အခန်း ၄၃ : အကြီးကဲယွဲ့ သေဆုံးခြင်း၊ သူတော်စင်မ အကြည့်တစ်ချက်ဖြင့် သေဆုံးခြင်း
မွန်းတည့်ချိန် မရောက်ခင်မှာပဲ တည်းခိုခန်းထဲမှာ ဟင်းပွဲတွေ ရောက်လာဖို့ စောင့်နေတဲ့ ပိုင်ယီဟာ ဆေးဆိုင်ပိုင်ရှင် လျူအိုကြီး အလောတကြီး ရောက်လာတာကို မြင်လိုက်ရ၏။
လျူအိုကြီးဟာ ပိုင်ယီကို မြင်လိုက်တဲ့အခါ သူ့မျက်နှာပေါ်က ပျော်ရွှင်မှုကို လုံးဝ ဖုံးကွယ်ထားလို့ မရပေ။
ထို့နောက် သူဟာ စိတ်လှုပ်ရှားစွာ ပြောလိုက်၏။ "သခင်လေးပိုင်... ကောင်းကင်ဘုံရဲ့ အမျက်ဒေါသပဲဗျ... လီမျိုးနွယ်စုက ကောင်းကင်ဘုံရဲ့ အမျက်ဒေါသကို ခံစားလိုက်ရပြီး ဒီမနက် ကောင်းကင်ပေါ်ကနေ မိုးကြိုး နှစ်ချက် ပစ်ချပြီး ယုတ်မာတဲ့ လီမျိုးနွယ်စုကို ရှင်းပစ်လိုက်တယ်တဲ့..."
"လီမျိုးနွယ်စုရဲ့ အဓိက ဂိုဏ်းသားတွေ ဘယ်သူမှ မလွတ်မြောက်ကြဘူး... အပြင်မှာ အလုပ်လုပ်နေတဲ့ လူတွေပဲ လွတ်သွားကြတာ"
"ကောင်းကင်ဘုံတောင် လီမျိုးနွယ်စုရဲ့ ရက်စက်ကြမ်းကြုတ်တဲ့ လုပ်ရပ်တွေကို သည်းမခံနိုင်တော့ဘူးပဲ"
လျူအိုကြီးဟာ ပိုင်ယီရဲ့ ရှေ့မှာ အမြန် ဝင်ထိုင်လိုက်ပြီး လက်ဖက်ရည် တစ်ခွက် ငှဲ့ကာ တစ်ကျိုက်တည်း မော့သောက်လိုက်၏။
အနည်းငယ် အသံဝင်နေတဲ့ လည်ချောင်းကို စိုစွတ်သွားစေပြီးနောက်မှာ သူဟာ စိတ်လှုပ်ရှားစွာ ဆက်ပြောလိုက်သည်။ "လီဟယ်ရှန်း၊ လီရှန်းခယ်၊ လီလျန်ယီ၊ လီရှုဟိုင်... ဒီကောင်စုတ်တွေက ဦးလေးလျူ လို ကုန်သည်တွေကို နှစ်ပေါင်းများစွာ အနိုင်ကျင့်လာခဲ့တာ ငါတို့ ကောင်းကောင်း မှတ်မိနေသေးတယ်"
"ဒီကောင်စုတ်တွေက မကောင်းမှုတွေ မရေမတွက်နိုင်အောင် လုပ်ခဲ့ကြတာ... ဒီနေ့တော့ ကောင်းကင်ဘုံက ငါတို့အတွက် တကယ် ကလဲ့စားချေပေးလိုက်ပြီပဲ"
ဒီအထိ ပြောပြီးတော့ လျူအိုကြီးဟာ နောင်တရတဲ့ အရိပ်အယောင်လေးနဲ့ ပြောလိုက်၏။ "ဒါပေမဲ့ ကြားရတာတော့ အသက်ငယ်တဲ့ လူတွေက ကိစ္စတွေ ဆွေးနွေးဖို့ ဘိုးဘေးခန်းမဆောင်ထဲ ဝင်ခွင့် မရကြဘူးတဲ့"
"ဒါ့အပြင် လီမျိုးနွယ်စုရဲ့ အဓိက အဖွဲ့ဝင် သုံးလေးယောက်က လောလောဆယ် ချင်းဟယ် ခရိုင် အပြင်ဘက် ရောက်နေကြတယ်"
"သူတို့ အကုန် သေကုန်ရင် ဘယ်လောက် ကောင်းမလဲ... နှမြောစရာ ကောင်းလိုက်တာ..."
