အခန်း ၃၃ : ချန်ချန်ရွှယ်၏ အခြေတည် အဆင့် (၂)သို့ ချိုးဖြတ်ခြင်း
ချင်းကျောက်ဟာ သူမရဲ့ နှလုံးသားနေရာကို ထိကြည့်လိုက်ပြီး ကြောက်ရွံ့မှုတွေ ကျန်ရစ်နေသေးခဲ့လေသည်။ နှလုံးကို ထိုးဖောက်သွားတဲ့ ဓားပျံက အစအနမကျန် ပျောက်ကွယ်သွားပြီ ဖြစ်ကြောင်း သူမ တွေ့ရှိလိုက်ရ၏။
အဲဒီ ထူးဆန်းတဲ့ ကျင့်ကြံခြင်း ကမ္ဘာမှာ သူမဟာ အမျိုးသမီးတွေကို အနိုင်ကျင့်နေတဲ့ လူမိုက်တစ်ယောက်ရဲ့ ခြေလက်တွေကို ချိုးပစ်လိုက်ပြီး သူ့ခန္ဓာကိုယ် အစိတ်အပိုင်း တစ်ခုကိုတောင် ဒုက္ခိတ ဖြစ်သွားအောင် လုပ်ပစ်လိုက်လေသည်။
နောက်ဆုံးကျတော့ အဲဒီလူမိုက်ရဲ့ အဖေက မသေမျိုးကျင့်ကြံသူ တစ်ယောက် ဖြစ်နေမယ်လို့ ဘယ်သူထင်ထားခဲ့မည်နည်း။
ထို့အပြင် သူ့ရဲ့ ကျင့်ကြံမှုက ချီစုစည်းမှု အဆင့် (၇) တောင် ရောက်နေပေသည်။
ဒါကြောင့် သူမ လက်စားချေခဲ့ရပြီး အသက်ခံခဲ့ရသည်။
အကယ်၍ လက်တွေ့ဘဝမှာသာ ဆိုရင် သူမက အားနည်းသူ မဟုတ်သလို သူမရဲ့ ခွန်အားက မနည်းလှပေ။ သူမက အသက် (၁၇) နှစ်သာ ရှိသေးပေမယ့် ချီစုစည်းမှု အဆင့် (၁၀) မသေမျိုးကျင့်ကြံသူ ဖြစ်နေပေပြီ။
ကျင်းရှင်း နန်းတော်ကနေ ယူဆောင်လာတဲ့ ပစ္စည်းတွေနဲ့ ပေါင်းလိုက်ရင် အခြေတည်အဆင့် (၁) ကျင့်ကြံသူကိုတောင် သူမ ယှဉ်ပြိုင်နိုင်လေသည်။
ဝမ်းနည်းစရာ ကောင်းတာက အဲဒီ ရင်းနှီးကျွမ်းဝင်မှု မရှိတဲ့ မသေမျိုးကျင့်ကြံခြင်း ကမ္ဘာမှာတောပ သူမဟာ အသက် (၁၂) နှစ် ရှိနေပြီ ဆိုပေမယ့် ချီစုစည်းမှု အဆင့် (၁) ပဲ ရှိနေသေးခြင်းပင်။
ထို့ကြောင့် သူမ လုံးဝ မယှဉ်နိုင်ပဲ ချက်ချင်း အသတ်ခံလိုက်ရပေသည်။
သေဘေးနဲ့ ကြုံလိုက်ရတဲ့ ခံစားချက်က သူမအား ယခုထိ ကြောက်လန့်နေစေတုန်းပင်။
ကံကောင်းတာက... သူမ ယခုထိ အသက်ရှင်နေသေးတုန်း ဖြစ်လေသည်။
