အခန်း ၅၆ : သူတော်စင်မ၏ အခြေတည် အဆင့် ၃သို့ရောက်ရှိခြင်း၊ ကိုယ်ဘာသာကိုယ် အဆုံးစီရင်ခြင်း
"တပည့်မလေး ပြောတာ တကယ် မှန်နေတာပဲ..."
မသေမျိုးကျင့်ကြံခြင်း သာရုပ်ဖော် စနစ်ထဲတွင်....
မိစ္ဆာချုပ်လှောင် မျှော်စင်ကို အထူးပြု စောင့်ကြပ်တဲ့ ကောင်းကင်ဂိုဏ်းအကြီးအကဲက ဟိုမျိုးနွယ် ဖြစ်ပေသည်။ သူက ကောင်းကင်ဂိုဏ်းထဲမှာ တစ်နှစ်ပတ်လုံး နှိမ့်ချစွာ နေလေ့ရှိတာကြောင့် လူတော်တော်များများက သူ့နာမည်ကိုတောင် မသိကြဘဲ အကြီးအကဲဟိုလို့ပဲ ခေါ်ကြလေသည်။
ကောင်းကင်ဂိုဏ်းက သက်တမ်းနုတဲ့ အကြီးအကဲ တချို့ ဆိုရင် ဒီလိုလူတစ်ယောက် ရှိနေမှန်းတောင် မသိကြပေ။။
ဒါကို ကြည့်ရင် ဒီအကြီးအကဲဟိုက ဘယ်လောက်တောင် သိုသိုသိပ်သိပ်နေထိုင်သလဲဆိုသည်အား မြင်နိုင်လေသည်။
အဲဒါကြောင့်ပင် ချန်ချန်ရွှယ်ဟာ သူမရဲ့ ဂျူနီယာ ညီမလေး ဟိုရင်းယွမ်ကို ခေါ်ပြီး အကြီးအကဲဟိုရဲ့ လက်အောက် ခိုလှုံလိုက်တဲ့အခါ လူအများကြီးအား မတုန်လှုပ်စေခဲ့တာပငမ။
သူတို့က သိပ်နှိမ့်ချလွန်းတာကြောင့် ကောင်းကင်ဂိုဏ်းထဲမှာ သူတို့ ရှိနေမှန်းတောင် လူတော်တော်များများ မေ့လျော့နေခဲ့ကြသည်။
တကယ်တော့ ပြီးခဲ့တဲ့ မသေမျိုးကျင့်ကြံခြင်း သရုပ်ဖော် ဘဝသာ မရှိခဲ့ရင် ကောင်းကင်ဂိုဏ်းထဲမှာ မိစ္ဆာချုပ်လှောင် မျှော်စင် ဆိုတာ ရှိမှန်း ချန်ချန်ရွှယ် သိမှာ မဟုတ်သလို မျှော်စင်ကို စောင့်ကြပ်နေတဲ့ အကြီးအကဲဟို ရှိမှန်းလည်း သိမှာ မဟုတ်ပေ။
အတွေ့အကြုံများစွာ ရရှိပြီးနောက် မသေမျိုးကျင့်ကြံခြင်းကို အကြိမ်ကြိမ် သရုပ်ဖော်ပြီးတဲ့နောက်မှာတော့
နောက်ဆုံးတော့ သူမဟာ လျှောက်လှမ်းလို့ ရနိုင်မယ့် လမ်းကြောင်းတစ်ခုကို ရှာတွေ့နိုင်ခဲ့ပေပြီ။
ဒါက သူမရဲ့ သတိကြီးတဲ့ စရိုက်နဲ့ ကိုက်ညီသလို လမ်းဆုံးနေတဲ့ အခြေအနေကို ချိုးဖျက်နိုင်မယ့် နည်းလမ်းလည်း ဖြစ်လေသည်။
အကြီးအကဲဟိုကတော့ ဒီအရာအားလုံးက သူ့တပည့်မလေးရဲ့ မျှော်လင့်ချက် ဘောင်အတွင်းမှာ ရှိနေတယ် ဆိုတာ သဘာဝကျကျ မသိခဲ့ချေ။
