အခန်း ၂၀ : ဆုလာဘ်များ ရရှိခြင်း

​[သင် ဖိတ်ကြားထားသည့် ကိုယ်စားလှယ်လောင်း ချန်ချန်ရွှယ်ဟာ သရုပ်ဖော် မသေမျိုးကျင့်ကြံခြင်း ဘဝတွင် (၁၆) နှစ်၊ (၁) လ နှင့် (၁၉) ရက်တိုင်တိုင် အသက်ရှင် နေထိုင်ခဲ့ပါသည်။ နောက်တစ်ကြိမ် သရုပ်ဖော်မှု မပြုလုပ်မီ (၂၄) နာရီ အချိန်စောင့်ဆိုင်းရပါမည်။]

​[ချန်ချန်ရွှယ်ဟာ တတိယအကြိမ် သရုပ်ဖော်မှုတွင် ဂိုဏ်းတစ်ခုသို့ ဝင်ရောက်နိုင်ခဲ့ပါသည်။ ထပ်ဆောင်း ဆုလာဘ် ရရှိပါသည်]

​[သင်သည် အောက်ပါ ဆုလာဘ်များကို ရရှိလိုက်ပ့သည် ]

​[ဆုလာဘ် ၁ - ကျောက်စိမ်း ကျင့်စဉ် (မသေမျိုးအဖြစ် တက်လှမ်းခြင်း ဂိုဏ်း၏ မသေမျိုးကျင့်စဉ်၊ အမြင့်ဆုံး ရွှေအမြုတေ အဆင့်အထိ ကျင့်ကြံနိုင်ပါသည်)]

​[ဆုလာဘ် ၂ - ချီစုစည်းမှု အဆင့် (၂) (ချန်ချန်ရွှယ် (၁၆) နှစ်တာ ပြင်းပြင်းထန်ထန် ကျင့်ကြံထားသော ကျင့်ကြံမှုအဆင့်)]

​[ဆုလာဘ် ၃ - ဓား (ဓားလမ်းစဉ်နှင့် ရေစက်ပါခြင်း)]

​[ထပ်ဆောင်း ဆုလာဘ် - ပိုင်ဖျင်ဓား (မသေမျိုးကျင့်ကြံခြင်း ဂိုဏ်းချုပ်ကြီးမှ ချန်ချန်ရွှယ်အား ပေးသနားခဲ့သော ဝိညာဉ်ဓား)]

​[ကျေးဇူးပြု၍ ဆုလာဘ် တစ်ခုခုကို ရွေးချယ်ပါ။ ထပ်ဆောင်း ဆုလာဘ်သည် မဖြစ်မနေ ရရှိမည့် ဆုလာဘ် ဖြစ်ပါသည်။ သီးသန့် ရွေးချယ်စရာ မလိုပါ။]

​မသေမျိုးကျင့်ကြံခြင်း သရုပ်ဖော် စနစ်ရဲ့ ဆုလာဘ် (၃) ခုနဲ့ ထပ်ဆောင်း ဆုလာဘ်ကို ကြည့်ပြီး ပိုင်ယီ တော်တော်လေး တွေဝေသွားခဲ့သည်။

​အကြောင်းမှာ ဆုလာဘ် (၃) ခုစလုံးက သိပ်ကောင်းနေတာပြီး သူ အကုန် လိုချင်နေတာကြောင့်ပင်။

​ကျောက်စိမ်း ကျင့်စဉ်က ဓားကျင့်စဉ်နဲ့ ယှဉ်လို့ မရဘူး ဆိုပေမယ့် သူကလည်း မသေမျိုးကျင့်ကြံခြင်း ကျင့်စဉ် တစ်ခုပါပင်။ မသေမျိုးကျင့်ကြံခြင်း လောကမှာ ပြည့်စုံတဲ့ မသေမျိုးကျင့်စဉ် တစ်ခုဆိုရင် ဘာပဲဖြစ်ဖြစ် အလွန် တန်ဖိုးရှိပေသည်။

​ကျောက်စိမ်း ကျင့်စဉ်ရဲ့ အမြင့်ဆုံး အဆင့်က ရွှေအမြုတေ အဆင့်ပဲ ရှိတယ် ဆိုရင်တောင် လုယူချင်တဲ့ မသေမျိုးကျင့်ကြံသူတွေ အများကြီး ရှိနေမှာပင်။

