဒီ (၆) ယောက်လုံး ပေါင်းလိုက်ရင်တောင် သူအနိုင်ယူနိုင်ပေသည်။
'သို့သော် ပိုင်ယီလိုမျိုး လုံးဝ ဒဏ်ရာမရဘဲ တစ်ဖက်လူကို အပြတ်ရှင်းနိုင်ပါ့မလား.....'
ပိရွှီ စက္ကန့်အနည်းငယ်လောက် စဉ်းစားလိုက်၏။
သူရရှိလိုက်သည့် အဖြေက မဖြစ်နိုင်ဘူးဆိုတာပင်။
မိစ္ဆာကျင့်ကြံသူတွေက အမှောင်ထဲမှာ ပုန်းခိုနေပြီး သူက အလင်းရောင်အောက်မှာ ရောက်နေခဲ့သည်။ တစ်ဖက်လူ၏ အမှောင်ထဲကနေ ရုတ်တရက် တိုက်ခိုက်မှုက သူတို့ရဲ့ အပြင်းထန်ဆုံး တိုက်ခိုက်မှုဖြစ်နေကာ သူ့အား စဉ်းစားဖို့ အချိန် ပေမည်မဟုတ်ပေ။
အလျင်စလို ဖြစ်နေတဲ့ အချိန်မှာ သူ သေချာပေါက် ဒဏ်ရာရသွားမည်ဖြစ်ပြီး တစ်ခဏအတွင်းမှာ ပြင်းပြင်းထန်ထန် ဒဏ်ရာရသွားဖို့ ဖြစ်နိုင်ချေ များ၏။
ဖြစ်နိုင်တာက... သူ လုပ်နိုင်တာ ဆိုလို့ သေစေနိုင်လောက်တဲ့ ဒဏ်ရာတွေကို အတတ်နိုင်ဆုံး ရှောင်ရှားတာလောက်ပဲ တတ်နိုင်ပေမည်။
အကယ်၍ သူသာ ချုံခိုတိုက်ခိုက်ခံရပြီး မိစ္ဆာကျင့်ကြံသူရဲ့ လက်ချက်နဲ့ ပြင်းထန်တဲ့ ဒဏ်ရာ ရသွားခဲ့ရင် တစ်ဖက်လူကို ဆက်လက် ရင်ဆိုင်နိုင်တော့မည် မဟုတ်ပေ။
ဒါကို တွေးပြီး ပိရွှီ လေတစ်ချက် ရှူသွင်းလိုက်မိ၏။ ပိုင်ယီကို ကြည့်တဲ့ သူ့အကြည့်ကလည်း အကြိမ်ကြိမ် ပြောင်းလဲသွားခဲ့သည်။
အစတုန်းက စိတ်အားထက်သန်မှုပဲ ရှိပေမယ့် အခုတော့ လေးစားမှုအနည်းငယ် ပါဝင်လာခဲ့၏။
ဒါက ကျင့်ကြံသူတွေရဲ့ ကမ္ဘာဖြစ်ရာ တခြားသူတွေက မင်းထက် ငယ်ရွယ်ပုံရပေမယ့် သူတို့ရဲ့ ခွန်အားက မင်းထက် အများကြီး ပိုသန်မာနေနိုင်ပေသည်။
ထို့ကြောင့် မင်း သူတို့ကို ခေါ်ဝေါ်ရမှာက စီနီယာပင်။
သူက အသက်ပိုကြီးနေလို့ ပါးစပ်က ထုတ်မပြောရင်တောင် သူ့နှလုံးသားရဲ့ အောက်ခြေမှာတော့ သူ့အဆင့်အတန်းကို သူ လျှော့ချလိုက်ပြီး တစ်ဖက်လူရဲ့ အဆင့်အတန်းကို မြှင့်တင်ပေးလိုက်ပေပြီ။
"အကယ်၍ အခြေအနေက ကျင့်ကြံသူပိုင် ပြောသလို ဖြစ်နေရင် ချင်းဟယ် ခရိုင်က တကယ် အန္တရာယ် ရှိနေပြီ" ပိရွှီ သူ့ခေါင်းထဲက အာရုံလွဲစေတဲ့ အတွေးတွေကို ဖယ်ရှားလိုက်ပြီး လေးနက်တဲ့ လေသံနဲ့ ပြောလိုက်၏။ "ချင်းဟယ် ခရိုင်ထဲမှာ မိစ္ဆာကျင့်ကြံသူ အများအပြား သေချာပေါက် ပုန်းခိုနေကြပြီး တစ်ဖက်လူရဲ့ ခွန်အားက ဒီ (၆) ယောက်ထက်တောင် ပိုသန်မာကောင်း သန်မာနိုင်တယ်"
