အခန်း ၂၃ : ချန်ချန်ရွယ်၏ ဂိုဏ်းမှ ထွက်ခွာခြင်း ၊ ဂျူနီဟာ ညီမလေး ဟိုရင်းယွမ်
မွန်းတည့်ချိန်မှာတော့ ပိုင်ယီဟာ တည်းခိုခန်းကနေ အိမ်ပြန်ရောက်နေပြီ ဖြစ်ခဲ့ပြီး အချိန်စောင့်ဆိုင်းရမှု ပြီးဆုံးမယ့် အချိန်အား တိတ်ဆိတ်စွာ စောင့်ဆိုင်းနေခဲ့သည်။
မိနစ်အနည်းငယ် စောင့်ပြီးနောက် မသေမျိုးကျင့်ကြံခြင်း သရုပ်ဖော် စနစ် ပေါ်လာတာကို မြင်လိုက်ရတဲ့အခါ ၂၄) နာရီ အချိန်စောင့်ဆိုင်းရမှု ပြီးဆုံးသွားပြီမှန်း သိလိုက်လေသည်။
မကြာခင်မှာပဲ ချန်အိမ်တော်မှာ ရှိနေတဲ့ ချန်ချန်ရွှယဟာ သူမရဲ့ အသိစိတ်ထဲကနေ သရုပ်ဖော် စနစ်နဲ့ ဆက်သွယ်ဖို့ ကြိုးစားနေသာ်အား တွေ့ရှိလိုက်ရ၏။
ဝမ်းနည်းစရာ ကောင်းတာကသူမ မသိတဲ့ အချက်ကတော့ သူမ သရုပ်ဖော် စနစ်နဲ့ ချိတ်ဆက်နိုင်တာက ပိုင်ယီ သူမကို ဝင်ရောက်ခွင့်ပေးထားလို့ ဆိုတာပါပင်။
အကယ်၍ ပိုင်ယီသာ ဝင်ရောက်ခွင့် မပေးခဲ့ပါက သူမ ဘယ်လိုနည်းနဲ့မှ သရုပ်ဖော် စနစ်နဲ့ ချိတ်ဆက်နိုင်မှာ မဟုတ်ပေ။
ဒါပေမဲ့ ချန်ချန်ရွှယ်လို အရည်အသွေးမြင့် လုပ်သားတစ်ယောက်ကို ပိုင်ယီ ဘယ်လိုလုပ် လက်လွှတ်ခံနိုင်မည်နည်း။
လက်ရှိမှာ ပိုင်ယီက ချီစုစည်းမှု အဆင့် (၂) ရောက်နေပြီ ဖြစ်လို့ မသေမျိုးကျင့်ကြံသူ အစစ်အမှန် ဖြစ်နေခဲ့သည်။ ပြောရရင် ချန်ချန်ရွှယ် တစ်ယောက်တည်း မဟုတ်ဘဲ နောက်ထပ် လူတစ်ယောက်ကိုပါ သာရုပ်ဖော် စနစ်ထဲ ဝင်ရောက်ဖို့ ဖိတ်ခေါ်နိုင်ပေသည်။
ဒါပေမဲ့ အကြီးမားဆုံး ပြဿနာက... ချင်းဟယ် ခရိုင် တစ်ခုလုံးမှာ ကောင်းကင်ဘုံရဲ့ အချစ်တော်လို့ သတ်မှတ်နိုင်တာ ချန်ချန်ရွှယ် တစ်ယောက်ပဲ ရှိနေခြင်းပင်။
ဒုတိယမြောက် သင့်တော်တဲ့ လုပ်သားကိုတော့... ပိုင်ယီ ရှာမတွေ့သေးချေ။။
သူက တွေ့ကရာလူကို သရုပ်ဖော် စနစ်ထဲ အတင်း ဆွဲမသွင်းချင်ပေ။ ၎င်းက အလကား အချိန်ဖြုန်းတာနဲ့ အတူတူပင်။
