အခန်း ၅၁ : မြင့်မြတ်သောနှလုံးသား နန်းတော်၊ ချင်းဟယ်အတွင်း ပုန်းခိုနေကြသော မိစ္ဆာကျင့်ကြံသူများ
ပိုင်ယီဟာ အမှုနှိမ်နင်းရေးမှူး ဟယ် ကို အိမ်ထဲဖိတ်ပြီး လက်ဖက်ရည် တိုက်ချင်ခဲ့ပေမယ့် တစ်ဖက်လူက ခေါင်းခါပြီး ငြင်းပယ်လိုက်သည်။ အမှုနှိမ်နင်းရေးမှူး ဟယ် က ရှင်းပြလိုက်၏ "ကျွန်တော်က ကျင့်ကြံသူပိုင်ကို ကိစ္စတစ်ခု အသိပေးဖို့ လာတာပါ... လက်ဖက်ရည် သောက်ဖို့ မလိုပါဘူး"
"ခဏနေရင် ကျွန်တော် ချင်းဟယ် ခရိုင်ထဲက တခြား လေလွင့်ကျင့်ကြံသူတွေနဲ့ တောင်အောက်ဆင်းပြီး လေ့ကျင့်နေတဲ့ ဂိုဏ်းကျင့်ကြံသူ တချို့ကို သွားအသိပေးရဦးမှာ"
'အို....
လီမျိုးနွယ်စု ကိစ္စကြောင့် မဟုတ်ဘူးလား...'
ပိုင်ယီ စူးစမ်းလိုစိတ်နဲ့ မေးလိုက်၏။ "ဘာကိစ္စများလဲ"
အမှုနှိမ်နင်းရေးမှူး ဟယ် က သူ့မျက်နှာကို တည်လိုက်ပြီး လေးနက်တဲ့ လေသံနဲ့ ပြန်ဖြေလိုက်သည်။ "ကျင့်ကြံသူပိုင်... ဒီကိစ္စကို ကျင့်ကြံသူတွေကိုပဲ ပြောပြမှာပါ... မလိုလားအပ်တဲ့ ထိတ်လန့်မှုတွေ မဖြစ်အောင် ကျင့်ကြံသူပိုင် အနေနဲ့ ဒီသတင်းကို သာမန် ပြည်သူလူထုကို ထုတ်မပြောဖို့ မျှော်လင့်ပါတယ်"
"လွန်ခဲ့တဲ့ ရက်ပိုင်းက နန်းတော်က မြင့်မြတ်သော နှလုံးသား နန်းတော်လို့ ခေါ်တဲ့ မိစ္ဆာဂိုဏ်း အင်အားစု တစ်ခုကို ရှာဖွေတွေ့ရှိခဲ့ပြီး သူတို့ရဲ့ ကာလရှည် စီမံကိန်းကို ဖျက်ဆီးပစ်ခဲ့တယ်.... နန်းတော်က ကျွမ်းကျင်သူ အမြောက်အမြား စေလွှတ်ပြီး မြင့်မြတ်သော နှလုံးသား နန်းတော်က မိစ္ဆာတွေကို တစ်ယောက်ချင်းစီ လိုက်လံ သတ်ဖြတ်ခဲ့တယ်"
"ဒါပေမဲ့ အဲဒီ မိစ္ဆာတွေရဲ့ ခွန်အားကို လျှော့တွက်လို့ မရဘူး... နန်းတော်က စေ့စပ်သေချာတဲ့ အစီအစဉ် ဆွဲထားရင်တောင် လွတ်မြောက်သွားတဲ့ မိစ္ဆာတွေ အများကြီး ရှိနေသေးတယ်"
