အခန်း ၄၄ : မိစ္ဆာလမ်းစဥ်သို့ ကူးပြောင်းသွားသော ချင်းကျောက်၊ ချီးကျူးလို့ မရတဲ့ ရွေးချယ်ခံအမှတ် (၂)
"...ဒီ မသေမျိုးကျင့်ကြံခြင်း သရုပ်ဖော် စနစ်က ငါ့ကို ပစ်မှတ်ထားနေတာပဲ"
ချန်ချန်ရွှယ်ဟာ သေဆုံးခြင်းကို ဘယ်လောက်ပဲ ကျင့်သားရနေပါစေ ဒီလို ရုတ်တရက် အဓိပ္ပာယ်မရှိတဲ့ သေဆုံးနည်းက သူမအား စိတ်ဓာတ်ကျစေပေသည်။
မိစ္ဆာသခင်ကြီး အပေါ် တံဆိပ်ခတ်ထားတာ လျော့ရဲသွားပြီး မိစ္ဆာသခင်ကြီးက ထွက်ပြေးသွားခဲ့ကာ ကောင်းကင်ဂိုဏ်းက တပည့်တွေဟာ ၎င်းကြောင့်သေဆုံးသွားခဲ့ကြလေသည်။
၎င်းက ဘယ်ဘက်ကပဲ ကြည့်ကြည့် အဓိပ္ပာယ်မရှိပေ။
ဒါပေမဲ့ သူမဟာ ဒီလို အဓိပ္ပာယ်မရှိတဲ့ ကိစ္စမျိုး ကြုံတွေ့ခဲ့ရလေသည်။ ပြောရရင် သူမ သေဆုံးတိုင်း တော်တော် အဓိပ္ပာယ်မရှိ ဖြစ်နေခဲ့ပြီး ပိုပိုပြီး အဓိပ္ပာယ်မရှိတဲ့ ဘက်ကို ဦးတည်နေခဲ့လေသည်။
တစ်နည်းအားဖြင့် ပြောရရင် သူမ သရုပ်ဖော် စနစ်ထဲမှာ ပိုအသက်ရှည်ရှည် နေနိုင်လေ ပိုအန္တရာယ် များလေ ဖြစ်နေပုံရပေသည်။
သူမရဲ့ ဂုဏ်သတ္တိတွေ သုည မဖြစ်သွားရင်တောင်ထူးဆန်းတဲ့ ကိစ္စရပ်မျိုးစုံ ကြုံတွေ့ရဦးမည်ဖြစ်၏။
ဒါ့အပြင် ကြည့်လိုက်ရင် ထူးဆန်းတယ်လို့ ထင်ရတဲ့ ဒီကိစ္စတွေက မကြာခဏဆိုသလို သေစေနိုင်ပြီး သူမ အသက်ကို တိတ်တဆိတ် ယူဆောင်သွားတတ်လေသည်။
ထို့ကြောင့် သူမဟာ အစကနေ ပြန်စရုံမှတပါး ရွေးချယ်စရာ မရှိတော့ချေ။
"ကောင်းကင်ဂိုဏ်း ဂိုဏ်းချုပ်ကြီးက မူလဝိညာဉ် အဆင့်ကို ရောက်နေတာ ပြီးတော့ ကောင်းကင်ဂိုဏ်းမှာ အထွတ်အထိပ် အကြီးအကဲတစ်ယောက် ရှိသေးတယ်လို့ ကြားတယ်.... အဲဒီလူက ကောင်းကင်ဂိုဏ်းရဲ့ ဂိုဏ်းချုပ်ဟောင်း ဖြစ်ပြီး သူလည်း မူလဝိညာဉ် အဆင့်ပဲ"
"မူလဝိညာဉ် အဆင့်ကျင့်ကြံသူ နှစ်ယောက်တောင် ရှိရက်နဲ့ တံဆိပ်ခတ်ထားတာကနေ အခုမှ ထွက်ပြေးလာတဲ့ မိစ္ဆာ တစ်ကောင်ကို မနိုင်ဘူးတဲ့လား... ဒါဆို အဲဒီမိစ္ဆာက မူလဝိညာဉ် အဆင့်အထက် ရောက်နေတယ် ဆိုတဲ့ သဘောလား"
"ဒါဆို ဘယ်လိုလုပ် ကောင်းကင်ဂိုဏ်းက တံဆိပ်ခတ်ထားနိုင်ခဲ့တာလဲ... ဒါမှမဟုတ် ကောင်းကင်ဂိုဏ်းမှာ ပိုသန်မာတဲ့ တစ်စုံတစ်ယောက် ရှိနေသေးတာလား"
"အရေးကြီးဆုံး အချက်က..."
