အခန်း ၁၈၇ : အခြေတည်အဆင့်၉သို့ ရောက်ရှိခြင်း
၎င်းက သာမန်မျက်စိဖြင့်မြင်နိုင်လောက်သည့် ဝိညာဉ်စွမ်းအင်ရေဝဲတစ်ခုအဖြစ်ဖွဲ့စည်းသွားပြီး ထိုမြင်ကွင်းက လူများကို စကားမပြောနိုင်အောင် ဖြစ်သွားစေခဲ့သည်။
ကံကောင်းစွာဖြင့် ပိုင်ယီသည် ခြံဝင်းအတွင်း၌ လူများ၏ မျက်စိနှင့် နားများကို လှည့်စားနိုင်သည့် ပုံရိပ်ယောင်အစီအရင်များကို ကြိုတင်ပြင်ဆင်ထားခဲ့သည်။
ထို့အပြင် ဤပုံရိပ်ယောင်အစီအရင်များကို ရှုကျစ်ဟွာက ခိုင်ခံ့အောင်ပြုလုပ်ပြီး မွမ်းမံထားပေးခဲ့လေသည်။
ထို့ကြောင့် ၎င်းက အခြေတည်အဆင့် (၇)သို့ ပိုင်ယီ အဆင့်ချိုးဖျက်ဝင်ရောက်သည့်အခါ သူ၏လှုပ်ရှားမှုများကို ဖုံးကွယ်ထားရန်လုံလောက်ပေသည်။
အကယ်၍ ရွှေအမြုတေနှင့်အထက် ကျင့်ကြံမှု အဆင့်ရှိသည့် ကျင့်ကြံသူများက ဤနေရာရှိအခြေအနေကို စုံစမ်းရန် သူတို့၏ နတ်ဘုရားအသိစိတ်ကို အသုံးပြုခဲ့လျှင်တော့ သူတို့ဟာ တစ်စုံတစ်ရာကို ရှာတွေ့ကောင်း ရှာတွေ့နိုင်ပေသည်။
သို့မဟုတ်ပါက ဤနေရာတွင် ဘာဖြစ်ပျက်ခဲ့သည်ကို မည်သူမျှ သိရှိနိုင်မည်မဟုတ်ပေ။
ချင်းဟဲခရိုင်ရှိ ချီသန့်စင်ခြင်းအဆင့်လေလွှင့်ကျင့်ကြံသူများနှင့် နန်းတွင်းကျင့်ကြံသူများအတွက်မူ...
သဲလွန်စတစ်ခုခု မြင်တွေ့ရရန်ဆိုသည်မှာ ပို၍ပင် မဖြစ်နိုင်ပေ။
'ဘုန်း..'
ပိုင်ယီတစ်ဦးတည်းသာ ကြားနိုင်သည့် ကျယ်လောင်သည့် အသံတစ်ခုဟာ သူ၏ဒန်တန်မှ ထွက်ပေါ်လာခဲ့သည်။ ထို့နောက် သူဟာ အခြေတည်အဆင့် (၇)၏ ကျင့်ကြံမှုအဆင့်သို့ ခြေလှမ်းလှမ်းဝင်ရောက်သွားပြီ ဖြစ်သည်။
ဒါ့အပြင်မပြီးသေးချေ။
သူ၏သွေးကြောများနှင့်ဒန်တန်တို့ဟာ ဝိညာဉ်စွမ်းအင်များကို အရူးအမူးစုပ်ယူနေဆဲဖြစ်သည်။ ဝိညာဉ် စွမ်းအင်အမြောက်အမြားက သူ၏သွေးကြောများ၊ ဒန်တန်၊ အသား၊ အရိုးများနှင့်သူ၏ဝိညာဉ်ကိုပင် အဆက်မပြတ် အာဟာရဖြည့်တင်းပေးနေခဲ့သည်။
......
'ဘုန်း..'
