အခန်း ၄၀ : ခင်ဗျားအတွက် အသုဘဝန်ဆောင်မှုတွေ ပေးနေကြပြီ

​ညဘက်တွင်....

​လီမျိုးနွယ်စုရဲ့ အဘိုးအိုက တခြားအဝတ်အစား တစ်စုံ လဲဝတ်ထားခဲ့ပြီး သူ့မျက်နှာအား ရုပ်ဖျက်ထားခဲ့လေသည်။ ၎င်းက သူ့ရဲ့ မူလရုပ်ရည်နဲ့ အသက်အရွယ်ကို ဘယ်သူမှ မသိစေချင်တာကြောင့်ပင်။

​ရည်ရွယ်ချက်ကတော့ သူ့ရဲ့ အဆင့်အတန်းကို ဖုံးကွယ်ဖို့ဖြစ်ပြီး ချန်မျိုးနွယ်စု သခင်ကြီးရဲ့ မွေးနေ့မှာ သူ ဒီလိုကိစ္စမျိုး လုပ်နေတာ မသိစေချင်တာကြောင့်ပင်။

​သူ့အမြင်မှာတော့ ချန်မျိုးနွယ်စု သခင်ကြီး ဆိုတာ ကလေးလေး တစ်ယောက်သာ ဖြစ်ပေမဲ့ အဲဒီကောင်မှာ စွမ်းအားကြီးတဲ့ မြေးမလေးရှိနေပေသည်။

​လီမျိုးနွယ်စုရဲ့ ဘိုးဘေးက ချန်ချန်ရွှယ်အား လုံးဝ မစော်ကားရဲတာကြောင့် ဒီလောက် ဒုက္ခခံပြီး အလုပ်ရှုပ်နေရခြင်း ဖြစ်လေသည်။

​သူ့ပုံသဏ္ဌာန်က ညဘက်မှာ သွားလာနေတဲ့ သရဲတစ္ဆေ တစ်ကောင်လိုပင်။

​မျက်စိတစ်မှိတ်အတွင်း သူဟာ ပျံသန်းထွက်ခွာလိုက်ပြီး  သူ့အမြန်နှုန်းက သိပ်မြန်လွန်းလို့ လူတွေ သေချာ မမြင်နိုင်လောက်ပေ။

​ချီစုစည်းမှု အဆင့် (၉) ကျင့်ကြံမှုက  မပျံသန်းနိုင်ကျပေမဲ့ လေထဲမှာ အချိန်တိုတိုလေး ပျံဝဲဖို့တော့ တက်နိုင်လေသည်။

​မကြာခင်မှာပဲ သူဟာ လိုရာခရီးကို ရောက်ရှိသွားခဲ့သည်။

ထို့နောက် အိမ်ခေါင်မိုးစွန်း တစ်ခုပေါ်မှာ ရပ်ပြီး သူ့ရှေ့က အိမ်ကို ငုံ့ကြည့်လိုက်၏။

​"ဟမ်"

​သူဟာ အိမ်ထဲမှာ ကိုယ်ရောင်ကိုယ်ဝါ တစ်ခုမက ရှိနေပုံရတာ  ရုတ်တရက် သတိပြုမိလိုက်လေသည်။

​'တခြားလူတွေ ရှိနေတယ်...'

​'ဟွန်း... လီမျိုးနွယ်စုက ကောင်တွေ အကုန်လုံး အသုံးမကျတဲ့ ကောင်တွေ ဖြစ်ကုန်ပြီလား.. ပိုင်ယီ ဆိုတဲ့ လေလွင့်ကျင့်ကြံသူက တစ်ကိုယ်တော်သမား ဖြစ်ပြီး  ဘာအဖော်မှ မရှိဘူးလို့ ပြောထားကြတယ် မဟုတ်လား'

