အခန်း ၂၄ : သူတော်စင်မ၏ တုန်လှုပ်မှု
မသေမျိုးကျင့်ကြံခြင်း သရုပ်ဖော် ဘဝအသစ် တစ်ခု စတင်တိုင်း ချန်ချန်ရွှယ် အနေနဲ့ သူမရဲ့ ကံတရားကို ပြောင်းလဲဖို့ ကြိုးစားခဲ့လေသည်။ သရုပ်ဖော် မသေမျိုးကျင့်ကြံသူ ဘဝကို ပြီးခဲ့တဲ့ အကြိမ်နဲ့ မတူအောင် လုပ်ဆောင်ခဲ့သည်။
ဒီလိုနည်းနဲ့မှ ပြီးခဲ့တဲ့ သရုပ်ဖော်မှုထက် ပိုကောင်းအောင် လုပ်နိုင်မည်ပင်။
ပိုင်ယီလည်း ချန်ချန်ရွှယ်ရဲ့ ချဉ်းကပ်ပုံကို သဘောတူလေသည်။ အကယ်၍ သူမသာ ပြီးခဲ့တဲ့ သရုပ်ဖော်မှုက လမ်းကြောင်းဟောင်းအတိုင်း လိုက်မယ် ဆိုရင် နိဂုံးချုပ်ကလည်း အရင်တစ်ခေါက်နဲ့ ဘာမှ ကွာခြားမှာ မဟုတ်တော့ပေ။
"ဒီ ဟိုရင်းယွမ်ကို မသေမျိုးကျင့်ကြံခြင်း သရုပ်ဖော် စနစ်ထဲက ချန်ချန်ရွှယ်ရဲ့ ပထမဆုံး မိတ်ဆွေလို့ သတ်မှတ်လို့ ရမလားပဲ.. မသေမျိုးကျင့်ကြံသူတွေရဲ့ စကားနဲ့ ပြောရရင် ဟိုရင်းယွမ်က ချန်ချန်ရွှယ်ရဲ့ ကျင့်ကြံဖော်ပေါ့"
ပိုင်ယီဟာ စိတ်လှုပ်ရှားစွာ သက်ပြင်းချလိုက်၏။
ပြီးခဲ့တဲ့ သရုပ်ဖော်မှုတွေမှာ ချန်ချန်ရွှယ်က တစ်ကိုယ်တော်သမားတစ်ယောက် ဖြစ်ခဲ့ပြီး မိသားစု ရှိရှိပေမဲ့ သူတို့နဲ့ ဆက်ဆံရေးက ဝါးတားတားပါပင်။
မသေမျိုးအဖြစ် တက်လှမ်းခြင်း ဂိုဏ်းထဲ ဝင်ရောက်ခဲ့တာတောင် ဂိုဏ်းသားတွေနဲ့ အကွာအဝေး တစ်ခု ထားရှိခဲ့လေသည်။
သူမရဲ့ လူမှုဆက်ဆံရေး ဖွံ့ဖြိုးတိုးတက်မှု အားလုံးက ဖိအားပေးခံရလို့ ဖြစ်လာတယ်လို့ ပြောလို့ရပေသည်။
ဒီတစ်ခါကြမှ... သူမဟာ သရုပ်ဖော် စနစ်ထဲက လူတွေကို ချဉ်းကပ်ဖို့ ရွေးချယ်ကာ သူတို့နဲ့ မိတ်ဆွေဖွဲ့ဖို့ ကိုယ်တိုင် စတင် လှုပ်ရှားခဲ့လေသည်။
ဒီလို လုပ်ရပ်မျိုးက သာမန်ပါပင်။
ပိုင်ယီ့ အမြင်မှာတော့ ချန်ချန်ရွှယ် အနေနဲ့ ဒီလို ပြောင်းလဲမှုမျိုး လုပ်တာက ကောင်းမွန်ပြီး ဒီလို ပြောင်းလဲမှုမျိုး လုပ်မှသာ သရုပ်ဖော် စနစ်ထဲမှာ ငါးလေးတစ်ကောင် ရေထဲ ကူးခတ်သလို အဆင်ပြေပြေ ဖြတ်သန်းနိုင်မှာဖြစ်ပေသည်။
