အခန်း ၂ : မသေမျိုးကျင့်ကြံခြင်း အဓိပ္ပာယ်အစစ်မှန်ကို သိရှိချင်သလား

​ချင်းဟယ် ခရိုင်။

​ချန်အိမ်တော်။

​နှစ်တစ်ထောင်မှ တစ်ကြိမ်သာ ပေါ်ထွက်လာသည့် ပါရမီရှင်ဟု လူတိုင်း သိထားကြသည့် ချန်ချန်ရွှယ်ဟာ ဖြည်းဖြည်းချင်း မျက်လုံးဖွင့်လိုက်၏။

​သူမဟာ မနေ့ညကတည်းက စိတ်နှစ်ပြီး ကျင့်ကြံအားထုတ်နေခဲ့လေသည်။ သို့ပေမဲ့ သူမ၏ ကျင့်ကြံမှု အတားအစီးက လုံးဝ လျော့ရဲလာခြင်း မရှိသေးပေ။

​"ဒီမှာက ဝိညာဉ်စွမ်းအင် ပါးလွှာလွန်းတယ်..  ဒီမှာ ဆယ်ရက်လောက် ကျင့်ကြံတာက ဂိုဏ်းမှာ တစ်နာရီလောက် ကျင့်ကြံတာလောက်တောင် မထိရောက်ဘူး"

​ချန်ချန်ရွှယ်ဟာခေါင်းခါလိုက်ပြီး ရေရွတ်လိုက်၏။

​"ဟူး...ဒီလို ကျင့်ကြံနှုန်းနဲ့ဆိုရင်... ဘယ်တော့များမှ အတားအစီးကို ချိုးဖျက်ပြီး အခြေတည်အဆင့် (၂) ကို ရောက်နိုင်မလဲ မသိဘူး"

​သူမဟာ (၁၉) နှစ်သာ ရှိသေးသော်လည်း အခြေတည်အဆင့် (၁) ကျင့်ကြံသူ တစ်ယောက် ဖြစ်နေပေပြီ။

​သူမအနေဖြင့် ဝိညာဉ်ဓားဂိုဏ်း၏ သူတော်စင်မ ဖြစ်လာနိုင်ခဲ့ခြင်းမှာ ဤကဲ့သို့ ချဲ့ကားပြောရလောက်သည့် ပါရမီတို့ကြောင့် ဖြစ်၏။

​သို့သော် ပါရမီ ဘယ်လောက်မြင့်မြင့် အတားအစီး ဆိုတာ ရှိလာမြဲပင်။ ယခု သူမဟာ ထိုကဲ့သို့သော အတားအစီးမျိုးနှင့် ကြုံတွေ့နေခဲ့ရလေသည်။

​ချန်ချန်ရွှယ်ဟာ အခြေတည်အဆင့် (၁) တွင် တန့်နေသည်မှာ တစ်နှစ်တိတိ ရှိသွားပြီ ဖြစ်ပေသည်။

​သူမအနေဖြင့် စိတ်ပူပန်မိသည်မှာ ရှောင်လွှဲမရပေ။

​တကယ်လို့များ...

​တခြားသူတွေသာ သူမရဲ့ စိုးရိမ်ပူပန်မှုကို သိသွားခဲ့ရင်ပါက မနာလိုလွန်းလို့ သွေးအန်သွားကြလောက်လေသည်။

​မသေမျိုးကျင့်ကြံသူ အများစုဟာ သူတို့တစ်သက်လုံး အခြေတည်အဆင့်သို့ မရောက်နိုင်ကြပေ။

​အသက် ၁၀၀၊ ၂၀၀ ရောက်သည်အထိ ချီစုစည်းမှု အဆင့်မှာပဲ ရှိနေသေးတဲ့ ကျင့်ကြံသူတွေ နေရာတိုင်းမှာ ရှိနေလေသည်။

​ထို့ကြောင့် ချန်ချန်ရွှယ်၏ ပါရမီအား မိစ္ဆာဆန်သောပါရမီဟုပင် တင်စားနိုင်ပေသည်။

​သူမ မတ်တတ်ရပ်လိုက်စဉ်မှာပင်...

