အခန်း ၂၆ : ချီစုစည်းမှု စတုတ္ထအဆင့်၊ သေဆုံးခြင်း

​မွေးရာပါ ပါရမီ (၂) ခုကို အစားထိုးပြီးကတည်းက တစ်နှစ်လုံးလုံး ကြာသွားခဲ့ပေမဲ့ ချန်ချန်ရွှယ် အနေနဲ့ သူမခန္ဓာကိုယ်မှာ ဘာပြောင်းလဲမှုမှ မရှိဘူးလို့ ခံစားခဲ့ရသည်။

​ဒါကိုလည်း သူမ နားလည်ပေသည်။

​ဘာပဲဖြစ်ဖြစ် ပါရမီအသစ် (၂) ခုက သူမရဲ့ ရုပ်ပိုင်းဆိုင်ရာ ခန္ဓာကိုယ်နဲ့ မသက်ဆိုင်ပဲ အချိန် နောက်ပြန်လှည့်ခြင်းဆိုတာက ဖြစ်နိုင်ခြေနဲ့ ဆိုင်တဲ့ ပါရမီအသစ် တစ်ခုပင်။ ဘယ်အချိန်ကျမှ အလုပ်ဖြစ်မလဲ ဘယ်သူမှ မသိနိုင်ချေ။

​အသက် ၃၀ တွင် အောင်မြင်ခြင်းကတော့ ပြောနေစရာပင် မလိုပါပေ။

​နာမည်အတိုင်းပင် အဲဒီအသက် မရောက်မချင်း ဒီပါရမီက အသုံးဝင်မည်မဟုတ်ပေ။

​အခုတော့... ဒီပါရမီကို အလုပ်ဖြစ်ဖို့ အနည်းဆုံး (၉) နှစ်လောက် သူမ ထပ်စောင့်ရပေအုံးမည်။

​ဒီအရေးကြီးတဲ့ (၉) နှစ်တာ ကာလကို အေးအေးဆေးဆေး ဖြတ်သန်းနိုင်ဖို့အတွက် ချန်ချန်ရွှယ်ဟာ ဂိုဏ်းအပြင်ထွက်ပြီး အတွေ့အကြုံ ရှာဖွေရမယ့် အခွင့်အလမ်း အားလုံးကို စွန့်လွှတ်လိုက်၏။ ယှဉ်ပြိုင်တဲ့ သဘောဆောင်တဲ့ ဂိုဏ်းတွင်း ပြိုင်ပွဲတွေမှာလည်း သူမဟာ ဝင်ရောက် မယှဉ်ပြိုင်ခဲ့ပါပေ။

​တစ်ချိန်တည်းမှာပဲ သူမ မသိတဲ့ လူတွေနဲ့ ထိတွေ့ဆက်ဆံတာဟာ အလွန် နည်းပါးပြီး သူမ အိမ်တွင်းအောင်း တစ်ယောက်ဖြစ်သွားပြီလို့ ပြောလို့ရပေသည်။

​ချန်ချန်ရွှယ်ဟာ ကောင်းကင်ဂိုဏ်းထဲမှာ နေခဲ့တာ တော်တော်ကြာပြီ ဖြစ်ပေမယ့် သူမ သိတာဆိုလို့ (၃) ယောက်ပဲ ရှိလေသည်။

​တစ်ယောက်က ထူးဆန်းတဲ့ အကြောင်းပြချက်တွေနဲ့ သူမကို ချဉ်းကပ်ချင်နေတဲ့ ဂျူနီယာ ညီမလေး ဟိုရင်းယွမ်ဖြစ်ကာ ကျန်တဲ့ (၂) ယောက်က အကြီးအကဲ ယွဲ့ နဲ့ ကောင်းကင်ဂိုဏ်းရဲ့ ဂိုဏ်းချုပ်ကြီးပင်။