ဒါကို ကြားပြီးနောက် ပိုင်ယီဟာ မျက်ခွံ ပင့်လိုက်မ်လေသည်။ ထို့နောက် သူ့ဟာ အံ့သြဟန်ဆောင်ပြီး မေးလိုက်၏။ "ဦးလေးလျူ... ဒီသတင်း ဘယ်က ကြားတာလဲ"
လျူအိုကြီးဟာ တဟားဟား ရယ်မောလိုက်သည်။ "ဒါပေါ့...လီမျိုးနွယ်စုဆီကပဲပေါ့... လီမျိုးနွယ်စုက လောလောဆယ် ဖရိုဖရဲ ဖြစ်နေပြီ... လီမျိုးနွယ်စုရဲ့ မျိုးဆက်သစ် လူငယ်တွေက ဆယ်ကျော်သက် အရွယ်တွေပဲ ရှိသေးတာ... တချို့ဆို အသက် နည်းနည်းလေးပဲ ရှိသေးတာမို့ သူတို့က သူတို့အောက်က လူတွေကို ဘယ်လို ထိန်းချုပ်နိုင်မှာလဲ"
"သတ္တိရှိတဲ့ အစေခံ အများကြီးက အထဲက ရတနာ ပစ္စည်းတွေကို သိမ်းယူပြီး ထွက်ပြေးကုန်ကြပြီ... ဒီအခွင့်အရေးကို သုံးပြီး သူတို့က ချမ်းသာချင်နေကြတာလေ"
"ပြီးတော့ ချောင်ဂိုဏ်းက လူတွေလည်း လီအိမ်တော်ထဲ ဖောက်ထွင်း ဝင်ရောက်နေကြပြီ"
"ငါသာ သိက္ခာမရှိရင်... အဲဒီအထဲ သွားပြီး အပျော်ဝင်ပါလိုက်ဦးမယ်"
ပိုင်ယီ ထပ်မေးလိုက်၏။ "ဒီလောက် ကိစ္စကြီး ဖြစ်နေတာကို နန်းတော်က မှုခင်းထိန်းသိမ်းရေး ရုံးက ဂရုမစိုက်ဘူးလား"
"ဂရုစိုက်ပါတယ် ဒါပေမဲ့ သူတို့က လီမျိုးနွယ်စုရဲ့ မျိုးဆက်သစ် လူငယ်တွေကိုပဲ ကာကွယ်ပေးနိုင်တာလေ... တခြားကိစ္စတွေကို ဂရုမစိုက်နိုင်တော့ဘူး"
လျူအိုကြီးက ထပ်ပြောလိုက်သည်။ "မှုခင်းထိန်းသိမ်းရေး ရုံးက ကျင့်ကြံသူတွေ အကုန် ရောက်နေကြတာ"
"အကယ်၍ မှုခင်းထိန်းသိမ်းရေး ရုံးကသာ ကာကွယ်မပေးရင် လီမျိုးနွယ်စုက မီးရှို့ခံရလောက်ပြီ"
"ချင်းဟယ် ခရိုင်မှာ သူတို့ရဲ့ ရန်သူတွေက များမှများပဲ.."
"..."