"ဒီလောက် စွမ်းအားကြီးတဲ့ မိစ္ဆာ လက်ကနေ ဘယ်လို လွတ်မြောက်နိုင်မှာလဲ"
ချန်ချန်ရွှယ် ကြောင်အသွားခဲ့လေသည်။
ဒါက သူမဘဝမှာ ကြုံဖူးသမျှ အဓိပ္ပာယ်မရှိဆုံး ရန်သူပါပင်။ လက်တွေ့ဘဝက သူမရဲ့ ဆရာသခင်ထက်တောင် ပိုသန်မာနေသေးလေသည်။
အကယ်၍ အဲဒီ မိစ္ဆာသာ ဝိညာဉ်ဓားဂိုဏ်းမှာ ပေါ်လာရင် ဝိညာဉ်ဓားဂိုဏ်း မပျက်စီးရင်တောင် အကြီးအကျယ် ထိခိုက်ဆုံးရှုံးသွားပေလိမ့်မည်။
ထို့အပြင် ပြန်လည် နာလန်ထူနိုင်မှာ မဟုတ်ချေ။
မသေမျိုးကျင့်ကြံခြင်း သရုပ်ဖော် စနစ်ထဲမှာ သူမက ချီစုစည်းမှု အဆင့် (၁၀) ကျင့်ကြံသူ တစ်ယောက်ပဲ ရှိသေးပြီး လက်တွေ့ဘဝမှာတောင် အခြေတည်အဆင့် (၂)သာ ရှိလေသည်။
သူမ ဘာလုပ်သင့်လဲဆိုတာ မသိတော့သလို သူမမှာ ဘာအကြံဉာဏ်မှလည်း ရှိမနေပေ။
"ဒီလိုလုပ်ရင်ရော... ငါ သင့်တော်တဲ့ အချိန်တစ်ခု စောင့်ပြီး ကောင်းကင်ဂိုဏ်းကနေ ထွက်ခွာလိုက်ရင်ရော"
ဒီအတွေး ချန်ချန်ရွှယ် ခေါင်းထဲ ပေါ်လာခဲ့သည်။ လမ်းဆုံးနဲ့ ကြုံလာတဲ့အခါ သူမ ပထမဆုံး စဉ်းစားမိတဲ့ ဖြေရှင်းနည်းက ဆုတ်ခွာဖို့ပင်။
သူမ လမ်းဆုံးကို ရှောင်ရှားရပေမည်။
...
အလွန် သတိကြီးတဲ့ ချန်ချန်ရွှယ်နဲ့ ယှဉ်ရင် တခြား ရွေးချယ်ခံတစ်ယောက် ဖြစ်တဲ့ ချင်းကျောက်ကတော့ ဆန့်ကျင်ဖက်ပင်။ ပိုမှန်အောင် ပြောရရင် ချင်းကျောက်ရဲ့ စရိုက်ထဲမှာ သတိကြီးခြင်းဆိုတဲ့ စကားလုံးက အရေးပါတဲ့ နေရာကို ယူမထားခဲ့ပေ။
ချင်းကျောက် ခြေတစ်လှမ်း ဆုတ်လိုက်ပြီး မသေမျိုးကျင့်ကြံခြင်း သရုပ်ဖော် စနစ်ထဲ ပြန်ဝင်ကာ ပြီးခဲ့တဲ့ အကြိမ်နဲ့ တူညီတဲ့ ဘဝကိုပဲ ရွေးချယ်လိုက်၏။
သူမဟာ သရုပ်ဖော် စနစ်ထဲမှာ အကြိမ်ကြိမ် သေဆုံးခဲ့ရသည်အား လုံးဝ မကျေမနပ် ဖြစ်နေခဲ့ပေသည်။
သာမန် ကြည်လင်သောနေမင်းဂိုဏ်း လေးကများ သူမကို အကြိမ်ကြိမ် သတ်ရဲလေသည်။
သူမ သူတို့ကို ခွင့်မလွှတ်နိုင်ချေ။
မွေးဖွားလာကာစ ချင်းကျောက်ဟာ အံ့ဖွယ် ပါရမီကို ပြသခဲ့သည်။ အသက် တစ်နှစ်တောင် မပြည့်သေးခင်မှာပင် သူမဟာ စကားကို ကျွမ်းကျွမ်းကျင်ကျင် ပြောနိုင်ခဲ့သည်။ ဒါက ချင်းမိသားစုဝင် အားလုံးကို သူမ မိစ္ဆာ တစ်ကောင်ကောင် ပူးကပ်နေတယ်လို့ ထင်သွားစေခဲ့သည်။
