အခန်း ၁၉၉ : ဖူရွှမ်နီ၏ လူသားမွေးမြူရေးအစီအစဥ်
မေပယ်လ်မြို့တော်၏ ချင်းမျိုးနွယ်စုတွင် ထည့်သွင်းထားသည့် လူအနည်းငယ်ညာ အလွန်ကောက်ကျစ်စဉ်းလဲကြသည်။ သင်အမိန့်ပေးရန် မလိုအပ်ဘဲ သင်တည်ထောင်ထားသော ယန်အဖွဲ့အစည်းအတွက် အကျိုးအမြတ်များရရှိစေရန် နည်းလမ်းများကို သူတို့ဘာသာ စဉ်းစားခဲ့ကြသည်။ သင်၏ငွေတိုးချေးသည့် လုပ်ငန်းသည် မေပယ်လ် မြို့တော်သို့ တဖြည်းဖြည်းပျံ့နှံ့သွားခဲ့သည်။
သင်၏ လက်အောက်ရှိ လူအုပ်စုမှတစ်ဆင့် သင်သည် ဝူမျိုးနွယ်စုနှင့် ချင်မျိုးနွယ်စုကြားတွင် စီးပွားရေး တံတားတစ်စင်း တည်ဆောက်နိုင်ခဲ့သည်။ အနာဂတ်တွင် မိသားစုနှစ်စု စီးပွားရေးလုပ်ဆောင်ကြသည့်အခါ သူတို့ဟာ သင့်အား အကာအကွယ်ပေးခ ပေးဆောင်ရမည်ဖြစ်သည်။
[အသက် ၂၆ နှစ်၊ သင်၏လက်အောက်ရှိ မိစ္ဆာသားရဲ အရေအတွက်ဟာ အံ့မခန်းဖွယ် ၈၆၀ သို့ ရောက်ရှိသွားခဲ့သည်]
[သင်၏ လက်အောက်ရှိ လူသားအရေအတွက်ကလည်း စုစုပေါင်း ၃၂ ဦးသို့ ရောက်ရှိသွားခဲ့သည်]
[ကြီးထွားလာနေသည့်အဖွဲ့ကို ကြည့်ပြီး သင်ဟာ အလွန် ကျေနပ်ပီတိဖြစ်မိသည်။]
အဖွဲ့ကြီးမားလာသည်နှင့်အမျှ အဖွဲ့အစည်းကို ကောင်းစွာ စည်းရုံးနိုင်ရန် အတိုင်းအတာတစ်ခုအထိ စီမံခန့်ခွဲမှု ရှိရမည်ကို ဖူရွှမ်နီသိရှိပေသည်။
အကယ်၍ ဤမိစ္ဆာသားရဲ ၈၀၀ကျော်ကို တစ်နေရာတည်းတွင် စုစည်းထားပါက ၎င်းက အလွန်ရှုပ်ထွေးကာ ပရမ်းပတာဖြစ်နေပေလိမ့်မည်။
ထို့ကြောင့် ဖူရွှမ်နီဟာ ကျင့်ကြံခြင်းဂိုဏ်းများ၏ လမ်းစဉ်ကို လိုက်နာပြီး အသန်မာဆုံး၊ ဉာဏ်အကောင်းဆုံးနှင့် အတွေ့အကြုံအများဆုံး မိစ္ဆာသားရဲများကို အကြီးအကဲများအဖြစ် စီစဉ်ခန့်အပ်ခဲ့သည်။
လက်ရှိတွင် သူမ၏လက်အောက်၌ အကြီးအကဲလေးဦးသာရှိပြီး သူတို့အားလုံးက စွမ်းအားကြီးမားသည့် မိစ္ဆာသားရဲများဖြစ်ကြသည်။
အကြီးအကဲများ၏အောက်တွင် အဖွဲ့အစည်း၏ ကျောရိုးအဖြစ် သတ်မှတ်နိုင်သည့် အကာအကွယ်ပေးသူတစ်ဦးကို သူမ စီစဉ်ခဲ့သည်။
အကာအကွယ်ပေးသူ၏အောက်တွင် အနိမ့်ဆုံး အဆင့်၏ ခေါင်းဆောင်ဖြစ်သည့် လက်ထောက်တစ်ဦး ရှိပေသည်။
......