လျူအိုကြီးဆီက သတင်းတွေ ကြားပြီးနောက်မှာ လက်ရှိ အခြေအနေကို ပိုင်ယီ အတော်အတန် နားလည်သဘောပေါက်သွားခဲ့သည်။
သူဟာ လီမျိုးနွယ်စုရဲ့ အဓိက အဖွဲ့ဝင်တွေကို သုတ်သင်လိုက်တဲ့အခါ လီမျိုးနွယ်စုကို စောင့်ကြည့်နေတဲ့ လူတွေက ငြိမ်မနေနိုင်တော့ပေ။
နည်းနည်းဖြစ်ဖြစ် များများဖြစ်ဖြစ် သူတို့ အားလုံးဟာ လီမျိုးနွယ်စုရဲ့ အနိုင်ကျင့်တာ ခံခဲ့ရဖူးပြီး တချို့ဆို လီမျိုးနွယ်စုနဲ့ သွေးကြွေး ရှိနေကြလေသည်
ဒါပေမဲ့... အရင်တုန်းက လီမျိုးနွယ်စုရဲ့ ရက်စက်ကြမ်းကြုတ်မှုနဲ့ အခြေခံအုတ်မြစ်ကြောင့် သူတို့ ဘာမှ မလုပ်ရဲခဲ့ကြပေ။
သို့ပေမဲ့ အခုတော့ မတူတော့ပေ။
ဒါပေါ့ ရေနောက်မှာ ငါးရှာချင်တဲ့ လူတွေလည်း အများကြီး ရှိနေမှာ သေချာပြီး ဒီလို လူတွေက အများစု ဖြစ်နေလောက်ပေသည်။
ဒီအဆင့် ရောက်နေပြီ ဆိုတော့ လီမျိုးနွယ်စုက ချင်းဟယ် ခရိုင်ကနေ ပျောက်ကွယ်သွားမှာ မဟုတ်ပေမယ့် အများကြီး အင်အားချည့်နဲ့သွားမှာ သေချာလေသည်။
အကယ်၍ တစ်နေ့ ကောင်းကင်ပေါ်ကနေ စွမ်းအားကြီးတဲ့ လူတစ်ယောက် ဆင်းမလာရင် ဘယ်သူမှ လီမျိုးနွယ်စုရဲ့ ကျဆင်းမှုကို ပြန်လည် ကုစားနိုင်မည် မဟုတ်ချေ။
ပိုင်ယီလည်း အခြေအနေ ကောင်းနေတုန်း ရပ်တန့်လိုက်၏။
အဓိက တရားခံ လီဟယ်ရှန်း သေသွားပြီ ဖြစ်လို့ လီမျိုးနွယ်စုကို သူ ဆက်ပြီး ဒုက္ခမပေးချင်တော့ပေ။
...
အချိန်များ ကုန်ဆုံးသွားခဲ့ပြီး မကြာခင် မွန်းတည့်ချိန် ရောက်လာခဲ့သည်။
တည်းခိုခန်းထဲက လေထုက အေးစက်ပြီး ခြောက်ကပ်နေတုန်းပင်။ ဘာပဲဖြစ်ဖြစ် ချန်အိမ်တော်က စားသောက်ပွဲကြီး ပြီးဆုံးဖို့ ရက်အနည်းငယ် လိုသေးတာရာ ရံဖန်ရံခါ ဖောက်သည် အနည်းငယ် ဝင်လာပြီး လီမျိုးနွယ်စုရဲ့ ဒုက္ခရောက်နေတဲ့ အကြောင်း ပြောဆိုကြလေသည်။ သူတို့ အားလုံးဟာ လီမျိုးနွယ်စုရဲ့ ကံဆိုးမှုကို ပျော်ရွှင်နေသလိုမျိုး ပေါ့ပေါ့ပါးပါး ပြောဆိုနေခဲ့ကြသည်။
ဖြစ်နိုင်တာက သူတို့ ကောင်းကင်ဘုံမှာ မျက်စိရှိတယ်လို့ ချီးကျူးနေကြတာ ဒါမှမဟုတ် လီမျိုးနွယ်စုက လူတွေ မသေသေးလို့ နောင်တရနေတာ ဖြစ်လောက်ပေသည်။
