အခန်း ၂၇ : နောက်ဆုံးအပြီးသတ် ဆုလာဘ်၊ သခင်ကြီးချန်၏ မွေးနေ့

​ချန်ချန်ရွှယ် အနေနဲ့ အသက် (၂၉) နှစ်အထိ အသက်ရှင်နိုင်ခဲ့တာကို ပိုင်ယီ အလွန် ကျေနပ်မိခဲ့သည်။ ပြီးခဲ့တဲ့ တစ်ခေါက်က ဆယ်ကျော်သက် အရွယ်မှာတင် သေဆုံးခဲ့တာနဲ့ ယှဉ်ရင် ဒီတစ်ခါ ချန်ချန်ရွှယ်ဟာ အများကြီး တိုးတက်လာခဲ့လေသည်။

​အသက် ၃၀ တွင် အောင်မြင်ခြင်းဆိုတဲ့ မွေးရာပါ ပါရမီကို အသက်ဝင်စေဖို့ သီသီလေး လိုသွားတာကတော့ တော်တော်လေး နှမြောစရာ ကောင်းတာကြောင့် ပိုင်ယီဟာ နောင်တရမိသလို ခံစားလိုက်ရပေသည်။

​ချန်ချန်ရွှယ်သာ နောက်ထပ် ရက်အနည်းငယ်လောက် အသက်ဆက်ရှင်နိုင်ခဲ့ရင် ဒီ ပါရမီ အသက်ဝင်လာတော့မည်ပင်။

​အဲဒီအချိန်ကျရင် ရမယ့် ဆုလာဘ်က သူ့အတွက် ကြည်နူးစရာ ကောင်းတဲ့ အံ့သြမှုကို ယူဆောင်လာပေးနိုင်ပေသည်။

​'နှမြောစရာ ကောင်းလိုက်တာ...'

​ချန်ချန်ရွှယ် အနေနဲ့ သရုပ်ဖော် စနစ်ထဲမှာ အကြိမ်ကြိမ် ကျရှုံးပြီး သေဆုံးခဲ့ရလို့ စိတ်ဒဏ်ရာ တွေ ကျန်ရစ်မလား ဆိုတာကိုတော့...

​"အဟွတ်"

​ဒါက သူ စဉ်းစားရမယ့် ကိစ္စ မဟုတ်ပဲ သူ တာဝန်ယူရမယ့် ကိစ္စ မဟုတ်ချေ။

​ဒီအချိန်မှာပဲ မသေမျိုးကျင့်ကြံခြင်း သရုပ်ဖော် စနစ်ရဲ့ ဆုလာဘ် အသိပေးချက်က သူ့စိတ်ထဲ နောက်ဆုံးတော့ ပေါ်လာခဲ့သည်။

​[သင် ဖိတ်ကြားထားသည့် ကိုယ်စားလှယ်လောင်း ချန်ချန်ရွှယ်ဟာ သရုပ်ဖော် မသေမျိုးကျင့်ကြံခြင်း ဘဝတွင် (၂၉) နှစ်၊ (၁၀) လ နှင့် (၂၁) ရက်တိုင်တိုင် အသက်ရှင် နေထိုင်ခဲ့သည်။ နောက်တစ်ကြိမ် သရုပ်ဖော်မှု မပြုလုပ်မီ (၂၄) နာရီ အချိန်စောင့်ဆိုင်းရပါမည်။]

​[သင်သည် အောက်ပါ ဆုလာဘ်များကို ရရှိလိုက်ပါသည်  ]

​[ဆုလာဘ် ၁ - ချန်ချန်ရွှယ်၏ (၂၉) နှစ်တာ မသေမျိုးကျင့်ကြံခြင်း အတွေ့အကြုံ (သူတော်စင်မ အနှစ်ချုပ်ထားသော တန်ဖိုးရှိသည့် အတွေ့အကြုံများ)]