အကယ်၍ ချင်းကျောက်သာ အရေးကြီးတဲ့ အချိန်မှာ ကလေးတစ်ယောက်လို ဟန်မဆောင်လိုက်ရင် သူမကို မိစ္ဆာလို့ တံဆိပ်ကပ်ခံရလောက်ပေသည်။
[အသက် ၃ နှစ် - သင်သည် သင့်မျိုးနွယ်စု၏ လျှို့ဝှက်ချက်များကို စူးစမ်းရှာဖွေရန် ကြိုးစားနေခဲ့သည်။]
[အသက် ၄ နှစ် - သင်သည် သင့်မျိုးနွယ်စု၏ လျှို့ဝှက်ချက်များကို ဆက်လက် စူးစမ်းရှာဖွေနေဆဲ ဖြစ်သည်။]
[အသက် ၅ နှစ် - သင်သည် အခြေတည်အဆင့် မသေမျိုးကျင့်ကြံသူ ဖြစ်သော ချင်းမျိုးနွယ်စု ခေါင်းဆောင်နှင့် သီးသန့် တွေ့ဆုံခဲ့သည်။ ချင်းမျိုးနွယ်စုမှာ လျှို့ဝှက်ချက် တစ်ခုခု ရှိမရှိ သင် မေးမြန်းလိုက်သည်။ မူလက ခေါင်းဆောင်က ပြန်ဖြေမည် မဟုတ်ဟု သင် ထင်ထားသော်လည်း သူက သင့်ကို လျှို့ဝှက်ချက် ပြောပြခဲ့သည်။ တကယ်တော့ အလွန် ရိုးရှင်းနေပေသည်။]
[ဒီလျှို့ဝှက်ချက်က သင့်ရဲ့ ကွယ်လွန်သွားတဲ့ မိခင်နဲ့ ပတ်သက်နေကြောင်း သင် သိလိုက်ရသည်။ သင့်မိခင်ရဲ့ အလောင်းကို ဒီနေ့အထိ ထိန်းသိမ်းထားပြီး ချင်းမျိုးနွယ်စုရဲ့ ဘိုးဘေးခန်းမဆောင် အောက်မှာ ထားရှိထားခဲ့သည်။ သူမရဲ့ အလွန် ထူးခြားတဲ့ ခန္ဓာကိုယ်ဖွဲ့စည်းပုံကြောင့် သူမရဲ့အလောင်းဟာ နှစ်ပေါင်းများစွာ ကြာတာတောင် မပုပ်သိုးသွားသေးပေ။]
[သင် တစ်စုံတစ်ခုကို နားလည်သဘောပေါက်သွားပုံ ရလေသည်။]
[အသက် ၈ နှစ် အရွယ်တွင် သင်ဟာ ပြင်းထန်စွာ ဒဏ်ရာရနေသော မိစ္ဆာကျင့်ကြံသူ တစ်ဦးနှင့် မတော်တဆ တွေ့ဆုံခဲ့သည်။ တစ်ဖက်လူသည် နာမည်ဆိုးဖြင့် ကျော်ကြားသော သွေးမိစ္ဆာဂိုဏ်းမှ လာကြောင်း သင် သိလိုက်ရသည်။ သင် သူ့ကို သတ်ဖြတ်ပြီး ဂုဏ်သတင်း ကျော်ကြားအောင် လုပ်နိုင်သော်လည်း သူ့ကို ကယ်တင်ရန် ရွေးချယ်လိုက်သည်။]
[မိစ္ဆာကျင့်ကြံသူ ပြန်လည် သက်သာလာပြီးနောက် သူဟာ သင့်ကို မသတ်ခဲ့ပေ။ ထိုအစား သူက သင့်ကို သိုလှောင်အိတ် တစ်လုံး ပေးခဲ့သည်။ သင် ဖွင့်ကြည့်လိုက်ရာ ကောင်းကင်မြေကြီး ရတနာ အမြောက်အမြားနှင့် အမိန့်ပေး တံဆိပ်ပြားတစ်ခုကို တွေ့ရှိခဲ့သည်။]
