အခန်း ၁၈၃ : မဟာဝေ၏ နန်းတွင်း အရှုပ်အထွေး
မဟာဝေလျှို့ဝှက်အစောင့်များ အချိန်အတိုင်းအတာ တစ်ခုအထိ ရှာဖွေပြီးနောက် ချင်းကျောက် ချန်ထားခဲ့သည့် ရှေးဟောင်းဆွဲကြိုးကို နောက်ဆုံး၌ ရှာတွေ့ခဲ့ကြသည်။
ရှေးဟောင်းဆွဲကြိုးထဲမှ အဘွားအိုတွင် မည်သည့် ပြဿနာမျှ မရှိပေ။ အဘွားအို၏ စိတ်အခြေအနေ သိပ်မကောင်းလှခြင်းသာ ရှိလေသည်။
ပြန်စဉ်းစားကြည့်လျှင် ဤသည်မှာ ပုံမှန်သာဖြစ်ချေသည်။
ဘာပဲဖြစ်ဖြစ်… ချင်းကျောက်နှင့် အဘွားအိုတို့ အတူတကွ ရှိနေခဲ့သည်မှာ အလွန်ကြာမြင့်ခဲ့ပြီ ဖြစ်သည်။
ဤနှစ်များ တစ်လျှောက်လုံး ချင်းကျောက်သည် အဘွားအိုချင်၏ဝိညာဉ်အပိုင်းအစကို ပြုစုပျိုးထောင်ရန် သူမ၏ဝိညာဉ်စွမ်းအင် အစိတ်တစ်ပိုင်းကို မျှဝေပေးခဲ့သည်။
ထို့အပြင်…
သူတို့ နှစ်ဦးသည် ရံဖန်ရံခါ စကားပြောဆိုဆက်သွယ်လေ့ရှိပြီး ချင်းကျောက်က ရံဖန်ရံခါ သူမကိုမေးခွန်းအချို့မေးမြန်းလေ့ရှိသည်။
ဤကဲ့သို့ ဖလှယ်ပြီးနောက်…
အဘွားအိုသည် ချင်းကျောက်ကို သူမ၏ဂျူနီယာ တစ်ဦးကဲ့သို့ ဆက်ဆံခဲ့ပေသည်။
နောက်ဆုံးတွင်…
ချင်းကျောက် အသတ်ခံလိုက်ရရာ အဘွားအိုချင် မည်သို့ စိတ်အခြေအနေကောင်းမွန်နိုင်မည်နည်း။
"စီနီယာချင်၊ ချင်းကျောက်ကို သတ်သွားတဲ့ ရွှေအမြုတေကျင့်ကြံသူသုံးယောက်က ဘယ်လိုပုံစံရှိလဲ ဆိုတာ ရှင်သိလား။ သူတို့ တိုက်ခိုက်တဲ့အခါ သူတို့ရဲ့ မျက်နှာတွေကို ရုပ်ဖျက်ထားကြလား။ သူတို့အသုံးပြုခဲ့တဲ့ ကျင့်ကြံခြင်းနည်းစနစ်တွေကိုရော မှတ်မိသေးလား"
ချန်ချန်ရွှယ်သည် အဘွားအိုချင်နှင့် ဆက်သွယ်ရန် ကိုယ်ပိုင် အစပျိုးမှုရယူခဲ့ပြီး သူမအား ဤအရေးကြီးသော မေးခွန်းများကို မေးမြန်းခဲ့သည်။
......