​[ဆုလာဘ် ၂ - ချီစုစည်းမှု အဆင့် (၄) ဝိညာဉ်စွမ်းအား အားလုံး (သန့်စင်သော ဝိညာဉ်စွမ်းအား )]

​[ဆုလာဘ် ၃ - ဓား (သူတော်စင်မ၏ မွေးရာပါ ပါရမီ)]

​[ကျေးဇူးပြု၍ ဆုလာဘ် တစ်ခုခုကို ရွေးချယ်ပါ]

​"ထပ်ဆောင်း ဆုလာဘ် မပါဘူးလား" ပိုင်ယီ ကြောင်သွားသော်လည်း ချက်ချင်း ပြန်သတိဝင်လာပြီး တစ်စုံတစ်ခုကို ရုတ်တရက် သဘောပေါက်သွားခဲ့သည်။ "ဒီ သရုပ်ဖော် ဘဝမှာ ချန်ချန်ရွှယ်က သိုသိုသိပ်သိပ် နေခဲ့ပုံရတယ်... သူမရဲ့ ကျင့်ကြံခြင်းကို နှောင့်ယှက်မယ့် ဘယ်ကိစ္စမှာမှ မပါဝင်ဘဲ နေခဲ့တာ...  ဒီလို အခြေအနေမျိုးမှာ အောင်မြင်မှုတစ်ခုခု ရဖို့ဆိုတာ သိပ်ခက်ခဲသလို ထပ်ဆောင်း ဆုလာဘ် ပေါ်လာဖို့လည်း ခက်ခဲတာပေါ့"

​မသေမျိုးကျင့်ကြံခြင်း သရုပ်ဖော် စနစ်ရဲ့ ဆုလာဘ် တွက်ချက်မှုက ဘယ်လောက် အသက်ရှင်သလဲ ဆိုတာပေါ် မူတည်ရုံသာမက ဘယ်လို အတွေ့အကြုံတွေ ရခဲ့သလဲ ဆိုတာပေါ်လည်း မူတည်နေပေသည်။

​ချန်ချန်ရွှယ်ရဲ့ စတုတ္ထအကြိမ် သရုပ်ဖော် ဘဝက သဘာဝကျကျ သိပ်စိတ်လှုပ်ရှားစရာ မကောင်းခဲ့ပေ။

​ဘာလို့လဲဆိုတော့ သူမ ကောင်းကင်ဂိုဏ်းထဲ ရောက်သွားပြီးကတည်းက အမြဲတမ်း သီးသန့်သာ နေထိုင်ခဲ့ပြီး အပြင်ထွက်တာလည်း ရှားပါးခဲ့လေသည်။

​သူမ အနေနဲ့ အဖြစ်အပျက် ကြီးကြီးမားမား တစ်ခု ကြုံတွေ့ဖို့ မလွယ်ကူခဲ့ပဲ နောက်ဆုံးမှသာ အကြီးအကဲ ယွဲ့ရဲ့ လုပ်ရပ်တွေကို ဖော်ထုတ်မိသွားပြီး အကြီးအကဲ ယွဲ့ရဲ့ သတ်ဖြတ်ခြင်းကို ခံလိုက်ရခြင်း ဖြစ်ပေသည်။

​ထို့ကြောင့် ရလဒ်ကတော့ ဒီတစ်ခေါက် ဆုလာဘ်တွေက သိပ်မရက်ရောလှပေ။

​ဆုလာဘ်တွေထဲမှာ (၂၉) နှစ်တာ မသေမျိုးကျင့်ကြံခြင်း အတွေ့အကြုံ၊ ချီစုစည်းမှု အဆင့် (၄) ကျင့်ကြံမှု နဲ့ ဓားပါရမီ တို့ ပါဝင်ခဲ့သည်။

