အခန်း ၄၅ : ပိုင်ယီ၏ ပထမဆုံးအကြိမ် ကိုယ်တိုင် ချိုးဖျက်ဝင်ရောက်ခြင်း

​သူ ချင်းကျောက်ကို အခုလေးတင် ချီးကျူးခဲ့ပေမယ့် ချင်းကျောက်က မိနစ်ပိုင်း အတွင်းမှာပဲ သေဆုံးသွားခဲ့လေသည်။ ဒါက သူ့ရဲ့ တစ်ခုခုကို ကောင်းတယ် ပြောလိုက်တာနဲ့ အဲဒီအရာက ချက်ချင်း ပျက်စီးသွားတတ်တာကြောင့် မဟုတ်ဘူး ဆိုတာ ပိုင်ယီ အပြည့်အဝ ယုံကြည်ပေသည်။ ဒါက သေချာပေါက် ချင်းကျောက် ကိုယ်တိုင်ကြောင့်ပင်။

​ဘာပဲဖြစ်ဖြစ် ချင်းကျောက်က ဖြောင့်မတ်သော လမ်းစဉ်ကို သစ္စာဖောက်ခဲ့တာကြောင့် သူမ အနေနဲ့ အကျိုးဆက်တွေကို ခံစားရမည်ပင်။

​မသေမျိုးကျင့်ကြံခြင်း လောကမှာ သာမန်လူတွေရဲ့ မျက်လုံးထဲမှာ မိစ္ဆာလမ်းစဉ်က လူတွေ ဆိုတာ လူယုတ်မာတွေပင်။ သဘာဝကျကျ သူတို့က လူတိုင်း သတ်ဖြတ်ချင်နေတဲ့ လူတွေ ဖြစ်နေပြီး ဖြောင့်မတ်သော ဂိုဏ်းတိုင်းက မိစ္ဆာလမ်းစဉ်က လူတွေဟာ သူတို့ရဲ့ ရန်သူတော်တွေ အဖြစ် သတ်မှတ်ထားကြပေသည်။

​ဒီလို အခြေအနေမျိုးမှာ အကယ်၍ ချင်းကျောက်သာ နည်းနည်းလေး သိသာထင်ရှားနေမယ် ဆိုရင် လူ့အဖွဲ့အစည်းရဲ့ ပြင်းထန်တဲ့ ရိုက်နှက်ဆုံးမမှုကို သူမ ခံရပေမည်။

​"နှမြောစရာ ကောင်းလိုက်တာ... အကယ်၍ သူမသာ ဒီလမ်းဆုံးကနေ ဖောက်ထွက်နိုင်ခဲ့ပြီး ချန်ချန်ရွှယ်လို သွေးမိစ္ဆာဂိုဏ်းထဲမှာ နှစ်ရာပေါင်းများစွာ နေလိုက်ရင် မူလဝိညာဉ် အဆင့်ကျင့်ကြံသူ ဖြစ်လာနိုင်လောက်တယ်"

​ပိုင်ယီ နောင်တရတဲ့ လေသံနဲ့ ရေရွတ်လိုက်၏။ "ဒါပေမဲ့ ချင်းကျောက်ရဲ့ စရိုက်က ထိန်းချုပ်လို့ မရတဲ့ ပုံစံမျိုး ဖြစ်နေတယ်... အကယ်၍ သူတို့ နှစ်ယောက် တစ်ယောက်ကို တစ်ယောက် အပြန်အလှန် ဖြည့်စွက်ပေးနိုင်ရင် ကောင်းမှာပဲ"

​ဒါပေါ့ တကယ်သာ အဲဒီလို ဖြစ်လာခဲ့ရင် လူတစ်ယောက်ရဲ့ စရိုက်က သိပ်ပြီး ပြီးပြည့်စုံလွန်းနေပေမည်။

