အခန်း ၃၇ : သတိကြီးတဲ့ သူတော်စင်မ ချန်ချန်ရွှယ်၊ သိုသိပ်စွာ နေထိုင်ပါ
ချင်းကျောက်ဟာ ရုတ်တရက် မျက်လုံးပြုးသွားခဲ့လေသည်။ ပထမဆုံးအကြိမ် မသေမျိုးကျင့်ကြံခြင်း သရုပ်ဖော်တုန်းက သရုပ်ဖော် စနစ်က သူမကို ဆုလာဘ် တစ်ခုပဲ ပေးခဲ့လို့ ဒီစနစ်က နည်းနည်း ကပ်စေးနည်းတယ်လို့ သူမ ခံစားခဲ့ရသည်။
ဒါပေမဲ့ ဒီတစ်ခါတော့ သူမ အဲဒီအမြင်ကို ပြန်ရုပ်သိမ်းလိုက်ပေပြီ။
ဒါက မွေးရာပါ ဝိညာဉ်ခန္ဓာကြောင့်ပင်။
မွေးရာပါ ဝိညာဉ်ခန္ဓာ တစ်ဝက်ဆိုပေမယ့် ဒါက သူမအား အလွန် စိတ်လှုပ်ရှားစေတုန်းပင်။
မွေးရာပါ ပါရမီတွေထဲက တစ်ခု၊ မွေးရာပါ ဝိညာဉ်ခန္ဓာလို ပါရမီမျိုးက မသေမျိုးကျင့်ကြံသူတွေ အတွက် ဘာကို ဆိုလိုသလဲ ဆိုတာ ချင်းကျောက် သဘာဝကျကျ သိလေသည်။
ချင်းကျောက်က သူမရဲ့ မသေမျိုးကျင့်ကြံခြင်း ပါရမီက အလွန် မြင့်မားတယ်လို့ ထင်မြင်ယူဆထားပြီး သူမရဲ့ မွေးရာပါ အရည်အချင်းက ပါရမီရှင်လို့ ခေါ်ဆိုဖို့ လုံလောက်တယ်လို့ ထင်ပေသည်။
ဒါပေမဲ့ မသေမျိုးကျင့်ကြံသူ တစ်ယောက်က ဘယ်လောက်ပဲ ပါရမီကောင်းကောင်း မွေးရာပါ ဝိညာဉ်ခန္ဓာရဲ့ ဆွဲဆောင်မှုကို မလွန်ဆန်နိုင်ချေ။
"ကောင်းတယ်" သူမ ခေါင်းထဲမှာ အတွေးပေါင်းစုံ ပေါ်လာခဲ့ပြီး နောက်ဆုံးမှာတော့ စကားတစ်လုံးတည်း အဖြစ် ပြောင်းလဲသွားခဲ့သည်။
သူမဟာ နည်းနည်း စိတ်မရှည် ဖြစ်လာခဲ့ပြီး နောက်ထပ် မသေမျိုးကျင့်ကြံခြင်း သရုပ်ဖော်မှုကို ချက်ချင်း စတင်ချင်နေပေပြီ။ ဝမ်းနည်းစရာ ကောင်းတာက သရုပ်ဖော် စနစ်အား သူမဟာ (၁၂) နာရီတိတိ စောင့်ရပေအုံးမည်။
"အကယ်၍ အချိန်တိုင်း ဆုလာဘ်တွေက ဒီလောက် ရက်ရောနေမယ် ဆိုရင် မကြာခင်မှာပဲ..."