​ပိုင်ယီဟာ နည်းနည်း နောင်တရမိသလို ခံစားရပေမယ့် သူ ဘာမှ လုပ်လို့ မရပေ။

​အကယ်၍ ဝိညာဉ်ဓားဂိုဏ်း သူတော်စင်မ အနေနဲ့ သရုပ်ဖော် စနစ်ထဲမှာ ပိုပြီး စိတ်လှုပ်ရှားစရာ ကောင်းတဲ့ ဘဝမျိုး ဖြတ်သန်းချင်တယ် ဆိုရင် လမ်းတစ်ဝက်မှာ ရုတ်တရက် သေဆုံးသွားနိုင်မယ့် ဖြစ်နိုင်ခြေ အဆမတန် များပြားလာပေလိမ့်မည်။ စွမ်းအားကြီးတဲ့ မသေမျိုးကျင့်ကြံသူတွေရဲ့ သတ်ဖြတ်ခြင်းကိုတောင် ခံရနိုင်လေသည်။

​ချန်ချန်ရွှယ်ဟာ အသက် (၂၉) နှစ်အထိ အသက်ရှင်နိုင်ခဲ့တာက ပြဿနာ အားလုံးကို ရှောင်ရှားနိုင်ခဲ့တာကြောင့်ပင်။

​တခြား နည်းလမ်း မရှိပေ။ သရုပ်ဖော် စနစ်က ရက်စက်လေသည်။

​"ငါ နံပါတ် (၃) ကို ရွေးမယ်"

​ဒီဆုလာဘ် (၃) ခုထဲမှာ ပိုင်ယီဟာ တွန့်ဆုတ်နေစရာ မလိုချေ။။

​မသေမျိုးကျင့်ကြံခြင်း အတွေ့အကြုံက သူ့အတွက် သိပ်အသုံးမဝင်သလို ချီစုစည်းမှု အဆင့် (၄) ဝိညာဉ်စွမ်းအား အားလုံးကလည်း မဆိုးဘူး ဆိုပေမယ့် ဒီဝိညာဉ်စွမ်းအားကို သုံးပြီး သူ ချီစုစည်းမှု အဆင့် (၃) ကို တစ်ရှိန်ထိုး ရောက်နိုင်ချင်မှ ရောက်နိုင်မှာ ဖြစ်ပေသည် ။ ဒါပေမဲ့ မွေးရာပါ ပါရမီဓားကတော့ မတူပါချေ။

​သူဟာ ဒီမွေးရာပါ ပါရမီကို သုံးပြီး သူ့ရဲ့ အရည်အချင်းကို အတင်းအဓမ္မ ပြောင်းလဲပစ်နိုင်လေသည်။

​သူ့ရဲ့ မွေးရာပါ အရိုးအခြေခံအုတ်မြစ်ကို ပိုကောင်းအောင် လုပ်နိုင်ပေသည်။

​အကယ်၍ သူ့ရဲ့ မွေးရာပါ အရိုးအခြေခံအုတ်မြစ်ကို အများကြီး တိုးတက်အောင် လုပ်နိုင်ခဲ့ရင် ပြင်ပ အကူအညီ လိုတော့မှာ မဟုတ်ချေ။ သူတော်စင်မအား သူ့ရဲ့ ရွေးချယ်ခံအဖြစ် သုံးစရာ မလိုတော့သလို မသေမျိုးကျင့်ကြံခြင်း သရုပ်ဖော် စနစ်ကို သုံးစရာ မလိုတော့ပဲ သူ့ရဲ့ အရည်အချင်းကို အားကိုးပြီး အဆင့်မြင့်လာအောင် ကျင့်ကြံနိုင်ပေမည်။

​ဒါက အထူး အရေးကြီးလေသည်။

​ထို့နောက် ပိုင်ယီဟာ ဒီဆုလာဘ်ကို ရွေးချယ်လိုက်သည်နှင့် သူ့ခန္ဓာကိုယ်က ပြောင်းလဲသွားတာကို ခံစားလိုက်ရ၏။

