အခန်း ၃၄ : ပါရမီရှင်တိုင်းမှာ မာန်မာန ရှိကြတာပဲလား
ချန်ချန်ရွှယ်ရဲ့ အခြေတည်အဆင့် (၂) ကို ချိုးဖျက်ဝင်ရောက်ဖို့ ကြိုးစားမှုကြောင့် ဖြစ်ပေါ်လာတဲ့ လှုပ်ရှားမှုကြီးက ချင်းဟယ် ခရိုင်က ကျင့်ကြံသူ ထက်ဝက်လောက်ကိုတောင် လှိုင်းထနေတဲ့ ဝိညာဉ်စွမ်းအင် လှုပ်ရှားမှုကို ခံစားမိစေခဲ့သည်။ ပိုင်ယီလည်း အပါအဝင်ပင်။
ချန်ချန်ရွှယ် ဘယ်လို ဆုလာဘ်မျိုး ရရှိခဲ့လဲ ဆိုတာ ပိုင်ယီက သိနေတော့ ဝိညာဉ်စွမ်းအင် လှုပ်ရှားမှုကို မြင်လိုက်ရတာနဲ့ သူ့ရဲ့ ပထမဆုံး တုံ့ပြန်မှုကတော့ ချန်ချန်ရွှယ် အဆင့်တက်တော့မယ် ဆိုတာပင်။
"အသက် (၁၉) နှစ်အရွယ် အခြေတည်အဆင့် (၂)..."
ပိုင်ယီ သက်ပြင်းမချဘဲ မနေနိုင်တော့ပေ။ "ချန်ချန်ရွှယ်သာ ဝိညာဉ်ဓားဂိုဏ်းကို ပြန်ရောက်သွားရင် သူမရဲ့ ဆရာသခင်က သူမရဲ့ တိုးတက်မှု အရှိန်အဟုန်ကို ကြည့်ပြီး လန့်သွားမှာ သေချာတယ်"
မသေမျိုးကျင့်ကြံခြင်း သရုပ်ဖော် စနစ်ထဲမှာ ချန်ချန်ရွှယ် ရရှိတဲ့ ဆုလာဘ်တွေက တစ်ကြိမ်ချင်းစီ ဆိုရင် သိပ်မများပြားချေ။
ဒါပေမဲ့ (၅) ကြိမ်စာ စုဆောင်းလိုက်တဲ့အခါမှာတော့ အတော်လေး များပြားသွားပေသည်။
ဒါ့အပြင် ချန်ချန်ရွှယ်က သရုပ်ဖော် စနစ်ထဲမှာ ဆက်လက် ကျင့်ကြံနေဦးမည် ဖြစ်ရာ စုဆောင်းမိတဲ့ ဆုလာဘ်တွေက ပိုများလာဦးမည်ပင်။
သိထားရမှာက မသေမျိုးကျင့်ကြံခြင်း သရုပ်ဖော် စနစ်ထဲမှာ နှစ်ရာပေါင်းများစွာ ကုန်ဆုံးသွားရင်တောင် လက်တွေ့မှာ မိနစ် ရာဂဏန်းလောက်ပဲ ကြာပေသည်။
ချန်ချန်ရွှယ်က တစ်နေ့ တစ်ကြိမ် သရုပ်ဖော်နိုင်ပြီး သူမဟာ အချိန်တိုအတွင်း နောက်ထပ် ကျင့်ကြံမှု အဆင့်တွေကို လွယ်လွယ်ကူကူ ချိုးဖျက်ဝင်ရောက်နိုင်မှာ ဖြစ်ပေသည်။
ဒါပေမဲ့ ဒီအရာတွေ အားလုံး ဖြစ်လာဖို့ ဆိုရင် သူမဟာ ပြီးခဲ့တဲ့ သရုပ်ဖော်မှုထက် ပိုအသက်ရှည်ရှည် နေနိုင်ဖို့ လိုအပ်လေသည်။
ဒါပေမဲ့ ပိုင်ယီဟာ ချန်ချန်ရွှယ်အား မစိုးရိမ်ပေ။ ဘာလို့လဲဆိုတော့ သူ့အမြင်မှာ ချန်ချန်ရွှယ်က အရည်အချင်း ပြည့်မီတဲ့ ရွေးချယ်ခံတစ်ယောက် ဖြစ်၏။
