အခန်း ၃၀ : ဒုတိယမြောက် ရွေးချယ်ခံ၏ ပထမဆုံး သရုပ်ဖော် ဘဝ
မသိစိတ်ထဲမှာ ချင်းကျောက်ဟာ သူမရဲ့ အသိစိတ် ဖြည်းဖြည်းချင်း ကြည်လင်လာပြီး အမြင်အာရုံတွေ ပြန်ရလာတယ်လို့ ခံစားလိုက်ရလေသည်။
ဒါပေမဲ့ သူမကို ကြောက်လန့်သွားစေတာက သူမဟာ အခု ဖရိုဖရဲ ဖြစ်နေတဲ့ ဟင်းလင်းပြင်တစ်ခုထဲ ရောက်နေသလို ဖြစ်နေတာပင်။
လောလောဆယ် သူမဘေးမှာ ဘာတစ်ခုမှ ရှိမနေတာကို အာရုံခံမိလိုက်၏။
'ဒါ ဘယ်နေရာလဲ....'
သူမ ထိတ်လန့်သွားခဲ့ပြီး နောင်တရနေလေသည်။
အကယ်၍ ဒီလို ထူးဆန်းတဲ့ အရာမျိုးနဲ့ ကြုံရမယ်မှန်း သိခဲ့ပါက သူမဟာ ကျင်းရှင်း နန်းတော်ကနေ ထွက်လာခဲ့မှာ မဟုတ်ချေ။
ကျင်းရှင်း နန်းတော်မှာဆိုရင် သူမအမေရဲ့ ကာကွယ်မှုအောက်မှာ သူမက စိတ်ကြိုက်နေလို့ရပေသည်။
သူမ လုပ်ချင်ရာ လုပ်လို့ရသလို ဘယ်သူမှ သူမအား မထိန်းချုပ်နိုင်ပေ။
သူမ စဉ်းစားမိသွားခဲ့သည်... 'သူမ သေသွားပြီလား ဒါမှမဟုတ် မသေသေးဘူးလား..'
'သူမ တကယ်ပဲ ငရဲပြည်ကို ရောက်နေတာလား...'
'သူမ ပြန်လည်ဝင်စားပြီး ဘဝသစ်တစ်ခု စတင်ရတော့မှာလား...'
[မသေမျိုးကျင့်ကြံခြင်း သရုပ်ဖော် စနစ်မှ ကြိုဆိုပါသည်။ သင်သည် သရုပ်ဖော် စနစ်အတွင်း သင့်ဘဝသစ်ကို စတင်ပါတော့မည်]
[...]
မသေမျိုးကျင့်ကြံခြင်း သရုပ်ဖော် စနစ်ရဲ့ သတိပေးချက် ရုတ်တရက် ပေါ်လာတာကြောင့် ချင်းကျောက် လန့်သွားခဲ့ပြီး ခဏလောက် ကြောင်သွားခဲ့လေသည်။
'မသေမျိုးကျင့်ကြံခြင်း သရုပ်ဖော် စနစ်... ဒါ ဘာအရာကြီးလဲ... သရုပ်ဖော် စနစ်ထဲမှာ သေဆုံးခြင်းက တကယ်သေဆုံးခြင်း မဟုတ်ဘူးတဲ့လား... ဘာကို ဆိုလိုတာလဲ...'
'သရုပ်ဖော် ဘဝ ပြီးဆုံးသွားတဲ့အခါ ဆုလာဘ် တွက်ချက်မှု ရှိသေးတယ်... ဒါပေမဲ့ (၅) နှစ်အထိ အသက်ရှင်ရမယ်တဲ့...'