မသေမျိုးကျင့်ကြံခြင်းမှာ တစ်ခါတစ်ရံ လောကရဲ့ နည်းလမ်းတွေကိုလည်း ပြစ်ပယ်လိုမရပေ။
အဖော်ဆိုတာလည်း မသေမျိုးကျင့်ကြံသူတွေဟာ လိုအပ်လေသည်။
အတိုချုပ်ပြောရရင်... ချန်ချန်ရွှယ် တစ်လှမ်းချင်းစီ ကောင်းမွန်တဲ့ ဘက်ကို ကြီးထွားလာတာ မြင်ရတော့ ပိုင်ယီ သိပ်ပျော်ပေသာ်။
ဘာပဲဖြစ်ဖြစ် ချန်ချန်ရွှယ်က သူ့ရဲ့ လုပ်သားဖြစ်ကာ ချန်ချန်ရွှယ် ပိုအသက်ရှင်နိုင်လေ သူအတွက် ပိုကောင်းလေလေပင်။
ပိုင်ယီရဲ့ စောင့်ကြည့်မှုအောက်မှာ သရုပ်ဖော် စနစ်ထဲက ချန်ချန်ရွှယ်ဟာ အဲဒီကမ္ဘာကြီးမှာ အသက်ရှင်ရပ်တည်နိုင်ဖို့ ကြိုးစားနေဆဲ ဖြစ်ပေသည်။
[အသက် ၁၅ နှစ် - ချန်ချန်ရွှယ်ဟာ သူမ၏ ဂျူနီယာ ညီမလေး ဟိုရင်းယွမ်ကို ခေါ်ပြီး ကောင်းကင်ဂိုဏ်းသို့ ဝင်ရောက်ခဲ့သည်။ ချန်ချန်ရွှယ်ဟာ ကောင်းကင်ဂိုဏ်း၏ အတွင်းစည်း တပည့်ဖြစ်လာခဲ့ပြီး ဟိုရင်းယွမ်ကိုတော့ အမျိုးသမီး အကြီးအကဲ တစ်ဦးက ရွေးချယ်ပြီး ဆက်ခံသူ တပည့်အဖြစ် လက်ခံခဲ့သည်။]
[ချန်ချန်ရွှယ်သည် အစွမ်းကုန် ကြိုးစား ကျင့်ကြံနေခဲ့သည်...]
[အသက် ၁၆ နှစ် - ချန်ချန်ရွှယ်ဟာ သူမ၏ လှပသော ရုပ်ရည်ကြောင့် ကောင်းကင်ဂိုဏ်းတွင် နာမည်ကြီး ပုဂ္ဂိုလ်တစ်ဦး ဖြစ်နေခဲ့သည်။ အားယားနေသူ တစ်ယောက်က ဂိုဏ်းတွင်း အလှပဂေး (၁၀၀) စာရင်းကို ဖန်တီးခဲ့ရာ ချန်ချန်ရွှယ်က နံပါတ် (၁) ဖြစ်ပြီး ဟိုရင်းယွမ်က နံပါတ် (၂) ဖြစ်လေသည်။]
[သူမ၏ ကျင့်ကြံမှုအဆင့် ရပ်တန့်နေသလို ခံစားလိုက်ရသဖြင့် ချန်ချန်ရွှယ်ဟာ စီနီယာ အစ်ကို၊ အစ်မ များနှင့် လိုက်ပါပြီး တောင်အောက်ဆင်းကာ လေ့ကျင့်ခဲ့သည်။]
[ချန်ချန်ရွှယ်သည် မိစ္ဆာကျင့်ကြံသူ တစ်ဦးကို သတ်ဖြတ်ခဲ့ပါသည်။]
[အသက် ၁၇ နှစ် - ကောင်းကင်ဂိုဏ်း၏ ဂိုဏ်းတွင်း ပြိုင်ပွဲ ကျင်းပခဲ့သည်။ ချန်ချန်ရွှယ်နှင့် ဟိုရင်းယွမ် ပြိုင်ဘက်များ ဖြစ်လာခဲ့ကြသည်။ ခင်မင်ရင်းနှီးစွာ အပြန်အလှန် ယှဉ်ပြိုင်ပြီးနောက် ချန်ချန်ရွှယ်က အနည်းငယ် အသာစီးရပြီး ဂိုဏ်းတွင်း ပြိုင်ပွဲတွင် တောက်ပစွာ အောင်မြင်ခဲ့သည်]