ဘာပဲဖြစ်ဖြစ် ဝိညာဉ်ဓားဂိုဏ်း သူတော်စင်မ ချန်ချန်ရွှယ်တောင်မှ သရုပ်ဖော် စနစ်ထဲမှာ အကြိမ်ကြိမ် သေဆုံးခဲ့ပြီး အကြိမ်တိုင်း အသက် (၂၀) ကျော်အောင် မနေနိုင်ခဲ့ပေ။
ထို့ကြောင့် သာမန်လူ တစ်ယောက် ဒါမှမဟုတ် တခြား မသေမျိုးကျင့်ကြံသူ တစ်ယောက်သာ ဆိုရင်အသက် (၂) နှစ် ပြည့်အောင် နေနိုင်ပါ့မလား ဆိုတာတောင် မသေချာချေ။
ချန်ချန်ရွှယ်က သရုပ်ဖော် စနစ်နဲ့ ချိတ်ဆက်ဖို့ သူမရဲ့ အသိစိတ်ကနေတစ်ဆင့် ဆက်လက် ကြိုးစားနေတာ မြင်တော့၊ပိုင်ယီ သူမကို ခွင့်ပြုချက် ပေးလိုက်၏။
...
တစ်ချိန်တည်းမှာပင်။
ချန်အိမ်တော်...
မသေမျိုးကျင့်ကြံခြင်း သာရုပ်ဖော် စနစ်ကို လှမ်းခေါ်ချင်နေတဲ့ ချန်ချန်ရွှယ်ဟာ အကြိမ်ကြိမ် ကြိုးစားပေမယ့် မအောင်မြင်ခဲ့ပေ။ မူလက တည်ငြိမ်နေတဲ့ သူမဟာ နည်းနည်း ပြာယာခတ်လာခဲ့လေသည်။
'ဘာဖြစ်တာလဲ.. ဘာလို့ သာရုပ်ဖော် စနစ်ကို ခေါ်မရတော့တာလဲ...'
'သရုပ်ဖော် စနစ်ထဲမှာ သူမရဲ့ စွမ်းဆောင်ရည်က ညံ့လို့... သူမ စွန့်ပစ်ခံလိုက်ရတာလား...'
အတွေးပေါင်းစုံ ခေါင်းထဲ ဖြတ်သန်းနေချိန်မှာပဲ ရင်းနှီးနေတဲ့ သတိပေးချက်တစ်ခု ရုတ်တရက် ပေါ်လာခဲ့သည်။ သူမ ခဏလောက် ကြောင်သွားပြီးမှ စိတ်သက်သာရာရစွာ သက်ပြင်းချလိုက်မိလေသည်။
'ကံကောင်းပါသေးရဲ့... ရှိနေသေးတာပဲ..'
ချန်ချန်ရွှယ် အနေနဲ့ မသေမျိုးကျင့်ကြံခြင်း သရုပ်ဖော် စနစ်ကို သူမရဲ့ အရေးကြီးဆုံး လျှို့ဝှက်ရတနာ တစ်ခုလို သတ်မှတ်ထားပြီးသားဖြစ်ကာ အကယ်၍ သရုပ်ဖော် စနစ်သာ ရုတ်တရက် ပျောက်ကွယ်သွားရင် သူမဟာ စိတ်ဓာတ်ကျသွားပြီး ပြိုလဲသွားလောက်ပေသည်။ သူမရဲ့ ကျင့်ကြံခြင်းမှာ စိတ်ဝိညာဉ် မိစ္ဆာတောင် ဝင်ရောက်လာနိုင်လေသည်။
သူမ အနေနဲ့ သရုပ်ဖော် စနစ်ကို အရမ်းမှီခိုနေမိတာကိုသူမ သိနေပေသည်။
ဒါပေမဲ့... ဒါက ရှောင်လွှဲလို့ မရဘူးချေ။ ဘာလို့လဲဆိုတော့ သရုပ်ဖော် စနစ်က ရတဲ့ ဆုလာဘ်တွေက သူမ ကိုယ့်ဘာသာ ဖင်ထောင်ပြီး ကျင့်ကြံနေတာထက် အများကြီး ပိုကောင်းနေတာကြောင့်ပင်။
