အခန်း ၃၁ : ငါ့မှာ မပါသင့်တဲ့ အစိတ်ပိုင်း တစ်ခုရှိနေတယ်
မသေမျိုးကျင့်ကြံခြင်း သရုပ်ဖော် စနစ် အတွင်း၌ ...
ဆန်းကြယ်ဆေးဂိုဏ်း....
အသက် (၄) နှစ်ကျော်ကျော် ရှိနေပြီ ဖြစ်တဲ့ ချင်းကျောက်ဟာ မသေမျိုးကျင့်ကြံဖို့ အရင်းအမြစ် ပါကြောင်း စစ်ဆေးတွေ့ရှိခဲ့သည်။ ဒါ့အပြင် ဆန်းကြယ်ဆေးဂိုဏ်းက အကြီးအကဲ တစ်ယောက်ရဲ့ လက်အောက်ခံ ဖြစ်လာခဲ့လေသည်။ ယုတ္တိဗေဒအရ ပြောရရင် သူမ ပျော်ရွှင်နေသင့်ပေသည်။
ဒါပေမဲ့ သူမရဲ့ ရှုပ်ထွေးနေတဲ့ ဝင်စားမွေးဖွားခြင်း အတွေ့အကြုံကို တွေးမိတော့ ချင်းကျောက် မပျော်ရွှင်နိုင်ပေ။
ဒီ ထူးဆန်းတဲ့ မသေမျိုးကျင့်ကြံခြင်း သရုပ်ဖော် စနစ်က သူမအား တကယ် ပြန်လည်မွေးဖွားခွင့် ပေးမယ်လို့ ထင်မထားခဲ့ချေ။
သူမ ဝင်စားခါစတုန်းက လုံးဝ အံ့သြမှင်သက်သွားခဲ့ပြီး တခြားကမ္ဘာတစ်ခုကို ရောက်လာတယ် ဆိုတဲ့ အချက်ကို လက်ခံဖို့ အချိန်အများကြီး ယူခဲ့ရသည်။
ထို့အပြင် ဒါကလည်း မသေမျိုးကျင့်ကြံခြင်း ကမ္ဘာတစ်ခုဆိုသည်အား သူမ သိလိုက်ရ၏။
သူမ မူလ နေထိုင်ခဲ့တဲ့ ကမ္ဘာနဲ့ မတူတာတစ်ခုက ဒီကမ္ဘာမှာ ကျင်းရှင်း နန်းတော် မရှိသလို ဝိညာဉ်ဓားဂိုဏ်းလည်း မရှိပေ... ချန်ချန်ရွှယ် ဆိုတာလည်း မရှိတော့ပေ။
သူမ ပြန်သွားလို့ ရနိုင်မလား ဆိုတာ ချင်းကျောက် မသိသလို မသေမျိုးကျင့်ကြံခြင်း သရုပ်ဖော် စနစ်က ပြောတာတော့ သူမ သေသွားရင် ပြန်သွားလို့ ရသည်တဲ့။
ဒါပေမဲ့ ချင်းကျောက် တကယ် မစမ်းရဲခဲ့ပေ။ ဘာလို့ဆို တကယ် သေသွားမှာ ကြောက်၍ပင်။
သူမ ကြောက်လန့်နေခဲ့လေသည်။
"ဟူး"
ချင်းကျောက်ဟာ သူမရဲ့ စကပ်အနားစကို ဆွဲလိုက်ပြီး မရှိသင့်တဲ့ အစိတ်အပိုင်းအား ငုံ့ကြည့်လိုက်၏။ သူမရဲ့ အတွေးတွေက လေးလံနေခဲ့ပြီး ခံစားချက်တို့ကလည်း ရှုပ်ထွေးနေခဲ့ပေသည်။
(၄) နှစ် ကြာပြီးတာတောင် ဒီမရှိသင့်တဲ့ အစိတ်အပိုင်းကို လက်ခံဖို့ သူမ ခက်ခဲနေတုန်းပင်။
စောစောသာ သိခဲ့ပါက ပါရမီအသစ် ရွေးတုန်းက ဒီလောက် ပေါ့ပေါ့ဆဆ ရွေးခဲ့မိမှာ မဟုတ်ချေ။
ဒီသောက်ကျိုးနည်း အရာကို ရွေးမယ့်အစား ဟို အကြွေးဆက်ခံသူကို ရွေးလိုက်တာကမှ ပိုကောင်းပေအုံးမည်။
'သောက်ကျိုးနည်းပဲ...'