​အကယ်၍ ရောင်းစားလိုက်ပါက သေချာပေါက် ဈေးကောင်း ရမှာဖြစ်ပေသည်။

​ကြားဖူးတာတော့ မသေမျိုးကျင့်ကြံသူတွေ သုံးတဲ့ ငွေကြေးက ရွှေ၊ ငွေ မဟုတ်ဘဲ ဝိညာဉ်ကျောက်လို့ ခေါ်တဲ့ အရာပင်။

​ဝိညာဉ်ကျောက်တွေကို ကုန်သွယ်ရာမှာ သုံးနိုင်သလို ကျင့်ကြံခြင်းမှာ အထောက်အကူ ဖြစ်အောင်လည်း သုံးနိုင်ပေသည်။

​တစ်ချိန်တည်းမှာပဲ လက်နက်တွေ သန့်စင်ဖို့နဲ့ ဆေးလုံးတွေ ဖော်စပ်ဖို့လည်း သုံးနိုင်လေသည်။

​ပြောရမယ်ဆိုရင်... ပိုင်ယီသာ ကျောက်စိမ်း ကျင့်စဉ်ကို ရွေးလိုက်ရင် အဲဒါကို သုံးပြီး ကျင့်ကြံခြင်း အရင်းအမြစ် အမြောက်အမြားနဲ့ လဲလှယ်လို့ ရနိုင်လေသည်။

​ဒုတိယ ဆုလာဘ်ကတော့ ချန်ချန်ရွှယ်ရဲ့ သရုပ်ဖော် စနစ်ထဲက ကျင့်ကြံမှုကို ဆက်ခံရယူခြင်းပင်။

​အသက်ရှူချိန် တစ်ကြိမ်အတွင်းမှာပဲ သူဟာ သာမန်လူ တစ်ယောက် အဖြစ်ကနေ ချီစုစည်းမှု အဆင့် (၂) ကို တက်လှမ်းနိုင်ပြီး မသေမျိုးကျင့်ကြံသူ အစစ်အမှန် ဖြစ်လာပေလိမ့်မည်။

​လက်ရှိအချိန်မှာ ပိုင်ယီ ခန္ဓာကိုယ်ထဲမှာ ဝိညာဉ်စွမ်းအင် ရှိတယ် ဆိုပေမယ့် သူ့ကို မသေမျိုးကျင့်ကြံသူလို့ သတ်မှတ်လို့ မရသေးပေ။

​ချန်ချန်ရွှယ်ရဲ့ ကျင့်ကြံမှုအဆင့်ကို ဆက်ခံရယူလိုက်ရင် လီမျိုးနွယ်စုကို ပိုကောင်းကောင်း ကိုင်တွယ်နိုင်မှာ ဖြစ်သလို ဒီအန္တရာယ်များတဲ့ ကမ္ဘာကြီးမှာ စောစောစီးစီး ကိုယ့်ကိုယ်ကိုယ် ကာကွယ်နိုင်စွမ်း အတိုင်းအတာ တစ်ခုအထိ ရှိလာမည်ပင်။

​တတိယ ဆုလာဘ်ကလည်း တန်ဖိုးရှိလေသည်။ ဒါက ရှားပါးတဲ့ မွေးရာပါ ပါရမီ တစ်မျိုးပင်။

​ဒါက မသေမျိုးကျင့်ကြံခြင်းအတွက် အခြေခံအုတ်မြစ် တည်ဆောက်ပေးမည်ဖြစ်ပြီး ပေတစ်သောင်း မြင့်တဲ့ အဆောက်အဦ တစ်ခု မြေကြီးထဲက ထိုးထွက်လာနိုင်တာက ကောင်းမွန်တဲ့ အခြေခံအုတ်မြစ်ကြောင့်ပါပင်။ တစ်နည်းပြောရရင် ပါရမီ ဆိုတာ အခြေခံအုတ်မြစ်နဲ့ တူပေသည်။

​ဆုလာဘ် (၃) ခုစလုံး သိပ်ကောင်းလွန်းနေလို့ ပိုင်ယီ ရွေးရခက်နေခဲ့၏။

'​နံပါတ် (၁) ကို ရွေးရမလား..'