အသက်ရှူချိန်အနည်းငယ်မပြည့်မီမှာပင် ပိုင်ယီဟာနောက်ထပ် အဆင့်ငယ်တစ်ခုကို ထပ်မံကျော်ဖြတ်ပြီး အခြေတည်အဆင့်(၈)ကို ရောက်သွားခဲ့သည်။
နောက်ထပ်အသက်ရှူချိန် အနည်းငယ်ကုန်ဆုံးသွားပြီး ဒီတစ်ကြိမ်တွင် သူဟာ အခြေတည်အဆင့် (၉)သို့ ရောက်ရှိသွားခဲ့သည်။
ပိုင်ယီဟာ သူရဲ့ခန္ဓာကိုယ်တစ်ခုလုံး သန့်စင်မွန်မြတ်သွားသည်ဟု ခံစားလိုက်ရသည်။ ကမ္ဘာလောကတွင် သူဟာ ပြိုင်ဘက်ကင်းဖြစ်နေပြီဟု ထင်ယောင်ထင်မှားဖြစ်သွားသကဲ့သို့ပင်။
အဓိက အကြောင်းရင်းမှာ အဆင့်ချိုးဖျက်မှု အရှိန်အဟုန်က အလွန်မြန်ဆန်လွန်းသဖြင့် သူ့ကို ထူးခြားသော ထင်ယောင်ထင်မှားဖြစ်မှုတစ်ခု ပေးစွမ်းလိုက်ခြင်းဖြစ်သည်။
ကံကောင်းစွာဖြင့် ဤထင်ယောင်ထင်မှားဖြစ်မှုက မြန်မြန်ရောက်လာပြီး မြန်မြန်ပျောက်ကွယ်သွားခဲ့သည်။ ပိုင်ယီဟာ သူ၏မတည်ငြိမ်သည့် စိတ်ခံစားမှုများကို လျင်မြန်စွာ တည်ငြိမ်အောင်ပြုလုပ်လိုက်ပြီး လေပူတစ်ချက်ကို မှုတ်ထုတ်လိုက်သည်။
"ငါကအားနည်းသေးတယ်... ဘဝင်မြင့်လို့ မဖြစ်သေးဘူး။" ပိုင်ယီကိုယ့်ကိုယ်ကိုယ် ပြောလိုက်သည်။ "အနည်းဆုံးတော့ ငါရွှေအမြုတေအဆင့် ရောက်တဲ့ အခါကျမှ နည်းနည်းလောက်ဂုဏ်ယူမယ်။"
ထပ်ဆောင်းဆုလာဘ်လေးခုကလည်း ရောက်ရှိလာခဲ့သည်။
အဆင့်မြင့်ဝိညာဉ်ဆေးပင်(၅,၀၀၀)ကို ပိုင်
ယီ၏ သိုလှောင်အိတ်ထဲတွင် သိမ်းဆည်းထားလိုက်သည်။
ဆေးလုံးမသန့်စင်တတ်သည့် သူ့အတွက် ဤဝိညာဉ် ဆေးပင်များက အထူးတလည်အသုံးမဝင်လှပေ။
သို့သော် ရှုကျစ်ဟွာ ဆေးလုံးသန့်စင်တတ်ကြောင်း သူ သတိရလိုက်၏။ အချိန်ကျလာတဲ့အခါ သူဟာ သူမကို ကိုင်တွယ်ဖြေရှင်းဖို့ ဝိညာဉ်ဆေးပင်တစ်စိတ်တစ်ပိုင်း ပေးလိုက်ရုံပင်။