​လီမျိုးနွယ်စုရဲ့ အဘိုးအိုက သူ့စိတ်ထဲမှာ သူ့သားသမီး မြေးမြစ်တွေကို မဆဲဘဲ မနေနိုင်တော့ပေ။ သူ မျှော်လင့်ထားသလို ဖြစ်မလာဘူးလို့ ခံစားနေရပေသည်။

​အကယ်၍ လီမျိုးနွယ်စုကို ဒီလို အသုံးမကျတဲ့ ကောင်တွေ ဆက်ပြီး ထိန်းချုပ်နေမယ် ဆိုရင် မကြာခင်မှာပဲ လီမျိုးနွယ်စုက သူတို့လက်ထဲမှာ လုံးဝ ပျက်စီးသွားလိမ့်မယ်လို့ သူ ခံစားမိလေသည်။

​ဒါပေမဲ့... သူဟာ လုံးဝ စိတ်မပူပေ။

​အဘယ်ကြောင့်ဆိုသော် အဲဒီ ကိုယ်ရောင်ကိုယ်ဝါ အနည်းငယ်ထဲမှာ ဝိညာဉ်စွမ်းအင် လှုပ်ရှားမှု ရှိတဲ့ တစ်ခုကလွဲရင် ကျန်တဲ့ဟာတွေဆီမှာ ဘာဝိညာဉ်စွမ်းအင် လှုပ်ရှားမှုမှ သူ အာရုံမခံနိုင်တာကြောင့်ပင်။

​ဆိုလိုတာက ဝိညာဉ်စွမ်းအင် လှုပ်ရှားမှု ရှိတဲ့သူက ပိုင်ယီ ဖြစ်ပြီး မရှိတဲ့သူတွေက သာမန်လူ (၃) ယောက် ဖြစ်ပေမည်။

​ပိုင်ယီက တကယ်ပဲ ချီစုစည်းမှု အဆင့် (၅) ဟုတ်မဟုတ်ကတော့ လီမျိုးနွယ်စု အဘိုးအို မသေချာချေ။

​ဒါပေမဲ့ ပိုင်ယီက သူ့ထက် အားနည်းတယ် ဆိုတာတော့ သူ သေချာပေါက် သိလေသည်။

​ဘာပဲဖြစ်ဖြစ် သူက တစ်ဖက်လူရဲ့ ဝိညာဉ်စွမ်းအင် လှုပ်ရှားမှုကို အာရုံခံနိုင်လေရာ ဒါက သူတို့နှစ်ယောက် ကြားက ကွာခြားချက်ကို ရှင်းပြနေခြင်းပင်။

​"အမြန် ရှင်းလိုက်မယ်" လီမျိုးနွယ်စု အဘိုးအိုဟာ သူတော်စင်မဟာ ချင်းဟယ် ခရိုင်မှာ ရှိနေသေးတယ် ဆိုတာ သိတာကြောင့်  ပိုင်ယီနဲ့ အချိန်မဖြုန်းချင်တော့ပေ။ ထို့ကြောင့် သူရဲ့ လက်ချောင်းတွေကို ဖျစ်ညှစ်လိုက်ရာ ဝိညာဉ်စွမ်းအင်တွေ လှိုင်းထလာခဲ့သည်။

​ထို့နောက် ဓားပျံတစ်ချောင်းဟာ  ဓားအိမ်ထဲကနေ အလိုအလျောက် ပျံထွက်လာခဲ့ပြီး တည်ငြိမ်စွာ လေပေါ်မှာ ဝဲပျံနေခဲ့လေသည်။

​ဓားပျံပေါ်မှာ ဝိညာဉ်စွမ်းအင် ဖျော့ဖျော့လေး လည်ပတ်နေပြီး ကြည့်လိုက်ရုံနဲ့တင် ကြက်သီးထစေလောက်သည့် သတ်ဖြတ်လိုစိတ်တို့ ပါဝင်နေခဲ့ပေသည်။