ဒီအချိန်မှာ အကြီးအကဲဟိုရဲ့ မျက်နှာထားက သတိကြီးနေပြီး သူ့မျက်လုံးထဲမှာ စိုးရိမ်မှု အရိပ်အယောင် တချို့ ဖြတ်သန်းသွားခဲ့သည်။ "မကောင်းတော့ဘူး... မိစ္ဆာချုပ်လှောင် မျှော်စင်ရဲ့ တံဆိပ်ခတ်ထားမှု လျော့ရဲနေပြီ... ဆိုလိုတာက အထဲက မိစ္ဆာက အပြင်ကို ထွက်လာဖို့ အခွင့်အလမ်း သိပ်များနေပြီ"
"ဒါက ရှေးခေတ်ကတည်းက ရှင်သန်လာတဲ့ မိစ္ဆာတစ်ကောင်ပဲ.... နှစ်သန်းပေါင်းများစွာ ချုပ်လှောင်ခံထားရရင်တောင် သူ့ရဲ့ ခွန်အားကို လျှော့တွက်လို့ မရဘူး... ကောင်းကင်ဂိုဏ်း တစ်ခုတည်းရဲ့ အင်အားနဲ့ ဆိုရင် သူ့ကို ဖြေရှင်းဖို့ ခက်ခဲမှာကို ငါ စိုးရိမ်မိတယ်"
အကြီးအကဲဟိုက သူ့ဘေးမှာ တည်တည်ငြိမ်ငြိမ် ရှိနေတဲ့ ချန်ချန်ရွှယ်ကို ကြည့်လိုက်ပြီး ကြောင်အနေတဲ့ ဟိုရင်းယွမ်ကို ကြည့်လိုက်၏။
သူ့ရဲ့ ယခင်က စိတ်ပျက်အားလျော့နေမှုတွေကို ဖယ်ရှားလိုက်ပြီး လေးနက်သော အသံဖြင့် ပြောလိုက်သည်။ "မင်းတို့နှစ်ယောက် ဒီနေရာကို စောင့်ကြပ်နေကြ ပြီးတော့ ဘယ်သူ့ကိုမှ မိစ္ဆာချုပ်လှောင် မျှော်စင်နား အကပ်မခံနဲ့"
"ဒီဝိညာဉ်လက်နက်ကို မင်းတို့ကို ပေးထားမယ်... အကယ်၍ တစ်ယောက်ယောက်က မိစ္ဆာချုပ်လှောင် မျှော်စင်နား ကပ်လာပြီး သတိပေးစကား နားမထောင်ရင် တစ်ခါတည်းတိုက်ခိုက်လိုက်"
"ဒီဝိညာဉ်လက်နက်က ရွှေအမြုတေ အဆင့်ကျင့်ကြံသူတွေကိုတောင် ခဏလောက် ယှဉ်နိုင်တယ်"
ချန်ချန်ရွှယ်နဲ့ ဟိုရင်းယွမ် နှစ်ယောက်လုံး ခေါင်းငြိမ့်လိုက်ကြ၏။ "ဟုတ်ကဲ့ ဆရာ"
အကြီးအကဲဟို ပျံသန်းထွက်ခွာသွားတာကို ကြည့်ရင်း ဟိုရင်းယွမ်ဟာ ဇဝေဇဝါ ဖြစ်နေတုန်းပင်။ တံဆိပ်ခတ်ထားမှု လျော့ရဲနေတာကို သူမရဲ့ စီနီယာ အစ်မက ဘာလို့ သိနေတာလဲ ဆိုတာအား သူမ သိပ်နားမလည်ပေ။
ဘာလို့ ဆရာသခင်က ဒီလောက် သတိကြီးနေရသည်နည်း။ မိစ္ဆာချုပ်လှောင် မျှော်စင်ထဲမှာ ပိတ်မိနေတဲ့ မိစ္ဆာက တကယ်ပဲ ပြိုင်ဘက်ကင်းတဲ့ (Unrivaled) အရာတစ်ခု ဖြစ်နေသည်လား.....
"စီနီယာ အစ်မ..."