သူမရှေ့မှာ ပေါ်လာတဲ့ စာသားတွေကို ကြည့်ပြီး ချင်းကျောက် နည်းနည်း ထိတ်လန့်သွားပေမယ့် တစ်ချိန်တည်းမှာ စိတ်ရှုပ်ထွေးနေခဲ့ပေသည်။
အစတုန်းက သူမက နားမလည်ချင်ပါကို ရွေးခဲ့တာဖြစ်ပြီး အဘယ်ကြောင့် ဆွဲခေါ်ခံလိုက်ရသည်နည်း။
ပြီးတော့ ဒီစည်းမျဉ်းတွေက ဘာအတွက်လဲ နားမလည်ပေ။
[ကျေးဇူးပြု၍ သင်၏ မသေမျိုးကျင့်ကြံခြင်း သရုပ်ဖော် ဘဝကို စတင်ရန် အောက်ပါ မွေးရာပါ ပါရမီ (၁၀) ခုထဲမှ (၃) ခုကို ရွေးချယ်ပါ ]
[ ၁။ သူလျှိုဇာတ်လမ်း (သုံးနှစ်ပြီးရင် ပြီးပြီဆိုပြီး သုံးနှစ်ပြီး သုံးနှစ် ထပ်စောင့်နေရမယ့် သူလျှိုကံကြမ္မာ)]
[၂။ ကျားမ မကွဲပြားသူ (သင့်ခန္ဓာကိုယ်တည်ဆောက်ပုံက သာမန်လူများနှင့် အနည်းငယ် ကွဲပြားနေပါမည် )]
[၃။ ခြေထောက်ကို စွဲလမ်းသူ (ခြေထောက်မြင်ရင် စိတ်လှုပ်ရှားတတ်တဲ့ စိတ်အခြေအနေ ရှိသူ)]
[၄။ ဟာကွက်ရှာသူ (အားနည်းချက်တွေကို ရှာဖွေပြီး အလွယ်လမ်းလိုက်နိုင်သူ)]
[၅။ ဆန်းကြယ်သော ရွှေအမြုတေ (ကောင်းကျိုးပေးမလား၊ ဆိုးကျိုးပေးမလား မသိရတဲ့ အမည်မသိ ဆေးလုံးတစ်လုံး)]
[၆။ ထောင်နန်းစံမယ့် အင်ဂျင်နီယာ (အင်ဂျင်နီယာ ဖြစ်လာပြီး လုပ်ငန်းခွင်အမှားကြောင့် ထောင်ကျမယ့် ကံကြမ္မာ)]
[၇။ မလိမ်ညာကြေး (ဘယ်တော့မှ လိမ်ညာပြောဆိုမည် မဟုတ်ပေ)]
[၈။ သံသယလွန်ကဲသူ (ကိစ္စကြီးကြီးမားမား ဖြစ်တော့မယ်ဆိုပြီး အမြဲတမ်း စိုးရိမ်ပူပန်နေတတ်ခြင်း)]
[၉။ ကံကောင်းခြင်း နတ်ဘုရားမ (အသက် ၁၀ နှစ်အထိ အလွန် ကံကောင်းနေလိမ့်မည်)]
[၁၀။ အကြွေးဆက်ခံသူ (မိဘဆီကနေ အမွေမရဘဲ အကြွေးတွေသာ ဆက်ခံရမယ့် ကံကြမ္မာ)]
[ကျေးဇူးပြု၍ ရွေးချယ်ပါ]
'ဟမ်... (၃) ခု ရွေးခိုင်းနေတာလား' အတွေးတစ်ခု ချင်းကျောက် ခေါင်းထဲ ဖြတ်သန်းသွားခဲ့သည်။
သူမ ရွေးသင့်လား...
သူမ တွန့်ဆုတ်နေမိခဲ့လေသည်။
ဒီ မသေမျိုးကျင့်ကြံခြင်း သရုပ်ဖော် စနစ် ဆိုတာ ဘယ်လိုအရာလဲ သူမ နားမလည်ပေ။
ဒါပေမဲ့ သူမ အခု ဘယ်လို အခြေအနေမျိုး ရောက်နေလဲ ဆိုတာတော့ သူမ ကောင်းကောင်း ရှင်းရှင်းလင်းလင်း သိပေသည်။
အကယ်၍ သူမသာ ဒီ မသေမျိုးကျင့်ကြံခြင်း သရုပ်ဖော် စနစ်နဲ့ မပူးပေါင်းဘူး ဆိုရင် သူမ နေရာတင် သေသွားမည်လား။
"ရှူး.."