[ဟိုရင်းယွမ်ဟာ ချန်ချန်ရွှယ်အား ဆေးပုလင်း တစ်ပုလင်း လက်ဆောင်ပေးခဲ့ပြီး ချန်ချန်ရွှယ်က ကျေးဇူးတင်ကြောင်း ပြောကြားခဲ့သည်။]
[အသက် ၁၈ နှစ် - ချန်ချန်ရွှယ်ဟာ သူမ၏ ချီကြောများ ဖောင်းကားလာသည်ကို ခံစားလိုက်ရပြီး နောက်တစ်ဆင့်သို့ ချိုးဖျက်ဝင်ရောက်ရန် ပြင်ဆင်လိုက်သည်။]
[ချီစုစည်းမှု အဆင့် (၃) သို့ ချိုးဖျက်ဝင်ရောက်နေပါသည်...]
[အောင်မြင်ပါသည်]
[ချန်ချန်ရွှယ်ဟာ ချီစုစည်းမှု အဆင့် (၃) မသေမျိုးကျင့်ကြံသူ တစ်ဦး ဖြစ်လာခဲ့ပြီး ဟိုရင်းယွမ်က အထူးတလည် လာရောက် ဂုဏ်ပြုခဲ့သည်။]
[...]
"ချီစုစည်းမှု အဆင့် (၃).."
မျှော်လင့်ထားတဲ့ အတိုင်းပါပင်။ ဝိညာဉ်ဓားဂိုဏ်း သူတော်စင်မက ပိုင်ယီအား စိတ်ပျက်အောင် မလုပ်ခဲ့ပါချေ။ ဒီ စတုတ္ထအကြိမ် သရုပ်ဖော် ဘဝမှာ သူမက အရင်စံချိန်ဟောင်းကို ချိုးဖျက်ပြီး ချီစုစည်းမှု အဆင့် (၃) ကို တစ်ရှိန်ထိုး တက်လှမ်းနိုင်ခဲ့လေသည်။
ဒါ့အပြင် ချန်ချန်ရွှယ်က အတော်လေး အင်အားကြီးတဲ့ ကောင်းကင်ဂိုဏ်း ကို ဝင်ရောက်ခဲ့တာပြီး ဂိုဏ်းချုပ်ကြီးကလည်း မူလဝိညာဉ် အဆင့် တစ်ဝက် ကျင့်ကြံသူ ဖြစ်လေသည်။ သူက တော်တော် နာမည်ကြီးတယ်လို့ ပြောလို့ရပေသည်။
ဒါကြောင့် ကောင်းကင်ဂိုဏ်းမှာ ချန်ချန်ရွှယ် အနေနဲ့ ကျင့်ကြံခြင်းမှာ ပိုပြီး အာရုံစိုက်နိုင်ခဲ့ပြီး သူမရဲ့ ကျင့်ကြံခြင်းကို နှောင့်ယှက်မယ့် သေးမွှားတဲ့ ကိစ္စတွေကို အာရုံစိုက်စရာ မလိုတော့ချေ။
ဒီနည်းအားဖြင့် သူမဟာ ပိုသန်မာလာဖို့ အခွင့်အလမ်း များလာခဲ့ပြီး ချီစုစည်းမှု အဆင့် (၄) ကိုတောင် ချိုးဖျက်ဝင်ရောက်နိုင်မယ့် အခွင့်အရေး ရှိလာခဲ့လေသည်။
ယခုအချိန်ထိ အရာအားလုံး ပိုကောင်းတဲ့ ဘက်ကို ဦးတည် ဖွံ့ဖြိုးတိုးတက်နေခဲ့ပေသညါ။
...