​ရုတ်တရက် သူမ၏ မျက်နှာက အေးစက်သွား၏။

​"ဘယ်သူလဲ"

​"ချွင်.."

​အေးစက်သော အလင်းတန်းတစ်ခု လက်ခနဲ ဖြစ်သွားပြီး ချန်ချန်ရွှယ်၏ လက်ထဲသို့ ရောက်ရှိလာခဲ့သည်။ တုန်လှုပ်ဖွယ်ကောင်းသော ဓားအသိစိတ်တစ်ခုဟာ  အိမ်တော်ကို ဖြတ်သန်းသွားခဲ့လေသည်။ ရုတ်တရက် အပူချိန်ဟာ ဒီဂရီ အနည်းငယ် ကျဆင်းသွားသလို ခံစားလိုက်ရပေသည်။

​"ဟမ်..." ချန်ချန်ရွှယ်ဟာ မည်သည့် ထူးဆန်းသော အော်ရာကိုမျှ မခံစားရကြောင်း ချက်ချင်း သိလိုက်ရ၏။

​ချန်အိမ်တော်ရှိ လူအများစုမှာ သာမန်လူများသာ ဖြစ်ကြပြီး မသေမျိုးကျင့်ကြံသူများ ရှိလျှင်တောင် အားလုံးက ချီစုစည်းမှု အဆင့်သာ ရှိကြပေသည်။

​သူမထက် အားနည်းသူ တစ်ယောက်ယောက်က သူမ၏ အသိစိတ်ထဲ တိတ်တဆိတ် ဝင်ရောက်လာခြင်းက လုံးဝ မဖြစ်နိုင်ပေ။

​သူမထက် အများကြီး ပိုသန်မာသူတွေမှသာ သူမ မသိအောင် ပုန်းကွယ်နိုင်မည် ဖြစ်၏။ အနည်းဆုံး ရွှေအမြုတေအဆင့်လောက် ရှိမှ ရပေမည်။

​ဒါပေမဲ့... သူတို့က ရွှေအမြုတေ အဆင့် ရောက်နေပြီဆိုရင် ဘာလို့ သူမကို ဗြောင်ကျကျမတိုက်ခိုက်ကြတာလဲ..'

​သူမဟာ အနည်းငယ် စိတ်ကို တည်ငြိမ်အောင် ထားလိုက်ပြီး သူမ၏ အသိစိတ်ထဲ ပေါ်လာသည့် အရာများကို ပြန်လည် ဆန်းစစ်ကြည့်လိုက်၏။

​၎င်းမှာ စာကြောင်း နှစ်ကြောင်း ဖြစ်ပေသည်။

​[မသေမျိုးကျင့်ကြံခြင်း၏ အဓိပ္ပာယ်အစစ်အမှန်ကို သင် သိရှိနားလည်ချင်သလား။ စစ်မှန်သော အသက်ရှင်ခြင်းကို သင် လိုလားသလား။]

​[သိလိုပါတယ်]

​[မသိလိုပါ]

​ထိုစာကြောင်း နှစ်ကြောင်း၏ ညာဘက်ထောင့်တွင် သေးငယ်လွန်း၍ သေချာမမြင်ရသော X သင်္ကေတလေး တစ်ခု ရှိနေခဲ့သည်။ ချန်ချန်ရွှယ်ဟာ ထို X သင်္ကေတလေးက ဘာကို ဆိုလိုမှန်း နားမလည်ပေ။

​ဒါက... သူမကို ရွေးချယ်ခိုင်းတာလား။

​မသေမျိုးကျင့်ကြံခြင်း၏ အဓိပ္ပာယ်အစစ်အမှန်...

​စစ်မှန်သော အသက်ရှင်ခြင်း...

