အခန်း ၄၆ : ပိုင်ယီ ချီစုစည်းမှု အဆင့်၉ သို့ ရောက်ရှိခြင်း၊ ချန်ချန်ရွှယ် ဝိညာဥ်ဂိုဏ်းသို့ ပြန်သွားခြင်း

​ပိုင်ယီ ကိုယ့်ဘာသာ ချိုးဖျက်ဝင်ရောက်ဖို့ ရွေးချယ်လိုက်၏။ မွေးရာပါ ဝိညာဉ်ခန္ဓာပါရမီကြောင့် အတားအစီးကို လျစ်လျူရှုနိုင်ပြီး အဆင့်တက်ဖို့ အခွင့်အရေး ရတာနဲ့ ချိုးဖျက်ဝင်ရောက်ရတာက အလွန် လွယ်ကူနေပေမည်။

​သူဟာ ကနေရင်း ချိုးဖျက်ဝင်ရောက်ရင်တောင် ပြဿနာ သိပ်မရှိဘူးလို့ ပိုင်ယီ ခံစားမိပေသည်။

​ဒါပေမဲ့ အဲဒါက နည်းနည်း ထူးဆန်းလွန်းနေမည်ဖြစ်ရာ ဒါကြောင့် ပုံမှန် အနေအထားကိုပဲ သူ ရွေးလိုက်လေသည်။

​ထို့နောက် သူဟာ ကုတင်ပေါ်မှာ တင်ပျဉ်ခွေထိုင်ပြီး မျက်လုံးမှိတ်လိုက်ကာ ခန္ဓာကိုယ်ထဲက ဝိညာဉ်စွမ်းအင်တွေကို လည်ပတ်စေလိုက်၏။

​ခန္ဓာကိုယ်ထဲ စီးဝင်လာတဲ့ ကြီးမားလှတဲ့ ဝိညာဉ်စွမ်းအင်တွေက သူ့ကိုယ်ပိုင် ဝိညာဉ်စွမ်းအင်တွေနဲ့ အလွန် လျင်မြန်တဲ့ အရှိန်နဲ့ ပေါင်းစပ်သွားခဲ့ပြီး သူ့ရဲ့ အရှိန်ဝါတစ်ခုလုံးကို အဆက်မပြတ် မြင့်တက်လာစေခဲ့သည်။

​ခြံဝင်းထဲက ကောင်းကင်မြေကြီး ဝိညာဉ်စွမ်းအင်တွေကလည်း ထူးဆန်းတဲ့ လှုပ်ရှားမှုတွေ ဖြစ်ပေါ်နေခဲ့ပြီး  အပြင်ဘက်က ဝိညာဉ်စွမ်းအင်တွေကိုတောင် စတင် သက်ရောက်မှု ရှိလာခဲ့လေသည်။

​ကံကောင်းတာက... ချီစုစည်းမှု အဆင့် ချိုးဖျက်ဝင်ရောက်တာက အခြေတည်အဆင့် ချိုးဖျက်ဝင်ရောက်သလောက် လှုပ်ရှားမှု မကြီးမားတာပင်။

​သူ့ခြံဝင်းနားကို မတော်တဆ ဖြတ်သွားတဲ့ ကျင့်ကြံသူ တစ်ယောက် မရှိရင် ဘယ်သူမှ သတိထားမိမှာ မဟုတ်ပေ။

​"ဘုန်း.."

​သူတစ်ယောက်တည်းသာ ကြားနိုင်တဲ့ ဝါဂွမ်းရိုက်သံလို အသံတစ်ခုဟာ သူ့ခန္ဓာကိုယ် အတွင်းက ထွက်ပေါ်လာတာကို ပိုင်ယီ ရုတ်တရက် ခံစားလိုက်ရသည်။

​ချီစုစည်းမှု အဆင့် (၈)....