"ပြီးတော့ မြင့်မြတ်သောနှလုံးသား နန်းတော်က မိစ္ဆာ တစ်စိတ်တစ်ပိုင်းက ချင်းဟယ် ခရိုင် ဘက်ကို ထွက်ပြေးလာကြတယ်"
"ဒါကြောင့် ချင်းဟယ် ခရိုင် အတွင်းမှာ မိစ္ဆာကျင့်ကြံသူတွေ ပုန်းခိုနေတယ်လို့ ခရိုင်ရုံးက သံသယ ရှိနေတယ်"
အမှုနှိမ်နင်းရေးမှူးဟယ် စကားရပ်လိုက်ပြီး ပိုင်ယီကို စောင့်ကြည့် အကဲခတ်နေခဲ့သည်။
ဒါက သူ့ရဲ့ မျက်နှာထားကို စောင့်ကြည့် အကဲခတ်နေသလိုပင်။
ပိုင်ယီက ဘာထူးခြားတဲ့ မျက်နှာအမူရာမှ မပြတာ သတိထားမိတဲ့အခါ အမှုနှိမ်နင်းရေးမှူး ဟယ် ဆက်ပြောလိုက်သည်။ "နန်းတော်က ကျွမ်းကျင်သူတွေရဲ့ ဝိုင်းရံပိတ်ဆို့မှုကနေ လွတ်မြောက်လာတဲ့ မိစ္ဆာတွေက အနည်းနဲ့အများ ဒဏ်ရာရထားကြပေမယ့် သူတို့က အလွန် အန္တရာယ်များတဲ့ သူတွေ ဖြစ်နေတုန်းပဲ"
"သူတို့ထဲမှာ အခြေတည်အဆင့်မိစ္ဆာတွေ ပါလာဖို့ ဖြစ်နိုင်ချေ သိပ်များတယ်.... မြင့်မြတ်သောနှလုံးသား နန်းတော်က မိစ္ဆာတွေက ကိစ္စတစ်ခုခု လုပ်ရင် သိပ်ကို အစွန်းရောက်တတ်ကြပြီး သူတို့ လေ့ကျင့်တဲ့ ကျင့်စဉ်တွေက ဥပဒေနဲ့ ကိုယ်ကျင့်တရားတွေကို ချိုးဖောက်ထားတာ"
"လီမျိုးနွယ်စုမှာ ဖြစ်ပျက်ခဲ့တဲ့ ကပ်ဘေး အကြောင်း ကျင့်ကြံသူပိုင် ကြားဖူးမှာပါ... လီမျိုးနွယ်စု ခေါင်းဆောင်ကို သတ်ဖြတ်ခဲ့တဲ့ လျှို့ဝှက်ဆန်းကြယ် မသေမျိုးကျင့်ကြံသူက မြင့်မြတ်သော နှလုံးသား နန်းတော်က လူတစ်ယောက် ဖြစ်နိုင်ချေ များတယ်လို့ ခရိုင်ရုံးက ခန့်မှန်းထားပါတယ်"
ထိုစကားကြောင့် ပိုင်ယီ အတွေးနက်သွား၏။
'အာ... ဒါက..
လီမျိုးနွယ်စု ခေါင်းဆောင်ကို သတ်ခဲ့တဲ့ မသေမျိုးကျင့်ကြံသူက သူလေ..... လူသတ်သမားက မြင့်မြတ်သောနှလုံးသား နန်းတော်က မိစ္ဆာကျင့်ကြံသူ တစ်ယောက် ဖြစ်မယ်လို့ ချင်းဟယ် ခရိုင်ရုံးက တကယ် ခန့်မှန်းထားတာလား...'