"အဲဒီ လျှို့ဝှက်ဆန်းကြယ်တဲ့ မသေမျိုးကျင့်ကြံခြင်း သရုပ်ဖော် စနစ်က ငါ့ကို မလိမ်ညာခဲ့ဘူးပဲ... အထဲမှာ သေသွားရင်တောင် လက်တွေ့ကမ္ဘာက ငါ့ကို မထိခိုက်စေဘူး... အခု ငါ လက်တွေ့ကမ္ဘာကို ပြန်ရောက်နေပြီ မဟုတ်လား"
ချင်းကျောက် သူမပတ်ဝန်းကျင်က လူတွေကို ကြည့်လိုက်၏။ သူမရဲ့ လက်ချောင်းထိပ်မှာလည်း ကိုယ်ဖျောက်အဆောင်တစ်ခု ရှိနေသေးတာကို သတိပြုမိလိုက်လေသည်။
ဒီ ကိုယ်ဖျောက်အဆောင်က တခြားလူတွေရဲ့ အာရုံစိုက်မှုကို မခံရဘဲ သူမအား ပျောက်ကွယ်သွားအောင် လုပ်ပေးနိုင်၏။
သူမဘေးက ဖြတ်သွားတဲ့ လူတိုင်းက သူမကို လျစ်လျူရှုထားကြသလိုပင်။။
"ဒါက... အချိန် ပြောင်းလဲမှု မရှိဘူးလား"
ချင်းကျောက် အံ့သြတုန်လှုပ်စွာ ရေရွတ်လိုက်၏။ "အဆင့်မြင့် ကိုယ်ဖျောက်အဆောင်တစ်ခုက အများဆုံး (၁) နာရီပဲ ခံတာလေ... ငါ အဲဒီ မသေမျိုးကျင့်ကြံခြင်း သရုပ်ဖော် စနစ်ထဲမှာ (၁၂) နှစ်တိတိ နေခဲ့တာကို"
"မဟုတ်သေးဘူး..." ကိုယ်ဖျောက်အဆောင်ထဲက ဝိညာဉ်စွမ်းအင်တွေ လုံးဝ ကုန်ဆုံးမသွားသေးပေမယ့် သိပ်အများကြီး မကျန်တော့တာကို သူမ တွေ့ရှိလိုက်ရသည်။
ဆိုလိုတာက... အချိန်က တကယ် ကုန်ဆုံးသွားခဲ့ပေသည်။ သို့သော် ကုန်ဆုံးသွားတဲ့ နှုန်းက အလွန် နှေးကွေးနေခြင်းပင်။
တစ်နည်းအားဖြင့် ပြောရရင် မသေမျိုးကျင့်ကြံခြင်း သရုပ်ဖော် စနစ်ထဲက အချိန်စီးဆင်းမှုက အဆပေါင်းများစွာ မြန်ဆန်နေတာပင်။
'ဒါကြောင့် ဒီလို ဖြစ်နေတာကိုး တကယ် မှော်ဆန်တာပဲ...'
ရုတ်တရက် မသေမျိုးကျင့်ကြံခြင်း သရုပ်ဖော် စနစ်ရဲ့ စာသား သတိပေးချက်တွေ ထပ်မံ ပေါ်လာခဲ့ပြန်သည်။
[သင်သည် သင်၏ ပထမဆုံး မသေမျိုးကျင့်ကြံသူ ဘဝ သရုပ်ဖော်မှုတွင် အသက်ရှင် နေထိုင်ခဲ့သည်...]
[သင်သည် အောက်ပါ ဆုလာဘ်ကို ရရှိလိုက်သည် - ]
[ဆုလာဘ် - ဆန်းကြယ်သော ဆေးလုံးဖော်စပ်နည်း (မပြည့်စုံ)]
"ဒါက ကျင့်စဉ်တစ်ခုပဲ.."
ချင်းကျောက် အံ့သြသွား၏။
'မသေမျိုးကျင့်ကြံခြင်း သရုပ်ဖော်မှု ပြီးဆုံးသွားရင် တကယ် ဆုလာဘ် ရတာလား..'
