အခန်း ၂၉ : ဒုတိယမြောက် ရွေးချယ်ခံလူသား ( ၂ )

​ဖြစ်နိုင်တာက ပိုင်ယီက ဘာမကောင်းတဲ့ ရည်ရွယ်ချက်မှ မပြသခဲ့ခြင်း ဒါမှမဟုတ် ဟိုလူ (၃) ယောက်က သူတို့ခွန်အားကို သူတို့ ယုံကြည်လွန်းလို့  ဒါမှမဟုတ် ပိုင်ယီက ကျင်းရှင်း နန်းတော်ကို အမွှန်းတင် ပြောနေလို့ပဲ ဖြစ်ပေလိမ့်မည်။

​သူတို့ (၃) ယောက်နဲ့ စကားပြောနေတုန်း ပိုင်ယီဟာ သတင်းအချက်အလက် တချို့ ရရှိလိုက်၏။ အများစုကတော့ သူ စိတ်မဝင်စားတဲ့ အရာတွေပင်။

​ဒါပေမဲ့ သူတို့ရဲ့ ဂျူနီယာ ညီမလေးနဲ့ ပတ်သက်တဲ့ သတင်းအချက်အလက် တချို့ကိုတော့ သူ ရယူနိုင်ခဲ့လေသည်။

​သူတို့ ဂျူနီယာ ညီမလေးရဲ့ မျိုးရိုးနာမည်က ချင်း ဖြစ်ပြီး နာမည်က ကျောက် ဖြစ်ပေသည်။

​သူမရဲ့ နာမည်က ချင်းကျောက်ပင်။

​သူမက ချန်ချန်ရွှယ်ထက် (၂) နှစ် ငယ်ကာ အသက် (၁၇) နှစ်ပဲ ရှိနေသေးလေသည်။

​ဒါပေမဲ့ အသက်ငယ်လို့ လျှော့တွက်လို့ မရချေ။

​ဘာပဲဖြစ်ဖြစ် သူမက ကျင်းရှင်း နန်းတော်သခင်ကြီးရဲ့ သမီးဖြစ်တာကြောင့် နန်းတော်သခင်ကြီးရဲ့ အရည်အချင်းတွေကို အမွေဆက်ခံထားမှာ သေချာပေသည်။

​ဒီလို ငယ်ရွယ်တဲ့ အသက်အရွယ်မှာတင် သူမဟာ ချီစုစည်းမှု အဆင့် (၁၀) ကို ရောက်နေပြီး ဟိုလူ (၃) ယောက် ပြောပြချက်အရ သူတို့ရဲ့ ဂျူနီယာ ညီမလေးက နန်းတော်သခင်ကြီး ပေးထားတဲ့ အထူး မှော်လက်နက်တွေ၊ တန်ဖိုးရှိတဲ့ ဝိညာဉ်အဆောင်တွေရဲ့ အကူအညီနဲ့ အခြေတည်အဆင့် ကျင့်ကြံသူတွေကိုတောင် ယှဉ်ပြိုင်တိုက်ခိုက်နိုင်သည်တဲ့။

​ဒါကြောင့်ပဲ သူမက ကျင်းရှင်း နန်းတော်ကနေ ခိုးထွက်ရဲတာဖြစ်ပြီး  ဒီအခွင့်အရေးကို သုံးကာ ချန်ချန်ရွှယ်ကို ပြဿနာ လိုက်ရှာချင်နေတာ ဖြစ်လေသည်။

​သူမက လက်စားချေချင်နေတာပင်။

​သူမရဲ့ နာမည်၊ အဆင့်အတန်း၊ ကျင့်ကြံမှုအဆင့် နဲ့ ဇာတ်လမ်းတိုလေး တချို့ကို သိလိုက်ရတာက ပိုင်ယီ အတွက် သူမကို မသေမျိုးကျင့်ကြံခြင်း သရုပ်ဖော် စနစ်ထဲ ဖိတ်ခေါ်ဖို့ လုံလောက်တဲ့ အခြေခံ အချက်အလက်တွေ ဖြစ်နေပေပြီ။