ခက်ခက်ခဲခဲ ထွက်ပြေးလွတ်မြောက်လာတဲ့ အဲဒီ မိစ္ဆာကျင့်ကြံသူတွေက သူ့အစား တိုက်ရိုက် ခေါင်းခံပေးလိုက်တာပင်။
အမှုနှိမ်နင်းရေးမှူးဟယ် က သူ ဘာတွေ တွေးနေလဲ မသိချေ။ သူ့မျက်နှာက လေးနက်နေတုန်းဖြစ်ပြီး သူက သိပ်အလေးအနက် ထားတတ်တဲ့ လူတစ်ယောက်ပင်။သူ ဆက်ပြောလိုက်၏။ "အကယ်၍ ကျင့်ကြံသူပိုင် အနေနဲ့ မြင့်မြတ်သောနှလုံးသား နန်းတော်က မိစ္ဆာတွေနဲ့ တွေ့ခဲ့ရင် ရန်သွားမစတာ အကောင်းဆုံးပါပဲ.. ဒီအစား ခရိုင်ရုံးကို အကြောင်းကြားဖို့ အခွင့်အရေး ရှာပါ"
"အဲဒီအချိန်ကျရင် ခရိုင်ရုံးက မြို့တော်က စွမ်းအားကြီး ကျင့်ကြံသူတွေကို ဆက်သွယ်လိုက်ပါ့မယ်"
"ပြီးတော့ မိစ္ဆာတွေကို လာရောက်ပြီး လုံးဝ သုတ်သင်ခိုင်းလိုက်မယ်"
ထင်ထားတဲ့ အတိုင်းပင် လက်တွေ့က ကျင့်ကြံခြင်း လောကကလည်း သရုပ်ဖော် စနစ်ထဲက ကျင့်ကြံခြင်း လောကထက် ဘာမှ မလုံခြုံပဲ လက်တွေ့မှာလည်း အလွန် အန္တရာယ် များပေသည်။
ဒါပေမဲ့... အန္တရာယ်က လာနေပေပြီ။
ပိုင်ယီဟာ နန်းတော် အကြောင်း သိပ်မသိပေမယ့် နန်းတော်မှာ နက်ရှိုင်းတဲ့ အခြေခံအုတ်မြစ်ရှိမှန်း သိပေသည်။ နန်းတော်က ကျင့်ကြံသူတွေက ဂိုဏ်းတွေက ကျင့်ကြံသူတွေထက် အားမနည်ချေ။
ဘာပဲဖြစ်ဖြစ် အကယ်၍ နန်းတော်က ကျင့်ကြံသူတွေသာ သိပ်အားနည်းနေရင် ဒီလောက်များတဲ့ ကျင့်ကြံခြင်း ဂိုဏ်းတွေကို သူတို့ ဘယ်လို ထိန်းချုပ်နိုင်မည်နည်း။
စစ်မှန်သောကျင့်ကြံခြင်း ဂိုဏ်းတွေပဲ ဖြစ်ဖြစ် မိစ္ဆာလမ်းစဉ်ကျင့်ကြံခြင်း ဂိုဏ်းတွေပဲ ဖြစ်ဖြစ် သူတို့ အားလုံး နန်းတော်ရဲ့ ထိန်းချုပ်မှုကို ခံထားရသည်ပင်။
ဒါကို ကြည့်ရင် နန်းတော်က ဘယ်လောက် စွမ်းအားကြီးလဲ ဆိုတာ မြင်နိုင်ပေသည်။
ယခု၌ မြင့်မြတ်သောနှလုံးသား နန်းတော် လို့ ခေါ်တဲ့ အဲဒီ မိစ္ဆာဂိုဏ်းက နန်းတော်ရဲ့ ဝိုင်းရံပိတ်ဆို့မှုကနေ လွတ်မြောက်နိုင်ခဲ့၏။ ဆိုလိုတာက မြင့်မြတ်သော နှလုံးသား နန်းတော်က ဝိညာဉ်ဓားဂိုဏ်းတို့၊ ကျင်းရှင်း နန်းတော်တို့လောက် မနိမ့်ကျတဲ့ အင်အားစု တစ်ခု ဖြစ်နိုင်ချေ များပေသည်။
ဒီလို အန္တရာယ်ရှိတဲ့ မိစ္ဆာလမ်းစဉ်က လူတွေ ချင်းဟယ် ခရိုင်ထဲ စိမ့်ဝင်လာတာဆိုတော့ တကယ်ပဲ ကြီးမားတဲ့ ခြိမ်းခြောက်မှုတစ်ခုပင်။
ဒါ့အပြင် အမှုနှိမ်နင်းရေးမှူးဟယ် ရဲ့ စေ့စေ့စပ်စပ် ကြည့်နေတဲ့ အကြည့်ကို ပိုင်ယီ ခံစားလို့ ရပေသည်။။