"ဒီမိစ္ဆာကျင့်ကြံသူတွေရဲ့ ရည်ရွယ်ချက်က ဘာပဲဖြစ်ဖြစ် သူတို့ ချင်းဟယ် ခရိုင်ထဲမှာ တစ်ရက်နေရင် ချင်းဟယ် ခရိုင်က လူတွေ တစ်ရက် အန္တရာယ် ရှိနေမှာပဲ"
"သာမန်လူတွေက မိစ္ဆာကျင့်ကြံသူတွေနဲ့ တွေ့ရင် ရိုးရိုးရှင်းရှင်းပဲ ပြန်လည် ခုခံနိုင်စွမ်း လုံးဝ မရှိကြဘူး"
ပိရွှီ သတိထားပြီး ပြောလိုက်သည်။"ပြီးတော့ အားနည်းတဲ့ လေလွင့်ကျင့်ကြံသူ တချို့နဲ့ ကျင့်ကြံမှု နိမ့်တဲ့ ဂိုဏ်းသား တချို့လည်း ဒီမိစ္ဆာကျင့်ကြံသူတွေနဲ့ တွေ့ရင် သေဆုံးသွားလိမ့်မယ်"
သူ ချက်ချင်းပဲ အလွန် ဒုက္ခရောက်တော့မယ်လို့ ခံစားလိုက်ရ၏။
ချင်းဟယ် ခရိုင် ဆိုတာ ခရိုင်လေး တစ်ခုပင်။ဘယ်လောက်ပဲ စည်ကားပါစေ သူ့ရဲ့ အုပ်ချုပ်ရေး အဆင့်အတန်းကို မြှင့်တင်လို့ မရနိုင်ပေ။
ချင်းဟယ် ခရိုင်ထဲမှာ ခရိုင်ရုံး တစ်ခုတည်းရှိရာ ဒီမိစ္ဆာကျင့်ကြံသူတွေကို သူတို့ ဘယ်လို ကိုင်တွယ်နိုင်မည်နည်း။
ဒီအချိန် ပိရွှီဘေးမှာ ရှိတဲ့ အမှုနှိမ်နင်းရေးမှူး ဟယ် က မျက်မှောင်ကြုတ်ပြီး စဉ်းစားလိုက်၏ ။"အရှင်ပိ... ကျွန်တော်တို့ထဲမှာ ရုပ်ဖျက်ထားတဲ့ မိစ္ဆာကျင့်ကြံသူ တစ်ယောက်မှ မရှိဘူးလို့ ကျင့်ကြံသူပိုင် ပြောပါတယ်... ဒါပေမဲ့ ခရိုင်ရုံးထဲမှာ ကျန်နေခဲ့တဲ့ သူတွေထဲမှာ ရုပ်ဖျက်ထားတဲ့ မိစ္ဆာကျင့်ကြံသူ မရှိဘူးလို့ ဆိုလိုတာ မဟုတ်ပါဘူး"
"ဒါ့အပြင် လွန်ခဲ့တဲ့ ရက်ပိုင်းက လီမျိုးနွယ်စု ကပ်ဘေးသင့်ပြီး လီမျိုးနွယ်စုရဲ့ အခြေခံအုတ်မြစ်တစ်ခုလုံး ပျက်စီးလုနီးပါး ဖြစ်သွားရတဲ့ အကြောင်းရင်းက မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေရဲ့ လက်ချက်လို့ ဒီကျွန်တော်မျိုး ခံစားမိပါတယ်"
"လောလောဆယ်တော့ သူတို့ရဲ့ ရည်ရွယ်ချက်က ဘာလဲ ဆိုတာ ကျွန်တော်တို့ မသိရသေးပါဘူး... ဖြစ်နိုင်တာက သူတို့မှာ ဘာရည်ရွယ်ချက်မှ မရှိတာလည်း ဖြစ်နိုင်တယ်"
"သူတို့က လူသတ်ချင်လို့ ရိုးရိုးရှင်းရှင်းပဲ လူသတ်နေကြတာ"
အမှုနှိမ်နင်းရေးမှူး ဟယ် ရဲ့ စကားကို ကြားပြီးနောက် ပိရွှီ လေတစ်ချက် အဝရှူသွင်းလိုက်၏။ သူလည်း အရင်က ကိစ္စကို တွေးမိသွားခဲ့သည်။