​ဒါပေါ့ ပိုင်ယီ အနေနဲ့ အခုချက်ချင်း သူမကို ခေါ်သွင်းလို့ မရသေးချေ။ အ​ကြောင်းမှာ မသေမျိုးကျင့်ကြံခြင်း သရုပ်ဖော် စနစ်ရဲ့ အချိန်စောင့်ဆိုင်းရမှုက မကုန်ဆုံးသေးပေ။ ဒုတိယမြောက် ရွေးချယ်ခဲတစ်ယောက်ကို ဖိတ်ခေါ်ချင်ရင်တောင် အချိန်စောင်းဆိုင်းရမှု ပြီးတဲ့အထိ စောင့်ရပေအုံးမည်။

​"မိတ်ဆွေ... ခင်ဗျားအတွက်လည်း မလွယ်ကူပါဘူး" အရက်နံ့ နံနေတဲ့ ကျင်းရှင်း နန်းတော်က ကျင့်ကြံသူ တစ်ယောက်က သက်ပြင်းချပြီး ပြောလိုက်၏။ "ဆရာသခင် မရှိဘဲ မသေမျိုးကျင့်ကြံခြင်း ဂိုဏ်းတစ်ခုခုကို မဝင်ဘဲနဲ့ မသေမျိုးကျင့်ကြံခြင်း လမ်းစဉ်ပေါ် အတင်းအဓမ္မ တက်လှမ်းတာက ဘယ်လောက်တောင် ဇွဲလုံ့လနဲ့ သန္နိဋ္ဌာန် လိုအပ်မလဲ..."

​"အကယ်၍ မိတ်ဆွေအနေနဲ့ အသက် (၃၀) မတိုင်ခင် ချီစုစည်းမှု အဆင့် (၅) ကို ရောက်အောင် ချိုးဖျက်ဝင်ရောက်နိုင်ရင် ကျွန်တော်တို့ ခင်ဗျားကို ကျင်းရှင်း နန်းတော်နဲ့ မိတ်ဆက်ပေးပါ့မယ်"

​ပိုင်ယီက ကျေးဇူးတင်တဲ့ မျက်နှာထား လုပ်ပြလိုက်၏။ "ကျေးဇူးတင်ပါတယ်ဗျာ"

​သူတို့ (၃) ယောက်က ချင်းကျောက်ရဲ့ အခြေခံ အချက်အလက်တွေ ဖွင့်ပြောလိုက်လို့ ကျေးဇူးတင်တာလား ဒါမှမဟုတ် သူတို့ (၃) ယောက်က သူ့ကို ကျင်းရှင်း နန်းတော်နဲ့ မိတ်ဆက်ပေးဖို့ ကြိုးစားပေးမယ် ဆိုလို့ ကျေးဇူးတင်တာလား ဆိုတာတော့...

​ပိုင်ယီ တစ်ယောက်တည်းသာ သိပေမည်။

​အချိန်များ ကုန်ဆုံးသွားခဲ့လေသည်။

​ကျင်းရှင်း နန်းတော်က ကျင့်ကြံသူ (၃) ယောက်ဟာတည်းခိုခန်းမှာ ကြာကြာ မနေခဲ့ကြပေ။ သူတို့က သာမန်လောကက ဝိုင်အရသာကို ပြန်လည် ခံစားချင်လို့ ခဏလာခဲ့ကြတာဖြစ်ပြီး သူတို့ ဒီခရီးစဉ်ရဲ့ ရည်ရွယ်ချက်ကို မမေ့ချေ။ ထို့ကြောင့် ပိုင်ယီအား နှုတ်ဆက်ပြီးနောက်မှာ သူတို့ (၃) ယောက် ထွက်ခွာသွားခဲ့ကြသည်။

​ပိုင်ယီဟာ သူ့အိမ်ကို ပြန်ရောက်ပြီးနောက် မသေမျိုးကျင့်ကြံခြင်း သရုပ်ဖော် စနစ်ကို အသုံးပြုလိုက်၏။

​ချင်းကျောက်က မသေမျိုးကျင့်ကြံခြင်း သရုပ်ဖော် စနစ်ရဲ့ အကွာအဝေးထဲမှာ ရှိမရှိ သူ သိချင်နေပေသည်။

​"တွေ့ပြီ..."