ပြောင်းပြန်အနေနဲ့ သူ့ရဲ့ ဒုတိယမြောက် ရွေးချယ်ခံ ချင်းကျောက်ကိုတော့ ပိုင်ယီ နည်းနည်း စိတ်ပူနေမိလေသည်။
ချင်းကျောက်က သရုပ်ဖော် စနစ်ထဲမှာ တစ်ကြိမ်ပဲ သရုပ်ဖော်ဖူးသေးတာကြောင့် ပိုင်ယီဟာ သူမရဲ့ စရိုက်ကို လောလောဆယ် ခန့်မှန်းလို့ မရသေးချေ။
အကယ်၍ ချင်းကျောက်သာ စိတ်ဓာတ်ပျော့ညံ့သူဆိုရင် သရုပ်ဖော် စနစ်ထဲမှာ သေပြီးတဲ့နောက် ပြန်ဝင်ရဲတော့မှာ မဟုတ်ပေ။
ဒါဆိုရင် ပိုင်ယီ အနေနဲ့ နောက်ထပ် ရွေးချယ်ခံ တစ်ယောက် ထပ်ရှာရုံမှတပါး ရွေးချယ်စရာ မရှိတော့ပေ။
ထို့ကြောင့် သူမက သူ့အား စိတ်ပျက်အောင် မလုပ်ဖို့ မျှော်လင့်ပေမည်။
...
အချိန်များ ကုန်ဆုံးသွားခဲ့လေသည်။
ချန်မျိုးနွယ် သခင်ကြီး ချန်ရဲ့ မွေးနေ့ပွဲက နေ့ကနေ ညအထိ၊ ညကနေ နောက်တစ်နေ့ မနက်အထိ ကျင်းပခဲ့သည်။ တစ်ရက်နီးပါး ကုန်ဆုံးသွားပြီ ဖြစ်ပေမယ့် ချန်အိမ်တော်က သက်ဝင်လှုပ်ရှားနေတုန်းပင်။
ချန်ချန်ရွှယ်ဟာ အခြေတည်အဆင့် (၂) ကို ရောက်ရှိပြီးနောက် မနေ့ညက စားသောက်ပွဲမှာ ခဏ ပေါ်လာခဲ့ပြီး အိမ်ထဲမှာပဲ ဆက်နေခဲ့လေသည်။
အကြောင်းမှာ သူမရဲ့ ကျင့်ကြံမှုအဆင့် တည်ငြိမ်အောင် လုပ်ဖို့ လိုအပ်တာကြောင့် ဖြစ်၏။
ဒါ့အပြင် သူမဟာ နောက်တစ်ကြိမ် မသေမျိုးကျင့်ကြံခြင်း သရုပ်ဖော်ဖို့ တိတ်တဆိတ် စောင့်ဆိုင်းနေခဲ့လေသည်။
"အချိန်တန်ပြီ"
ချန်ချန်ရွှယ်ဟာ မျက်လုံးတွေကို ဖြည်းဖြည်းချင်း ဖွင့်လိုက်ပြီး မသေမျိုးကျင့်ကြံခြင်း သရုပ်ဖော် စနစ်နဲ့ ချိတ်ဆက်ဖို့ ကြိုးစားလိုက်၏။ ဒီတစ်ခါတော့ မမျှော်လင့်ဘဲ အဆင်ပြေချောမွေ့သွားပြီး ချက်ချင်း ချိတ်ဆက်မိသွားခဲ့သည်။
ချန်ချန်ရွှယ်ဟာ အရင် လမ်းကြောင်းဟောင်းအတိုင်း ရွေးချယ်ခဲ့သည်။
သူမဟာ မသေမျိုးကျင့်ကြံခြင်း ဘဝသစ် တစ်ခုအား မရွေးချယ်ခဲ့ပေ။
[အသက် ၀ နှစ် - သင်သည် ဆင်းရဲသော မိသားစုတွင် မွေးဖွားခဲ့သည်။ သင့်မိခင်က သင့်ကို ချန်ချန်ရွှယ်ဟု အမည်ပေးခဲ့သည်။]