ထပ်ဆောင်းဆုလာဘ် (၂)အတွက်မူ ထပ်ပြောနေစရာ မလိုပေ။ ကောင်းကင်ဝါးမျိုမိစ္ဆာနည်းစနစ်၏ ကြောက်မက်ဖွယ်ကောင်းမှုက ပြောစရာမလိုအောင် ရှင်းလင်းနေပေသည်။ နက်နဲဆန်းကြယ်သည့် မျက်နှာဖုံးက ရွှေအမြုတေနှင့်အခြေတည်အဆင့် မိစ္ဆာအမြောက်အမြားကို ဝါးမျိုခဲ့သည့်အပြင် ရှေးဟောင်း ဝိညာဉ်ဖွဲ့စည်းမှုအဆင့်မိစ္ဆာတစ်ကောင်၏ ဝိညာဉ် သန္ဓေသားကိုပါ ဝါးမျိုခဲ့လိမ့်မည်ဟု ပိုင်ယီ မျှော်လင့်မထားခဲ့ခြင်းသာဖြစ်သည်။
ရလဒ်အနေဖြင့် ကောင်းကင်ဝါးမျိုမိစ္ဆာနည်းစနစ်က ၎င်း၏ အပြည့်အဝအကြောင်းအရာထဲမှ ဆယ်ပုံ နှစ်ပုံသာရှိသေးပေသည်။
ဖြစ်နိုင်တာက ကောင်းကင်ဝါးမျိုမိစ္ဆာနည်းစနစ် အဆင့်မြင့်လာလေလေ ၎င်းကို ရယူဖို့ပိုခက်ခဲလာလေလေ ဖြစ်ပေမည်။။
အခု ဒီကောင်းကင်ဝါးမျိုမိစ္ဆာနည်းစနစ်၏ ဆယ်ပုံ နှစ်ပုံကိုပေါင်းထည့်လိုက်ခြင်းဖြင့် ပိုင်ယီသည် ဤအံ့အားသင့်ဖွယ်နည်းစနစ်၏ ဆယ်ပုံငါးပုံကို ရရှိပြီးဖြစ်ကာ တစ်ဝက်တိတိ ရရှိထားပြီဟာ ဆိုရပေမည်။
နောက်ထပ်တစ်ဝက်ကို ရယူရန် မည်သည့်တန်ဖိုး ပေးဆပ်ရမည်ကိုတော့ သူမသိပေ။
သွေးကြာပန်းတာအိုဆရာ၏ မိစ္ဆာသန္ဓေသားကို ဘယ်နှကြိမ်လောက် ဝါးမျိုမှ ရမလဲဆိုသည်ကတော့ ခန့်မှန်းမရချေ။
'သောက်ကျိုးနည်း... သွေးကြာပန်းတာအိုဆရာကို သိုးသူငယ်လေးတစ်ကောင်လို အသုံးချပြီးအရင်းအမြစ် အဖြစ်ရိတ်သိမ်းနေတာပဲ.....'
ထပ်ဆောင်းဆုလာဘ် (၃)အဖြစ် ပေးအပ်သည့် ကာကွယ်ရေးကျောက်စိမ်းဆွဲကြိုးက ပိုင်ယီ၏ မျက်လုံးများကို အရောင်တောက်သွားစေပေသည်။ ဤကျောက်စိမ်းဆွဲကြိုးနှင့်ပတ်သက်ပြီး သူ့တွင် အလွန်နက်ရှိုင်းသောအထင်ကြီးမှုရှိလေသည်။
ချန်ချန်ရွှယ်နှင့် အခြားသူများ မသေမျိုးကျင့်ကြံခြင်း သရုပ်ဖော်နေစဉ် ချန်ချန်ရွှယ်ဟာ ဤကျောက်စိမ်း ဆွဲကြိုးကို ဝေ့ရီအား ပေးခဲ့ဖူးသည်။ ဝေ့ရီဟာ ဝိညာဉ် ဖွဲ့စည်းမှုအဆင့်မိစ္ဆာသန္ဓေသား၏ တိုက်ခိုက်မှုကို တားဆီးရန် ဤအထူးကျောက်စိမ်းဆွဲကြိုးကို အသုံးပြုခဲ့သည်။
ဤကျောက်စိမ်းဆွဲကြိုးက ထိုတိုက်ခိုက်မှုကြောင့် ကျိုးပဲ့သွားခဲ့သော်လည်း ၎င်းက အစွမ်းထက်ခြင်း မရှိဘူးဟုမဆိုလိုပေ။ ဤသည်မှာ အသက်ကယ်နတ်ဘုရားအဆင့်လက်နက်တစ်ခုဖြစ်သည်။
