အခန်း ၃၅ : ဝိညာဥ်အကြွင်းအကျန် ဆွံ့အသွားခြင်း
ချင်းကျောက်က ချန်ချန်ရွှယ်လို ရွေးချယ်မှုမျိုး မလုပ်ခဲ့ပေ။ ဘာလို့လဲဆိုတော့ ပထမအကြိမ် သရုပ်ဖော်တုန်းက သူမဟာ မွေးရာပါ ပါရမီ တစ်ခုကြောင့် အကြီးအကျယ် ဒုက္ခရောက်ခဲ့ရတာကြောင့်ပင်။
အခု အဲဒီမြင်ကွင်းကို ပြန်တွေးလိုက်တိုင်း သူမဟာ မတုန်လှုပ်ဘဲ မနေနိုင်တော့ပေ။
သူမ တစ်ကိုယ်လုံးမှာ အဲဒီ မွေးရာပါ ပါရမီအပေါ် ခုခံငြင်းဆန်ချင်စိတ်တွေ ပြည့်နှက်နေခဲ့သည်။
ဒါကြောင့် သူမဟာ အရာအားလုံးကို အစကနေ ပြန်စဖို့နဲ့ ပါရမီအသစ် ရွေးချယ်ဖို့ ဆုံးဖြတ်လိုက်၏။
[၁။ အမှိုက် လမ်းစဉ် (ငယ်ရွယ်ပြီး ဆင်းရဲသူကို အနိုင်မကျင့်ပါနဲ့၊ လူလတ်ပိုင်းဖြစ်ပြီး ဆင်းရဲသူကို အနိုင်မကျင့်နဲ့၊ အိုမင်းပြီး ဆင်းရဲသူကို အနိုင်မကျင့်နဲ့)]
[၂။ မြေပိုင်ရှင်၏ မိုက်မဲသော သား (သင့်ဖခင်က တော်တော် ချမ်းသာသည်)]
[၃။ ပေါင်းစပ်ဖို အဖြစ် မွေးဖွားလာသူ (အောက်ပါတို့သည် ပိုက်ဆံပေးရသော အကြောင်းအရာများဖြစ်သည်)]
[၄။ ဘုရင်ကို သိပါ (ငါ့ထက် ဘယ်သူမှ ပိုမသိဘူး)]
[၅။ ဆယ်ဆက်တိုင်တိုင် လူကောင်း (သင်သည် လူကောင်းတစ်ယောက် ဖြစ်သည်)]
[၆။ သံကြက်ဖ (ခန္ဓာကိုယ်ပေါ်မှာ အမွေးတစ်ပင်တောင် မရှိလောက်အောင် သံလို မာကျောသူ - လွန်စွာ ကပ်စေးနည်းသူဟုလည်း အဓိပ္ပာယ်ရသည်)]
[၇။ မာလော့ ဂိုဏ်း (သင့်ခေါင်းကို သတိထားပါ)]
[၈။ အဘွားအိုတစ်ဦးကို သယ်ဆောင်ခြင်း(အမှိုက် နှင့် တွဲဖက်လိုက်လျှင် ပိုကောင်းမွန်စွာ အလုပ်လုပ်သည်)]
[၉။ နဂါးဘုရင် (သူ ပါးစပ်စောင်းလိုက်လျှင် သူ့ဆွဲဆောင်မှုက နှစ်ဆ တိုးလာသည်)]
[၁၀။ မွေးရာပါ ဝိညာဉ်ခန္ဓာ (မူလဝိညာဉ် အဆင့် အောက်တွင် မည်သည့် အတားအစီးမျှ မရှိ)]
"ရှူး"
ပါရမီအသစ် (၁၀) ခုကို မြင်လိုက်ရတော့ ချင်းကျောက် လေအေးတစ်ချက် ရှူရှိုက်လိုက်မိလေသည်။ ဒီတစ်ခါ သူမရဲ့ ကံတရားက ပြီးခဲ့တဲ့ အကြိမ်ထက် အဆပေါင်းများစွာ ပိုကောင်းနေတယ် ဆိုတာ သူမ သိလိုက်၏။
သူမ သိပ်နားမလည်တဲ့ ပါရမီတချို့ ရှိနေသေးပြီး ဥပမာ - ဘုရင်ကို သိပါဆိုတာမျိုးပင်။ သူမ လုံးဝ ဇဝေဇဝါ ဖြစ်နေခဲ့သည်။
