အခန်း ၄၁ : ထိတ်လန့်နေတဲ့ လီမျိုးနွယ်စု ခေါင်းဆောင်
အဝေးက အိမ်ခေါင်မိုးပေါ်မှာ ရပ်နေတဲ့ လီမျိုးနွယ်စု အဘိုးအိုဟာ လေအေးတို့ တိုက်ခတ်နေတာကို ခံစားနေရပေမယ့် ချွေးတွေက သူ့အဝတ်အစားတွေကို စိုရွှဲသွားလုနီးပါး ဖြစ်နေခဲ့လေသည်။
ဒီအခိုက်အတန့်မှာ သူ့အသက်က သူပိုင်တာ မဟုတ်တော့ဘူး ဆိုတာ သူ သတိမထားမိသလို ခြံဝင်းထဲက လူ (၄) ယောက်က စကားလုံး အနည်းငယ် ပြောရုံနဲ့တင် သူ့ကံကြမ္မာကို ဆုံးဖြတ်လိုက်ပြီ ဆိုတာလည်း သူ မသိပေ။
အခု သူဟာ အခြေတည်အဆင့် ကိုယ်ရောင်ကိုယ်ဝါ (၃) ခုရဲ့ ပိတ်ဆို့တာကို ခံထားရပြီး ကြောက်လွန်းလို့ မလှုပ်ရဲတော့ပဲ ထွက်လည်း မပြေးရဲချေ။
အကယ်၍ သူ တစ်ခုခု လှုပ်ရှားလိုက်တာနဲ့ သူ့အသက် ချက်ချင်း ပျောက်ဆုံးသွားမှာကို ကြောက်နေမိလေသည်။
ရုတ်တရက် လီမျိုးနွယ်စု အဘိုးအိုက ငွေရောင် အလင်းတန်း တစ်ချက် လက်ခနဲ ဖြစ်သွားတာ မြင်လိုက်ရ၏။ ၎င်းက အလွန် မြန်ဆန်တဲ့ အရှိန်နဲ့ ပျံသန်းလာတဲ့ ဓားပျံတစ်ချောင်းမှန်း သူ မြင်လိုက်ရပေသည်။
ဒါ့အပြင် ဒီဓားပျံက သူ့ဆီ တည့်တည့် လာနေခြင်းပင်။
ထို့ကြောင့် လီမျိုးနွယ်စု အဘိုးအိုရဲ့ ဆံပင်တွေ ထောင်မတ်သွားခဲ့ပြီး တစ်ခါမှ မကြုံဖူးတဲ့ အန္တရာယ် အငွေ့သက်တို့အား ခံစားလိုက်ရပေသည်။
'သေခြင်းတရား... သေခြင်းတရားက ဆိုက်ရောက်လာပြီ....'
သူဟာ ဓားပျံရဲ့ တိုက်ခိုက်မှုကို ရှောင်တိမ်းဖို့ ပြင်လိုက်ချိန်မှာပဲ ကြီးမားတဲ့ ကြောက်ရွံ့မှု တစ်ခုကို ရုတ်တရက် ခံစားလိုက်ရ၏။ ၎င်းက သူ့ထက် ပိုသန်မာတဲ့ ကျင့်ကြံသူ တစ်ယောက်က သူ့လှုပ်ရှားမှုတွေကို ဖိနှိပ်ဖို့ အရှိန်ဝါကို ထုတ်လွှတ်လိုက်ခြင်းပင်။
'ခြံဝင်းထဲက အခြေတည်အဆင့် ကျင့်ကြံသူ (၃) ယောက်ပဲ...သူတို့လည်း သူ့ကို သေစေချင်နေကြတာလား...'
'မဖြစ်ဘူး.....'
'မကောင်းတော့ဘူး...'
