အခန်း ၃၂ : ဆုလာဘ်များ ရရှိခြင်း၊ ချီစုစည်းမှု အဆင့် (၅ )
လက်တွေ့ကမ္ဘာမှာတော့ အချိန်တွေ တစ်မိနစ်ပြီး တစ်မိနစ် ကုန်ဆုံးသွားခဲ့သည်။
လက်တွေ့ကမ္ဘာနှင့် မတူတာက မသေမျိုးကျင့်ကြံခြင်း သရုပ်ဖော် စနစ်ထဲမှာတော့ အရှိန်မြှင့်စက်တပ်ထားသလို အချိန်တွေက အလွန် မြန်ဆန်စွာ ကုန်ဆုံးနေခြင်းပင်။
ပိုင်ယီ အနေနဲ့ ရွေးချယ်ခံနှစ်ယောက်၏ အခြေအနေတို့အား အာရုံစိုက်နေခဲ့လေသည်။
သူတို့ နှစ်ယောက်စလုံးက မသေမျိုးကျင့်ကြံခြင်း သရုပ်ဖော် လုပ်ငန်းစဉ်မှာ သိုသိုသိပ်သိပ် နေထိုင်ကြပြီး မလိုအပ်တဲ့ ပြဿနာတွေကို သွားမရှာခဲ့ကြပေ။
သူတို့ နှစ်ယောက်စလုံး ကောင်းကောင်း နေထိုင်နေသည်ဟု ဆိုရပေမည်။
[အသက် ၃၁ နှစ် - ချန်ချန်ရွှယ်ဟာ ဓားကျင့်စဉ်ကို ပိုမို ကျွမ်းကျင်လာခဲ့ပြီး သူမ၏ ကျင့်ကြံမှုလည်း ပိုမို တိုးတက်လာသည်။]
[အသက် ၃၂ နှစ် - ချန်ချန်ရွှယ်၏ ဆရာသခင်သည် သူမအား လက်နက်သန့်စင်ခြင်း နည်းပညာတစ်ခု ပေးသနားခဲ့သည်။]
[အသက် ၃၃ နှစ် - မိစ္ဆာကျင့်ကြံသူ တစ်ယောက်ဟာ ပြဿနာ လိုက်ရှာနေခဲ့သည်။ ထို့ကြောင့် သူမဆရာသခင်၏ အမိန့်အရ ချန်ချန်ရွှယ်ဟာ မိစ္ဆာကို နှိမ်နင်းပြီး တာအိုကို ကာကွယ်ရန် တောင်အောက်ဆင်းခဲ့သည်။ ကောင်းကင်ဂိုဏ်းမှာပဲ ဆက်နေချင်ပေမယ့် လူမသိသူမသိ မဖြစ်ချင်တဲ့အတွက် သူမဟာ တောင်အောက်ဆင်းပြီး ဆရာသခင် ပေးတဲ့ တာဝန်ကို ပြီးမြောက်အောင် ထမ်းဆောင်ခဲ့သည်။]
[အသက် ၃၄ နှစ် - အမျိုးသား ကျင့်ကြံသူ တစ်ယောက်က ချန်ချန်ရွှယ်ကို ချစ်ရေးဆိုခဲ့သော်လည်း သူမ ရက်ရက်စက်စက် ငြင်းပယ်လိုက်သည်။ ကြားရတာတော့ အဲဒီ အမျိုးသား ကျင့်ကြံသူက စိတ်ပျက်လက်ပျက် ပြန်သွားပြီးနောက် လျှို့ဝှက်ဆန်းကြယ်သူ တစ်ယောက်ရဲ့ ရိုက်နှက်ခြင်းကိုတောင် ခံလိုက်ရသေးည်တဲ့။ ဘယ်သူ လုပ်တာလဲ ဆိုတာ ချန်ချန်ရွှယ် သိနေပြီး တော်တော်လေး ကူကယ်ရာမဲ့ ဖြစ်သွားခဲ့ရသည်။]