မူလဝိညာဉ်အဆင့်ရှိ စွမ်းအားကြီးပုဂ္ဂိုလ်များပင်လျှင် ဤအရာရှိပါက ကျင့်ကြံခြင်း လောကတွင် လှည့်လည်သွားလာနိုင်ပေသည်။
ဆိုရသော် ဤကျောက်စိမ်းဆွဲကြိုးရှိခြင်းက နောက်ထပ် အသက်အနည်းငယ်ပိုရှိသည်နှင့် ညီမျှပေသည်။
ထို့ကြောင့် သူ့အသက်ကိုကယ်တင်ပေးမည့် နောက်ထပ်လှည့်ကွက်တစ်ခု သူ့လက်ထဲတွင် ရှိလာပြီ ဖြစ်သည်။
ကျောက်စိမ်းကဲ့သို့ဖြူဖွေးသည့် ဤကျောက်စိမ်း ဆွဲကြိုးဟာ ပိုင်ယီ၏ လက်ဖဝါးပေါ်တွင် ရောက်ရှိလာသောအခါ ကျောက်စိမ်းဆွဲကြိုးပေါ်တွင် လက်ကျန် အပူငွေ့အချို့ ရှိနေသည်ကို သူရုတ်တရက် ခံစားလိုက်ရပြီး ၎င်းက မှိန်ဖျော့သည့် မွှေးရနံ့တစ်ခုနှင့်အတူ ပါရှိလေသည်။
'ဒါက…ချန်ချန်ရွှယ်ရဲ့ ခန္ဓာကိုယ်အပူချိန်… ပြီးတော့ သူမ ခန္ဓာကိုယ်ပေါ်က မွှေးရနံ့များ ဖြစ်နေမလား..'
ဤအထူးကျောက်စိမ်းဆွဲကြိုးကို ကြည့်ပြီး ပိုင်ယီလေးနက်သော အတွေးထဲသို့မကျရောက်ဘဲ မနေနိုင်တော့ပေ။
နောက်ဆုံး ထပ်ဆောင်းဆုလာဘ်က မြင်တွေ့နိုင်သည့် ပစ္စည်းတစ်ခုမဟုတ်ပေ။
၎င်းက ရွေးချယ်ခံနံပါတ် (၃)၏ တစ်ကြိမ်သုံး ဆုလာဘ်ဖြစ်သည့် ဖိနှိပ်ခြင်းနှင့် အတော်လေး ဆင်တူပေသည်။
သို့သော် ရွေးချယ်ခံနံပါတ် (၃)၏ ဖိနှိပ်ခြင်းက မိစ္ဆာသားရဲအချို့အပေါ်တွင်သာ အသုံးပြုနိုင်လေသည်။
ချန်ချန်ရွှယ်၏ စတင်သူဘုရင်၏အော်ရာက လူသားများ အပေါ် ထိရောက်မှု ရှိကြောင်း ထင်ရှားပေသည်။
ထို့ကြောင့် ၎င်းက နောက်ထပ်ကြီးမားသော ရိတ်သိမ်းမှုတစ်ခုပင်။
…
ယွမ်ယင်းခရိုင်။
ချန်ချန်ရွှယ်ဟာ လက်ဖက်ရည် တစ်ခွက်စာအချိန်ခန့်စောင့်ဆိုင်းပြီးနောက် သရုပ်ဖော်စနစ်ထံမှ ဆုလာဘ်များကို လက်ခံရရှိခဲ့သည်။
ဆုလာဘ်များကို သူမ မြင်တွေ့လိုက်ရသည့်အခါ သူမ၏ မူလက တည်ငြိမ်နေသည့် စိတ်ခံစားမှုများဟာ လှုပ်ရှားသွားရသည်။