ဒီတွန့်ဆုတ်မှုက စက္ကန့်ပိုင်းလောက်ပဲ ကြာလိုက်ပြီး အသက်ရှင်လိုစိတ် ပြင်းပြတဲ့ ချင်းကျောက်ဟာ ရွေးချယ်မှုကို စတင် လုပ်ဆောင်လိုက်လေသည်။
စိတ်မချရတဲ့ ပါရမီတွေကို ဖယ်ထားလိုက်မယ် ဆိုရင်၊ ဥပမာ - ပါရမီ ၆၊ ပါရမီ ၇၊ ပါရမီ ၈ နဲ့ ပါရမီ ၁၀ တို့ပင်...
ပါရမီ ၆ က အင်ဂျင်နီယာ ဆိုတာ ဘာလဲ ချင်းကျောက် မသိပေမယ့် ထောင်ဆိုတာတော့ သူမ သိပေ။
သူမ ထောင်ထဲ မသွားချင်ပေ။
ပါရမီ ၇ က ပိုတောင် ရယ်စရာ ကောင်းသေးလေသည်။ သူမ မလိမ်ရဘူးတဲ့လား....
ကြက်သီးထစရာ ကောင်းလွန်းပေသည်။
ပါရမီ ၈ ကလည်း သူမ ကြိုက်တဲ့အရာ မဟုတ်ပေ
ပါရမီ ၁၀ ကလည်း မကောင်းပဲ သူမဟာ အကြွေးတွေ ဆက်ခံရပေမည်။
'ဟင့်အင်း...မဖြစ်ဘူး...မဖြစ်ဘူး...'
သူမ ရွေးလို့ မဖြစ်ပေ။
ထို့နောက် ချင်းကျောက်ဟာ သူမ နားမလည်တဲ့ အရာတွေကို ဖယ်ရှားလိုက်တော့ ပါရမီ ၅ နဲ့ ပါရမီ ၉ ပဲ ကျန်တော့လေသည်။
"အဲ... တစ်ခု လိုနေသေးတယ်..." ချင်းကျောက်ဟာ မျက်မှောင်ကြုတ်ပြီး ပါရမီတွေကို တစ်ခုချင်းစီ သေချာ ပြန်ကြည့်လိုက်၏။
ပါရမီ ၂က စိတ်ဝင်စားစရာ ကောင်းတယ်လို့ သူမ ခံစားမိပေသည်။
သာမန်လူရဲ့ ခန္ဓာကိုယ် တည်ဆောက်ပုံနဲ့ မတူဘူး ဆိုတော့ အထူး ခန္ဓာကိုယ်ဖွဲ့စည်းပုံကို ဆိုလိုတာလားပင်။
ဘယ်လို အထူး ခန္ဓာကိုယ်ဖွဲ့စည်းပုံလဲ ဆိုတာ သူမ မသေချာပေမယ့် ဘာပဲဖြစ်ဖြစ်... တခြားဟာတွေထက်တော့ ပိုစိတ်ချရလေသည်။
"သုံးခု ပြည့်ပြီ"
[သင်သည် ပါရမီ ၂၊ ပါရမီ ၅၊ နှင့် ပါရမီ ၉ တို့ကို ရွေးချယ်လိုက်ပါသည်။ မသေမျိုးကျင့်ကြံခြင်း သရုပ်ဖော် စနစ်က သင့်အား ကိုယ်ပိုင် ဂုဏ်သတ္တိ၁၀ မှတ် ပေးထားပြီး ကျပန်း ခွဲဝေပေးနေပါသည်...]
[နာမည် - ချင်းကျောက်]
[ခန္ဓာကိုယ်ဖွဲ့စည်းပုံ - ၃]
[စိတ်အခြေအနေ - ၁]
[မိသားစု နောက်ခံ - ၂]
[ကံတရား - ၃]
[ဂုဏ်သတင်း - ၁]
[ပါရမီ - ကျားမမကွဲပြားသူ ၊ လျှို့ဝှက်ဆန်းကြယ်သော ရွှေအမြုတေ၊ ကံကောင်းခြင်း နတ်ဘုရားမ]
[သတိပေးချက် - မည်သည့် ဂုဏ်သတ္တိ မဆို သုည ဖြစ်သွားပါက သေဆုံးနိုင်ခြေ အလွန် မြင့်မားသွားပါမည်]
[သင်၏ မသေမျိုးကျင့်ကြံခြင်း သရုပ်ဖော် ဘဝ တရားဝင် စတင်ပါပြီ - ]
[ရေတွက်ခြင်း - ၁၀၊ ၉...]
