အခန်း ၃၉ : လီမျိုးနွယ်စု၏ ဘိုးဘေး
[အသက် ၈၂ နှစ် - သင်သည် အထူး ဆေးလုံးတစ်လုံး ရရှိခဲ့ပြီး စားသုံးပြီးနောက် ဝိညာဉ်စွမ်းအင် အမြောက်အမြား သင့်ခန္ဓာကိုယ်ထဲ စီးဝင်လာခဲ့သည်။ သင် ချီစုစည်းမှု အဆင့် (၉) ကို ချိုးဖျက်ဝင်ရောက်ရန် ကြိုးစားနိုင်သည်ဟု ခံစားလိုက်ရသော်လည်း ပိုမို တည်ငြိမ်စေရန်အတွက် ဆက်လက် အချိန်ဆွဲရန် ဆုံးဖြတ်လိုက်သည်။]
[အသက် ၈၅ နှစ် - သင်ဟာ မြို့ငယ်လေး တစ်မြို့ကို ဖြတ်သန်းသွားစဉ် မြို့က ပလိပ်ရောဂါ ခံစားနေရသည်ကို တွေ့ရှိလိုက်ရသည်။ သင် ကူညီပေးရန် ဆုံးဖြတ်လိုက်သည်။]
[မြို့ငယ်လေးမှ ပလိပ်ရောဂါသည် မိစ္ဆာကျင့်ကြံသူ တစ်ဦးကြောင့် ဖြစ်ပွားရကြောင်း သင် မတော်တဆ တွေ့ရှိလိုက်ရသည်။ သင် ပြဿနာကြီး တစ်ခုနှင့် ရင်ဆိုင်နေရကြောင်း သဘောပေါက်လိုက်သည်။]
[သင် ပြဿနာ ဝဲဂယက်ထဲ ဆွဲခေါ်ခံလိုက်ရသည်။]
[အသက် ၈၆ နှစ် - သင် ဖျက်ဆီးလိုက်သော မိစ္ဆာကျင့်ကြံသူသည် အရှက်ရသဖြင့် ဒေါသထွက်နေသည်။ သင့်ကို အမြန်ဆုံး သတ်ဖြတ်ရန် သူ ကျိန်ဆိုလိုက်သည်။ တစ်ဖက်လူသည် အခြေတည်အဆင့် (၅) တွင် ရှိနေသည်။ သင်သည် သူ့ပြိုင်ဘက် မဟုတ်ပေ။ အရေးကြီးသော အခိုက်အတန့်တွင် ဟိုရင်းယွမ် ပေါ်လာပြီး သင့်အတွက် သေစေနိုင်သော တိုက်ကွက်ကို ကာကွယ်ပေးခဲ့သော်လည်း သူမ အသက်ဖြင့် ပေးဆပ်လိုက်ရသည်။]
[သင် အခွင့်အရေးယူပြီး ထွက်ပြေးလွတ်မြောက်ခဲ့သည်။ သင် အသက်ရှင်ခဲ့သော်လည်း လက်တစ်ဖက် ပေးဆပ်လိုက်ရသည်။]
[အသက် ၈၇ နှစ် - မသိရသော အကြောင်းရင်းဖြင့် သင် ထိုမိစ္ဆာကျင့်ကြံသူ၏ ရှာဖွေတွေ့ရှိခြင်းကို ခံလိုက်ရသည်။]
[သင် သူ့ပြိုင်ဘက် မဟုတ်ပေ။]
[သင် သေဆုံးသွားပါပြီ။]
[အသက် - ၈၇ နှစ်၊ ၉ လ၊ ၁၇ ရက်]
'ငါ သတိမကြီးသေးဘူး.. ငါ ဂရုမစိုက်သေးဘူး..'