​မကြာခင်မှာပဲ ပိုင်ယီဟာ သရုပ်ဖော် စနစ်ဆီကနေ တုံ့ပြန်မှုအား ရရှိလိုက်လေသည်။

​အဲဒီတုန်းက သူ ချန်ချန်ရွှယ်ကို ဖိတ်ခေါ်တုန်းကလည်း ဒီနည်းလမ်းနဲ့ပဲ ဖိတ်ခေါ်ခဲ့တာပင်။

​မသေမျိုးကျင့်ကြံခြင်း သရုပ်ဖော် စနစ်ရဲ့ တခြားသူကို ဖိတ်ခေါ်တဲ့ လုပ်ဆောင်ချက်က ရေဒါတစ်ခုလိုပါပင်။ ကီလိုမီတာ အနည်းငယ် ပတ်လည်အတွင်းရှိ ပိုင်ယီ ရှာချင်တဲ့ လူကို ရှာပေးနိုင်လေသည်။

​တစ်ဖက်လူရဲ့ တည်နေရာ အတိအကျကို မပြသပေမယ့် ပိုင်ယီ အနေနဲ့ တစ်ဖက်လူရဲ့ အသိစိတ်နဲ့ ထူးခြားတဲ့ ဆက်သွယ်မှု တစ်ခု ရယူနိုင်ပေသည်။

​သို့သော် ဒီထူးခြားတဲ့ ဆက်သွယ်မှုက မသေမျိုးကျင့်ကြံခြင်း သရုပ်ဖော် စနစ်ရဲ့ အကူအညီနဲ့မှ ပြုလုပ်လို့ ရပေသည်။

​...

​တစ်ချိန်တည်းမှာပင်။

​ချန်အိမ်တော် အပြင်ဘက်။

​လမ်းမကြီး တစ်လျှောက် စားပွဲဝိုင်းတွေနဲ့ ပြည့်နှက်နေခဲ့သည်။ စည်ကားသိုက်မြိုက်နေတဲ့ လူအုပ်ကြီးဟာ ထူးခြားစွာ သက်ဝင်လှုပ်ရှားနေခဲ့ပြီး မျက်စိတစ်ဆုံး ကြည့်လိုက်ပါက လမ်းတစ်လမ်းတည်းမှာတင် လူထောင်ပေါင်းများစွာ ပြည့်နှက်နေပေသည်။ ဘေးပတ်ဝန်းကျင်က လမ်းတွေမှာလည်း စားပွဲဝိုင်းတွေနဲ့ ပြည့်နေတာ ထည့်မပြောရသေးချေ။

​လမ်းပေါ်မှာ အသားဟင်း ရနံ့တွေ ဝိုင်ရနံ့တွေ မွှေးပျံ့နေခဲ့ပြီး ဒါကို ကြည့်ရင် ချန်မျိုးနွယ်စုက ဒီပွဲကြီး ခမ်းနားအောင် ဘယ်လောက်တောင် ငွေကုန်ကြေးကျ ခံထားလဲ ဆိုတာ သိသာနေလေသည်။

​စားသောက်ပွဲက (၉) ရက်နဲ့ (၉) ည ကြာမည်ဖြစ်ရာ ငွေစ (၁၀,၀၀၀) မက ကုန်နိုင်ပေသည်။

​"တကယ် ဆူညံတာပဲ... ဒါပေမဲ့ ခံစားချက်ကတော့ မဆိုးပါဘူး... ဒါက သာမန်လောကလား"

​"ခြောက်ကပ်နေတဲ့ ကျင်းရှင်း နန်းတော်ထက် အများကြီး ပိုသက်ဝင်လှုပ်ရှားနေတာပဲ.."

