အခန်း ၂၅ : မွေးရာပါ ပါရမီများ နောက်တစ်ကြိမ် ရွေးချယ်ခြင်း
ချန်ချန်ရွှယ်ဟာ သူမရဲ့ ရုပ်ရည်အပေါ် အလွန် ယုံကြည်မှု ရှိလေသည်။ သူမရဲ့ ရုပ်ရည်ကြောင့် လူအများအပြား သူမကို ချစ်မြတ်နိုးကြမယ် ဆိုတာ သူမ သိပြီး ဒါက သိပ်ပုံမှန် ဖြစ်စဉ်တစ်ခုပင်။ တခြားလူတွေရဲ့ အတွေးတွေကို သူမက ဘယ်လို တားဆီးနိုင်မည်နည်း။
ဒါ့အပြင် တခြားလူတွေရဲ့ ထင်မြင်ချက်တွေကို သူမ ဂရုစိုက်နေစရာ မလိုပါပေ။
ဘာပဲဖြစ်ဖြစ် သူမကလည အဲဒီလူတွေကို လုံးဝ စိတ်မဝင်စားပေ။
ဒါပေမဲ့ သူမ တကယ် မမျှော်လင့်ထားတာက... သူမနဲ့ လိင်တူချင်း ဖြစ်တဲ့အပြင် သူမနဲ့လည်း ဆက်ဆံရေး ကောင်းမွန်တဲ့ လူတစ်ယောက်က သူမအပေါ် ဒီလိုစိတ်တွေ ရှိနေတယ် ဆိုတာပင်။
သူမ နောက်ကနေ တကောက်ကောက် လိုက်နေတဲ့ ဂျူနီယာ ညီမလေးက သူမအပေါ် ဒီလို ထူးဆန်းတဲ့ အတွေးတွေ ရှိနေမယ်လို့ ဘယ်သူက ထင်ထားမည်နည်း။
ဒါက ကိုယ်နဲ့ သုံးနှစ်လောက် အတူတူ အိပ်ခဲ့တဲ့ အခန်းဖော်တစ်ယောက်က ကိုယ့်ခန္ဓာကိုယ်ကို တောက်လျှောက် တပ်မက်နေသလိုပင်။ ပုံမှန်ဆို ပခုံးဖက်ပြီး ရင်းရင်းနှီးနှီး နေပေမယ့် ကိုယ်က ဘာမှမဖြစ်ပေမဲ့ တစ်ဖက်လူရဲ့ ရင်တွေက ဒိန်းဒိန်း ခုန်နေသလိုပင်။
ချန်ချန်ရွှယ် တစ်ကိုယ်လုံး ထုံကျင်သွားခဲ့ရသည်။
'ဒီ မသေမျိုးကျင့်ကြံခြင်း သရုပ်ဖော် စနစ်က တကယ့်ကို နည်းလမ်းပေါင်းစုံနဲ့ သူမကို သွယ်ဝိုက်ပြီး နှိပ်စက်နေတာပါလား...'