​ဒီ (၃) ယောက်ကိုပဲ သူမ သိပေသည်။

​ကျန်တဲ့လူတွေကိုတော့... နာမည် သိရင်တောင် သူမ အထူးတလည် မှတ်မထားပေ။

​အဘယ်ကြောင့်ဆိုသော် မလိုအပ်၍ပင်။ ဘာပဲဖြစ်ဖြစ် အဲဒီလူတွေနဲ့ သူမ ဆက်သွယ်စရာ အကြောင်းမှ မရှိတာကြောင့် မှတ်ထားစရာလည်း မလိုဘူးချေ။

​ဒါက သူမဟာ နှစ်ပေါင်းများစွာ အေးအေးချမ်းချမ်း နေထိုင်နိုင်ပြီး အန္တရာယ် အမျိုးမျိုးကို နည်းလမ်းပေါင်းစုံနဲ့ ရှောင်ရှားကာ မသေမျိုးကျင့်ကြံခြင်း သရုပ်ဖော် စနစ်ထဲမှာ ပိုအသက်ရှည်ရှည် နေနိုင်အောင် ကြိုးစားနေခြင်းပင်။

​[အသက် ၂၁ နှစ် - သင်သည် ဂိုဏ်းတွင်း ပြိုင်ပွဲ ဝင်ရောက် ယှဉ်ပြိုင်ရန် ငြင်းဆန်ခဲ့ပြီး ကျင့်ကြံရာ နေရာတစ်ခုတွင် သီးသန့်ကျင့်ကြံရန် ရွေးချယ်လိုက်ပါသည်။ သင့်ကျင့်ကြံမှု တိုးတက်လာပြီး ဓားကျင့်စဉ် အပေါ် နားလည်သဘောပေါက်မှု ပိုမို နက်ရှိုင်းလာခဲ့သည်။]

​[အသက် ၂၂ နှစ် - သင့် ဂျူနီယာ ညီမလေးဟာ အတွေ့အကြုံ သင်ယူဖို့ အပြင်ထွက်စဉ် ပြင်းထန်စွာ ဒဏ်ရာရလာခဲ့သည်။ ကံကောင်းစွာဖြင့် သူမသည် နတ်ဘုရား လွှတ်မြောက်ခြင်းအင်းကို အချိန်မီ အသုံးပြုပြီး လွတ်မြောက်လာနိုင်ခဲ့သည်။ စိုးရိမ်ပူပန်မှုကြောင့် သင်ဟာ သူမအား အချိန်တစ်ခုအထိ ပြုစုစောင့်ရှောက်ပေးခဲ့သည်။]

​[အသက် ၂၃ နှစ် - သင့်၏ ချီကြောများ အနည်းငယ် ဖောင်းကားလာသည်ကို ခံစားလိုက်ရသော်လည်း ချီစုစည်းမှု အဆင့် (၄) သို့ ချိုးဖျက်ဝင်ရောက်ရန် အချိန်ကောင်း မဟုတ်သေးဟု သင် ယူဆလိုက်သည်။]

​[အသက် ၂၄ နှစ် - မိစ္ဆာဂိုဏ်းထံ အညံ့ခံခဲ့သော မသေမျိုးအဖြစ် တက်လှမ်းခြင်း ဂိုဏ်းဟာ ဖြောင့်မတ်သော မသေမျိုးကျင့်ကြံခြင်း ဂိုဏ်း အများအပြား၏ ချေမှုန်းဖျက်ဆီးခြင်းကို ခံလိုက်ရလေသည်။ သတင်း ကြားလိုက်ရသောအခါ သင့်စိတ်အခြေအနေက အနည်းငယ် ရှုပ်ထွေးသွားခဲ့သည်။ ဘာပဲဖြစ်ဖြစ် သင်ဟာ မသေမျိုးအဖြစ် တက်လှမ်းခြင်း ဂိုဏ်းမှာ အချိန်တစ်ခုလောက် နေခဲ့ဖူး​တာကြောင့်ပင်။]