အစတုန်းက တစ်ဖက်လူက သူဟာ မြင့်မြတ်သောနှလုံးသား နန်းတော်က အဖွဲ့ဝင် တစ်ယောက်များလား ဆိုပြီး သေချာပေါက် သံသယ ဝင်ခဲ့သည်။
"ဟုတ်ကဲ့ပါ" ပိုင်ယီ ခေါင်းအနည်းငယ် ငြိမ့်ပြလိုက်သည်။ "ဒီကိစ္စကို လာပြောပြပေးတဲ့ အတွက် အမှုနှိမ်နင်းရေးမှူးဟယ် ကို ကျေးဇူးအများကြီး တင်ပါတယ်... အကယ်၍ မိစ္ဆာကျင့်ကြံသူတွေရဲ့ ခြေရာလက်ရာ တွေ့ရင် ကျွန်တော် နန်းတော်ကို သတင်းပို့ပါ့မယ်"
အမှုနှိမ်နင်းရေးမှူးဟယ် ပြန်ပြောလိုက်သည်။ "ကျင့်ကြံသူပိုင် ဒုက္ခပေးသလို ဖြစ်သွားရင် ခွင့်လွှတ်ပါ ကျွန်တော့်ကို ခွင့်ပြုပါဦး... တခြား ကျင့်ကြံသူတွေကို သတင်းသွားပို့ရဦးမှာမို့ပါ"
"..."
အမှုနှိမ်နင်းရေးမှူးဟယ် ထွက်သွားတာကို ကြည့်ရင်း ပိုင်ယီ ခေါင်းထဲမှာ အတွေးပေါင်းစုံ ဖြတ်သန်းသွားခဲ့၏။
အကယ်၍ ကျင့်ကြံခြင်း သရုပ်ဖော် စနစ်သာ မရှိခဲ့ရင် ချင်းဟယ် ခရိုင်ထဲမှာ မိစ္ဆာကျင့်ကြံသူ တစ်ယောက် ပုန်းခိုနေနိုင်တယ် ဆိုတာ သိလိုက်ရုံနဲ့ သူဟာ အမြန် ပြောင်းရွှေ့ပြီး ထွက်ပြေးသွားလောက်ပေသည်။
မိစ္ဆာကျင့်ကြံသူ ဆိုတာ လီမျိုးနွယ်စုလို မဟုတ်ပဲ သူတို့က အများကြီး ပိုကြောက်စရာ ကောင်း၏။
ဒါပေမဲ့ သူ့မှာ မသေမျိုးကျင့်ကြံခြင်း သရုပ်ဖော် စနစ်နဲ့ ရွေးချယ်ခံနှစ်ယောက် ရှိနေတော့ သူ့ရဲ့ စိတ်ဓာတ်က ကွာခြားသွားပေပြီ။
...
တစ်ချိန်တည်းမှာပင် ချင်းဟယ် ခရိုင် တည်းခိုခန်း တစ်ခုတွင်....
သူမရဲ့ မသေမျိုးကျင့်ကြံခြင်း သရုပ်ဖော် ဘဝ ပြီးဆုံးသွားကာစ ချင်းကျောက်ဟာ သူမရင်ထဲက မကျေနပ်မှုနဲ့ စိတ်ဓာတ်ကျမှုတွေကို မေ့ပျောက်နိုင်ဖို့ စားပွဲအပြည့် တည်ခင်းထားတဲ့ အရသာရှိတဲ့ အစားအစာတွေကို ကြိုးကြိုးစားစား စားသောက်နေခဲ့သည်။
အဲဒီ ကြေးဝါရောင် တံခါးကြီးက သူမရဲ့ အတွေးတွေကို ဝင်ရောက်စွက်ဖက်နိုင်မယ်လို့ ဘယ်သူ ထင်ထားမည်နည်း။
ထို့အပြင် သူမ ကိုယ့်ကိုယ်ကိုယ် မထိန်းချုပ်နိုင်ခဲ့ပေ။
အဲဒီတုန်းက သူမနဲ့ အတူပါလာတဲ့ အဘွားအိုက အချိန်မီ သတိပေးခဲ့ပြီး သူမ ရုတ်တရက် သတိပြန်ဝင်လာပေမယ့် အချိန်နှောင်းသွားခဲ့ပေပြီ။
ချင်းကျောက်ဟာ သူမ ဘယ်လို သတ်ဖြတ်ခြင်း အစီအရင်မျိုးကို အသက်သွင်းမိလိုက်မှန်းတောင် မသိလိုက်ချေ။
သူမ ရှင်းပြလို့မရဘဲ သေဆုံးသွားခဲ့လေသည်။
"သောက်ကျိုးနည်း...."