တစ်နေ့ တစ်ကြိမ် သူမဟာ ရိတ်သိမ်းမှု အသစ်တစ်ခု ရနိုင်ပေမဲ့ သူမ နေ့တိုင်း ကျင့်ကြံရင်တောင် သိပ်ရရှိခြင်းမရှိပေ။
ကျင့်ကြံခြင်းက ပိုသန်မာလာစေတယ် ဆိုတာ မှန်ပေမဲ့ ၎င်းက သိပ်နှေးကွေးလွန်းလေသည်။
ချီစုစည်းမှု အဆင့် (၂) ဝိညာဉ်စွမ်းအင် အားလုံး သူမ ခန္ဓာကိုယ်ထဲ စီးဝင်လာတဲ့အခါ အတားအစီးက ချိုးဖျက်တော့မလို ခံစားခဲ့ရတာကို ချန်ချန်ရွှယ် ရှင်းရှင်းလင်းလင်း မှတ်မိနေသေးပေသည်။
အဲဒီ ခံစားချက်က သူမ လနဲ့ချီ ကြိုးစားရင်တောင် ရချင်မှ ရမယ့် ခံစားချက်မျိုးပင်။
ပိုကောင်းတဲ့ ဆက်ဆံမှုကို ခံစားဖူးပြီးမှ အရင်ဘဝဟောင်းကို ပြန်သွားရမယ် ဆိုရင်... သူမ လက်မခံနိုင်ဘူးလို့ ချန်ချန်ရွှယ် ခံစားနေခဲ့ရသည်။
[မသေမျိုးကျင့်ကြံခြင်း သရုပ်ဖော် စနစ်မှ ကြိုဆိုပါသည်။ စတုတ္ထအကြိမ် မသေမျိုးကျင့်ကြံခြင်း သရုပ်ဖော်မှုကို အသက်သွင်းမည်မှာ သေချာပါသလား]
"သေချာတယ်"
[မသေမျိုးကျင့်ကြံခြင်း သရုပ်ဖော် စနစ်မှ ကြိုဆိုပါသည်။ သင်ဟာ စတုတ္ထအကြိမ် မသေမျိုးကျင့်ကြံခြင်း သရုပ်ဖော်မှုကို အသက်သွင်းရန် အတည်ပြုလိုက်ပြီ ဖြစ်ပါသည်]
[လက်ရှိတွင် သင့်၌ ရွေးချယ်စရာ နှစ်ခု ရှိပါသည် - ]
[ရွေးချယ်စရာ ၁ - ပြီးခဲ့သည့် မသေမျိုးကျင့်ကြံခြင်းဘဝ သရုပ်ဖော်မှုကို ဆက်လက်လုပ်ဆောင်မည်။ သို့သော် အစမှ အကုန်ပြန်စရမည် ဖြစ်ပြီး မွေးရာပါ ပါရမီအသစ်ကို ချက်ချင်း ပြန်လည်ရွေးချယ်၍ မရနိုင်ပါ။ ပါရမီအသစ် ပြန်လည်ရရှိရန်အတွက် သရုပ်ဖော်မှုထဲတွင် အနှစ် ၂၀ ကြာအောင် အသက်ရှင်နေထိုင်ရန် လိုအပ်ပါသည်။]
[ရွေးချယ်စရာ ၂ - မသေမျိုးကျင့်ကြံခြင်းဘဝ သရုပ်ဖော်မှု အသစ်တစ်ခုကို ရွေးချယ်မည်။ မွေးရာပါ ပါရမီအသစ်ကို ချက်ချင်း ပြန်လည်ရွေးချယ်နိုင်ပါသည်။]
"ရွေးချယ်စရာ ၁"
