အခန်း ၅၀ : ကျင့်ကြံခြင်းလောက၏ နန်းတော်နှင့် ပထမဆုံး အဆက်သွယ် ပြုလုပ်ခြင်း၊ အမှုနှိမ်နှင်းရေးမှုး ဟယ်
[အသက် ၂၁ နှစ် - ချင်းမိသားစုက နေထိုင်စရာ နေရာသစ် တည်ဆောက်ဖို့ အလုပ်ရှုပ်နေချိန်မှာ သင်ကတော့ ဝိညာဉ်စွမ်းအင် ပေါကြွယ်ဝတဲ့ လူသူကင်းမဲ့သော ကျွန်းကို ပျော်ရွှင်စွာ ရှာဖွေနေခဲ့သည်။ ရုတ်တရက် ကံကောင်းကာ ပင်လယ်နက်ထဲမှာ ထူးဆန်းတဲ့ နေရာတစ်ခုကို သင် ရှာတွေ့ခဲ့သည်။]
ရေရှောင်ရှားခြင်း အစီအရင်ကို အသက်သွင်းထားတဲ့ ချင်းကျောက်ဟာ ပျော့ပျောင်းတဲ့ ငါးလေး တစ်ကောင်လို ရေထဲမှာ လွတ်လွတ်လပ်လပ် အသက်ရှူနိုင်ခဲ့လေသည်။
ဒီအခိုက်အတန့်မှာ သူမရဲ့ မျက်လုံးတွေ ပြူးကျယ်နေပြီး အံ့သြတုန်လှုပ်တဲ့ မျက်နှာထားနဲ့ သူမရှေ့က အရာကို စိုက်ကြည့်နေခဲ့သည်။
မှိန်ဖျဖျ လင်းနေတဲ့ ရေအောက် ကျောက်တောင်ကြီး တစ်လုံးပေါ်မှာ တည်ရှိနေတဲ့ ကြေးဝါရောင် တံခါးတစ်ချပ်အား သူမ မြင်လိုက်ရ၏။
ရှေးကျပြီး ခမ်းနားထည်ဝါတဲ့ ကြေးဝါရောင် တံခါးကြီးက သန္တာကျောက်တန်းတွေနဲ့ခရုခွံတွေ ဖုံးလွှမ်းနေတဲ့ ရေအောက် ကျောက်တောင်ကြီးထဲမှာ မြှုပ်နှံထားသလို တည်ရှိနေခဲ့သည်။
ရံဖန်ရံခါ ပင်လယ်ငါး အနည်းငယ်က ကြေးဝါရောင် တံခါးကြီးနား ဖြတ်ကူးနေခဲ့ကြသည်။ ကြေးဝါရောင် တံခါးကြီးပေါ်မှာ အမှတ်အသား တချို့ ရှိပေမယ့် အချိန်ကာလ ကြာမြင့်မှုကြောင့် အကွက်အပြောက် အမှတ်အသားတွေ ဖုံးလွှမ်းနေခဲ့ပေသည်။
ဒီအမှတ်အသားတွေ အားလုံး ပျက်စီးနေပြီဖြစ်ရာ ကြေးဝါရောင် တံခါးကြီးပေါ်မှာ ဘာတွေ ထွင်းထုထားလဲ ဆိုတာ မြင်ရခက်ခဲလေသည်။
"စီနီယာ... ဒါ ဘာကြီးလဲ"
ချင်းကျောက် အဘွားအိုကို မေးလိုက်၏။ သိသာတာက သူမရှေ့က တံခါးကြီးက သူမရဲ့ ဗဟုသုတ နယ်ပယ်ထဲမှာ လုံးဝ မရှိဘူးဆိုတာပင်။
အဘွားအိုရဲ့ လေသံထဲမှာလည်း မယုံကြည်နိုင်မှုတွေ ပြည့်နှက်နေခဲ့သည်။ ဒီကြေးဝါရောင် တံခါးကြီးရဲ့ ဇာစ်မြစ်ကို သူမ သိပုံရလေသည်။ ဒါပေမဲ့ သူမလေသံထဲမှာ မသေချာမှု အရိပ်အယောင် ပါဝင်နေခဲ့သည်။ "ဘယ်လိုလုပ် ဖြစ်နိုင်မှာလဲ... ရှေးဟောင်း စာအုပ်တချို့ထဲမှာပဲ ဒီလို မှတ်တမ်းမျိုး ဖတ်ဖူးတယ်... ငါ ထင်ခဲ့တာက ရှေးလူကြီးတွေက လုပ်ကြံဖန်တီးထားတာလို့..."