ဒါပေမဲ့ သူမကို စိတ်ကျေနပ်စေတဲ့ ပါရမီတွေလည်း အများကြီး ပါနေပေသည်။
အထူးသဖြင့် နောက်ဆုံးတစ်ခုဖြစ်သည့် မွေးရာပါ ပါရမီ တစ်ခုပင်။ ဒါကို လျစ်လျူရှုထားဖို့ သူမအတွက် ပိုခက်ခဲနေခဲ့သည်။
"နောက်ဆုံး ပါရမီကတော့ သေချာပေါက် ရွေးကို ရွေးရမယ့် အရာပဲ... ဒါဆို ကျန်တာ ဘာရွေးရမလဲ" ချင်းကျောက် ဗျာများနေခဲ့ပြီး သူမ မနေနိုင်ဘဲ ရေရွတ်လိုက်၏။ "အမှိုက်ပထမ ပါရမီနဲ့ အဋ္ဌမ ပါရမီကြားမှာ ဆက်စပ်မှု ရှိနေသလိုပဲ"
"တွဲဖက်လိုက်ရင် ပိုကောင်းတယ်တဲ့... ဖြစ်နိုင်တာက ဒီပါရမီ နှစ်ခုကို ပေါင်းစပ်လိုက်ရင် မမျှော်လင့်ထားတဲ့ အရာတစ်ခုခု ဖြစ်လာနိုင်မလားပဲ"
'ဘာလို့...မစမ်းကြည့်ရမှာလဲ...'
ချင်းကျောက် ဒီအကြံ ဝင်လာခဲ့သည်။ ဘာပဲဖြစ်ဖြစ် မသေမျိုးကျင့်ကြံခြင်း သရုပ်ဖော် စနစ်ထဲမှာ သေတာက လက်တွေ့ဘဝနဲ့ မဆိုင်ဘူးပဲ သေသွားရင်တောင် မနက်ဖြန် ပြန်လုပ်လိုက်ရုံပင်။
ဒီလို ထူးဆန်းတဲ့ နာမည်နဲ့ ပါရမီတွေက တစ်ခုခု ဖုံးကွယ်ထားတာ ဖြစ်နိုင်ပေသည်။
အကယ်၍ ဒီပါရမီတွေ အကုန်လုံး လိုက်စမ်းကြည့်လိုက်ရင် အနည်းဆုံးတော့ အကောင်းဆုံး တစ်ခုကို ရွေးထုတ်နိုင်မည်ပင်။
"ကောင်းပြီ"
ချင်းကျောက် ချက်ချင်း ရွေးချယ်လိုက်၏။ "ငါ ဒီတစ်ခါ ၁၊ ၈ နဲ့ ၁၀ ကို ရွေးမယ်"
[သရုပ်ဖော်မှု စတင်လိုက်ပါသည်]
တစ်ခဏချင်းမှာပဲ ချင်းကျောက်ညာ သူမရဲ့ အသိစိတ်ကို နောက်တစ်ကြိမ် ထိန်းချုပ်နိုင်စွမ်း မရှိတော့ပေ။
ထို့နောက် ပြန်လည် သတိဝင်လာတဲ့ အချိန်မှာ သူမဟာ မွေးကင်းစ ကလေးလေး တစ်ယောက် ဖြစ်နေပြီ ဆိုတာ သိလိုက်ရလေသည်။
[အသက် ၀ နှစ် - သင်ဟာ မသေမျိုးကျင့်ကြံသူ မျိုးနွယ်စု တစ်ခုတွင် မွေးဖွားခဲ့သည်။ သင် မွေးဖွားသည့် နှစ်မှာပင် သင့်ဖခင်ဟာ ချင်းမျိုးနွယ်စု၏ ခေါင်းဆောင် ဖြစ်လာခဲ့သည်။ ထို့ကြောင့် သင်ဟာ ချင်းမျိုးနွယ်စု၏ အကြီးဆုံး သမီး ဖြစ်လာခဲ့သည်။]
[ချင်းမျိုးနွယ်စုနှင့် အဆင့်တူညီသော ဂူမျိုးနွယ်စုခေါင်းဆောင်ဟာ သင့်ကို ဂုဏ်ပြုရန်နှင့် သင့်အား သူ့သားနှင့် လက်ထပ်ပေးရန် အထူးတလည် ရောက်လာခဲ့သည်။]