[အသက် ၁၉ နှစ် - သင်သည် ကျင့်ကြံခြင်း၌ ကြိုးစားနေဆဲ ဖြစ်သည်။ ဒီအတောအတွင်း သင့် ဂျူနီယာ ညီမလေးက သင့်ကို ကြည့်တဲ့ အကြည့်တွေက ပိုပိုပြီး ထူးဆန်းလာတာ သတိပြုမိလိုက်သည်။ ကျင့်ကြံနေစဉ် စိတ်အခြေအနေကို မထိခိုက်စေဖို့နဲ့ ချီလမ်းကြောင်းလွဲခြင်း မဖြစ်ရအောင် သူမနဲ့ အကွာအဝေး တစ်ခုလောက် ခွာထားသင့်တယ်လို့ သင် ခံစားလိုက်ရသည်။]
[သင်၏ ကြိုးစားအားထုတ်မှုကို သင့်ဆရာက မြင်တွေ့ခဲ့ပါသည်။ ထို့ကြောင့် သူမဟာ သင့်အား အလွန် တန်ဖိုးရှိသော ဆေးလုံး တစ်လုံး ပေးသနားခဲ့သည်။ စားသုံးပြီးနောက် သင်ဟာ ချက်ချင်း သန့်စင်လိုက်သည်။]
[အသက် ၂၀ နှစ် - သင်ဟာ ကျင့်ကြံခြင်း၌ ကြိုးစားနေဆဲ ဖြစ်သည်။]
အသက် (၂၀) အရွယ် ချန်ချန်ရွှယ်၏ ရုပ်ရည်က ပိုမို လှပလာခဲ့သလို သူမ၏ ထူးခြားသော ကိုယ်ရောင်ကိုယ်ဝါနှင့် ပေါင်းစပ်လိုက်သောအခါ ကောင်းကင်ဂိုဏ်းတွင် နာမည်ကျော် အမျိုးသမီး တစ်ယောက် ဖြစ်လာခဲ့လေသည်။
ဒါက သူမရဲ့ ဂုဏ်သတင်းကို တကယ် မြှင့်တင်ပေးခဲ့ပေမဲ့ သူမကတော့ သိပ်ပြီး မခံစားရချေ။
ဘာပဲဖြစ်ဖြစ် လက်တွေ့မှာ ချန်ချန်ရွှယ်က ဝိညာဉ်ဓားဂိုဏ်းရဲ့ သူတော်စင်မ ဖြစ်ကာ ဒီလို အခြေအနေမျိုးကို သူမ ကြုံတွေ့ခဲ့တာ ကြာပြီဖြစ်တာကြောင့် ဒါတွေက ဘာမှ မထူးဆန်းတော့ပေ။ ပြောရရင် ဒါက သူမကို နေမထိထိုင်မသာတောင် ဖြစ်နေစေပေသည်။
သူမက ကျင့်ကြံရာမှာ လူသိမခံဘဲ လူတွေ အများကြီး သူမကို သိနေတာအား မလိုချင်ပါပေ။
ဝမ်းနည်းစရာ ကောင်းတာက သူမက သူမရဲ့ လှပလွန်းတဲ့ ရုပ်ရည်ကို ထိန်းချုပ်လို့ မရတာပါပင်။ မွေးကတည်းက ဒီလို ပါလာမှတော့ သူမ ဘာမှ မလုပ်နိုင်တော့ချေ။
ဒီအချိန်မှာ ချန်ချန်ရွှယ် အဂရုစိုက်ဆုံး အရာက သူမရဲ့ ပါရမီကို ပြန်လည်မွမ်းမံဖို့ပင်။
[ဂုဏ်ယူပါသည် သင်ဟာနှစ်ပေါင်း (၂၀) တိုင်တိုင် အသက်ရှင် နေထိုင်နိုင်ခဲ့ပြီးပါပြီး။]
[သင်၏ မွေးရာပါ ပါရမီ စတင် ပြန်လည်မွမ်းမံပါပြီ။ သင် မလိုအပ်သော မူလပါရမီများကို အစားထိုးရန်အတွက် လုံးဝအသစ် ဖြစ်သော မွေးရာပါ ပါရမီများကို ရွေးချယ်နိုင်ပါပြီ။]
"နှစ် (၂၀) အသက်ရှင်နိုင်ရင် မွေးရာပါ ပါရမီ ပြန်လည်မွမ်းမံနိုင်တယ် ဆိုတာ မေ့လုနီးပါးပဲ..."
သူမ စိတ်ထဲ ပေါ်လာတဲ့ သတိပေးချက်ကို ကြည့်ပြီး ချန်ချန်ရွှယ် ရေရွတ်လိုက်၏။ "ငါ မလိုအပ်တဲ့ မွေးရာပါ ပါရမီကို အစားထိုးလို့ ရတယ်ပေါ့.."
...