'ဆုလာဘ်က ဆန်းကြယ်သော ဆေးလုံးဖော်စပ်နည်းတဲ့လား...'
'သရုပ်ဖော် စနစ်ထဲက မသေမျိုးကျင့်ကြံခြင်း ကမ္ဘာမှာ ရှိတဲ့ ကျင့်စဉ်တွေကို လက်တွေ့ဘဝမှာ သုံးလို့ ရတာလား...'
'ဒါဆို ဘာလို့... လက်တွေ့ကမ္ဘာက ကျင့်စဉ်တွေကိုကျတော့ သရုပ်ဖော် စနစ်ထဲမှာ သုံးလို့ မရတာလဲ..'
သူမ သိပ်နားမလည်တော့ပေ။
သူမလို ဒုတိယမျိုးဆက် ကျင့်ကြံသူ တစ်ယောက် အတွက် ဒီဆုလာဘ်က သိပ်မများပြားလှပေ။ ကျင်းရှင်း နန်းတော်က ဘယ်ဆေးလုံးဖော်စပ်နည်းမဆို ဒီနည်းပညာထက် အဆပေါင်းများစွာ သာလွန်နေမှာပင်။
ဒါပေမဲ့ ဒါက ချင်းကျောက် အတွက် ကမ္ဘာသစ်တစ်ခုရဲ့ တံခါးကို ဖွင့်ပေးလိုက်သလိုဖြစ်ရာ သူမ မျက်လုံးတွေက အရောင်တောက်လာခဲ့လေသည်။
"ငါ အသက် (၁၂) နှစ်အထိပဲ နေခဲ့ရတာတောင် ဒီလို ဆုလာဘ်မျိုး ရနေပြီ.. တကယ်လို့ ငါ အသက် (၁၂၀) အထိ နေနိုင်ရင်ရော.... အကယ်၍ ငါ့ကျင့်ကြံမှုက အခြေတည်အဆင့် ရောက်သွားရင်ရော.... ရွှေအမြုတေ အဆင့် ရောက်ရင်ရော..... မူလဝိညာဉ် အဆင့် ရောက်ရင်ရော"
"ဒါဆိုရင် ငါ ပိုကောင်းတဲ့ ဆုလာဘ်တွေ ရနိုင်ပြီး ပိုသန်မာလာမလားပဲ "
"ဖြစ်နိုင်တာက ချန်ချန်ရွှယ်ကိုတောင် ကျော်တက်သွားနိုင်မလားပဲ"
ချင်းကျောက် ပိုတွေးလေ ဖြစ်နိုင်ခြေ ပိုများလေလို့ ခံစားလာခဲ့ရသည်။
မသေမျိုးကျင့်ကြံခြင်း သရုပ်ဖော် စနစ်ထဲက ကျင့်ကြံမှု သရုပ်ဖော်ခြင်း ဆိုတာ အတွေ့အကြုံ သင်ယူခြင်းတစ်မျိုးနဲ့ တူကာ သရုပ်ဖော် စနစ်ထဲက အချိန်စီးဆင်းမှုက သိပ်မြန်ပေသည်။
အကယ်၍ သူမသာ အဲဒီမှာ နှစ်ရာပေါင်းများစွာ နေလိုက်ရင်... လက်တွေ့မှာ နေ့ဝက်လောက်သာ ကုန်ဆုံးပေလိမ့်မည်။
"နှမြောစရာ ကောင်းလိုက်တာ..." သရုပ်ဖော် စနစ်မှာ ပေါ်လာတဲ့ သတိပေးချက် အသစ်ကို ကြည့်ပြီး ချင်းကျောက် မျက်မှောင်ကြုတ်ကာ မကျေမနပ် ရေရွတ်လိုက်၏။ "ငါ ထပ်ဝင်ချင်ရင် တစ်ရက် စောင့်ရဦးမယ်တဲ့... သောက်ကျိုးနည်း... အခုချက်ချင်း ထပ်ဝင်လို့ရရင် ကောင်းမှာပဲ"
"ငါ ထပ်ဝင်တဲ့အခါကျရင် အဲဒီလူမိုက်ကောင်ကို တိတ်တဆိတ် ဒုက္ခိတ ဖြစ်အောင် လုပ်ပစ်မယ် ဒါမှ သူ့အဖေက ဘယ်သူ သူ့သားကို လုပ်သွားလဲ ဆိုတာ သိမှာ မဟုတ်ဘူး"
"ပြီးတော့ ငါ ပိုသန်မာလာတဲ့အခါ အဲဒီ သားအဖ နှစ်ယောက်စလုံးကို ဒုက္ခရောက်အောင် လုပ်ပစ်အုံးမယ်"
"..."