"ရှူး"
ချန်ချန်ရွှယ် သူမ ဂျူနီယာ ညီမလေးရဲ့ မေးခွန်းကို ဖြတ်ပြောလိုက်ပြီး တည်ငြိမ်တဲ့ လေသံနဲ့ ပြောလိုက်သည်။ "အစ်မက မသေမျိုးကျင့်ကြံခြင်း လောက ကောင်းစားဖို့ အတွက် လုပ်နေတာလို့ပဲ ညီမလေး မှတ်ထားရင် ရပါပြီ... အစ်မကို ယုံပါ"
ထို့နောက် ချန်ချန်ရွှယ် ခေါင်းမော့လိုက်ပြီး တိမ်တွေကြား ထိုးဖောက်ဝင်ရောက်နေတဲ့ မိစ္ဆာချုပ်လှောင် မျှော်စင်ကြီးကို ကြည့်လိုက်၏။ မျှော်စင်ကြီးဆီက ရှေးဟောင်း အရှိန်ဝါတို့ ထွက်ပေါ်နေခဲ့ပြီး လူတွေကို မကောင်းတဲ့ ခံစားချက်အား ပေးစွမ်းနေခဲ့လေသည်။
'ရှေးခေတ်က မိစ္ဆာတွေ... နှစ်သန်းပေါင်းများစွာ...'
စောစောက အကြီးအကဲဟို ပြောလိုက်တဲ့ စကားတွေက သူမခေါင်းထဲ ဖြတ်သန်းသွားခဲ့သည်။
ဒီစကားလုံးတွေထဲမှာ ပါဝင်တဲ့ သတင်းအချက်အလက် ပမာဏက သိပ်များလွန်းပေသည်။
အကယ်၍ ရှေးခေတ်ကတည်းက ချုပ်လှောင်ခံထားရတဲ့ မိစ္ဆာသာ တကယ် မှန်တယ် ဆိုရင် ဒီမိစ္ဆာချုပ်လှောင် မျှော်စင်ကို ကောင်းကင်ဂိုဏ်းက တည်ဆောက်ခဲ့တာ မဟုတ်ဘူး ဆိုတဲ့ အဓိပ္ပာယ်ပင်။ 'အထဲက မိစ္ဆာကို ကောင်းကင်ဂိုဏ်းက ချုပ်လှောင်ခဲ့တာ မဟုတ်ဘူးပေါ့....'
'ကောင်းကင်ဂိုဏ်းရဲ့ ဘိုးဘေးခေါင်းဆောင်က ဒီနေရာမှာ ဂိုဏ်းလာဖွင့်ခဲ့တာပဲ ရှိမယ်... ပြီးတော့ အထဲမှာ မိစ္ဆာချုပ်လှောင် မျှော်စင် ရှိနေတာကို တိုက်ဆိုင်စွာ တွေ့ရှိခဲ့တာပဲ....
ဒါ့အပြင် မိစ္ဆာချုပ်လှောင် မျှော်စင်ထဲမှာ ရှေးဟောင်း မိစ္ဆာ ချုပ်လှောင်ထားမှန်းလည်း သူ သိနေခဲ့မယ်...
ဒါကြောင့် အထဲက မိစ္ဆာ အပြင်ထွက်လာပြီး ဒုက္ခမပေးအောင် ကာကွယ်ဖို့ မိစ္ဆာချုပ်လှောင် မျှော်စင်ကို စောင့်ကြပ်ဖို့ သူ ဆုံးဖြတ်ခဲ့တာလား...
အတွင်းထဲမှာ ဒီလို လျှို့ဝှက်ချက်မျိုး ရှိနေတာလား...'