သူမ၏ မေးခွန်းကို ကြားသည့်အခါ အဘွားအိုချင်က ပြန်လည် ပြောလိုက်သည်။
"ငါက ဝိညာဉ်အပိုင်းအစအခြေအနေမှာ ရှိနေပေမယ့်၊ ဝိညာဉ်အပိုင်းအစခန္ဓာကိုယ်နဲ့ အပြင်ကဟာတွေကို မြင်နိုင်သေးတယ်"
သူမ ခေတ္တရပ်တန့်လိုက်ပြီး ဆက်ပြောလိုက်သည်။
"သူတို့ ဘယ်လိုပုံစံရှိလဲဆိုတာ ငါ မှတ်မိတယ် ပြီးတော့ သူတို့ရုပ်ဖျက်မထားကြဘူးဆိုတာလည်း ငါသိတယ်။"
"သူတို့ အသုံးပြုခဲ့တဲ့ ကျင့်ကြံခြင်းနည်းစနစ်နဲ့ ပတ်သက်ရင်တော့…"
ဤအချိန်တွင် အဘွားအိုချင်၏ လေသံက စိတ်ဝင်စားဖွယ်ကောင်းလာခဲ့သည်။
"ငါမမှားဘူးဆိုရင် သူတို့အသုံးပြုခဲ့တဲ့ ကျင့်ကြံခြင်း နည်းစနစ်က မဟာဝေနန်းတော်ထဲကပဲ"
"ဒါ့အပြင် သူတို့ခန္ဓာကိုယ်ပေါ်က အရှိန်ဝါကို ငါ့ရှေ့မှာ ဘယ်လိုမှဖုံးကွယ်ထားလို့ မရဘူး။ ဒီလူတွေက နန်းတော်ထဲကပဲ ဖြစ်ရမယ်"
ချန်ချန်ရွှယ်သည် ချင်းကျောက်ကို တိုက်ခိုက်မည် မဟုတ်ကြောင်း အဘွားအိုချင် သိပေသည်။
အကယ်၍ ချန်ချန်ရွှယ်သာ ချင်းကျောက်ကို တိုက်ခိုက်ချင်ခဲ့လျှင် အတိတ်က သူမ၌အခွင့်အရေး အများအပြား ရှိခဲ့ပေသည်။
ဘာကြောင့် အခုချိန်ထိ စောင့်နေရမည်နည်း။
အဘွားအိုချင်က ဆက်ပြောလိုက်သည်။
"လွန်ခဲ့တဲ့ အချိန်တုန်းက မဟာဝေမင်းဆက်ရဲ့ အိမ်ရှေ့စံမင်းသားက ချင်းကျောက်နဲ့ သီးသန့်တွေ့ဆုံခဲ့တယ်။ တွေ့ဆုံရတဲ့ရည်ရွယ်ချက်က သူမကို အိမ်ရှေ့စံမင်းသားရဲ့ ဘက်တော်သားဖြစ်လာအောင် စည်းရုံးဖို့ပဲ။ ဖြစ်နိုင်တာက ချင်းကျောက်ကို အသုံးချပြီး မင်းရဲ့ ဘေးနားမှာ ထားချင်လို့နေမှာပေါ့"
"ဒါပေမဲ့ အဲဒီအချိန်တုန်းက ချင်းကျောက်က ငြင်းပယ်ခဲ့တယ်။ အခု သူမ ဒုက္ခရောက်သွားပြီ။ ငါ မမှားဘူးဆိုရင် ရွှေအမြုတေအဆင့်ကျင့်ကြံသူသုံးယောက်ကို လှုပ်ရှားဖို့ အမိန့်ပေးခဲ့တာက…"
"မဟာဝေမင်းဆက်ရဲ့ အိမ်ရှေ့စံမင်းသား.... မင်းရဲ့ အစ်ကိုကြီးပဲ"
ထင်ထားသည့် အတိုင်းပင်။
ဤဝိညာဉ်အပိုင်းအစစီနီယာကတောင် မဟာဝေ မင်းဆက်၏ အိမ်ရှေ့စံမင်းသားအပေါ် သံသယ ဝင်နေခဲ့သည်။
သို့ဖြစ်ရာ ချင်းကျောက် လုပ်ကြံခံရမှု၏ နောက်ကွယ်မှတရားခံကို အတည်ပြုရန် အခြေခံအားဖြင့် ဖြစ်နိုင်ချေရှိသွားပြီဖြစ်သည်။
ဤအချိန်တွင် အဘွားအိုချင်က မေးလိုက်သည်။
"ဆွဲကြိုးကိုရှာဖွေဖို့ မင်းလူတွေကို အထူးတလည် စေလွှတ်ခဲ့ပြီး ဒီကိစ္စတွေအကြောင်း ငါ့ကို လာမေးတယ်ဆိုတော့… မင်းက အဲဒီကလေးမလေး ချင်းကျောက်အတွက် လက်စားချေပေးချင်လို့များလား"
သူမဟာ ချင်းကျောက်အတွက် လက်စားချေပေးစရာ မလိုကြောင်း ချန်ချန်ရွှယ် ပြောချင်မိသည်။ ခဏကြာလျှင် ချင်းကျောက်ဟာ သူမဘာသာ သေချာပေါက် လက်စားချေပေလိမ့်မည်။
