အခန်း ၁၈၆ : အောင်မြင်မှုလေးခုအား အသက်သွင်နိုင်ခဲ့သည့် ချန်ချန်ရွှယ်၊ ဆုလာဘ်များ
လက်တွေ့ကမ္ဘာသို့ ပြန်ရောက်လာသည့် ချန်ချန်ရွှယ်၏ စိတ်အခြေနေက ချင်းကျောက်နှင့် လုံးဝကွဲပြားခြားနားနေခဲ့သည်။
သူမဟာ ဒေါသမထွက်သလို မကျေမနပ်လည်း မဖြစ်ပေ။ သူမ၏ အတွေးများက ယခင်ကကဲ့သို့ပင် တည်ငြိမ်နေခဲ့သည်။ သူမ၏ သေဆုံးမှုကြောင့် အံ့သြခြင်းမရှိပေ။ ဘာပဲဖြစ်ဖြစ် သူမဟာ အကြိမ်ပေါင်းများစွာ သေဆုံးရသည်ကို အသားကျနေပြီဖြစ်သည်။
အသက် (၁၉)နှစ်အရွယ် မိန်းကလေးတစ်ယောက်သည် သေဆုံးမှုအများအပြားကို ကြုံတွေ့ခဲ့ရပြီးပြီဟု မည်သူတွေးထင်မိမည်နည်း။
"စစ်တုရင်ရွေ့ကွက် နည်းနည်းလွဲချော်သွားတယ်၊ ဒါကြောင့် ရှုံးနိမ့်တာပုံမှန်ပါပဲ။" ချန်ချန်ရွှယ်၏ ရေရွတ်သံဟာလည်း အလွန်တည်ငြိမ်နေပြီး ဒေါသအနည်းငယ်မျှပင်မရှိပေ။
"တစ်ဖက်လူရဲ့ ငါ့အပေါ် ရက်စက်ကြမ်းကြုတ်မှုကို ငါ လျှော့တွက်မိလိုက်တယ်၊ ပြီးတော့တခြားလူတွေ အပေါ် ထားရှိတဲ့ ထီးနန်းရဲ့ဆွဲဆောင်မှုကိုလည်း ငါ လျှော့တွက်မိလိုက်တယ်။ သွေးသားရင်း ညီအစ်ကို မောင်နှမတွေဖြစ်ရင်တောင် အကြွင်းမဲ့အာဏာနဲ့ ရင်ဆိုင်ရတဲ့အခါ သူတို့က တစ်ယောက်နဲ့တစ်ယောက် လုံးဝ ကျောခိုင်းသွားကြပြီး ဓားတွေဆွဲထုတ်ကြတော့တာပဲ။"
"နောက်ဆုံးတော့ ငါက သိပ်မသန်မာသေးဘူး။ အကယ်၍ ငါ့ဘေးနားမှာ နောက်ထပ်မူလဝိညာဉ် အဆင့် ကျင့်ကြံသူတစ်ယောက်သာရှိခဲ့ရင် စစ်မြေပြင်မှာ မူလဝိညာဉ်အဆင့်ကျင့်ကြံသူနှစ်ယောက်ကို ငါ ကြောက်စရာမလိုဘူး။ အိမ်နီးချင်းနိုင်ငံက ဒီလောက် ပြတ်သားပြီး မူလဝိညာဉ်အဆင့်ကျင့်ကြံသူနှစ်ယောက်ကို တွန့်ဆုတ်ခြင်း မရှိဘဲ စေလွှတ်လိမ့်မယ်လို့ ငါမျှော်လင့်မထားခဲ့ဘူး။"
"မူလဝိညာဉ်အဆင့်ကျင့်ကြံသူတွေက သာမန်လူတွေ မဟုတ်ဘူး။ အသက်အငယ်ဆုံး မူလဝိညာဉ်အဆင့် ကျင့်ကြံသူတောင် အသက် (၅၀၀)ထက် မနည်းနိုင်ဘူး။"
"မင်းဆက်တစ်ခုအတွက် မူလဝိညာဉ်အဆင့်ကျင့်ကြံသူတစ်ယောက်ဟာ အမြင့်ဆုံးအဆင့်က ကျောထောက်နောက်ခံတိုင်ကြီးတစ်ခုပဲ။ အကယ်၍ စစ်တပ်ထဲမှာ ထားရှိမယ်ဆိုရင် သူကစစ်ဗိုလ်ချုပ် ရာထူးကို ရယူနိုင်တယ်။"
"ခမည်းတော် အချိန်အကြာကြီး ပျိုးထောင်ခဲ့တဲ့ လျှို့ဝှက်အစောင့်တပ်ဖွဲ့ကတောင် မူလဝိညာဉ်အဆင့် ကျင့်ကြံသူတစ်ယောက်ပဲမွေးထုတ်ပေးနိုင်ခဲ့တယ်၊ ပြီးတော့ သူက အဲဒီမူလဝိညာဉ်အဆင့်ကျင့်ကြံသူကိုတောင် ငါ့ကိုလက်ဆောင်ပေးခဲ့တာ။"
ချန်ချန်ရွှယ် ကိုယ့်ကိုယ်ကိုယ် စကားပြောနေခြင်းကို ရပ်တန့်လိုက်သည်။ သူမ ဒီတစ်ကြိမ်သင်ခန်းစာကို မှတ်သားထားပြီး နောက်တစ်ကြိမ် အလားတူအမှားမျိုး လုပ်တော့မည်မဟုတ်ပေ။
ထို့အပြင် သူမဟာ အလားတူလှည့်ကွက်မျိုးကို နောက်တစ်ကြိမ် ခံရတော့မည်မဟုတ်ပေ။
သူမခေါင်းခါလိုက်ပြီး ခေါင်းထဲမှ ရှုပ်ထွေးသော အတွေးများကို လွှင့်ပစ်လိုက်သည်။
ထျု့နောက် ချန်ချန်ရွှယ်ဟာ ဆုလာဘ်ရောက်ရှိလာမည့်အချိန်ကို တိတ်ဆိတ်စွာစောင့်ဆိုင်းနေလိုက်သည်။
......