ချန်ချန်ရွှယ် ကိုယ်တိုင်လည်း အဲဒီလိုပဲ ထင်ခဲ့ပြီး သူမရဲ့ စတုတ္ထအကြိမ် သရုပ်ဖော်မှုက ပြီးခဲ့တဲ့ (၃) ကြိမ်ထက် ပိုအောင်မြင်တယ်လို့ ခံစားနေရကာ အနာဂတ်အတွက် မျှော်လင့်ချက်တွေ ပြည့်နှက်နေခဲ့လေသည်။
ဒါပေမဲ့ သူမ အကောင်းမြင်လွန်းလို့ မရမှန်းလည်း သိပြီး ဘာမဆို ဖြစ်သွားနိုင်ပေသည်။
သရုပ်ဖော် စနစ်ထဲမှာ (၃) ကြိမ်ဆက်တိုက် သေဆုံးခဲ့ရတာက သူမကို သင်ခန်းစာတွေ အများကြီး ပေးခဲ့ပေပြီ။
သူမ တစ်ခုကိုတော့ ကောင်းကောင်း သိထားပြီး ၎င်းက မာန်မတက်နဲ့ဟုပင်။
သူမရဲ့ ကိုယ်ပိုင် ခွန်အားနဲ့ အနာဂတ်အပေါ် မျှော်လင့်ချက်တွေ နည်းနည်းလေး မာန်တက်သွားတာနဲ့ သူမကို စောင့်ကြိုနေတာက အလွန် ကံဆိုးမိုးမှောင်ကျတဲ့ ကံတရားပဲ ဖြစ်ပေလိမ့်မည်။
သေဆုံးခြင်းက အတွေ့အကြုံကို ယူဆောင်လာပေးတယ်......
"စီနီယာ အစ်မ... ကောင်းကင်ကိုင်ဆောင်ဂိုဏ်းရဲ့ စည်းမျဉ်းအရ အတွင်းစည်း တပည့် တစ်ယောက်က အသက် (၂၀) မတိုင်ခင် ချီစုစည်းမှု အဆင့် (၃) ကို ရောက်နိုင်ရင် အကြီးအကဲ တစ်ယောက်ရဲ့ လက်အောက်ခံ ဖြစ်လာနိုင်ပြီး ဆက်ခံသူ တပည့်ဖြစ်ခွင့်ရှိတယ်"
ဟိုရင်းယွမ်က မျှော်လင့်ချက်တွေ ပြည့်နှက်နေတဲ့ မျက်နှာထားနဲ့ ပြောလိုက်၏။ "စီနီယာ အစ်မ... အကြီးအကဲ ယွဲ့ရဲ့ လက်အောက်ခံ ဖြစ်အောင် ကြိုးစားကြည့်ပါလား"
"အကြီးအကဲ ယွဲ့..." ချန်ချန်ရွှယ် အံ့သြစွာ မေးလိုက်သည်။ "အဲဒါ ညီမလေးရဲ့ ဆရာ မဟုတ်ဘူးလား"
ဟိုရင်းယွမ်ရဲ့ ကျင့်ကြံမှု အမြစ်က ချန်ချန်ရွှယ်ထက် အများကြီး ပိုကောင်းပေသည်။
ကောင်းကင်ဂိုဏ်းထဲ ရောက်ရောက်ချင်းမှာပဲ သူမအား အကြီးအကဲ ယွဲ့ က ခေါ်ယူခဲ့ပြီး ဆက်ခံသူ တပည့် အဖြစ် လက်ခံခဲ့ခြင်း ဖြစ်လေသည်။