​"သွားစမ်း" ဓားပျံဖြင့် ခြံဝင်းထဲက ဝိညာဉ်စွမ်းအင် လှုပ်ရှားမှုဆီကို အမြန် ချိန်ရွယ်လိုက်ပြီ ချက်ချင်း လေထုကို ခွဲပြီး ပျံသန်းသွားခဲ့သည်။

​ဒီဓားက... သေချာပေါက် သေစေနိုင်တဲ့ တိုက်ကွက်ပင်။

​ဒီအချက်ကို လီမျိုးနွယ်စု အဘိုးအို အပြည့်အဝ ယုံကြည်မှု ရှိနေပေသည်။ သူ့ထက် အားနည်းတဲ့ မသေမျိုးကျင့်ကြံသူ တစ်ယောက်က သူ သေချာပြင်ဆင်ထားတဲ့ တိတ်တဆိတ် တိုက်ခိုက်လိုက်တဲ့ ဒီဓားချက်ကို ကာကွယ်နိုင်လိမ့်မယ်လို့ သူ မထင်ပေ။

​ဓားပျံဟာ ခေါင်မိုးကြွပ်တွေကို ထိုးဖောက်တော့မယ့် ဆဲဆဲ...

နောက်တစ်ခဏတွင်...

​ကျယ်လောင်တဲ့ ဒင် ဆိုတဲ့ အသံ ထွက်ပေါ်လာခဲ့ပြီး  လီမျိုးနွယ်စု အဘိုးအိုအား မျက်လုံး ပြူးကျယ်သွားစေခဲ့လေသည်။ ပိတ်ဆို့ ဟန့်တားခံလိုက်ရတဲ့ သူ့ဓားပျံအား မယုံကြည်နိုင်စွာ ကြည့်လိုက်ပေသည်။

​ရင်းနှီးမနေတဲ့ ဓားပျံတစ်ချောင်းဟာ ခြံဝင်းထဲကနေ ပျံတက်လာခဲ့ပြီး သူ့ဓားပျံအား အတင်းအဓမ္မ ပိတ်ဆို့လိုက်တာကို သူဟာ ရှင်းရှင်းလင်းလင်း မြင်လိုက်ရ၏။

​ထို့နောက် ဓားပျံ နှစ်ချောင်းဟာ ထိပ်တိုက် တွေ့ပြီးနောက် ပြန်ကန်ထွက်သွားခဲ့ကြသည်။

​လီမျိုးနွယ်စု အဘိုးအိုဟာ သူ့ဓားကို အမြန် ထိန်းချုပ်ပြီး တည်ငြိမ်အောင် လုပ်လိုက်ပေမယ့် သူ့ဓားပျံရဲ့ ကိုယ်ထည်ပေါ်မှာ သိသာထင်ရှားတဲ့ အက်ရာကြီး တစ်ခု ဖြစ်သွားတာ တွေ့လိုက်ရလို့ တုန်လှုပ်သွားခဲ့လေသည်။

​ဒါ့အပြင် အက်ရာသေးသေးလေးတွေ အများကြီး ပေါ်လာခဲ့ပေသည်။

​"အဲ...အဲ့ဒါက... ဝိညာဉ်လက်နက်..."

​လီမျိုးနွယ်စု အဘိုးအို လေအေးတစ်ချက် ရှူရှိုက်လိုက်မိ၏။ ဝိညာဉ်လက်နက် မဟုတ်ပါက တခြား ဘယ်အရာက သူ့ဓားပျံကို ချက်ချင်း ပျက်စီးသွားအောင် လုပ်နိုင်မည်နည်း။

​ဒါ့အပြင်... တစ်ဖက်လူက သူ့ကို ဘယ်လို ရှာတွေ့သွားခဲ့သည်နည်း။

​သူဟာ သေချာပေါက် ကောင်းကောင်း ဖုံးကွယ်ထားခဲ့သလို ဒါက ရှင်းရှင်းလင်းလင်း တိတ်တဆိတ် တိုက်ခိုက်လိုက်ခြင်းပင်။