​'နံပါတ် (၂) ကို ရွေးရမလား..'

​'နံပါတ် (၃) ကို ရွေးရမလား..'

​အတွေးပေါင်းစုံ ခေါင်းထဲ ဖြတ်သန်းသွားပြီးနောက်မှာ နောက်ဆုံးတော့ ပိုင်ယီဟာ မှန်ကန်တယ်လို့ ထင်ရတဲ့ ရွေးချယ်မှု တစ်ခုကို ပြုလုပ်လိုက်၏။ "ငါ နံပါတ် (၂) ကို ရွေးမယ်!

"

​သူ ချီစုစည်းမှု အဆင့် (၂) ကျင့်ကြံမှုအဆင့်ကို လိုချင်ပေသည်။

​ပိုင်ယီ ကောင်းကောင်း သိထားလေသည်။

​လောလောဆယ် သူနဲ့ ချင်းဟယ် ခရိုင်က လီမျိုးနွယ်စုကြား ဆက်ဆံရေးက အဆင်မပြေ ဖြစ်နေခဲ့သည်။ လီမျိုးနွယ်စုက ချင်းဟယ် ခရိုင်မှာ နှစ်ပေါင်း ရာနဲ့ချီ ရပ်တည်လာနိုင်တာကြောင့် သာမန်လူတွေ မသိတဲ့ အခြေခံအုတ်မြစ် တစ်ခုခု မရှိဘူးလို့ ပိုင်ယီ မယုံကြည်ပါပေ။ ဒီလို အခြေခံအုတ်မြစ်မျိုးက လူကို သေစေနိုင်လောက်ပေသည်။

​သူ့အနေနဲ့ အချိန်တိုအတွင်း ကိုယ့်ကိုယ်ကိုယ် ကာကွယ်နိုင်လောက်တဲ့ ခွန်အား လိုအပ်နေပြီး ဒုတိယ ဆုလာဘ်ကပဲ အဲဒါကို ပေးစွမ်းနိုင်မှာ ဖြစ်လေသည်။

​သူ ရွေးချယ်လိုက်တဲ့ အခိုက်အတန့်မှာပဲ အလွန် သန့်စင်တဲ့ ဝိညာဉ်စွမ်းအင် အမြောက်အမြားက သူ့ရဲ့ ဒန်ထျန်းနဲ့ ချီကြောတွေထဲကို ရူးသွပ်မတတ် စီးဝင်လာခဲ့သည်။

​မျက်စိတစ်မှိတ်အတွင်းမှာပဲ သူ့ချီကြောတွေက ဘယ်လောက်တောင် ကျယ်ပြန့်သွားလဲ မသိတော့ပေမဲ့ ခန္ဓာကိုယ်ထဲက ဝိညာဉ်စွမ်းအင်တွေက စီးဆင်းနေတဲ့ စမ်းချောင်းလေး တစ်ခုလို ဖြစ်နေခဲ့လေသည်။

​သူ့ရဲ့ ခြေလက်အင်္ဂါတွေနဲ့ အရိုးတွေကို ဝိညာဉ်စွမ်းအင်တွေက အဆက်မပြတ် ဆေးကြောပေးနေခ​ဲ့ပြီး သူ့ရဲ့ ရုပ်ပိုင်းဆိုင်ရာ ခန္ဓာကိုယ်က စတင် ပြောင်းလဲလာခဲ့လေသည်။

​သူ့ရဲ့ အာရုံခံစားမှု (၅) ခုလည်း ပြောင်းလဲနေလာခဲ့သည်။

​"ဘုန်း.."

​အသံအက်အက် တစ်ခု ကြားလိုက်ရသလိုမျိုး ပိုင်ယီဟာ အခက်အခဲ မရှိဘဲ ချီစုစည်းမှု အဆင့် (၁) ကို တက်လှမ်းနိုင်ခဲ့လိုက်သည်။

​ဒါပေမဲ့ မပြီးသေးချေ။

​ဝိညာဉ်စွမ်းအင် အမြောက်အမြားက သူ့ချီကြောတွေနဲ့ ဒန်ထျန်းထဲ ဆက်လက် စီးဝင်နေဆဲ ဖြစ်ပေမယ့် သူ့အား မသက်မသာ မဖြစ်စေခဲ့ပဲ ၎င်းအစား သူဟာသက်သောင့်သက်သာ ရှိနေခဲ့လေသည်။

​အတိုချုပ်ပြောရရင်...