တစ်ချိန်တည်းမှာပင်။
ပိုင်ယီဟာလည်း မသေမျိုးကျင့်ကြံခြင်း သရုပ်ဖော် စနစ်ရဲ့ သတိပေးချက်ကို မြင်လိုက်ရလေသည်။ ချန်ချန်ရွှယ် အနေနဲ့ နှစ် (၂၀) ကြုံတွေ့ခဲ့ရပေမယ့် လက်တွေ့မှာတော့ သူ မိနစ် (၂၀) လောက်ပဲ ကုန်ဆုံးသွားခဲ့လေသည်။
ချန်ချန်ရွှယ်ရဲ့ စတုတ္ထအကြိမ် မသေမျိုးကျင့်ကြံခြင်း သရုပ်ဖော် ဘဝက သူ မျှော်လင့်ထားတာထက် ပို၍ချောမွေ့နေခဲ့သည်။
အခုဆိုရင် ချန်ချန်ရွှယ် အနေနဲ့ သူမရဲ့ မွေးရာပါ ပါရမီကို ပြန်လည်မွမ်းမံဖို့ အခွင့်အရေး ရရှိနေပေပြီ။
ပိုင်ယီ့ ဘက်ကနေ ကြည့်ရင် ချန်ချန်ရွှယ် အတွက် မွမ်းမံပေးထားတဲ့ ပါရမီအသစ် (၁၀) ခုအား မြင်နေရလေသည်။
[ချန်ချန်ရွှယ်၏ မွေးရာပါ ပါရမီကို မွမ်းမံနေသည်... အောင်မြင်စွာ မွမ်းမံပြီးပါပြီ]
[ချန်ချန်ရွှယ်ဟာ မလိုအပ်သော ပါရမီများကို အစားထိုးရန်အတွက် အောက်ပါ မွေးရာပါ ပါရမီအသစ် (၁၀) ခုထဲမှ ကြိုက်နှစ်သက်ရာ (၃) ခုကို ရွေးချယ်နိုင်ပါသည်။]
[၁။ ကိုယ်တိုင် ပြန်လည်ဆန်းစစ်သူ (သင် လုပ်သမျှ ကိစ္စတိုင်းကို ကိုယ်တိုင် ပြန်လည်ဆန်းစစ် ဝေဖန်နိုင်လိမ့်မည်)]
[၂။ အချိန် နောက်ပြန်လှည့်ခြင်း (အချိန် နောက်ပြန်လှည့်ခြင်းကို ဖြစ်ပေါ်စေမည့် ဖြစ်နိုင်ခြေ အတိုင်းအတာ တစ်ခု ရှိသည်)]
[၃။ သေဆုံးခြင်း (နေရာတင် ပွဲချင်းပြီး သေဆုံးမည်)]
[၄။ တာအိုကို အောင်မြင်ရန် အဖော်ကို သတ်ပါ (သင့် အဖော်ကို သတ်ဖြတ်ခြင်းက သင့် ကျင့်ကြံမှုအဆင့်ကို တိုက်ရိုက် မြှင့်တင်ပေးလိမ့်မည်)]
[၅။ ဘိုးဘေးပိုင် ကျောက်စိမ်းဆွဲပြား (ကံကောင်းခြင်း အနည်းငယ် ယူဆောင်လာပေးမည်)]
[၆။ မိစ္ဆာ (ဖြောင့်မတ်သူများက သင့်အပေါ် ထားရှိသော အမြင် -၁၀၀၊ မိစ္ဆာကျင့်ကြံသူများက သင့်အပေါ် ထားရှိသော အမြင် +၁၀၀)]
[၇။ အသက် ၃၀ တွင် အောင်မြင်ခြင်း (အသက် ၃၀ ပြည့်လျှင် ကောင်းသောအရာများ ဖြစ်ပေါ်လာလိမ့်မည်)]
[၈။ နဂါးဘုရင် (သင် ပါးစပ်ကို စောင်းလိုက်လျှင် ဆွဲဆောင်မှု နှစ်ဆ တိုးလာမည်)]
[၉။ စက်ယန္တရား အဖြစ် ပြောင်းလဲခြင်း (အသားနဲ့ သွေးက အားနည်းတယ်၊ စက်ယန္တရား အဖြစ် ပြောင်းလဲခြင်းကသာ အစစ်အမှန်)]
[၁၀။ ဘီလူးကျောကုန်း ( ကြွက်သားများဖြင့် ထုဆစ်ထားခြင်း)]
"အာ... ဒါက..."
ဒါက ချန်ချန်ရွှယ် ကံဆိုးတာလား ပိုင်ယီ မသိတော့ပေ။ ဒီ မွေးရာပါ ပါရမီအသစ်တွေက နည်းနည်း...