ချင်းကျောက်ကို ကျေနပ်စေတဲ့ တစ်ခုတည်းသော အရာကတော့ သူမရဲ့ ကံတရားပင်။ သူမရဲ့ ကံတရားက ရယ်စရာကောင်းလောက်အောင် ကောင်းနေတယ်လို့ ခံစားရပြီး အပြင်ထွက်ရင် ရွှေတုံး အနည်းငယ် ကောက်ရတာက ပုံမှန်လိုပင်။
သိုလှောင်လက်စွပ် တစ်ကွင်း ကောက်ရတာတောင် ပုံမှန်ဖြစ်နေခဲ့ပေသည်။
ဒါက သူမရဲ့ မွေးရာပါ ပါရမီရဲ့ အကျိုးသက်ရောက်မှုကြောင့်လို့ သူမသိပေသည်။
'အံ့သြစရာ ကောင်းလိုက်တာ...
သူမရဲ့ ကံတရားကိုတောင် လွှမ်းမိုးနိုင်တယ် ဆိုတော့ ဒါ ဘယ်လို နည်းလမ်းမျိုးလဲ... မသေမျိုးနည်းလမ်းလား....'
"ဒါနဲ့..."
ချင်းကျောက် တစ်ခုခု သတိရသွားပုံ ရလေသည်။ ဆွဲကြိုးလို ဆွဲထားတဲ့ သိုလှောင်လက်စွပ်ကို သူမ ထိလိုက်၏။ ပြီးတော့ လက်သေးသေးလေးကို လှန်လိုက်ရာ ရွှေရောင်ဖျော့ဖျော့ တောက်ပနေတဲ့ ဆေးလုံးတစ်လုံးက သူမ လက်ဝါးပေါ် ရောက်လာခဲ့သည်။
အလွန် ထူးခြားသည့် ဆေးရနံ့တစ်ခု နှာခေါင်းထဲ ဝင်ရောက်လာခဲ့ပြီး ချင်းကျောက်ကို စိတ်လက်ပေါ့ပါး ပျော်ရွှင်သွားစေခဲ့ပေသည်။
"ဒီဆေးလုံးရဲ့ အာနိသင်က ဘာလဲဆိုတာ ငါ မသိဘူး... စားလိုက်ရင် ငါ နေရာတင် သေသွားမလား ဒါမှမဟုတ် ငါ့ကံတရားက ပေါက်ကွဲသွားပြီး ရွှေအမြုတေ အဆင့်ကို တက်လှမ်းဖို့ ကူညီပေးမယ့် နတ်ဆေးလုံး ဖြစ်နေမလားပဲ"
"ဒီကျင့်ကြံခြင်း ကမ္ဘာမှာ ဘာတွေ ဖြစ်ပျက်နေလဲ ဆိုတာ ငါ မသိဘူး..."
"ကျင်းရှင်း နန်းတော်ရဲ့ ကျင့်စဉ်တွေက ဒီကမ္ဘာမှာ လုံးဝ အသုံးမဝင်ဘူးဆိုတောပ ငါ အစကနေ ပြန်ကျင့်ကြံရမှာပဲ... ဒါ့အပြင် ဒီဘဝက ငါ့ခန္ဓာကိုယ်ရဲ့ အရင်းအမြစ် က အရင်ဘဝကနဲ့ ယှဉ်ရင် တအားဆိုးတာပဲ... ကျင့်ကြံရတာ တကယ် ပင်ပန်းလွန်းတယ်"
"ငါ... စားလိုက်သင့်လား"
ချင်းကျောက် ဗျာများနေခဲ့လေသည်။
သူမဟာ ဒီလောက် အားနည်းနေတာမျိုး မဖြစ်ချင်ပေ။ အသက် (၄) နှစ် ရှိနေပြီ ဖြစ်ပေမဲ့ ချီစုစည်းမှု အဆင့် (၁) တောင် မရောက်သေးချေ။ ထို့ကြောင့် မသေမျိုးကျင့်ကြံခြင်း ဂိုဏ်းတစ်ခုထဲ ဝင်ထားတယ် ဆိုပေမယ့် စိတ်မလုံခြုံသလို ခံစားနေခဲ့ရလေသည်။ ထို့အပြင် သူမအား ဒုက္ခပေးချင်တဲ့ လူတွေ အမြဲ ရှိနေတယ်လို့ ခံစားနေခဲ့ရသည်။
ပိုသန်မာလာဖို့ အတွက် ကြိုးစားကျင့်ကြံတာ အပြင် တစ်ခုတည်းသော ဖြတ်လမ်းနည်းက... ဒီရွှေအမြုတေ ဖြစ်ပေသည်။
ဒါက မွေးရာပါ ပါရမီ ရွေးတုန်းက သူမ ရွေးခဲ့တဲ့ လျှို့ဝှက်ဆန်းကြယ်သော ရွှေအမြုတေဖြစ်ကာ ဒီရွှေအမြုတေကို သူမရဲ့ ဆွေမျိုးတွေက ပေးခဲ့ခြင်းပင်။
ကံကောင်းခြင်းနတ်ဘုရားမ ပါရမီ အလုပ်လုပ်နေတုန်း အခွင့်ကောင်းယူပြီး သူမ စားလိုက်သင့်လား.....