​"သောက်ကျိုးနည်း အဲဒီ အသုံးမကျတဲ့ ကောင်တွေ ပေးတဲ့ သတင်းအချက်အလက်တွေ အကုန် မှားနေတာပဲ" သူဟာ အခြေအနေ မကောင်းမှန်း ချက်ချင်း ခံစားလိုက်ရပြီး အခြေအနေက သူ မျှော်လင့်ထားတာထက် ကျော်လွန်သွားပေပြီ။ ပိုင်ယီအား သတ်ဖြတ်နိုင်မယ့် ယုံကြည်ချက် အပြည့်အဝတောင် မရှိတော့ပေ။

​'မဖြစ်ဘူး သူ ဆုတ်ခွာမှ ဖြစ်မယ်..'

​ဝိညာဉ်လက်နက် ပိုင်ဆိုင်ထားတဲ့ လေလွင့်ကျင့်ကြံသူ တစ်ယောက် ပြီးတော့ တစ်ဖက်လူက ချီစုစည်းမှု အဆင့် (၅) ဖြစ်ဖို့ လုံးဝ မဖြစ်နိုင်ပေ။ ဖြစ်နိုင်တာက တစ်ဖက်လူက သူ့ထက် နည်းနည်းလေးပဲ အားနည်းတာ ဖြစ်လောက်ပေသည်။

​ဒီလို အခြေအနေမျိုးမှာ... တစ်ဖက်လူကို သတ်နိုင်ဖို့ ၁၀၀% အာမ မခံရဲတော့သလို သူဟာ ၁၀၀% ယုံကြည်ချက် မရှိဘဲ ဘယ်တော့မှ မလှုပ်ရှားချေ။

​ဒါက မသေမျိုးကျင့်ကြံသူ တစ်ယောက် အနေနဲ့ သူ့ရဲ့ မူဝါဒဖြစ်ပြီး ဒီအချက်ကြောင့်ပဲ သူဟာ ဒီနေ့အထိ အသက်ရှင်နိုင်ခဲ့တာပင်။

​ဒါပေမဲ့ သူ လှည့်ထွက်ပြီး ထွက်ပြေးဖို့ ကြိုးစားလိုက်ပေမဲ့ စွမ်းအားကြီးတဲ့ အရှိန်ဝါ (၃) ခုကို တွေ့ရှိလိုက်ရလို့ သူဟာ တုန်လှုပ်သွားခဲ့ရလေသည်။ သူ့အား  စိတ်ပျက်အားငယ်သွားစေတဲ့ အရှိန်ဝါတွေက သူ့ကို တပြိုင်နက်တည်း ချိန်ရွယ်ထားလိုက်တာကြောင့် သူ့ရဲ့လှုပ်ရှားမှုတွေက ရပ်တန့်သွားခဲ့ပြီး သူ့နဖူးပေါ်ကနေ ချွေးစေးတွေ အဆက်မပြတ် စီးကျလာခဲ့သည်။

​'အခြေတည်အဆင့်...

​သေချာပေါက် အခြေတည်အဆင့်ပဲ.....'

​'အခြေတည်အဆင့် (၃) ယောက်... ချီစုစည်းမှု အဆင့် (၁) ယောက်'

​ခြံဝင်းထဲမှာ ဝိညာဉ်စွမ်းအင် လှုပ်ရှားမှု မရှိလို့ သူ အာရုံမခံနိုင်ခဲ့တဲ့ လူ (၃) ယောက်က တကယ်တော့ သာမန်လူတွေ မဟုတ်ကြချေ။ သူတို့က သူ့ထက် ပိုသန်မာတာကြောင့် သူတို့အား အာရုံမခံနိုင်ခဲ့တာ ဖြစ်ပေသည်။

​"ရှူး.."