"​သိပ်ကောင်းတာပဲ"

​"ဘုန်း.."

​မမြင်ရတဲ့ ဝိညာဉ်စွမ်းအင်တွေဟာ ရုတ်တရက် အရပ်မျက်နှာ အနှံ့ ဖြာထွက်သွားခဲ့ပြီး သူ့အဝတ်အစား အစွန်းတွေကို လွင့်ပျံသွားစေခဲ့သည်။

​ချီစုစည်းမှု အဆင့် (၂)...

​တစ်မိနစ်တောင် မပြည့်ခင်မှာ သူဟာ ချီစုစည်းမှု အဆင့် (၂) ကို တက်လှမ်းနိုင်ခဲ့လေသည်။

​ပိုင်ယီ မျက်လုံးဖွင့်လိုက်၏။ သူဟာ လွန်ခဲ့တဲ့ တစ်မိနစ်ကနဲ့ လုံးဝ ကွဲပြားခြားနားသွားသလို ခံစားလိုက်ရသည်။ သူ့ရဲ့ သက်ရှိပုံစံကို အဆင့်မြှင့်တင်လိုက်သလို ဖြစ်သွားပြီး ဒီပြောင်းလဲမှုကို ရှင်းပြဖို့ ခက်ခဲနေခဲ့သည်။

​'ဒါက မသေမျိုးကျင့်ကြံသူ ဖြစ်ရခြင်းရဲ့ ခံစားချက်လား.. ဒါက ချီစုစည်းမှု အဆင့် (၂) ရဲ့ ကျင့်ကြံမှုအဆင့်လား...'

​တစ်ချိန်တည်းမှာပဲ ဓားအိမ်ထဲ ထည့်ထားတဲ့ ဝိညာဉ်ဓား တစ်ချောင်း သူ့လက်ထဲသို့ လေထဲကနေ ရုတ်တရက် ပေါ်လာခဲ့သည်။

​ပိုင်ဖျင်ဓား....

​မသေမျိုးကျင့်ကြံခြင်း သရုပ်ဖော် စနစ်ထဲက ချန်ချန်ရွှယ်ရဲ့ ဝိညာဉ်ဓားပင်။

​ချန်ချန်ရွှယ် ဝိုင်းရံခံရတုန်းက ဒီဝိညာဉ်ဓားက အတော်လေး ပျက်စီးနေခဲ့ပေသည်။။

​ဒါပေမဲ့ ပိုင်ယီ ဆွဲထုတ်လိုက်တဲ့အခါ အကောင်းပကတိ အတိုင်း ရှိနေတာ တွေ့လိုက်ရ၏။

​ဓားသွားက အေးစက်တဲ့ အလင်းရောင်နဲ့ တောက်ပနေခဲ့ပြီး လူတွေကို တုန်လှုပ်သွားစေနိုင်ပေသည်။

​"ထိန်းချုပ်စမ်း" ပိုင်ယီဟာ လက်ချောင်းတွေ လှုပ်ရှားပြီး အော်လိုက်၏။ ထိုနောက် ပိုင်ဖျင်ဓားဟာ သူ့လက်ထဲကနေ ချက်ချင်း ထွက်ခွာသွားပြီး သူ့ပတ်လည်မှာ ရေကူးနေတဲ့ နဂါးတစ်ကောင်လို ပျံဝဲနေခဲ့လေသည်။ ၎င်းက ယုံကြည်နိုင်စရာ မကောင်းလောက်အောင် ဖျတ်လတ်နေခဲ့ပေသည်။

​ချီစုစည်းမှု အဆင့် (၂) ကျင့်ကြံသူ တစ်ယောက် အနေနဲ့ ဓားကျင့်စဉ်ထဲက ဓားထိန်းချုပ်ခြင်း ပညာကို အသုံးပြုပြီး ဓားကို ကျွမ်းကျင်စွာ ထိန်းချုပ်နိုင်နေပေပြီ။