​[အသက် ၂၅ နှစ် - သင့်ဟာ ဂျူနီယာ ညီမလေး၏ ပါရမီက အံ့သြဖွယ်ကောင်းကြောင်း  တွေ့ရှိလိုက်ရသည်။ သူမ၏ ကျင့်ကြံမှုအဆင့်သည် သင့်ကို ကျော်တက်လုနီးပါး ဖြစ်နေခဲ့လေသည်။ ထို့ကြောင့် သင် အနည်းငယ် စိုးရိမ်လာခဲ့သည်။]

​[အသက် ၂၆ နှစ် - သင်သည် ချီစုစည်းမှု အဆင့် (၄) သို့ ချိုးဖျက်ဝင်ရောက်ရန် ကြိုးစားလိုက်သည်။ အောင်မြင်သည်။ သင်သည် ချီစုစည်းမှု အဆင့် (၄) ကျင့်ကြံသူ တစ်ဦး ဖြစ်သွားပါပြီ]

​[မကြာသေးမီက အကြီးအကဲ ယွဲ့ ၏ မျက်နှာအဆင်း သိပ်မကောင်းလှကြောင်း သင် တွေ့ရှိလိုက်ရသည်။]

​[အသက် ၂၇ နှစ် - ဂျူနီယာ ညီမလေး ဟိုရင်းယွမ် ပျောက်ကွယ်သွားသည်မှာ တစ်နှစ် ရှိပြီဖြစ်ရာ အကြီးအကဲ ယွဲ့ကို မေးကြည့်သောအခါ သူမ ကောင်းကောင်း ဖြေရှင်းချက် မပေးနိုင်ပေ။ ထို့ကြောင့် တစ်ခုခု မှားယွင်းနေကြောင်း သင် ခံစားလိုက်ရလေသည်။ သင့် ဂျူနီယာ ညီမလေး တစ်ခုခု ဖြစ်သွားပြီ ဖြစ်ဖို့ များပေသည်။ ဒ့ါကြောင့် သင်ဟာ တိတ်တဆိတ် စုံစမ်းရန် ဆုံးဖြတ်လိုက်သည်။]

​[သဲလွန်စ အချို့ကို သင် တွေ့ရှိလိုက်ရပါသည်။]

​[အသက် ၂၈ နှစ် - ဂျူနီယာ ညီမလေး ပေါ်မလာသေးပေ။ သူမ တစ်ခုခု ဖြစ်သွားပြီ ဆိုတာ သင် သေချာနေခ​ြ့သည်။ အကြီးအကဲ ယွဲ့ ဟာ တစ်ခုခု သိနေရပေမည်။]

​[သဲလွန်စ အချို့ကို သင် တွေ့ရှိလိုက်ရသည်။]

​[လွန်ခဲ့သော (၂) နှစ်တာ ကာလအတွင်း သင် စုဆောင်းရရှိခဲ့သော သဲလွန်စများ အပေါ် အခြေခံ၍  သင်ဟာ တုန်လှုပ်ဖွယ်ရာ လျှို့ဝှက်ချက် တစ်ခုကို ရှာဖွေတွေ့ရှိလိုက်ရသည်။ သင့်ကျောရိုးတစ်လျှောက် စိမ့်ခနဲ ဖြစ်သွားသော်လည်း တကယ်တမ်း ယုံကြည်ရ ခက်ခဲနေသည်။]

​[အသက် ၂၉ နှစ် - အားနည်းပြီး စိတ်ဓာတ်ကျနေသော အကြီးအကဲ ယွဲ့ ကိုယ်တိုင် ရောက်လာခဲ့သည်။ သင် ဘာတွေ စုံစမ်းနေတယ် ဆိုတာ သူမ သိပုံရသလို သင် ဘာတွေ သိပြီးသားလဲ ဆိုတာကိုလည်း သိနေခဲ့သည်။ သူမ အားလုံးအား ဖွင့်ပြောပြခဲ့လေသည်။ ]