​သူ ရောက်ရှိသွားပေပြီ.... ဒါပေမဲ့ ၎င်းက မပြီးသေးပါချေ။

​ဆုလာဘ်ထဲက ကျန်နေသေးတဲ့ ဝိညာဉ်စွမ်းအင် ပမာဏ အများကြီးဟာ သူ့ရဲ့ ချီကြောတွေနဲ့ ဒန်ထျန်းထဲမှာ ကျန်နေသေးတာ ပိုင်ယီ ခံစားနေရပေသည်။ ထို့ကြောင့် သူဟာ နောက်ထပ် အဆင့်တစ်ခုကို ဆက်လက် ချိုးဖျက်ဝင်ရောက်နိုင်လောက်သေးပေသည်။

​ဒါကို တွေးပြီး ပိုင်ယီ မတွန့်ဆုတ်တော့ပဲ မွေးရာပါ ဝိညာဉ်ခန္ဓာ အကူအညီနဲ့ ချီစုစည်းမှု အဆင့် (၉) ကို တိုက်ရိုက် ချိုးဖျက်ဝင်ရောက်ဖို့ ရွေးချယ်လိုက်၏။

"​ဘုန်း.."

​နောက်ထပ် ဘယ်သူမှ မကြားနိုင်တဲ့ ဝါဂွမ်းရိုက်သံ တစ်ခု ထပ်ထွက်ပေါ်လာခဲ့ပြီး သူ့ရဲ့ ဒန်ထျန်း၊ ချီပင်လယ် နဲ့ ချီကြောတွေဟာ တစ်ပြိုင်နက်တည်း အဆပေါင်းများစွာ ကျယ်ပြန့်သွားသလို ပိုင်ယီ ခံစားလိုက်ရလေသည်။

​သူ့ရဲ့ အရှိန်ဝါကလည်း ထပ်မံ မြင့်တက်လာခဲ့ပြီး သူဟာ ချီစုစည်းမှု အဆင့် (၉)သို့ ချိုးဖျက်ရောက်ရှိသွားခဲ့သည်။

​"ငါ ချီစုစည်းမှု အဆင့် (၁၀) ရောက်လုနီးပါးပဲ ဖြစ်နိုင်ခဲ့တာလား... ဒါက ငါ့ရဲ့ လက်ရှိ ခန္ဓာကိုယ်ကြံ့ခိုင်မှုက သရုပ်ဖော် စနစ်ထဲက ချန်ချန်ရွှယ်ထက် ပိုသန်မာနေလို့များလား"

​"သရုပ်ဖော် စနစ်ထဲမှာ သူမက ဓားဆိုတဲ့ မွေးရာပါ ပါရမီပဲ ရှိတာ... ငါ့မှာက ပိုစွမ်းအားကြီးတဲ့ မွေးရာပါ ဝိညာဉ်ခန္ဓာ ရှိတယ်"

​"ဒါကြောင့် သူမရဲ့ ချီစုစည်းမှု အဆင့် (၁၀) ဝိညာဉ်စွမ်းအင် အားလုံးက ငါ့ကို သူမနဲ့ တူညီတဲ့ ကျင့်ကြံမှုအဆင့် ရောက်အောင်ပဲ ကူညီပေးနိုင်ခဲ့တာ"

​ဒါ့အပြင် ချိုးဖျက်ဝင်ရောက်တဲ့အခါ သူ့ဝိညာဉ်စွမ်းအင် အစိတ်အပိုင်း တစ်ခုကို ချိုးဖျက်ဖို့ လိုအပ်သေးပြီး မွေးရာပါ ဝိညာဉ်ခန္ဓာက အတားအစီးကိုပဲ လျစ်လျူရှုနိုင်တာ ဖြစ်ပြီး စွမ်းအင် ကုန်ဆုံးမှုကိုတော့ လျစ်လျူမရှုနိုင်ပေ။

​အကယ်၍ ဒီအချက် (၂) ချက်သာ မရှိရင် သူဟာ ချီစုစည်းမှု အဆင့် (၁၀) ကို တိုက်ရိုက် ရောက်ရှိနိုင်လောက်တယ်လို့ ပိုင်ယီ ခံစားမိလိုက်လေသည်။