​ယခုအခါ၌ ဓားဟာ လေထဲမှာ ပျံဝဲတဲ့အခါ အရင်လို လုံးဝ တုန်ခါခြင်း မရှိတော့ပဲ အလွန် တည်ငြိမ်နေခဲ့သည်။

​ပိုင်ယီရဲ့ ထိန်းချုပ်မှုအောက်မှာ ပိုင်ဖျင်ဓားက အခန်းထဲမှာ အလွန် လျင်မြန်တဲ့ အရှိန်နဲ့ ဟိုဒီ ပျံသန်းနေခဲ့ပြီး မကြာခင်မှာပဲ ကံဆိုးတဲ့ ယင်ကောင် အနည်းငယ်ဟာ မြေကြီးပေါ် ပြုတ်ကျလာပြီး အားလုံး နှစ်ပိုင်းပြတ်နေခဲ့ကြသည်။

​ဓားသွားနဲ့ ထိစရာတောင် မလိုပေ။ ဓားထိန်းချုပ်ခြင်း ပညာကြောင့် ဖြစ်လာတဲ့ လေပြင်းက ယင်ကောင်တွေကို ဖြတ်တောက်ဖို့ လုံလောက်နေပေပြီ။

​"ချီစုစည်းမှု အဆင့် (၂) ကျင့်ကြံသူနဲ့ သာမန်လူ ဆိုတာ တူညီတဲ့ အဆင့်မှာ ရှိမနေဘူးပဲ"

​ပိုင်ယီ သက်ပြင်းချလိုက်၏။

​(၃) နှစ်တာ အတွင်းအားနှင့် သိုင်းပညာ အတွေ့အကြုံ၊ ဓားကျင့်စဉ် အပြည့်အစုံ၊ ဝိညာဉ်စွမ်းအင် အနည်းငယ်၊ ချီစုစည်းမှု အဆင့် (၂) ကျင့်ကြံမှုအဆင့်၊ ပိုင်ဖျင်ဓား။

​ဒါတွေ အားလုံးက လွန်ခဲ့တဲ့ (၃) ရက်အတွင်း သူတော်စင်မရဲ့ မသေမျိုးကျင့်ကြံခြင်း သရုပ်ဖော်မှုကနေ ပိုင်ယီ ရရှိခဲ့တဲ့ ဆုလာဘ်တွေပင်။

​သူ ပြောချင်တာက လွန်ခဲ့တဲ့ ရက်အနည်းငယ်က သူ့ဆုံးဖြတ်ချက် မှန်ကန်တယ်ဆိုတာပင်။။

​အကယ်၍ သူသာ ချန်ချန်ရွှယ်ကို မသေမျိုးကျင့်ကြံခြင်း သရုပ်ဖော် စနစ်ထဲ မဆွဲသွင်းခဲ့ရင် သူ ကိုယ်တိုင် ပြင်းပြင်းထန်ထန် သရုပ်ဖော်နေရအုံးမည်ဖြစ်ပြီး ဆုလာဘ်ရဖို့ အရည်အချင်း ပြည့်မီအောင် ဘယ်နှခါလောက် ထပ်သေရဦးမလဲ မသိချေ။။

​...

​ချန်အိမ်တော်။

​ချန်ချန်ရွှယ်ဟာ သူမရဲ့ မျက်လုံးတွေကို ဖွင့်လိုက်သည်။ သို့ပေမဲ့ သူမ၏ မျက်နှာက သိပ်မကောင်းလှပေ။ ဘာပဲဖြစ်ဖြစ် သူမက ရွေးချယ်စရာမဲ့သွားလို့ ကိုယ့်ကိုယ်ကိုယ် သတ်သေဖို့ ရွေးချယ်ခဲ့ရတာဖြစ်ပြီး သူမ မသေချင်သေးပေ။