ချင်းကျောက် လက်သီးဆုပ်လိုက်၏။ "ငါ ချန်ချန်ရွှယ်ကို ဘာမှော်လက်နက်မှ မပါဘဲ အနိုင်ယူနိုင်တော့မယ်"
"လက်ဗလာနဲ့ ချန်ချန်ရွှယ်ကို အနိုင်ယူမယ်"
ဟုတ်ပေသည်။
သူမ တောင်အောက်ဆင်းလာတဲ့ ရည်ရွယ်ချက်ကို မှတ်မိနေတုန်းပင်။ သူမဟာ ချန်ချန်ရွှယ်ရဲ့ အနိုင်ယူခံရတဲ့ မကျေနပ်မှုကို မမေ့ပျောက်နိုင်သေးပေ။
ဘာလို့ အခုသွားပြီး မစိန်ခေါ်တာလဲ ဆိုတော့... ချင်းကျောက်မှာ ဦးနှောက် ရှိသေးလို့ပင်.....
အခြေတည်အဆင့် (၁) ရှိတဲ့ ချန်ချန်ရွှယ်ကို ကျင်းရှင်း နန်းတော်က ယူလာတဲ့ မှော်လက်နက်တွေရဲ့ အကူအညီနဲ့ ဆိုရင် သူမဟာ ယှဉ်ပြိုင်နိုင်လောက်ပြီး ပြိုင်ဘက်အား အနိုင်ယူနိုင်မယ့် ယုံကြည်ချက်လည်း အနည်းငယ် ရှိပေသည်။
ဒါပေမဲ့ ချန်ချန်ရွှယ်က မနေ့ကမှ အခြေတည်အဆင့် (၂) ကို ချိုးဖျက်ဝင်ရောက်သွားတာကြောင့် ချင်းကျောက်ရဲ့ ဂနာမငြိမ် ဖြစ်နေတဲ့ အတွေးတွေ ချက်ချင်း ပျောက်ကွယ်သွားစေခဲ့သည်။
နည်းနည်း သူရဲဘောကြောင်တာက ပိုကောင်းပေသည်။
အခုချိန်မှာ ဝိညာဉ်ဓားဂိုဏ်းက အဲဒီ မုန်းစရာကောင်းတဲ့ မိန်းမကို သွားစိန်ခေါ်တာက ပြဿနာ သွားရှာတာနဲ့ အတူတူပင်။
သူမ အရိုက်ခံရမှာ သေချာလေသည်.......
...
"ဂျိမ်း"
ရေပုံးလောက် တုတ်တဲ့ မိုးကြိုးသွား တစ်ခု ဖြတ်သန်းသွားခဲ့ပြီး ကျောက်တုံးကြီး တစ်တုံးကို တိုက်ရိုက် ပစ်ချလိုက်သည်။ မာကျောတဲ့ ကျောက်တုံးကြီးဟာ ချက်ချင်း ပေါက်ကွဲသွားခဲ့ပြီး အစိတ်စိတ်အမွှာမွှာ ဖြစ်သွားခဲ့သည်။
ထို့အပြင် မြေကြီးပေါ်မှာ ကြီးမားတဲ့ တွင်းကြီးတစ်ခု ပေါ်လာခဲ့ပြီး လျှပ်စီးကြောင်းတွေရဲ့ လောင်ကျွမ်းရာ အစအနတွေ မြေပြင်ပေါ်မှာ ဖုံးလွှမ်းသွားခဲ့၏။
"သူ့ရဲ့ စွမ်းအားက မဆိုးဘူးပဲ" ချန်ချန်ရွှယ် ရရှိလိုက်တဲ့ ဆုလာဘ်က ကောင်းကင် မိုးကြိုးထိန်းချုပ်ခြင်း နည်းစနစ်ပင်။ မပြည့်စုံတဲ့ အစိတ်အပိုင်းလေးတစ်ခု ဆိုပေမယ့် သူမ အသုံးပြုလို့ ရသေးပေသည်။
မသေမျိုးကျင့်ကြံခြင်း သရုပ်ဖော် စနစ်က ရရှိတဲ့ ဆုလာဘ်ကို လက်တွေ့မှာ အသုံးပြုတိုင်း သိပ်လက်တွေ့မကျသလို သူမဟာ အမြဲ ခံစားခဲ့ရသည်။
သရုပ်ဖော် မသေမျိုးကျင့်ကြံခြင်း ကမ္ဘာမှာ ကောင်းကင်ဂိုဏ်းက ဝိညာဉ်ဓားဂိုဏ်းအောက် နည်းနည်းလေးပဲ နိမ့်လေသည်။