"ဟုတ်တယ်.." ဟိုရင်းယွမ် လေးနက်စွာ ခေါင်းညိတ်လိုက်၏။ "ဒါဆိုရင် တို့တွေ အတူတူ ကျင့်ကြံလို့ ရပြီပေါ့"
"ဒါက..." ချန်ချန်ရွှယ် ခဏလောက် စဉ်းစားလိုက်လေသည်။
ကောင်းကင်ဂိုဏ်းရဲ့ ဘယ်အကြီးအကဲ လက်အောက် ရောက်ရောက် သူမ ဂရုမစိုက်ပါပေ။ တစ်ဖက်လူက သူမကို လုံလောက်တဲ့ ကျင့်ကြံခြင်း အရင်းအမြစ်တွေ ပေးနိုင်ရင် ပြီးတာပင်။
ဒီ အကြီးအကဲ ယွဲ့ အကြောင်း သူမ နည်းနည်း ကြားဖူးပြီး သူမက ကောင်းကင်ဂိုဏ်းရဲ့ ရှားပါးတဲ့ အမျိုးသမီး အကြီးအကဲ တစ်ယောက်ပင်။
သူမရဲ့ ကျင့်ကြံမှုအဆင့်က ရွှေအမြုတေ အဆင့်ဖြစ်ပြီး အလွန် သန်မာလေသည်။
တစ်ချိန်တည်းမှာပဲ ဒီ အကြီးအကဲ ယွဲ့ က တပည့် သိပ်လက်မခံပဲ လွန်ခဲ့တဲ့ နှစ်အနည်းငယ်က ဟိုရင်းယွမ်ကို ဆက်ခံသူ တပည့် အဖြစ် လက်ခံလိုက်တာက ကောင်းကင်ဂိုဏ်းအား တော်တော်လေး လှုပ်ခတ်သွားစေခဲ့သည်။
အကယ်၍ သူမသာ တပည့် သိပ်လက်မခံတဲ့ အကြီးအကဲ တစ်ယောက်ရဲ့ လက်အောက် ရောက်သွားရင် ကျင့်ကြံခြင်း အရင်းအမြစ်တွေ ပိုရနိုင်တာ အမှန်ပါပင်။
ဒါပေမဲ့ ချန်ချန်ရွှယ်က လက်မခံနိုင်သလို ပြောလိုက်၏။ "ဖြစ်နိုင်တာက အကြီးအကဲ ယွဲ့ က အစ်မကို သဘောကျမှာ မဟုတ်ပါဘူး"
သူမရဲ့ ဓားကျင့်စဉ်ကို တစ်ခါမှ ထုတ်မပြဖူးပေ။
သူမရဲ့ မွေးရာပါ ပါရမီ ဓားတစ်ခုတည်းနဲ့ ပြီးတော့ သူမမှာ ကောင်းမွန်တဲ့ အခြေခံအုတ်မြစ် မရှိတာနဲ့ ဆိုရင် သူမရဲ့ မျှော်လင့်ချက်က သိပ်နည်းပါးတယ်လို့ ခံစားနေရလေသည်။။
"ကိစ္စမရှိပါဘူး"
ဟိုရင်းယွမ် တခစ်ခစ် ရယ်လိုက်လေသည်။ "လွန်ခဲ့တဲ့ ရက်အနည်းငယ်က အစ်မ ချီစုစည်းမှု အဆင့် (၃) ကို ချိုးဖျက်ဝင်ရောက်ဖို့ ကြိုးစားတော့မယ်လို့ ပြောတုန်းက ညီမ ရုတ်တရက် အကြံရပြီး ဆရာ့အတွက် ဝိညာဉ်ဝိုင်တွေ အများကြီး သွားဝယ်လိုက်တယ်"