ဒါကို ကြည့်ရင် သိသာတာက သာမန် ပြည်သူလူထုရဲ့ မျက်လုံးထဲမှာ ချင်းဟယ် ခရိုင်က လီမျိုးနွယ်စု ဆိုတာ နာမည်ကောင်း မရှိတဲ့ အဖွဲ့အစည်း တစ်ခုပင်။
၎င်းက အမှန်ပင်။
ချောင်ဂိုဏ်းလို ရာဇဝတ်ဂိုဏ်း တစ်ခုကို မွေးမြူထားတဲ့ မျိုးနွယ်စု တစ်ခုက နာမည်ကောင်း ရှိနေရင်မှ အံ့သြစရာပင်။
ပိုင်ယီ နေ့လယ်စာ စားပြီး ဟင်းရည် တစ်ငုံ သောက်လိုက်ချိန်မှာပဲ မတူညီတဲ့ နေရာတွေမှာ ရှိနေတဲ့ ရွေးချယ်ခံတွေဟာ မသေမျိုးကျင့်ကြံခြင်း သရုပ်ဖော် စနစ်နဲ့ ချိတ်ဆက်ဖို့ ကြိုးစားနေတာကို အာရုံခံမိလိုက်၏။
ထို့ကြောင့် သူဟာ နှစ်ယောက်စလုံးကို ဝင်ရောက်ခွင့် ပေးလိုက်လေသည်။
[အသက် ၀ နှစ် - ချန်ချန်ရွှယ်သည် ဆင်းရဲသော မိသားစုတွင် မွေးဖွားခဲ့သည်။ ဒီဘဝမှာ သူမ ဘာပြဿနာမှ မရှာဖို့ ဆုံးဖြတ်လိုက်သည်။ ပြီးခဲ့တဲ့ မသေမျိုးကျင့်ကြံခြင်း သရုပ်ဖော် ဘဝတွေမှာတော့ ဒီလို အတွေးမျိုး ရှိခဲ့ပေမယ့်ပေါ့။]
[အသက် ၃၀ နှစ် - နှစ်တိုင်း ဂိုဏ်းကို ပြန်ပြီး ကျင့်ကြံခြင်း အရင်းအမြစ်တွေ ယူတာကလွဲရင် ချန်ချန်ရွှယ်ဟာ ဂိုဏ်းမှာ နေခဲလေသည်။ သူမက မမြင်ရတဲ့ လူတစ်ယောက်လိုပဲ အလွန် နှိမ့်ချစွာ နေထိုင်ခဲ့သည်။]
[အသက် ၆၀ နှစ် - သူမ မကောင်းမှု ပြုလုပ်နေသော မိစ္ဆာကျင့်ကြံသူ အနည်းငယ်နှင့် ကြုံတွေ့ခဲ့ရသည်။ ချန်ချန်ရွှယ်ဟာ သူတို့ကို တားဆီးချင်သော်လည်း သူမ၏ စိတ်ကို ထိန်းချုပ်လိုက်သည်။ သူမက အနီးအနားရှိ ဂိုဏ်းများသို့ မိစ္ဆာကျင့်ကြံသူများ၏ ခြေရာများကို သတင်းပို့ရန် ရွေးချယ်လိုက်ပြီး မကောင်းမှု ပြုလုပ်နေသော မိစ္ဆာကျင့်ကြံသူ အနည်းငယ်ကို သုတ်သင်လိုက်သည်။]
[အသက် ၈၀ နှစ် - ချန်ချန်ရွှယ်သည် ချီစုစည်းမှု အဆင့် (၈) သို့ ရောက်ရှိသွားလေသည်။ သူမဟာ ဂိုဏ်းမှာ ကြာကြာနေဖို့ မရွေးချယ်ပဲ ဂိုဏ်းမှ ကျင့်ကြံခြင်း အရင်းအမြစ်များ ရရှိပြီးနောက်မှာ သူမဟာ ချက်ချင်း တောင်အောက်ဆင်းပြီး အတွေ့အကြုံ ရှာဖွေခဲ့သည်။]
