အခန်း ၅၅ : အသက်ရှင်ရန် မျှော်လင့်ချက် မရှိတော့သည့် ရွေးချယ်ခံ ချင်းကျောက်
သူမ အံကြိတ်ပြီး မုန်းတီးရတဲ့ ဝိညာဉ်ဓားဂိုဏ်း သူတော်စင်မ အကြောင်း ချင်းကျောက်ရုတ်တရက် တွေးမိသွားခဲ့သည်။ သူမက (၁၉) နှစ်ပဲ ရှိသေးကာ အခြေတည်အဆင့် (၂) ကို ရောက်နေပေပြီ။
ထို့ကြောင့် ချင်းကျောက် စိတ်ပျက်နေခဲ့၏။ အကယ်၍ သူမသာ ငယ်ငယ်လေးကတည်းက ကြေးဝါရောင် တံခါးကြီး အတွင်းဘက်မှာ ကျင့်ကြံခဲ့ရမယ် ဆိုရင် ပြီးတော့ သူမရဲ့ မွေးရာပါ ဝိညာဉ်ခန္ဓာနဲ့ ကိုယ်ပိုင်ကျင့်ကြံခြင်း အရိုးအခြေခံအုတ်မြစ်တို့ ပေါင်းစပ်လိုက်မယ် ဆိုရင်...
ဒါ့အပြင် သူမရဲ့ ဝိညာဉ်စွမ်းအားကို အဘွားအိုဆီ ခွဲဝေပေးပြီး ပြုစုပျိုးထောင်ပေးစရာ မလိုခဲ့ဘူး ဆိုရင်...
သူမ အသက် (၁၅) နှစ်မှာတင် အခြေတည်အဆင့်ကို ရောက်နိုင်လောက်ပေသည်။
"သောက်ကျိုးနည်း... ဘာလို့ ဒီအကြောင်း တွေးနေရတာလဲ... ငါ့မှာ မသေမျိုးကျင့်ကြံခြင်း သရုပ်ဖော် စနစ် ရှိနေတာပဲ... ချန်ချန်ရွှယ်ကို ကျော်တက်နိုင်ဖို့က သေချာနေပြီ မဟုတ်လား.... သူမက ဝိညာဉ်ဓားဂိုဏ်းရဲ့ သူတော်စင်မ တစ်ယောက်ပဲကို သူ့မှာ ဘာများ ထူးခြားနေလို့လဲ"
ချင်းကျောက် သူမခေါင်းထဲက အာရုံလွဲစေတဲ့ အတွေးတွေကို ဖယ်ရှားပစ်လိုက်၏။
ထို့နောက် သူမဟာ ပတ်ဝန်းကျင်ကို လေ့လာကြည့်လိုက်ပေသည်။
ရုတ်တရက် သူမ အကြည့်က နေရာတစ်နေရာမှာ စွဲမြဲသွားပြီး သူမရဲ့ အသက်ရှူနှုန်းက မြန်ဆန်လာခဲ့သည်။
"ဒါက..."
သူမအကြည့်နောက် လိုက်ကြည့်လိုက်တော့ မြေကြီးပေါ်မှာ ပေါက်နေတဲ့ ထူးဆန်းတဲ့ ပုံစံနဲ့ အပင်တစ်ပင်ကို တွေ့လိုက်ရ၏။
၎င်းအပင်က ဆန်စေ့လောက်ပဲ အရွယ်အစား ရှိပြီး သူ့ပုံစံက အလွန် ထူးဆန်းကာ တစ်ပင်လုံး တောက်ပတဲ့ အနီရောင် ဖြစ်နေခဲ့သည်။
၎င်းက ထူးခြားစွာ မျက်စိပသာဒ ဖြစ်နေစေခဲ့သည်။
ထို့အပြင် ထိပ်မှာ အစိမ်းရောင် အသီးလေး တစ်လုံး တွဲလောင်းကျနေခဲ့ပြီး အသီးက စပျစ်သီးလောက် အရွယ်အစား ရှိကာ အသီး၏ အရောင်က အဖြူရောင် ဖြစ်လေသည်။
ဒီအရာကို မြင်လိုက်တော့ ချင်းကျောက် အံ့သြစွာ မအော်မိအောင် မနည်းထိန်းထားလိုက်၏။
"ဒါ ဝိညာဉ်ခုတ်ဖြတ် မြက်ပင်ပဲ..."