​သူမဟာ စကားတစ်ခွန်းမျှ ထပ်မပြောဘဲ [မသိလိုပါ] ကို ရွေးချယ်လိုက်သည်။ အကြောင်းမှာ ဤအရာတွင် တစ်ခုခု မှားယွင်းနေသည်ဟု ခံစားလိုက်ရသောကြောင့် ဖြစ်၏။ ကံကောင်းခြင်း လက်ဆောင်ဖြစ်နိုင်ခြေက သိပ်မများလှပေ။ ကံကောင်းခြင်း လက်ဆောင်ဆိုတာ ဘယ်တုန်းက ဒီလို ထူးဆန်းတဲ့ နည်းလမ်းနဲ့ ပေါ်လာဖူးလို့လဲ....

​သို့သော်...

​ချန်ချန်ရွှယ် ရွေးချယ်ပြီးနောက်တွင် သူမ၏ အမြင်အာရုံက ရုတ်တရက် မည်းမှောင်သွားခဲ့လေသည်။ မှောင်မိုက်သော ချောက်နက်ထဲ ပြုတ်ကျသွားသလိုမျိုး ဖြစ်သွားခဲ့၏။ ထိုအချိန်တွင် သူမ၏ ခန္ဓာကိုယ်ကို မလှုပ်ရှားနိုင်တော့သလို မျက်လုံးကို လှည့်ချင်ရင်တောင် မရတော့ချေ။

​ဝိညာဉ်စွမ်းအင် ရှိနေခြင်းကိုလည်း မခံစားရတော့ဘဲ သူမ၏ ဝိညာဉ်အာရုံက ခန္ဓာကိုယ်ထဲ ပိတ်မိနေသလို ခံစားလိုက်ရလေသည်။

​'သောက်ကျိုးနည်း..'

​ချန်ချန်ရွှယ်ဟာ ထောင်ချောက်ထဲ မိသွားပြီမှန်း ချက်ချင်း နားလည်လိုက်သော်လည်း လွတ်မြောက်ရန် နည်းလမ်း မရှိပေ။ သူမ ခန္ဓာကိုယ်ထဲက ဝိညာဉ်စွမ်းအင်ကိုတောင် အသုံးပြုလို့ မရတော့ချေ။

​သူမ၏ အသိစိတ်သာ နိုးကြားမနေလျှင် သူမဟာ သေဆုံးသွားပြီဟု ထင်မှတ်မိလောက်ပေသည်။

​ထိုအချိန်တွင်...

​သူမ၏ မျက်စိရှေ့တွင် အရာတစ်ခု နောက်ဆုံး၌ ပေါ်လာခဲ့သည်။

​နောက်ထပ် စာကြောင်း အနည်းငယ် ဖြစ်သော်လည်း အကြောင်းအရာမှာ ယခင်နှင့် မတူတော့ပေ။

​[မသေမျိုးကျင့်ကြံခြင်း သရုပ်ဖော် စနစ်မှ ကြိုဆိုပါသည်။ သင်ဟာ သရုပ်ဖော်မှုထဲတွင် ဘဝသစ် တစ်ခုကို စတင်နိုင်ပါပြီ]

​'မသေမျိုးကျင့်ကြံခြင်း သရုပ်ဖော် စနစ်... ဒါက ဘာကြီးလဲ..'

​'မှော်ရတနာလား..'

​'အစီအရင်လား...'

​'ဒါရဲ့ ရည်ရွယ်ချက်က ဘာလဲ... ဘာလို့ သူမကို ဒီထဲမှာ ပိတ်လှောင်ထားတာလဲ..'

​မေးခွန်းများက သူမ၏ ခေါင်းထဲ ပေါ်လာသော်လည်း မည်သူကမျှ ဖြေကြားမပေးပေ။

​[သရုပ်ဖော် မသေမျိုးကျင့်ကြံခြင်း လုပ်ငန်းစဉ်တွင် သင် အသက်ရှင်သန်သည့် အချိန် ကြာလေလေ၊ သင် ကြုံတွေ့ရသည့် ဖြစ်ရပ်များက ပိုမို စိတ်လှုပ်ရှားစရာ ကောင်းလေလေ၊ သင် သေဆုံးပြီးနောက် ရရှိမည့် ဆုလာဘ်များက ပိုမို ရက်ရောလေလေ ဖြစ်ပါမည်။]