"ကလေးမလေး... မင်း ဒီတံခါးကြီး အကြောင်း ဘယ်သူ့ကိုမှ မပြောနဲ့... ဒီမှာ ဒီလိုအရာမျိုး ရှိမှန်း တခြားသူတွေ သိသွားရင် မင်း ပြောတဲ့ ကြည်လင်သော နေမင်း ဂိုဏ်းထက် အများကြီး ပိုကြောက်စရာ ကောင်းတဲ့ အရာတွေနဲ့ ကြုံတွေ့ရလိမ့်မယ်"
"အပေါ်က ပုံစံတွေကို သေချာမမြင်ရပေမယ့် ဒါက ရှေးခေတ်က ကျန်ရစ်ခဲ့တဲ့ ပစ္စည်းတစ်ခု ဆိုတာ သေချာတယ်"
"ဒီ ကြေးဝါရောင် တံခါးကြီးရဲ့ နောက်ကွယ်မှာ ရှေးခေတ်က စွမ်းအားကြီး ပုဂ္ဂိုလ် တစ်ဦး ချန်ထားခဲ့တဲ့ ဂူတစ်ခု ရှိနိုင်ခြေ သိပ်များတယ်"
ဒါကို ကြားလိုက်ရတော့ ချင်းကျောက် ပါးစပ်အဟောင်းသား ဖြစ်သွားပြီး ဘာပြောရမှန်း မသိတော့ပေ။ "ရှေးခေတ်..."
"အနည်းဆုံး လွန်ခဲ့တဲ့ နှစ်သန်းပေါင်းများစွာ ကပေါ့" အဘွားအို လေးနက်သော အသံဖြင့် ပြောလိုက်၏။
"ရှူး..."
နှစ်သန်းပေါင်းများစွာ.....
ချင်းကျောက် သူမရဲ့ တည်ငြိမ်မှုကို ဆုံးရှုံးလုနီးပါး ဖြစ်သွားခဲ့လေသည်။ ဒါ ဘယ်လောက် ကြီးမားတဲ့ ကိန်းဂဏန်းလဲ ဆိုတာ သူမ စိတ်ကူးကြည့်လို့ မရပေ။
လက်တွေ့ဘဝမှာ သူမ မြင်ဖူးသမျှ အသက်အကြီးဆုံး ကျင့်ကြံသူက မသေမျိုးကျင့်ကြံခြင်း ဂိုဏ်းတစ်ခုက အထွတ်အထိပ် အကြီးအကဲပင်။
ဆံပင်ဖြူဖြူနဲ့ အဲဒီ အဘိုးအို ကျင့်ကြံသူရဲ့ အသက်က (၅၀၀၀) ကျော်နေပြီလို့ သူမအမေ ပြောဖူးလေသည်။
ဒါပေမဲ့... နှစ် (၅၀၀၀) နဲ့ နှစ်သန်းပေါင်းများစွာ ကြားက ကွာခြားချက်က သိပ်ကြီးမားလွန်းပေသည်။
'အဓိက အချက်က စီနီယာ ပြောတာက အနည်းဆုံး နှစ်သန်းပေါင်းများစွာတဲ့.....
ဆိုလိုတာက... နှစ်သန်းပေါင်း ဆယ်ချီလည်း ဖြစ်နိုင်တာပေါ့...'
အခွင့်အရေး......