ချန်ချန်ရွှယ်ဟာ ဒုတိယ ရွေးချယ်စရာကို မရွေးချယ်ခဲ့ပါချေ။ ဘာလို့လဲဆိုတော့ သူမရဲ့ မာနက လမ်းတစ်ဝက်မှာ လက်လျှော့လိုက်တာကို လက်မခံနိုင်တာကြောင့်ပင်။
သူမရဲ့ မူလ သရုပ်ဖော် ဘဝမှာ သူမဟာ (၃) ကြိမ်တိုင်တိုင် သာရုပ်ဖော်ခဲ့လေသည်။
နောက်ဆုံးတော့ အကြိမ်တိုင်းမှာ သူမရဲ့ လက်တွေ့ဘဝကို ကျော်လွန်အောင် မလုပ်နိုင်ခဲ့တာကြောင့် သူမ ဘယ်လို လက်ခံနိုင်မည်နည်း။
သူမ ထွက်ပြေးဖို့ ဘယ်တော့မှ ရွေးချယ်မှာ မဟုတ်ပဲ အကယ်၍ သူမ ထွက်ပြေးဖို့ ရွေးချယ်လိုက်ရင် သူမက ချန်ချန်ရွှယ် မဟုတ်တော့ဘူးပေ။
ထို့နောက် ရင်းနှီးနေတဲ့ ကိုယ်ပိုင် ဂုဏ်သတ္တိ ဇယားကွက် ပြန်ပေါ်လာခဲ့ပြီး မွေးရာပါ ပါရမီ (၃) ခုကလည်း အတူတူပါပင်။
မျက်စိတစ်မှိတ်အတွင်း ချန်ချန်ရွှယ်ရဲ့ စတုတ္ထအကြိမ် မသေမျိုးကျင့်ကြံခြင်း သရုပ်ဖော် ဘဝ တရားဝင် စတင်ခဲ့လေသည်။
[အသက် ၀ နှစ် - သင်ဟာ ဆင်းရဲသော မိသားစုတွင် မွေးဖွားခဲ့ပါသည်။ ကောင်းကင်နှင့် မြေကြီး ဝိညာဉ်စွမ်းအင်များကို စတင် ရှူရှိုက် လေ့ကျင့်ခဲ့ပါသည်။ သင့်မွေးရာပါ ပါရမီ သိပ်မကောင်းသော်လည်း ဝိညာဉ်စွမ်းအင် ရှူရှိုက် လေ့ကျင့်မှု ဖြစ်စဉ်က အနည်းငယ် ချောမွေ့နေခဲ့သည်။]
[အသက် ၄ နှစ် - ချီစုစည်းမှု အဆင့် (၁) သို့ ရောက်ရှိပြီးနောက် သင်ဟာ ချက်ချင်း အရောင်စုံ ကျားကြီးကို သွားရောက်သတ်ဖြတ်ခဲ့ပြီး ဓားပြတစ်သိုက်ကိုပါ သတ်ဖြတ်ခဲ့သည်။ သင့်ဂုဏ်သတင်းသည် မိုင်ပေါင်း တစ်ရာ ပတ်လည်အထိ တုန်လှုပ်သွားစေခဲ့ပြီး မသေမျိုးအဖြစ် တက်လှမ်းခြင်း ဂိုဏ်း၏ အာရုံစိုက်မှုကို အောင်မြင်စွာ ရယူနိုင်ခဲ့ပါသည်။]
[အသက် ၅ နှစ် - သင်သည် မသေမျိုးအဖြစ် တက်လှမ်းခြင်း ဂိုဏ်းသို့ ဝင်ရောက်ခဲ့ပြီး ကျင့်ကြံခြင်း အရင်းအမြစ် အမြောက်အမြား ရရှိခဲ့သည်။ ဂိုဏ်းသားများနှင့် သင့်ဆက်ဆံရေး အတော်လေး သဟဇာတ ဖြစ်ခဲ့သည်။]