ဒါကို တွေးပြီး ချင်းကျောက် အမဲသား တစ်ဖတ်ကို ပြင်းပြင်းထန်ထန် ဝါးစားလိုက်သည်။ သူမသွားတွေနဲ့ ကြိတ်ချေပစ်ချင်နေသလိုပင်။
ဒီအချိန်မှာ မနီးမဝေးက စားပွဲဝိုင်း တစ်ခုမှာ ချီစုစည်းမှု အဆင့် လေလွင့်ကျင့်ကြံသူ (၂) ယောက်၏ တိုးတိုးလေး ဆွေးနွေးနေတာက သူမအာရုံကို ဆွဲဆောင်သွားခဲ့သည်။
သူမ နားစွင့်လိုက်မိသည်။
"ညီအစ်ကိုမို... ဒီနေ့ ခရိုင်ရုံးက အမှုထမ်းတွေ မင်းကို လာရှာသေးလား"
"အေး လာရှာတယ်.. သူတို့ မြင့်မြတ်သောနှလုံးသား နန်းတော်အကြောင်း ပြောသွားကြတယ်... ငါတို့ ချင်းဟယ် ခရိုင်ထဲမှာ မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေ တကယ် ပုန်းခိုနေတာလားကွ"
"ဘယ်သူ သိမှာလဲ.... ဟူး... ကြားရတာတော့ ဒီမိစ္ဆာတွေက မျက်တောင်မခတ်ဘဲ လူသတ်ကြတာတဲ့... မရေမတွက်နိုင်တဲ့ တာအိုရောင်းရင်းတွေ ဒီမိစ္ဆာတွေရဲ့ လက်ချက်နဲ့ သေဆုံးခဲ့ကြရတာ... ချင်းလို့ ခေါ်တဲ့ တာအိုရောင်းရင်း တစ်ယောက်ကို မင်း သိတယ်မလား... သူက လွန်ခဲ့တဲ့ နှစ်အနည်းငယ်ကမှ ချီစုစည်းမှု အဆင့် (၂) ကို ချိုးဖျက်ဝင်ရောက်နိုင်ခဲ့တာ... ဒါကြောင့် သူ့က ကျင့်ကြံမှုအဆင့်ကို တည်ငြိမ်ဖို့ ဝိညာဉ်ဆေးပင်တွေ သွားရှာမယ် ပြင်ဆင်နေတာလေ... နောက်ဆုံးတော့ မိစ္ဆာကျင့်ကြံသူတွေရဲ့ ချုံခိုတိုက်ခိုက်တာ ခံလိုက်ရပြီး သေသွားရှာတယ်...ပြီးတော့ သူ့ရဲ့ အရေပြားတစ်ခုလုံးတောင် အခွာခံထားရတယ်တဲ့"
"ချင်းဟယ် ခရိုင်က လေလွင့်ကျင့်ကြံသူ အများစုက ချီစုစည်းမှု အဆင့် (၁) နဲ့ (၂) လောက်ပဲ ရှိကြတာကို မိစ္ဆာတွေကို ဘယ်လို ယှဉ်နိုင်မှာလဲ"
"..."
'မြင့်မြတ်သောနှလုံးသား နန်းတော်....'