ချင်းကျောက်က သူမအဘွားဆီကနေ ဆေးဖော်စပ်ခြင်း ပညာကို အချိန်အကြာကြီး သင်ယူခဲ့တာကြောင့် ဆေးဖော်စပ်ဖို့ လိုအပ်တဲ့ ဝိညာဉ်ဆေးပင်တွေ အများကြီးကို သူမ သဘာဝကျကျ သိနေခဲ့သည်။ ချင်းကျောက်ဟာ ဝိညာဉ်ဆေးပင် ထောင်ပေါင်းများစွာကို အလွတ်ကျက်မှတ်ထားခဲ့လေသည်။
အဲဒီအထဲမှာ သာမန် ဝိညာဉ်ဆေးပင်တွေ ရှိသလို နှစ်တစ်ထောင်မှ တစ်ခါ တွေ့ရခဲတဲ့ ရှားပါး ဝိညာဉ်ဆေးပင်တွေလည်း ပါ၏။
သူမရှေ့က ဝိညာဉ်ခုတ်ဖြတ်မြက်ပင်က အလွန် ရှားပါးပေသည်။ ဘယ်လောက် ရှားပါးလဲ ဆိုရင် နှစ်တစ်ထောင်နေလို့ တစ်ပင် ရှာတွေ့ချင်မှ တွေ့နိုင်မှာဖြစ်ပြီး နှိုင်းယှဉ်လို့ မရနိုင်အောင် တန်ဖိုးကြီးမားလှသည်။
အကယ်၍ သူမသာ ဒါကို ခူးပြီး နားလည်တတ်ကျွမ်းတဲ့ ကျင့်ကြံသူ တချို့ကို ရောင်းလိုက်ရင် အနည်းဆုံး အလယ်လတ် ဝိညာဉ်ကျောက်တုံး ရာပေါင်းများစွာနဲ့ ရောင်းလို့ ရနိုင်ပေသည်။
ချင်းမိသားစု တစ်ခုလုံးရဲ့ ပိုင်ဆိုင်မှုကတောင်ထိုမျှ မရှိချေ။
ဒါပေမဲ့ နောက်တစ်ခဏမှာပဲ ချင်းကျောက်ရဲ့ အာရုံစိုက်မှုက တခြားအရာ တစ်ခုဆီ ရောက်သွားခဲ့သည်။ ဝိညာဉ်ခုတ်ဖြတ် မြက်ပင်နဲ့ မနီးမဝေးမှာ သိပ်ထူးဆန်းတဲ့ ပုံစံနဲ့ နောက်ထပ် ဝိညာဉ်ဆေးပင် တစ်ပင် ရှိနေတာ သူမ သတိထားမိလိုက်၏။ ချက်ချင်းပဲ သူမ မျက်လုံးတွေ ပြူးကျယ်သွားပြီး စိတ်လှုပ်ရှားကာ တုန်ရီလာခဲ့သည်။
"ရှေးဦးမသေမျိုး ဂျင်ဆင်း"
သူမ အကြည့်က တခြားတစ်နေရာဆီ ထပ်ပြောင်းသွားခဲ့ပြီး ပါးစပ်ပင် မပိတ်နိုင်တော့ချေ။
"ရွှေရောင် လင်းဇီး"
"လမင်းသစ်ပင် "
"..."
တစ်ချက်ကြည့်လိုက်ရုံနဲ့တင် သူမဟာ အလွန် တန်ဖိုးကြီးတဲ့ ဝိညာဉ်ဆေးပင် ဒါဇင်ပေါင်းများစွာကို တွေ့ရှိလိုက်ရသည်။
ဒါ့အပြင် တချို့ ဝိညာဉ်ဆေးပင်တွေက ပုံမှန်မဟုတ်မှန်း သိသာနေပေမယ့် သူမ မသိဘူး ဖြစ်နေတာလည်း တွေ့လိုက်ရ၏။
ဒီဝိညာဉ်ဆေးပင်တွေက ရှေးဟောင်း မှတ်တမ်းတွေထဲမှာ မပါဝင်တာလား ဒါမှမဟုတ် သူမ သက်ဆိုင်ရာ ရှေးဟောင်း မှတ်တမ်းတွေကို မဖတ်ဖူးသေးတာလားပင်။
ထိုအချိန်၌ သူမ စိတ်ထဲမှာ အတွေးတစ်ခုတည်းပဲ ရှိတော့ပေသည်။
၎င်းက 'ငါ ချမ်းသာပြီဟေ့..'