[... ၀]
[သရုပ်ဖော်မှု စတင်လိုက်ပါသည်]
...
တစ်ချိန်တည်းမှာပင်...
ဒုတိယမြောက် ရွေးချယ်ခံလူသား ချင်းကျောက်ရဲ့ ပါရမီအသစ် (၃) ခု ရွေးချယ်မှုကို ကြည့်ပြီး ပိုင်ယီ လေးလေးနက်နက် စဉ်းစားခန်း ဝင်သွားခဲ့သည်။
ချင်းကျောက် အနေနဲ့ ပါရမီ ၅ နဲ့ ပါရမီ ၉ ကို ရွေးချယ်တာ ပုံမှန်ဖြစ်ကာ သာမန်လူတွေလည်း ဒီနှစ်ခုကို ရွေးကြမည်ပင်။
ရွေးချယ်မှု တစ်ခုက လျှို့ဝှက်ဆန်းကြယ်တဲ့ ရွှေအမြုတေ အသုံးဝင်မလား ဆိုတာ လောင်းကြေးထပ်တာဖြစ်လေသည်။။
နောက်ရွေးချယ်မှု တစ်ခုက ကံတရား ကောင်းမွန်အောင် လုပ်တာဖြစ်ပြီး အနည်းဆုံးတော့ အသက် (၁၀) နှစ် မတိုင်ခင် သူမ ကံကောင်းနေဦးမည်ပင်။
ဆိုလိုတာက သူမ အသက် (၁၀) နှစ် အထိ အသက်ရှင်ချင်ဖို့ လွယ်ကူပေလိမ့်မည်။
ဒါပေမဲ့ ချင်းကျောက်က ပါရမီ ၂ ကို ကျပန်း ရွေးလိုက်တာကတော့...
"ကျွတ်"
စိတ်ဝင်စားစရာပဲ။ ပိုင်ယီ ပြုံးလိုက်၏။
သူ တိုးတိုးလေး ရေရွတ်လိုက်လေသည်။ "သူမ ဒီပါရမီက ဘာကို ဆိုလိုတာလဲ သိသွားရင် သူမရဲ့ စိတ်အခြေအနေ ပေါက်ကွဲမသွားဖို့ပဲ မျှော်လင့်ရတာပေါ့... သူမကို ကျပန်း ခွဲဝေပေးထားတဲ့ ဂုဏ်သတ္တိ ၁၀ မှတ်ထဲမှာ စိတ်အခြေအနေ က (၁) မှတ်ပဲ ပါတာ...အကယ်၍ ဒီ (၁) မှတ်သာ ကုန်သွားရင် သေဆုံးနိုင်ခြေက အဆမတန် တက်သွားလိမ့်မယ်"
ချန်ချန်ရွှယ်နဲ့ ယှဉ်ရင် ချင်းကျောက်က တော်တော် ကံဆိုးတယ်လို့ ပြောရပေမည်။
သူမက ထူးဆန်းတဲ့ မွေးရာပါ ပါရမီတွေ အများကြီး ရရှိခဲ့ပေမယ့် အသုံးပြုလို့ ရတာက နည်းနည်းလေးပဲ ရှိလေသည်။
ချင်းကျောက် နားမလည်တဲ့ ပါရမီကောင်း တချို့လည်း ပါပေသည်။
သူမ နားမလည်တော့ မရွေးရဲခဲ့တာ ဖြစ်လေသည်။
ပိုင်ယီရဲ့ ကြည့်ရှုသူ ရှုထောင့်ကနေ ဆိုရင် မသေမျိုးကျင့်ကြံခြင်း သရုပ်ဖော် စနစ်ရဲ့ စာသား သတိပေးချက်တွေကို မြင်ရသလို ချင်းကျောက် ဝင်စားမွေးဖွားလာတဲ့ မြင်ကွင်းကိုလည်း မြင်နေရပေသည်။