​လီမျိုးနွယ်စု အဘိုးအိုဟာ ယခုအချိန်၌  ခေါင်းနားပန်းကြီးသွားသလို ခံစားလိုက်ရပြီး ကျောရိုးထဲကနေ ဦးခေါင်းအထိ အေးစိမ့်သွားခဲ့လေသည်။

​သူဟာ တံတွေးအား ခက်ခဲစွာ မျိုချလိုက်ရ၏။ 

​"ဒါ ဝိညာဉ်ဓားဂိုဏ်းရဲ့ ဓားထိန်းချုပ်ခြင်း နည်းစနစ်မဟုတ်လား"

​ခြံဝင်းထဲမှာ ကျင်းရှင်း နန်းတော်က ကျင့်ကြံသူ တစ်ယောက်ဟာ ဝိညာဉ်ဝိုင်ခွက်ကို ကိုင်ထားရင်း အနည်းငယ် မူးနေတဲ့ ပုံစံနဲ့ အပြင်ဘက်ကို လှမ်းကြည့်လိုက်၏။

​သူ့မျက်လုံးတွေက နံရံကို ဖောက်ထွင်းမြင်နိုင်သကဲ့သို့ အဝေးက အိမ်ခေါင်မိုးစွန်းပေါ်မှာ မလှုပ်ရဲဘဲ ရပ်နေတဲ့ လီမျိုးနွယ်စု အဘိုးအိုကို လှမ်းမြင်နေရပေသည်။

​ထို့နောက် သူဟာ နားမလည်စွာ မေးလိုက်သည်။ "ညီကိုပိုင်... ခင်ဗျား ဘာလို့ ဝိညာဉ်ဓားဂိုဏ်းက လူတွေကို စော်ကားမိတာလဲ"

​ဟုတ်ပေသည်။

​ဒီ အခြေတည်အဆင့် ကျင့်ကြံသူ (၃) ယောက်က ချင်းဟယ် ခရိုင်ကို ချင်းကျောက်အား လိုက်ရှာဖို့ ရောက်လာတဲ့ ကံဆိုးတဲ့ ကောင် (၃) ကောင်ပင်။

​မူလက သူတို့ ချင်းကျောက်ကို ရှာတွေ့မယ်လို့ ယုံကြည်ချက် အပြည့် ရှိခဲ့ကြပြီး နောက်ဆုံးတော့ သူမရဲ့ ဆံပင်တစ်မျှင်တောင် ရှာမတွေ့ခဲ့ကြချေ။ ချင်းကျောက်က ချန်အိမ်တော် နားမှာ အရိပ်အယောင်တောင် မပြခဲ့ပေ။

​သူတို့ ရက်အနည်းငယ်လောက် ရှာဖွေခဲ့ပေမယ့် ဘာမှ မတွေ့ခဲ့ရပဲ သူတို့ စိတ်ပျက်လက်ပျက် ဖြစ်နေတုန်း ညနေဘက်မှာ ပိုင်ယီနဲ့ မမျှော်လင့်ဘဲ ပြန်တွေ့ခဲ့ကြခြင်း ဖြစ်လေသည်။

​ထို့ကြောင့် နှစ်ဖက်စလုံး စုပြီး ဝိုင်သောက်ခဲ့ကြ​သည်။ ဘာပဲဖြစ်ဖြစ် ချင်းဟယ် ခရိုင်မှာ သူတို့ဟာ ပိုင်ယီကိုပဲ သိနေတာကြောင့်ပင်။

​ပိုင်ယီဟာ သူ့ရဲ့ ဓားလက်ချောင်းကို ပြန်ရုပ်သိမ်းလိုက်ရာ ပိုင်ဖျင်ဓားဟာ ချက်ချင်း ပြန်ရောက်လာပြီး ဓားအိမ်ထဲသို့ ဝင်သွားခဲ့သည်။ ထို့နောက် သူ ပြောလိုက်၏။ "လီမျိုးနွယ်စု ဖြစ်လောက်တယ်"