ချန်ချန်ရွှယ်ဟာ သရုပ်ဖော် မသေမျိုးကျင့်ကြံခြင်း ဘဝထဲမှာ သူမရဲ့ သေဆုံးမှုအား တည်ငြိမ်စွာ ရင်ဆိုင်နိုင်ခဲ့သည်။
သူမ အကြိမ်ကြိမ် သေဆုံးဖူးတော့ အသားကျနေပေပြီ။ အကြိမ်ကြိမ် ကျရှုံးပြီးခဲ့တာကြောင့် ကျရှုံးမှာကို မကြောက်တော့ချေ။
သူမ သတိမကြီးသေးဘူးလို့ပဲ ခံစားရပြီး သူမရဲ့ သဘောထားကို ဆက်လက် ပြုပြင်ရပေအုံးမည်။
သူမ မလုပ်သင့်တဲ့ အရာတွေကို ဘယ်တော့မှ မလုပ်သင့်ပဲ တခြားသူတွေကိုလည်း ပေါ့ပေါ့ဆဆ မကူညီသင့်ပေ။
အကယ်၍ ကူညီလိုက်ပါက တစ်ခုခု ဖြစ်မှာ သေချာပေသည်။
သူမ တည်ငြိမ်စွာ နေရပေမည်။
"ဖြစ်နိုင်တာက... ငါ (၅) ကြိမ်၊ (၆) ကြိမ်လောက် ထပ်ပြီး သရုပ်ဖော်လိုက်ရင် သရုပ်ဖော် ဘဝထဲမှာ အခြေတည်အဆင့်ကို ရောက်နိုင်လောက်တယ်"
ချန်ချန်ရွှယ် ခေါင်းခါလိုက်၏။ "ထားလိုက်ပါတော့... အခု အများကြီး တွေးနေလို့လည်း အသုံးမဝင်ဘူး"
"သရုပ်ဖော် မသေမျိုးကျင့်ကြံခြင်းထဲမှာ ဘာတွေ ဖြစ်လာမလဲ ဆိုတာ..."
"ငါ ကြိုတင်ခန့်မှန်းနိုင်မယ့် နည်းလမ်း မရှိဘူး"
"..."
...
[ချန်ချန်ရွှယ်သည် သရုပ်ဖော် မသေမျိုးကျင့်ကြံခြင်း ဘဝတွင် (၈၇) နှစ်၊ (၉) လ၊ နှင့် (၁၇) ရက်တိုင်တိုင် အသက်ရှင် နေထိုင်ခဲ့သည်။ သင်သည် အောက်ပါ ဆုလာဘ်များကို ရရှိလိုက်သည် - ]
[ဆုလာဘ် ၁ - ဝိညာဉ်စုစည်းဆေးလုံး (စားသုံးပြီးနောက် ဝိညာဉ်စွမ်းအင် အမြောက်အမြား သင့်ခန္ဓာကိုယ်ထဲ စီးဝင်လာမည်)]
[ဆုလာဘ် ၂ - သတိကြီးခြင်း (မလုပ်ခင် သေချာစဉ်းစားတတ်ခြင်း)]
[ဆုလာဘ် ၃ - ချီစုစည်းမှု အဆင့် (၇) ကျင့်ကြံမှု (ချီစုစည်းမှု အဆင့် (၇) သို့ တိုက်ရိုက် ချိုးဖျက်ဝင်ရောက်ခြင်း)]
တွန့်ဆုတ်နေစရာ လိုသေးမည်လော.....
"ငါ နံပါတ် ၃ ကို ရွေးမယ်"
ကိုယ့်ရဲ့ ကိုယ်ပိုင်ခွန်အားက အရာအားလုံးရဲ့ အရင်းမြစ်ဖြစ်ရာ ပိုင်ယီဟာ ချီစုစည်းမှု အဆင့် (၇) ကို မတွန့်ဆုတ်ဘဲ ရွေးချယ်လိုက်၏။
သူ ရုတ်တရက် သဘောပေါက်လိုက်တာ တစ်ခုက သူ အဆင့်တက်တိုင်း ချန်ချန်ရွှယ်ရဲ့ ဆုလာဘ် တွက်ချက်မှုကြောင့် အဆင့်တက်ရတာပင်။
ချန်ချန်ရွှယ်ရဲ့ သရုပ်ဖော် ဘဝက တကယ်ပဲ စိတ်လှုပ်ရှားစရာ မကောင်းသလို သူမရဲ့ အရိုးအခြေခံအုတ်မြစ်ကြောင့် သူမရဲ့ ကျင့်ကြံမှုက နှေးကွေးလေသည်။
သူမ အသက် (၈၀) ကျော်မှ ချီစုစည်းမှု အဆင့် (၈) ပဲ ရှိသေးတာဖြစ်ပြီး သူ့အတွက် တွက်ချက်ပေးတဲ့ ဆုလာဘ်က ချီစုစည်းမှု အဆင့် (၇) ပဲ ရှိပေသည်။
ဒါပေမဲ့ သူမက လုံလောက်အောင် တည်ငြိမ်လေသည်။
ချန်ချန်ရွှယ်ရဲ့ တည်ငြိမ်မှုကြောင့်ပဲ အကြိမ်တိုင်း သူမဟာ အရင်စံချိန်ဟောင်းကို ချိုးဖျက်နိုင်ခဲ့တာကြောင့် ဒါက နောက်ကွယ်က သူဌေးဖြစ်တဲ့ ပိုင်ယီကိုလည်း အကျိုးရှိစေခဲ့သည်။
...