ထို့ကြောင့် ကောင်းကင်ဂိုဏ်းရဲ့ မိုးကြိုးထိန်းချုပ်ခြင်း နည်းစနစ်က တကယ့်ကို စွမ်းအားကြီးလေသည်။
ချန်ချန်ရွှယ်က သူ့ရဲ့ စွမ်းအားကို စမ်းသပ်ဖို့ အထူးတလည် အပြင်ထွက်လာခဲ့ပြီး အခုတော့ သူမ ရရှိလိုက်တဲ့ ဆုလာဘ်ကို အလွန် ကျေနပ်နေမိခဲ့သည်။ "အကယ်၍ ဒီ မိုးကြိုးထိန်းချုပ်ခြင်း နည်းစနစ်သာ ဝိညာဉ်ဓားဂိုဏ်းမှာ ရှိနေရင် ဓားကျင့်စဉ်လိုပဲ ဘိုးဘေးပိုင် အဖိုးတန် ကျင့်စဉ်တစ်ခု အဖြစ် သတ်မှတ်ခံရလောက်တယ်"
မိုးကြိုးရဲ့ စွမ်းအားက အလွန် ပြင်းထန်ပြီး ကျင့်စဉ်တစ်ခုကြောင့် ဖြစ်ပေါ်လာတဲ့ မိုးကြိုးဆိုတော့ ပိုအန္တရာယ်များတဲ့ ဝိညာဉ်စွမ်းအင်တွေ ပါဝင်နေခဲ့ရာ သူ့ရဲ့ စွမ်းအားက... သာမန် မိုးကြိုးထက် ပိုကြောက်စရာ ကောင်းပေသည်။
ဒါ့အပြင် မိုးကြိုးရဲ့ အမြန်နှုန်းက သိပ်မြန်လွန်းလို့ သာမန်ကျင့်ကြံသူတွေ ဆိုပါက တုံ့ပြန်ချိန်တောင် ရလိုက်မည် မဟုတ်ပေ။
၎င်းက လူတွေကို အလစ်အငိုက်မိဖို့ လုံလောက်လေသည်။
"နောက်တစ်ကြိမ် သရုပ်ဖော်ဖို့ တစ်ရက်နီးပါး လိုသေးတယ်"
ချန်ချန်ရွှယ် ရေရွတ်လိုက်၏။ "ငါ ထပ်စောင့်ရဦးမှာမယ်"
...
အချိန်များ ကုန်ဆုံးသွားခဲ့လေသည်။
နောက်တစ်နေ့ မွန်းတည့်ချိန် ရောက်တဲ့အခါ ချန်ချန်ရွှယ်နဲ့ ချင်းကျောက် နှစ်ယောက်စလုံး မသေမျိုးကျင့်ကြံခြင်း သရုပ်ဖော် စနစ်နဲ့ ချိတ်ဆက်ဖို့ တပြိုင်နက်တည်း ကြိုးစားနေတာကို ပိုင်ယီ အာရုံခံမိလိုက်သည်။ သူတို့ နှစ်ယောက် အချိန်ကိုက် ညှိထားသလိုပင်။
ပိုင်ယီ အနေနဲ့ ရွေးချယ်ခံနှစ်ယောက်ကို တားဆီးမှာ မဟုတ်သလို သူတို့ရဲ့ စိတ်အားထက်သန်မှုကိုလည်း ဖျက်ဆီးမှာ မဟုတ်ချေ။
သူ ခွင့်ပြုချက် ပေးလိုက်တဲ့အခါ ချန်ချန်ရွှယ်နဲ့ ချင်းကျောက် နှစ်ယောက်စလုံး သရုပ်ဖော် စနစ်ထဲ တပြိုင်နက်တည်း ဝင်ရောက်သွားခဲ့ကြသည်။
ချန်ချန်ရွှယ်ဟာ သူမ ရင်းနှီးနေတဲ့ ဘဝကိုပဲ ဆက်လက် ရွေးချယ်ခဲ့သည်။
ဒါက ပိုင်ယီ မျှော်လင့်ထားတဲ့ အတိုင်းပင်။ ပိုင်ယီက ချန်ချန်ရွှယ်ရဲ့ စရိုက်ကို ကောင်းကောင်း နားလည်နေပေပြီ။
ဒီရွေးချယ်ခံ အမှတ်၁ က ဘဝသစ်တစ်ခု ပြန်စမှာ မဟုတ်ပေ။
ခြွင်းချက် အနေနဲ့... သူမ လုံးဝ စိတ်ကုန်သွားရင်ပေါ့....