​"လူမျိုးစုံ ရှိတာပဲဟေ့"

​လူအုပ်ကြီးထဲမှာ မိန်းကလေး တစ်ယောက်ဟာ လည်ပင်းဆန့်ပြီး ဘယ်ကြည့်လိုက် ညာကြည့်လိုက် လုပ်နေခဲ့ပြီး ဒီနေရာက အရာအားလုံးကို စိတ်ဝင်စားနေပုံ ရလေသည်။

​ဒါပေမဲ့ အံ့သြစရာ ကောင်းတာက ကောင်မလေးရဲ့ ရုပ်ရည်က သိပ်ကို လှပလွန်းနေပေမယ့် ဘေးပတ်ဝန်းကျင်က လူတွေက သူမကို လျစ်လျူရှုထားကြခြင်းပင်။

​ဒါ့အပြင် သူမက လူအုပ်ကြီးထဲ တိုးဝင်သွားတဲ့အခါ  ဘေးနားက လူတွေက အလိုအလျောက် လမ်းဖယ်ပေးခဲ့ကြသည်။

​သူမ ရှိနေမှန်း သိပေမယ့် မမြင်ရသလို ဖြစ်နေခဲ့ကြလေသည်။

​၎င်းက သိပ်ကို ထူးဆန်းလှပေသည်။

​ဒီကိစ္စနဲ့ ပတ်သက်ပြီး ကောင်မလေးက မအံ့သြပဲ သူမဟာ စိတ်လှုပ်ရှားစွာ ရေရွတ်လိုက်၏။ "အစ်ကိုကြီး သန့်စင်ပေးလိုက်တဲ့ ကိုယ်ဖျောက်အဆောင်က တကယ် အံ့သြစရာ ကောင်းတာပဲ... ကံကောင်းလို့ လွန်ခဲ့တဲ့ ရက်အနည်းငယ်က သူ့ဆီကနေ အဆင့်မြင့် ကိုယ်ဖျောက်အဆောင် အနည်းငယ် ခိုးလာလိုက်မိတာ မဟုတ်ရင် ကျင်းရှင်း နန်းတော်ရဲ့ တံခါးမကြီးကနေတောင် ခိုးထွက်လာနိုင်မှာ မဟုတ်ဘူး"

​ကျင်းရှင်း နန်းတော် ဆိုတာ မသေမျိုးကျင့်ကြံခြင်း လောကရဲ့ နာမည်ကြီး ဂိုဏ်းတစ်ခုပင်။ ပုန်းအောင်းနေသော နဂါးများ၊ ဝပ်နေသော ကျားများရှိတဲ့ နေရာလို့ ပြောလို့ရပြီး ကျွမ်းကျင်သူတွေက တိမ်တွေလို များပြားလှပေသည်။

​သူမ ဘယ်လောက်ပဲ ပါရမီကောင်းကောင်း သူမရဲ့ မွေးရာပါ ပါရမီက ဘယ်လောက်ပဲ ကောင်းကင်ဘုံကို အံတုနိုင်ပါစေ သူမရဲ့ အသက်အရွယ်ကြောင့် ကန့်သတ်ချက် ရှိနေတုန်းပင်။ သူမရဲ့ ကျင့်ကြံမှုက ချီစုစည်းမှု အဆင့် (၁၀) ပဲ ရှိသေးလေသည်။

​ချီစုစည်းမှု အဆင့် (၁၀) ကျင့်ကြံသူ တစ်ယောက် အနေနဲ့ သူမရဲ့ အဆင့်အတန်းက နည်းနည်း ထိရှလွယ်ပြီး ထူးခြားနေခဲ့သည်။

​ကျင်းရှင်း နန်းတော်လို နေရာမျိုးကနေ ခိုးထွက်ဖို့ ဆိုတာ တကယ့်ကို ခက်ခဲလေသည်။

​ခြွင်းချက် အနေနဲ့... သူမက ပြင်ပ အရာဝတ္ထု တချို့ကို အသုံးပြုနိုင်ရင်တော့ သိပ်ပြီး မခက်ခဲတော့ပေ။