​သိပ်ပြီးပြည့်စုံလွန်းလို့ ကြက်သီးထစရာတောင် ကောင်းနေပေမည်။

​ချင်းကျောက်လို မဆင်မခြင် လုပ်တတ်တဲ့ စရိုက်မျိုးက လူတွေကို ပိုလက်တွေ့ကျတဲ့ ခံစားချက် ပေးပြီး သူမက သာမန်လူ တစ်ယောက်နဲ့ ပိုတူပေသည်။

​[သင် ဖိတ်ကြားထားသော ကိုယ်စားလှယ်လောင်း ချင်းကျောက်သည် သရုပ်ဖော် မသေမျိုးကျင့်ကြံခြင်း ဘဝတွင် (၂၉) နှစ်၊ (၀၄) လ နှင့် (၂၂) ရက်တိုင်တိုင် အသက်ရှင် နေထိုင်ခဲ့ပါသည်။ သင်သည် အောက်ပါ ဆုလာဘ်များကို ရရှိလိုက်ပါသည် - ]

​[ချင်းကျောက်သည် လမ်းဆုံးကို ချိုးဖျက်ခြင်းအောင်မြင်မှုကို အသက်သွင်းနိုင်ခဲ့ပါသည်။ ချင်းကျောက်သည် မိစ္ဆာလမ်းစဉ်သို့ ကူးပြောင်းခြင်းအောင်မြင်မှုကို အသက်သွင်းနိုင်ခဲ့ပါသည်။ သင်သည် ထပ်ဆောင်း ဆုလာဘ် (၂) ခု ရရှိလိုက်သည်]

​[ဆုလာဘ် ၁ - သာမန် ဆေးပေါင်းဖို တစ်လုံး (ဈေးပေါသော ဆေးပေါင်းဖို)]

​[ဆုလာဘ် ၂ - သွေးပုလဲ(သွေးမိစ္ဆာဂိုဏ်း ပဉ္စမ အကြီးအကဲက ချင်းကျောက်ကို ပေးခဲ့သော ဝိညာဉ်လက်နက်)]

​[ဆုလာဘ် ၃ - အမှိုက် လမ်းစဉ် (ပါရမီ)]

​[ထပ်ဆောင်း ဆုလာဘ် ၁ - သွေးမိစ္ဆာ ခေါ်ယူခြင်း တံဆိပ်ပြား (သင့်အား ရန်သူကို သတ်ဖြတ်ရာတွင် ကူညီရန် အခြေတည်အဆင့် (၅) ကျင့်ကြံသူ တစ်ဦးကို ခေါ်ယူနိုင်သည်။ (၁၀) မိနစ် ကြာရှည်ခံသည်)]

​[ထပ်ဆောင်း ဆုလာဘ် ၂ - သိုလှောင်အိတ် (ချင်းကျောက် အသုံးပြုခဲ့သော သိုလှောင်အိတ်)]

​"သူမက အောင်မြင်မှု (၂) ခုကို တစ်ပြိုင်နက်တည်း အသက်သွင်းလိုက်တာလား"

​ပိုင်ယီ နည်းနည်း မယုံကြည်နိုင် ဖြစ်သွားခဲ့သည်။ "ပြီးတော့ ထပ်ဆောင်း ဆုလာဘ် (၂) ခုတောင် ရတာလား"

​'ဘုရားရေ....'

​'ဒီ ရွေးချယ်ခံအမှတ် (၂) က တကယ် အရည်အချင်း ရှိတာပဲ...'

​ပိုင်ယီဟာ သူမကို ရာထူးတိုးပေးပြီး လစာတိုးပေးချင်လိုက်ပေမဲ့ ဝမ်းနည်းစရာ ကောင်းတာက သူ့မှာ အခွင့်အရေး မရှိတာပင်........