ကြည့်ရတာ သူမရဲ့ စိတ်ဓာတ်က တော်တော်ကြံ့ခိုင်ပုံ ရပြီး သူမ၏ အခြေအနေအား အမြန် လက်ခံနိုင်လိုက်ပေသည်။
...
တစ်ချိန်တည်းမှာပင် ချန်အိမ်တော်....
ထိတ်လန့်တကြား ဖြစ်နေတဲ့ ချင်းကျောက်နဲ့ ယှဉ်ရင်ချန်ချန်ရွှယ်ကတော့ ပိုပြီး တည်ငြိမ်နေခဲ့လေသည်။
သူမရဲ့ ပဉ္စမအကြိမ်မြောက် မသေမျိုးကျင့်ကြံခြင်း သရုပ်ဖော်မှု ပြီးဆုံးသွားတဲ့အခါ သူမ ဘာမှားခဲ့လဲ ဆိုတာ ပြန်စဉ်းစားလိုက်၏။
အကြီးအကဲ ယွဲ့အား ဒီအတိုင်း လွှတ်ထားလို့ မဖြစ်ဘူးလို့ ချန်ချန်ရွှယ် ခံစားမိပေသည်။
အကယ်၍ အကြီးအကဲ ယွဲ့ရဲ့ လျှို့ဝှက်ချက်ကို စောစောစီးစီး ဖွင့်ချလိုက်ရင် ဂျူနီယာ ညီမလေး အသတ်ခံရမှာ မဟုတ်ပေ။
ဒါပေမဲ့ ပြန်စဉ်းစားကြည့်လိုက်တော့ ဒါက စိတ်မချရဘူးလို့ ခံစားမိလေသည်။
နောက်ပိုင်းမှာ ချန်ချန်ရွှယ်က အကြီးအကဲ ယွဲ့ရဲ့ လျှို့ဝှက်ချက်ကို ဖွင့်ချလိုက်တော့ အကြီးအကဲ ယွဲ့ရဲ့ လက်စားချေခြင်းကို ခံလိုက်ရပြီး သူမရဲ့ ပဉ္စမအကြိမ် သရုပ်ဖော်မှုက ဒီလိုပဲ ပြီးဆုံးသွားခဲ့ရပေသည်။
အဲဒီအချိန်တုန်းက ချန်ချန်ရွှယ်က ကောင်းကင်ဂိုဏ်းထဲမှာ ရှိနေပြီး အဲဒီအချိန်မှာ အကြီးအကဲ ယွဲ့က လူထုရဲ့ ဝေဖန်ပြစ်တင်မှုကို ခံနေရလေသည်။
နောက်ဆုံးကျတော့ အကြီးအကဲ ယွဲ့ဟာ ကောင်းကင်ဂိုဏ်းထဲ တိတ်တဆိတ် ပြန်ဝင်လာပြီး သူမကို လာသတ်ခဲ့သည်။
နောက်ဆုံးတော့ အရာအားလုံးက သူမ အားနည်းနေတာကြောင့်ပင်။
ချန်ချန်ရွှယ် သက်ပြင်းချလိုက်၏။
"ဒီတစ်ခါ ဆုလာဘ်က ချီစုစည်းမှု အဆင့် (၅) ဝိညာဉ်စွမ်းအင် အားလုံးတဲ့လား" ချန်ချန်ရွှယ်ဟာ ဆုလာဘ် လက်ခံရရှိလိုက်ပြီး အံ့သြစွာ တီးတိုး ရေရွတ်လိုက်သည်။ "ချီစုစည်းမှု အဆင့် (၅) ဝိညာဉ်စွမ်းအင် အားလုံး ဆိုတာ သေချာပေါက် ကြီးမားတဲ့ ဝိညာဉ်စွမ်းအင် ပမာဏပဲ... အကယ်၍ ဝိညာဉ်စွမ်းအင် အားလုံး ချီကြောတွေထဲ စီးဝင်လာရင်..."