အကယ်၍ ငါ ဒီဝိညာဉ်ဆေးပင်တွေ အကုန်လုံးကို ထုပ်ပိုးပြီး ယူသွားလိုက်ရင် ဒီသရုပ်ဖော် ဘဝရဲ့ ဆုလာဘ် တွက်ချက်မှုမှာ ဒီဝိညာဉ်ဆေးပင်တွေထဲက အနည်းငယ်ကို ရနိုင်ဖို့ အခွင့်အရေး များပေသည်။
ချင်းကျောက် ပြေးသွားပြီး ဝိညာဉ်ဆေးပင်တွေကို သူမအိတ်ထဲ ထည့်ဖို့ ပထမဆုံး ခြေလှမ်း လှမ်းလိုက်ချိန်မှာပဲ သူမ မျက်နှာအမူရာက ရုတ်တရက် ပြောင်းလဲသွားခဲ့ပြီး ရင်ထဲမှာ သတိပေးခေါင်းလောင်းသံတို့ မြည်ဟည်းသွားခဲ့သည်။
"မကောင်းတော့ဘူး.... သွားပြီ..."
သူမ အဘွားအိုနဲ့ ဆက်သွယ်လို့ မရတော့ရာအခြေတည်အဆင့် (၁) ကျင့်ကြံမှုနဲ့ ကြေးဝါရောင် တံခါးကြီး အတွင်းဘက်က ကမ္ဘာမှာ ဘယ်နေရာမှာ အစီအရင်ရှိ၊မရှိဆိုသည်အား သူမ မမြင်နိုင်ပေ။
ဒါက သေစေနိုင်လောက်ပေသည်။
[သင်သည် သတ်ဖြတ်ခြင်း အစီအရင်တစ်ခုကို အသက်သွင်းမိလိုက်ပါသည်။ သင် ဘယ်လို သေသွားမှန်းတောင် သတိမထားမိလိုက်ခင်မှာပဲ အသိစိတ် အားလုံး ပျောက်ဆုံးသွားခဲ့သည်။ ဖြစ်နိုင်တာက ကြေးဝါရောင် တံခါးကြီး အတွင်းဘက်က အစီအရင် ဖွဲ့စည်းပုံတွေက အာလူးကြော်အိတ်ထဲက လေလိုပဲ နေရာတိုင်းမှာ ပြည့်နှက်နေတာ ဖြစ်နိုင်သည်.....]
[သင် သေဆုံးသွားပါသည်]
[အသက် - ၂၅ နှစ်၊ ၀၉ လ၊ ၁၈ ရက်]
...
ချင်းဟယ် ခရိုင်ရှိ တည်းခိုခန်း တစ်ခု၌...
ချင်းကျောက်ဟာ ကုတင်ပေါ်မှာ ကူကယ်ရာမဲ့စွာ လဲလျောင်းနေခဲ့သည်။ သူမ၏ ခြေထောက်တွေက တုန်ရီနေခဲ့ပြီး မျက်လုံးတွေက အရောင်အဆင်း ကင်းမဲ့နေခဲ့သည်။ မျှော်လင့်ချက်တွေကို ဆုံးရှုံးလိုက်ရတဲ့ တစ်ဖက်သတ်ချစ်ကြိုက်နေတဲ့ လူတစ်ယောက်လိုပင်.......
"ဝိညာဉ်ဆေးပင်တွေ... ငါ့ရဲ့ ဝိညာဉ်ဆေးပင်တွေ... အကုန် ပျောက်သွားပြီ..."
"အကုန် ပျောက်သွားပြီ..."
"အား..."
"ငါ သိပ်ဒေါသထွက်တာပဲ......"
သူမ ကိုယ်ကို လှိမ့်လိုက်ပြီး စောင်ထဲမှာ မျက်နှာအပ်ထားလိုက်၏။ အချိန်အကြာကြီး အသက်အောင့်ထားပြီးနောက် နောက်ဆုံးတော့ သူမ စိတ်တည်ငြိမ်သွားပြီး ပြန်ထထိုင်လိုက်သည်။
ကျင်းရှင်း နန်းတော်မှာ ရှိတုန်းက အစီအရင် ပညာရပ်ကို ဘာလို့ ပိုမလေ့လာခဲ့မိတာလဲ ဆိုပြီး သူမဟာ နောင်တရနေမိလေသည်။
အကယ်၍ အဘွားအိုရဲ့ သတိပေးချက် မလိုအပ်ဘဲ တံခါးကြီး အတွင်းဘက်က အစီအရင်တွေကို သူမ ရှာဖွေတွေ့ရှိနိုင်ခဲ့မယ် ဆိုရင် သူမဟာ အစီအရင်ကြောင့် သေဆုံးမှာ မဟုတ်ပေ။
ဒါဆိုရင် သူမ အတွင်းဘက်မှာ စိတ်ကြိုက် လုယက်နိုင်တော့ပေမည်။
'သောက်ကျိုးနည်း...'