[တစ်ဖက်လူက ပြောသည်မှာ သင် တံဆိပ်ပြားကို ချိုးဖျက်လိုက်သည်နှင့် (၁၀) ရက်အတွင်း သင့်ကျေးဇူးကို ဆပ်ရန် သူ သေချာပေါက် ရောက်လာမည်ဟု ဆိုသည်။]
[သင် အတွေးနက်သွားပုံ ရလေသည်။]
[အသက် ၁၃ နှစ် - သင်နှင့် အတူပါလာသော အဘွားအိုကို အောင်မြင်စွာ နှိုးထစေနိုင်ခဲ့သည်။ သင့် စိုးရိမ်ပူပန်မှုများနှင့် အခြား အရာများကို သူမအား ပြောပြလိုက်သည်။ အဘွားအိုက ပြန်ပြောသည်မှာ လိုအပ်လာလျှင် လမ်းမှန်လား လမ်းမှားလား ဆိုတာ ဂရုစိုက်မနေသင့်ကြောင်း အရေးကြီးဆုံးက အသက်ရှင်ဖို့ ဖြစ်ကြောင်း ပြောခဲ့သည်။]
[အသက် ၁၇ နှစ် - အဘွားအို၏ လမ်းညွှန်မှုဖြင့် သင်သည် ချီစုစည်းမှု အဆင့် (၄) သို့ ရောက်ရှိသွားပေပြီ]
[အသက် ၁၈ နှစ် - သင့်ဘဝ၏ ပထမဆုံး ဆေးလုံးများကို စတင် ဖော်စပ်နိုင်ခဲ့သည်။ သင့်ပါရမီက မြင့်မားလွန်းသဖြင့် အဘွားအို စကားမပြောနိုင်အောင် ဖြစ်သွားခဲ့သည်။]
[အသက် ၂၀ နှစ် - ကြည်လင်သော နေမင်း ဂိုဏ်းမှ လူများ သင့်ဖခင်ထံ လာရောက် လည်ပတ်ခဲ့ကြသည်။ သင့်ဖခင်၏ မျက်နှာက အရုပ်ဆိုးနေခဲ့ပြီး သူတို့အား ပြန်လွှတ်လိုက်သည်။ ကြည်လင်သော နေမင်း ဂိုဏ်းမှ လူများ ထွက်ခွာသွားချိန် သူတို့မျက်လုံးထဲတွင် အေးစက်သော သတ်ဖြတ်လိုစိတ်များ ဖြတ်သန်းသွားသည်ကို သင် မြင်လိုက်ရသည်။]
[တစ်ဖက်လူ၏ လက်စားချေမှုကို သတိထားရန် သင့်ဖခင်အား သတိပေးလိုက်သည်။ သင့်ဖခင်က သင့်အကြံဉာဏ်ကို နားထောင်ပြီး ကြိုတင် ပြင်ဆင်မှုများ ပြုလုပ်ခဲ့သည်။]
[အသက် ၂၁ နှစ် - ချင်းမိသားစု၏ ပြင်ဆင်မှုများ ထိရောက်ခဲ့သည်။ ကြည်လင်သော နေမင်း ဂိုဏ်းက ချင်းမိသားစုကို တိုက်ခိုက်တော့မည်ကို ကြိုတင် သိရှိထားသဖြင့် မိသားစု တစ်ခုလုံး ထိတ်လန့်သွားခဲ့ကြသည်။ သူတို့သည် ကြည်လင်သော နေမင်း ဂိုဏ်း၏ ပြိုင်ဘက် လုံးဝ မဟုတ်ပေ။ ဒါ့အပြင် အခု သူတို့ ဘယ်ကို ပြေးရမည်နည်ူ။]
[သင့် အကြံပြုချက် - မိစ္ဆာလမ်းစဉ်သို့ ဝင်ရောက်ပါဆိုတဲ့ အကြံပြုချက်က အလွန် တုန်လှုပ်စရာ ကောင်းသဖြင့် လူတိုင်း ကြောင်အသွားခဲ့ကြသည်။]
[သို့သော် သင့်ဖခင်နှင့် ခေါင်းဆောင်ကြီးတို့က အလေးအနက် စဉ်းစားနေခဲ့ကြသည်။]
[...]