လက်ထောက်၏ အောက်တွင် မိစ္ဆာသားရဲ လက်ပါးစေအချို့ ရှိပေသည်။
အောက်ခြေအဆင့်မိစ္ဆာသားရဲများ၏ စိတ်အားထက်သန်မှုကို လှုံ့ဆော်ရန်အတွက် အောက်ခြေအဆင့် မိစ္ဆာသားရဲလက်ပါးစေများကိုပင် အဓိက၊ အတွင်းစည်း နှင့် အပြင်စည်းအဆင့်များအဖြစ် ထပ်မံခွဲခြားထားခဲ့သည်။
ဖူရွှမ်နီသည် ကျင့်ကြံခြင်းဂိုဏ်း၏ အဖွဲ့အစည်း တည်ဆောက်ပုံကို သူမ၏ကိုယ်ပိုင်မိစ္ဆာသားရဲ အဖွဲ့အစည်းထဲသို့ ကူးယူခဲ့သည်။
ဤအရာက လုံးဝသင့်လျော်မှုမရှိကြောင်း သူမ သိလေသည်။ ဘာပဲဖြစ်ဖြစ် သူမ၏လက်အောက်ငယ်သား အုပ်စုက မိစ္ဆာသားရဲများသာဖြစ်ပြီး လူသားကျင့်ကြံသူများမဟုတ်ကြပေ။
သို့ပေမဲ့ မသင့်လျော်သည့်အရာ တစ်ခုခု ရှိနေပါက အနာဂတ်တွင် ၎င်းကို သူမပြောင်းလဲနိုင်ပေသည်။ မည်သို့ပင်ဆိုစေ ကျင့်ကြံခြင်းလောကတွင် အထူးသဖြင့် ကျင့်ကြံခြင်း သရုပ်ဖော်စနစ်ထဲရှိ မသေမျိုးကျင့်ကြံခြင်းလောကတွင် သူမ၌ ပိုင်ဆိုင်မှု သိပ်မရှိပေ။ သူမ၌ အမှားလုပ်ရန် အခွင့်အရေးများစွာ ရှိနေခြင်းသာဖြစ်သည်။
အကယ်၍ သူမဟာ ဟာကွက်များ ကို တွေ့ရှိပါက အနာဂတ်တွင် ၎င်းတို့ကို သူမပြုပြင်နိုင်ပေသည်။
အကယ်၍ လိုအပ်နေသည့် အရာများကိုတွေ့ရှိပါကလည်း အနာဂတ်တွင် ၎င်းတို့ကို ဖြည့်ဆည်းနိုင်လေသည်။
အကယ်၍ ပိုလျှံနေသည့် အရာများကိုတွေ့ရှိပါကလည်း အနာဂတ်တွင် ၎င်းတို့ကို ဖယ်ရှားပစ်နိုင်ပေသည်။
အတော်လေး ပြီးပြည့်စုံသည့် အဖွဲ့အစည်း တည်ဆောက်ပုံတစ်ခုရရှိပြီးနောက် ဖူရွှမ်နီဟာ သူမ၏လက်အောက်ရှိ မိစ္ဆာသားရဲများကို အမိန့်ပေးသည့်အခါ ယခင်ကထက် ပိုမိုထိရောက်မှု ရှိလာကြောင်းတွေ့ခဲ့ရသည်။
ထို့အပြင် အလုပ်လုပ်ရာတွင်လည်း ယခင်ကထက် ပိုမို ထိရောက်မှုရှိလာလေသည်။
သူမဟာ လုပ်ပိုင်ခွင့်နှင့်တာဝန်တွေကို ခွဲပေးလိုက်သည့် မိစ္ဆာသားရဲအကြီးအကဲလေးဦးက ကိစ္စတစ်ချို့ကို ကိုယ်ပိုင်ဆုံးဖြတ်ချက်ဖြင့် လုပ်ဆောင်ခဲ့ရင်တောင် ဖူရွှမ်နီက ဒေါသမထွက်သည့်အပြင် ဝမ်းတောင် သာပေမည်။
အဘယ်ကြောင့်ဆိုသော် ဤအရာမျက သူမ၏ လေ့ကျင့်ရေး နည်းလမ်းမှန်ကန်ကြောင်း ပြသနေတာကြောင့်ပင်။ သူမက တုံးအသည့် မိစ္ဆာသားရဲတစ်စုကို ဉာဏ်ကောင်းသည့် မိစ္ဆာသားရဲတစ်စု ဖြစ်လာအောင် ပြုစုပျိုးထောင်ပေးနိုင်ခဲ့သည်။