နောက်ဆုံးတွင် သူမ စိတ်မလှုပ်ရှားပဲ မနေနိုင်တော့ပေ။
"ဒါက..." သူမ အံ့သြစွာပြောလိုက်သည်။ "အောင်မြင်မှု လေးခု"
"ထပ်ဆောင်းဆုလာဘ်လေးခု"
"ပုံမှန်ဆုလာဘ်တစ်ခုက်ပါ ပေါင်းလိုက်ရင် ဒီတစ်ခေါက် စုစုပေါင်းဆုလာဘ်က ငါးခုတောင် ရမှာပေါ့"
သူမ အနည်းငယ် အံ့သြသွားရသည်။
"တိုင်းပြည်တစ်ခုနှင့်ယှဉ်နိုင်လောက်အောင် ကြွယ်ဝချမ်းသာခြင်း။ ဒါက ချင်းကျောက်နဲ့ငါ ဧရာမ ကြေးဝါတံခါးကြီးရဲ့ ကမ္ဘာငယ်နေရာကနေ လုယက်ခဲ့တဲ့ ပစ္စည်းတွေကြောင့် ဖွင့်လှစ်နိုင်ခဲ့တဲ့ အောင်မြင်မှုလား"
"မိစ္ဆာ၏ရန်သူ။ ဒါက ငါသွေးကြာပန်းတာအိုဆရာရဲ့ မိစ္ဆာသန္ဓေသားကို ဖျက်ဆီးဖို့ နက်နဲဆန်းကြယ်တဲ့ မျက်နှာဖုံးကို အသုံးပြုခဲ့လို့ ဖြစ်ရမယ်... ဟုတ်တယ်မလား"
"တိုင်းပြည်တည်ငြိမ်စေခြင်း။ ငါ မမှားဘူးဆိုရင် ဒါက အရင်မင်းဆက်ရဲ့ အကြွင်းအကျန်တွေကို နှိမ်နင်းခဲ့တဲ့ ရလဒ်ဖြစ်ရမယ်။"
"နန်းတွင်းအာဏာကို ဝင်ရောက်စွက်ဖက်ခြင်း။ ဒါက မဟာဝေ အိမ်ရှေ့စံမင်းသားနဲ့ ငါကြားက တိုက်ပွဲရဲ့ ရလဒ်လား"
[ဆုလာဘ် - အခြေတည်အဆင့် (၅)၏ ဝိညာဉ် စွမ်းအင်အားလုံး (မွေးရာပါ ဝိညာဉ် ခန္ဓာကိုယ်-တစ်ဝက်နှင့်အတူ သင်သည် အခြေတည်အဆင့် အဆင့် (၅)သို့ တစ်ရှိန်ထိုးအဆင့်ချိုးဖျက် ဝင်ရောက်နိုင်သည်)]
[ထပ်ဆောင်းဆုလာဘ် ၁ - ဝိညာဉ်ဆေးပင် (၁,၀၀၀) (အားလုံးက အရည်အသွေး မြင့်မားသည့် အထူးဝိညာဉ်ဆေးပင်များဖြစ်ကြသည်)]
[ထပ်ဆောင်းဆုလာဘ် ၂ - ကောင်းကင်ဝါးမျိုမိစ္ဆာ နည်းစနစ်၏ မပြည့်စုံသော မူကွဲ (ကောင်းကင်ဝါးမျိုမိစ္ဆာနည်းစနစ်၏ ဆယ်ပုံတစ်ပုံ)]
[ထပ်ဆောင်းဆုလာဘ် ၃ - ပျက်စီးနေသည့် ကာကွယ်ရေးကျောက်စိမ်းဆွဲကြိုး (မူလဝိညာဉ် အဆင့်ကျင့်ကြံသူတစ်ဦး၏ တိုက်ခိုက်မှုတစ်ခုကို ခံနိုင်ရည်ရှိသည်)]
[ထပ်ဆောင်းဆုလာဘ် ၄ - အထူးအရှိန်ဝါ (သင့်တွင် လွှမ်းမိုးချုပ်ကိုင်နိုင်သည့် အရှိန်ဝါအနည်းငယ်ရှိသည်)]