​ဒီကမ္ဘာမှာ သူ စော်ကားမိထားတာ ဆိုလို့ ချင်းဟယ် ခရိုင်က လီမျိုးနွယ်စုပဲ ရှိပေသည်။

​ထို့ကြောင့် တိတ်တဆိတ် တိုက်ခိုက်သူရဲ့ အဆင့်အတန်းကို သူ တစ်ခါတည်းနဲ့ ခန့်မှန်းလို့ ရပေသည်။

​သို့ပေမဲ့ လီမျိုးနွယ်စုမှာ ဝိညာဉ်ဓားဂိုဏ်းနဲ့ ပတ်သက်ဆက်နွယ်မှု တချို့ ရှိနေလိမ့်မယ်လို့ သူ ထင်မထားခဲ့တာကြောင့် သူ့မျက်နှာက နည်းနည်း ထူးဆန်းနေခဲ့သည်။

​"လီမျိုးနွယ်စု.."

​ကျင်းရှင်း နန်းတော်က မသေမျိုးကျင့်ကြံသူတွေ အံ့သြသွားခဲ့ကြသည်။

​ပိုင်ယီက ဘာဖြစ်ခဲ့လဲ ဆိုတာ အကျဉ်းချုံး ပြောပြလိုက်ပြီး မပြောသင့်တာ တချို့ကိုတော့ ချန်လှပ်ထားခဲ့သည်။ ဒါက သူတို့အား ရုတ်တရက် နားလည်သွားစေခဲ့သည်။

​တစ်ယောက်က နှုတ်ခမ်းမဲ့ပြီး မထီမဲ့မြင် ပြောလိုက်၏။ "ဝိညာဉ်ဓားဂိုဏ်းက ဝိညာဉ်ဓားဂိုဏ်းပါပဲ...  ဒီကောင်တွေက ငါတို့ ဖြောင့်မတ်တဲ့ ဂိုဏ်းတွေရဲ့ အရှက်ရစရာတွေပဲ"

​နောက်တစ်ယောက်ရဲ့ မျက်လုံးထဲမှာ သတ်ဖြတ်လိုစိတ်တွေ တောက်ပလာခဲ့သည်။ "ဒီကောင်က... ခုနက ငါတို့ (၃) ယောက်ကိုပါ သတ်ချင်နေတာ... သေရမှာ မကြောက်ဘူးပဲ"

​နောက်ဆုံးလူက တင်းမာစွာ ပြောလိုက်၏။ "သူ့ကို သတ်လိုက်ရင် ကျင်းရှင်း နန်းတော် အတွက် ပြဿနာ ဖြစ်လာမလား"

​သူတို့ (၃) ယောက်စလုံးဟာ သတ်ဖြတ်လိုစိတ်တွေ ထုတ်ဖော်နေခဲ့ကြလေသည်။

​သိသာတာက လီမျိုးနွယ်စု အဘိုးအိုဟာ သူတို့အား  စော်ကားမိလိုက်ပေပြီ။

​မသေမျိုးကျင့်ကြံသူတွေ ဆိုတာ ဘယ်တုန်းကမှ လူကောင်းတွေ မဟုတ်ကြပေ။ သူတို့က ပုံမှန်ဆို စကားပြောတာ၊ ပြုမူတာတွေကို ထိန်းချုပ်ထားတတ်ကြပေမယ့် တစ်ယောက်ယောက်က စတင် လှုပ်ရှားလာပြီ ဆိုရင် ဘာမှထိန်းချုပ်နေမည် မဟုတ်ပေ။

​ဒါပေမဲ့ တစ်ဖက်လူရဲ့ အဆင့်အတန်းက နည်းနည်း ထိရှလွယ်ပြီး ဝိညာဉ်ဓားဂိုဏ်းရဲ့ ဓားထိန်းချုပ်ခြင်း နည်းစနစ်ကို တတ်မြောက်ထားလေသည်။