​ပိုင်ယီဟာ ဓားထိန်းချုပ်ခြင်း ပညာကို စမ်းသုံးကြည့်လိုက်ရာ အရင်ကထက် ပိုချောမွေ့နေတာကို တွေ့လိုက်ရပေသည်။

​ဝိညာဉ်စွမ်းအားက ပိုင်ဖျင်ဓားကို ပျံသန်းဖို့ လမ်းညွှန်တဲ့အခါ လုံးဝ အဆို့အတား မရှိသလို ခံစားရလေသည်။ ဒီခံစားချက်က အရင်တုန်းကနဲ့ လုံးဝ ကွာခြားနေခဲ့သည်။

​၎င်းက လူတစ်ယောက်က အသုံးမဝင်တဲ့ အသားပို ဂရမ်အနည်းငယ်ကို လှီးထုတ်လိုက်သလိုပင်။

​'ဟုတ်တယ်..သိပ်ကောင်းတယ်..'

​...

​ချန်အိမ်တော်။

​ချန်ချန်ရွှယ်ဟာလည်း သူမရဲ့ ဆုလာဘ်ကို လက်ခံရရှိပြီးပြီ ဖြစ်၏။ ဆုလာဘ် (၃) ခုထဲက တစ်ခု ရွေးချယ်ခွင့် ရှိတဲ့ ပိုင်ယီနဲ့ မတူဘဲ သူမမှာတော့ ဆုလာဘ် တစ်ခုတည်းသာ ရှိလေသည်။ အဲဒါကလည်း အရည်အသွေး နိမ့်တဲ့ ဗားရှင်းသာ ဖြစ်ပေသည်။ ပိုင်ယီ ရရှိတဲ့ ဆုလာဘ်၏ အဆင့်အတန်းနဲ့ ယှဉ်လို့ မရနိုင်ပေ။

​ဒါပေါ့ သူမက ဒီအကြောင်း ဘာမှ မသိတဲ့အတွက် မကျေမနပ် ဖြစ်တာမျိုး မရှိခဲ့ပေ။

​သူမ ရရှိတဲ့ ဆုလာဘ်က တကယ် ညံ့ဖျင်းတယ်လို့သာ ခံစားရတာက သူမ အပြစ်ပင်။ ဒီတစ်ခါ သရုပ်ဖော် စနစ်ထဲမှာ သူမရဲ့ စွမ်းဆောင်ရည် သိပ်မကောင်းခဲ့တာကြောင့်ပင်။

​ဒါတွေအားလုံးက သူမ အပြစ်တွေဖြစ်ပြီး တခြားသူတွေနဲ့ မဆိုင်ချေ။

​"ဓားလမ်းစဉ်ကို ဉာဏ်အလင်းပွင့်ဖို့ အခွင့်အရေး တစ်ကြိမ်..." ဒီတစ်ခါ ရရှိတဲ့ ဆုလာဘ်ကို ကြည့်ပြီး ဆုလာဘ်က ဘယ်လောက် ကောင်းတယ် ဆိုတာ ချန်ချန်ရွှယ် မပြောနိုင်ခဲ့ပေ။ ဘာပဲဖြစ်ဖြစ် သူမရဲ့ ထူးကဲတဲ့ ပါရမီနဲ့ ဆိုရင် ဓားလမ်းစဉ်ကို ရံဖန်ရံခါ ဉာဏ်အလင်းပွင့်တာက ပုံမှန်ပင်။

​ဒါပေမဲ့ သူမ ညည်းညူလို့ မရပေ။ အ​ကြောင်းမှာ  သာမန် မသေမျိုးကျင့်ကြံသူတွေ အတွက်တော့ ဓားလမ်းစဉ်ကို တစ်ကြိမ် ဉာဏ်အလင်းပွင့်ရတာက အချိန်အကြာကြီး စိတ်လှုပ်ရှားစေဖို့ လုံလောက်နေပေပြီ။