ဒါပေါ့ အဲဒီနောက်ပိုင်း လီမျိုးနွယ်စု အကြောင်း သူ ဂရုမစိုက်တော့ပေ။ အဲဒီလို မျိုးနွယ်စု ပျက်စီးသွားတာက သူနဲ့ ဘာမှ မဆိုင်ချေ။
ဒါပေမဲ့ အကယ်၍ ခရိုင်ရုံးထဲမှာ အဲဒီ မှုခင်းဆေးဆရာဝန် အပြင် မိစ္ဆာကျင့်ကြံသူ အဖြစ် ရုပ်ဖျက်ထားတဲ့ တခြားလူတွေ ရှိနေသေးရင် အားလုံး ဒုက္ခရောက်ပေပြီ။
"အားလုံး" ပိရွှီ ချက်ချင်း ဆုံးဖြတ်ချက် ချလိုက်သည်။ "အလောင်းတွေ အားလုံးကို ခရိုင်ရုံးဆီ ချက်ချင်း ပြန်သယ်သွားကြ.... ပြီးတော့ မင်းတို့ အားလုံး ခရိုင်ရုံးကို ပြန်ကြ.... အပြင်ရောက်နေတဲ့ အရာရှိတွေ အားလုံးကို စုစည်းလိုက်..... ဘယ်သူပဲ ဖြစ်ဖြစ် ပြန်မလာတဲ့သူက အကြီးမားဆုံး သံသယရှိသူပဲ..."
တစ်ချိန်တည်းမှာပင် သူဟာ ပိုင်ယီဘက် လှည့်ပြီး လက်နှစ်ဖက်ဆုပ်ကာ အရိုအသေပြုလိုက်၏။ "ကျင့်ကြံသူပိုင်... ဒီအကျပ်အတည်းကို ကျော်လွှားနိုင်ဖို့ ချင်းဟယ် ခရိုင်ကို ကူညီပေးပါလို့ ကျွန်တော် တောင်းပန်ပါတယ်"
ပိရွှီရဲ့ အနေအထားက နိမ့်ချလွန်းနေခဲ့၏။ သို့သော် အကူအညီ တောင်းတဲ့အခါ တောင်းပန်တိုးလျှိုးတဲ့ သဘောထား ရှိရပေမည်။
ဒီအကြောင်းရင်းကြောင့် သူ ကတိပေးလိုက်သည်။ "ကျင့်ကြံသူပိုင် အနေနဲ့ ခရိုင်ရုံးကို (၃) ရက်လောက်ပဲ ကူညီပေးဖို့ လိုတာပါ... ကျွန်တော် ပြည်နယ် အစိုးရဆီ သတင်းပို့လိုက်ပါ့မယ်... ပြည်နယ် အစိုးရက နန်းတော်က ကျင့်ကြံသူတွေ (၃) ရက်အတွင်း ချင်းဟယ် ခရိုင်ကို စေလွှတ်လောက်ပါတယ်"
"ပြီးတော့ ဒီကိစ္စ ပြီးသွားရင် ချင်းဟယ် ခရိုင်ရဲ့ သမိုင်းမှတ်တမ်းထဲမှာ ကျင့်ကြံသူပိုင်ရဲ့ အောင်မြင်မှုတွေကို ကျွန်တော် ရေးသားထားပါ့မယ်"
"တစ်ချိန်တည်းမှာပဲ ဒီကိစ္စကို နန်းတော်ဆီ ကျွန်တော် အစီရင်ခံပါ့မယ်"
ပိရွှီ ခဏလောက် ရပ်နားပြီး ဆက်ပြောလိုက်သည်။"နန်းတော်က ကျင့်ကြံသူပိုင်ကို ဆုလာဘ် အမြောက်အမြား သေချာပေါက် ပေးအပ်ပါလိမ့်မယ်"
အမှန်အတိုင်း ပြောရရင် ပိုင်ယီ တကယ်တော့ ဒီလိုကိစ္စမျိုးမှာ မပါဝင်ချင်ပေ။ ဒါပေမဲ့ ပြဿနာက သူကိုယ်တိုင်လည်း မြင့်မြတ်သောနှလုံးသား နန်းတော်ရဲ့ ပစ်မှတ် ဖြစ်နေပြီဖြစ်ရာ အကယ်၍ သူ မပါဝင်ရင်တောင် အတင်းအကြပ် ပါဝင်ရပေလိမ့်မည်။