[အသက် ၃၅ နှစ် - အကြီးအကဲ ယွဲ့ဟာ ဟိုရင်းယွမ်ကို စတင် စကားပြောလာတာ မြင်လာကို ချန်ချန်ရွှယ် ချက်ချင်း သတိထားလိုက်မိသည်။ ထို့ကြောင့် အကြီးအကဲ ယွဲ့နဲ့ ဝေးဝေးနေဖို့ ဟိုရင်းယွမ်ကို သတိပေးလိုက်သည်။]
[အသက် ၃၆ နှစ် - ချန်ချန်ရွှယ်ဟာ ချီစုစည်းမှု အဆင့် (၆) သို့ ချိုးဖျက်ဝင်ရောက်ရန် ကြိုးစားသော်လည်း မအောင်မြင်ခဲ့ပေ။]
[ကံကောင်းစွာဖြင့် တန်ပြန်မှု မဖြစ်ပေါ်ခဲ့ပေ။]
[အသက် ၃၇ နှစ် - စိတ်မလုံခြုံ ဖြစ်နေသော ချန်ချန်ရွှယ်ဟာ ဂျူနီယာ ညီမလေး ဟိုရင်းယွမ်ကို လိုက်ရှာရန် ပြင်ဆင်လိုက်သည်။ သို့သော် သူမ ဘယ်လောက်ပဲ ကြိုးစားရှာရှာ ဟိုရင်းယွမ်ကို ရှာမတွေ့ခဲ့ပေ။ ချန်ချန်ရွှယ်၏ စိတ်အခြေအနေ အလွန် ဆိုးရွားနေခဲ့သည်။ သူမက အကြီးအကဲ ယွဲ့ကို ရှောင်ပုန်းနေခဲ့တာ ရှင်းနေပေမယ့် တစ်ဖက်လူက စတင် တိုက်ခိုက်လာခဲ့ပေပြီ။]
[အကြီးအကဲ ယွဲ့ရဲ့ ဟန်ဆောင်မျက်နှာဖုံးကို တိုက်ရိုက် ခွာမချခဲ့မိတဲ့အတွက် သူမ နည်းနည်း နောင်တရနေမိခဲ့သည်။]
[အသက် ၃၈ နှစ် - ချန်ချန်ရွှယ်ဟာ အကြီးအကဲ ယွဲ့၏ လျှို့ဝှက်ချက်ကို စုဆောင်းပြီး သူမဆရာသခင်ထံ ပေးအပ်လိုက်သည်။ သူမဆရာသခင်က ဒေါသတကြီးဖြင့် ဂိုဏ်းချုပ်ကြီးထံ တိုင်ကြားလိုက်သည်။ ဂိုဏ်းချုပ်ကြီးက အမိန့်ပေးလိုက်ရာ အကြီးအကဲ ယွဲ့ကို ကောင်းကင်ဂိုဏ်းမှ ထုတ်ပယ်လိုက်ပြီး ကောင်းကင်ဂိုဏ်းမှ အစွမ်းထက်သူများက လိုက်လံ ဖမ်းဆီးခဲ့ကြသည်။]
[အကြောင်းရင်း တစ်ခုခုကြောင့် ဒါက ချန်ချန်ရွှယ် လက်ချက်မှန်း အကြီးအကဲ ယွဲ့ သိသွားခဲ့သည်။]
[ချန်ချန်ရွှယ်ဟာ အကြီးအကဲ ယွဲ့၏ တိတ်တဆိတ် တိုက်ခိုက်သတ်ဖြတ်ခြင်းကို ခံလိုက်ရသည်!]
[သူမ သေဆုံးသွားပါပြီ]
[သူမ၏ အသက်မှာ (၃၈) နှစ်၊ (၂) လ နှင့် (၂၂) ရက် ဖြစ်သည်။]
[...]