ချန်ချန်ရွှယ် သူမရင်ထဲက ခန့်မှန်းချက်က အမှန်နဲ့ နီးစပ်လောက်တယ်လို့ ခံစားလိုက်ရပေသည်။
[သင့်ကြောင့် ကောင်းကင်ဂိုဏ်း ဂိုဏ်းချုပ်ကြီးသည် အကြီးအကဲများ အားလုံးကို အရေးပေါ် ခေါ်ယူပြီး ဒီကိစ္စကို အတူတကွ ဘယ်လို ဖြေရှင်းမလဲ ဆွေးနွေးခဲ့ကြသည်။ နောက်ဆုံးတော့ သူတို့ ကောက်ချက်တစ်ခု ချလိုက်နိုင်သည် - ကောင်းကင်ဂိုဏ်း တစ်ခုတည်းရဲ့ အင်အားနဲ့ ဆိုရင် မိစ္ဆာချုပ်လှောင် မျှော်စင်ရဲ့ တံဆိပ်ကို အားဖြည့်ပေးနိုင်မှာ မဟုတ်တာကြောင့် စစ်ကူတောင်းရန် ဆုံးဖြတ်လိုက်ကြသည်။]
[ဖြောင့်မတ်သော ဂိုဏ်းပေါင်း ဒါဇင်များစွာ ဦးနှောက်ခြောက်အောင် စဉ်းစားပြီး နှစ်ပေါင်း (၂၀) နီးပါး အချိန်ပေးပြီး တံဆိပ်ကို အားဖြည့်ပေးပြီးနောက်မှာတော့ မိစ္ဆာချုပ်လှောင် မျှော်စင်ရဲ့ တံဆိပ်က နောက်ဆုံးတော့ တည်ငြိမ်သွားခဲ့သည်။]
[အသက် ၁၀၀ နှစ် - အကြီးအကဲ ယွဲ့ ကွယ်လွန်သွားပြီ ဆိုတဲ့ သတင်း သင် ကြားလိုက်ရသည်။ အကြီးအကဲ ယွဲ့ ကို စိတ်ဆင်းရဲပြီး သေအောင် နောက်တစ်ကြိမ် နှိပ်စက်မိပြန်ပြီလို့ မခံစားဘဲ မနေနိုင်တော့ပေ။]
[အသက် ၁၂၀ နှစ် - သင်သည် အခြေတည်အဆင့်ကို မျှော်မှန်းထားသည်ထက် (၆) နှစ် စောပြီး ချိုးဖျက်ဝင်ရောက်နိုင်ခဲ့သည်။ သင် အနည်းငယ် ပျော်ရွှင်မိခဲ့သည်။]
[အသက် ၁၅၀ နှစ် - သင်သည် အခြေတည်အဆင့် (၂) ကို ချိုးဖျက်ဝင်ရောက်ဖို့ ကြိုးစားနိုင်ပြီဟု ခံစားလိုက်ရသည်။ သို့သော် ဘေးကင်းစေရန် သင့်ကျင့်ကြံမှုကို ခေတ္တ ဖိနှိပ်ထားလိုက်သည်။]
[အသက် ၁၆၀ နှစ် - သင်သည် အခြေတည်အဆင့် (၂) ကို စတင် ချိုးဖျက်ဝင်ရောက်ခဲ့သည်]
[အောင်မြင်ပါသည်]
"အခြေတည်အဆင့် (၂)..... "ချန်ချန်ရွှယ်ဟာ ပျောက်ဆုံးနေတာ ကြာပြီ ဖြစ်တဲ့ အပြုံးတစ်ခုကို မထုတ်ဖော်ဘဲ မနေနိုင်တော့ပေ။ သူမရဲ့ မွေးရာပါ ပါရမီနဲ့ အရိုးအခြေခံအုတ်မြစ်က သူမရဲ့ ဂျူနီယာ ညီမလေး ဟိုရင်းယွမ်လောက် မကောင်းပေ။ သူမ ညီမလေးက အခြေတည်အဆင့် (၁၀) ရောက်နေပေမဲ့ သူမကတော့ အခုမှ အခြေတည်အဆင့် (၂) ပဲ ရှိသေးပေသည်။
ဒါပေမဲ့ သူမ ဒီလောက်နဲ့တင် သိပ်ကျေနပ်နေခဲ့ပြီး ပြီးခဲ့တဲ့ မသေမျိုးကျင့်ကြံခြင်း သရုပ်ဖော် ဘဝတုန်းကဆို သူမဟာ အခြေတည်အဆင့် (၁) ပဲ ရောက်ခဲ့လေသည်။ အခုတော့ အရင်စံချိန်ကို ချိုးဖျက်နိုင်ခဲ့ပြီလို့ သတ်မှတ်လို့ ရပေမည်။