[အသက် ၁၀ နှစ် - သင်သည် မသေမျိုးအဖြစ် တက်လှမ်းခြင်း ဂိုဏ်းတွင် ရှိနေခဲ့သည်။ ဒီတစ်ခါ ကောင်းကင်ဂိုဏ်းသို့ ပြောင်းရွှေ့သင့်မသင့် စဉ်းစားနေခဲ့သည်။]
[အသက် ၁၄ နှစ် - သင်သည် ဂျူနီယာ ညီမလေးကို ခေါ်ပြီး ကောင်းကင်ဂိုဏ်းသို့ ပြောင်းရွှေ့ခဲ့သည်။]
[အသက် ၂၀ နှစ် - ကိုယ်တိုင် မထိခိုက်ဘဲ အကြီးအကဲ ယွဲ့ကို ဖြုတ်ချမယ့် နည်းလမ်း ရှာမတွေ့သေးပေ။ သင်သည် ဂျူနီယာ ညီမလေးကို ခေါ်ပြီး လေ့ကျင့်ရန် တောင်အောက်ဆင်းခဲ့သည်။ ကောင်းကင်ဂိုဏ်းနှင့် တတ်နိုင်သမျှ ဝေးဝေးနေရန် ဆုံးဖြတ်လိုက်သည်။]
[အသက် ၃၀ နှစ် - သင်သည် အပြင်လောကတွင် လေ့ကျင့်နေဆဲ ဖြစ်သည်။ နှစ်အနည်းငယ် ကြာမှ ကောင်းကင်ဂိုဏ်းသို့ တစ်ခါ ပြန်လာပြီး ပြန်လာတိုင်း ရက်အနည်းငယ်သာ နေထိုင်ခဲ့သည်။]
[အသက် ၃၈ နှစ် - သင်နှင့် ဂျူနီယာ ညီမလေး ဟိုရင်းယွမ်တို့သည် အပြင်လောကတွင် အတော်လေး နာမည်ရနေပြီ ဖြစ်သည်။]
[အသက် ၃၉ နှစ် - သင်သည် ချီစုစည်းမှု အဆင့် (၆) သို့ ချိုးဖျက်ဝင်ရောက်ရန် ကြိုးစားသော်လည်း မအောင်မြင်ဘဲ တန်ပြန်မှုကို ခံစားလိုက်ရသည်။]
"အဟွတ်..." ချန်ချန်ရွှယ်၏ မျက်နှာဟာ ဖြူဖတ်ဖြူရော် ဖြစ်နေခဲ့လေသည်။ ရက်အနည်းငယ် ကြာသွားပြီ ဖြစ်ပေမယ့် တန်ပြန်မှုဒဏ်ရာတို့က ပျောက်ကွယ်မသွားသေးပေ။
ဒါပေမဲ့ သူမ စိတ်ဓာတ်မကျပဲ ထိုအစား သူမဟာ ပြုံးလိုက်ပေသည်။
ဘာလို့လဲဆိုတော့ ဒီတစ်ခါ သူမက ပြီးခဲ့တဲ့ သရုပ်ဖော် ဘဝက စံချိန်ကို ချိုးဖျက်နိုင်ခဲ့တာကြောင့်ပင်။
သူမ ကောင်းကင်ဂိုဏ်းနဲ့ ဝေးဝေးနေခဲ့ပြီး နှစ်အနည်းငယ် ကြာမှ တစ်ခါ ပြန်လာခဲ့လေသည်။
ဂျူနီယာ ညီမလေး ဟိုရင်းယွမ်ကလည်း သူမဘေးမှာ အမြဲ ရှိနေခဲ့ပြီး သူမ အနေနဲ့ အကြီးအကဲ ယွဲ့နဲ့ ထိတွေ့ဆက်ဆံရမယ့် အခွင့်အရေး မရှိခဲ့သလို သဘာဝကျကျ အကြီးအကဲ ယွဲ့ရဲ့ ပစ်မှတ်ထားခြင်းကိုလည်း မခံခဲ့ရပေ။
အပြင်လောကမှာ လေ့ကျင့်ရတာ အန္တရာယ်များတယ် ဆိုပေမယ့် ကောင်းကင်ဂိုဏ်း အတွင်းပိုင်းမှာက ပိုအန္တရာယ် များလေသည်။
အကယ်၍ ကောင်းကင်ဂိုဏ်းရဲ့ ကျင့်ကြံခြင်း အရင်းအမြစ်တွေသာ မရှိခဲ့ရင် ချန်ချန်ရွှယ်ဟာ လေလွင့်ကျင့်ကြံသူ လုပ်လိုက်ပေမည်။