[အသက် ၁၁ နှစ် - သင်ဟာ ချီစုစည်းမှု အဆင့် (၂) သို့ အောင်မြင်စွာ တက်လှမ်းနိုင်ခဲ့ပါသည်။]
[အသက် ၁၃ နှစ် - သင့်တွင် ဂျူနီယာ ညီမလေး တစ်ယောက် တိုးလာခဲ့သည်။ သူမနှင့် ကောင်းမွန်သော မိတ်ဆွေဖွဲ့နိုင်ခဲ့ပါသည်။ သင့်ဆရာသခင် ဂိုဏ်းချုပ်ကြီးသည် ခရီးထွက်ရန် ပြင်ဆင်နေခဲ့သည်။ အချိန်တစ်ခုလောက် ရွှေ့ဆိုင်းဖို့ သင် အကြံပေးခဲ့သော်လည်း သူက သင့်အကြံပေးချက်ကို ဂရုမစိုက်ခဲ့ပေ။ သင် ဘာမှ ပြောင်းလဲလို့ မရမှန်း သိလိုက်ရသည်။ ထို့ကြောင့် မသေမျိုးအဖြစ် တက်လှမ်းခြင်း ဂိုဏ်းမှ စောစီးစွာ ထွက်ခွာရန် ပြင်ဆင်ရမည်ဟု သင် ခံစားလိုက်ရသည်။]
[အသက် ၁၄ နှစ် - သတင်းဆိုး ရောက်လာခဲ့သည်။ မသေမျိုးအဖြစ် တက်လှမ်းခြင်း ဂိုဏ်း၏ ဂိုဏ်းချုပ်ကြီးသည် မိစ္ဆာဂိုဏ်း၏ ချောင်းမြောင်းတိုက်ခိုက်ခြင်းကို ခံခဲ့ရသည်။ ဂိုဏ်းတွင်း ပဋိပက္ခများ စတင်လာပြီး လူအများအပြားက သင့်ကို ပစ်မှတ်ထားလာကြသည်။ သို့သော် သင်သည် ဂျူနီယာ ညီမလေးနှင့်အတူ ဂိုဏ်းမှ ထွက်ခွာသွားသည်မှာ ကြာပြီ ဖြစ်ကြောင်း သူတို့ တုန်လှုပ်စွာ တွေ့ရှိလိုက်ရသည်။]
"စီနီယာ အစ်မ... ကျွန်မတို့ နှစ်ယောက် မသေမျိုးအဖြစ် တက်လှမ်းခြင်း ဂိုဏ်းကနေ ထွက်လာခဲ့ကြပြီဆိုတော့ အနာဂတ်မှာ ဘာလုပ်ကြမလဲ" အားနည်းတဲ့ အသံတစ်ခု သူမနောက်ကနေ ထွက်ပေါ်လာခဲ့သည်။
အသံကို နားထောင်ခြင်းအားဖြင့် ချန်ချန်ရွှယ်ရဲ့ ဂျူနီယာ ညီမလေးက သိပ်အသက်မကြီးသေးကြောင်း သိသာပေသည်။ သူမက ချန်ချန်ရွှယ်ထက် တစ်နှစ်လောက် ငယ်ပေသည်။
သူမရဲ့ လေသံထဲမှာ စိုးရိမ်ပူပန်မှုနဲ့ ဇဝေဇဝါ ဖြစ်မှုတွေ ပါဝင်နေခဲ့သည်။ သူမဟာ ချန်ချန်ရွှယ်အား သူမရဲ့ ကျောရိုးသဖွယ် အားကိုးနေခဲ့လေသည်။