"ကျွန်တော် ထင်တာကတော့... ကျောက်အာပြောတာ အဓိပ္ပာယ် ရှိတယ်... ကျွန်တော်တို့ ချင်းမိသားစုကလွဲရင် ဖြောင့်မတ်သော လမ်းစဉ်က ဘယ်ဂိုဏ်းကများ ကြည်လင်သော နေမင်း ဂိုဏ်းကို စော်ကားရဲမှာလဲ" ချင်းကျောက်ရဲ့ ဖခင် ပြောလိုက်၏။
လက်ရှိ ချင်းမိသားစု ခေါင်းဆောင်က အံကြိတ်ပြီး ပြောလိုက်သည်။ "ဖြောင့်မတ်သော လမ်းစဉ်က ကျွန်တော်တို့ ချင်းမိသားစုကို လက်မခံနိုင်မှတော့ ဘာလို့ မိစ္ဆာလမ်းစဉ် ဘက်ကို မကူးပြောင်းလိုက်ရမှာလဲ"
ဒါက ချင်းမိသားစုရဲ့ စိတ်ပျက်အားငယ်စွာ လောင်းကြေးထပ်မှုပင်။ ချင်းမိသားစု ခေါင်းဆောင် အနေနဲ့ ချင်းမိသားစု အသက်ရှင်သန်ရေးကို ဦးစားပေရပေမည်။
ဒီလို လမ်းဆုံး အခြေအနေမျိုးမှာ တစ်ခုတည်းသော ထွက်ပေါက်က အမှောင်ဘက်ခြမ်းကို ကူးပြောင်းဖို့ပင်။
ချင်းမိသားစုရဲ့ ဘိုးဘေးခေါင်းဆောင်က တိုးတိုးလေး ပြောလိုက်၏။ "ဒါပေမဲ့ မိစ္ဆာလမ်းစဉ်နဲ့ ဆက်သွယ်ဖို့ ငါတို့မှာ ဘယ်လို အချိတ်အဆက် ရှိလို့လဲ"
"အကယ်၍ ချင်းမိသားစုက မိစ္ဆာလမ်းစဉ် ဘက်ကို ကူးပြောင်းချင်တယ် ဆိုရင်တောင် သူတို့က ငါတို့ ချင်းမိသားစုကို အထင်ကြီးချင်မှ ကြီးမှာ"
ဒါအမှန်ပါပင်။ မိစ္ဆာလမ်းစဉ်က လူတွေ အားလုံးက ထူးဆန်းတဲ့ စိတ်နေသဘောထားတွေ ရှိကြပြီး သူတို့ဟာ စည်းမျဉ်းစည်းကမ်းတွေကို မလိုက်နာဘဲ ရက်စက်ကြမ်းကြုတ်စွာ ပြုမူတတ်ကြလေသည်။
ဒါ့အပြင် ချင်းမိသားစုက အရင်တုန်းက ဖြောင့်မတ်သော လမ်းစဉ် မိသားစုဖြစ်ရာ မိစ္ဆာလမ်းစဉ် ဘက်ကို ကူးပြောင်းဖို့ သူတို့မှာ ဘယ်လို နည်းလမ်း ရှိမည်နည်း။
သူတို့ ဝမ်းနည်းစွာ တွေ့ရှိလိုက်ရတာကတော့ အမှောင်ဘက်ခြမ်းကို ကူးပြောင်းချင်ရင်တောင် သူတို့မှာ နည်းလမ်း မရှိပေ။
အကယ်၍ သူတို့ မိစ္ဆာလမ်းစဉ် ဘက်ကို ကူးပြောင်းပြီး စွမ်းအားကြီးတဲ့ မိစ္ဆာဂိုဏ်း တစ်ခုရဲ့ ကာကွယ်မှုကို မရရှိရင် ချင်းမိသားစုက ကြည်လင်သော နေမင်း ဂိုဏ်းကို ရင်ဆိုင်ရရုံသာမက ဖြောင့်မတ်သော ဂိုဏ်းပေါင်းများစွာရဲ့ တိုက်ခိုက်မှုကိုပါ ရင်ဆိုင်ရပေမည်။နန်းတော်ရဲ့ တရားဝင် အင်အားစုတွေကတောင် ချင်းမိသားစုကို ဖျက်ဆီးပစ်ကြပေမည်။
ရုတ်တရက် လူတိုင်းဟာ အေးစက်ပြီး မှိုင်းညို့တဲ့ ကိုယ်ရောင်ကိုယ်ဝါ တစ်ခုအား ခံစားလိုက်ကြရသည်။ ဒီကိုယ်ရောင်ကိုယ်ဝါထဲမှာ သွေးနံ့သင်းသင်းလေး ပါဝင်နေခဲ့ပြီး လူတွေကို တုန်ရီသွားစေကာ ကြက်သီးထသွားစေခဲ့လေသည်။
သူတို့ ကိုယ်ရောင်ကိုယ်ဝါရဲ့ အရင်းအမြစ်ကို ချက်ချင်း ကြည့်လိုက်ရာ အဲဒါပ ချင်းကျောက် ဖြစ်နေတာ တွေ့လိုက်ရလို့ တုန်လှုပ်သွားခဲ့ကြရပေသည်။
ထို့အပြင် ချင်းကျောက်၏ လက်ထဲမှာ တံဆိပ်ပြား တစ်ခု ကိုင်ထားခဲ့သည်။
တံဆိပ်ပြားပေါ်မှာ ထွင်းထုထားတဲ့ စာလုံး (၃) လုံးကို ရှိနေတဲ့ လူတိုင်း ရှင်းရှင်းလင်းလင်း မြင်လိုက်ကြရ၏။
သွေးမိစ္ဆာဂိုဏ်း.....