အနည်းဆုံးတော့ဘသူမရဲ့ ရန်သူ ဖြစ်လာနိုင်ခြေ များတဲ့ ရွှေအမြုတေ အဆင့် ကျင့်ကြံသူ တစ်ယောက်ကို ရင်ဆိုင်စရာ မလိုတော့တာပင်။
[အသက် ၄၂ နှစ် - နောက်ဆုံးတွင် သင်သည် တန်ပြန်မှုဒဏ်ရာ ပျောက်ကင်းသွားပြီး ဆက်လက် ကြိုးစား ကျင့်ကြံနေခဲ့သည်။]
[သင့် ဂျူနီယာ ညီမလေး ဟိုရင်းယွမ်သည် ချီစုစည်းမှု အဆင့် (၇) သို့ ရောက်ရှိနေခဲ့ပေပြီ။]
[အသက် ၄၅ နှစ် - သင်သည် ချီစုစည်းမှု အဆင့် (၆) သို့ အောင်မြင်စွာ ရောက်ရှိသွားပြီး ယခင် သရုပ်ဖော် ဘဝက စံချိန်ကို ချိုးဖျက်နိုင်ခဲ့ပါသည်။]
[အသက် ၄၉ နှစ် - ဂျူနီယာ ညီမလေး ဟိုရင်းယွမ်သည် ကျင့်ကြံခြင်း လောကမှ လျှို့ဝှက်ဆန်းကြယ်သော အင်အားစုကြီး တစ်ခုအား စော်ကားမိလိုက်သည်။ ထိုအင်အားစုကြီးကို မစော်ကားမိစေရန် ကောင်းကင်ဂိုဏ်း ဂိုဏ်းချုပ်ကြီးက ဂျူနီယာ ညီမလေးကို ဂိုဏ်းသို့ ပြန်ခေါ်လာပြီး ဂိုဏ်းစည်းမျဉ်းဖြင့် အရေးယူရန် သင့်ကို အမိန့်ပေးလိုက်သည်။]
[သင် ငြင်းဆန်လိုက်သည်။]
[ထို့ကြောင့် သင်နှင့် ဟိုရင်းယွမ်အား ဂိုဏ်းသစ္စာဖောက်များ အဖြစ် သတ်မှတ်လိုက်ကြသည်။]
[အသက် ၅၂ နှစ် - သင်သည် မိစ္ဆာဂိုဏ်းသား တစ်ယောက်ကို သတ်ဖြတ်လိုက်သည်။ သို့သော် ထိုသူ၏ အထောက်ထားက ရိုးရှင်းမနေပေ။ သူသည် မိစ္ဆာဂိုဏ်း အကြီးအကဲ တစ်ဦး၏ တိုက်ရိုက် တပည့် ဖြစ်နေခဲ့သည်။ သင် ပြဿနာကြီး တစ်ခု ဖန်တီးမိလိုက်ပေပြီ။]
[ဂျူနီယာ ညီမလေးကို ဖြောင့်မတ်သော လမ်းစဉ်က လိုက်လံ ဖမ်းဆီးနေပြီး သင့်ကိုတော့ မိစ္ဆာလမ်းစဉ်က လိုက်လံ ဖမ်းဆီးနေခဲ့သည်။ သင်ဟာ ကိုယ့်ကိုယ်ကိုယ် မရယ်ဘဲ မနေနိုင်တော့ပေ။]
[အသက် ၅၅ နှစ် - ဂျူနီယာ ညီမလေး ဟိုရင်းယွမ်သည် အခြေတည်အဆင့် ကျင့်ကြံသူ တစ်ဦး၏ လက်ချက်ဖြင့် သေဆုံးသွားခဲ့သည်။ သူမ သေသွားပါပြီ]
[အသက် ၅၆ နှစ် - သင်သည် မိစ္ဆာဂိုဏ်း ကျွမ်းကျင်သူ တစ်ဦး၏ လိုက်လံ ဖမ်းဆီးခြင်းကို ခံနေရသည်။]
[သင် သေဆုံးသွားပါပြီ]
[အသက် - ၅၆ နှစ်၊ ၁၀ လ၊ ၉ ရက်]
...