"ပြီးတော့ ဆရာ့ကို မူးအောင် တိုက်ပြီး ဒီကိစ္စကို ပြောပြလိုက်တာ ဆရာက ချက်ချင်း သဘောတူလိုက်ရော"
"ပြီးတော့ ဆရာက ရွှေအမြုတေ အဆင့် ကျင့်ကြံသူလေ... ကတိပေးပြီးရင် ပြန်ရုပ်သိမ်းလို့ မရဘူး"
"သူမ သေချာပေါက် ပြန်ရုပ်သိမ်းမှာ မဟုတ်ဘူး"
ချန်ချန်ရွှယ်ဟာ စကားမပြောနိုင်တော့ပေ။
'အကြီးအကဲ ယွဲ့ က တကယ့်ကို ကောင်းမွန်တဲ့တပည့်လေး လက်ခံထားတာပဲ... သူများကို လှည့်စားတာ တော်တော် တော်တာပဲ'
စိတ်ထဲမှာ ညည်းညူနေမိပေမယ့် ချန်ချန်ရွှယ် တော်တော်လေး စိတ်လှုပ်ရှားသွားခဲ့သည်။
ဒီ ဂျူနီယာ ညီမလေးက အခု သူမကို တကယ် ကူညီပေးနေတာပင်။
"ကောင်းပြီလေ အစ်မ ကြိုးစားကြည့်ပါ့မယ်" သူမ ပြန်ဖြေလိုက်လေသည်။
[သင်သည် ကောင်းကင်ဂိုဏ်း အကြီးအကဲ ယွဲ့ ၏ တပည့် ဖြစ်လာရန် ကြိုးစားခဲ့သည်။ အကြီးအကဲ ယွဲ့ ခေတ္တမျှ စဉ်းစားပြီးနောက် သင့်ကို အဓိက တပည့်အဖြစ် လက်ခံရန် ဆုံးဖြတ်လိုက်သည်။ သူမသည် သင့်အား ဝိညာဉ်လက်နက်တစ်ခု၊ ဆေးပုလင်း အနည်းငယ် နှင့် ကျင့်စဉ်တစ်ခု ပေးသနားခဲ့သည်။ တစ်ဖက်လူ၏ ရက်ရောမှုကြောင့် သင်ဟာ ပါးစပ်အဟောင်းသား ဖြစ်သွားခဲ့ရသည်။]
[သင်ဟာ ကောင်းကင်ဂိုဏ်း၏ နာမည်ကျော် ပုဂ္ဂိုလ်တစ်ဦး နောက်တစ်ကြိမ် ဖြစ်လာခဲ့ပြန်သည်။ အကြီးအကဲ ယွဲ့ ၏ ဆက်ခံသူ တပည့် ဖြစ်လာပြီးနောက် သင်ဟာ ဂိုဏ်းသား အများအပြား၏ မနာလို ဝန်တိုမှုများကို ခံခဲ့ရသည်။ သင်သည် ၎င်းတို့အား လျစ်လျူရှုထားလိုက်သည်။]
[တစ်နေ့တွင် သင့် ဂျူနီယာ ညီမလေး အိပ်ရင်း ယောင်ပြောတာကို မတော်တဆ ကြားလိုက်ရသည်။ သင်သာ ယောကျ်ားလေး ဖြစ်ရင် သိပ်ကောင်းမှာပဲဟုပင်။ သင်က သူ့ကို ညီမလေးအရင်းလို သဘောထားပေမဲ့ သူက သင့်အား ပြန်ကြံစည်ချင်နေပေသည်။]
[ထို့ကြောင့် သင့်၏ ဖြူစင်သော နှလုံးသားဟာ တုန်လှုပ်သွားခဲ့ရသည်။]
...