ချန်အိမ်တော်...
ချန်ချန်ရွှယ်ဟာလည်း သူမရဲ့ ဆုလာဘ်ကို လက်ခံရရှိလိုက်၏။ ဆေးရနံ့တွေ သင်းပျံ့နေတဲ့ သူမ လက်ဝါးပေါ်က ဝိညာဉ်စုစည်းဆေးလုံးကို ကြည့်ပြီး သူမ မျက်ခုံးမပင့်ဘဲ မနေနိုင်တော့ပေ။ သူမရဲ့ မျက်နှာက နည်းနည်း ထူးဆန်းနေခဲ့သည်။ "ဒါ ငါ အသက် (၈၂) နှစ်တုန်းက ရခဲ့တဲ့ ဝိညာဉ်စုစည်းဆေးလုံး မဟုတ်ဘူးလား"
"ဒါကလည်း တော်တော် ကောင်းတဲ့ ဆုလာဘ်လို့ ပြောလို့ရတယ်... ဒီဆေးလုံးက အခြေတည်အဆင့် ကျင့်ကြံသူတွေ အတွက်တောင် အာနိသင် ရှိတာကိုး... မသေမျိုးကျင့်ကြံခြင်း လောကမှာ ဒီဆေးလုံးရဲ့ တန်ဖိုးက အဆင့်နိမ့် ဝိညာဉ်ကျောက်တုံး(၁၀) တုံးလောက် ရှိတယ်"
"အကယ်၍ သာမန်လောကက ပိုက်ဆံနဲ့ လဲမယ်ဆိုရင် ရွှေစ (၁၀,၀၀၀) မပေးရဘဲ ဒီဆေးလုံးကို ဝယ်လို့ ရမှာ မဟုတ်ဘူး"
သူမ ဝိညာဉ်စုစည်းဆေးလုံးကို မတွန့်ဆုတ်ဘဲ မျိုချလိုက်၏။
အချိန်ကိုက်ပင် သူမက အခြေတည်အဆင့် (၂) ကို အခုလေးတင် ချိုးဖျက်ဝင်ရောက်ခဲ့ပြီး အဲဒီတုန်းက အောင်မြင်စွာ ချိုးဖျက်ဝင်ရောက်နိုင်ဖို့အတွက် သူမဆီမှာ ရှိသမျှ ဆေးလုံးတွေ အကုန်နီးပါး သုံးလိုက်ရကာ ကုသဖို့ ဆေးလုံးတချို့ပဲ ကျန်တော့လေသည်။
ထို့ကြောင့် ယခု ဒီ ဝိညာဉ်စုစည်းဆေးလုံးက သူမရဲ့ အခြေတည်အဆင့် (၂) ကျင့်ကြံမှုကို တည်ငြိမ်အောင် လုပ်ဖို့ လုံလောက်ပေသည်။
ဒီတစ်ခါ ဆုလာဘ် အတွက်တော့...
