အခန်း ၁၉၃ : ရှုကျစ်ဟွာ -မင်းရဲ့ပါရမီနည်းနည်းလောက် ထပ်ယူရမယ်
ယခုမှသာ ပိုင်ယီ၏ ကျင့်ကြံမှုအဆင့်က အခြေတည်အဆင့် (၆)တွင် မရှိတော့ကြောင်း ရှုကျစ်ဟွာ သတိပြုမိသွားခဲ့သည်။
သူတို့ မတွေ့ရသည့် နေ့တစ်ဝက်အတွင်းမှာပင် သူဟာ အခြေတည်အဆင့် (၉)သို့ ရောက်ရှိနေပြီဖြစ်သည်။
ဒါက နောက်ပြောင်နေသလိုပင်။
ရှုကျစ်ဟွာဟာ သူမအာရုံခံမိသည်မှာ မှားယွင်းနေသည်ဟုထင်မှတ်သွားခဲ့သည်။ သူမ မယုံကြည်နိုင်စွာဖြင့် မျက်လုံးများကိုပင် ပွတ်သပ်လိုက်ပြီး မျက်လုံးဝိုင်းကြီးများဖြင့် ပိုင်ယီအား ထပ်ကြည့်လိုက်လေသည်။
သို့သော် ၎င်းက တူညီသည့် ကျင့်ကြံမှုအဆင့် ဖြစ်နေဆဲပင်။
'အခြေတည်အဆင့် (၉)...ဒါ… ဒါက ယုံကြည်နိုင်စရာ မရှိဘူး...'
"တပည့် မင်းက လူ့လောကကိုဆင်းသက်လာပြီး ကျင့်ကြံခြင်းလမ်းစဉ်ကို လျှောက်လှမ်းရင်း လူ့လောကမှာ လာကစားနေတဲ့ မသေမျိုးတစ်ပါးများလား"
ရှုကျစ်ဟွာ ပါးစပ်အဟောင်းသား ဖြစ်သွားရသည်။ သူမက ဆက်ပြောလိုက်သည်။ "ဒါမှမဟုတ် မင်းအရင်တုန်းက ကျင့်ကြံမှုအဆင့်ကို ဖုံးကွယ်ထားခဲ့တာလား"
"အခုတော့ မင်းထပ်ပြီး မဖုံးကွယ်တော့ဘဲနဲ့ ကြွားလုံးထုတ်တော့မလို့လား"
"ဒါမှမဟုတ်…"
"မင်းရဲ့ ကျင့်ကြံမှုအဆင့်ကို ဖုံးကွယ်ထားတုန်းပဲလား。 အခြေတည်အဆင့် (၉)က မင်းရဲ့ လက်ရှိ အကန့်အသတ် မဟုတ်ဘူးမလား"
သူမ ဆွံ့အသွားခဲ့ရသည်။
......
နေ့ခင်းဘက်က ဝိညာဉ်ဓားဂိုဏ်း၏ သူတော်စင်မက အသက်တစ်ရှူစာအတွင်း အဆင့်ငယ်နှစ်ဆင့်ကို အဆင့်ချိုးဖျက်ဝင်ရောက်သွားသည်ကို မြင်တွေ့ခဲ့ရခြင်းကပင် သူမကို စကားမပြောနိုင်တော့လောက်အောင် အံ့အားသင့်စေခဲ့ပြီးဖြစ်သည်။
ထိုအချိန်က လွန်ခဲ့သောနှစ်ရာပေါင်းများစွာ တစ်လျှောက်လုံး သူမဟာ ခွေးတစ်ကောင်ကဲ့သို့ အသက်ရှင်နေထိုင်ခဲ့သည်လားဟု သူမကိုယ်သူမ ပြင်းပြင်းထန်ထန် သံသယဝင်သွားစေခဲ့ပေသည်။
ယခု နောက်ထပ်လူတစ်ယောက်က အသက်တစ်ရှူစာ အတွင်း အဆင့်ငယ်သုံးဆင့်ကို အဆင့်ချိုးဖျက်ဝင်ရောက်သွားပြန်သည်။ ထိုအပြင် မမျှော်လင့်ဘဲ ထိုသူမှာ သူမ၏ တပည့်ဟောင်းဖြစ်နေချေသည်။
"ဆရာမ ခန့်မှန်းတာမှန်လောက်ပါတယ်..."