တူညီတဲ့ မသေမျိုးကျင့်ကြံခြင်း သရုပ်ဖော်မှုကို မကြာခဏ ကြုံတွေ့ရတာကြောင့် ချန်ချန်ရွှယ် နည်းနည်း စိတ်ကုန်နေပြီလို့ ပိုင်ယီ ခံစားရလေသည်။ ဒါပေမဲ့ သူမရဲ့ ရင်ထဲမှာ ဆက်လက် ကြိုးစားချင်တဲ့ ပြင်းပြတဲ့ ဆန္ဒတစ်ခု ရှိနေတုန်းပင်။
ဒီဆန္ဒ ပျောက်ကွယ်သွားတဲ့အခါ သူမဟာ ဘဝသစ်တစ်ခု ပြန်စကောင်း စနိုင်ပေလိမ့်မည်။
ရွေးချယ်ခံအမှတ် (၂) ချင်းကျောက် အတွက်ကတော့...
ဒီတစ်ခါ သူမ ဘဝသစ် ပြန်စဖို့ မရွေးချယ်ခဲ့ပေ။ သူမရဲ့ ရွေးချယ်မှုက ချန်ချန်ရွှယ်နဲ့ အတူတူပင်။ သူမရဲ့ အရင်ဘဝကို ဆက်လက် ရှင်သန်ဖို့ ရွေးချယ်လိုက်၏။
ဘာပဲဖြစ်ဖြစ်... ချင်းကျောက် အနေနဲ့ ဒီလို ကောင်းမွန်တဲ့ မွေးရာပါ ပါရမီ ရဖို့ မလွယ်ကူပေ။ ထို့ကြောင့် ဒီလို အခွင့်အရေးမျိုးကို သူမ လက်လွှတ်ခံမှာ မဟုတ်တာ သေချာပေသည်။
ဒီလို ကောင်းမွန်တဲ့ မွေးရာပါ ပါရမီ ရှိကာ သူမရဲ့ နောက်ခံကလည်း မဆိုးတာ ဘာမကျေနပ်စရာ ရှိမည်နည်း။
[အသက် ၀ နှစ် - ချန်ချန်ရွှယ်ဟာ ဆင်းရဲသော မိသားစုတွင် မွေးဖွားခဲ့သည်...]
[အသက် ၀ နှစ် - ချင်းကျောက်သည် မသေမျိုးကျင့်ကြံသော မိသားစုတွင် မွေးဖွားခဲ့သည်...]