​ယခု သူမ လုပ်လိုက်သလိုမျိုးပင်။ တွန့်ဆုတ်မနေဘဲ သူမဟာ အစ်ကိုကြီးရဲ့ ဝိညာဉ်အဆောင် အနည်းငယ်ကို ယူလိုက်လေသည်။

​ပြီးတော့ ချင်းဟယ် ခရိုင်ကို လာဖို့ ကျင်းရှင်း နန်းတော်ကနေ ခိုးထွက်ရာမှာ ဒါတွေကို အသုံးပြုခဲ့ပေသည်။

​ရည်ရွယ်ချက်က ရိုးရှင်းပေသည်။ ၎င်းက ဝိညာဉ်ဓားဂိုဏ်းရဲ့ သူတော်စင်မကို ပြဿနာ သွားရှာမလို့ပင်။

​"သုံးနှစ်... ဒီသုံးနှစ်လုံး ငါ ဘယ်လို သည်းခံခဲ့ရလဲ သူသိရဲ့လား... လွန်ခဲ့တဲ့ သုံးနှစ်က ယှဉ်ပြိုင်ပွဲတုန်းက အဲဒီမိန်းမက ငါ့ဆံပင်တွေကို ဓားတစ်ချက်တည်းနဲ့ ဖြတ်ပစ်လိုက်တာ... "

​ကောင်မလေး အံကြိတ်လိုက်၏။ "သူ့ကြောင့် ငါ အရူးလုပ်ခံလိုက်ရတာ... ငါ့ အစ်ကိုကြီးနဲ့ ဒုတိယ အစ်ကိုတို့က အကြာကြီး ဝိုင်းရယ်ကြတာ... ပြီးတော့ အမေကတောင် ငါ့ကို ကောင်းကောင်း မကျင့်ကြံလို့ ဆိုပြီး ဆူပူကြိမ်းမောင်းပြီး တစ်နှစ်လောက် အပြင်မထွက်ရ အမိန့် ပေးလိုက်သေးတယ်"

​"သောက်ကျိုးနည်း ... ချန်"

​"ဒီတစ်ခါတော့ ငါ အခွင့်အရေး ရပြီ... ငါ... ချင်းကျောက်က မင်းကို သေချာပေါက် သင်ခန်းစာ ပေးရမယ်"

​ကောင်မလေးဟာ ကျင်းရှင်း နန်းတော်သခင်ကြီးရဲ့ အငယ်ဆုံးသမီး ချင်းကျောက်ပင်။

​ရုတ်တရက် ချင်းကျောက်ရဲ့ မကျေမနပ် ဖြစ်နေတဲ့ မျက်နှာထား အေးခဲသွားခဲ့သည်။ သူမရဲ့ မျက်နှာက  အကြိမ်ကြိမ် ပြောင်းလဲသွားခဲ့ပြီး သူမရဲ့ မျက်ဝန်းတွေထဲမှာ မယုံကြည်နိုင်မှုတွေ ပြည့်နှက်သွားခဲ့လေသည်။ တစ်ချိန်တည်းမှာပဲ သူမ သတိထားလိုက်ပြီး ထိတ်လန့်သွားခဲ့သည်။ "ဘာဖြစ်တာလဲ... တစ်ယောက်ယောက် ငါ့အသိစိတ်ထဲ ခိုးဝင်လာတာလား"

​သူမဟာ  ခြေလှမ်း ရပ်တန့်သွားပြီး တုန်လှုပ်သွားခဲ့သည်။

​သူမ ခိုးထွက်လာကာစမှာပဲ ဒီလိုကိစ္စမျိုး ကြုံရလိမ့်မယ်လို့ ထင်မထားခဲ့ပဲ  အလစ်အငိုက် မိသွားခဲ့လေသည်။

​ထိုအချိန်၌ သူမရဲ့ အသိစိတ်ထဲမှာ စာသားအနည်းငယ် ပေါ်လာတာကို ရှင်းရှင်းလင်းလင်း 'မြင်' နေခဲ့ရသည်။

​"ဘဝရဲ့ အဓိပ္ပာယ် အစစ်အမှန်ကို နားလည်ချင်သလား...  တကယ် အသက်ရှင်ချင်သလား"

​"နားလည်ချင်ပါတယ်"

​"မနားလည်ချင်ပါ"

..............