ပိုင်ယီသည် ဤကိစ္စနှင့်ပတ်သက်၍ များများစားစား မရှင်းပြခဲ့ပေ။ ရှုကျစ်ဟွာ မည်သို့ပင် ခန့်မှန်းပါစေ သူကတော့ 'ဟုတ်တယ်၊ ဟုတ်တယ်၊ ဟုတ်တယ်၊ ဆရာမ ခန့်မှန်းတာ မှန်တယ်' ဟုသာ အမြဲတမ်း ပြောပေလိမ့်မည်။
အဘယ်ကြောင့်ဆိုသော် မသေမျိုးကျင့်ကြံခြင်းသရုပ်ဖော်စနစ်ကဲ့သို့သော အထူးကိစ္စရပ်တစ်ခုကို ထုတ်ဖော်ကြေညာရန်မှာ မကောင်းသောကြောင့်ဖြစ်သည်။
သူ၏သဘောထားက ရှုကျစ်ဟွာကို သူမ၏ မေးစေ့အားကိုင်ကာ တက်ကြွစွာ ခွဲခြမ်းစိတ်ဖြာလာစေခဲ့သည်။
"မသေမျိုးတစ်ပါးက တိုက်ရိုက် ဆင်းသက်လာတာလည်း မဟုတ်ဘူး၊ ဖုံးကွယ်ထားတဲ့ ကျင့်ကြံမှုလည်း မဟုတ်ဘူးဆိုရင်…"
"ရှူး"
"ဖြစ်နိုင်တာက… မင်းက နှစ်တစ်သန်းမှာ တစ်ခါပဲ ပေါ်လာတတ်တဲ့ ကြောက်မက်ဖွယ်ကောင်းတဲ့ ပါရမီရှင်မျိုးလား"
သူမ စိတ်လှုပ်ရှားစွာဖြင့် ပြောလိုက်၏။
ပိုင်ယီက "ဟုတ်တယ်" ဟု ပြန်ဖြေလိုက်၏။
"ဒါမှမဟုတ်ရင် မင်းက ဘယ်လိုမသေမျိုး ရတနာမျိုးကိုရခဲ့ပြီး မသေမျိုးဆေးလုံးကို စားသုံးလိုက်တာလဲ"
ပိုင်ယီက "ဟုတ်တယ်" ဟု ပြန်ဖြေလိုက်လေသည်။
"..."
ပိုင်ယီ၏ ပြီးစလွယ်သဘောထားက ရှုကျစ်ဟွာ၏ နှလုံးသားထဲမှ စိတ်လှုပ်ရှားမှုကို မလျော့ကျသွားစေပေ။ သူမ ရုတ်တရက် ပိုင်ယီ၏ လက်ကို ဆွဲကိုင်လိုက်ပြီး အိမ်ထဲသို့ ဆွဲခေါ်သွားခဲ့သည်။
ဤပုံမှန်မဟုတ်သည့် လုပ်ရပ်ကြောင့် ပိုင်ယီ ဇဝေဇဝါ ဖြစ်သွားရသည်။ "ဆရာမ ဘာလုပ်နေတာလဲ။ အသားနဲ့ ဟင်းသီးဟင်းရွက်တချို့ကို စောစောဝယ်ခိုင်းပြီး ဒီည အရသာရှိတဲ့ အစားအစာတစ်ခု ချက်ပြုတ်ကြည့်မယ်လို့ ပြောထားတာမဟုတ်ဘူးလား"
"ဘာချက်ရမှာလဲ..." ရှုကျစ်ဟွာက စိတ်လှုပ်ရှားစွာ ပြောလိုက်သည်။ "ငါ့တပည့်က နှစ်တစ်သန်းမှာ တစ်ခါမှ ပေါ်ပေါက်ခဲတဲ့ ပါရမီရှင်ပဲ။ မင်းရဲ့ ပါရမီ နည်းနည်းလောက်ကို ငါထပ်ယူရမယ်.... ဖြစ်နိုင်တာက ငါလည်း အဆင့်တစ်ဆင့် နှစ်ဆင့်လောက်ကို တစ်ရှိန်ထိုးအဆင့်ချိုးဖျက် ဝင်ရောက်သွားနိုင်တယ်လေ။"
"ဒီည ငါတို့ ကျင့်ကြံကြမယ်.... အရင်တုန်းက ဆရာမ မင်းကို သင်ပေးခဲ့တဲ့ ကျင့်ကြံခြင်းနည်းစနစ်ကို လေ့ကျင့်ကြမယ်..."
"..."