ဒါပေမဲ့ ဒီအခြေအနေ အတွက် ဘယ်သူ့ကို အပြစ်တင်နိုင်မည်နည်း။ ချင်းကျောက်ဟာ ဝမ်းနည်းစွာ သဘောပေါက်လိုက်တာက သူမ ကိုယ့်ကိုယ်ကိုယ်သာ အပြစ်တင်ရပေမည်။ ဒါပေမဲ့ သူမ ကိုယ့်ပါးကိုယ် ပြန်ရိုက်ကာ ဆုံးမ၍တော့ မဖြစ်ပေ။
"ဟူး... မနက်ဖြန်ကျရင် စီနီယာဆီကနေ အစီအရင် ပညာရပ်ကို သင်ယူရမယ်"
ချင်းကျောက် ရည်ညွှန်းတဲ့ စီနီယာဆိုတာ သဘာဝကျကျပင် သူမနဲ့ အတူပါလာတဲ့ အဘွားအိုဖြစ်၏။
...
[သင် ဖိတ်ကြားထားသော ရွေးချယ်ခံ ချင်းကျောက် သည် ဤ မသေမျိုးကျင့်ကြံခြင်း သရုပ်ဖော် ဘဝတွင် (၂၅) နှစ်၊ (၀၉) လ နှင့် (၁၈) ရက်တိုင်တိုင် အသက်ရှင် နေထိုင်ခဲ့ပါသည်။ သင်သည် အောက်ပါ ဆုလာဘ်များကို ရရှိလိုက်သည် - ]
[ဆုလာဘ် ၁ - (၁၅) နှစ်တာ ဆေးဖော်စပ်ခြင်း အတွေ့အကြုံ (အသက် ၁၀ နှစ်မှ ၂၅ နှစ်အထိ ချင်းကျောက်၏ ဆေးဖော်စပ်ခြင်း အတွေ့အကြုံ)]
[ဆုလာဘ် ၂ - မီးပိုးချည် အတွင်းခံအင်္ကျီ (ချင်းကျောက် မသေခင် ဝတ်ဆင်ထားသော ကိုယ်ကျပ်အင်္ကျီ.....)]
[ဆုလာဘ် ၃ - သာမန် ဆေးပေါင်းဖို (စာသားအတိုင်း သာမန်ပဲ.....)]
ဒီတစ်ခါ ချင်းကျောက် ဘာအောင်မြင်မှုမှ အသက်မသွင်းနိုင်ခဲ့ချေ။ ဒါ့အပြင် ဒီတစ်ခါ သူမရဲ့ သရုပ်ဖော် မသေမျိုးကျင့်ကြံခြင်း ဘဝ လမ်းကြောင်းက ပြီးခဲ့တဲ့ အကြိမ်နဲ့ တူနေခဲ့လေသည်။
ရလဒ်အနေနဲ့ ဆုလာဘ် တွက်ချက်မှုကလည်း သိပ်ကြည့်ကောင်းမနေခဲ့ပေ။
ပိုင်ယီ ချက်ချင်းပဲ ဆုလာဘ် (၁) ကို ရွေးချယ်လိုက်၏။
တခြား ရွေးချယ်စရာ မရှိပဲ ဆုလာဘ် (၃) ခု ထဲမှာ ဒါတစ်ခုပဲ ပိုပုံမှန်ဖြစ်မယ် ထင်ရ၏။
ဒါကလွဲရင် ဘာမှ သိပ်မရှိပေ။
အထူးသဖြင့် အဲဒီ ပိုးချည် အတွင်းခံအင်္ကျီ.... သူက တနှာရူးသူ တစ်ယောက် မဟုတ်ရာ ဘာသုံးလို့ ရမည်နည်း။
ဆေးဖော်စပ်ခြင်း အတွေ့အကြုံကို ရရှိပြီးနောက် ပိုင်ယီ ခံစားမိတာက သူ့ကို ဆေးပေါင်းဖို တစ်လုံးနဲ့ ဝိညာဉ်ဆေးပင် တချို့ ပေးလိုက်ရင် သူ အလုပ်ပြောင်းပြီး ဆေးဖော်စပ်သူ တစ်ယောက် လုံးဝ လုပ်လို့ ရမည်ဆိုတာပင်။
ပိုင်ယီ ခေါင်းခါလိုက်၏။ ဒီနေ့ ဆုလာဘ်တွေ အတွက် ချင်းကျောက်ကို အားကိုးလို့ မရတော့ရာ သူ့အကြည့်က ချန်ချန်ရွှယ်ဘက်ဆီ ရောက်သွားခဲ့သည်။