ရွေးချယ်ခံတွေရဲ့ မသေမျိုးကျင့်ကြံခြင်း သရုပ်ဖော် ဘဝ နောက်တစ်ကြိမ် တရားဝင် စတင်ပေပြီ။
ပိုင်ယီ အာရုံအစိုက်ဆုံး လူကတော့ သဘာဝကျကျ ဝိညာဉ်ဓားဂိုဏ်းက ချန်ချန်ရွှယ်ပင်။
တခြား နည်းလမ်း မရှိချေ။ သရုပ်ဖော် စနစ်ထဲမှာ ချန်ချန်ရွှယ်ရဲ့ အဆင့်တက်နှုန်းက သိပ်နှေးကွေးပေမယ့် သူမ သရုပ်ဖော်တဲ့ အကြိမ်အရေအတွက်က အများဆုံး ဖြစ်နေတာကြောင့်ပင်။
ပြီးခဲ့တဲ့ အကြိမ် ချန်ချန်ရွှယ် သရုပ်ဖော်တုန်းက သူမဟာ ချီစုစည်းမှု အဆင့် (၆) ရောက်နေပေပြီ။
ဒီတစ်ခါ သူမဟာ ယခင်စံချိန်အား ချိုးနိုင်လိမ့်မယ်လို့ ပိုင်ယီ ခံစားရလေသည်။
သူ့အတွေး ဆုံးသွားတာနဲ့ မသေမျိုးကျင့်ကြံခြင်း သရုပ်ဖော် စနစ်ရဲ့ စာသား သတိပေးချက်တွေ သူ့မြင်ကွင်းထဲ နောက်တစ်ကြိမ် ပေါ်လာခဲ့သည်။
[အသက် ၁၅ နှစ် - ချန်ချန်ရွှယ်သည် ကောင်းကင်ဂိုဏ်းသို့ ပြောင်းရွှေ့ခဲ့သည်။ ကျင့်ကြံခြင်း အရင်းအမြစ် အမြောက်အမြား ရရှိပြီးနောက် သူမသည် ဂျူနီယာ ညီမလေးနှင့်အတူ လေ့ကျင့်ရန် ချက်ချင်း အပြင်ထွက်ခဲ့သည်။]
[အသက် ၂၀ နှစ် - ချန်ချန်ရွှယ် လေ့ကျင့်နေဆဲ ဖြစ်သည်။]
[အသက် ၃၀ နှစ် - သူမ၏ ကံတရား ပေါက်ကွဲသွားပြီး ချန်ချန်ရွှယ်ဟာ စွန့်ပစ်ခံနေရာတစ်ခု တွေ့ရှိခဲ့ပြီး ကောင်းမွန်သော ပစ္စည်းအမြောက်အမြား ရရှိခဲ့သည်။]
[အသက် ၄၀ နှစ် - ချန်ချန်ရွှယ်သည် ဂျူနီယာ ညီမလေးကို ခေါ်ပြီး တံခါးပိတ် ကျင့်ကြံခဲ့သည်။ ဒီတစ်ခါ သူမ၏ ဂျူနီယာ ညီမလေးက လျှို့ဝှက်ဆန်းကြယ်သော အင်အားစုကြီးကို မစော်ကားမိခဲ့ပေ။ ဒါက ချန်ချန်ရွှယ်ကို သက်ပြင်းချနိုင်စေခဲ့သည်။]
[အသက် ၅၀ နှစ် - ချန်ချန်ရွှယ်သည် မိစ္ဆာကျင့်ကြံသူကို ရန်စဖို့ မရွေးချယ်ခဲ့ပေ။ သူမသည် သေစေနိုင်သော ကပ်ဘေးတစ်ခုကို အောင်မြင်စွာ ရှောင်ရှားနိုင်ခဲ့သည်။]
[အသက် ၆၀ နှစ် - ချန်ချန်ရွှယ်သည် ချီစုစည်းမှု အဆင့် (၇) သို့ ရောက်ရှိသွားခဲ့သည်]
[အသက် ၇၀ နှစ် - သူမသည် မသေမျိုးကျင့်ကြံသူ တစ်ဦး ဖြစ်သော်လည်း ပြဿနာ မတက်စေရန် အတွက် နှစ်၇၀ကြာ အသက်ရှင်ခဲ့သော ချန်ချန်ရွှယ်သည် လူတစ်ယောက်ကိုမျှ မသတ်ဖြတ်ခဲ့ပေ။ ကိုယ့်ကိုယ်ကိုယ် လေ့ကျင့်ရာတွင် သူမ၏ ပစ်မှတ်က မိစ္ဆာသားရဲများသာ ဖြစ်ပေသည်။]
[အသက် ၈၀ နှစ် - ချန်ချန်ရွှယ်သည် ချီစုစည်းမှု အဆင့် (၈) သို့ ရောက်ရှိသွားခဲ့သည်]
...