​ဆုလာဘ် (၃) ခု အတွက်တော့ ပြောစရာ သိပ်မရှိပဲ

သူဟာ ဆုလာဘ် (၂) ကို ရွေးလိုက်၏။

​နောက်ဆုံး ဆုလာဘ် (၂) ခု အတွက်တော့ ရွေးစရာ မလိုပေ။ ဘာလို့လဲဆိုတော့ ထပ်ဆောင်း ဆုလာဘ် ဘယ်နှခုပဲ ပါပါ အောင်မြင်မှု (၁၀၀) နဲ့ ထပ်ဆောင်း ဆုလာဘ် (၁၀၀) ပါရင်တောင် ရွေးစရာ မလိုပေ။ အားလုံးကို ရမည်ဖြစ်ရာ ဘာလို ရွေးချယ်နေစရာလိုမည်နည်း။

​မျက်စိတစ်မှိတ်အတွင်းမှာပဲ ပိုင်ယီရဲ့ လက်ဝါးပေါ်မှာ ထူးဆန်းတဲ့ သွေးရောင် ပုလဲလုံးလေး တစ်လုံး ဖြည်းဖြည်းချင်း လွင့်မြောနေခဲ့သည်။

​ပုလဲလုံးလေးက အရည်တွေ ခဲနေသလို ဖြစ်နေပြီး သွေးနံ့ သင်းသင်းလေး ထွက်ပေါ်နေခဲ့သည်။

​၎င်းက သွေးခဲလုံးလေး တစ်လုံးနဲ့ တူနေပေသည်။

​ဒါပေမဲ့ ပိုင်ယီရဲ့ လက်ချောင်းထိပ်လေးနဲ့ ထိလိုက်တဲ့အခါ ဖန်ပုလဲလုံးလေး တစ်လုံးလို အထိအတွေ့မျိုး ပိုဆန်နေပြီး အရွယ်အစားက စားပွဲတင်တင်းနစ် ဘောလုံးလောက် ရှိတာ သူ သတိထားမိလိုက်၏။ 'ဆိုတော့ ဒါက သွေးခဲလုံးနဲ့ တူတဲ့ စားပွဲတင်တင်းနစ် ဘောလုံး အရွယ်အစားရှိ ဖန်ပုလဲလုံးပေါ့...'

​ဒီလို ထူးဆန်းတဲ့ အတွေး သူ့ခေါင်းထဲ ရှိနေပေမယ့် ပိုင်ယီဟာ ဒီသွေးပုလဲကို လျှော့မတွက်ပေ။

​ဘာပဲဆိုဆို ဒါက ဝိညာဉ်လက်နက် ဖြစ်ပေသည်။

​ချင်းကျောက် ဒီသွေးပုလဲကို အသုံးပြုတာ ပိုင်ယီ မြင်ဖူးပြီး အခြေခံအားဖြင့် ကိုယ်ပိုင် သွေးနဲ့ ဝိညာဉ်စွမ်းအင်ကို စွမ်းအင်အရင်းအမြစ် အဖြစ် အသုံးပြုပြီး သွေးပုလဲကို အသက်သွင်းရလေသည်။

​ပြီးရင် ဒီသွေးပုလဲကို ထိန်းချုပ်ပြီး လူမသိသူမသိ လူသတ်လို့ ရပေသည်။

​ချင်းကျောက် အသုံးပြုတဲ့ မြင်ကွင်းကို ပြန်တွေးကြည့်တော့ ဒါက လက်နက်ပုန်းတစ်ခုနဲ့ ပိုတူတယ်လို့ ပိုင်ယီ ခံစားရ၏။

​ထိုအပြင် ဒါက ပိုင်ယီရဲ့ ဒုတိယမြောက် ဝိညာဉ်လက်နက်လို့ ပြောလို့ရပေသည်။

​ပထမဆုံး တစ်ခုက ပိုင်ဖျင်ဓားဖြစ်ပြီး အဲဒါက ရွေးချယ်ခံ အမှတ် (၁) ချန်ချန်ရွှယ်ဆီကနေ ရရှိခဲ့တဲ့ တော်တော်ကောင်းတဲ့ ဝိညာဉ်ဓား တစ်လက်.....