ချန်ချန်ရွှယ် တော်တော် ကျေနပ်မိ၏။
မသေမျိုးကျင့်ကြံခြင်း သရုပ်ဖော်တိုင်း အလွန် ပျင်းစရာ ကောင်းတယ် ဆိုတာ သူမ ကောင်းကောင်း သိပြီးစိတ်လှုပ်ရှားစရာ ဆိုတဲ့ စကားလုံးနဲ့ ဘာမှ မဆိုင်ပေ။
ထို့ကြောင့် ဒီလို ဆုလာဘ်မျိုး ရတာက သူမ မျှော်လင့်ထားတာထက် ကျော်လွန်နေလေသည်။
...
ချန်ချန်ရွှယ် ဘက်မှာ တည်ငြိမ်နေပေမယ့် ချင်းကျောက် ဘက်မှာတော့ မကျေမနပ် ဖြစ်နေခဲ့သည်။ ပိုင်ယီ ဘက်မှာလည်း ဆုလာဘ်ကို ပျော်ရွှင်စွာ စောင့်ဆိုင်းနေခဲ့ပေသည်။
သို့ပေမဲ့ ချင်းဟယ် ခရိုင်က လီမျိုးနွယ်စု ကတော့ ယခုအချိန်၌ မပျော်ရွှင်နိုင်ချေ။
လီမျိုးနွယ်စု အိမ်တော်ထဲတွင် မုတ်ဆိတ်ဖြူ၊ မျက်ခုံးဖြူနဲ့ အဘိုးအို တစ်ယောက်ဟာ ထိပ်ဆုံး ခုံမှာ ထိုင်နေခဲ့ပြီး လီမျိုးနွယ်စု ခေါင်းဆောင် လီဟယ်ရှန်း ကတော့ ဒီအဘိုးအို ဘေးမှာပဲ ထိုင်နေခဲ့သည်။
နှစ်ဖက်စလုံးရဲ့ အဆင့်အတန်းက တစ်ချက်ကြည့်လိုက်တာနဲ့ သိသာနေပေသည်။
လီဟယ်ရှန်းရဲ့ သဘောထားက အလွန် နှိမ့်ချနေခဲ့ပြီး ဂျူနီယာ တစ်ယောက်ရဲ့ လေသံနဲ့ ပြောနေခဲ့၏။ သူက အားနည်းစွာနဲ့ တုံ့ဆိုင်းတုံ့ဆိုင်း ပြောလိုက်သည်။ "အဘိုး... အဘိုးက ဝိညာဉ်ဓားဂိုဏ်းကနေ အခုမှ ဆင်းလာတာ ပြီးတော့ အဲဒီ ပိုင်ယီကို ချက်ချင်း ကိုင်တွယ်ချင်နေတာလား... အခုက ချန်မျိုးနွယ်စု အဘိုးသခင်ကြီးရဲ့ မွေးနေ့လေ တစ်ဖက်လူက (၉) ရက်နဲ့ (၉) ည စားသောက်ပွဲ ကျင်းပချင်နေတာ... အခုမှ (၃) ရက် (၄) ရက်လောက်ပဲ ရှိသေးတယ်..."
"အကယ်၍ ဒီအချိန်မှာ ပိုင်ယီကို သွားကိုင်တွယ်ရင် ပြဿနာ ကြီးထွားသွားမလား... အဲဒီ သူတော်စင်မသာ သိသွားရင် တစ်ဖက်လူ မကျေမနပ် ဖြစ်သွားနိုင်တယ်"
မုတ်ဆိတ်ဖြူ၊ မျက်ခုံးဖြူ အဘိုးအိုက လီဟယ်ရှန်းရဲ့ အဘိုး ဖြစ်သလို မသေမျိုးကျင့်ကြံခြင်း လောကမှာ လီမျိုးနွယ်စုရဲ့ လက်ရှိ ကျောထောက်နောက်ခံလည်း ဖြစ်လေသည်။