​ချန်ချန်ရွှယ်ဟာ မျက်လုံးတွေကို ဖြည်းဖြည်းချင်း မှိတ်လိုက်၏။ ဒီအခိုက်အတန့်မှာ သူမရဲ့ ဓားလမ်းစဉ် နားလည်သဘောပေါက်မှုက ပိုမို နက်ရှိုင်းလာခဲ့သည်။

​ဓားလမ်းစဉ်ကို အပြည့်အဝ ဉာဏ်အလင်းပွင့်ဖို့ (၂) နာရီ ကြာသွားခဲ့သည်။

​ထို့နောက်သူမဟာ သက်ပြင်းတစ်ချက် ချလိုက်၏။

​"မသေမျိုးကျင့်ကြံခြင်း သရုပ်ဖော် စနစ်က တကယ် အံ့သြစရာ ကောင်းတာပဲ... ဓားလမ်းစဉ် ဉာဏ်အလင်းပွင့်တာကိုတောင် ဆုလာဘ် အနေနဲ့ ပေးနိုင်တယ်... ဒါက တကယ်တမ်း ဘာအရာကြီးလဲ မသိဘူး.... ဉာဏ်အလင်းပွင့်ခြင်းကို တခြားသူဆီ ပေးလို့ ရသလား... တကယ် ယုံကြည်နိုင်စရာ မကောင်းဘူးပဲ.."

​သူမဟာ မသေမျိုးကျင့်ကြံခြင်း သရုပ်ဖော် စနစ်၏ အံသြစရာကောင်းမှုတို့အား နောက်တစ်ကြိမ် ကိုယ်တိုင် ကြုံတွေ့လိုက်ရပြီး အံ့ဖွယ်ကောင်းလှပေသည်။

​အံ့သြတာ အပြင် ချန်ချန်ရွှယ်ဟာ စိတ်လှုပ်ရှားစွာ သက်ပြင်းချလိုက်မိ၏။ သူမဟာ မသေမျိုးကျင့်ကြံခြင်း သရုပ်ဖော် စနစ်ရဲ့ လျှို့ဝှက်ချက် အားလုံးကို ရှာဖွေဖော်ထုတ်ချင်နေမိခဲ့သည်။

​ဒါပေမဲ့... သူမမှာ ဒီလိုအတွေးမျိုး ရှိနေမှန်း သတိထားမိလိုက်တဲ့ အခါ... သူမက ကျယ်ပြန့်လှတဲ့ ကြယ်တာရာ စကြဝဠာကြီးကို မော့ကြည့်နေသလို ခံစားလိုက်ရလေသည်။

​စကြဝဠာရဲ့ လျှို့ဝှက်ချက်ကို စူးစမ်းရှာဖွေချင်နေသလိုပင်။ ဒါက မသေမျိုးတွေနဲ့ နတ်ဘုရားတွေရဲ့ လျှို့ဝှက်ချက်ဖြစ်ကာ သူမဟာ ကိုယ့်အင်အားကိုယ် နားမလည်ဘဲ ရဲတင်းလွန်းနေတာကို တွေးမိပြီး ကိုယ့်ကိုယ်ကိုယ် မရယ်ဘဲ မနေနိုင်တော့ပေ။

​"ငါက အကြီးအကဲ တစ်ယောက်ကိုတောင် တစ်လလောက် ကိုင်တွယ်နိုင်စွမ်း မရှိဘူး... သူက ငါ့ကို အကြာကြီး အရူးလုပ်ထားခဲ့တာ... ငါက ဘယ်လိုလုပ် မသေမျိုးကျင့်ကြံခြင်း သရုပ်ဖော် စနစ်ရဲ့ လျှို့ဝှက်ချက်ကို စူးစမ်းရှာဖွေဖို့ အရည်အချင်း ရှိမှာလဲ"

​သူမ ခေါင်းခါလိုက်၏။

​...