"ထင်ထားတဲ့ အတိုင်းပါပဲ" လက်တွေ့ဘဝကို ပြန်ရောက်လာပြီးနောက် ချန်ချန်ရွှယ်ရဲ့ စိတ်အခြေအနေ ဘာမှ မပြောင်းလဲသွားခဲ့ပေ။ဘာလိုဆို သူမ သေတော့မယ် ဆိုတာ ကြိုသိပြီးသား ဖြစ်တာကြောင့်ပင်။ "ရင်းယွမ်က အဲဒီ လျှို့ဝှက်ဆန်းကြယ်တဲ့ အင်အားစုကို စော်ကားမိကတည်းက ငါ အကြာကြီး အသက်မရှင်နိုင်တော့ဘူး ဆိုတာ သိခဲ့တယ်"
"နောက်ပိုင်းမှာ မိစ္ဆာကျင့်ကြံသူတွေကိုပါ စော်ကားမိပြီး ဒီလောက်ထိ ကံဆိုးလိမ့်မယ်လို့တော့ ထင်မထားခဲ့ဘူး"
"ကံဆိုးတဲ့ ကောင်မလေး နှစ်ယောက်ပဲ... ငါ့ရဲ့ ကံဆိုးမှုတွေက ရင်းယွမ်ဆီ ကူးစက်သွားတာလည်း ဖြစ်နိုင်တယ်"
ချန်ချန်ရွှယ်ဟာ သရုပ်ဖော် စနစ်ထဲမှာ နေထိုင်ခဲ့တဲ့ နှစ်ကာလ စုစုပေါင်းက ဂဏန်း (၃) လုံး ရှိနေပေပြီ။
ထို့ကြောင့် သူမရဲ့ စိတ်အခြေအနေက တည်ငြိမ်လွန်းနေခဲ့ပြီး လှိုင်းဂယက်တို့ သိပ်မထတော့ပေ။
သူမ အများကြီး ကြုံတွေ့ခဲ့ဖူးပေပြီ။
...
ချန်ချန်ရွှယ်ရဲ့ ဘဝ သရုပ်ဖော်မှုကို ကြည့်ပြီးတဲ့နောက် မသေမျိုးကျင့်ကြံခြင်း သရုပ်ဖော် စနစ်က ဘယ်လောက်တောင် အိပ်မက်ဆိုးဆန်သလဲ ဆိုတာ ပိုင်ယီ နောက်တစ်ကြိမ် သဘောပေါက်လိုက်၏။
ဟိုရင်းယွမ်က မစော်ကားသင့်တဲ့ အင်အားစု တစ်ခုကို ဘယ်လို စော်ကားမိလဲ ဆိုတာ သူ သိပေသည်။ သူမဟာ လူတစ်ယောက်ကို သူရဲကောင်းဆန်ဆန် ဝင်ကယ်ရင်း တခြားလူတစ်စုကို သင်ခန်းစာ ပေးလိုက်ခြင်းပင်။
သူမရဲ့ တိုက်ခိုက်မှုတွေက နည်းနည်း ပြင်းထန်ပြီး လူသေသွားပေမယ့် သူမက မှန်ကန်တာ လုပ်ခဲ့တာပဲလေ.....