​[ဟိုရင်းယွမ်ကို တပည့်အဖြစ် လက်ခံရခြင်း အကြောင်းရင်းမှာ အကြီးအကဲ ယွဲ့ဟာ လျှို့ဝှက်နည်းလမ်းတစ်ခုကို ကျင့်ကြံနေပြီး ယဇ်ပူဇော်ရန် အဖြစ် အသုံးပြုရန် အထူးခန္ဓာကိုယ်ဖွဲ့စည်းပုံတစ်ခု လိုအပ်သောကြောင့် ဖြစ်သည်။ သို့မဟုတ်ပါက သူမ၏ ခန္ဓာကိုယ်သည် ကြီးမားသော တန်ပြန်မှုကို ခံစားရမည် ဖြစ်ပြီး ဟိုရင်းယွမ်၌ ထိုခန္ဓာကိုယ်ဖွဲ့စည်းပုံ ရှိနေပေသည်။]

​[သင့်အား တပည့်အဖြစ် လက်ခံရခြင်း အကြောင်းရင်းမှာ ဟိုရင်းယွမ်ကို စိတ်တည်ငြိမ်စေရန် ဖြစ်သည်။ ယခင်က လျှို့ဝှက်နည်းလမ်း ကျင့်ကြံခြင်းမှ တန်ပြန်မှုကို ခံစားလိုက်ရသဖြင့် တန်ပြန်မှုကို ဖြေရှင်းရန်အတွက် ဟိုရင်းယွမ်၏ အထူးခန္ဓာကိုယ်ဖွဲ့စည်းပုံကို အသုံးပြုရုံမှတပါး အခြားရွေးချယ်စရာ မရှိခဲ့ပေ။]

​[သင် ရှာဖွေတွေ့ရှိနိုင်လိမ့်မည်ဟု သူမ ထင်မထားခဲ့ပေ။ အမှန်တရားနှင့် အလွန် နီးစပ်နေပြီ ဖြစ်၏။ ထို့ကြောင့် အကြီးအကဲ ယွဲ့ အနေနှင့် သင့်အား ဖုံးကွယ်ထားရန် မလိုအပ်တော့ဟု ခံစားခဲ့ရသည်။]

​[ယခု သင် သိသွားပြီ ဖြစ်၍ သင် ဆက်လက် အသက်ရှင်နေရန် မလိုအပ်တော့ဟု အကြီးအကဲ ယွဲ့ ခံစားခဲ့ရသည်။]

​[သင် သေဆုံးသွားပါပြီ]

​[သင်၏ အသက်မှာ (၂၉) နှစ်၊ (၁၀) လ နှင့် (၂၁) ရက် ဖြစ်သည်။]

​"ဘုန်း.."

​သတင်းအချက်အလက် အမြောက်အမြား သူမခေါင်းထဲ ပေါက်ကွဲသွားခဲ့သည်။ ဒေါသတွေက မသေမျိုးကျင့်ကြံခြင်း သရုပ်ဖော် စနစ်ထဲမှာ ကျန်ရစ်ခဲ့ပြီ ဖြစ်ပေမယ့် ချန်ချန်ရွှယ်ရဲ့ ရင်ထဲမှာ ရှိနေဆဲ ဖြစ်တာကြောင့် သူမရဲ့ မျက်နှာထား မည်းမှောင်အုံ့မှိုင်းနေခဲ့လေသည်။

​သရုပ်ဖော် စနစ်ထဲက ဇာတ်ကောင်တွေ အားလုံးက တကယ် မရှိဘူးလို့ သူမရဲ့ ယုတ္တိကျတဲ့ တွေးခေါ်မှုက ပြောနေခဲ့ပေသည်။

​ဒါပေမဲ့ အဲဒီ အတွေ့အကြုံတွေက သူမကို ပြောပြနေတာကတော့... သရုပ်ဖော် စနစ်ထဲမှာ သူမ သိကျွမ်းခဲ့တဲ့ လူတွေ တစ်ယောက်ချင်းစီမှာ ထင်ရှားတဲ့ ကိုယ်ရည်ကိုယ်သွေး ကိုယ်စီ ရှိကြတယ် ဆိုတာပင်။