ချင်းကျောက် မနီးမဝေးက မသေမျိုးကျင့်ကြံသူ (၂) ယောက်ရဲ့ စကားဝိုင်းကို ကြားလိုက်ရာ သူမ မျက်မှောင်ကြုတ်လိုက်၏။
သူမ စိတ်ထဲမှာ မရေရွတ်ဘဲ မနေနိုင်တော့ပေ။ 'ဘာလို့ ဒီနာမည်က ကျင်းရှင်း နန်းတော်နဲ့ သိပ်ဆင်တူနေရတာလဲ... ချင်းဟယ် ခရိုင်မှာ မိစ္ဆာကျင့်ကြံသူတွေ ပုန်းခိုနေမယ်လို့ ငါ ထင်မထားခဲ့ဘူး'
မိစ္ဆာကျင့်ကြံသူတွေ အကြောင်း သူမထက် ပိုသိတဲ့သူ မရှိချေ။
ဘာလို့လဲဆိုတော့... မနေ့က သူမ မသေမျိုးကျင့်ကြံခြင်း သရုပ်ဖော်တုန်းက သူမဟာ မိစ္ဆာကျင့်ကြံသူ အဖြစ် နှစ်အနည်းငယ်လောက် နေထိုင်ခဲ့ပြီး စွမ်းအားကြီးတဲ့ မိစ္ဆာဂိုဏ်းကိုတောင် ဝင်ရောက်ခဲ့ဖူးလေသည်။
အကယ်၍ အဲဒီ မိစ္ဆာကျင့်ကြံသူတွေ ချင်းဟယ် ခရိုင်မှာ တကယ် ပုန်းခိုနေပြီး နန်းတော်က ကျွမ်းကျင်သူတွေရဲ့ လိုက်လံ ဖမ်းဆီးတာကို ရှောင်ရှားချင်တယ် ဆိုရင် သူတို့အတွက် အလုံခြုံဆုံး နေရာက ခရိုင်ရုံးပင်။
ဒါပေမဲ့ အမြဲတမ်းတော့ အဲဒီလို မဟုတ်နိုင်ပဲ မိစ္ဆာကျင့်ကြံသူ အများစုက အစွန်းရောက်တဲ့ အတွေးတွေ ရှိတတ်ပြီး ထူးထူးဆန်းဆန်းတွေ လုပ်တတ်ကြ၏။
သူတို့ တစ်ချက်တစ်ချက် ထဖောက်တာက မဆန်းပေ။
"ငါနဲ့ မတူဘူး... ငါကတော့ တည်တည်ငြိမ်ငြိမ် နေနိုင်တယ်"
အကယ်၍ သူမသာ ချင်းဟယ် ခရိုင်ကို ထွက်ပြေးလာခဲ့ရင် သူမ မတွန့်ဆုတ်ဘဲ ချင်းဟယ် ခရိုင် အစိုးရရဲ့ အာဏာကို ထိန်းချုပ်ပြီး ဒေသန္တရ အစိုးရရဲ့ အာဏာကို အသုံးပြုကာ လူတချို့ရဲ့ မျက်စိတွေ နားတွေကို လှည့်စားပစ်လိုက်မည်ပင်။
ပြီးရင် အမှောင်ထဲမှာ ပုန်းခိုပြီး ဖြည်းဖြည်းချင်း စီစဉ်ကာ သူမ ဒဏ်ရာတို့ သက်သာလာပြီးတဲ့နောက်...
ပြီးရင်...
"အဟွတ် အဟွတ် အဟွတ်...."
ချင်းကျောက် ပြင်းပြင်းထန်ထန် ချောင်းအနည်းငယ် ဆိုးလိုက်ပြီး သူမခေါင်းထဲ ပေါ်လာတဲ့ အစီအစဉ်ကို အမြန် ရပ်တန့်လိုက်ကာ သူမရင်ထဲက အန္တရာယ်ရှိတဲ့ အတွေးတွေကို ဖျောက်ဖျက်ပစ်လိုက်၏။
လက်တွေ့ဘဝမှာ သူမက ဖြောင့်မတ်လမ်းစဥ်မှတစ်ယောက် ဖြစ်ကြောင်း သူမ မေ့လုနီးပါး ဖြစ်သွားခဲ့ရသည်။
သူမစိတ်ထဲမှာ မိစ္ဆာကျင့်ကြံသူ တစ်ယောက်ရဲ့ အတွေးတွေ ဘယ်လိုလုပ် ပြည့်နှက်နေရသည်နည်း။
...