[သင် ကြောင်အသွားခဲ့သည်။]
[အသက် ၃ နှစ် - သင့်၏ မွေးရာပါ ဝိညာဉ်ခန္ဓာကို စစ်ဆေးတွေ့ရှိခဲ့သည်။ သင့်ဖခင်ဟာ အလွန် ဝမ်းမြောက်သွားခဲ့ပြီး သင့်အား ချင်းမျိုးနွယ်စု၏ မသေမျိုးကျင့်စဉ်ကို သင်ကြားပေးခဲ့သည်။ သင်သည် နာမည်ကျော် ပါရမီရှင် တစ်ဦး ဖြစ်လာခဲ့သည်။]
[အသက် ၄ နှစ် - ပါရမီရှင် ဖြစ်သော သင်ဟာ ချီစုစည်းမှု အဆင့် (၁) သို့ ရောက်ရှိနေခဲ့ပေပြီ]
[အသက် ၆ နှစ် - သင်ဟာ ရှေးဟောင်း ဆွဲပြားတစ်ခု ရရှိခဲ့သည်။ လှသည်ဟု ထင်သဖြင့် လည်ပင်းတွင် ဆွဲထားလိုက်သည်။]
[အသက် ၈ နှစ် - သင်သည် ချီစုစည်းမှု အဆင့် (၂) သို့ ရောက်ရှိနေခဲ့သည်]
[အသက် ၁၀ နှစ် - တစ်ခါမှ မမြင်ဖူးသော သင့် စေ့စပ်ထားသူဆိုသူက မသေမျိုးကျင့်ကြံခြင်း ဂိုဏ်းတစ်ခုသို့ ဝင်ရောက်သွားကြောင်း သင် သိလိုက်ရသည်။ အဲဒီကောင်က ပါရမီရှင် ဖြစ်နေလိမ့်မယ်လို့ သင် ထင်မထားခဲ့ပေမယ့် သင် သူ့ကို မကြိုက်ကြောင်း ရှင်းလင်းနေခဲ့သည်။]
[အသက် ၁၃ နှစ် - သင်ဟာ ချီစုစည်းမှု အဆင့် (၃) သို့ ရောက်ရှိသွားခဲ့သည်]
[အသက် ၁၄ နှစ် - သင့်ခန္ဓာကိုယ်ထဲရှိ ဝိညာဉ်စွမ်းအင်များ လျင်မြန်စွာ ပျောက်ဆုံးနေကြောင်း သင် ရုတ်တရက် သတိပြုမိလိုက်ပြီး ဖြေရှင်းနည်း ရှာမတွေ့ခဲ့ပေ။ သင့်ဖခင်ဟာ ဤကိစ္စကို သိသွားသောအခါ အခြေတည်အဆင့် (၁၀) ရောက်နေသော ချင်းမျိုးနွယ်စု ဘိုးဘေးကြီးကို တောင်ပေါ်မှ ဆင်းလာရန် ချက်ချင်း တောင်းဆိုလိုက်သည်။ သို့သော် သူလည်း အကြောင်းရင်းကို ရှာမတွေ့ပေ။]
[အသက် ၁၅ နှစ် - သင့်ကျင့်ကြံမှုက ချီစုစည်းမှု အဆင့် (၂) သို့ ပြန်လည် ကျဆင်းသွားခဲ့သည်။ သင် ၏ ဘဝကို သံသယ ဝင်လာခဲ့သည်။]
[အသက် ၁၆ နှစ် - သင့်ကျင့်ကြံမှုက ချီစုစည်းမှု အဆင့် (၁) အောက်သို့ ကျဆင်းသွားခဲ့သည်။ ထို့ကြောင့် သင်ညာ သာမန်လူ တစ်ယောက် ပြန်ဖြစ်သွားပြီး လှောင်ပြောင်စရာ ပစ်မှတ် တစ်ခု ဖြစ်လာခဲ့သည်။ သင့်ကွယ်ရာမှာ သင့်အား အမှိုက်လို့ ခေါ်နေကြတာကို သင် သိလိုက်သည်။]
[...]