​ဒုတိယ တစ်ခုက ဒီသွေးပုလဲပင်။

​ဒီပစ္စည်းက ဖြောင့်မတ်သော လမ်းစဉ်က လူတွေ သုံးတဲ့ ပစ္စည်းနဲ့ မတူဘူး ဆိုပေမယ့် ပိုင်ယီ ဂရုမစိုက်ပေ။

​ဘာပဲဖြစ်ဖြစ် သူက ကိုယ့်ကိုယ်ကိုယ် ဖြောင့်မတ်သော လမ်းစဉ်ရဲ့ အစိတ်အပိုင်းလို့ မထင်ထားပဲ  သူက ဆရာသခင် မရှိတဲ့ လေလွင့်ကျင့်ကြံသူ တစ်ယောက်ပင်။

​'ပြဿနာ မရှိပါဘူး...သိမ်းထားလိုက်မယ်...'

​ထို့နောက် ပိုင်ယီရဲ့ အကြည့်က တခြားလက်တစ်ဖက်ဆီ ရောက်သွားခဲ့သည်။ အဲဒီလက်ထဲမှာ အနက်ရောင် စာလုံး (၃) လုံး ပါတဲ့ အနီရောင်ရင့်ရင့် တံဆိပ်ပြားတစ်ခု ရှိနေ​ခဲ့သည်။

​စာလုံးတွေက ထူထဲပြီး အားကောင်းပေမယ့် ဘယ်လိုပဲ ကြည့်ကြည့် လူတွေကို ထူးဆန်းတဲ့ မကောင်းဆိုးဝါး ခံစားချက်တစ်ခုအား ပေးနေခဲ့သည်။

​ထို့ကြောင့် လူတွေက အကြာကြီး စိုက်မကြည့်နိုင်ပေချေ။

​"သွေးမိစ္ဆာဂိုဏ်း..." ပိုင်ယီ ဒီစာလုံး (၃) လုံးကို ကြည့်ပြီး ကိုယ့်ဘာသာ ရေရွတ်လိုက်၏။

​ဒီပစ္စည်းက ချင်းကျောက် လက်ထဲက တံဆိပ်ပြားနဲ့ ပုံစံတူတူပင်။

​ဖြစ်နိုင်တာက ချင်းကျောက်ရဲ့ တံဆိပ်ပြားများ ဖြစ်နေမလားပင်။

​'မသေမျိုးကျင့်ကြံခြင်း သရုပ်ဖော် စနစ်က ကုန်ကျစရိတ် လျှော့ချနေတာများလား.....'

​သွေးမိစ္ဆာဂိုဏ်းက အခြေတည်အဆင့် (၅) ကျင့်ကြံသူ တစ်ယောက်ကို ခေါ်ယူနိုင်စွမ်း ရှိတယ် ဆိုတော့ ပိုင်ယီ မနေနိုင်ဘဲ တံဆိပ်ပြားကို နည်းနည်း တင်းတင်းကြပ်ကြပ် ဆုပ်ကိုင်လိုက်မိသည်။ ဒါပေမဲ့ မတော်တဆ ချေမိပြီး သူ့ရဲ့ ဝှက်ဖဲတစ်ခုအား ဖြုန်းတီးလိုက်မိမှာကိုလည်း စိုးရိမ်နေမိပေသည်။

​ဒါက အခြေတည်အဆင့် (၅) သက်တော်စောင့်တစ်ယောက် ရှိတာနဲ့ ညီမျှပြီး မဖြစ်မနေ လိုအပ်တာ မဟုတ်ရင် မသုံးတာက အကောင်းဆုံးပင်။