ချန်ချန်ရွှယ်ရဲ့ မသေမျိုးကျင့်ကြံခြင်း သရုပ်ဖော် အတွေ့အကြုံက ပိုင်ယီရဲ့ မျက်စိရှေ့မှာ ရုတ်တရက် ပြီးဆုံးသွားခဲ့လေသည်။
နောက်ဆုံးတော့ သူမဟာ အကြီးအကဲ ယွဲ့ရဲ့ လက်ချက်နဲ့ပဲ သေဆုံးသွားခဲ့ရပြန်ပေသည်။
သူမရဲ့ အတွေ့အကြုံက ပြီးခဲ့တဲ့ မသေမျိုးကျင့်ကြံခြင်း သရုပ်ဖော်မှုနဲ့ မတူဘူး ဆိုပေမယ့် နိဂုံးချုပ်ကတော့ အတူတူပင်။
ကွာခြားချက် တစ်ခုတည်း ရှိသေးပေသည်။ ၎င်းက ဒီတစ်ခါ သူမ နှစ်အနည်းငယ် ပိုအသက်ရှင်ခဲ့တာပင်။
အဲဒါကလွဲရင် ဘာမှ မကွာခြားခဲ့ပေ။
"ဒါက သူမ ကံကြမ္မာကို မပြောင်းလဲနိုင်ခဲ့တဲ့ ပထမဆုံး အကြိမ်ပဲ မဟုတ်လား" ပိုင်ယီ ဖြစ်ပျက်သမျှ အားလုံးကို ကြည့်ပြီး ကိုယ့်ဘာသာ ရေရွတ်လိုက်၏။ "ပြီးခဲ့တဲ့ သရုပ်ဖော်မှု အကြိမ်ကြိမ်တိုင်းမှာ သူမဟာ အရင်တစ်ခေါက်က လမ်းဆုံးကို ချိုးဖျက်ကျော်ဖြတ်နိုင်ခဲ့တယ်... ဒီတစ်ခါတော့ သရုပ်ဖော် စနစ်ထဲမှာ သူမ ကြုံတွေ့ရတဲ့ အခက်ခဲဆုံး အတားအဆီး ဖြစ်ပုံရတယ်"
"တစ်ဖက်လူက ရွှေအမြုတေ အဆင့် မသေမျိုးကျင့်ကြံသူဆိုတော့ ချီစုစည်းမှု အဆင့် (၅) ပဲ ရှိသေးတဲ့ သူမ အနေနဲ့ ဘယ်လိုပဲ လုပ်လုပ် တစ်ဖက်လူရဲ့ ယုတ်မာတဲ့ လက်ကနေ မလွတ်မြောက်နိုင်မှာ မဟုတ်ဘူး..."
"ဒါပေမဲ့ ဒီလောက်ဆိုရင်ပဲ ချန်ချန်ရွှယ် အတွက် ကောင်းမွန်နေပါပြီ... ဟိုတစ်ယောက်က သူမထက်တောင် စောစော သေသွားသေးတာ"
ချန်ချန်ရွှယ်ထက် စောပြီး သရုပ်ဖော်မှု ပြီးဆုံးသွားတဲ့သူကတော့ ယုံမှားသံသယ ဝင်စရာ မလိုပဲ ကျင်းရှင်း နန်းတော်သခင်ကြီးရဲ့ အငယ်ဆုံးသမီးပင်။
လွန်ခဲ့တဲ့ (၂၂) မိနစ်က...
[အသက် ၅ နှစ် - ချင်းကျောက်သည် ကြိုးစား ကျင့်ကြံသော်လည်း ချီစုစည်းမှု အဆင့် (၁) ကို မရောက်ရှိသဖြင့် တော်တော်လေး စိတ်ဓာတ်ကျနေခဲ့သည်။]
[အသက် ၆ နှစ် - ချင်းကျောက်ဟာ ချီစုစည်းမှု အဆင့် (၁) သို့ ထပ်မံ ချိုးဖျက်ဝင်ရောက်ရန် ကြိုးစားသော်လည်း မအောင်မြင်ခဲ့ပေ။ သို့သော် သူမ မည်သည့် တန်ပြန်မှုမှ မခံစားခဲ့ရပေ။]