သူကလည်း ချန်ချန်ရွှယ်လိုပဲ ဝိညာဉ်ဓားဂိုဏ်းက လာခြင်းပင်။
ဒါပေမဲ့ သူတော်စင်မ ချန်ချန်ရွှယ်ရဲ့ အဆင့်အတန်းနဲ့ မတူဘဲ သူက ဝိညာဉ်ဓားဂိုဏ်းရဲ့ ဂိုဏ်းထောက်တစ်ယောက်သာ ဖြစ်လေသည်။
ဒါ့အပြင် သူက အပြင်စည်း ဂိုဏ်းထောက်တစ်ယောက်ပင်။
"(၉) ရက်နဲ့ (၉) ည..." အဘိုးအို မျက်မှောင်ကြုတ်လိုက်၏။ "ချန်မျိုးနွယ်စုက ကလေးက မွေးနေ့ပွဲ ကျင်းပရုံလေးကို သူက ဒီလောက် အကြီးအကျယ် လုပ်နေတာလား"
သူ့ရဲ့ မျက်မှောင်ကြုတ်မှုကို ကြည့်ခြင်းအားဖြင့် သူ တွန့်ဆုတ်နေမှန်း သိသာပေသည်။
ဘာပဲဖြစ်ဖြစ်... သူဟာ ချန်ချန်ရွှယ်ကို မစော်ကားရဲချေ။
ချန်ချန်ရွှယ်ရဲ့ အဆင့်အတန်းက သူ့ထက် အဆပေါင်းများစွာ မြင့်မားရုံသာမက သူမရဲ့ ကျင့်ကြံမှုကလည်း သူ့ထက် အများကြီး ပိုသန်မာတာကြောင့်ပင်။
သူဟာ ချီစုစည်းမှု အဆင့် (၉) ပဲ ရှိသေးပြီး ချန်ချန်ရွှယ်ကတော့ အခြေတည်အဆင့်ကို ရောက်နေပေပြီ။
ဒါပေမဲ့ အဘိုးအိုက အမြန် ပြောလိုက်သည်။ "ကိစ္စမရှိပါဘူး... (၉) ရက်နဲ့ (၉) ည စားသောက်ပွဲ ကျင်းပတော့ရော ဘာဖြစ်လဲ... ပိုင်ယီ ဆိုတဲ့ မသေမျိုးကျင့်ကြံသူက ချန်အိမ်တော်နဲ့ နီးသလား"
လီဟယ်ရှန်း ခဏ စဉ်းစားပြီး ပြန်ဖြေလိုက်သည်။ "တော်တော် ဝေးပါတယ်... သာမန်လူ လမ်းလျှောက်မယ် ဆိုရင် အမွှေးတိုင် နှစ်တိုင်စာလောက် ကြာအောင် လျှောက်ရလိမ့်မယ်"
"ဒါဆို ကောင်းတာပေါ့" အဘိုးအိုရဲ့ မျက်မှောင်ကြုတ်မှု လျော့ကျသွားခဲ့သည်။
ထို့နောက် သူ အေးစက်စွာ နှာခေါင်းရှုံ့လိုက်ပြီး သူ့လေသံက အေးစက်ကာ ယုတ်မာသော အသံပေါက်နေလေသည်။ "လေလွင့်ကျင့်ကြံသူလေး တစ်ယောက်က ငါ့လီမျိုးနွယ်စုကို အနိုင်ကျင့်ရဲတယ်ပေါ့... သူက လီမျိုးနွယ်စုဝင် တစ်ယောက်ကို သတ်ခဲ့ပြီးတာတောင် ချင်းဟယ် ခရိုင်မှာ ဗြောင်ကျကျ နေရဲသေးတယ်.. တော်တော် မောက်မာတာပဲ"
"ပြီးတော့ မင်း..."