​[ဆုလာဘ်များ ရရှိရန် သတ်မှတ်ချက်မှာ (၅) နှစ် ကြာအောင် အသက်ရှင်နေထိုင်ရန် ဖြစ်ပါသည်။ ကျေးဇူးပြု၍ သတိထားပြီး ဂရုတစိုက် နေထိုင်ပါ။]

​[သရုပ်ဖော် စနစ်ထဲတွင် သေဆုံးခြင်းက အမှန်တကယ် သေဆုံးခြင်း မဟုတ်ပါ။ သင်ဟာ လက်တွေ့ကမ္ဘာတွင် အသက်ရှင်လျက် ရှိနေပါသေးသည်။]

​[ကံကောင်းပါစေ... ကံကောင်းသူလေး]

​"သရုပ်ဖော် စနစ်ထဲမှာ သေတာက အမှန်တကယ် သေတာ မဟုတ်ဘူး.. ဟမ်... ငါ စကားပြောလို့ ရတယ်လား.. ငါ လှုပ်ရှားလို့ ရသွားပြီလား..."

​ချန်ချန်ရွှယ်ဟာ စိတ်ရှုပ်ထွေးစွာဖြင့် ကိုယ့်ဘာသာ ရေရွတ်နေရင်းမှ ရုတ်တရက် သတိဝင်လာခဲ့သည်။

​သူမ ခန္ဓာကိုယ်ထဲက ဝိညာဉ်စွမ်းအင်ကို အသုံးမပြုနိုင်သေးသော်လည်း အနည်းဆုံးတော့ ယခု လှုပ်ရှားလို့ရပြီး စကားပြောလို့ ရနေပြီ ဖြစ်၏။

​စောစောကလို မလှုပ်မယှက် ဖြစ်မနေတော့ပေ။

​ယခု သူမဟာ ထူးဆန်းသော နေရာလွတ်တစ်ခုသို့ ရောက်ရှိနေပြီး မည်သို့ ထွက်ရမည်ကို မသိချေ။

​"ဒီ မသေမျိုးကျင့်ကြံခြင်း သရုပ်ဖော် စနစ် ဆိုတဲ့အရာက ဘာလုပ်ချင်လဲ ဆိုတာကို စောင့်ကြည့်ရုံပဲ ရှိတော့တယ်..."

​ချန်ချန်ရွှယ်၏ အတွေးများ လေးလံနေခဲ့သည်။

​[သင့်၏ မသေမျိုးကျင့်ကြံခြင်းဘဝကို အသက်သွင်းရန် အောက်ပါ မွေးရာပါ ပါရမီ (၁၀) ခုထဲမှ (၃) ခုကို ကျေးဇူးပြု၍ ရွေးချယ်ပေးပါ - ]

​[၁။ ခြင်္သေ့အက ကျွမ်းကျင်သူ]

​[၂။ အရှုံးသမား (လူငယ်တွေကို အနိုင်မကျင့်နဲ့၊ လူလတ်ပိုင်းတွေကို အနိုင်မကျင့်နဲ့၊ လူကြီးတွေကို အနိုင်မကျင့်နဲ့)]

​[၃။ ခြေထောက် ထိန်းချုပ်မှု (ခန့်မှန်းကြည့်လိုက်ပါ)]

​[၄။ ဉာဏ်အလင်းပွင့်သော ဆရာသခင်၏ လက်ဆောင် (အထူးပစ္စည်းတစ်ခု ရရှိဖို့ အခွင့်အရေး ရှိမယ်)]

​[၅။ ခသူးလူး (ရေဘဝဲခေါင်းနှင့် ရူးသွတ်နေသော အရူး)]

​[၆။ မျိုးနွယ်စု ကူးပြောင်းခြင်း (လူသားမျိုးနွယ် မဟုတ်သော အခြားမျိုးနွယ်စု တစ်ခု အဖြစ် ဝင်စားရန် အခွင့်အရေး ရှိသည်)]