နောက်ဆုံးတော့... သူမဟာ မသိလိုက်ဘာသာဖြင့် အဲဒီ အဖွဲ့အစည်းကို စော်ကားမိလိုက်ပေသည်။
ပြီးတော့ ချန်ချန်ရွှယ်လည်း ဒီကိစ္စထဲ ပါဝင်သွားခဲ့၏။
မသေမျိုးကျင့်ကြံခြင်း သရုပ်ဖော် စနစ်က ချန်ချန်ရွှယ် အတွက် တမင်သက်သက် ပြဿနာ ဖန်တီးပေးနေပြီး သရုပ်ဖော်မှု အခက်အခဲကို မြှင့်တင်ပေးနေသလို ပိုင်ယီဟာ ခံစားလိုက်ရပေသည်။
အခက်အခဲ မြင့်တက်လာပြီ ဆိုတာနဲ့ သေစေနိုင်လေသည်။
[သင်သည် အောက်ပါ ဆုလာဘ်များကို ရရှိလိုက်ပါသည် - ]
စာသား သတိပေးချက် ထပ်ပေါ်လာပြန်ပြီး ပိုင်ယီရဲ့ အာရုံကို ဆုလာဘ်တွေက ဖမ်းစားလိုက်လေသည်။
[ဆုလာဘ် ၁ - ကောင်းကင် မိုးကြိုးထိန်းချုပ်ခြင်း နည်းစနစ် (တိုက်ခိုက်ခြင်းနှင့် သတ်ဖြတ်ခြင်းကို အဓိကထားသော ကောင်းကင်ဂိုဏ်း၏ နည်းစနစ်)]
[ဆုလာဘ် ၂ - အချိန် နောက်ပြန်လှည့်ခြင်း (အချိန် နောက်ပြန်လှည့်နိုင်မည့် ဖြစ်နိုင်ခြေ အတိုင်းအတာ တစ်ခု ရှိသည်)]
[ဆုလာဘ် ၃ - (၅၆) နှစ်တာ ကျင့်ကြံခြင်း အတွေ့အကြုံ (ချန်ချန်ရွှယ်၏ ပြင်းထန်သော ကျင့်ကြံမှု အတွေ့အကြုံ)]
(၃) ခုထဲက (၁) ခု ရွေးရပေအုံးမည်။
ဒီတစ်ခါ ချန်ချန်ရွှယ်က အောင်မြင်မှု အသစ် တွေ မရခဲ့လို့ ထပ်ဆောင်း ဆုလာဘ်တော့ မပါဝင်ခဲ့ချေ။
ပိုင်ယီ မတွန့်ဆုတ်ဘဲ ပထမ ဆုလာဘ်ကို ရွေးလိုက်၏။
ဒုတိယ ဆုလာဘ်က သိပ်စိတ်မချရပေ။ နှစ်ဘယ်လောက် နောက်ပြန်လှည့်သွားမလဲကို ဘယ်သူသိတိုင်မည်နည်း။
အကယ်၍ သူ ကိုယ့်ကိုယ်ကိုယ် ပျောက်ဆုံးသွားရင်ရော.....
အခြေအနေက ကို့ရိုကားရားဖြစ်သွားပေလိမ့်မည်။
တတိယ ဆုလာဘ်ကိုတော့ သူ လျစ်လျူရှုလိုက်၏။ ၎င်းက သိပ်အရေးမကြီးဘူးလို့ ခံစားရလို့ပင်။
ဒီအချိန်မှာ ဒုတိယ ရွေးချယ်ခံ ချင်းကျောက်ကလည်း မသေမျိုးကျင့်ကြံခြင်း သရုပ်ဖော် စနစ်နဲ့ ချိတ်ဆက်ဖို့ ကြိုးစားနေတာကို ပိုင်ယီ သတိပြုမိလိုက်တာကြောင့် သူမကိုလည်း ဝင်ရောက်ခွင့် ပေးလိုက်၏။
ကြည့်ရတာ ချင်းကျောက်က သူ့ကို စိတ်ပျက်အောင် မလုပ်ခဲ့ပေ။ တစ်ဖက်လူမှာလည်း အရှုံးမပေးတဲ့ စိတ်ဓာတ် ရှိပုံရလေသည်။
သူမနဲ့ ချန်ချန်ရွှယ်ကြားမှာ တူညီတဲ့ အချက်တချို့ ရှိနေပေသည်။
ဖြစ်နိုင်တာက... ပါရမီရှင်တွေ အားလုံးမှာ မာန်မာန ဆိုတဲ့ လေထု ရှိကြတယ် ထင်ပါရဲ့.....
မျှော်လင့်ရတာက ဒီ ဒုတိယမြောက် ရွေးချယ်ခံလေးက သူ့ကို အံ့သြမှုလေး တစ်ခုလောက် ပေးနိုင်မလား ဆိုတာပင်။
...