ဒီတစ်ကြိမ် ဆုလာဘ်က အလွန်ရက်ရောနိုင်ပြီး ယခင် ဆုလာဘ်များကို များစွာကျော်လွန်လိမ့်မည်ဟု သူမ၏ မသိစိတ်က သူမကို ပြောပြနေခဲ့သည်။
သူမ၏ မျှော်လင့်ချက် မှန်မမှန် သူမမသိရုံသာ ရှိပေသည်။
..
[သင်ဖိတ်ခေါ်ထားသည့် ချန်ချန်ရွှယ်ဟာ ဤမသေမျိုးကျင့်ကြံခြင်းသရုပ်ဖော်ဘဝတွင် (၅၆) နှစ်၊ (၀၇) လ၊ နှင့် (၂၈) ရက် ရှင်သန်ခဲ့သည်]
[သင်သည် တိုင်းပြည်တစ်ခုနှင့် ယှဉ်နိုင်လောက်အောင်ကြွယ်ဝချမ်းသာခြင်း၊ မိစ္ဆာ၏ ရန်သူ၊ တိုင်းပြည်တည်ငြိမ်စေခြင်း နှင့် နန်းတွင်းအာဏာကို ကျူးကျော်ထိပါးခြင်းဆိုသည့် အောင်မြင်မှုလေးခုကို အောင်မြင်စွာဖွင့်လှစ်နိုင်ခဲ့သည်။ သင်သည် နောက်ထပ် ဆုလာဘ် သုံးခုကိုရရှိခဲ့ပါသည်]
[သင်သည် အောက်ပါဆုလာဘ်များကိုရရှိပါသည် –]
[ဆုလာဘ် ၁ - အခြေတည်အဆင့်(၉)၏ ဝိညာဉ် စွမ်းအင်အားလုံး (အခြေတည်အဆင့် (၆)တွင် ရှိသည့်သင့်အား အဆင့်ငယ်သုံးဆင့်ကို တစ်လှမ်းတည်းဖြင့် ကျော်ဖြတ်စေနိုင်သည်)]
[ဆုလာဘ် ၂ - ယွီချင်းဓား(ချန်ချန်ရွှယ် ဧရာမ ကြေးဝါတံခါးကြီး၏ ကမ္ဘာငယ်နေရာမှ မတော်တဆ ရရှိခဲ့သော ဝိညာဉ်လက်နက်တစ်ခု)]
[ဆုလာဘ် ၃ - ပင်လယ်ငြိမ်းအေးစေသော ကျမ်းစာ(သတ်ဖြတ်ခြင်းကျမ်းစာအောက် မနိမ့်ကျသည့် မဟာဝေမင်းဆက်စာကြည့်တိုက်၏ရတနာ)]
[ထပ်ဆောင်းဆုလာဘ် ၁ - ဝိညာဉ်ဆေးဝါး (၅,၀၀၀) (အားလုံးက အလွန်အရည်အသွေး မြင့်မားကြသည်)]
[ထပ်ဆောင်းဆုလာဘ် ၂ - ကောင်းကင်ဝါးမျိုမိစ္ဆာ နည်းစနစ်၏ မပြည့်စုံသောမူကွဲ(ကောင်းကင်ဝါးမျို မိစ္ဆာနည်းစနစ်၏ ဆယ်ပုံနှစ်ပုံ မူကွဲ)]
[ထပ်ဆောင်းဆုလာဘ် ၃ - ကာကွယ်ရေး ကျောက်စိမ်းဆွဲကြိုး (ဝိညာဉ်ဖွဲ့စည်းမှုအဆင့် တိုက်ခိုက်မှုကို တားဆီးပေးနိုင်သည့် အထူး ကျောက်စိမ်းဆွဲကြိုး)]
[ထပ်ဆောင်းဆုလာဘ် ၄ - စတင်သူဘုရင်၏ အော်ရာ (မဟာဝေမင်းသမီးတစ်ပါးအနေဖြင့် နှစ်များစွာ ကြာအောင် ချန်ချန်ရွှယ် ပျိုးထောင်ခဲ့သောအော်ရာ)]
ဆုလာဘ်များက ချင်းကျောက်၏ ဆုလာဘ်များထက်ပင် ပိုမိုမျက်စိကျိန်းလောက်စရာ ကောင်းလှပေသည်။
ချန်ချန်ရွှယ်က စုစုပေါင်းအောင်မြင်မှုလေးခုကို ဖွင့်လှစ်နိုင်ခဲ့ပြီး ရလဒ်အနေဖြင့် ထပ်ဆောင်းဆုလာဘ် လေးခုကို ရရှိခဲ့သည်။