ထောင်ပေါင်းများစွာသော အတွေးတွေက ဒီအချိန်တိုလေး အတွင်း သူ့ခေါင်းထဲ ဖြတ်သန်းသွားပေမယ့် ဒီအချိန်တိုလေး အတွင်းမှာပဲ အရာအားလုံး ရုတ်တရက် ရပ်တန့်သွားခဲ့လေသည်။ ကြီးမားတဲ့ ခေါင်းကြီး တစ်လုံးဟာ နောက်ဘက်ကို လွင့်ထွက်သွားပြီး လည်ပင်းက ပြတ်ရာက အလွန် ချောမွေ့နေခဲ့သည်။
ဓားချက် တစ်ချက်တည်းဖြင့် သေဆုံးခြင်းပင်။
အကယ်၍ ပိုင်ယီသာ လီမျိုးနွယ်စု အဘိုးအိုကို တစ်ယောက်တည်း ကိုင်တွယ်ရမယ် ဆိုရင် နိုင်မယ်လို့ ယုံကြည်မှု ရှိဖို့အတွက် သူ့ရဲ့ ဝှက်ဖဲတွေ အကုန် ထုတ်သုံးရပေမည်။
ဘာပဲဖြစ်ဖြစ် ပိုင်ယီက ချီစုစည်းမှု အဆင့် (၇) ပဲ ရှိသေးပြီး လီမျိုးနွယ်စု အဘိုးအိုထက် အဆင့် (၂) ဆင့် နိမ့်နေလေသည်။
လီမျိုးနွယ်စု အဘိုးအိုရဲ့ သက်တမ်းက ကုန်ခါနီးလို့ သူ့ခွန်အားတွေက ကျဆင်းနေရင်တောင် အဆင့် ကွာခြားချက်ကို အစားထိုးဖို့ ခက်ခဲပေသည်။
'ဒါပေမဲ့ ဘယ်သူက ဒီကောင့်ကို ဒီညမှာ လာတိုက်ခိုက်ဖို့ ရွေးချယ်လောက်အောင် ကံဆိုးစေချင်လို့လဲ....နောက်ဆုံးတော့ ကျင်းရှင်း နန်းတော်က လူတွေနဲ့ တည့်တည့် တိုးတော့တာပဲ....'
ဒါ့အပြင် အစပိုင်းမှာကတည်းက လီမျိုးနွယ်စု အဘိုးအိုက ကျင်းရှင်း နန်းတော်က လူတွေကို နှုတ်ပိတ်ဖို့ သတ်ချင်ခဲ့တာပင်။
ပြောရရင် သူ မစော်ကားသင့်တဲ့ လူတွေကို သွားစော်ကားမိလိုက်မိတာဖြစ်ပေသည်။
...
အချိန်များ ကုန်ဆုံးသွားခဲ့သည်။
နောက်တစ်နေ့ မနက် ရောက်တဲ့အခါ လီမျိုးနွယ်စု ခေါင်းဆောင် လီဟယ်ရှန်းဟာ မနက်ခင်း ရှုခင်းကို ခံစားနိုင်တဲ့ စိတ်အခြေအနေတို့ မရှိခဲ့ချေ။ သူဟာ တစ်ညလုံး မအိပ်ခဲ့ဘဲ အိမ်မှာ အဘိုးအို ပြန်လာမယ့် အချိန်ကို တစ်ညလုံး စောင့်နေခဲ့လေသည်။
မနေ့ညက လီဟယ်ရှန်းရဲ့ အဘိုးတစ်ဖြစ် လီမျိုးနွယ်စုရဲ့ ကျောထောက်နောက်ခံ အဘိုးအိုဟာ ပိုင်ယီကို သတ်ဖို့ ဓားကို ယူပြီး ထွက်သွားခဲ့ပြီး မသွားခင်တုန်းက အဘိုးအို ပြောခဲ့တာက တစ်နာရီ အတွင်း ပြန်လာခဲ့မည်ဟုပင်။
သို့ပေမဲ့ နောက်ဆုံး... တစ်ညလုံး ကုန်သွားပြီဖြစ်သော်လည်း အဘိုးအို ပြန်မလာခဲ့သေးချေ။
'ရှူး..မမျှော်လင့်ထားတဲ့ ကိစ္စ တစ်ခုခု ဖြစ်သွားတာများလား..'
'ဝိညာဉ်ဓားဂိုဏ်းရဲ့ ပြင်ပ ဂိုဏ်းထောက် ဖြစ်တဲ့ အဘိုးအိုက ပိုင်ယီကို ရှုံးသွားတာများလား...'
'ဘယ်လိုလုပ် ဖြစ်နိုင်မှာလဲ..... မဖြစ်နိုင်ဘူး...'