"ရှူး" ချင်းမိသားစု ခေါင်းဆောင် လေအေးတစ်ချက် ရှူရှိုက်လိုက်မိလေသည်။ သူ့ကိုယ်ရောင်ကိုယ်ဝါကို ဖုံးကွယ်ဖို့ အစီအရင် တစ်ခု အမြန် တည်ဆောက်လိုက်ပြီး တုန်လှုပ်စွာ မေးလိုက်၏။ "ဒါ သွေးမိစ္ဆာဂိုဏ်းရဲ့ တံဆိပ်ပြား မဟုတ်လား... ကျောက်အာ... ညည်း ဒါ ဘယ်က ရတာလဲ"
ချင်းကျောက် ဘာမှ ဖုံးကွယ်မထားတော့ပါပေ။ ဒီအဆင့် ရောက်နေမှတော့ ဖုံးကွယ်ထားစရာလည်း မလိုတော့ချေ။
သူမဟာ အဲဒီ မိစ္ဆာကျင့်ကြံသူကို ကယ်တင်ခဲ့ပြီး ဒီတံဆိပ်ပြားကို သိမ်းထားခဲ့ပြီး ဒီနေ့ကို စောင့်နေခဲ့ခြင်းပင်။
ချင်းကျောက် အရာအားလုံးကို ရှင်းလင်းစွာ ရှင်းပြလိုက်၏။
ဒါက လူတိုင်းကို အံ့သြသွားစေခဲ့လေသည်။
ချင်းမိသားစုရဲ့ ဘိုးဘေးခေါင်းဆောင်က တုန်လှုပ်မှုကနေ ပထမဆုံး ပြန်လည် သက်သာလာပြီး ရုတ်တရက် သူ့မုတ်ဆိတ်ကို သပ်ကာ ကျယ်လောင်စွာ ရယ်မောလိုက်လေသည်။ "ဟားဟားဟား... ငါ့ရဲ့ မြစ်မလေးက ရေကန်ထဲက ငါးကြင်းလေး မဟုတ်မှန်း ငါသိသားပဲ။ မကြာခင် သူမက နဂါး အဖြစ် ပြောင်းလဲတော့မှာ... ကောင်းတယ်... ကောင်းတယ်... ဘာပဲဖြစ်ဖြစ် ငါတို့က သေခါနီးနေပြီ... ဖြောင့်မတ်သော လမ်းစဉ်လား ... မိစ္ဆာလမ်းစဉ်လား ဆိုတာ ဘာဂရုစိုက်နေစရာ လိုတော့မှာလဲ... အရေးကြီးဆုံးက ချင်းမိသားစုရဲ့ မျိုးဆက်ကို ဆက်လက် ထိန်းသိမ်းထားဖို့ပဲ.."
ဒီနေ့မှာပဲ ချင်းကျောက်က ချင်းမိသားစုရဲ့ အဓိက ဆုံးဖြတ်ချက်ချတဲ့ အဆင့်ကို ဝင်ရောက်လာခဲ့သည်။ သူမရဲ့ ရာထူးက ချင်းမိသားစုရဲ့ ဘိုးဘေးခေါင်းဆောင်နဲ့ သူမဖခင် အောက်မှာပဲ ရှိတော့လေသည်။
သူမက ချင်းမိသားစုရဲ့ စစ်မှန်တဲ့ နံပါတ် ၃ ခေါင်းဆောင် ဖြစ်လာခဲ့ပြီး ဘယ်သူမှလည်း ကန့်ကွက်ခြင်း မရှိကြပေ။
[သင် သွေးမိစ္ဆာဂိုဏ်း၏ တံဆိပ်ပြားကို ချိုးဖျက်လိုက်ပြီး သွေးမိစ္ဆာဂိုဏ်းမှ လူတစ်ယောက် ရောက်လာရန် (၇) ရက် စောင့်ဆိုင်းခဲ့သည်]
[အဲဒီတုန်းက သင် ကယ်တင်ခဲ့တဲ့ သွေးမိစ္ဆာဂိုဏ်း ကျင့်ကြံသူက တကယ်တော့ သွေးမိစ္ဆာဂိုဏ်းရဲ့ ပဉ္စမမြောက် အကြီးအကဲ ဖြစ်မှန်း အခုမှ သင် သိလိုက်ရသည်။ တစ်ဖက်လူက သွေးမိစ္ဆာဂိုဏ်းမှာ အလွန် ဂုဏ်သရေ ကြီးမားပြီး မိစ္ဆာကျင့်ကြံသူ အများအပြားက သူ့တပည့်များ ဖြစ်ကြသည်။]
သင် သွေးမိစ္ဆာဂိုဏ်းမှ လူများကို ချင်းမိသားစု၏ အကျပ်အတည်း အကြောင်း အလုံးစုံ ပြောပြလိုက်ရာ သွေးမိစ္ဆာဂိုဏ်းက ချင်းမိသားစုမှ လူကြီးလူငယ် အားလုံးကို တိတ်တဆိတ် ခေါ်ဆောင်သွားခဲ့သည်။ သင့်ကွယ်လွန်သူ မိခင်၏ အလောင်း အပါအဝင်ပင်။
ကြည်လင်သော နေမင်း ဂိုဏ်းက ချင်းမိသားစုဆီ ရောက်လာတဲ့အခါ ချင်းမိသားစုမှာ လူတစ်ယောက်မှ မရှိတော့တာ တွေ့လိုက်ရလို့ တုန်လှုပ်သွားခဲ့ကြသည်။
သင် လမ်းဆုံးကို အောင်မြင်စွာ ချိုးဖျက်နိုင်ခဲ့ပါပြီ။
...