အသက် (၁၆) နှစ် အရွယ် ချင်းကျောက်ဟာ ချင်းမျိုးနွယ်စု အိမ်နောက်ဖေးက ရေကန်ဘေးမှာ မျှော်လင့်ချက်မဲ့နေတဲ့ မျက်နှာထားနဲ့ ထိုင်နေခဲ့လေသည်။ သူမ အကြောင်းရင်းကို လုံးဝ နားမလည်နိုင် ဖြစ်နေခဲ့သည်။ ဘာလို့ သူမရဲ့ ကျင့်ကြံမှုအဆင့်က အကြောင်းရင်းမရှိဘဲ ဆက်တိုက် ကျဆင်းနေရသည်နည်း။
'သောက်ကျိုးနည်း... ဖြစ်နိုင်တာက အမှိုက် လမ်းစဉ် ဆိုတဲ့ မွေးရာပါ ပါရမီကြောင့်များလား...'
ဒါ့အပြင် သူမ ရွေးချယ်ခဲ့တဲ့ မွေးရာပါ ပါရမီတွေထဲမှာ အမှိုက် လမ်းစဉ်နဲ့ တွဲဖက်ထားတဲ့ အဘွားအိုတစ်ဦးကို သယ်ဆောင်ခြင်းက အလုပ်မဖြစ်သေးပုံ ရလေသည်။
အဘွားအိုက ဘယ်က ရောက်လာမှာလဲ... သူမ တစ်ခါမှ မမြင်ဖူးပေ။
"ဟူး"
ချင်းကျောက် ကူကယ်ရာမဲ့စွာ သက်ပြင်းချပြီး ညည်းညူလိုက်၏။ "ဒီတစ်ခါလည်း ငါ မှားယွင်းတဲ့ ရွေးချယ်မှု လုပ်မိပြန်ပြီပဲ.. (၁၀) နှစ်ကျော် အချိန်တွေ ဖြုန်းတီးလိုက်မိပြီ....အား"
"အရုပ်မလေး... ဘာလို့ နေ့တိုင်း ငါ နားမလည်တဲ့ စကားတွေ ပြောနေရတာလဲ"
ရုတ်တရက် အိုမင်းတဲ့ အသံတစ်ခုဟာ သူမ ခေါင်းထဲက ထွက်ပေါ်လာခဲ့သည်။ "ညည်းက အခုမှ ဆယ်ကျော်သက် အရွယ်ပဲ ရှိသေးတာ ဘာလို့ (၁၀) နှစ်ကျော် အချိန်ဖြုန်းလိုက်မိတယ် ပြောနေတာလဲ"
ချင်းကျောက် ကြောင်အသွားခဲ့လေသည်။
ရုတ်တရက် ထွက်ပေါ်လာတဲ့ အသံက ဘေးနားက လူတစ်ယောက် ပြောတာ မဟုတ်ဘဲ သူမ ခေါင်းထဲက ထွက်ပေါ်လာတာ ဆိုတာ သေချာပေသည်။
'မသေမျိုးကျင့်ကြံခြင်း သရုပ်ဖော် စနစ်လား...'
'မဟုတ်ဘူး...'