​ထို့နောက် ပိုင်ယီ မျက်လုံးဖွင့်လိုက်ရာ ထူးဆန်းတဲ့ အလင်းရောင် တစ်ချက် သူ့မျက်လုံးထဲ ဖြတ်သန်းသွားခဲ့သည်။ မွေးရာပါ ဝိညာဉ်ခန္ဓာရဲ့ အံ့ဖွယ်ကောင်းမှုကို နောက်ဆုံးတော့ သူ ခံစားလိုက်ရ၏။ 'ဒါက ပါရမီရှင် ဖြစ်ရတဲ့ ခံစားချက်လား.....'

​"ချီစုစည်းမှု အဆင့် (၇) ထက် အများကြီး ပိုသန်မာတယ်... အဆင့်ငယ် (၂) ဆင့်ပဲ မြင့်တာ ဆိုပေမယ့်  ခွန်အား ကွာခြားချက်က ကောင်းကင်နဲ့ မြေကြီးလိုပဲ"

​အေးစက်တဲ့ အလင်းရောင် တစ်ချက် ဖြတ်သန်းသွားခဲ့သည်။

​စောစောက သိုလှောင်အိတ်ထဲ ထည့်ထားတဲ့ ပိုင်ဖျင်ဓားဟာ သိုလှောင်အိတ်ထဲကနေ ချက်ချင်း ပျံထွက်လာခဲ့ပြီး အလွန် မြန်ဆန်တဲ့ အရှိန်နဲ့ လေထုကို ခွဲပြီး ပျံသန်းသွားခဲ့သည်။ မျက်စိတစ်မှိတ်အတွင်းမှာပဲ ရှေ့နောက် အကြိမ်ပေါင်း ဒါဇင်နဲ့ချီ လူးလာပျံသန်းနေခဲ့ပေသည်။

​အခန်းထဲ၌ ပိုင်ဖျင်ဓားရဲ့ လေထုကို ခွဲဖြတ်သွားတဲ့ တရွှီရွှီ အသံတွေနဲ့ ပြည့်နှက်နေခဲ့လေသည်။

​...

​ချင်းဟယ် ခရိုင် တည်းခိုခန်း တစ်ခု၌....

​လက်တွေ့ကမ္ဘာကို ပြန်ရောက်လာပေမယ့် ချင်းကျောက်ဟာ စိတ်ဓာတ်ကျနေပြီး မကျေမနပ် ဖြစ်ကာ အံကြိတ်ပြီး သူမဘာသာ ရေရွတ်လိုက်၏။ "သောက်ကျိုးနည်း... ငါ အဲဒီ လမ်းဆုံးကို ချိုးဖျက်နိုင်ခဲ့ပြီကို အခု အကြောင်းမဲ့ သက်သက် သေသွားရပြန်ပြီ... အပြင်ထွက်တာနဲ့ ဟို ဖြောင့်မတ်သော လူတွေဆိုသူတွေရဲ့ လိုက်လံ ဖမ်းဆီးတာ ခံရတယ်... ဘာ ဖြောင့်မတ်သော လမ်းစဉ်လဲ... သောက်ရေးမပါတာ... အဟွတ် အဟွတ်"

​သူမ ဆဲဆိုဖို့ ပြင်လိုက်ချိန်မှာပဲ လက်တွေ့ဘဝမှာ သူမဟာ ဖြောင့်မတ်သော လူတစ်ယောက် ဖြစ်နေမှန်း ချင်းကျောက် ရုတ်တရက် သတိရလိုက်လေသည်။

​သူမအမေ၊ သူမအစ်ကိုကြီး၊ သူမအစ်မကြီး၊ ပြီးတော့ သူမရဲ့ စီနီယာ အစ်ကို၊ အစ်မတွေ... သူတို့အားလုံးက ဖြောင့်မတ်သောလမ်းစဥ်က လူတွေပင်။