[အသက် ၂၈ နှစ်၊ နှစ်နှစ်ကြာဖွံ့ဖြိုးတိုးတက်ပြီးနောက် လမ်းကြောင်းအသီးသီးမှတစ်ဆင့် ကျင့်ကြံခြင်းအရင်းအမြစ်များကို ရရှိပြီးနောက် သင်ဟာ ဝိညာဉ်ကျောက်တုံးပမာဏအမြောက်အမြားကို စုဆောင်းနိုင်ခဲ့ပြီဖြစ်သည်။ ဤဝိညာဉ်ကျောက်တုံးများက ကျီဟိုင်မြို့တော်တွင် သြဇာကြီးမားသူတစ်ဦးဖြစ်လာရန် သင့်အတွက် လုံလောက်ပေသည်။ သို့သော် သင်၏အဖွဲ့အစည်းကို ဖွံ့ဖြိုးတိုးတက်စေရန်နှင့် ခိုင်မာအားကောင်းစေရန် ၎င်းတို့ကို အသုံးပြုမည်ဆိုပါက ဤဝိညာဉ်ကျောက်တုံးများက မလုံလောက်သေးကြောင်း သင်သဘောပေါက်ပေသည်]
[အသက် ၂၉ နှစ်။ ကြမ်းတမ်းသည့် ငလျင်တစ်ခုကြောင့် မိုင်တစ်ထောင်အချင်းဝက်ဟာ ထိခိုက်သွားရသည်။ ပြည်သူများအတွက် အသက်ရှင်သန်ရန် နည်းလမ်း မရှိတော့ပေ]
[နန်းတွင်းမှ ခွဲဝေပေးသည့် ကယ်ဆယ်ရေးပစ္စည်းများဟာ ပြည်သူများလက်ထဲသို့ မရောက်မီမှာပင် ၎င်းတို့ကို အဆင့်ဆင့်ခွဲဝေယူငင်လိုက်ကြရာ ဆယ်ပုံတစ်ပုံပင် မကျန်တော့ပေ။]
[ကျီဟိုင်မြို့တော်မှ လူများဟာ နှစ်များတစ်လျှောက် တည်ဆောက်ထားသည့် အဆက်အသွယ်ကွန်ရက်မှ တစ်ဆင့် သင်ဟာလည်း ဝေစုတစ်ခုရရှိခဲ့သည်။]
[လူအမြောက်အမြားဟာ မည်သူမှ မလိုလားသည့် ဒုက္ခသည်များအဖြစ် အတင်းအကျပ်ပြောင်းလဲသွားခဲ့ရသည်။]
[အသက်ရှင်ကျန်ရစ်ရန်အတွက် လူတစ်စုဟာ စွန့်စားပြီး အန္တရာယ်များသည့် လူသူကင်းမဲ့သည့် တောင်တန်းများထဲသို့ ဝင်ရောက်ရန်မှလွဲ၍ ရွေးချယ်စရာမရှိခဲ့ပေ။ သားရဲများ နေရာတိုင်းတွင် ရှိနေပြီး မိစ္ဆာသားရဲများ သောင်းကျန်းနေသည့် ဤအန္တရာယ်များသော ဧရိယာတွင် အခြေချနေထိုင်ရန် နေရာတစ်ခုကို သူတို့ ရှာဖွေရန်ကြိုးစားခဲ့ကြသည်။]
[အသက် ၃၀ နှစ်၊ သင်၏လက်အောက်ငယ်သားများက လူသားအမြောက်အမြား သင်၏နယ်မြေထဲသို့ ချဉ်းကပ်လာကြောင်း သင့်ကိုပြောပြခဲ့သည်။]
[သူတို့အထဲတွင် ကျင့်ကြံသူတစ်ဦးသာပါဝင်ပြီး ကျန်သူများအားလုံးက သာမန်ပြည်သူများသာ ဖြစ်ကြသည်။]
[…]