ကြီးမားတဲ့ အခွင့်အရေးပင်
ချင်းကျောက် အသက်ရှူမြန်လာခဲ့သည်။ သူမရဲ့ စိတ်လှုပ်ရှားမှုကြောင့် သူမရဲ့ ပါးလေးတွေဟာ နီရဲလာခဲ့ပြီး အရက်မူးနေသလို ဖြစ်နေခဲ့သည်။
'အကယ်၍ ဒီငါးတွေက တံခါးကို ထိလို့ရရင် ပြဿနာ မရှိလောက်ပါဘူး... ဒါဆို ငါဝင်လို့ ရမလား စမ်းကြည့်သင့်သလား... '
ဒီအတွေး သူမခေါင်းထဲ ဝင်လာခဲ့ပြီး သူမ တားဆီးလို့ မရတော့ပေ။
ချင်းကျောက်ဟာ သူမရင်ထဲက စိတ်လှုပ်ရှားမှုနဲ့ လောဘတို့အား ခံစားလိုက်ရပြီး သူမ ထိန်းချုပ်နိုင်စွမ်းအောက်က လွတ်ကင်းသွားသလိုပင်။ သေလမ်းကို မရှာသင့်ဘူးလို့ သူမ ခံစားရပေမယ့် သေသွားလည်း ကိစ္စမရှိပါဘူးလို့လည်း ခံစားနေရလေသည်။
"ဟမ်" အဘွားအို တစ်ခုခုကို အာရုံခံမိလိုက်ပုံရပြီး ချင်းကျောက်ရဲ့ ခေါင်းထဲမှာ စိုးရိမ်တကြီး အော်ပြောလိုက်၏။ "အနားမကပ်နဲ့"
[ချင်းကျောက်သည် ကြေးဝါရောင် တံခါးကြီး၏ သတ်ဖြတ်ခြင်း အစီအရင်ကို မတော်တဆ အသက်သွင်းမိလိုက်သည်။]
[ချင်းကျောက် သေဆုံးသွားပါသည်]
[အသက် - ၂၁ နှစ်၊ ၀၃ လ၊ ၁၂ ရက်]
...
[ချင်းကျောက်သည် မသေမျိုးကျင့်ကြံခြင်း သရုပ်ဖော် ဘဝတွင် (၂၁) နှစ်၊ (၀၃) လ နှင့် (၁၂) ရက်တိုင်တိုင် အသက်ရှင် နေထိုင်ခဲ့သည်။ သင်သည် အောက်ပါ ဆုလာဘ်များကို ရရှိလိုက်သည် - ]
[ဆုလာဘ် ၁ - ချင်းမိသားစု၏ နဂါးကုတ်လက်သည်း (ချင်းမိသားစု တပည့်များ မဖြစ်မနေ သင်ယူရသော အသုံးမကျသည့် သိုင်းပညာ....)]
[ဆုလာဘ် ၂ - အဆင့်နိမ့် ဝိညာဉ်ကျောက်တုံး (၅၀) (လက်တွေ့ကမ္ဘာတွင် အသိအမှတ်ပြုထားသော မသေမျိုးကျင့်ကြံခြင်း ငွေကြေး)]
[ဆုလာဘ် ၃ - ရွှေ (၂၀၀၀) (ချင်းကျောက်၏ ငယ်ဘဝ မုန့်ဖိုး)]
"အာ... ဒါက..."
ချင်းကျောက်ရဲ့ ပြီးခဲ့တဲ့ ဆုလာဘ် တွက်ချက်မှုက အလွန် ရက်ရောခဲ့တာကြောင့် ဒီတစ်ခါ သူမရဲ့ စွမ်းဆောင်ရည်ကို ပိုင်ယီ မျှော်လင့်နေခဲ့လေသည်။
နောက်ဆုံးတော့ ထင်ထားတဲ့ အတိုင်းပင်။ သူဟာ ချင်းကျောက်ကို သိပ်မျှော်လင့်ချက် မထားသင့်ချေ။ သူမရဲ့ စရိုက်က အလျှော့ပေးတတ်တဲ့ လူမျိုးပေ။
ဒါ့အပြင် နောက်ဆုံးမှာ တွေ့ခဲ့တဲ့ ကြေးဝါရောင် တံခါးကြီးက ချင်းကျောက်ရဲ့ ဆင်ခြင်တုံတရားကို နှောင့်ယှက်နိုင်တဲ့ ထူးခြားတဲ့ ဆွဲဆောင်မှု တစ်ခုခု ရှိနေပုံရပြီး သူမအား အလကား သေစေခဲ့လေသည်။
ဒီတစ်ခါ ချင်းကျောက်ရဲ့ သေဆုံးမှုက ကလေးကစားစရာလို ဖြစ်နေပြီး ဒီတစ်ခါ သရုပ်ဖော် မသေမျိုးကျင့်ကြံခြင်း ဘဝက ဘာမှ စိတ်လှုပ်ရှားစရာ မရှိတာကြောင့် ဆုလာဘ် တွက်ချက်မှုကလည်း ကြည့်ကောင်းမနေခဲ့ပေ။
ပိုင်ယီဟာ ဆုလာဘ် (၁) ကို လျစ်လျူရှုလိုက်၏။