သူ လီဟယ်ရှန်းကို စူးစိုက်ကြည့်လိုက်၏။ "တစ်ဖက်လူက မသေမျိုးကျင့်ကြံသူ ဆိုတာတောင် မင်း မသိဘဲ လူလွှတ်ပြီး သူ့ကို သွားစော်ကားခိုင်းရသလား... လီမျိုးနွယ်စုကို ထာဝရ ငရဲကျအောင် လုပ်ချင်နေတာလား"
"အကယ်၍ တစ်ဖက်လူက နည်းနည်းလေး ပိုသန်မာရင် ငါတောင် မင်းတို့လို အသုံးမကျတဲ့ မျိုးဆက်တွေကို ကာကွယ်ပေးနိုင်မှာ မဟုတ်ဘူး"
လီဟယ်ရှန်းကတော့ ရှက်ရွံ့တဲ့ အပြုံးလေးသာ ပြုံးပြနိုင်တော့၏။
မျိုးနွယ်စု ခေါင်းဆောင် တစ်ယောက်ရဲ့ မျက်နှာပေါ်မှာ ဒီလို အမူအရာမျိုး မြင်ရတာ စိတ်ကူးကြည့်ဖို့ ခက်ခဲပေသည်။
အဘိုးအို ဆက်ပြောလိုက်သည်။ "မင်းပြောတော့ ပိုင်ယီ ဆိုတဲ့ ကျင့်ကြံသူက လူသတ်ဖို့ ဓားကို ထိန်းချုပ်တဲ့အခါ မတည်ငြိမ်ဘူးဆို... ဆိုလိုတာက တစ်ဖက်လူက ချီစုစည်းမှု အဆင့် (၅) ကို ချိုးဖျက်ဝင်ရောက်တာ မကြာသေးဘူး ဆိုတာပဲ... ငါ ထင်တာတော့ သူ သူ့ရဲ့ ကျင့်ကြံမှုအဆင့်ကို တည်ငြိမ်အောင်တောင် မလုပ်ရသေးဘူး"
"ဒီလို ငယ်ရွယ်တဲ့ အသက်အရွယ်နဲ့ ချီစုစည်းမှု အဆင့် (၅) ကို ရောက်ရှိသွားတဲ့ လေလွင့်ကျင့်ကြံသူ တစ်ယောက်"
သူ မျက်လုံးကျဉ်းလိုက်ပြီး သံသယ အရိပ်အယောင် တစ်ခု သူ့မျက်လုံးထဲ ဖြတ်သန်းသွားခဲ့သည်။ "သူ့မှာ ကျောထောက်နောက်ခံ ရှိရင်ရှိ၊ မရှိရင် ရတနာတစ်ခုခု ရထားတာပဲ ဖြစ်မယ်"
'ကျောထောက်နောက်ခံ ရှိနိုင်ခြေက မများဘူး...'
အကယ်၍ သူ့မှာ ကျောထောက်နောက်ခံသာ ရှိရင်... ဒီလို အရှက်ရမှုကို ဘယ်လိုခံနေမည်နည်း။ လီမျိုးနွယ်စုကို အကြာကြီးကတည်းက သတ်ဖြတ်ပစ်လိုက်ပြီ ဖြစ်ပြီး သူ ဝိညာဉ်ဓားဂိုဏ်းကနေ လီမျိုးနွယ်စုကို ပြန်လာတဲ့အခါ မြင်ရမှာက အလောင်းပုံကြီးပဲ ဖြစ်မည်ပင်။
တစ်နည်းအားဖြင့် ပြောရရင်... သူ ရတနာ တစ်ခုခု ရရှိထားတာ ဖြစ်နိုင်ခြေ များပေသည်။
'တန်ဖိုးရှိတဲ့ ဆေးလုံးလား... ကျင့်စဉ်လား... အမွေအနှစ်လား...'
အဘိုးအို ဂနာမငြိမ် ဖြစ်လာခဲ့သည်။ သူဟာ ချီစုစည်းမှု အဆင့် (၉) မှာ ရပ်တန့်နေတာ ကြာပြီ ဖြစ်ပြီး သူ့သက်တမ်းကလည်း ဖြည်းဖြည်းချင်း ကုန်ဆုံးနေခဲ့ပေပြီ။ ကြည့်ရတာ သူ အကြာကြီး နေရတော့ပုံ မပေါ်ချေ။
ပိုရှည်လျားတဲ့ သက်တမ်း ရဖို့အတွက် သူဟာ အဆင့်မြင့်မြင့်ကို ချိုးဖျက်ဝင်ရောက်ဖို့ အရေးတကြီး လိုအပ်နေပေပြီ။
အကယ်၍ သူ ချိုးဖျက်ဝင်ရောက်ချင်ပါက အရင်းအမြစ်တွေ လိုအပ်ပြီး ဝိညာဉ်ဓားဂိုဏ်းရဲ့ အရင်းအမြစ်တွေက သူအတွက် နည်းပါးလွန်းတာကြောင့် ဒီအတားအစီးက ကျော်ဖြတ်နိုင်မည်မဟုတ်ပေ။
...