​လက်တွေ့ကမ္ဘာမှာ သွေးမိစ္ဆာဂိုဏ်း ရှိမရှိ သူ မသိပေမယ့် သွေးမိစ္ဆာဂိုဏ်း ကျင့်ကြံသူတွေက မိစ္ဆာလမ်းစဉ်က လာမှန်း တစ်ချက်ကြည့်လိုက်ရုံနဲ့ သိသာလေသည်။

​အကယ်၍ သူလည်း မိစ္ဆာလမ်းစဉ် အဖြစ် အထင်ခံလိုက်ရရင် ဖြောင့်မတ်သော လမ်းစဉ်ရဲ့ လိုက်လံ ဖမ်းဆီးတာ ခံရပေမည်။

​နောက်ဆုံး သိုလှောင်အိတ်ထဲမှာတော့ ကြည့်စရာ ဘာမှ မရှိပဲ အထဲမှာ နေရာကျယ်တာကလွဲရင် ဘာမှ မရှိပေ။

​ပိုင်ယီ ခန့်မှန်းကြည့်တာတော့ ဒီသိုလှောင်အိတ်က သူ့အခန်းထဲက ပစ္စည်းတွေ အကုန် ထည့်လို့ရလေသည်။

​ထို့နောက် သူဟာ ပိုင်ဖျင်ဓား၊ သွေးပုလဲ နဲ့ နှလုံးသားသန့်စင်ဆေးလုံးတို့ကို အိတ်ထဲ ထည့်လိုက်သည်။

​သို့ပေမဲ့ နေရာအလွတ်တွေ အများကြီး ကျန်နေသေးလေသည်။

​ထို့နောက် ပိုင်ယီဟာ သူ့အာရုံကို တခြား ရွေးချယ်ခံရဲ့ ဆုလာဘ်တွေဆီ လှည့်လိုက်၏။

​[သင် ဖိတ်ကြားထားသော ကိုယ်စားလှယ်လောင်း ချန်ချန်ရွှယ်သည် သရုပ်ဖော် မသေမျိုးကျင့်ကြံခြင်း ဘဝတွင် (၁၂၁) နှစ်၊ (၁၁) လ နှင့် (၀၂) ရက်တိုင်တိုင် အသက်ရှင် နေထိုင်ခဲ့ပါသည်။ သင်သည် အောက်ပါ ဆုလာဘ်များကို ရရှိလိုက်ပါသည် - ]

​[ဆုလာဘ် ၁ - တည်ရှိမှု အာရုံခံနိုင်စွမ်း လျော့နည်းခြင်း (လူတွေက သင့်ကို ရံဖန်ရံခါ လျစ်လျူရှုထားကြလိမ့်မည်)]

​[ဆုလာဘ် ၂ - ချီစုစည်းမှု အဆင့် (၁၀) ဝိညာဉ်စွမ်းအင် အားလုံး (အလွန် ကြီးမားသော သန့်စင်သည့် ဝိညာဉ်စွမ်းအင်)]

​[ဆုလာဘ် ၃ - သက်တမ်း (၁၀၀) နှစ် (မတော်တဆမှု မရှိပါက နောက်ထပ် နှစ် ၁၀၀ အသက်ရှင်နိုင်သည်)]

​ချင်းကျောက်ရဲ့ အံ့သြစရာ ကောင်းတဲ့ ဆုလာဘ် တွက်ချက်မှုနဲ့ ယှဉ်ရင် ချန်ချန်ရွှယ်ရဲ့ ဆုလာဘ် တွက်ချက်မှုက နည်းနည်း နိမ့်ကျနေလေသည်။

​ဒါပေမဲ့ ပိုင်ယီ တော်တော် ကျေနပ်ပြီး ဘာပဲဖြစ်ဖြစ် ဒါက သူ အလကား ရလိုက်တဲ့ ဆုလာဘ်တွေ ဖြစ်တာကြောင့်ပင်။