[အသက် ၉၀ နှစ် - ချန်ချန်ရွှယ် အနေနဲ့ အသက် (၁၀၀) မတိုင်ခင် အခြေတည်အဆင့် (၁) ကို ချိုးဖျက်ဝင်ရောက်ဖို့ မျှော်လင့်ချက် မရှိတော့ဟု ခံစားလိုက်ရသည်။ သို့သော် အသက် (၁၀၀) မတိုင်ခင် ချီစုစည်းမှု အဆင့် (၉) ကို ချိုးဖျက်ဝင်ရောက်ရန် ကြိုးစားနိုင်ခဲ့သည်။]
[အသက် ၉၅ နှစ် - ဂျူနီယာ ညီမလေး ဟိုရင်းယွမ်သည် အခြေတည်အဆင့် (၁) ကို တည်ငြိမ်အောင် လုပ်ဆောင်နိုင်ခဲ့သည်။ ချန်ချန်ရွှယ်ဟာ သူမအတွက် ရင်ထဲကနေ ဝမ်းမြောက်မိနေခဲ့သည်။ သူမကိုယ်တိုင်လည်း ချီစုစည်းမှု အဆင့် (၉) သို့ ရောက်ရှိသွားပေပြီ။]
[အသက် ၁၀၀ နှစ် - ချန်ချန်ရွှယ်သည် ကောင်းကင်ဂိုဏ်းမှ သတင်းတစ်ခု ကြားသိလိုက်ရသည် - အကြီးအကဲ ယွဲ့သည် ကျင့်စဉ်၏ တန်ပြန်မှုကြောင့် သေဆုံးသွားလေသည်။ ဤသတင်းကို ကြားပြီးနောက်မှာ ချန်ချန်ရွှယ်ဟာ သက်ပြင်းမချဘဲ မနေနိုင်တော့ပေ။]
[...]
"ငါ အသက် (၁၀၀) ပြည့်သွားပြီ... အလကား စောင့်ဆိုင်းခဲ့ရတာ မဟုတ်ဘူးပဲ... ငါ့အတွေးတွေ မမှားဘူး။ အကြီးအကဲ ယွဲ့ကို ကိုင်တွယ်ဖို့ နည်းလမ်းမရှိမှတော့ သူ့သေတဲ့အထိ စောင့်လိုက်တာကပဲ ကောင်းတယ်... ဘာပဲဖြစ်ဖြစ် သူမက ကျင့်စဉ် တန်ပြန်မှု အဆင့်ကို ရောက်နေပြီဆိုတော့ မကြာခင် သူမ သေမှာပဲ"
ချန်ချန်ရွှယ်ရဲ့ မျက်နှာက သိပ်မပြောင်းလဲသွားပေမယ့် စိတ်လှုပ်ရှားစွာ သက်ပြင်းမချဘဲ မနေနိုင်တော့ပေ။ "ဒီနည်းအားဖြင့် ငါဖြစ်ဖြစ် ဂျူနီယာ ညီမလေး ဖြစ်ဖြစ် အန္တရာယ်ကနေ လွတ်မြောက်နိုင်ပြီ"
ဝမ်းနည်းစရာ ကောင်းတာက သူမရဲ့ မွေးရာပါ ပါရမီက သိပ်ညံ့ဖျင်းလွန်းပြီး ဓားပါရမီ တစ်ခုတည်းနဲ့ ထောက်ပံ့ထားရတာပင်။
အကယ်၍ သူမမှာသာ လက်တွေ့ဘဝကလို မသေမျိုးကျင့်ကြံခြင်း မွေးရာပါ ပါရမီ ရှိခဲ့ရင် နှစ် (၁၀၀) အတွင်း ရွှေအမြုတေ အဆင့်ကို လုံးဝ ရောက်ရှိနိုင်လောက်တယ်လို့ ချန်ချန်ရွှယ် ခံစားမိလေသည်။
ထို့အပြင် သူမရဲ့ ကိုယ်ပိုင်ခွန်အားကို သုံးပြီး အကြီးအကဲ ယွဲ့ကို သတ်နိုင်မည်ဖြစ်ကာ ဒီလောက် ရုန်းကန်နေစရာ လိုမည်မဟုတ်ချေ။