ပြောရမယ် ဆိုရင် နည်းနည်း မဆင်မခြင် နိုင်တယ်လို့ ထင်ရတဲ့ ချင်းကျောက်က ဒုတိယ ခေါင်းဆောင် ဖြစ်လာပြီး ဒီတစ်ခါ သူမရဲ့ စွမ်းဆောင်ရည်က သိပ်ကောင်းတယ်လို့ ပြောလို့ရပေသည်။ သိထားရမှာက လက်တွေ့ဘဝမှာ ချင်းကျောက်ဟာ ကျင်းရှင်း နန်းတော်သခင်ကြီးရဲ့ သမီးဖြစ်လေသည်။ သူမက စစ်မှန်တဲ့ ဖြောင့်မတ်သော လမ်းစဉ်က လူတစ်ယောက်ဖြစ်ကာ ဖြောင့်မတ်သော လမ်းစဉ်ရဲ့ အမြစ်တွယ်နေတဲ့ လူမျိုးပင်။
ယုတ္တိဗေဒအရ ပြောရရင် သူမလို လူမျိုးက မိစ္ဆာကျင့်ကြံသူတွေကို အလွန် ရွံရှာမုန်းတီးတတ်ကြပေသည်။
ဒါပေမဲ့ မသေမျိုးကျင့်ကြံခြင်း သရုပ်ဖော် စနစ်ထဲမှာတော့ ချင်းကျောက်ဟာ လွယ်လွယ်ကူကူပဲ မိစ္ဆာလမ်းစဉ် ဘက်ကို ကူးပြောင်းသွားခဲ့သည်။
သူမ လုံးဝ မတွန့်ဆုတ်ခဲ့ပေ။
တကယ်တော့... ချင်းကျောက် စိတ်လှုပ်ရှားနေတာကိုတောင် ပိုင်ယီ မြင်နိုင်လေသည်။
"အာ... ဒါက.."
အကယ်၍ ကျင်းရှင်း နန်းတော်သခင်ကြီးသာ သူ့သမီးမှာ ဒီလို ပုန်ကန်ချင်တဲ့ စိတ်မျိုး ရှိနေမှန်း သိသွားရင် သူ အကြီးအကျယ် ဒေါသထွက်သွားလောက်ပေသည်။
သို့ပေမဲ့ ချင်းကျောက်ရဲ့ မမျှော်လင့်ထားတဲ့ ကိုင်တွယ်ဖြေရှင်းမှုက သူမကို ဒီအကျပ်အတည်းကနေ အောင်မြင်စွာ လွတ်မြောက်စေခဲ့၏။
"တော်တော် မိုက်တာပဲ..."