​ထို့အပြင် ဝိညာဉ်ဓားဂိုဏ်းက ကျင့်ကြံသူကို သတ်ဖြတ်တာက တော်တော် ပြဿနာများပေသည်။

​"စီနီယာတို့... သူက ကျွန်တော့်ကြောင့် ရောက်လာတာ..  ဒါကြောင့် သူ့ခေါင်းကို ကျွန်တော်ပဲ ယူလိုက်ပါမယ်" ပိုင်ယီရဲ့ လေသံက အလွန် တည်ငြိမ်နေတာကြောင့် သူတို့ဟာ သူအား ကြည့်လိုက်ကြလေသည်။

​"ညီအကိုပိုင်... ခင်ဗျား ဝိညာဉ်ဓားဂိုဏ်းရဲ့ လက်စားချေတာကို မကြောက်ဘူးလား" တစ်ယောက်က အံ့သြစွာ မေးလိုက်၏။

​"ဘာကြောက်စရာ ရှိလို့လဲ" ပိုင်ယီ ပြုံးပြီး ပြောလိုက်သည်။ "သူက ငါ့ကို လာသတ်တာလေ...  သူ့အဆင့်အတန်းကြောင့် ငါက သူ့ကို လွှတ်ပေးလိုက်ရမှာလား... ဒါဆို ခင်ဗျားတို့ ကိုယ့်ကိုယ်ကိုယ် ကျင့်ကြံသူလို့ ဘယ်လို ခေါ်နိုင်တော့မလဲ... အိမ်ပြန်ပြီး ဝက်ပဲ မွေးလိုက်ကြပါတော့"

​"ကောင်းပြီ" တစ်ယောက်က စားပွဲကို ရိုက်ပြီး ပြောလိုက်၏။ "ခင်ဗျားရဲ့ စိတ်ဓာတ်ကြောင့် ခင်ဗျားကို ကျွန်တော် မိတ်ဆွေဖွဲ့လိုက်ပြီ"

​ထို့နောက် အဲဒီလူက လေးလေးနက်နက် ပြောလိုက်သည်။ "ညီအကို... လွတ်လွတ်လပ်လပ်သာ လှုပ်ရှားလိုက်ပါ... အလောင်းဖျောက်ဖို့ သုံးတဲ့ ဆေးမှုန့် ပုလင်းကို ကျွန်တော် ဒီမှာ ကျကျန်ထားခဲ့နိုင်တယ်....."

​နောက်တစ်ယောက်က ပြောလိုက်ပြန်၏။ "ငါ့ဆီမှာ ဝိညာဉ်ကို သတ်ဖြတ်နိုင်တဲ့ ဝိညာဉ်အဆောင် တစ်ခု ရှိတယ်....ဒါပေမဲ့ ဘယ်နားရောက်နေလဲ မသိဘူး ဒီမှာများ ကျကျန်နေခဲ့သလားပဲဟ.."

​နောက်ဆုံးလူက ချောင်းဟန့်လိုက်၏။ "အဟမ်း.. ငါ့ဆီမှာ ကိုယ်ရောင်ကိုယ်ဝါ အစအနတွေကို ဖျောက်ဖျက်ပေးနိုင်တဲ့ ကျိန်စာတစ်ခု ရှိတယ်.. ညီအကို... ခင်ဗျား..."

​"စီနီယာ အစ်ကို... သိပ်သိသာအောင် မလုပ်ပါနဲ့"

​"အဟွတ်... ငါ မူးနေပြီ... ငါ မူးနေပြီ"

​ပိုင်ယီ စကားမပြောနိုင်တော့ပေ။

​'ဘာကြီးလဲဟ.. အသုဘ ဝန်ဆောင်မှုအတွက်များ စီစဥ်ပေးနေကြတာလား....'

​မသိတဲ့လူတွေဆိုပါက သူတို့ (၃) ယောက်ဟာ ဝိညာဉ်ဓားဂိုဏ်းနဲ့ ကြီးမားတဲ့ အငြိုးအတေး ရှိနေတယ်လို့ ထင်သွားကြမည်ပင်။

​...