သူမရဲ့ မေးခွန်းကို ကြားတော့ ချန်ချန်ရွှယ်ဟာ အလွန် တည်ငြိမ်နေခဲ့ပေသည်။ မုန်တိုင်းပေါင်းများစွာကို တွေ့ကြုံခဲ့ဖူးပြီမို့ သူမရဲ့ စိတ်ခံစားချက်တို့က သိပ်မပြောင်းလဲခဲ့ချေ။ သူမ ညင်သာစွာ ပြန်ဖြေလိုက်၏။ "တခြား မသေမျိုးကျင့်ကြံခြင်း ဂိုဏ်းတစ်ခုခုကို ဝင်ဖို့ ကြိုးစားကြတာပေါ့... မသေမျိုးအဖြစ် တက်လှမ်းခြင်း ဂိုဏ်းက လူတွေ အကုန်လုံး အကျိုးစီးပွားကြောင့် မျက်စိကန်းကုန်ကြပြီ... မကြာခင် သူတို့ အကြီးအကျယ် ပြဿနာတက်ကြတော့မှာ"
"မသေမျိုးအဖြစ် တက်လှမ်းခြင်း ဂိုဏ်းမှာ ငါတို့ရဲ့ အနေအထားက တော်တော် အဆင်မပြေ ဖြစ်နေတယ်... အကယ်၍ ဂိုဏ်းထဲ ဆက်နေမယ် ဆိုရင် ပဋိပက္ခ ဝဲဂယက်ထဲ သေချာပေါက် ပါဝင်သွားလိမ့်မယ်... အဲဒီအချိန်ကျရင် လွတ်မြောက်ဖို့ သိပ်ခက်ခဲသွားလိမ့်မယ်"
"ရင်းယွမ်.. ညီမလေးရဲ့ ပါရမီက ကောင်းမွန်တယ်... ဂိုဏ်းကြီး တစ်ခုမှာ ဆိုရင်တောင် ညီမလေးက လူကြိုက်များနေဦးမှာပါ"
ချန်ချန်ရွှယ် ဆက်ပြောလိုက်၏။ "တခြား ဂိုဏ်းတွေက လက်မခံမှာကို စိတ်ပူစရာ မလိုပါဘူး"
ချန်ချန်ရွှယ်ရဲ့ ဂျူနီယာ ညီမလေး နာမည်က ဟိုရင်းယွမ်ဖြစ်၏။
ဆင်းရဲတဲ့ မိသားစုက လာတဲ့ သူမနဲ့ မတူဘဲ ဟိုရင်းယွမ်က ငယ်စဉ်ကတည်းက ချမ်းသာတဲ့ မိသားစုရဲ့ သမီးလေး ဖြစ်ခဲ့ပေသည်။ မသေမျိုးကျင့်ကြံဖို့ ပါရမီ ပါလာကြောင်း စစ်ဆေးတွေ့ရှိခဲ့လို့ သူမက မသေမျိုးအဖြစ် တက်လှမ်းခြင်း ဂိုဏ်းကို ဝင်ရောက်ဖို့ ရွေးချယ်ခဲ့တာ ဖြစ်ပေသည်။
အတွေ့အကြုံ ရင့်ကျက်တဲ့ ချန်ချန်ရွှယ်နဲ့ ယှဉ်ရင် အသက် (၁၃) နှစ်ပဲ ရှိသေးတဲ့ ဟိုရင်းယွမ်က စာရွက်အဖြူလေး တစ်ရွက်လိုပင်။
သူမက ဒီကမ္ဘာကြီးကို သိချင်စိတ် ပြင်းပြနေသလို တစ်ချိန်တည်းမှာပဲ အနည်းငယ် ကြောက်ရွံ့နေခဲ့သည်။
"ဒါဆို... စီနီယာ အစ်မ... အစ်မ ကျွန်မနဲ့အတူ လိုက်မှာလား" ဟိုရင်းယွမ် အသံတိုးတိုးလေးနဲ့ မေးလိုက်သည်။
"အင်း" ချန်ချန်ရွှယ် ပြုံးလိုက်၏။ "အစ်မ မလိုက်ရင် တစ်ယောက်ယောက် ညီမလေးကို အနိုင်ကျင့်တဲ့အခါ ဘယ်သူက ကာကွယ်ပေးမှာလဲ"
...