ဒါပေမဲ ကံကောင်းခြင်းနတ်ဘုရားမရဲ့ ကံကောင်းမှုက ဒီရွှေအမြုတေ အပေါ် သက်ရောက်မှု ရှိပါ့မလား......
...
ချင်းကျောက် မသိတာကတော့ သူမ ဗျာများနေချိန်မှာပဲ ဝိညာဉ်ဓားဂိုဏ်းရဲ့ သူတော်စင်မ ချန်ချန်ရွှယ်ဟာလည်း မသေမျိုးကျင့်ကြံခြင်း သရုပ်ဖော် စနစ်နဲ့ ချိတ်ဆက်နေတယ် ဆိုတာပင်။
ပိုင်ယီက ချန်ချန်ရွှယ်ရဲ့ တောင်းဆိုမှုကို အာရုံခံမိပြီးနောက် သူမကို ဝင်ရောက်ခွင့် ပေးလိုက်ခြင်းပင်။
ရွေးချယ်ခံလူသားနှစ်ယောက်က သူ့အတွက် ပြိုင်တူ သာရုပ်ဖော်ပေးနေကြခြင်းဖြစ်တာကြောင့် ပိုင်ယီဟာ နည်းနည်း စိတ်လှုပ်ရှားနေခဲ့ပေသည်။
လောလောဆယ် ချင်းကျောက်က သရုပ်ဖော် စနစ်ထဲမှာ အသက် (၁၀) နှစ် အထိ အသက်ရှင်နိုင်ဖို့က သေချာသလောက် ဖြစ်နေပေပြီ။
ချန်ချန်ရွှယ်ကတော့ အတွေ့အကြုံရှိတဲ့ ဝန်ထမ်းဟောင်းကြီးဖြစ်ရာ ပြောစရာမလိုချေ။ ထို့အပြင် ချန်ချန်ရွှယ်က သူမ ရင်းနှီးပြီးသား သရုပ်ဖော် ဘဝဟောင်းကိုပဲ ဆက်လက် ရွေးချယ်မယ် ဆိုတာ ပိုင်ယီ ခန့်မှန်းစရာပင် မလိုပေ။
သူစောင့်ရမှာက ချန်ချန်ရွှယ်က သူ့အတွက် ဘယ်လို အံ့သြစရာ အသစ်အဆန်းတွေ ယူဆောင်ပေးလာမလဲဆိုတာပင်။
ယခုကဲ့သို့ လုပ်သား နှစ်ယောက်က သူ့အတွက် အလုပ်လုပ်ပေးနေတာက ဘယ်လိုခံစားရလဲဆိုရင်....
"အင်း...သိပ်ကောင်းတယ်.."