​[၇။ ဘိုးဘေးပိုင် ကျောက်စိမ်းဆွဲပြား (ကံကောင်းခြင်း အနည်းငယ် ယူဆောင်လာပေးမည်)]

​[၈။ ဓား (ဓားနှင့် ရေစက်ပါခြင်း)]

​[၉။ ကံတရား၏ သမီးပျို (သင်ဟာ အမျိုးသမီး ဖြစ်ကို ဖြစ်ရမည်)]

​[၁၀။ ခြေတံရှည် သတ္တဝါ (သင့်၏ ခန္ဓာကိုယ် အပေါ်ပိုင်းနှင့် အောက်ပိုင်း အချိုးအစားက သိသိသာသာ မညီမမျှ ဖြစ်နေမယ်)]

​[ကျေးဇူးပြု၍ ရွေးချယ်ပါ]

​"ဒါတွေက... ဟမ်.. ဘာကြီးလဲ..."

​မွေးရာပါ ပါရမီ (၁၀) ခု သူမ ရှေ့တွင် ပေါ်လာခဲ့တာကြောင့် သူမဟာ လုံးဝ ဇဝေဇဝါ ဖြစ်သွားခဲ့ရသည်။

​ဒီ မသေမျိုးကျင့်ကြံခြင်း သရုပ်ဖော် စနစ်က သူမကို ပါရမီ (၃) ခု ရွေးခိုင်းနေသည်လား။

​ချန်ချန်ရွှယ်ဟာ ရွေးချယ်ပြီးပါက ဒီထူးဆန်းတဲ့ နေရာကနေ ထွက်ခွာလို့ ရမရ မသိပေ။ သို့သော် သူမတွင် အခြားရွေးချယ်စရာ မရှိကြောင်းကိုတော့ သိပေသည်။

​သူမ ဒီမှာ ထာဝရ နေမလား... ဒါမှမဟုတ် လောင်းကြေးထပ် ကြည့်မလား....

​သူမဟာ အံကိုကြိတ်ပြီး ဒီ မွေးရာပါ ပါရမီ (၁၀) ခုကို အလေးအနက် စတင် ကြည့်ရှုလိုက်၏။

​ရွေးချယ်စရာ ၁ ကိုတော့ သူမဟာ လျစ်လျူရှုလိုက်သည်။

​ခြင်္သေ့အက ဆိုတာ ဖျော်ဖြေရေး တစ်မျိုးမှန်း သူမ သိလေသည်။ ငယ်ငယ်တုန်းက မြင်ဖူးကာ မဆိုးလှပေမဲ့  သူမဟာ စိတ်မဝင်စားပေ။

​ရွေးချယ်စရာ ၂... ချန်ချန်ရွှယ်ဟာ မျက်မှောင်ကြုတ်လိုက်၏။ ၎င်းဥက ဘာကို ဆိုလိုမှန်း သူမ သိပ်နားမလည်ပေ။

​ဒါကို ရွေးလိုက်ရင် သူမ အရှုံးသမား ဖြစ်သွားမည်လား။

​ကြည့်ရတာ မကောင်းတဲ့ ပါရမီ ဖြစ်ပုံရလေသည်။ ထို့ကြောင့် သူမဟာ ၎င်းအား လုံးဝ ရွေးလို့ မဖြစ်ပေ။

​ရွေးချယ်စရာ ၃... ဒါကိုလည်း သူမ နားမလည်ပေ။ စိတ်ချရအောင် ကျော်လိုက်၏။

​ရွေးချယ်စရာ ၄... ချန်ချန်ရွှယ် အတွေးနက်သွားခဲ့သည်။

​ဉာဏ်အလင်းပွင့်သော ဆရာသခင်ရဲ့ လက်ဆောင်...  တာအိုလမ်းစဉ်မှာ ကျွမ်းကျင်သူလို့ ခေါ်ထိုက်တဲ့ ပုဂ္ဂိုလ်ဆိုရင် အနည်းဆုံး ရွှေအမြုတေ အဆင့် ဒါမှမဟုတ် မူလဝိညာဉ် အဆင့်လောက်တော့ ရှိရပေမည်။