ဒါ့အပြင် ဒီတစ်ခါ သူမ ကောင်းကင်ဂိုဏ်းကို ကယ်တင်နိုင်ခဲ့လို့ သူမ ရင်ထဲမှာ စိတ်နှလုံးမိစ္ဆာတွေ ကြီးထွားမလာတော့ချေ။
ဘယ်လိုပဲ ကြည့်ကြည့် ဒါက ပြီးပြည့်စုံနေပေသည်။
ချန်ချန်ရွှယ်ရဲ့ ပျော်ရွှင်မှုက စက္ကန့်ပိုင်းလောက်တောင် မခံလိုက်ပဲ သူမ ရင်ထဲက ဖော်ပြလို့ မရနိုင်တဲ့ ပင်ပန်းနွမ်းနယ်မှုတွေက ဖုံးလွှမ်းသွားခဲ့သည်။
သူမ ရင်ထဲက မာနအတွက် သူမဟာ တင်ပဆုံရိုးတွေ နာကျင်တဲ့အထိ သည်းခံခဲ့ရ၏
အခြေတည်အဆင့် (၂) ရောက်ဖို့ သူမ ကြိုးကြိုးစားစား ကျင့်ကြံခဲ့ရသည်။
၎င်းက အလွန် ပင်ပန်းခက်ခဲလေသည်။
နောက်ဆုံးတော့ သူမဟာ မသေမျိုးကျင့်ကြံခြင်း ဘဝကို သရုပ်ဖော်တိုင်း နှစ်ပေါင်း တစ်ရာကျော် ဖြတ်သန်းနေရကာ ချန်ချန်ရွှယ်ဟာ သူမ ဘယ်နှနှစ် ရှင်သန်ခဲ့ပြီးပြီလဲ ဆိုတာတောင် မေ့နေပေပြီ။ 'နှစ် ငါးရာ ခြောက်ရာလောက်တော့ ရှိလောက်ပြီ မဟုတ်လား.. သိပ်ခက်ခဲလွန်းတယ်...'
"အဆင့် (၃) ကို ဆက်ပြီး ချိုးဖျက်ဝင်ရောက်ရမယ်" ချန်ချန်ရွှယ် အံကြိတ်လိုက်၏။ "ငါ အခြေတည်အဆင့် (၃) ကို ချိုးဖျက်ဝင်ရောက်နိုင်တာနဲ့ အကြီးအကဲ ယွဲ့ သေဆုံးသွားတာကလွဲရင် မိစ္ဆာချုပ်လှောင် မျှော်စင်ရဲ့ လျှို့ဝှက်အန္တရာယ်တွေလည်း ပြေလည်သွားပြီ... ဂျူနီယာ ညီမလေးရဲ့ ခွန်အားကလည်း မသေမျိုးကျင့်ကြံခြင်း လောကမှာ ရပ်တည်ဖို့ လုံလောက်နေပြီ"
"ဒီကမ္ဘာမှာ ငါ့ကို တွယ်တာစေမယ့် အရာ ဘာမှ မရှိတော့ဘူး"
"ဟူး"
လေတစ်ချက် ပြင်းပြင်းမှုတ်ထုတ်လိုက်ပြီး ချန်ချန်ရွှယ် ရေရွတ်လိုက်သည်။ "နောက်ဆုံးတော့ သရုပ်ဖော် မသေမျိုးကျင့်ကြံခြင်း ဘဝသစ်ကို ပြောင်းလဲဖို့ အချိန်တန်ပြီ"
...
ချင်းဟယ် ခရိုင်။
ချန်ချန်ရွှယ်က သူ့ကို ဘယ်တော့မှ စိတ်ပျက်အောင် လုပ်မှာ မဟုတ်ဘူး ဆိုတာ ပိုင်ယီ သိလိုက်ပေသည်။ အသေချာပင် ဒီတစ်ခါ ချန်ချန်ရွှယ်ဟာ အခြေတည်အဆင့် (၂) ကို ချိုးဖျက်ဝင်ရောက်နိုင်ခဲ့ပြီး သရုပ်ဖော် မသေမျိုး ဘဝရဲ့ လမ်းဆုံးနေတဲ့ အခြေအနေကိုတောင် ဖြေရှင်းနိုင်ခဲ့ပေသည်။
သူတော်စင်မက ဘာပဲဖြစ်ဖြစ် သူတော်စင်မပင်။ သရုပ်ဖော် ဘဝမှာ နေထိုင်စရာ နည်းလမ်းတွေ အများကြီး ရှိပြီး သူမ တစ်ခုခု လုပ်တိုင်း သေသေချာချာ လုပ်ကိုင်တတ်၏။