စိတ်မရှည်စွာ စောင့်ဆိုင်းနေတဲ့ လီမျိုးနွယ်စု ခေါင်းဆောင်ဟာ နောက်ဆုံးတော့ မနေနိုင်ဘဲ အစေခံ အနည်းငယ်ကို ခေါ်ပြီး အမိန့်ပေးလိုက်၏။ "မင်းတို့ ကောင်တွေ... ပိုင်ယီ နေတဲ့ နေရာကို သွားကြည့်စမ်း... ပြီးတော့ ဟိုမှာ ဘာဖြစ်ခဲ့လဲ ဆိုတာ ကြည့်ခဲ့"
အစေခံတွေက တစ်ယောက်မျက်နှာ တစ်ယောက် ကြည့်ပြီး စိတ်ထဲမှာ ရှုပ်ထွေးနေကြပေမယ့် ဘာမေးခွန်းမှ မမေးရဲကြပေ။
သူတို့ အမြန် ပြေးထွက်သွားကြပြီး တစ်နာရီကျော် ကြာပြီးတဲ့နောက်မှာ သူတို့ဟာ အလောတကြီး ပြန်ရောက်လာခဲ့ကြသည်။
"ဘာမှ မဖြစ်ခဲ့ဘူး..." ဒီအဖြေကို ကြားလိုက်ရတော့ လီဟယ်ရှန်း မျက်လုံး ပြူးကျယ်သွားခဲ့၏။ မျိုးနွယ်စု ခေါင်းဆောင် တစ်ယောက်ရဲ့ တည်ငြိမ်နိုင်စွမ်းကို ထိန်းထားဖို့ သူညာ ခက်ခဲသွားခဲ့လေသည်။ "ဘယ်လိုလုပ် ဖြစ်နိုင်မှာလဲ... တိုက်ခိုက်တဲ့ လက္ခဏာ ဘာမှ မရှိဘူးလား... ပြီးတော့ ပိုင်ယီက အသက်ရှင်လျက် ကောင်းကောင်းမွန်မွန် ရှိနေတာ မင်းတို့ မြင်ခဲ့တယ်ပေါ့"
သူ ကြောင်အသွားခဲ့ပေသည်။ သူ့မျိုးနွယ်စုရဲ့ အဘိုးအိုက ပိုင်ယီကို မကိုင်တွယ်နိုင်ခဲ့ဘူး ဆိုသည်အား လီဟယ်ရှန်း ထင်မထားခဲ့ပေ။
ပိုင်ယီက အသက်ရှင်လျက် ကောင်းကောင်းမွန်မွန် ရှိနေပြီး အဘိုးအိုက ပျောက်ဆုံးနေရာ ဆိုလိုရင်းက ရှင်းနေပါပေပြီ။ ချက်ချင်းဆိုသလို သူဟာ ချွေးစေးတွေ ပြန်လာခဲ့လေသည်။
"မြန်မြန်... မင်းတို့ရဲ့ သခင်လေး၊ သခင်မလေး နဲ့ သခင်မကြီးကို မြန်မြန် သွားခေါ်ချေ.... အပြင်ရောက်နေတဲ့ လီမျိုးနွယ်စုဝင်တွေ အကုန်လုံးကို ပြန်ခေါ်လိုက်..... ဘာရပ်လုပ်နေကြတာလဲကွ မြန်မြန်သွားစမ်း"
လီဟယ်ရှန်းရဲ့ လေသံထဲမှာ ထိတ်လန့်တဲ့ အရိပ်အယောင်တွေ ပါဝင်နေခဲ့၏။
သူ့စိတ်ထဲက ဖြစ်နိုင်ဖွယ် မရှိတဲ့ ခန့်မှန်းချက်တွေကို သူ သိပ်မယုံချင်ပေမယ့် လက်ရှိ အခြေအနေက အဲဒီ ခန့်မှန်းချက်က မှန်ကန်နိုင်ချေ အများဆုံးလို့ ပြောနေပေသာ်။
'အဘိုးအို သေဆုံးသွားဖို့ ဖြစ်နိုင်ချေ သိပ်များတယ်....'
အဘိုးအိုက လီမျိုးနွယ်စုရဲ့ အစွမ်းအထက်ဆုံး မသေမျိုးကျင့်ကြံသူဖြစ်ပေသည်။ အကယ်၍ သူသာ ပိုင်ယီ လက်ချက်နဲ့ သေသွားရင် လီမျိုးနွယ်စုက တစ်ဖက်လူရဲ့ လက်စားချေတာကို ခံရတော့မှာ သေချာပေသည်။
စွမ်းအားကြီးတဲ့ ကျင့်ကြံသူ တစ်ယောက်ရဲ့ လက်စားချေတာကို သူတို့ ဘယ်လို ခုခံနိုင်မည်နည်း။
"ဘာလို့ အရာအားလုံး ဒီလို ဖြစ်ကုန်ရတာလဲ... ဒီလို မဖြစ်သင့်ဘူး"
လီဟယ်ရှန်းရဲ့ မျက်လုံးတွေထဲမှာ ရှုပ်ထွေးမှုတွေ ပြည့်နှက်နေခဲ့၏။ သူ့ရဲ့ ဆယ်စုနှစ်ပေါင်းများစွာ ဘဝမှာ ပထမဆုံးအကြိမ် ကူကယ်ရာမဲ့သလို ခံစားလိုက်ရလေသည်။
အခုချိန်ထိ သူ နောင်တရစရာ ဘာမှ မရှိခဲ့ပေ။ တစ်ခုတည်းသော နောင်တကတော့ အရင်တုန်းက လှပတဲ့ မိန်းကလေး တစ်ယောက် မရှာခဲ့မိတာပင်.......