ထင်ထားတဲ့ အတိုင်းပါပင်။ ပိုင်ယီက ခွင့်ပြုချက် ပေးလိုက်သည်နှင့် ချန်ချန်ရွှယ်ဟာ သရုပ်ဖော် စနစ်ထဲ နောက်တစ်ကြိမ် ဝင်ရောက်လာပြီး ရင်းနှီးနေတဲ့ ဘဝဟောင်းကိုပဲ ရွေးချယ်လိုက်လေသည်။
[အသက် ၀ နှစ် - ချန်ချန်ရွှယ်ဟာ မသေမျိုးကျင့်ကြံခြင်း ကမ္ဘာတစ်ခုသို့ ဝင်စားခဲ့ပြီး ဆင်းရဲသော မိသားစုတစ်ခုတွင် မွေးဖွားခဲ့ပါသည်။]
[အသက် ၄ နှစ် - ချန်ချန်ရွှယ်ဟာ မသေမျိုးအဖြစ် တက်လှမ်းခြင်း ဂိုဏ်းသို့ ဝင်ရောက်ခဲ့သည်။]
[အသက် ၈ နှစ် - ချန်ချန်ရွှယ်ဟာ သူမ၏ ပထမဆုံး လေ့ကျင့်ရေးခရီးစဉ်တွင် မိစ္ဆာသားရဲ တစ်ကောင်ကို သတ်ဖြတ်ခဲ့သည်။ ၎င်းက မသေမျိုးအဖြစ် တက်လှမ်းခြင်း ဂိုဏ်း၏ ဂိုဏ်းချုပ်ကြီးအား အလွန် ကျေနပ်စေခဲ့သည်။ သူသည် သူမအား ပိုင်ဖျင်ဓား ဟုခေါ်သော ဝိညာဉ်လက်နက် တစ်ခု ပေးသနားခဲ့သည်။]
[အသက် ၁၄ နှစ် - မသေမျိုးအဖြစ် တက်လှမ်းခြင်း ဂိုဏ်းတွင် ပြည်တွင်းစစ် ဖြစ်ပွားခဲ့သည်။ ချန်ချန်ရွှယ်ဟာ သူမ၏ ဂျူနီယာ ညီမလေးကို ခေါ်ပြီး ကောင်းကင်ဂိုဏ်းသို့ ထွက်ခွာခဲ့သည်။ အကြီးအကဲ ယွဲ့ ထံ မဝင်ရောက်ဖို့ ဂျူနီယာ ညီမလေးကို သူမ မှာကြားခဲ့သည်။ ဂျူနီယာ ညီမလေးက သူမရဲ့ အကြံပေးချက်ကို နားထောင်ခဲ့သည်။]
[အသက် ၂၀ နှစ် - ချန်ချန်ရွှယ်၏ မွေးရာပါ ပါရမီ ပြန်လည်ရွေးချယ်ခဲ့ပြီး သူမဟာ ယခင် ပါရမီ (၂) ခုကိုပဲ ထပ်မံ အစားထိုးခဲ့သည်။]
[အသက် ၂၂ နှစ် - ဂျူနီယာ ညီမလေးဟာ လေ့ကျင့်ရန် တောင်အောက်ဆင်းလိုခဲ့သည်။ ချန်ချန်ရွှယ်က သူမကို ငြိမ်ငြိမ်နေရန်နှင့် မဆင်မခြင် မလုပ်ရန် မှာကြားခဲ့သည်။]
[အသက် ၂၇ နှစ် - ကောင်းကင်ဂိုဏ်းတွင်းရှိ သိုသိုသိပ်သိပ် နေတတ်သော ညီအစ်မ နှစ်ယောက်ကို လူအများ မေ့လျော့နေခဲ့ကြသည်။ လက်တွေ့တွင် သူတို့ နှစ်ယောက်စလုံးဟာ ချီစုစည်းမှု အဆင့် (၄) မသေမျိုးကျင့်ကြံသူများ ဖြစ်နေကြပေပြီ။ ပါရမီရှင် ဂျူနီယာ ညီမလေး ဟိုရင်းယွမ်သည် ချီစုစည်းမှု အဆင့် (၅) သို့ ရောက်လုနီးပါး ဖြစ်နေပေပြီ။]
[အသက် ၃၀ နှစ် - ကြီးမားသော အခက်အခဲ တစ်ခုကို ကျော်ဖြတ်ပြီးနောက် ချန်ချန်ရွှယ်ဟာ အသက် ၃၀ တွင် အောင်မြင်ခြင်းပါရမီကို အသက်သွင်းလိုက်သည်]
[ချန်ချန်ရွှယ်၏ ကျင့်ကြံမှု ချက်ချင်း တစ်ဆင့် တက်သွားခဲ့သည်]
[ချန်ချန်ရွှယ်ဟာ ချီစုစည်းမှု အဆင့် (၅) သို့ ရောက်ရှိသွားပါပြီ]
...