​ထို့ကြောင့် သူမ ဆဲဆိုလိုက်တာက သူတို့အားလုံးကို ဆဲဆိုလိုက်သလို ဖြစ်နေပြီ လက်တွေ့ဘဝက သူမကိုယ်တိုင် အပါအဝင်ပင်။

​"သွေးမိစ္ဆာဂိုဏ်းကနေ ထွက်လိုက်တာနဲ့ ငါ အမဲလိုက်ခံရတာပဲ။... ဒါဆို ငါ့ကို ဂိုဏ်းထဲမှာပဲ နေပြီး အပြင်မထွက်နဲ့လို့ ပြောချင်တာလား"

​ချင်းကျောက် အမြန် ခေါင်းခါလိုက်၏။ သူမ သွေးမိစ္ဆာဂိုဏ်းထဲမှာ တသက်လုံး နေရမည်ဆိုပါက သူမကို တိုက်ရိုက် သတ်ပစ်လိုက်တာကမှ ပိုကောင်းပေအုံးမည်။ အထီးကျန်ခြင်းကိုတော့ သူမ သည်းမခံနိုင်ပေ။

​သွေးမိစ္ဆာဂိုဏ်းက ပျင်းစရာ ကောင်းတဲ့ နေရာဖြစ်ပြီး  နှစ်အနည်းငယ် နေတာက သူမအတွက် အကန့်အသတ် ဖြစ်နေပေပြီ။

​အကယ်၍ ဆယ်စုနှစ်ပေါင်းများစွာ သို့မဟုတ် နှစ် (၁၀၀) လောက် နေရမယ် ဆိုရင်... သူမ ပျင်းရိပြီး သေသွားပေလိမ့်မည်။

​[သင်သည် သရုပ်ဖော် မသေမျိုးကျင့်ကြံခြင်း ဘဝတွင် (၂၉) နှစ်၊ (၀၄) လ နှင့် (၂၂) ရက်တိုင်တိုင် အသက်ရှင် နေထိုင်ခဲ့ပါသည်။ သင်သည် လမ်းဆုံးကို ချိုးဖျက်ခြင်းနှင့် မိစ္ဆာလမ်းစဉ်သို့ ကူးပြောင်းခြင်း အောင်မြင်မှု (၂) ခုကိုလည်း အသက်သွင်းနိုင်ခဲ့ပါသည်။ သင်သည် ထပ်ဆောင်း ဆုလာဘ် (၂) ခု ရရှိလိုက်ပါသည်။]

​[ဆုလာဘ် - ချီစုစည်းမှု အဆင့် (၁၀) ဝိညာဉ်စွမ်းအင် အားလုံး (အလွန် သန့်စင်သော ဝိညာဉ်စွမ်းအင်)]

​[ထပ်ဆောင်း ဆုလာဘ် ၁ - ကျိုးပဲ့နေသော အမိန့်ပေး တံဆိပ်ပြား (သွေးမိစ္ဆာဂိုဏ်း၏ ချီစုစည်းမှု အဆင့် (၁၀) ကျင့်ကြံသူ တစ်ဦးကို ခေါ်ယူနိုင်သည်။ အချိန်ကန့်သတ်ချက်မှာအသက်(၆၀)ရှူချိန် ဖြစ်သည်)]

​[ထပ်ဆောင်း ဆုလာဘ် ၂ - သွေးမိစ္ဆာ အလောင်းထိန်းချုပ်ခြင်း နည်းစနစ်(သွေးမိစ္ဆာဂိုဏ်း၏ အတွင်းစည်း တပည့်များ သင်ယူရသော အခြေခံ နည်းစနစ်)]