"သူတို့ကို မတားနဲ့... ဝင်လာခွင့်ပေးလိုက်ပါ။" ဂရုတစိုက်စဉ်းစားပြီးနောက် ဖူရွှမ်နီ ဤဆုံးဖြတ်ချက်ကို ချလိုက်သည်။ "အောက်က မိစ္ဆာသားရဲတွေကို သူတို့ကို အန္တရာယ်မပေးဖို့ ပြောလိုက်။ စကားပြောတတ်တဲ့ မိစ္ဆာသားရဲအနည်းငယ်ကို စေလွှတ်ပြီး သူတို့ရဲ့ ခေါင်းဆောင်တွေနဲ့ ဆက်သွယ်ခိုင်းလိုက်။"
"ငါတို့က သူတို့ကို ကာကွယ်ပေးနိုင်တယ် ပြီးတော့ ငါတို့ရဲ့ နယ်မြေထဲမှာ အိမ်အသစ်တစ်ခု တည်ဆောက်ခွင့် ပေးမယ်။ ဒါပေမဲ့ သူတို့ပိုင်ဆိုင်သမျှ အရာအားလုံးကို ငါတို့မိစ္ဆာသားရဲတွေက ထိန်းချုပ်ထားမယ်"
"အကယ်၍ သူတို့ ဆန္ဒရှိရင် ငါတို့က သူတို့နဲ့ ပူးပေါင်းပြီး သူတို့ကိုကူညီပေးမယ်။ အကယ်၍ သူတို့ဆန္ဒမရှိရင် သူတို့ဘာသာသူတို့ ရပ်တည်ပစေ။"
သဘာဝဘေးအန္တရာယ်များနှင့် အကျင့်ပျက်ခြစားသည့်အရာရှိများကြောင့် နေရာရွှေ့ပြောင်းခံရသည့် သာမန်လူတစ်စုက သိပ်ပြီး အသုံးဝင်ပုံမရပေ။
သူတို့ကို လက်ခံခြင်းက အမှန်တကယ်တော့ ဝန်ထုပ်ဝန်ပိုးကိုသာ တိုးလာစေပေလိမ့်မည်။
သို့သော် သာမန်လူတစ်စုဖြစ်နေလျှင်ပင် လူတိုင်းက အသုံးဝင်ကြောင်း ဖူရွှမ်နီ အခိုင်အမာယုံကြည်ထားပေသည်။
လူသားများနှင့်သားရဲများကြားရှိကွာခြားချက်မှာ...
သူတို့တစ်ဦးစီတိုင်းတွင် ထူးခြားသည့်ဉာဏ်ပညာ ရှိနေခြင်းပင်။
ဉာဏ်ပညာအချို့ကို သင့်လျော်သည့်နေရာတွင် အသုံးပြုနိုင်ပြီး အံ့သြဖွယ်ကောင်းသည့် နည်းလမ်းများဖြင့် အသုံးပြုနိုင်သည်။
ထို့အပြင် ဖူရွှမ်နီ၏ ယန်အဖွဲ့အစည်းတွင် လူသား သစ္စာဖောက် အုပ်စုတစ်စုရှိနှင့်ပြီး ဖြစ်ပြီး အရေအတွက်ကလည (၆၀) နီးပါးရှိနေပြီဖြစ်သည်။
ဤကဲ့သို့သော အခြေအနေမျိုးတွင် ဖူရွှမ်နီ အနေဖြင့် သာမန်လူတစ်စုကို မွေးစားလိုက်လျှင်ပင် ပြဿနာရှိမည် မဟုတ်ပေ။ ထို့အပြင် ဤဒုက္ခသည်အုပ်စုမှ တစ်ဆင့် သူမဟာ သူမကို အမှန်တကယ်နာခံပြီး သူမကို ဘုရားသခင်အဖြစ်ပင် သတ်မှတ်မည့် ကျင့်ကြံသူများကို ပြုစုပျိုးထောင်ပေးနိုင်လေသည်။
မှန်ပေသည်။
ဖူရွှမ်နီဟာ လူသား သစ္စာဖောက်အုပ်စုတစ်စုကို ပြုစုပျိုးထောင်ချင်နေခြင်းဖြစ်သည်။ ပြီးတော့ သူမက သူတို့ကို ငယ်စဉ်ကတည်းက လေ့ကျင့်သင်ကြားပေးချင်သည်။