ဤသည်မှာ ယနေ့ ပိုင်ယိ ဝမ်းမြောက်စရာအံ့သြမှုကို ဒုတိယအကြိမ်ခံစားရခြင်းဖြစ်သည်။
ရွေးချယ်ခံနှစ်ဦးကြား ပူးပေါင်းဆောင်ရွက်မှုက အမှန်တကယ်ပင် အံ့သြဖွယ်ကောင်းနေခဲ့သည်။
အကယ်၍ သူတို့ဟာ အစကတည်းကပူးပေါင်းရန် ရွေးချယ်ခဲ့ကြလျှင် သူဟာ ယခုအချိန်တွင် ရွှေအမြုတေအဆင့်ကိုတောင် ရောက်ရှိနေလောက်ပြီဟု ပိုင်ယီ ခံစားလိုက်ရသည်။
ကံဆိုးစွာဖြင့် သူက သရုပ်ဖော်စနစ်ထဲမှ ဘဝကို ဝင်ရောက်စွက်ဖက်၍ မရနိုင်ပေ။ သို့မဟုတ်ပါက သူဟာ ချန်ချန်ရွှယ်နှင့်ချင်းကျောက်ကို အတူတကွတင်းကျပ်စွာ ပူးပေါင်းခိုင်းထားပြီးဖြစ်ပေလိမ့်မည်။
............
ချန်ချန်ရွှယ်၏ ဒီတစ်ကြိမ် ဆုလာဘ်တို့က အလွန်အမင်း ရက်ရောလှသည်။
ဆုလာဘ် (၁)ကပင် အလွန် ဆွဲဆောင်မှုရှိနေပြီ ဖြစ်သည်။ အဆင့်ငယ်သုံးဆင့်ကို တစ်ရှိန်ထိုးကျော်ဖြတ်ခြင်းဆိုသည်ကို လူဘယ်နှယောက်က ယုံကြည်ကြမည်နည်း။
ချင်းကျောက်၊ ချန်ချန်ရွှယ်၊ ဖူရွှမ်နီ ဤရွေးချ
ယ်ခံ သုံးဦးမှလွဲ၍ တစ်စုံတစ်ယောက်က အဆင့်နှစ်ဆင့်သို့မဟုတ် သုံးဆင့်ကို တစ်ရှိန်ထိုးအဆင့်ချိုးဖျက်နိုင်သည်ဆိုခြင်းကို ဘယ်သူယုံကြည်မည်နည်း။
အထူးသဖြင့် ၎င်းက ချီသန့်စင်ခြင်းအဆင့်မဟုတ်ဘဲ အခြေတည်အဆင့်၏ အဆင့်ငယ်သုံးဆင့် ဖြစ်နေသောအခါတွင်ဖြစ်သည်။
ဆုလာဘ် (၂)ကလည်း မဆိုးလှပေ။ ယွီချင်းဓားဟူသောအမည်က သွေးကြာပန်းတာအိုဆရာ၏ ကိုယ်ပိုင်ဝိညာဉ်လက်တက် မဟုတ်ကြောင်းသိသာထင်ရှားပေသည်။ သူချိပ်ပိတ်မခံရမီ ဖြောင့်မတ်လမ်းစဥ်မှကျင့်ကြံသူတစ်ဦးဆီမှ လုယူခဲ့ခြင်း ဖြစ်ပေမည်။
ထို့အပြင် ဝိညာဉ်ဖွဲ့စည်းမှုအဆင့်မိစ္ဆာတစ်ကောင် တပ်မက်သည့် ဝိညာဉ်လက်နက်တစ်ခုက အလွန်အဆင့်မြင့်သည့် ဝိညာဉ်လက်နက်တစ်ခု ဖြစ်ပေမည်။
၎င်း၏ အဆင့်အတန်းက ပိုင်ယီ ယခင်ကရရှိခဲ့ဖူးသည့် သွေးလိုနီရဲနေသည့်ကြေးပြားစထက် မနိမ့်ကျလောက်ပေ။
ဒါမှမဟုတ် အဲဒီကြေးပြားစပြီးရင် ဒုတိယလိုက်တာလည်း ဖြစ်နိုင်ပေသည်။
'ဆုလာဘ် (၃)က အဆင့်မြင့်တဲ့ ကျင့်ကြံခြင်း နည်းစနစ် တစ်ခုလား ဒါမှမဟုတ် မဟာဝေ မင်းဆက်ရဲ့ ကျင့်ကြံခြင်းနည်းစနစ်တစ်ခုလား....'