အကယ်၍ သူဟာ ပိရွှီကို ငြင်းပယ်ပြီး အိမ်မှာပဲ နေကာ ဘာမှ မလုပ်ဖို့ ရွေးချယ်ရင်တောင် မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေက ရပ်တန့်မည် မဟုတ်ချေ။
အထူးသဖြင့် အခု သူဟာ မိစ္ဆာကျင့်ကြံသူ (၆) ယောက်ကို သတ်လိုက်ခြင်းပင်။
အကယ်၍ ဒီမိစ္ဆာကျင့်ကြံသူတွေမှာ မျိုးနွယ်စိတ်နည်းနည်းလေး ရှိရင်တောင် ပိုင်ယီ နောက်ရက်တွေမှာ အေးအေးဆေးဆေး နေရမှာ မဟုတ်တော့ပေ။
ထို့ကြောင့် သူညာ သူတို့အားလုံးကို တစ်ခါတည်း အပြတ်ရှင်းပစ်ပြီး အနာဂတ်အတွက် ပြဿနာမှန်သမျှကို ဖယ်ရှားပစ်ရပေမည်။
"ကောင်းပါပြီ" ပိုင်ယီ ခေါင်းငြိမ့်လိုက်ပြီး မငြင်းဆန်တော့ပေ။ ဘာလို့လဲဆိုတော့ ကျယ်ပြန့်လှတဲ့ ချင်းဟယ် ခရိုင်ထဲမှာ ပုန်းခိုနေတဲ့ မိစ္ဆာကျင့်ကြံသူ တစ်စုကို သူ့တစ်ယောက်တည်း ရှာဖွေတာက ကောက်ရိုးပုံထဲ အပ်ရှာတာနဲ့ မခြားပေ။
အကယ်၍ သူသာ ရွှေအမြုတေအဆင့် ကျင့်ကြံသူ ဖြစ်ခဲ့ရင် ပြဿနာ မရှိပဲ နတ်ဘုရားအာရုံကို ဖြန့်ကျက်လိုက်တာနဲ့ ချင်းဟယ် ခရိုင် တစ်ခုလုံးကို လွှမ်းခြုံသွားပြီး မြောင်းထဲက ကြွက်စုတ်လေးတွေ ပုန်းခိုဖို့ မဖြစ်နိုင်တော့ပေ။
သို့ပေမဲ့ သူ့ရဲ့ လက်ရှိ အခြေတည်အဆင့် (၃) ကျင့်ကြံမှုနဲ့ကျတော့ နည်းနည်း ခက်ခဲကာ သူ့ရဲ့ နတ်ဘုရားအာရုံက မီတာရာဂဏန်းလောက်ပဲ ဖြန့်ကျက်နိုင်ပေသည်။
ဒါပေမဲ့ ခရိုင်ရုံးနဲ့ နန်းတော်ရဲ့ အကူအညီ ပါလာရင်တော့ အရာအားလုံးက ပိုရိုးရှင်းသွားပေမည်။
ဘာပဲဖြစ်ဖြစ် အခုတော့ လူတိုင်းမှာ ဘုံရန်သူ ရှိနေကြပေပြီ။
"ကျင့်ကြံသူပိုင်ရဲ့ ဖြောင့်မတ်စွာ ကူညီမှုအတွက် ကျေးဇူးတင်ပါတယ်" ပိရွှီ သူ့သိုလှောင်အိတ်ထဲက ဆေးပုလင်း တစ်လုံး ထုတ်လိုက်ပြီး ပြောလိုက်၏။ "ကျွန်တော့်မှာ ကောင်းတဲ့ ပစ္စည်း သိပ်မရှိပါဘူး.. ဒါက အဆိပ်ဖြေဆေး တစ်ပုလင်းပါ... ကျင့်ကြံသူပိုင် လက်ခံပေးဖို့ မျှော်လင့်ပါတယ်"
ပိရွှီက အစိုးရ ရုံးခန်းထဲမှာ နေရတာ အသားကျနေပြီ ဆိုတော့ တစ်ယောက်ယောက်ကို အကူအညီ တောင်းရင် လက်ဆောင် အရင် ပေးရမယ် ဆိုတာ အကျင့်ဖြစ်နေပေပြီ။