[အသက် ၇ နှစ် - ချင်းကျောက်၏ ဆရာသခင်က သူမအား ဆေးပုလင်း တစ်ပုလင်း ပေးသနားခဲ့သည်။]
[အသက် ၈ နှစ် - ချင်းကျောက်ဟာ ဆေးလုံး အမြောက်အမြားကို စုဆောင်း သောက်သုံးပြီးနောက်မှာ နောက်ဆုံးတွင် ချီစုစည်းမှု အဆင့် (၁) သို့ ရောက်ရှိသွားခဲ့သည်]
[အသက် ၈ နှစ် - သူမ၏ ကံကောင်းခြင်း နတ်ဘုရားမ ပါရမီ သက်တမ်းကုန်ဆုံးရန် အချိန်သိပ်မကျန်တော့ပေ။ ချင်းကျောက်ဟာ အံကြိတ်ပြီး လျှို့ဝှက်ဆန်းကြယ်သော ရွှေအမြုတေကို စားသုံးလိုက်သည်။ သူမ၏ မွေးရာပါ ပါရမီနှင့် အရည်အချင်းများ အလွန်အမင်း တိုးတက်လာခဲ့သည်။]
[အသက် ၁၁ နှစ် - အနီးအနားရှိ မသေမျိုးကျင့်ကြံခြင်း ဂိုဏ်းတစ်ခုဟာ ဖြောင့်မတ်သော လမ်းစဉ်ကို စွန့်လွှတ်ပြီး မိစ္ဆာဂိုဏ်းထံ အညံ့ခံလိုက်ကြောင်း ချင်းကျောက် ကြားသိလိုက်ရသည်။ သို့သော် ထိုဂိုဏ်းသည် မကြာမီမှာပင် ဖျက်ဆီးခံလိုက်ရလေသည်။]
[အသက် ၁၂ နှစ် - သူမ ပထမဆုံးအကြိမ် လေ့ကျင့်ရန် တောင်အောက်ဆင်းခဲ့သည်။ အမျိုးသမီးများကို အနိုင်ကျင့်နေသော လူချမ်းသာ သားသမီးတစ်ယောက်နှင့် တွေ့ဆုံခဲ့သည်။ ချင်းကျောက်ဟာ သူ့ခြေလက်(၅) ချောင်းစလုံးကို ချိုးဖျက်ပစ်လိုက်သည်။]
[သို့သော် ထိုလူ၏ ဖခင်သည် မသေမျိုးကျင့်ကြံသူ တစ်ဦး ဖြစ်နေခဲ့ပြီး သူ့ခွန်အားက သူမထက် သာလွန်နေခဲ့သည်]
[ချင်းကျောက် သေဆုံးသွားပါပြီ]
[သူမ၏ အသက်မှာ (၁၂) နှစ်၊ (၁) လ နှင့် (၁၄) ရက် ဖြစ်ပါသည်။]
[...]
ပိုင်ယီ ရွေးချယ်ထားတဲ့ ဒုတိယ ရွေးချယ်ခံက ချန်ချန်ရွှယ်ထက် စောပြီး သရုပ်ဖော် ဘဝ ပြီးဆုံးသွားခဲ့လေသည်။
ဒါပေါ့ ချင်းကျောက် အသက်ရှင်ခဲ့တဲ့ နှစ်ကာလ အရေအတွက်ကို ပိုင်ယီ တော်တော် ကျေနပ်လေသည်။
ဘာလို့လဲဆိုတော့ ဒါက ချင်းကျောက်ရဲ့ ပထမဆုံးအကြိမ် သရုပ်ဖော်မှု ဖြစ်တာကြောင့်ပင်။
ပထမဆုံးအကြိမ်မှာတင် အသက် (၁၂) နှစ် အထိ နေနိုင်ခဲ့ပြီး အဓိကကတော့ ကံကောင်းခြင်းနတ်ဘုရားမပါရမီကြောင့် ဆိုပေမယ့်ပေါ့....