သူမ စကားဆုံးတာနဲ့ ဘယ်ကမှန်းမသိ ရောက်လာတဲ့ အလွန် သန့်စင်သော ဝိညာဉ်စွမ်းအင်တွေဟာ သူမရဲ့ ချီကြောတွေနဲ့ ဒန်ထျန်းထဲကို ရူးသွပ်မတတ် စီးဝင်လာခဲ့သည်။
ချန်ချန်ရွှယ်က အခြေတည်အဆင့် (၁) ကျင့်ကြံသူ ဖြစ်နေပြီ ဖြစ်လို့ သူမ ခန္ဓာကိုယ်ထဲက ဝိညာဉ်စွမ်းအင်တွေက အလွန် များပြားလေသည်။
ဒါပေမဲ့ ဆုလာဘ် အနေနဲ့ ရရှိလိုက်တဲ့ သန့်စင်သော ဝိညာဉ်စွမ်းအင်တွေက လှုပ်ရှားမှုကြီး တစ်ခု ဖြစ်ပေါ်စေပြီး သူမ၏ မျက်နှာအား ရုတ်တရက် ပြောင်းလဲသွားစေခဲ့သည်။
အကြောင်းရင်းကတော့... သူမရဲ့ ကျင့်ကြံမှု အတားအစီးက ထပ်ပြီး လျော့ရဲလို့ မရနိုင်လောက်အောင် လျော့ရဲသွားတာကို ချန်ချန်ရွှယ် ရှင်းရှင်းလင်းလင်း ခံစားလိုက်ရလို့ပင်။
ဒီနေ့က သူမအဘိုးရဲ့ အသက် (၉၀) ပြည့် မွေးနေ့ဖြစ်ပြီး ချန်အိမ်တော်ထဲမှာ သူစိမ်းတွေ အများကြီး ရောက်နေကြလေသည်။
အဲဒီအထဲမှာ ကျင့်ကြံသူတွေလည်း ပါဝင်နေခဲ့သည်။
ဒါပေမဲ့ ချန်ချန်ရွှယ် ဂရုမစိုက်နိုင်တော့ပေ။ ဒါက သူမအတွက် အဆင့်တက်ဖို့ အခွင့်အရေးမှန်း သူမ သိပေသည်။
အကယ်၍ ဒီအခွင့်အရေးကို အရယူလိုက်ရင်... သူမ အတားအစီးကို ချိုးဖျက်နိုင်ပေလိမ့်မည်။
ချန်ချန်ရွှယ်ဟာ စကားတစ်ခွန်းမှ မပြောတော့ပေ။ သူမဟာ တင်ပျဉ်ခွေ ထိုင်လိုက်ပြီး ဆေးလုံး အမြောက်အမြား ထုတ်လိုက်ရာ ချက်ချင်းပင် ဝိညာဉ်စွမ်းအင်တွေက အရပ်မျက်နှာ အနှံ့ ဖြာထွက်သွားခဲ့ပြီး ဆေးရနံ့တို့ဟာ လေထဲမှာ ပြည့်နှက်သွားခဲ့သည်။
ထို့နောက် သူမညာ ဆေးလုံးတွေ အကုန်လုံးကို ပါးစပ်ထဲ ပစ်ထည့်လိုက်လေသည်။
ထို့နောက် သူမဟာ ဆေးအာနိသင်တို့အား စတင် သန့်စင်လိုက်ပေသည်။