ပိုင်ယီ လက်ခံလိုက်၏။
ထို့နောက် မြင့်မြတ်သောနှလုံးသား နန်းတော်က မိစ္ဆာကျင့်ကြံသူ (၆) ယောက်ရဲ့ အလောင်းတွေကို လူတိုင်း သယ်ဆောင်ပြီး ခရိုင်ရုံးဆီ လျှောက်သွားခဲ့ကြသည်။
မကြာမီ သူတို့ ရောက်ရှိလာခဲ့ကြသည်။
ချင်းဟယ် ခရိုင်ရဲ့ ခရိုင်ရုံးကို တော်တော်လေး ခမ်းနားထည်ဝါစွာ တည်ဆောက်ထားခဲ့သည်။ ညအမှောင်ထုအောက်မှာ အေးစက်တဲ့ အရိပ်အယောင် လုံးဝ မရှိပဲ ထို အစား အနားကပ်သွားရင် လူတွေကို နွေးထွေးတဲ့ ခံစားချက် ပေးစွမ်းနေခဲ့သည်။ ဒါက စိတ်ပိုင်းဆိုင်ရာ ခံစားချက် မဟုတ်ပဲ တကယ်ကို လူတွေကို နည်းနည်း နွေးထွေးသွားစေတာပင်။
ခရိုင်ရုံးနဲ့ နီးကပ်နေသရွေ့ သရဲတစ္ဆေတွေ ဘီလူးသရဲတွေကို ဟန့်တားနိုင်သည်ဟု ခံစားရစေပေသည်။
တကယ်တော့ အဲဒါ အမှန်ပင်။
ခရိုင်ရုံး ဆိုတာ ဘာပဲဖြစ်ဖြစ် နန်းတော်က ခန့်အပ်ထားတဲ့ တရားဝင် အစိုးရ အဖွဲ့အစည်းဖြစ်ရာ သူ့မှာ တိုင်းပြည်ရဲ့ ကံကြမ္မာအငွေ့အသက်အချို့ ရှိနေလေသည်။
သာမန်သရဲတစ္ဆေတွေ အတွက်တော့ ဒီကံကြမ္မာ အငွေ့အသက်က သေစေနိုင်၏။
သို့သော် နည်းနည်း သန်မာတဲ့ ကောင်တွေ ဆိုရင်တော့သူတို့ ကြောက်မှာ မဟုတ်ပေ။
မှုခင်းဆေးဆရာဝန် အဖြစ် ဟန်ဆောင်ထားတဲ့ မိစ္ဆာကျင့်ကြံသူက သာဓကကောင်းတစ်ခုပင်။
"အရှင်ပိ"
"အမှုနှိမ်နင်းရေးမှူး ဟယ်"
ခရိုင်ရုံးမှာ ညတာဝန်ကျနေတဲ့ အမှုထမ်းတွေက သူတို့ လာနေတာ မြင်တော့ အမြန် ရိုသေစွာ နှုတ်ဆက်ကြသည်။
ပိရွှီ ဒီအမှုထမ်းတွေကို တစ်ချက် ဝေ့ကြည့်လိုက်ပြီး သူ့ရင်ထဲမှာ သတိထားမှုတွေ ပြည့်နှက်နေခဲ့သည်။ ထို့နောက် သူက ပိုင်ယီကို မေးခွန်းထုတ်တဲ့ အကြည့်နဲ့ ကြည့်လိုက်၏။
ပိုင်ယီ ခေါင်းခါပြလိုက်သည်။
ပိရွှီ သူ့ရင်ထဲမှာ စိတ်သက်သာရာရစွာ သက်ပြင်းမချဘဲ မနေနိုင်တော့ပေ။ ညတာဝန်ကျနေတဲ့ အမှုထမ်းတွေကလည်း မိစ္ဆာကျင့်ကြံသူတွေ ဖြစ်နေမှာ သူ တကယ် ကြောက်နေခဲ့ခြင်းပင်။
အကယ်၍ အဲဒီလိုသာ ဖြစ်ခဲ့ရင် ချင်းဟယ် ခရိုင်ရဲ့ ခရိုင်ရုံး တစ်ခုလုံးက ပရမ်းပတာ ဖြစ်သွားလောက်ပေပြီ။
အကယ်၍ ပြည်နယ် အစိုးရ သို့မဟုတ် နန်းတော်ကသာ ဒါကို သိသွားရင် လူဘယ်နှယောက် အပြစ်ပေးခံရမလဲဆိုတာ ဘယ်သူ သိနိုင်မည်နည်း။
…