ဒါပေမဲ့ ဒါကလည်း အလွန် ရှားပါးပေသည်။
သိထားရမှာက ချန်ချန်ရွှယ် ပထမဆုံးအကြိမ် သရုပ်ဖော်တုန်းက (၅) နှစ်ပဲ ခံခဲ့တာပင်။
[သင် ဖိတ်ကြားထားသည့် ကိုယ်စားလှယ်လောင်း ချန်ချန်ရွှယ်ဟာ သရုပ်ဖော် မသေမျိုးကျင့်ကြံခြင်း ဘဝတွင် (၃၈) နှစ်၊ (၂) လ နှင့် (၂၂) ရက်တိုင်တိုင် အသက်ရှင် နေထိုင်ခဲ့ပါသည်။ နောက်တစ်ကြိမ် သရုပ်ဖော်မှု မပြုလုပ်မီ (၂၄) နာရီ အချိန်စောင့်ဆိုင်းရပါမည်။]
[သင်သည် အောက်ပါ ဆုလာဘ်များကို ရရှိလိုက်ပါသည် - ]
[ဆုလာဘ် ၁ - ချန်ချန်ရွှယ်၏ (၃၈) နှစ်တာ မသေမျိုးကျင့်ကြံခြင်း အတွေ့အကြုံ (သူတော်စင်မ တစ်ပါး၏ တန်ဖိုးရှိသော မသေမျိုးကျင့်ကြံခြင်း အတွေ့အကြုံ)]
[ဆုလာဘ် ၂ - ကောင်းကင် ချီထိန်းချုပ်ခြင်း နည်းစနစ်(ကောင်းကင်ဂိုဏ်း အတွင်းစည်း တပည့်များ မဖြစ်မနေ သင်ယူရသော ကျင့်စဉ်)]
[ဆုလာဘ် ၃ - ချီစုစည်းမှု အဆင့် (၅) (ချန်ချန်ရွှယ်၏ ပြင်းထန်သော ကျင့်ကြံမှုအဆင့်)]
...
[သင် ဖိတ်ကြားထားသည့် ကိုယ်စားလှယ်လောင်း ချင်းကျောက်ဟာ သရုပ်ဖော် မသေမျိုးကျင့်ကြံခြင်း ဘဝတွင် (၁၂) နှစ်၊ (၁) လ နှင့် (၁၄) ရက်တိုင်တိုင် အသက်ရှင် နေထိုင်ခဲ့ပါသည်။]
[သင်သည် အောက်ပါ ဆုလာဘ်များကို ရရှိလိုက်ပါသည် ]
[ဆုလာဘ် ၁ - ကျားမ မကွဲပြားခြင်း(သင့် ခန္ဓာကိုယ် တည်ဆောက်ပုံသည် သာမန်လူနှင့် အနည်းငယ် ကွဲပြားသည်)]
[ဆုလာဘ် ၂ - ချီစုစည်းမှု အဆင့် (၁) ဝိညာဉ်စွမ်းအင် (အလွန် သန့်စင်သော ဝိညာဉ်စွမ်းအင်)]
[ဆုလာဘ် ၃ - ဆန်းကြယ်သော ဆေးလုံးဖော်စပ်နည်း (ဆန်းကြယ်ဆေးဂိုဏ်း၏ ဆေးလုံးဖော်စပ်နည်း)]
[ကျေးဇူးပြု၍ အထက်ပါ ဆုလာဘ် (၆) ခုထဲမှ (၂) ခုကို ရွေးချယ်ပါ]
မျက်စိကျိန်းလောက်အောင် များပြားလှတဲ့ ဆုလာဘ် (၆) ခုကို ကြည့်ရုံနဲ့တင် စိတ်ကျေနပ်စရာ ကောင်းနေပေပြီ။
ပိုင်ယီ အနေနဲ့ ဆုလာဘ် (၂) ခုပဲ ရွေးချယ်ခွင့် ရှိပေမယ့် ဒါက လုံလောက်နေပေသည်။
ချန်ချန်ရွှယ်ဆီက မသေမျိုးကျင့်ကြံခြင်း အတွေ့အကြုံနဲ့ ကောင်းကင် ချီထိန်းချုပ်ခြင်း နည်းစနစ်ကိုတော့ ရွေးစရာ မလိုဘူးလို့ ပိုင်ယီ ခံစားရ၏။ ဒါကြောင့် ဒီဆုလာဘ် နှစ်ခုကို လျစ်လျူရှုလိုက်သည်။ ထိုအစား တတိယ ဆုလာဘ်က သူ့အာရုံကို ဖမ်းစားလိုက်လေသည်။
ချီစုစည်းမှု အဆင့် (၅)....