​အချိန်များ ကုန်ဆုံးသွားခဲ့ပြီး နောက်တစ်နေ့သို့ လျင်မြန်စွာ ရောက်ရှိလာခဲ့သည်။

​ဒီနေ့ ချန်အိမ်တော်က အလွန် သက်ဝင်လှုပ်ရှားနေတယ်လို့ ပြောလို့ရပေသည်။ ဂုဏ်သရေရှိ ဧည့်သည်တော် အမျိုးမျိုး ရောက်ရှိလာကြပြီး အိမ်တော်ထဲမှာ အစေခံတွေက တစ်ယောက်ပြီး တစ်ယောက် ဝင်ထွက်သွားလာနေခဲ့ကြသည်။ သူတို့ဟာ အလုပ်ရှုပ်လွန်းလို့ ချွေးတွေ ရွှဲနေပေမယ့် အနားမယူရဲကြပေ။

​ဧည့်သည်တွေ ဘာတွေ တွေးနေကြလဲ မသိရပေမဲ့ အနည်းဆုံး အပေါ်ယံမှာတော့ သူတို့အားလုံး အပြုံးကိုယ်စီနဲ့ မွေးနေ့လက်ဆောင် အမြောက်အမြားအား  သယ်ဆောင်လာခဲ့ကြသည်။

​ဒီနေ့က ချန်မျိုးနွယ် သခင်ကြီးရဲ့ အသက် (၉၀) ပြည့် မွေးနေ့ပွဲ ကျင်းပတဲ့ နေ့ပင်။

​ဧည့်သည်တွေ အားလုံး သိထားတာက ချန်မျိုးနွယ်စုရဲ့ မြေးမလေးဟာလည်း စားသောက်ပွဲမှာ ပေါ်လာလိမ့်မယ် ဆိုတာပင်။

​ဒါက ဝိညာဉ်ဓားဂိုဏ်းရဲ့ သူတော်စင်မဖြစ်ကာ သူတို့ အနေနဲ့ ဒီသူတော်စင်မနဲ့ စကားပြောခွင့် မရှိရင်တောင် သူမရဲ့ လှပတဲ့ မျက်နှာလေးကို မြင်လိုက်ရရုံနဲ့... ဒီဘဝမှာ နောင်တရစရာ မရှိတော့ပေ။

​"အဖေ... ဘာလို့ အဲဒီ သူတော်စင်မကို မမြင်ရသေးတာလဲ" လီမျိုးနွယ်စု ခေါင်းဆောင် လီဟယ်ရှန်းရဲ့ သားကြီးက ငယ်ရွယ်တဲ့သူ မဟုတ်တော့ပေ။ ဒါပေမဲ့ သူက လူငယ်လေး တစ်ယောက်လို ဘယ်ကြည့်လိုက် ညာကြည့်လိုက် လုပ်နေခဲ့ပြီး မျက်နှာကလည်း စိတ်မရှည်တဲ့ပုံ ပေါက်နေခဲ့သည်။

​လီဟယ်ရှန်းက သူ့သားကြီးကို အပြစ်မတင်ပေ။ ဘာလို့လဲဆိုတော့ သူလည်း အဲဒီ သူတော်စင်မနဲ့ တွေ့ချင်နေတာကြောင့်ပင်။

​လီမျိုးနွယ်စုက ဝိညာဉ်ဓားဂိုဏ်းထဲမှာ အဆက်အသွယ်တချို့ ရှိတယ် ဆိုပေမယ့် ချန်ချန်ရွှယ်နဲ့ ယှဉ်လိုက်ရင်... အဲဒီ အဆက်အသွယ် ဆိုတာတွေက သိပ်အပေါ်ယံ ဆန်လွန်းပေသည်။

​လီဟယ်ရှန်း အသံနှိမ့်ပြီး ပြောလိုက်၏။ "စိတ်မပူပါနဲ့ ဒီနေ့က သခင်ကြီး ချန်ရဲ့ မွေးနေ့ပဲ။ အဲဒီ သူတော်စင်မ သေချာပေါက် ပေါ်လာမှာပါ"

​...