​သူတို့ တစ်ယောက်ချင်းစီမှာ အသားနဲ့ သွေးနဲ့ ရှိကြလေသည်။

​သူတို့က အရုပ်တွေနဲ့ လုံးဝ မတူချေ။

​(၂၉) နှစ်ကျော် ကြာပြီးတဲ့နောက် စတုတ္ထအကြိမ် မသေမျိုးကျင့်ကြံခြင်း သရုပ်ဖော်မှုမှာ သူမ အတော်လေး အသားကျနေပြီ ဖြစ်သလို ကိုယ်ပိုင် ခံစားချက်တွေ အများကြီး ရောနှောပါဝင်နေခဲ့ပေပြီ။

​သူမ သေချာပေါက် သေဆုံးရမယ် ဆိုတာ သူမ သိပေသည်။ မသေမျိုးကျင့်ကြံခြင်း သရုပ်ဖော် စနစ်က သူမကို အေးအေးဆေးဆေး ကျင့်ကြံခွင့်ပေးမှာ မဟုတ်သလို ပြီးခဲ့တဲ့ အကြိမ်တွေတုန်းကလည်း ဒီလိုပဲ ဖြစ်ခဲ့တာကြောင့်ပင်။

​ဒါပေမဲ့ စတုတ္ထအကြိမ် သရုပ်ဖော်မှုမှာ ဒီလိုပုံစံနဲ့ ပြီးဆုံးသွားလိမ့်မယ်လို့ သူမ ထင်မထားခဲ့ချေ။

​ဟိုရင်းယွမ်...

​အကြီးအကဲ ယွဲ့...

​ဒီလူတွေက စတုတ္ထအကြိမ် သရုပ်ဖော် ဘဝမှာ ချန်ချန်ရွှယ်နဲ့ ရင်းနှီးခဲ့တဲ့ သူတွေပင်။ ဟိုရင်းယွမ် အပေါ်ထားတဲ့ သူမရဲ့ ခံစားချက်က အစ်မတစ်ယောက်က ညီမလေးတစ်ယောက်ကို ဆက်ဆံသလိုပင်။ အကြီးအကဲ ယွဲ့ ကိုလည်း ဆွေမျိုးတစ်ယောက်လို လူကြီးမိဘ တစ်ယောက်လို သဘောထားခဲ့လေသည်။

​ဒါပေမဲ့ သူမ ဂရုစိုက်တဲ့ လူနှစ်ယောက်ထဲက တစ်ယောက်က သူမကို သစ္စာဖောက်လိမ့်မယ်လို့ ထင်မထားခဲ့ချေ။

​ပိုမှန်အောင် ပြောရရင် တစ်ဖက်လူက သူမကို ဘယ်တုန်းကမှ အလေးအနက် မထားခဲ့ပဲ သူမကသာ တစ်ဖက်လူကို သိပ်ကောင်းတဲ့ လူကြီးမိဘ တစ်ယောက်လို့ ရိုးရိုးသားသား ထင်ခဲ့မိတာ ဖြစ်ပေသည်။

​တစ်ချိန်တည်းမှာပဲ... သူမ ဂရုစိုက်တဲ့ နောက်တစ်ယောက်ကလည်း သူမ အလွန် လေးစားရတဲ့ ဒီအကြီးအကဲရဲ့ လက်ချက်နဲ့ သေဆုံးသွားခဲ့ရသည်။

​"ဟူး"

​သူမဟာ သက်ပြင်း လေးလေးတစ်ချက် ချလိုက်သည်။ ရင်ထဲက မည်းမှောင်နေတဲ့ ခံစားချက်တို့ကိုတော့ ဘယ်လိုမှ ဖယ်ရှားလို့ မရနိုင်သေးပေ။