ဒီကျင့်စဉ်ရဲ့ အဆင့်အတန်းက နိမ့်လွန်းရုံမကပဲ ဆိုးရွားလွန်းပေသည်။
ကျင့်ကြံခြင်း ကျင့်စဉ်တောင် မဟုတ်ပဲ ချင်းမိသားစုရဲ့ မျိုးဆက်သစ် တပည့်တွေ ကိုယ့်ကိုယ်ကိုယ် ကာကွယ်ဖို့ သိုင်းပညာ နည်းနည်းပါးပါး တတ်အောင် သင်ပေးထားတာလောက်ပင်။
ဆုလာဘ် (၃) က ရွှေကို ပိုင်ယီ စိတ်မဝင်စားပဲ အဆင့်နိမ့် ဝိညာဉ်ကျောက်တုံး (၅၀) နဲ့ ယှဉ်ရင် ဒီရွှေနည်းနည်းလေးက သိပ်နည်းလွန်းလေသည်။
"ဝိညာဉ်ကျောက်တုံးတွေ ရှိရင် အနာဂတ်မှာ အခွင့်အရေး ရရင် ကျင့်ကြံသူ တချို့နဲ့ အရောင်းအဝယ် လုပ်လို့ ရတယ်"
"ဆုလာဘ် ၂"
ပြောပြီးတာနဲ့ ပိုင်ယီဟာ ဝိညာဉ်ကျောက်တုံးတွေကို သူ့သိုလှောင်အိတ်ထဲ အမြန် ထည့်လိုက်ပြီး လက်ထဲမှာ တစ်တုံးပဲ ချန်ထားလိုက်သည်။
ဝိညာဉ်ကျောက်တုံး ပတ်လည်မှာ ဝဲပျံနေတဲ့ သန့်စင်တဲ့ ဝိညာဉ်စွမ်းအင်တွေကို ကြည့်ပြီး သဘာဝတရားရဲ့ အံ့ဖွယ် ဖန်တီးမှုအပေါ် ပိုင်ယီ သက်ပြင်းမချဘဲ မနေနိုင်တော့ပေ။
ဝိညာဉ်ကျောက်တုံးတွေက ခဲသွားတဲ့ ဝိညာဉ်စွမ်းအင် တွေနဲ့ တူလေသည်။ ကျင့်ကြံသူတွေ အနေနဲ့ ဝိညာဉ်ကျောက်တုံးတွေကို သုံးပြီး သူတို့ရဲ့ ကျင့်ကြံခြင်း ပတ်ဝန်းကျင်မှာ ဝိညာဉ်စွမ်းအင် ကြွယ်ဝအောင် လုပ်လို့ရသေးပေသည်။
ထို့အပြင် ဝိညာဉ်ကျောက်တုံးတွေကို ဆေးဖော်စပ်ဖို့၊ လက်နက်သွန်းလုပ်ဖို့နဲ့အစီအရင်ခင်းကျင်းဖို့တွေမှာလည်း အသုံးပြုလို့ရလေသည်။
ပြောရမည်ဆိုပါက ၎င်းတို့က အရာရာ လုပ်နိုင်သလောက်နီးပါးပင်။
ဒါ့အပြင် ကျင့်ကြံသူတွေရဲ့ ငွေကြေးလည်း ဖြစ်၏။
ရုတ်တရက် ဒီအချိန်မှာ ခြံဝင်းအပြင်ဘက်က လှုပ်ရှားမှု တစ်ခုကို ပိုင်ယီ သတိပြုမိလိုက်လေသည်။ ဧည့်သည် တစ်ယောက် ဖြစ်ပုံရပြီး တစ်ဖက်လူက ဘာမကောင်းတဲ့ ရည်ရွယ်ချက်မှ မရှိသလို ရန်လိုမှု နည်းနည်းလေးမှ သူ မခံစားရပေ။
ဒါ့အပြင် တစ်ဖက်လူရဲ့ ကိုယ်ပေါ်မှာ ဝိညာဉ်စွမ်းအင် တချို့ စီးဆင်းနေသည်အား ပိုင်ယီ အာရုံခံမိလိုက်သည်။
မသေမျိုးကျင့်ကြံသူ တစ်ယောက် ဒါပေမဲ့ မသန်မာပေ။
ဒီလို ဝိညာဉ်စွမ်းအင် လှုပ်ရှားမှု အဆင့်က ချီစုစည်းမှု အဆင့် (၁) လောက်သာရှိပြီး ကျင့်ကြံသူ အဖြစ် အခုမှ စတင် ခြေလှမ်းစတဲ့ လူမျိုးပင်။ ပြီးတော့ ဝိညာဉ်စွမ်းအင် လှုပ်ရှားမှုက မတည်ငြိမ်နေရာ ဒီလူက ချီစုစည်းမှု အဆင့်ကို ရောက်တာ သိပ်မကြာလောက်သေးချေ။။
ထို့နောက် အားပါတဲ့ အသံတစ်ခုကို ပိုင်ယီ ကြားလိုက်ရ၏။
"ခွင့်ပြုပါခင်ဗျာ... ကျင့်ကြံသူပိုင် ဒီမှာ နေပါသလား... ကျွန်တော်က ချင်းဟယ် ခရိုင်ရုံးက အမှုနှိမ်နင်းရေးမှူး ဟယ် ပါ..."