သူဟာ ချန်ချန်ရွှယ်ရဲ့ ပါရမီအသစ် (၁၀) ခုကို ကြည့်ပြီး ကောင်းတာ သိပ်မပါဘူးလို့ ခံစားလိုက်ရလေသည်။
တကယ်တော့ တချို့ဟာတွေက လုံးဝ ဆိုးရွားနေတယ်။
အထူးသဖြင့် တတိယ ပါရမီအသစ်ပင်။
အဲဒါကို ရွေးလိုက်တာနဲ့... ချက်ချင်း သေသွားမည်ဖြစ်၏။
"ကောင်းလိုက်တာ..အံ့သြစရာကြီးပဲ..."
...
မသေမျိုးကျင့်ကြံခြင်း သရုပ်ဖော် စနစ် အတွင်း၌ ...
မွေးရာပါ ပါရမီအသစ် (၁၀) ခုစလုံးကို မြင်လိုက်ရတဲ့ ချန်ချန်ရွှယ် တစ်ယောက် လေးလေးနက်နက် စဉ်းစားခန်း ဝင်သွားခဲ့သည်။
သူမ နားမလည်တဲ့ ပါရမီတွေ အများကြီး ပါနေမှန်း သူမ တွေ့ရှိလိုက်ရ၏။
ပါရမီ ၁ - ကိုယ်တိုင် ပြန်လည်ဆန်းစစ်ခြင်း...ဘယ်လို ဆန်းစစ်မှာလဲ။ ဘာကိစ္စကို ဆန်းစစ်ရမှာလဲ။
သူမဟာ ဒီပါရမီကို ကျော်လိုက်ပြီး အောက်ကို ဆက်ကြည့်လိုက်သည်။
"အချိန်ကို... နောက်ပြန်လှည့်လို့ ရတယ်" ချန်ချန်ရွှယ် အံ့သြစွာ ရေရွတ်လိုက်လေသည်။ "ဒါက မသေမျိုးကျင့်ကြံခြင်း သရုပ်ဖော်ဖို့ နောက်ထပ် အခွင့်အရေး တစ်ခု ရတာနဲ့ တူတယ် မဟုတ်လား... ဒါပေမဲ့ ဒီလို အချိန် နောက်ပြန်လှည့်ခြင်းက ထိန်းချုပ်လို့ မရတဲ့ပုံပဲ... ဘယ်အချိန် ဖြစ်မလဲ မသိနိုင်ဘူး နှစ်ဘယ်လောက် ကြာမလဲ ဆိုတာလည်း မသိနိုင်ဘူး"
ကြည့်ရတာ သိပ်စိတ်မချရတဲ့ ပုံပင်။ ဒါပေမဲ့ အချိန်ရဲ့ စွမ်းအားနဲ့ ပတ်သက်လာတော့... သူမဟာ ဒါကို ယာယီ သိမ်းထားဖို့ ဆုံးဖြတ်လိုက်၏။
ပါရမီ ၃ ကိုတော့ သူမ လျစ်လျူရှုလိုက်သည်။ ဘာပဲဖြစ်ဖြစ် ဒါက သိပ်ရှင်းနေပြီပင်။
ချန်ချန်ရွှယ် အနေနဲ့ ကိုယ့်သေတွင်း ကိုယ်တူးလောက်အောင် မတုံးအသေးချေ။
ပါရမီ ၄ - ဒါ ဘာလဲ ဆိုတာ သူမ အကြမ်းဖျင်း နားလည်ပေသည်။ ပြဿနာက သူမက ဘယ်မှာ လက်တွဖော် သွားရှာရမည်နည်း။
သူမ လက်တွဲဖော် မရှာချင်သေးပေ။
ပါရမီ ၅ - ဒါက သူမရဲ့ မူလ မွေးရာပါ ပါရမီ (၃) ခုထဲက တစ်ခုနဲ့ အတူတူပါပင်။
ဒါကိုလည်း သူမ တိုက်ရိုက် ကျော်လိုက်၏။
ပါရမီ ၆ - ချန်ချန်ရွှယ် ခဏ တွန့်ဆုတ်နေမိခဲ့သည်။ အကယ်၍ ဒါကို ရွေးလိုက်ရင် သူမကို လမ်းမှန်ကျင့်ကြံသူတွေက လိုက်လံ ဖမ်းဆီးကြမည်ဖြစ်ပြီး မိစ္ဆာကျင့်ကြံသူတွေရဲ့ မျက်နှာသာပေးမှုကိုတော့ ရရှိပေလိမ့်မည်။