​"ကြည့်ရတာ မွေးရာပါ ဝိညာဉ်ခန္ဓာ တစ်ဝက်ကိုတော့ ယှဉ်လို့မရသေးဘူးပဲ... ချီစုစည်းမှု အဆင့် (၁၀) ဝိညာဉ်စွမ်းအင် တစ်ခုပဲ နည်းနည်း အသုံးဝင်မယ့်ပုံ ရှိတယ်... နောက်ထပ် နည်းနည်းလောက် ပိုရရင် ငါ အခြေတည်အဆင့်ကို ချိုးဖျက်ဝင်ရောက်ဖို့ ကြိုးစားလို့ ရနိုင်လောက်တယ်... အကယ်၍ ငါ အခြေတည်အဆင့် ရောက်သွားပြီး ကျင်းရှင်း နန်းတော်ကို ပြန်သွားရင် အမေက ငါ့ကို ခိုးထွက်ခဲ့လို့ အပြစ်ပေးမှာ မဟုတ်တော့ဘူးမလား"

​ချင်းကျောက် သူမရဲ့ ချောမွေ့ဖြူဖွေးတဲ့ မေးစေ့လေးကို ကိုင်ပြီး ရေရွတ်လိုက်၏။ သူမလေသံထဲမှာ အလွန် စိတ်ပျက်နေကြောင်း သိသာပေသည်။

​သူမဟာ ပိုကောင်းတဲ့ ဆုလာဘ် ရမယ်လို့ ထင်ခဲ့ပြီး ဥပမာ  သူမရဲ့ မွေးရာပါ ဝိညာဉ်ခန္ဓာ တစ်ဝက်ကို ပြီးပြည့်စုံတဲ့ မွေးရာပါ ဝိညာဉ်ခန္ဓာ အဖြစ် တိုက်ရိုက် ပြောင်းလဲပေးတာမျိုးပင်။

​အဲဒီလိုသာ ဆိုရင် သူမရဲ့ အခြေခံအုတ်မြစ်နဲ့ ပေါင်းစပ်လိုက်ပါက ကောင်းကင်ဘုံကို အံတုနိုင်ပေပြီ။

​ထပ်ဆောင်း ဆုလာဘ် (၂) ခု အတွက်တော့ သူမ တစ်ချက်ကြည့်ပြီး လျစ်လျူရှုလိုက်၏။

​သွေးမိစ္ဆာဂိုဏ်းက ချီစုစည်းမှု အဆင့် (၁၀) တိုက်ခိုက်ရေးသမား တစ်ယောက်ကို ခေါ်ယူနိုင်ပြီး သူက အသက်ရှူချိန်(၆၀)ပဲ ခံမည်ဖြစ်ရာ ၎င်းက သူမအတွက် အသုံးမဝင်ချေ။

​အရေးကြီးတဲ့ အချိန်ကျရင် တခြားသူတွေကို တိတ်တဆိတ် တိုက်ခိုက်ဖို့ သုံးဖို့ဆိုတာကလည်း သွေးမိစ္ဆာဂိုဏ်း တိုက်ခိုက်ရေးသမားရဲ့ ကျင့်ကြံမှုက နည်းနည်း နိမ့်လွန်းနေပေသည်။

​နောက်ဆုံးတစ်ခု ဖြစ်တဲ့ သွေးမိစ္ဆာဂိုဏ်းရဲ့ ကျင့်စဉ် အတွက်တော့ ချင်းကျောက် သိပ်အထင်မကြီးပေ။

​ဒါက သွေးမိစ္ဆာဂိုဏ်း အတွင်းစည်း တပည့်တွေ မဖြစ်မနေ သင်ယူရတဲ့ ကျင့်စဉ်တွေထဲက တစ်ခုပဲ ဖြစ်ပြီး သူမ သင်ယူထားတဲ့ ကျင်းရှင်း နန်းတော်ရဲ့ ကျင့်စဉ်တွေက ဒီအရာတွေထက် အဆပေါင်းများစွာ သာလွန်ပေရာ ဒါက သိပ်အသုံးမဝင်ဘူးလို့ သူမ ခံစားရလေသည်။

​..

​ချန်အိမ်တော်...