"နောက်ဆုံးတော့ ငါ့ရဲ့ကိုယ်ပိုင်ခွန်အားက မလုံလောက်သေးတာပဲ"
ချန်ချန်ရွှယ် ခေါင်းခါလိုက်၏။ "အခု ငါ့ရဲ့ နောက်ထပ် ရည်မှန်းချက်က မသေမျိုးကျင့်ကြံခြင်း သရုပ်ဖော် စနစ်ထဲမှာ အခြေတည်အဆင့်ကို ချိုးဖျက်ဝင်ရောက်ဖို့ပဲ... ပြီးရင် အခြေတည်အဆင့် (၃) ကို တစ်ရှိန်ထိုး ရောက်အောင်သွားမယ်... ဒါမှ ငါ့ဘဝကို ပြောင်းလဲနိုင်မှာ"
ထို့နောက် သူမဟာ ကျင့်ကြံခြင်းကို ဆက်လက် အာရုံစိုက်လိုက်၏။
[အသက် ၁၁၀ နှစ် - သင်သည် ချီစုစည်းမှု အဆင့် (၁၀) ကို ချိုးဖျက်ဝင်ရောက်နိုင်ပြီဟု ခံစားလိုက်ရသည်။ သို့သော် စိတ်ချရစေရန် ဘေးကင်းကင်းပဲ နေရန် ဆုံးဖြတ်လိုက်ပြီး ချိုးဖျက်ဝင်ရောက်မှု မအောင်မြင်ပါက ဖြစ်ပေါ်လာမည့် တန်ပြန်မှုတို့အား ရှောင်ရှားလိုက်သည်။ သင်ဟာ အကြီးအကဲ ယွဲ့လို အဖြစ်မျိုး မရောက်ချင်ပေ။]
[အသက် ၁၂၀ နှစ် - သင်သည် ချီစုစည်းမှု အဆင့် (၁၀) သို့ ရောက်ရှိသွားပေပြီ]
[အသက် ၁၂၁ နှစ် - ကောင်းကင်ဂိုဏ်းရှိ မိစ္ဆာချုပ်လှောင် မျှော်စင်တစ်ခုပေါ်မှ တံဆိပ်ခတ်ထားမှု လျော့ရဲသွားခဲ့သည်။ ထို့ကြောင့် မိစ္ဆာဟာ မျှော်စင်ကို ဖောက်ထွင်းထွက်ပြေးသွားခဲ့ပြီး ကောင်းကင်ဂိုဏ်းသည် ကြီးမားသော ကပ်ဘေးတစ်ခုနှင့် ကြုံတွေ့နေခဲ့ရသည်။ နောက်ဆုံးတော့ သင်ဟာ ကောင်းကင်ဂိုဏ်း၏ တပည့်တစ်ဦး ဖြစ်နေဆဲဖြစ်ရာ ကပ်ဘေးကို ကောင်းကင်ဂိုဏ်းနှင့်အတူ တိုက်ခိုက်ရန် ဂိုဏ်းသို့ ပြန်လာခဲ့သည်။]
[မိစ္ဆာက အလွန် စွမ်းအားကြီးလှရာ ကောင်းကင်ဂိုဏ်း၏ ဂိုဏ်းချုပ်ကြီးဟာ တိုက်ပွဲတွင် ကျဆုံးသွားခဲ့သည်။ အကြီးအကဲ အမြောက်အမြားဟာလည်း တိုက်ပွဲတွင် ကျဆုံးသွားခဲ့သလို သင့် ဂျူနီယာ ညီမလေးလည်း တိုက်ပွဲတွင် ကျဆုံးသွားခဲ့ရသည်။ ကောင်းကင်ဂိုဏ်းတွင် တပည့် (၁၀) ယောက်အောက်သာ ကျန်ရှိတော့ပေသည်။]
[မိစ္ဆာက သင့်ကို စူးစိုက်ကြည့်လိုက်ရာ ထိုအကြည့်ဖြင့်ပင် သင်ဟာ သေဆုံးသွားခဲ့သည်။]
[အသက် - ၁၂၁ နှစ်၊ ၁၁ လ၊ ၀၂ ရက်]
...