တစ်ခါတစ်ရံ ဒါက သိပ်အသုံးမဝင်လှပေ။
ဘာပဲဖြစ်ဖြစ်... ကောင်းကင်ဂိုဏ်းက ဖြောင့်မတ်သော လမ်းစဉ်ကို လိုက်တဲ့ မသေမျိုးကျင့်ကြံခြင်း ဂိုဏ်းဖြစ်လေသည်။
အကယ်၍ ဒီပါရမီကို ရွေးလိုက်ရင် မနက်ဖြန် နေထွက်တာကို မြင်ရဖို့ အခွင့်အရေး နည်းသွားမယ်လို့ ချန်ချန်ရွှယ် ခံစားမိလိုက်သည်။
ပုံမှန်ဆို သူမနဲ့ ဆက်ဆံရေး ကောင်းတဲ့ ဂျူနီယာ ညီမလေးတောင် သူမကို ဓားနဲ့ ချိန်ရွယ်လာပေလိမ့်မည်။
ပါရမီ ၇ - ဒါကိုတော့ သိမ်းထားသင့်တယ်လို့ သူမ ခံစားမိလိုက်သည်။
မသေမျိုးကျင့်ကြံခြင်း သရုပ်ဖော် စနစ်က ကောင်းသောအရာလို့ ပြောရင် သေချာပေါက် ကြီးမားတဲ့ အခွင့်အရေး တစ်ခု ဖြစ်မှာပင်။
ပါရမီ ၈၊ ၉၊ ၁၀...
၎င်းတို့အား သူမ နားမလည်ချေ။
သူမ အနေနဲ့ မွေးရာပါ ပါရမီ ဓားကိုတော့ ဆက်လက် သိမ်းထားရပေမည်။ ဘာလို့လဲဆိုတော့ သူမက ဒီပါရမီကို အများကြီး မှီခိုနေရခြင်းကြောင့်ပင်။
တစ်နည်းအားဖြင့် ပြောရရင် သူမ မွေးရာပါ ပါရမီ (၂) ခုကိုပဲ အစားထိုးဖို့ လိုပေသည်။
ဉာဏ်အလင်းပွင့်သော ဆရာသခင်၏ လက်ဆောင်နဲ့ ဘိုးဘေးပိုင် ကျောက်စိမ်းဆွဲပြားဆိုတဲ့ ပါရမီ နှစ်ခုကို သူမ စွန့်လွှတ်ပြီး ပါရမီ (၂) ခုကို အစားထိုးရပေမည်။
စက္ကန့်ပိုင်းလေး အတွင်းမှာ အတွေးပေါင်းများစွာက ချန်ချန်ရွှယ် ခေါင်းထဲ ဖြတ်သန်းသွားခဲ့သည်။
နောက်ဆုံးတော့ သူမ ဆုံးဖြတ်ချက် ချလိုက်၏။
"ငါ ဉာဏ်အလင်းပွင့်သော ဆရာသခင်၏ လက်ဆောင်နေရာမှာ အချိန် နောက်ပြန်လှည့်ခြင်းနဲ့ အစားထိုးမယ်.... ပြီးတော့ ဘိုးဘေးပိုင် ကျောက်စိမ်းဆွဲပြားနေရာမှာ အသက် ၃၀ တွင် အောင်မြင်ခြင်းနဲ့ အစားထိုးမယ်"
[အသက် ၂၀ နှစ် - သင်ဟာ ပါရမီအသစ် (၂) ခုကို အစားထိုးလိုက်ပါသည်။]
[ဘိုးဘေးပိုင် ကျောက်စိမ်းဆွဲပြား ဆုံးရှုံးသွားသောကြောင့် သင့်ကံတရား ပိုဆိုးရွားသွားခဲ့သည်။]
[ကံတရား -၁]
[သင်သည် ကျင့်ကြံခြင်း၌ ကြိုးစားအားထုတ်နေသည်။]
[အသက် ၂၁ နှစ်...]
...