...
တစ်ချိန်တည်းမှာပင် ပိုင်ယီ ဘက်၌
မနေ့ညက ပြဿနာ ဖြေရှင်းပြီးသွားတဲ့ ပိုင်ယီဟာ ဒီမနက်မှာ ဘာမှ မဖြစ်ခဲ့သလိုပင်။ ခေါင်းနည်းနည်း ကိုက်နေတာပဲ ခံစားရပြီး ကျင့်ကြံသူတွေ သောက်တဲ့ ဝိညာဉ်ဝိုင်ရဲ့ အာနိသင်က တော်တော် ပြင်းလေသည်။
ထို့အပြင် မနေ့ညက သူ့ကို လာတိုက်ခိုက်တဲ့သူက ချင်းဟယ် ခရိုင်၊ လီမျိုးနွယ်စုက ကျင့်ကြံသူ ဆိုတာ သူ အတည်ပြုလိုက်နိုင်ပေပြီ။
ပိုင်ယီက တစ်ဖက်လူဆီကနေ သေးငယ်တဲ့ သိုလှောင်အိတ်တစ်လုံး ရရှိခဲ့ပြီး အထဲမှာ တစ်ဖက်လူရဲ့ အဆင့်အတန်း ပြသတဲ့ ကျောက်စိမ်းပြားကို တွေ့ခဲ့ရသည်။
ဝိညာဉ်ဓားဂိုဏ်း ပြင်ပ ဂိုဏ်းထောက်လီရွှီ
ဒါ့အပြင် သူ့ဆီမှာ မျိုးရိုးစဉ်ဆက် ပြသတဲ့ ပစ္စည်းတစ်ခုလည်း ပါလာသေးပြီး အဲဒါက လီမျိုးနွယ်စုရဲ့ မျိုးရိုးစဉ်ဆက်ပင်။
'မျိုးရိုးစဉ်ဆက် ပြသတဲ့ ပစ္စည်းကို ကိုယ်နဲ့မကွာ ဆောင်ထားနိုင်တယ် ဆိုတော့ သူက မျိုးနွယ်စုထဲမှာ အဆင့်အတန်း အမြင့်ဆုံး လူပဲ ဖြစ်ရမယ်... ဆိုလိုတာက မနေ့ညက လူက လီမျိုးနွယ်စုမှာ ဝါအကြီးဆုံးနဲ့ အဆင့်အတန်း အမြင့်ဆုံး လူပေါ့....'
"ဒါဆိုရင် လီမျိုးနွယ်စုရဲ့ လျှို့ဝှက်အင်အားက ဒီလောက်ပဲ ရှိပုံရတယ်" ပိုင်ယီ ရေရွတ်လိုက်၏။
ချီစုစည်းမှု အဆင့် (၉) ကျင့်ကြံသူဖြစ်ပြီး တစ်ချိန်တည်းမှာပဲ ဝိညာဉ်ဓားဂိုဏ်းရဲ့ ပြင်ပ ဂိုဏ်းထောက်
ဒီလို ကျင့်ကြံမှုနဲ့ အဆင့်အတန်းက တခြားလူတွေရဲ့ မျက်လုံးထဲမှာတော့ မီလို့မရနိုင်တဲ့ အရာတွေပင်။
အကယ်၍ လွန်ခဲ့တဲ့ ရက်အနည်းငယ်က ပိုင်ယီသာ ဆိုရင် လီမျိုးနွယ်စုမှာ ဒီလိုလူမျိုး ရှိမှန်း သိတာနဲ့ မတွန့်ဆုတ်ဘဲ ထွက်ပြေးမှာ သေချာလေသည်။
ဒါပေမဲ့... ရက်တိုတိုလေး အတွင်းမှာ နှစ်ဖက်စလုံးရဲ့ အဆင့်အတန်းနဲ့ အတွေးတွေက ကြီးမားတဲ့ ပြောင်းလဲမှု ဖြစ်သွားခဲ့ပေပြီ။
"အခု ထွက်ပြေးချင်နေမယ့်သူက လီမျိုးနွယ်စု ခေါင်းဆောင် ဖြစ်လောက်တယ်"
ပိုင်ယီ မျက်လုံးကျဉ်းလိုက်၏။
သူ့ခန္ဓာကိုယ်ရဲ့ မူလပိုင်ရှင်က လီမျိုးနွယ်စုရဲ့ သတ်ဖြတ်ခြင်းကို ခံခဲ့ရတာကြောင့် လီမျိုးနွယ်စု ခေါင်းဆောင်က ဒီကိစ္စကို မသိဘူးလို့ ပိုင်ယီ မယုံပေ။ ပိုမှန်အောင် ပြောရရင် ဒီအမိန့်ကို ပေးခဲ့တာ သူပဲ ဖြစ်လောက်ပြီး လီမျိုးနွယ်စုရဲ့ လက်ပါးစေတွေက လုပ်ဆောင်ခဲ့တာဖြစ်ပေမည်။
ဒီလို လုပ်ခဲ့တာတောင် ပိုင်ယီက သူ့ကို လွှတ်ပေးမယ်လို့ မျှော်လင့်နေသည်လား......