​ဆုလာဘ်ကို သိပ်မကျေနပ်တဲ့ ချင်းကျောက်နဲ့ ယှဉ်ရင် ချန်ချန်ရွှယ်က တော်တော် ကျေနပ်နေလေသည်။ သူမက မသေမျိုးကျင့်ကြံခြင်း သရုပ်ဖော် စနစ်ရဲ့ ပုံမှန်ဆို သိပ်မရက်ရောတတ်တဲ့ အကျင့်ကို ကျင့်သားရနေခဲ့သည်။

​သူမ ဘာအောင်မြင်မှုမှ မရခဲ့လို့ ဒီတစ်ခါလည်း ထပ်ဆောင်း ဆုလာဘ် မရခဲ့ပေ။

​"သက်တမ်းနှစ်(၅၀)က ဘာမှမရတာထက်တော့ ပိုကောင်းပါတယ်"

​သက်တမ်း နှစ်(၅၀)က ဒီဆုလာဘ် တွက်ချက်မှုမှာ ချန်ချန်ရွှယ် ရရှိလိုက်တဲ့ ဆုလာဘ်ပင်။

​သူမဟာ အခြေတည်အဆင့် (၂) ပဲ ရှိသေးပေမယ့် အသက် (၃၀၀) အထိ နေနိုင်တော့မည်ဖြစ်သလို ဒီလို သက်တမ်း တိုးလာတာက အထီးကျန်ခြင်းကိုပဲ တိုးပွားလာစေသလိုပင်။

​သူမ ခေါင်းခါကာ ရေရွတ်လိုက်၏။ "ငါ ဝိညာဉ်ဓားဂိုဏ်းက ထွက်လာတာ တော်တော် ကြာသွားပြီ... စားသောက်ပွဲ ပြီးဆုံးဖို့ (၂) ရက် (၃) ရက် လိုသေးပေမယ့် ငါ့အဘိုး မွေးနေ့ပွဲက ပြီးပြီ။ ပြီးတော့ အဘိုးကို သက်တမ်းရှည်ဆေးလုံးတွေတောင် ပေးခဲ့ပြီးပြီ။ မြေးမလေး တစ်ယောက်ရဲ့ ကျေးဇူးသိတတ်မှုကို ဖြည့်ဆည်းပေးပြီးပြီလို့ သတ်မှတ်လို့ ရပါတယ်... ဒါကြောင့် ဝိညာဉ်ဓားဂိုဏ်းကို ပြန်ရမယ့် အချိန်ရောက်ပြီ"

​မသေမျိုးကျင့်ကြံခြင်း သရုပ်ဖော် စနစ်ကနေတဆင့် သူမရဲ့ ကျင့်ကြံမှုကို မြှင့်တင်နိုင်ပြီး မြှင့်တင်နိုင်တဲ့ အရှိန်အဟုန်က သိပ်မြန်လေသည်။

​တစ်ရက် တစ်ကြိမ် သရုပ်ဖော်တာက သူမအား အခွင့်အရေး အများကြီး ပေးနိုင်ပေသည်။

​ဒါပေမဲ့ ချင်းဟယ် ခရိုင်က ဝိညာဉ်စွမ်းအင်က သိပ်နည်းပါးလွန်းပြီး တခါတလေ သူမ ကိုယ့်ဘာသာ တရားထိုင် ကျင့်ကြံပေမယ့် နာရီအနည်းငယ်ကြာတာတောင် ဝိညာဉ်စွမ်းအင် အများကြီး မရနိုင်ကြောင်း တွေ့လိုက်ရလေသည်။

ထို့ကြောင့် ချင်းဟယ် ခရိုင်မှာ ဆက်နေရင် အချိန်ဖြုန်းသလိုပဲ ဖြစ်နေမည်ပင်။

​ဒါ့အပြင် ချင်းဟယ် ခရိုင်မှာ နေတာက အတော်လေး အန္တရာယ်များလေသည်။ လောလောဆယ် ချင်းဟယ် ခရိုင်မှာ သူမကို ခြိမ်းခြောက်နိုင်တဲ့သူ မရှိတာ မှန်ပေမဲ့ အနာဂတ်မှာ ဘယ်သူမှ မခြိမ်းခြောက်နိုင်ဘူးလို့ မဆိုလိုချေ။။