သူမ နောက်တစ်ဆင့်ကို ချိုးဖျက်ဝင်ရောက်ချင်နေပေပြီ။
ကီလိုမီတာ ပတ်လည်အတွင်းက ဝိညာဉ်စွမ်းအင်တွေဟာ သူမ ရှိရာအရပ်ဆီ ရူးသွပ်မတတ် စီးဆင်းလာခဲ့ကြသည်။ ဝိညာဉ်စွမ်းအင်တွေ စုစည်းသွားတဲ့အခါ သာမန် မျက်စိနဲ့တောင် ရှင်းရှင်းလင်းလင်း မြင်နိုင်နေခဲ့ပြီး ကောင်းကင်ပေါ်က ဝိညာဉ်စွမ်းအင်တွေက ချန်အိမ်တော် အထက်မှာ ကြီးမားတဲ့ ဝဲကတော့ကြီး တစ်ခု ဖြစ်ပေါ်စေခဲ့ပြီး ဝဲကတော့ရဲ့ ဗဟိုချက်က ချန်ချန်ရွှယ် ရှိနေတဲ့ နေရာ ဖြစ်ပေသည်။
ဒီမြင်ကွင်းက လူတိုင်းရဲ့ အာရုံစိုက်မှုကို ဖမ်းစားလိုက်ပြီး ဒီလို ထူးဆန်းတဲ့ ဖြစ်ရပ်မျိုးက သာမန်လူတွေကို ဘာလုပ်ရမှန်း မသိ ဖြစ်သွားစေခဲ့သည်။
ကျင့်ကြံသူတွေကတော့ မျက်လုံးတွေ ပြူးကျယ်သွားကြပြီး သူတို့၏ မျက်လုံးထဲမှာ တုန်လှုပ်မှုတွေ ပြည့်နှက်နေခဲ့ကြသည်။
ချန်အိမ်တော် အပြင်ဘက်...
ကျင့်ကြံခြင်း သရုပ်ဖော် စနစ်ကြောင့် ဖြစ်ပေါ်လာတဲ့ တုန်လှုပ်မှုကနေ အခုမှ ပြန်လည် သက်သာလာတဲ့ ချင်းကျောက်ဟာ ရုတ်တရက် ခေါင်းမော့လိုက်လေသည်။
ထို့နောက် ချင်းကျောက်ရဲ့ အကြည့်တွေက ဝိညာဉ်စွမ်းအင် ဝဲကတော့ကြီးဆီ ရောက်ရှိသွားခဲ့သည်။
ရင်းနှီးနေတဲ့ ကိုယ်ရောင်ကိုယ်ဝါကို သူမ ခံစားလိုက်ရသလို တစ်ဖက်လူရဲ့ ကြောက်မက်ဖွယ်ကောင်းတဲ့ ခွန်အားကိုလည်း ခံစားလိုက်ရပေသည်။
"အဲဒါ သူပဲ"
" အဲဒီမိန်းမပဲ"
ချင်းကျောက်ဟာ ချက်ချင်းပင် ချန်ချန်ရွှယ်အား သတိရလိုက်ပြီး သူမရဲ့ လေသံထဲမှာ မယုံကြည်နိုင်မှုတွေ ပြည့်နှက်သွားခဲ့သည်။ "သူက ငါ့မျက်စိရှေ့မှာတင် အဆင့်တက်နေတာလား... ဒါက အခြေတည်အဆင့်ရဲ့ စွမ်းအင် လှုပ်ရှားမှု မဟုတ်လား....အခြေတည်အဆင့် (၂)...."
...