ဘယ်လိုလုပ် ဖြစ်နိုင်မည်နည်း။ တစ်ဖက်လူက ဒီလိုကိစ္စမျိုး လုပ်ရဲမှတော့ လက်စားချေ ခံရဖို့လည်း ပြင်ဆင်ထားရပေမည်။
မူလပိုင်ရှင်ကို လုပ်ခဲ့တာ ဆိုပေမယ့် ပိုင်ယီက သူတို့ကို လွှတ်ပေးမှာ မဟုတ်ပေ။ အထူးသဖြင့် သူတို့က ပိုင်ယီကိုပါ ပစ်မှတ်ထားခဲ့ကြပြီး မနေ့ညက ချီစုစည်းမှု အဆင့် (၉) ကျင့်ကြံသူကိုတောင် လွှတ်လိုက်သေးလေသည်။
အကယ်၍ ကျင်းရှင်း နန်းတော်က ကံဆိုးတဲ့ ကောင် (၃) ကောင်သာ မရှိခဲ့ရင် ပိုင်ယီ အနေနဲ့ သူ့ထက် အဆင့် (၂) ဆင့် မြင့်တဲ့ ရန်သူကို ရင်ဆိုင်ရပြီး ခက်ခဲသွားနိုင်ပေသည်။
ဒါကြောင့် သူ ဒီကိစ္စအား ဒီအတိုင်း လွှတ်ထားလို့ မရချေ။
စိတ်ထဲက အတွေးတွေကို ဘေးဖယ်ထားပြီး ပိုင်ယီဟာ ကောင်းကင်ကို မော့ကြည့်လိုက်၏။
"မနက်စောစောပဲ ရှိသေးတာပဲ..."
စက္ကန့်အနည်းငယ်လောက် ရေရွတ်ပြီးနောက် ပိုင်ယီဟာ သူ့အကြည့်ကို သူ့လက်ဆီ ရွှေ့လိုက်၏။ သူ့လက်ထဲမှာ ကျောက်စိမ်းပုလင်းငယ် တစ်လုံး ကိုင်ထားလေသည်။
ဒီကျောက်စိမ်းပုလင်းက မနေ့ညက ကျင်းရှင်း နန်းတော်က မသေမျိုးကျင့်ကြံသူ (၃) ယောက်ထဲက တစ်ယောက် ပိုင်တာဖြစ်ပေသည်။
ဒါက ပိုင်ယီရဲ့ အိမ်ထဲမှာ မတော်တဆ ကျန်ရစ်ခဲ့တာပင်......
အထဲမှာ အလောင်းဖျောက်ဖို့ သုံးတဲ့ ဆေးမှုန့်ပါပြီး လီမျိုးနွယ်စု အဘိုးအိုရဲ့ အလောင်းကို ဖျောက်ဖို့ သုံးခဲ့ခြင်း ဖြစ်ပေသည်။
မနေ့ညက သူ တစ်ဝက်ပဲ သုံးလိုက်တာတောင် တစ်မိနစ်တောင် မကြာခင်မှာပဲ အလောင်းရဲ့ အစအန တစ်ခုမှ မကျန်တော့ပေ
အခု ပုလင်းထဲမှာ တစ်ဝက် ကျန်နေသေး၏။
လီမျိုးနွယ်စုရဲ့ တခြားအဖွဲ့ဝင်တွေကို သူ လျစ်လျူရှုထားလို့ ရပေမယ့် အဲဒီ လီမျိုးနွယ်စု ခေါင်းဆောင် အဲဒီ တရားခံ...
သူ သေကို သေရပေမည်။
...