[အသက် ၀ နှစ် - ချင်းကျောက်ဟာ မသေမျိုးကျင့်ကြံခြင်း ကမ္ဘာတစ်ခုသို့ ဝင်စားခဲ့ပြီး သာမန် မိသားစုတစ်ခုတွင် မွေးဖွားခဲ့သည်။ ကလေးသည် ကျားမ မကွဲပြားကြောင်း လက်သည်က တုန်လှုပ်စွာ တွေ့ရှိလိုက်ရသည်။]
[ချင်းကျောက် မွေးဖွားပြီး မကြာခင်မှာပဲ စကားစပြောခဲ့သည်။ သူမအမေက ဉာဏ်ကြီးရှင်လေး မွေးဖွားခဲ့ပြီဟု ခံစားလိုက်ရသော်လည်း သူမကလေးက ယောကျ်ားလေးလား မိန်းကလေးလား ဆိုတာ မသိပေ။]
[မသေမျိုးကျင့်ကြံသူ တစ်ယောက်က ဒီနေရာကို ဖြတ်သွားရင်း ချင်းကျောက်ရဲ့ အဖေနဲ့ မိတ်ဆွေဖွဲ့ခဲ့သည်။ သူ ထွက်ခွာသွားချိန်မှာ ရွှေအမြုတေ တစ်လုံး ပေးခဲ့သည်။]
[အသက် ၁ နှစ် - သူမ၏ ခန္ဓာကိုယ် တည်ဆောက်ပုံ အနည်းငယ် ပုံမှန်မဟုတ်ကြောင်း ချင်းကျောက် ရုတ်တရက် သဘောပေါက်လိုက်သည်။ သူမ၏ စိတ်အခြေအနေ ပြိုလဲသွားခဲ့သည်]
[စိတ်အခြေအနေ -၁]
[ချင်းကျောက်၏ ဖခင်က သူမကို ရွှေအမြုတေ ပေးခဲ့သော်လည်း ချင်းကျောက်ဟာ မဆင်မခြင် မစားရဲပေ။]
[စိတ်အခြေအနေ +၁]
[အသက် ၂ နှစ် - ဖြစ်နိုင်တာက ကံကောင်းခြင်းနတ်ဘုရားမ ပါရမီရဲ့ အကျိုးသက်ရောက်မှုကြောင့် ချင်းကျောက်ဟာ သိုလှောင်လက်စွပ် တစ်ကွင်း ကောက်ရခဲ့သည်။ သူမ သွေးစက်ချလိုက်ပြီးနောက် အထဲမှာ အဆင့်နိမ့် ဝိညာဉ်အဆောင်တစ်အုပ်နဲ့ ဝိညာဉ်စုစည်းဆေးလုံးပုလင်းအနည်းငယ်ကို တွေ့ရှိခဲ့သည်။]
[ကံတရား +၁]
[အသက် ၃ နှစ် - ချင်းကျောက်ဟာ သူမ၏ မွေးရာပါ ပါရမီကို အခမဲ့ စမ်းသပ်ခွင့် ရရှိလောက်အောင် ကံကောင်းခဲ့သည်။ သူမတွင် ကျင့်ကြံခြင်း ပါရမီ အနည်းငယ် ရှိနေခဲ့သည်။ သိပ်နာမည်မကြီးသော ကျင့်ကြံခြင်း ဂိုဏ်းအသေးစားလေး တစ်ခုက သူမကို ဂိုဏ်းသားအဖြစ် လက်ခံချင်နေခဲ့သည်။]
[အသက် ၄ နှစ် - ချင်းကျောက်ဟာ ဆန်းကြယ်ဆေးဂိုဏ်း၏ တပည့် ဖြစ်လာခဲ့သည်။ သူမသည် အကြီးအကဲ တစ်ဦး၏ တပည့် ဖြစ်လာလောက်အောင် ကံကောင်းခဲ့ပါသည်။]
[...]
...