ထင်ထားတဲ့ အတိုင်းပင်။
မသေမျိုးကျင့်ကြံခြင်း သရုပ်ဖော် စနစ်ထဲမှာ ချန်ချန်ရွှယ်ရဲ့ ဖွံ့ဖြိုးတိုးတက်မှုက ပိုင်ယီရဲ့ မျှော်လင့်ချက်ကို မကျော်လွန်ပေ။ တကယ်တော့ သူမက ပိုင်ယီ မျှော်လင့်ထားတာထက်တောင် ပိုထူးချွန်နေလေသည်။
သူမက အသက် (၈၀) အရွယ် အဘွားအိုအဖြစ် အသက်ရှင်နိုင်ခဲ့ပြီး သူမရဲ့ ကျင့်ကြံမှုက ချီစုစည်းမှု အဆင့် (၈) ကို ရောက်ရှိနိုင်ခဲ့ပေသည်။
ဒါတွေ အားလုံးက ချန်ချန်ရွှယ်ရဲ့ သတိကြီးတဲ့ စိတ်ထားကြောင့်ပင်။
မသေမျိုးကျင့်ကြံခြင်း သရုပ်ဖော်မှုကို ပြန်စတိုင်း သူမဟာ ပြီးခဲ့တဲ့ အကြိမ်ထက် ပိုသတိထားတတ်လာခဲ့သည်
ချန်ချန်ရွှယ် ဘယ်သူ့ကိုမှ ပြဿနာ မရှာသလို မသေမျိုးကျင့်ကြံသူ ရန်သူတွေကိုလည်း မစော်ကားချေ။
သူမက မသေမျိုးကျင့်ကြံခြင်း သရုပ်ဖော်ဖို့ မှန်ကန်တဲ့ နည်းလမ်းကို ရှာတွေ့သွားပုံရပေသည်။
ဒီလို ပျင်းစရာကောင်းတဲ့ မသေမျိုးကျင့်ကြံခြင်း ဘဝမျိုးက အပိုဆုလာဘ်တွေ မရနိုင်ဘူး ဆိုပေမယ့်...
ဒါပေမဲ့... သူမ အကြာကြီး အသက်ရှင်နိုင်လေသည်။
မသေမျိုးကျင့်ကြံခြင်း သရုပ်ဖော်မှု အတွေ့အကြုံ အများကြီး ရပြီးနောက်မှာ ချန်ချန်ရွှယ် တစ်ခု သင်ယူလိုက်ရ၏။
ခမ်းနားတဲ့ ဘဝ နေထိုင်ရတာ အသုံးမဝင်ပဲ စောစောပင် သေစေနိုင်ပေသည်။
အသက်ရှည်ရှည် နေနိုင်တာကမှ ဘုရင်လမ်းစဉ်ပင်။
သူမနဲ့ ရွယ်တူတန်းတူတွေ အကုန်လုံး သေဆုံးကုန်တဲ့ အထိ သူမ နေနိုင်ရင် သူမက အထူးချွန်ဆုံး ဖြစ်လာမည်ပင်။
အကြီးအကဲ ယွဲ့ သေဆုံးသွားတဲ့ အထိ သူမ နေနိုင်ရင် သူမရဲ့ ဂျူနီယာ ညီမလေး ဘေးကင်းသွားမည်ဖြစ်ပြီး အတိုချုပ်ပြောရရင် စကားတစ်လုံးတည်းသာ ရှိပေသည်။
၎င်းက အသက်ရှင်အောင် သိုသိပ်စွာ နေထိုင်ပါ.....
'ဒီသူတော်စင်မက မသေနိုင်မှန်း သိသာနေပေမယ့် သူမက သိပ်ကို သတိကြီးနေပါလား...'
ဒါပေမဲ့ ပိုင်ယီ သူမအား သိပ်သဘောကျလေသည်။
...