​သူမမှာ မသေမျိုးကျင့်ကြံခြင်း သရုပ်ဖော် စနစ် ရှိနေပြီး အကယ်၍ သရုပ်ဖော် စနစ်ကနေ အကျိုးအမြတ် အများကြီး ရယူဖို့ အချိန်မရလိုက်ခင် သူမအရင် သေဆုံးသွားနိုင်ပေသည်။

​ဝိညာဉ်ဓားဂိုဏ်းမှာ နေတာက အများကြီး ပိုလုံခြုံပြီး ဝိညာဉ်ဓားဂိုဏ်းမှာ ကျွမ်းကျင်သူတွေ အများကြီး ရှိရာ ဘယ်သူမှ အဲဒီမှာ ပြဿနာ သွားမရှာရဲကြပေ။

​မူလဝိညာဉ် အဆင့် မသေမျိုးကျင့်ကြံသူတွေတင် ဝိညာဉ်ဓားဂိုဏ်းမှာ အများကြီး ရှိနေလေသည်။

​သူမဟာ သရုပ်ဖော် စနစ်ထဲက သတိကြီးပြီး ဂရုစိုက်တတ်တဲ့ စရိုက်ကို လက်တွေ့ဘဝဆီ ယူဆောင်လာခဲ့တာကို ချန်ချန်ရွှယ် သိပေမယ့် သူမဟာ လုံးဝ ဂရုမစိုက်ပေ။

​နည်းနည်း ပိုသတိထားတာ မမှားပဲ အသက်ရှင်ကျန်ရစ်သူကမှ အနိုင်ရသူဖြစ်လေသည်။

​ဒါကို တွေးပြီး သူမ တွေးတဲ့အတိုင်း လုပ်ဆောင်လိုက်၏။

​ချန်ချန်ရွှယ် အရင်ဆုံး သူမအဘိုး၊ ဖခင်၊ မိခင်၊ ပြီးတော့ သိပ်မရင်းနှီးတဲ့ ဆွေမျိုးတချို့ကို သွားတွေ့လိုက်သည်။ ထို့နောက် သူတို့ကို စကားအနည်းငယ် ပြောပြီးနောက် ဝိညာဉ်ဓားဂိုဏ်းကို ပြန်ဖို့ ပြင်ဆင်လိုက်ပေသည်။

​သူမ စိတ်ကူးလိုက်ရုံနဲ့တင် ထူးခြားတဲ့ ဝိညာဉ်ဓား တစ်လက် လေထဲမှာ ပေါ်လာပြီး သူမရှေ့မှာ ဝဲပျံနေခဲ့သည်။

​ဒါ့အပြင် ဝိညာဉ်ဓားက လျင်မြန်တဲ့ အရှိန်နဲ့ ကြီးထွားလာခဲ့သည်။

​ဓားက စကိတ်ဘုတ်လောက် ကျယ်ပြန့်လာမှ ဒီပြောင်းလဲမှု ရပ်တန့်သွားခဲ့လေသည်။

​ထို့နောက် ချန်ချန်ရွှယ်ဟာ ဓားပေါ် တက်လိုက်၏။

​ဓားပျံစီးခြင်း....

​၎င်းက အခြေတည်အဆင့်ရောက်မှသာ စွမ်းဆောင်နိုင်သည့် အရာပင်။

​"ရွှီ" ဆိုတဲ့ အသံနဲ့အတူ လူနဲ့ ဓားက အလင်းတန်း တစ်ခုအဖြစ် ပြောင်းလဲသွားပြီး ကောင်းကင်ပေါ် တမဟုတ်ချင်း ပျံတက်သွားခဲ့ မျက်စိတစ်မှိတ်အတွင်း ပျောက်ကွယ်သွားခဲ့လေသည်...

​...