သရုပ်ဖော် စနစ်က အေးစက်တဲ့ စာသား သတိပေးချက်တွေပဲ ရှိလေသည်။ သူမ သရုပ်ဖော် စနစ်နဲ့ ဆက်သွယ်ဖို့ အကြိမ်ကြိမ် ကြိုးစားဖူးပေမယ့် တစ်ဖက်က လုံးဝ လျစ်လျူရှုထားခဲ့ပေသည်။ ဒါကြောင့် သရုပ်ဖော် စနစ်က သက်မဲ့အရာဝတ္ထု တစ်ခုပဲ ဖြစ်မယ်လို့ သူမ သံသယ ဝင်နေခဲ့ပြီး လက်နက်ဝိညာဉ်တောင် မရှိဘူးဟု ထင်ထားခဲ့လေသည်။
'ဒါဆို ဒီထူးဆန်းတဲ့ အသံက ဘယ်က ရောက်လာတာလဲ... '
ချင်းကျောက်ရဲ့ ရင်ထဲမှာ အဆုံးမဲ့ တုန်လှုပ်မှုနဲ့ သိချင်စိတ်တွေ ပြည့်နှက်သွားခဲ့သည်။
သို့သော် ကြောက်စိတ် မရှိချေ။ ဘာလို့လဲဆိုတော့ သရုပ်ဖော် စနစ်ထဲမှာ ဘယ်နှခါ သေသေ ကိစ္စမရှိမှန်း သူမ သိထားလေသည်။
ဒါကြောင့် ဘာကြောက်စရာ လိုမည်နည်း။
ချင်းကျောက် ရင်ထဲက မေးခွန်းကို မမေးရသေးခင်မှာပဲ အိုမင်းတဲ့ အသံက သူ့ဘာသာ ဖြေလိုက်ပေသည်။ "အရုပ်မလေး... မလန့်ပါနဲ့။ ငါက ဝိညာဉ်အကြွင်းအကျန်လေး တစ်ခုပါပဲ... လောလောဆယ် ညည်း လည်ပင်းမှာ ဆွဲထားတဲ့ ဆွဲပြားကို ခိုလှုံရာ အဖြစ် အသုံးပြုနေတာပါ... အခုမှ ညည်းနဲ့ ဆက်သွယ်ရတာက အရင်တုန်းက ငါ ဇဝေဇဝါ ဖြစ်နေသေးလို့ပါ"
ချင်းကျောက် ရုတ်တရက် နားလည်သွားခဲ့ပြီး သူမ လည်ပင်းမှာ ဆွဲထားတဲ့ ဆွဲပြားကို ထိလိုက်၏။
'နေဦး... ဒါက သူမရဲ့ မွေးရာပါ ပါရမီထဲက အဘွားအိုများ ဖြစ်နေမလား...'
လွန်ခဲ့တဲ့ နှစ်တွေ အတွင်း သူမ ကြုံတွေ့ခဲ့ရတဲ့ ကံဆိုးမိုးမှောင်ကျတဲ့ အတွေ့အကြုံ အားလုံးကို သူမ ဆက်စပ်ကြည့်လိုက်လေသည်။
သူမ အံ့သြစွာ မေးလိုက်၏။ "ရှင်က ငါ့ရဲ့ ဝိညာဉ်စွမ်းအားတွေကို စုပ်ယူနေတာလား"
"ရှင်က ငါ့ဝိညာဉ်စွမ်းအားတွေကို သုံးပြီး ရှင့်ရဲ့ ဝိညာဉ်အကြွင်းအကျန်ကို အားဖြည့်နေတာလား"
အိုမင်းတဲ့ အသံက ဆက်ပြောလိုက်သည်။ " ညည်း တော်တော် ဉာဏ်ကောင်းတာပဲ... ဟုတ်တယ် တကယ် အဲဒီလို ဖြစ်နေတာ"
ချင်းကျောက် နားလည်လိုက်လေသည်။
လွန်ခဲ့တဲ့ နှစ်တွေက သူမရဲ့ ကံဆိုးမှုတို့ကို အပြည့်အဝ နားလည်သွားပြီး အားလုံး ဒီကောင်ကြောင့်ပင်။