…
ညဘက် အချိန်တွင်။
ယွမ်ယင်း ခရိုင်။
ခရိုင် အစိုးရရုံး။
ဖူရွှမ်နီဟာ မသေမျိုးကျင့်ကြံခြင်း သရုပ်ဖော်စနစ်နှင့် ချိတ်ဆက်ရန် စတင်ကြိုးစားခဲ့သော်လည်း သရုပ်ဖော်စနစ်နှင့် ချိတ်ဆက်၍မရနိုင်ကြောင်း သူမတွေ့ရှိလိုက်ရသည်!
ဤအခြေအနေအောက်တွင် ပုံမှန်အားဖြင့် တည်ငြိမ်နေတတ်သည့် သူမဟာ အနည်းငယ်တုန်လှုပ်ချောက်ချားမသွားဘဲ မနေနိုင်ခဲ့ပေ။
ဘာတွေ အတိအကျ မှားယွင်းသွားတာလဲ။ အနာဂတ်မှာ သူမ သာရုပ်ဖော် စနစ်ထဲ ဝင်ရောက်ဖို့ နည်းလမ်း မရှိတော့ဘူးလား။
'ငါ့ရဲ့ မသေမျိုးကျင့်ကြံခြင်း သရုပ်ဖော်ခဲ့တဲ့ ပထမ နှစ်ကြိမ်မှာ စွမ်းဆောင်ရည်က သိပ်မကောင်းခဲ့လို့ မသေမျိုးကျင့်ကြံခြင်း သရုပ်ဖော်စနစ်ရဲ့ စွန့်ပစ်တာကို ခံလိုက်ရတာများလား....'
'ဒီလို ကောင်းမွန်တဲ့ အခွင့်အရေးကို ဒီအတိုင်းလေးပဲ လက်လွတ်ခံလိုက်ရတော့မှာလား...'
ဖူရွှမ်နီ မိန်းမောတွေဝေသည့် အခြေအနေသို့ ကျရောက်သွားလေသည်။
၎င်းက သာမန်လူတစ်ယောက်ကို ဒေါ်လာသန်းရာချီ ရရှိထားကြောင်းပြောပြပြီး ၎င်းကို သူရက်အနည်းငယ်ကြာဖြုန်းတီးပစ်ခဲ့ပြီးသည့် အခြေအနေမျိုးနှင့် တူညီသည်။ နောက်ဆုံးတွင် ထိုဒေါ်လာသန်းရာချီက သူမနှင့်မသက်ဆိုင်ကြောင်း ရုတ်တရက်အပြောခံလိုက်ရသကဲ့သို့ပင်။ မည်သည့် ရှင်းပြချက်မှမရှိဘဲ သူတို့က ငွေအားလုံးကို ပြန်လည်သိမ်းယူသွားကြသည်။
တစ်ခဏမျှ စိုးရိမ်ပူပန်မှု ခံစားချက်တစ်ခု ဖြစ်ပေါ်လာခဲ့သည်။
"ဒါ မမှန်ဘူး..." ဖူရွှမ်နီ သူမ၏ခေါင်းကို ခါယမ်းလိုက်ပြီး သူမစိတ်ထဲမှ စိတ်ဓာတ်ကျနေသည့် ခံစားချက်များကို ဖယ်ရှားပစ်လိုက်သည်။ သူမ သွားကို စေ့ထားလိုက်သည်။ "ငါ မသိတဲ့ ပြဿနာတချို့ ရှိနေတာ သေချာတယ်။ မသေမျိုးကျင့်ကြံခြင်း သရုပ်ဖော် စနစ်ရဲ့ အချိန်စောင့်ဆိုင်းခြင်းက မကုန်ဆုံးသေးလို့လား... အဲဒီလိုလညမဟုတ်လောက်ဘူး"
"ဒါမှမဟုတ် မသေမျိုးကျင့်ကြံခြင်း သရုပ်ဖော်စနစ်မှာ အပြောင်းအလဲ တစ်ခုခု ရှိနေတာလား။ ဒီအပြောင်းအလဲ ပြီးဆုံးသွားသရွေ့ ပြဿနာ ဘာမှမရှိသင့်ဘူးမလား"
"ပြဿနာ ဘာမှ မရှိသင့်ဘူး မလား"
ဖူရွှမ်နီ၏ လေသံတွင် မသေချာမှုများ ပြည့်နှက်နေခဲ့သည်။
သူမ အနည်းငယ် စိုးရိမ်မကင်းဖြစ်နေပြီး ထိုကဲ့သို့သော ယုံကြည်မှုမျိုး မရှိခဲ့ပေ။