"ချီစုစည်းမှု အဆင့် (၅)" ချန်ချန်ရွှယ်ဟာ အံ့သြတုန်လှုပ်စွာ ရေရွတ်လိုက်၏။ သူမရဲ့ ပါရမီအသစ် အသက် ၃၀ တွင် အောင်မြင်ခြင်းက ဒီလောက် အစွမ်းထက်မယ်လို့ ထင်မထားခဲ့ပေ။ ချီစုစည်းမှု အဆင့် (၄) ကနေ အဆင့် (၅) ကို ချက်ချင်း ရောက်သွားစေခဲ့ပေသည်။
ဒီအချိန်အတောအတွင်း သူမဟာ ဘာအဆို့အတားမှ မခံစားခဲ့ရပဲ မျက်စိတစ်မှိတ်အတွင်း အဆင့်တက်သွားခဲ့ခြင်း ဖြစ်လေသည်။
အရှိန်က သိပ်မြန်လွန်းလို့ သူမဟာ အလစ်အငိုက် မိသွားခဲ့ရ၏။
ဒါ့အပြင် ဒီလောက် မြန်မြန်ဆန်ဆန် ချီစုစည်းမှု အဆင့် (၅) ကို ရောက်သွားတာတောင် ဘာမှ မသက်မသာ မဖြစ်ခဲ့သလို သူမရဲ့ အခြေခံအုတ်မြစ် မခိုင်မာသလိုလည်း မခံစားခဲ့ရချေ။
ပြောင်းပြန်အနေနဲ့... ချီစုစည်းမှု အဆင့် (၅) ရဲ့ အခြေခံအုတ်မြစ်က သိပ်ခိုင်မာလွန်းလို့ သူမ နည်းနည်းတောင် ကြောက်လာမိခဲ့လေသည်။
"အကယ်၍ ငါသာ မူလဝိညာဉ် အဆင့် (၁၀) ရောက်နေပြီး အသက် ၃၀ တွင် အောင်မြင်ခြင်းပါရမီကို အသက်သွင်းလိုက်ရင် အဲဒီ အဆင့်ကို ကျော်ဖြတ်သွားနိုင်မလားပဲ"
ထိုအတွေးက သူမ ခေါင်းထဲ ရုတ်တရက် ပေါ်လာခဲ့လေသည်။
ထို့နောက် သူမဟာ ခေါင်းခါလိုက်ပြီး မရယ်ဘဲ မနေနိုင်တော့ပေ။
သူမက ချီစုစည်းမှု အဆင့် (၅) ကျင့်ကြံသူပဲ ရှိသေးတာ လက်ရှိဘဝမှာတောင် အခြေတည်အဆင့် (၁) ပဲ ရှိပေသည်။ ယခု၌ မူလဝိညာဉ် အဆင့် (၁၀) အထိ တွေးမိနေပေသည်။
ဝိညာဉ်ဓားဂိုဏ်းက သူမရဲ့ ဆရာသခင်ကလည်း မူလဝိညာဉ် အဆင့် ကျင့်ကြံသူဖြစ်ကာ သူက မူလဝိညာဉ် အဆင့် (၁၀) ပဲ ရှိသေးလေသည်။
"ငါ အများကြီး မစဉ်းစားချင်တော့ဘူး... ဒီ ပဉ္စမအကြိမ် မသေမျိုးကျင့်ကြံခြင်း သရုပ်ဖော်မှုက စတုတ္ထအကြိမ်ထက်တော့ တိုးတက်လာပြီပဲ" ချန်ချန်ရွှယ် ရေရွတ်လိုက်၏။ "ဒီတစ်ခါ ငါနဲ့ ရင်းယွမ်က ကောင်းကင်ဂိုဏ်းထဲ ဝင်ခဲ့ပေမယ့် ယုတ်မာတဲ့ ရည်ရွယ်ချက် ရှိတဲ့ အကြီးအကဲ ယွဲ့နဲ့ ဝေးဝေးနေခဲ့တယ်.. အကြီးအကဲ ယွဲ့နဲ့ မတည့်တဲ့ ကောင်းကင်ဂိုဏ်း အကြီးအကဲ တစ်ယောက်ရဲ့ လက်အောက်ကို ဝင်ခဲ့တာ"
"ဒီနည်းအားဖြင့် ရင်းယွမ်ရဲ့ အသက်ကို ကယ်တင်လိုက်နိုင်ပြီလို့ ပြောလို့ရတယ်... ဒါပေမဲ့ အကြီးအကဲ ယွဲ့က ကောင်းကင်ဂိုဏ်းထဲမှာ ရှိနေတုန်းပဲ... အကယ်၍ သူမသာ ရင်းယွမ်ရဲ့ ပါရမီက သူမ လိုချင်နေတဲ့ အမျိုးအစားမှန်း သိသွားရင်..."
မှိုင်းညို့တဲ့ အရိပ်အယောင် တစ်ခု ချန်ချန်ရွှယ်ရဲ့ မျက်လုံးထဲ ဖြတ်သန်းသွားခဲ့ပြီး ပြီးခဲ့တဲ့ သရုပ်ဖော်မှုကို သူမ သတိရလိုက်လေသည်။
သူမနဲ့ ဟိုရင်းယွမ် နှစ်ယောက်စလုံး အကြီးအကဲ ယွဲ့ရဲ့ လက်ချက်နဲ့ သေဆုံးခဲ့ရပေသည်။
ဒီအငြိုးအတေးကို သူမ မှတ်ထားလေသည်။
...