​ထို့ကြောင့် သူမဟာ ဒါကို ရွေးလိုက်၏။

​ရွေးချယ်စရာ ၅... ခသူးလူး... သူမ တစ်ခါမှ မကြားဖူးဘူး။ သတိထားတာ ပိုကောင်းပေမည်။

​ရွေးချယ်စရာ ၆....  ချန်ချန်ရွှယ်ဟာ ခဏမျှ တွန့်ဆုတ်နေခဲ့သော်လည်း မရွေးချယ်ခဲ့ပေ။

အဘယ်ကြောင့်ဆိုသော် ​သူမဟာ လူသား မဟုတ်တဲ့ အကောင် ဖြစ်မသွားချင်တာကြောင့်ပင်။

​"ရွေးချယ်စရာ ၇ နဲ့ ၈ကို ကြည့်ရတာတော့ သိပ်မဆိုးဘူး" ချန်ချန်ရွှယ်ဟာ ကိုယ့်ဘာသာ ရေရွတ်လိုက်၏။

​နောက်ဆုံး ရွေးချယ်စရာ နှစ်ခုကိုတော့... သူမ လျစ်လျူရှုလိုက်လေသည်။

​သူမ (၃) ခု ရွေးချယ်ပြီးနောက် စာသားအသစ်များ သူမ မျက်စိရှေ့တွင် ပေါ်လာခဲ့သည်။

​[သင်ဟာ ပါရမီ ၄၊ ၇ နှင့် ၈ တို့ကို ရွေးချယ်လိုက်ပါပြီ။ သရုပ်ဖော် စနစ်က သင့်အ ပါရမီအမှတ် ၁၀ မှတ် ပေးအပ်လိုက်ပါသည်။ သင့်၏ ကိုယ်ပိုင် ဂုဏ်သတ္တိများကို ကျပန်း ထုတ်လုပ်နေပါပြီ...]

​[အမည် - ချန်ချန်ရွှယ်]

​[ခန္ဓာကိုယ်ဖွဲ့စည်းပုံ - ၃]

​[စိတ်စွမ်းအား - ၃]

​[မိသားစု နောက်ခံ - ၁]

​[ကံတရား - ၃]

​[ဂုဏ်သတင်း - ၁]

​[ပါရမီ - ဉာဏ်အလင်းပွင့်သော ဆရာသခင်၏ လက်ဆောင်၊ ဘိုးဘေးပိုင် ကျောက်စိမ်းဆွဲပြား၊ ဓား]

​[သဲလွန်စ - မည်သည့် ဂုဏ်သတ္တိမဆို သုည ဖြစ်သွားပါက သေဆုံးနိုင်ခြေ အလွန် မြင့်မားသွားပါမည်]

​[သင့်၏ သရုပ်ဖော် မသေမျိုးကျင့်ကြံခြင်းဘဝ တရားဝင် စတင်ပါတော့မည် - ]

​[ရေတွက်ခြင်း - ၁၀၊ ၉၊ ၈...]

​ရေတွက်ခြင်း သုည နား ကပ်လာလေ၊ ချန်ချန်ရွှယ်ဟာ ပို၍ စိတ်လှုပ်ရှားလာလေ ဖြစ်နေခဲ့သည်။

​သူမဟာ စိတ်တည်ငြိမ်အောင် ထားဖို့ ခက်ခဲနေခဲ့ပေသည်။

​[ရေတွက်ခြင်း - ၀]

​[သရုပ်ဖော်မှု စတင်ပြီ]

​မျက်စိတစ်မှိတ်အတွင်းမှာပဲ ချန်ချန်ရွှယ်၏ အမြင်အာရုံဟာ ထပ်မံ မည်းမှောင်သွားခဲ့၏။ ဒီတစ်ခါတော့ သူမ၏ အသိစိတ်ပါ စက္ကန့်အနည်းငယ် ရပ်တန့်သွားခဲ့ခြင်းပင်။

​...