ရွေးချယ်ခံတွေက သူ့အတွက် ကြိုးစား အလုပ်လုပ်ပေးနေကြတာဖြစ်ပြီး သူတို့ တစ်နှစ်ပတ်လုံး အလုပ်လုပ်ပေးနိုင်ရင် ပိုကောင်းပေမည်။

​"ငါ ဆုလာဘ် (၂) ကို ရွေးမယ်"

​တည်ရှိမှု အာရုံခံနိုင်စွမ်း လျော့နည်းခြင်းက ပိုင်ယီအတွက် အသုံးမဝင်ချေ။ သူက ချင်းဟယ် ခရိုင်မှာ အမြဲတမ်း နှိမ့်ချစွာ  နေထိုင်ခဲ့ပြီး မိတ်ဆွေအပေါင်းအသင်းလည်း သိပ်မရှိရာ သူ့ရဲ့ တည်ရှိမှုက ဒီထက် နိမ့်လို့ မရတော့ပေ။

​သက်တမ်း (၁၀၀) နှစ် ဆိုတာက ပိုတောင် အသုံးမဝင်သေးပေ။ ချီစုစည်းမှု အဆင့် (၇) ရောက်နေပြီ ဖြစ်တဲ့ ပိုင်ယီဟာ ဒီသက်တမ်း (၁၀၀) လေးကို ဂရုမစိုက်ချေ။

​သူဟာ အခုချိန်မှာ အလွယ်တကူ နှစ်(၁၀၀)  အသက်ရှင်နိုင်နေပေပြီ။

​တစ်နေ့ သူ ချီစုစည်းမှု အဆင့် (၁၀) ကို ချိုးဖျက်ဝင်ရောက်နိုင်တဲ့အခါ နဇစ်(၂၀၀) အသက်ရှင်တာက ပုံမှန် ဖြစ်သွားမည်ပင်။

​သက်တမ်းအတွက် စိတ်ပူနေရတဲ့ ကျင့်ကြံသူတွေက သူတို့ရဲ့ အခြေခံအုတ်မြစ်မှာ ပြဿနာ ရှိနေလို့ ဖြစ်ပေသည်။

​ပိုင်ယီ ရွေးချယ်မှု ပြုလုပ်ပြီးနောက်မှာ ကြီးမားလှတဲ့ ဝိညာဉ်စွမ်းအင်တွေက သူ့ရဲ့ ချီကြောတွေနဲ့ ဒန်ထျန်းထဲကို အလွန် ကြမ်းတမ်းစွာ စီးဝင်လာခဲ့သည်။

​ဒါပေမဲ့ ၎င်းက သူ့အား မသက်မသာ မဖြစ်စေခဲ့ပေ။

​ဒါပေမဲ့ ဒီဝိညာဉ်စွမ်းအင်တွေက သိပ်များပြားလွန်းလို့ သူ အလစ်အငိုက် မိသွားခဲ့သည်။

​ပိုင်ယီ ဒီဝိညာဉ်စွမ်းအင်တွေကို လက်ခံရရှိပြီးနောက်မှာ သူ တကယ်ပဲ အဆင့်တက်ဖို့ အခွင့်အရေး ရရှိလိုက်မှန်း သဘောပေါက်လိုက်၏။

​မွေးရာပါ ဝိညာဉ်ခန္ဓာရဲ့ မွေးရာပါ ခန္ဓာကိုယ်ဖွဲ့စည်းပုံကြောင့် အဆင့်တက်ရာမှာ ကျရှုံးနိုင်ခြေ လုံးဝ မရှိတော့ပေ။

​ထို့အပြင် ဒါက သူ့ရဲ့ ပထမဆုံးအကြိမ် ကိုယ်တိုင် ချိုးဖျက်ဝင်ရောက်ခြင်း ဖြစ်လေသည်။

​ထို့ကြောင့် သူဟာ နည်းနည်း စိတ်လှုပ်ရှားနေခဲ့သည်။

​...