ချင်းကျောက်လို စိတ်မရှည်တာမျိုး မရှိပဲ ဆုံးဖြတ်ချက် မချခင် သေချာ စဉ်းစားလေသည်။ ချန်ချန်ရွှယ်ဟာ သရုပ်ဖော် စနစ်ထဲမှာ ဘဝသစ် တစ်ခု စမ်းသပ်တော့မယ် ဆိုတာလည်း ပိုင်ယီ သိလိုက်၏။
အဲဒါက လုံးဝ ပြဿနာ မရှိပေ။
ဝိညာဉ်ဓားဂိုဏ်းရဲ့ ဂုဏ်သရေရှိ သူတော်စင်မ တစ်ယောက်ကို အခြေတည်အဆင့် (၂) ရောက်ဖို့အတွက် နှစ် (၁၀၀) ကျော် ကျင့်ကြံခိုင်းရတာ မတရားလွန်းရာ ကျပေသည်။
သို့ပေမဲ့ ချန်ချန်ရွှယ်ဟာ ဒီလောက် အကြာကြီး အများကြီး ကြုံတွေ့ခဲ့ရတာတောင် သူမရဲ့ စိတ်အခြေအနေက ပေါက်ကွဲမသွားခဲ့ပဲ သူမရဲ့ စိတ်အခြေအနေက ရေပြင်လို တည်ငြိမ်နေခဲ့၏။
[အသက် ၁၇၀ နှစ် - ချန်ချန်ရွှယ်သည် အပြင်ထွက်စဉ် ကျင့်ကြံသူများကြား တိုက်ပွဲတစ်ခုတွင် ပါဝင်ပတ်သက်မိခဲ့သည်။ သူမတွင် ရွေးချယ်စရာ မရှိသဖြင့် ဝိုင်းရံပိတ်ဆို့မှုမှ သီသီလေး လွတ်မြောက်နိုင်ရန် သူမ၏ ဝှက်ဖဲအများအပြားကို အသုံးပြုလိုက်ရသည်။]
[အသက် ၁၈၀ နှစ် - ချန်ချန်ရွှယ်ဟာ မထင်မှတ်ထားသော ကံကောင်းမှုတစ်ခု ကြုံတွေ့ခဲ့ရသည်။ သူမ အခြေတည်အဆင့် (၃) ကို ချိုးဖျက်ဝင်ရောက်နိုင်ပြီဟု ခံစားလိုက်ရသည်။]
[အသက် ၁၈၅ နှစ် - ချန်ချန်ရွှယ် သူမ၏ ကျင့်ကြံမှုအဆင့်ကို ဆက်လက် ဖိနှိပ်ထားလို့ မရတော့ဘဲ အခြေတည်အဆင့် (၃) ကို တရားဝင် ချိုးဖျက်ဝင်ရောက်လိုက်သည်]
[သူမ အောင်မြင်စွာ ချိုးဖျက်ဝင်ရောက်နိုင်ခဲ့သည်]
[ဖြစ်နိုင်တာက သူမ အပြင်မှာ ရှိနေစဉ် အဆင့်ချိုးဖျက်လိုက်မိသောကြောင့် ရွှေအမြုတေ အဆင့်မိစ္ဆာသားရဲတစ်ကောင်၏ သတိပြုမိခြင်းကို ခံလိုက်ရသည်။ အခြေတည်အဆင့် (၃) သာ ရှိသေးသော ချန်ချန်ရွှယ်သည် ၎င်း၏ ပြိုင်ဘက် မဟုတ်ပေ။ ချန်ချန်ရွှယ် ထွက်ပြေးရန် ရည်ရွယ်ချက် မရှိပဲ သူမကိုယ့်ဘာသာကိုယ် အဆုံးစီရင်လိုက်သည်။]
[ရွှေအမြုတေ အဆင့် မိစ္ဆာသားရဲ ကြောင်အသွားခဲ့သည်။ အဆင့်ချိုးဖျက်ပြီးခါစ မသေမျိုးကျင့်ကြံသူ တစ်ယောက်က ချက်ချင်းပဲ ကိုယ့်ကိုယ်ကိုယ် အဆုံးစီရင်ဖို့ ဆုံးဖြတ်လိုက်တာမျိုး သူ ပထမဆုံးအကြိမ် မြင်ဖူးခြင်း ဖြစ်သည်။]
[ချန်ချန်ရွှယ် သေဆုံးသွားခဲ့သည်]
[သူမသည် အသက် (၁၈၅) နှစ်၊ (၁၁) လ နှင့် (၆) ရက် တွင် သေဆုံးသွားခဲ့သည်။]
[...]
...