​မသေမျိုးကျင့်ကြံခြင်း သရုပ်ဖော် စနစ်ထဲမှာ သေဆုံးတိုင်း သူမဟာ အစကနေ ပြန်စရပေသည်။

​၎င်းက အချိန်တွေ  ဖြုန်းတီးလိုက်ရခြင်းပင်။

​"ဂိုဏ်းအသေးစားလေး တစ်ခုကို ထိန်းချုပ်ဖို့အတွက် သူတို့ တစ်ယောက်ချင်းစီက ပုံမှန် ဟန်ဆောင်မှုတွေကို ခွာချပြီး ရုပ်ဆိုးတဲ့ မျက်နှာတွေကို ထုတ်ပြကြတယ်.... ဒီ မသေမျိုးကျင့်ကြံသူတွေက သာမန်လူတွေထက်တောင် ပိုကောက်ကျစ်ကြသေးတယ်"

​"ဒီလို တိုက်ပွဲမျိုးမှာ ပါဝင်ပတ်သက်ရပြီ ဆိုကတည်းက ဂျူနီယာ ညီမလေးလိုပဲ အမြန်ဆုံး ထွက်ခွာဖို့ ရွေးချယ်ခဲ့သင့်တာ"

​"နောက်ဆုံးတော့ ငါက မသေမျိုးအဖြစ် တက်လှမ်းခြင်း ဂိုဏ်းမှာ နေခဲ့ရပြီး ပစ်မှတ်ထားခံလိုက်ရတာပဲ"

​"ဟူး"

​ချန်ချန်ရွှယ်ဟာ ခေါင်းခါလိုက်ပြီး သူမရဲ့ အတွေးတွေကို တည်ငြိမ်အောင် အစွမ်းကုန် ကြိုးစားလိုက်၏။ မဒေါသထွက်ပါဘူးလို့ ပြောရင် သူမ လိမ်ရာ ကျနေမှာပင်။

​ဒီလိုကိစ္စမျိုးကို ဘယ်သူက မဒေါသထွက်ဘဲ နေမည်နည်း။

​သူမနဲ့ ဘာမှမဆိုင်သလို သူမ ပါလည်း မပါချင်ပေမဲ့ နောက်ဆုံးတော့ သူမပဲ ခံစားလိုက်ရပေသည်။

​မိစ္ဆာဂိုဏ်းနဲ့ ပေါင်းလိုက်တဲ့ အဲဒီမိန်းမ ဘာတွေ တွေးနေလဲ သူမ မသိတော့ချေ

​ဒီအချိန်မှာ မသေမျိုးကျင့်ကြံခြင်း သရုပ်ဖော် စနစ်ရဲ့ သတိပေးချက် နောက်ဆုံးတော့ ပေါ်လာပြီး သူမရဲ့ အာရုံကို လွှဲပြောင်းလိုက်၏။

​[သင်ဟာ တတိယအကြိမ် မသေမျိုးကျင့်ကြံခြင်း သရုပ်ဖော် ဘဝတွင် (၁၆) နှစ်၊ (၁) လ နှင့် (၁၉) ရက်တိုင်တိုင် အသက်ရှင် နေထိုင်ခဲ့ပါသည်။ သင်ဟာ ဆုလာဘ်ရယူရန် အရည်အချင်း ပြည့်မီပါသည်။ နောက်တစ်ကြိမ် သရုပ်ဖော်မှု မပြုလုပ်မီ (၁၂) နာရီ အချိန်စောင့်ဆိုင်းရပါမည်။]

​[ချန်ချန်ရွှယ်... သင်ဟာ တတိယအကြိမ် သရုပ်ဖော်မှုတွင် ဂိုဏ်းတစ်ခုသို့ ဝင်ရောက်နိုင်ခဲ့သည်။ သင်ဟာ ထပ်ဆောင်း ဆုလာဘ်ကို ရရှိလိုက်ပါသည်]

​[သင်သည် အောက်ပါ ဆုလာဘ်များကို ရရှိလိုက်ပါသည် - ]

​[ဆုလာဘ် - ချီစုစည်းမှု အဆင့် (၂) ဝိညာဉ်စွမ်းအင် အားလုံး (အလွန် သန့်စင်သော ဝိညာဉ်စွမ်းအင်)]

​[ထပ်ဆောင်း ဆုလာဘ် - ပြန်လည်နုပျိုဆေးလုံး နှစ်လုံး (မသေခင်က သင် အသုံးမပြုလိုက်ရသော ဆေးလုံးများ)]

​...