ယခု အသက်တစ်ရှူစာအချိန်တိုင်းက သူမအတွက် နှိပ်စက်ညှဉ်းပန်းမှုတစ်ခု ဖြစ်နေလေသည်။
တစ်နာရီခန့် ကုန်ဆုံးသွားပြီးနောက်မှသာ ဖူရွှမ်နီ ရုတ်တရက်တက်ကြွလာခဲ့သည်။ သူမ၏ လှပသော မျက်လုံးများကလည်း အရောင်တောက်လာခဲ့ပြီး စိတ်သက်သာရာရစွာ သက်ပြင်းချလိုက်၏။
နောက်ဆုံးတော့ သူမဟာ မသေမျိုးကျင့်ကြံခြင်း သရုပ်ဖော်စနစ်နှင့် အဆက်အသွယ် ပြုလုပ်နိုင်ခဲ့ပြီ ဖြစ်သည်။
"မဆိုးဘူး.." ရင်းနှီးနေသော စာကြောင်းများကို ကြည့်ကာ ဖူရွှမ်နီ ကံကောင်းသည်ဟု ခံစားလိုက်ရပြီး ရေရွတ်လိုက်သည်။ "မသေမျိုးကျင့်ကြံခြင်း သရုပ်ဖော်စနစ်က ငါမသိတဲ့ အပြောင်းအလဲတချို့ အမှန်တကယ် လုပ်ဆောင်ခဲ့ပုံရတယ်၊ အဲဒါကြောင့် ငါက အဲဒီစနစ်နဲ့ အသိစိတ်ကတစ်ဆင့်ချိတ်ဆက်လို့ မရခဲ့တာပဲ။"
၎င်းက မည်သို့သော အပြောင်းအလဲမျိုးဖြစ်ကြောင်း သူမ အလွန်စူးစမ်းချင်စိတ်ဖြစ်မိသော်လည်း သူမ အဖြေရနိုင်မည်မဟုတ်ကြောင်းကိုလည်း သူမ သိရှိပေသည်။
သူမ၏ နှလုံးသားထဲမှ စူးစမ်းလိုစိတ်ကို အတင်းအဓမ္မ ဖိနှိပ်ထားရုံသာ သူမ တတ်နိုင်တော့လေသည်။
သူမ တတ်နိုင်သည်မှာ ဘာမျှမရှိပေ။
[မသေမျိုးကျင့်ကြံခြင်း သရုပ်ဖော်စနစ်မှ ကြိုဆိုပါသည်]
[သင်သည် ပြီးခဲ့သည့် မသေမျိုးကျင့်ကြံခြင်း ဘဝ သရုပ်ဖော်မှုကို ဆက်လက်လုပ်ဆောင်ရန် ရွေးချယ်ခဲ့သည်။ ရေတွက်ခြင်း: ၁၀၊ ၉...]
[... ၃၊ ၂၊ ၁]
[သရုပ်ဖော်မှု စတင်ပါပြီ]
သူမ ဥခွံထဲတွင် ရှိနေသည့်ခံစားချက်ကို တတိယအကြိမ် ခံစားလိုက်ရသည့်အခါ ဥခွံထဲမှ ချက်ချင်း ခွဲထွက်ချင်သည့် ခံစားချက်မျိုး ဖူရွှမ်နီ၌ မရှိတော့ပေ။
ဤအထူးခံစားချက်ကို နောက်တစ်ကြိမ်ပြန်လည် ခံစားခွင့်ရသည့်အတွက်သာ သူမ ဝမ်းမြောက်နေခဲ့သည်။
[အသက် ၀ နှစ်၊ သင်သည် မိစ္ဆာသားရဲတစ်ကောင် အဖြစ် ပြန်လည်ဝင်စားခဲ့သည်။ သင် မွေးဖွားလာသည့်အခါ ကျင့်ကြံရန်အတွက် ကောင်းကင်နှင့် မြေကြီး ဝိညာဉ် စွမ်းအင်များကို စုပ်ယူရန် သင်ကြိုးစားခဲ့သည်။ ဝိညာဉ်စွမ်းအင်၏ အကျိုးသက်ရောက်မှုက သာမန်သာဖြစ်သော်လည်း သင်၏ စတင်ရာအမှတ်က ပို၍မြင့်မားရမည်ကို သင်သိရှိသောကြောင့် ၎င်းကို သင်နှစ်သက်ပျော်ရွှင်နေဆဲဖြစ်သည်။]