ထင်ထားတဲ့ အတိုင်းပါပင်။ ပါရမီရှင်ဖြစ်နိုင်တဲ့ ဘယ်သူမှ ရိုးရှင်းမနေပေ။
ချန်ချန်ရွှယ်က သတိကြီးပြီး တည်ငြိမ်စွာနဲ့ ပိုပိုသန်မာလာနိုင်ပြီး တခြားတစ်ဖက်မှာ ချင်းကျောက်က အန္တရာယ်ကြားကနေ ကြွယ်ဝချမ်းသာမှုကို ရှာဖွေပြီး ထွက်ပေါက် ရှာနိုင်လေသည်။
အကယ်၍ တခြားလူသာ ဒီအခြေအနေတွေနဲ့ ကြုံတွေ့ရရင် မျှော်လင့်ချက် ကုန်ဆုံးသွားလောက်ပြီး သူတို့ရဲ့ စိတ်ဓာတ်တွေ ပြိုလဲသွားလောက်ပေပြီ။
ဒါပေမဲ့ ဒီနှစ်ယောက်က ဖြေရှင်းနည်း ရှာတွေ့နိုင်ခဲ့ကြသည်။
"အင်း... ငါ့အောက် နည်းနည်းလေးပဲ နိမ့်တာပါ" ရွေးချယ်ခံနှစ်ယောက်ရဲ့ စွမ်းဆောင်ရည်တွေကို ပိုင်ယီ သိပ်ကျေနပ်သွားခဲ့လေသည်။
[အသက် ၂၅ နှစ်တွင် သွေးမိစ္ဆာဂိုဏ်းသို့ ဝင်ရောက်ခဲ့သော ချင်းကျောက်သည် သွေးမိစ္ဆာဂိုဏ်း ပဉ္စမ အကြီးအကဲ၏ တိုက်ရိုက် တပည့်ဖြစ်လာခဲ့သည်။ သွေးမိစ္ဆာဂိုဏ်းတွင် ချင်းမိသားစု၏ အဆင့်အတန်း မြင့်တက်လာခဲ့သည်။ ဘယ်သူက သတင်းပေါက်ကြားလိုက်မသိသလို သွေးမိစ္ဆာဂိုဏ်းထဲမှာ သူလျှို ရှိနေသလား မသိရပေမယ့် ဖြောင့်မတ်သော လမ်းစဉ်က ဒီကိစ္စကို သိရှိသွားခဲ့သည်။ ဒီအဆင့် ရောက်တော့ ချင်းမိသားစုဟာ လူတိုင်း သတ်ချင်နေတဲ့ အဖွဲ့အစည်း ဖြစ်လာခဲ့သည်။]
[အသက် ၂၈ နှစ် - သူမ၏ မိခင်တွင် ရှားပါးသော ကောင်းကင် ဝိညာဉ်ခန္ဓာရှိကြောင်း သွေးမိစ္ဆာဂိုဏ်း ပဉ္စမ အကြီးအကဲထံမှ ချင်းကျောက် သိရှိလိုက်ရသည်။ သူမ၏ အလောင်းကို အချိန်ကာလ တစ်ခုအထိ သန့်စင်ပြီးနောက်မှာ သက်တမ်းကုန်ဆုံးခါနီး စွမ်းအားကြီး ကျင့်ကြံသူများဟာ ခန္ဓာကိုယ် ပြောင်း၍ အသုံးပြုနိုင်မည် ဖြစ်သည်။ ဒါ့အပြင် သူတို့၏ ကျင့်ကြံမှုလည်း သိပ်မလျော့ကျသွားပေ။]
[ကြည်လင်သော နေမင်း ဂိုဏ်း၏ ရည်ရွယ်ချက် အစစ်အမှန်ကို ချင်းကျောက် နားလည်သွားခဲ့သည်။ သွေးမိစ္ဆာဂိုဏ်းက လူများကလည်း သူမမိခင်၏ အလောင်းကို လိုချင်တပ်မက်လာမှာ သူမ နည်းနည်း စိုးရိမ်လာသည်။]
[အသက် ၂၉ နှစ် - အတွေ့အကြုံ ရှာဖွေရေး ခရီးစဉ် တစ်ခုတွင် သူမသည် မိစ္ဆာဂိုဏ်း၏ တပည့် ဖြစ်ကြောင်း ဖြောင့်မတ်သော ကျင့်ကြံသူ တစ်ဦး၏ မှတ်မိခြင်းကို ခံလိုက်ရသည်။]
[ချင်းကျောက်ကို အခြေတည်အဆင့် ကျင့်ကြံသူ (၂) ဦးက လိုက်လံ ဖမ်းဆီးခဲ့သည်]
[ချင်းကျောက် ရှုံးနိမ့်ပြီး သေဆုံးသွားသည်]
[သူမ၏ အသက်မှာ (၂၉) နှစ်၊ (၀၄) လ နှင့် (၂၂) ရက် ဖြစ်သည်။]
ပိုင်ယီ သတိထားမိလိုက်တာက သူ ချင်းကျောက်ကို ချီးကျူးပြီး မိနစ်ပိုင်း အကြာမှာပဲ ရွေးချယ်ခံ အမှတ် (၂)ဟာ ရှုံးနိမ့်သွားခဲ့ခြင်းပင်။
"အာ... ထားပါတော့..."
"အဟွတ်..."
သူနဲ့ လုံးဝ မဆိုင်ပါဘူးနော်.........
...