'ခရိုင်ရုံး..'
'အမှုနှိမ်နင်းရေးမှူး...'
နန်းတော်က လူတွေ သူ့ကို လာရှာတယ် ဆိုတာ ပိုင်ယီ ရုတ်တရက် သဘောပေါက်လိုက်၏။
ရိုးရိုးသားသား ပြောရရင် ပိုင်ယီ ဒီကမ္ဘာကို ကူးပြောင်းရောက်ရှိလာတာ ဒီလောက် ကြာပြီး ဖြစ်ပေမဲ့ ခရိုင်ရုံးက လူတွေနဲ့ ဘယ်တုန်းကမှ အဆက်အသွယ် မလုပ်ဖူးသလောက်ပင်။ 'ဘာလို့ တစ်ဖက်လူက ရုတ်တရက်ကြီး သူ့ကို လာရှာတာလဲ..ဖြစ်နိုင်တာက လီမျိုးနွယ်စု ကိစ္စကြောင့်များလား...'
တစ်ဖက်လူက သူ့ကို ခေါ်ဝေါ်ပုံအရ သူက ကျင့်ကြံသူ ဆိုတာ ခရိုင်ရုံးက လူတွေ သိနေပြီ ဆိုတာ ပိုင်ယီ သိလိုက်သည်။
မကြာသေးမီက သူနဲ့ လီမျိုးနွယ်စုတို့ ဗြောင်ကျကျ ပဋိပက္ခ ဖြစ်ခဲ့ကြရာ သံသယ ဝင်ခံရတာ ပုံမှန်ပင်။
ပိုင်ယီဟာ အမှုနှိမ်နင်းရေးမှူး ဟယ်အား အကြာကြီး စောင့်မနေစေချင်ရာ ခြံဝင်း တံခါးဝသို့ လျှောက်သွားလိုက်၏။
တံခါးဖွင့်လိုက်တဲ့အခါ နန်းတော် အမှုနှိမ်နင်းရေးမှူး ဝတ်စုံ ဝတ်ဆင်ထားပြီး ခါးမှာ ဓားရှည်တစ်လက် ချိတ်ထားတဲ့ တောင့်တင်းသန်မာတဲ့ လူလတ်ပိုင်း အရွယ် အမျိုးသား တစ်ယောက်ကို တွေ့လိုက်ရပေသည်။
ဒါက ရှင်းရှင်းလင်းလင်း အမှုနှိမ်နင်းရေးမှူး ဟယ် ပင်။
ပိုင်ယီကို မြင်လိုက်တဲ့အခါ အမှုနှိမ်နင်းရေးမှူး ဟယ် နည်းနည်း အံ့သြသွားခဲ့သည်။ ဖြစ်နိုင်တာက ပိုင်ယီရဲ့ ငယ်ရွယ်မှုကြောင့် အံ့သြသွားတာလား ဒါမှမဟုတ် ပိုင်ယီရဲ့ ကျင့်ကြံမှုကို မခန့်မှန်းနိုင်လို့လား မသိပေ။
အမှုနှိမ်နင်းရေးမှူး ဟယ် လက်နှစ်ဖက် ဆုပ်ပြီး အရိုအသေပြုလိုက်၏။ "ကျင့်ကြံသူပိုင်"
ပိုင်ယီ ယဉ်ကျေးစွာ ပြန်ဖြေလိုက်သည်။ "အမှုနှိမ်နင်းရေးမှူး ဟယ်"
...