အကယ်၍ ဤကျင့်ကြံခြင်းနည်းစနစ်ကို လက်တွေ့ကမ္ဘာရှိ ကျင့်ကြံခြင်းလောကထဲသို့ ပစ်ချလိုက်ပါက သွေးစွန်းသည့်မုန်တိုင်းတစ်ခု ဖြစ်ပေါ်စေရန်နှင့် ကျင့်ကြံခြင်းလောကတွင် ကြီးမားသောမငြိမ်မသက်မှုမျ ဖြစ်ပွားစေရန်လုံလောက်ပေသည်။
ကံဆိုးစွာဖြင့်...
ဤသည်မှာ အဖြေများစွာ ရွေးချယ်ရသော မေးခွန်းမဟုတ်ပေ။ ဤသည်မှာ တစ်ခုတည်းသာ ရွေးချယ်ရသော မေးခွန်းဖြစ်သည်။
ကဏ္ဍအချို့တွင် ပိုင်ယီအားလုံးကို ရွေးချယ်နိုင်သော်လည်း ဤကဏ္ဍတွင်မူ သူဟာ တစ်ခုတည်းကိုသာ ရွေးချယ်နိုင်ပေသည်။
"ဆုလာဘ် ၁"
နောက်ဆုံးတွင် ပိုင်ယီဟာ အဆင့်သုံးဆင့်ကို တစ်ပြိုင်နက်တည်း ကျော်ဖြတ်နိုင်မည့် ဆွဲဆောင်မှုကို မခုခံနိုင်ခဲ့ပေ။
သူဟာ အခြေတည်အဆင့် (၉)သို့ အဆင့်ချိုးဖျက် ရောက်ရှိသွားသည်နှင့်တပြိုင်နက် ရွှေအမြုတေ အဆင့်သို့ ရောက်ရှိရန် ခြေလှမ်းနှစ်လှမ်းသာ လိုတော့ပေမည်...
သူသည် ရွှေအမြုတေအဆင့်ကျင့်ကြံသူတစ်ဦး ဖြစ်လာသည်နှင့်တပြိုင်နက် ၎င်းက အရည်အသွေးပိုင်းဆိုင်ရာခုန်ပျံကျော်လွှားမှုတစ်ခု ဖြစ်လာပေလိမ့်မည်။
ဥပမာဆိုရသော် ငါ့ကံကြမ္မာက ငါ့လက်ထဲမှာပဲ ရှိတယ်၊ ကောင်းကင်ဘုံမှာ မရှိဘူးဆိုသလိုပင်။
သိပ်မကြာမီ သန့်စင်ပြီးများပြားလှသည့် ဝိညာဉ် စွမ်းအင်များဟာ ကျယ်ပြောလှသော သမုဒ္ဒရာရေများကဲ့သို့ ပိုင်ယီ၏ ခြေလက်အင်္ဂါများနှင့် အရိုးများအတွင်းသို့ တိုးဝင်လာခဲ့သည်။
အကယ်၍ ပိုင်ယီတွင် မွေးရာပါဝိညာဉ်ခန္ဓာကိုယ်နှင့် လူသားဘုရင်ခန္ဓာကိုယ်သာမရှိခဲ့ပါက သူဟာ ဝိညာဉ် စွမ်းအင်များကြောင့် လွှမ်းမိုးခံရပေလိမ့်မည်။
ခြံဝင်းအတွင်းရှိ ဝိညာဉ်စွမ်းအင်များ လှုပ်ရှားလာပြီး ဝိညာဉ်စွမ်းအင်အမြောက်အမြား ကောင်းကင်ယံတွင် ဖြည်းညှင်းစွာ လှည့်ပတ်နေခဲ့ကြသည်။