ချန်ချန်ရွှယ်နဲ့ ချင်းကျောက်က မသေမျိုးကျင့်ကြံခြင်း သရုပ်ဖော် စနစ်ထဲ တပြိုင်နက်တည်း ဝင်သွားခဲ့ကြခြင်းပင်။
ထို့ကြောင့် ချန်ချန်ရွှယ် ဘက်၌လည်း အနှစ် (၂၀) ပဲ ရှိသေးလေသည်။
[အသက် ၂၇ နှစ် - ကောင်းကင်ဂိုဏ်းမှ ချန်ချန်ရွှယ်သည် သူမ၏ ယခင် သရုပ်ဖော် မသေမျိုးကျင့်ကြံခြင်း ဘဝကလို ဂိုဏ်းချုပ်ကြီး၏ တပည့် ဖြစ်ဖို့ မရွေးချယ်ခဲ့ပေ။ ထိုအစား သူမဟာ ဟိုရင်းယွမ်ကို ခေါ်ဆောင်ပြီး မိစ္ဆာချုပ်လှောင် မျှော်စင်ကို စောင့်ကြပ်သော ကောင်းကင်ဂိုဏ်း အကြီးအကဲ၏ တပည့် ဖြစ်ရန် ရွေးချယ်လိုက်သည်။ ဒါက အကြီးအကဲကို အလွန် အံ့အားသင့်သွားစေခဲ့သည်။ သူက နှစ်ပေါင်း ရာချီကြာအောင် တပည့် လက်မခံခဲ့ပေမဲ့ ချန်ချန်ရွှယ်၏ ရိုးသားမှုက သူ့အ စိတ်လှုပ်ရှားစေခဲ့သည်။ ထို့ကြောင့် သူဟာ ချန်ချန်ရွှယ်နှင့် ဟိုရင်းယွမ်ကို သူ့တပည့်များ အဖြစ် လက်ခံလိုက်သည်။]
[ဘယ်သူမှ ဒီနေရာကို မလာရဲကြသောကြောင့် ဂိုဏ်းထဲက အကြီးအကဲ တချို့က မိစ္ဆာချုပ်လှောင် မျှော်စင် စောင့်ကြပ်တဲ့ အကြီးအကဲမှာ တပည့် (၂) ယောက် ရသွားမှန်း မသိကြပေ။ သူတို့ထဲမှာ ကျင့်စဉ်တန်ပြန်မှုကြောင့် ဖြေရှင်းနည်း ရှာဖို့ စိတ်ပူနေတဲ့ အကြီးအကဲ ယွဲ့လည်း ပါလေသည်။]
[အသက် ၅၀ နှစ် - ချန်ချန်ရွှယ်နှင့် ဟိုရင်းယွမ် တို့သည် သူတို့၏ ကောင်းမွန်သော ကျင့်ကြံခြင်း စိတ်ဓာတ်နှင့် ထူးကဲသော ပါရမီကို အားကိုးပြီး ဆရာသခင် သင်ပေးသမျှ အကုန်လုံးကို သင်ယူနိုင်ခဲ့သည်။ ဒီအခွင့်အရေးကို ယူပြီး မိစ္ဆာချုပ်လှောင် မျှော်စင်၏ တံဆိပ်ခတ်ထားမှု လျော့ရဲနေပုံရကြောင်း ချန်ချန်ရွှယ် ထောက်ပြလိုက်ရာ သူမဆရာသခင်က အထူးတလည် စစ်ဆေးကြည့်ရှုခဲ့သည်။]
[ချန်ချန်ရွှယ်၏ ဆရာသခင် ဘာသဲလွန်စမှ မတွေ့ရှိခဲ့ပေ။ ဒါက သူမကို ဖြစ်နိုင်ချေ မရှိဘူးလို့ ခံစားရစေသည်။]
[အသက် ၈၀ နှစ် - မိစ္ဆာချုပ်လှောင် မျှော်စင်၏ တံဆိပ်ခတ်ထားမှု လျော့ရဲနေသလား စစ်ဆေးပေးရန် ချန်ချန်ရွှယ် သူမဆရာသခင်ကို နောက်တစ်ကြိမ် ထပ်မေးလိုက်သည်။ ဆရာသခင်က သူ့တပည့် သိပ်ပြီး သတိကြီးလွန်းနေတယ်လို့ ခံစားမိသော်လည်း စစ်ဆေးပေးလိုက်သည်။]
[ချန်ချန်ရွှယ် ပြောတာ မှန်နေလိမ့်မယ်လို့ ဘယ်သူ ထင်ထားမည်နည်း]
[တံဆိပ်ခတ်ထားမှု လျော့ရဲနေပေပြီ]
[...]