ချင်းကျောက်ဆီက ရတဲ့ ဆုလာဘ် (၃) ခုထဲမှာတော့ ပထမ ဆုလာဘ်ကို ပိုင်ယီ သဘာဝကျကျ ရွေးမှာ မဟုတ်ပေ။ ဒုတိယ ဆုလာဘ်ကလည်း သာမန်ပဲလို့ ခံစားရပြီး ချီစုစည်းမှု အဆင့် (၁) ဝိညာဉ်စွမ်းအင် အားလုံးက အခုချိန်မှာ သူ့အတွက် သိပ်အသုံးမဝင်တော့ပေ။
တတိယ ဆုလာဘ် ဖြစ်တဲ့ ဆန်းကြယ်သော ဆေးလုံးဖော်စပ်နည်းကိုတော့ ရွေးချယ်လို့ ရတယ်လို့ ပိုင်ယီ ခံစားလိုက်ရသည်။
အံ့ဖွယ်ဆေးတွေနှင့် နတ်ဆေးတွေက ကျင့်ကြံသူတွေ အတွက် လုံးဝ အရေးကြီးပေသည်။
ကုသဖို့ သုံးနိုင်ရုံသာမကပဲ ကျင့်ကြံခြင်း အတွက်လည်း အထောက်အကူ ပြုနိုင်လေသည်။
ရန်သူတွေကို သတ်ဖို့တောင် သုံးနိုင်သေးရာ ၎င်းအား အသုံးပြုပုံတဲ့ နယ်ပယ်က ကျယ်ပြန့်လှပေသည်။
ဒါ့အပြင်... နောက်ထပ် ကျွမ်းကျင်မှု တစ်ခု တတ်မြောက်ထားတာ အမြဲတမ်း ကောင်းပေသည်။
ပိုင်ယီ ရွေးချယ်မှု (၂) ခု ပြုလုပ်ပြီးနောက် သူ့ကျင့်ကြံမှုက ချီစုစည်းမှု အဆင့် (၃) အတားအဆီးကို ချက်ချင်း ချိုးဖျက်ကျော်ဖြတ်သွားပြီး ချီစုစည်းမှု အဆင့် (၄) ကို တိုက်ရိုက် ရောက်ရှိသွားခဲ့သည်။ သို့ပေမဲ့ ဒီမှာတင် မရပ်တန့်သွားခဲ့ပဲ ချီစုစည်းမှု အဆင့် (၅) ဆီကို လျင်မြန်စွာ ဆက်လက် ထိုးတက်သွားခဲ့သည်။
"ဘုန်း..."
ပိုင်ယီတစ်ယောက်တည်းသာ ကြားနိုင်တဲ့ ထူးခြားတဲ့ ပေါက်ကွဲသံတစ်ခုအား ဒန်ထျန်းဆီကနေ ကြားလိုက်ရ၏။
ကျင့်ကြံမှုက နောက်တစ်ဆင့်သို့ ထပ်မံ ချိုးဖျက်ဝင်ရောက်သွားခဲ့ပေပြီ။
လှိုင်းထနေတဲ့ ကြီးမားသည့် ဝိညာဉ်စွမ်းအင်တို့က သူ့၏ခန္ဓာကိုယ် အပြင်ဘက်အထိ လျှံကျလာခဲ့ရာ အိပ်မက်တစ်ခုလို ဖြစ်နေခဲ့သည်။ ချီစုစည်းမှု အဆင့် (၅) က ပေးစွမ်းတဲ့ စွမ်းအား ခံစားချက်က ချီစုစည်းမှု အဆင့် (၃) နဲ့ ယှဉ်လို့ မရနိုင်လောက်အောင် ကွာခြားလွန်းပေသည်။
တစ်ချိန်တည်းမှာပဲ ဆန်းကြယ်သော ဆေးလုံးဖော်စပ်နည်းနဲ့ ပတ်သက်တဲ့ သတင်းအချက်အလက် အမြောက်အမြား သူ့ခေါင်းထဲ ဝင်ရောက်လာခဲ့လေသည်။
ထို့နောက် ဆေးလုံးဖော်စပ်နည်းပညာအား ချက်ချင်း တတ်မြောက်သွားခဲ့ရုံသာမက အခြား ဆေးဝါးဖော်စပ်နည်း ဒါဇင်ကျော်ကိုလည်း တက်မြောက်လာခဲ့သည်။
...