ချင်းကျောက်ဟာ ရုတ်တရက် မျက်လုံးကျဉ်းလိုက်သည်။ အတွေးပေါင်းများစွာက သူမ ခေါင်းထဲ ဖြတ်သန်းသွားခဲ့ပေမဲ့ သူမ ဒေါသ မထွက်ခဲ့ချေ။
ထိုအစား သူမက ဦးအောင် မေးလိုက်၏။ "ရှင် နိုးလာပြီ ဆိုတော့ နောက်ပိုင်း ငါ့ဝိညာဉ်စွမ်းအားတွေကို ဆက်မစုပ်တော့ဘူး မဟုတ်လား"
"မစုပ်တော့ပါဘူး"
ချင်းကျောက် ဆက်မေးလိုက်သည်။ "ရှင့်ကို ဘယ်လို ခေါ်ရမလဲ"
"ငါ့ မျိုးရိုးနာမည်က ညည်းနဲ့ အတူတူပဲ... ချင်း"
တောက်ပတဲ့ အလင်းရောင် တစ်ခု ချင်းကျောက်ရဲ့ မျက်လုံးထဲ ဖြတ်သန်းသွားခဲ့ပြီး ချက်ချင်း ပြောလိုက်သည်။ "စီနီယာ ချင်း... ရှင်က ဝိညာဉ်အကြွင်းအကျန် ပုံစံနဲ့ အသက်ရှင်နိုင်တယ် ဆိုတော့ အသက်ရှင်စဉ်တုန်းက အနည်းဆုံး စွမ်းအားကြီးတဲ့ မူလဝိညာဉ် အဆင့် ကျင့်ကြံသူ ဖြစ်ခဲ့မှာပဲ မဟုတ်လား... ရှင်က ကျမရဲ့ဝိညာဉ်စွမ်းအားတွေ အများကြီး စုပ်ယူခဲ့တာလေ... ဒီတော့ ညီမျှတဲ့ လဲလှယ်မှု အနေနဲ့ ကျမကို လျော်ကြေးပေးတဲ့ အနေနဲ့ အကျိုးခံစားခွင့် တချို့တော့ ပေးသင့်တယ် မဟုတ်လား"
ဝိညာဉ်အကြွင်းအကျန် အံသြသွားခဲ့သည်။ "အကျိုးခံစားခွင့်.... ဟုတ်ပါပြီ... ငါ ညည်းကို နှစ်ပေါင်းများစွာ ဒုက္ခပေးခဲ့မိတဲ့အတွက် လျော်ကြေး တချို့တော့ ပေးသင့်ပါတယ်... အကယ်၍ ညည်း ငါ့ကို ဆရာအဖြစ် အသိအမှတ်ပြုရင် ငါ..."
ချင်းကျောက် ပြုံးပြီး ပြောလိုက်လေသည်။ "ဆရာအဖြစ် အသိအမှတ်ပြုတာ ထားလိုက်ပါတော့... ရှင် အသက်ရှင်တုန်းက ကျင့်ကြံခဲ့တဲ့ နေရာရှိမှာပဲ မဟုတ်လား"
"ဘယ်နေရာမှာလဲ ပြောပြ ကျမသွားပြီး ရှင့်ရတနာတွေကို ယူလိုက်မယ်"
ချင်းကျောက်က ဆရာတင်ဖို့ စိတ်မဝင်စားပေ။
လက်တွေ့မှာ သူမကို ကျင့်ကြံနည်း သင်ပေးတဲ့သူက သူမအမေ ကျင်းရှင်း နန်းတော်ရဲ့ နန်းတော်သခင်ကြီးပင်။
ထို့အပြင် သူမအမေကလည်း မူလဝိညာဉ် အဆင့် ကျင့်ကြံသူကြီးဖြစ်၏။
သူမက ဒုတိယမျိုးဆက် ကျင့်ကြံသူဖြစ်တာကြောင့် ၎င်းတို့က မလိုအပ်ပေ။
ဝိညာဉ်အကြွင်းအကျန်ဟာ ချင်းကျောက်ကြောင့် စကားမပြောနိုင်ပဲ ဆွံ့အ သွားခဲ့ရလေသည်။
...