​"ဘာကို ဆိုလိုတာလဲ......."

​သူမ အဲဒီစာသားကို လိုက်ရွတ်ရင်း တံတွေး မမျိုချဘဲ မနေနိုင်တော့ပေ။

​'ဖြစ်နိုင်တာက သူမအမေ ကိုယ်တိုင် တောင်အောက်ဆင်းပြီး သူမကို လာဖမ်းတာလား..... ဒါပေမဲ့ ပြန်မဖမ်းခင် သင်ခန်းစာ ပေးတဲ့ အနေနဲ့ နောက်ပြောင်နေတာလား....'

​ဒါမှမဟုတ် တစ်ယောက်ယောက်က သူမကို ကြံစည်နေတာလားပင်။

​'တစ်ယောက်ယောက်က သူမကို ကျင်းရှင်း နန်းတော်ကနေ ထွက်လာအောင် မျှားခေါ်ပြီး အခုမှ လှုပ်ရှားတာလည်း ဖြစ်နိုင်ပေသည်။

​"ရှူး.."

​ချင်းကျောက် လေအေးတစ်ချက် ရှူရှိုက်လိုက်မိ၏။

​သူမ နောင်တရလာခဲ့လေသည်။

​အကြောင်းရင်းက ဘာပဲဖြစ်ဖြစ် သူမ ကိုယ့်ကိုယ်ကိုယ် ဒုက္ခတွင်းထဲ တွန်းပို့လိုက်မိပြီလို့ ခံစားလိုက်ရသည်။ အထူးသဖြင့် သူမကို ကာကွယ်ပေးမယ့် ကျွမ်းကျင်သူ တစ်ယောက်မှ မပါလာခဲ့ပေ။

​သူမရဲ့ ချီစုစည်းမှု အဆင့် (၁၀) ကျင့်ကြံမှုက အားကောင်းတယ် ဆိုပေမယ့် ချင်းဟယ် ခရိုင်မှာ သူမကို နိုင်မယ့်သူ သိပ်မရှိပေမယ့် အခု သူမ ကြုံတွေ့နေရတဲ့ ထူးဆန်းတဲ့ အခြေအနေက ချီစုစည်းမှု အဆင့် (၁၀) ထက် သာလွန်နေတာ သေချာပေသည်။

​ဒါက ချီစုစည်းမှု အဆင့် ကျင့်ကြံသူ တစ်ယောက် လုပ်နိုင်တဲ့ ကိစ္စမျိုး မဟုတ်ချေ။

​'တစ်ဖက်လူက သူမရဲ့ အသိစိတ်ထဲ ဝင်ရောက်နိုင်တယ် ဆိုတော့ အခြေတည်အဆင့်လား...'

​'မဖြစ်နိုင်ဘူး....'

​'ရွှေအမြုတေအဆင့်လား.... မူလဝိညာဉ်အဆင့်လား....'

​"နားမလည်ချင်ပါ" ချင်းကျောက်ဟာ အံကြိတ်ပြီး ရွေးချယ်လိုက်၏။ ဒီအချိန်မှာ သူမ မျှော်လင့်နိုင်တာက တစ်ဖက်လူမှာ သတ်ဖြတ်လိုစိတ် မရှိပါစေနဲ့ ဆိုတာပင်။

​သူမဟာ နားမလည်ချင်ပါကို ရွေးချယ်လိုက်လေသည်။

​နောက်တစ်ခဏတွင် သူမရဲ့ အသိစိတ်ဟာ ရုတ်တရက် ရပ်တန့်သွားပြီး သူမ ဘာမှ မတွေးနိုင်တော့သလိုပင်။

​ထို့နောက် ခဏတာ အတွင်းမှာပဲ သူမဟာ ပျောက်ကွယ်သွားခဲ့လေသည်။

​...