​သူမရဲ့ ဘဝတစ်ခုချင်းစီက အလောတကြီး ပြီးဆုံးသွားတဲ့ ဇာတ်လမ်းတစ်ပုဒ်လို ဖြစ်နေပြီး ဇာတ်ကွက် မပြည့်စုံဘူးလို့ ချန်ချန်ရွှယ် ခံစားနေခဲ့ရသည်။

​အချိန်တိုင်း သူမ အလစ်အငိုက် မိသွားပြီး အချိန်တိုင်း သူမအတွက် မျက်စိပွင့်စရာ ဖြစ်ခဲ့ရသည်။

​ကျင့်ကြံခြင်း လောကရဲ့ အန္တရာယ် အမျိုးမျိုးလိုပါပင်။

​ဒီအန္တရာယ်တွေကို သူမဆီ တစ်ခုပြီး တစ်ခု ပို့ဆောင်ပေးနေတာက လက်ခံဖို့ ခက်ခဲပေသည်။

​သူမရဲ့ အတွေးတွေဟာ  ရှုပ်ထွေးနေခဲ့၏။

​"ဝမ်းသာစရာ ကောင်းတဲ့ တစ်ခုတည်းသော အရာကတော့... ဒီတစ်ခါ ငါ အသက် (၂၉) နှစ်အထိ နေခဲ့ရတာပဲ... ပြီးတော့ ငါ့ကျင့်ကြံမှုက ချီစုစည်းမှု အဆင့် (၄) ကို ရောက်ခဲ့တယ်... ဒါပေမဲ့... ငါ ဘာလို့ မပြုံးနိုင်ရတာလဲ.... ငါ ဘာလို့ မပျော်ရတာလဲ"

​ချန်ချန်ရွှယ် ရေရွတ်လိုက်၏။ "ဒီလောက် နှစ်တွေအကြာကြီး စောင့်နေတာတောင် အချိန် နောက်ပြန်လှည့်ခြင်းပါရမီက အလုပ်မဖြစ်ခဲ့ဘူးပဲ... အသက် ၃၀ တွင် အောင်မြင်ခြင်း ပါရမီကျတော့လည်း နည်းနည်းလေးပဲ လိုတော့တာကို"

​"မသေမျိုးကျင့်ကြံခြင်း သရုပ်ဖော် စနစ်က ငါ့ကို သီးသန့် ပစ်မှတ်ထားနေတာလားပဲ"

​"ဒါမှမဟုတ်..."

​"မသေမျိုးကျင့်ကြံသူ ဘဝကို သရုပ်ဖော်တိုင်း ငါက သရုပ်ဖော် စနစ်ရဲ့ ပစ်မှတ် ဖြစ်နေတာလား"

​"..."

​အကယ်၍ ချန်ချန်ရွှယ် ရင်ထဲက နာကြည်းမှုတွေသာ အစစ်အမှန် ဖြစ်လာမယ် ဆိုရင် ဒီရေလှိုင်းကြီး အဖြစ် ပြောင်းလဲသွားပြီး ချန်အိမ်တော် တစ်ခုလုံးကို နစ်မြုပ်သွားစေလောက်ပေသည်။

​သူမ ဘယ်လောက်ပဲ ဒေါသထွက်ထွက်၊ နာကြည်းနာကြည်း အသုံးမဝင်ဘူး ဆိုတာ သူမ သိပေသည်။

​သူမ လုပ်နိုင်တဲ့ တစ်ခုတည်းသော အရာက စောင့်ဆိုင်းဖို့ပင်။

​(၁၂) နာရီ စောင့်ရမယ်....

​သူမရဲ့ ကိုယ်ပိုင်ဘဝကို ပြန်စပြီး မူလ ဘဝလမ်းကြောင်းကို ပြန်လည် ရေးဆွဲရပေမည်။

​ဒါက နေ့တိုင်း နောင်တရဆေး တစ်လုံး သောက်ပြီး ပြန်စနေရသလိုပင်။

​...