သို့သော် သူမပြောသည့်စကားကို နားလည်ရန် အမှန်တကယ်ခက်ခဲပေလိမ့်မည်။
သူမဟာ မသေမျိုးကျင့်ကြံခြင်းသရုပ်ဖော်စနစ် ရှိနေကြောင်းကို ပေါ့ပေါ့ပါးပါး ထုတ်ပြော၍မရနိုင်ပေ။
ဤအကြောင်းကို တွေးတောရင်း ချန်ချန်ရွှယ် ပြန်လည်ဖြေကြားလိုက်သည်။
"အဲဒီလိုပဲ ဆိုပါတော့"
[နောက်တစ်နေ့တွင် သင်သည် ညီလာခံတက်ရောက်လာခဲ့သည်။ သင်၏ပေါ်ထွက်လာမှုက လူအများအပြား၏အာရုံစိုက်မှုကို ဆွဲဆောင်ခဲ့ပြီး ညီလာခံမှအရာရှိများတွင် မတူညီသောအတွေးများ ရှိခဲ့ကြသည်။ မဟာဝေဧကရာဇ်ချန်ဖုန်းယင်ညာလည်း သင်၏ပေါ်ထွက်လာမှုကြောင့် အံ့အားသင့်ခဲ့သော်လည်း သူ၏သမီးတော် နိုင်ငံရေးကိစ္စရပ်များတွင် ပါဝင်နိုင်သည့်အတွက် ဝမ်းမြောက်ခဲ့သည်။ အဘယ်ကြောင့်ဆိုသော် သင်၏ စွမ်းရည်ဖြင့် သင်ညာ နန်းတွင်းနိုင်ငံရေးတွင်ပါဝင်ရန် အရည်အချင်း ပြည့်မီသည်ဟု သူယုံကြည်သောကြောင့်ဖြစ်သည်။]
[အသက် ၄၈နှစ် ဧည့်သည်အနည်းငယ် မင်းသမီး၏ စံအိမ်တော်သို့ ရောက်ရှိလာခဲ့ကြသည်။ သူတို့က မဟာဝေမင်းဆက်၏ အရာရှိဟောင်းအချို့ ဖြစ်ကြသည်။ သူတို့ဟာ သင့်အား အကြံဉာဏ်များနှင့် လမ်းညွှန်မှု အများအပြားပေးခဲ့ကြသည်။ ဤလူများ လောင်းကစားစတင်နေကြပြီဖြစ်ကြောင်း သင် သိရှိသော်လည်း သင်ငြင်းပယ်ခြင်းမရှိခဲ့ပေ။]
[သင်၏လုပ်ဆောင်ချက်များက မဟာဝေအိမ်ရှေ့စံ မင်းသားအား ဤကိစ္စနှင့် ပတ်သက်၍ ပိုမို အကဲဆတ်သွားစေခဲ့သည်။ မဟာဝေအိမ်ရှေ့စံမင်းသားဟာ သင်နှင့်စကားပြောရန် ကိုယ်တိုင်ကိုယ်ကျ ရောက်လာခဲ့သော်လည်း သူညာ ဤကိစ္စကို ဆွေးနွေးခြင်းမရှိခဲ့ပေ။]
[သူနှင့် စကားပြောဆိုရာတွင် သင်၏ သဘောထားက ကျိုးနွံလွန်းခြင်းမရှိသလို မောက်မာခြင်းလည်း မရှိပေ။ သင်၏ သဘောထားက တစ်ဖက်လူ၏ နှလုံးသားထဲရှိသံသယများကို ဖြေကြားပြီး ဖြစ်သည်။ မဟာဝေအိမ်ရှေ့စံမင်းသားသည် အပြုံးတစ်ခုကို အတင်းညှစ်ထုတ်ကာ မင်းသမီး၏ စံအိမ်တော်မှ ထွက်ခွာသွားခဲ့သည်။]
[အသက် ၄၉နှစ်၊ နိုင်ငံတစ်နိုင်ငံ၏ မင်းသမီးတစ်ပါးနှင့် အမျိုးသမီးတစ်ဦးဟာ နန်းတွင်းနိုင်ငံရေးတွင် ပါဝင်ခြင်းက မဟာဝေမင်းဆက်၏ဘိုးဘေးဥပဒေများနှင့်မကိုက်ညီဟုဆိုကာ ဝန်ကြီးအချို့က သင့်ကို စွပ်စွဲပြစ်တင်ခဲ့ကြသည်။ လူ့လောက၏ဆင်းရဲဒုက္ခများနှင့် ပြည်သူတို့၏ ဆင်းရဲမွဲတေမှုကို မသိနားမလည်ဘဲ ပြည်သူ့ဝမ်းစာရေးနှင့် နန်းတွင်းနိုင်ငံရေးအကြောင်း စတင်ပြောဆိုသည်ဟုဆိုကာ သင့်ကို စွပ်စွဲပြစ်တင်သော ဝန်ကြီးများလည်း ရှိခဲ့ကြသည်။]
[တစ်ခုပြီး တစ်ခုလာနေသော စွပ်စွဲပြစ်တင်မှုများနှင့် ရင်ဆိုင်ရသောအခါ သင်သည် တည်ငြိမ်စွာ ရင်ဆိုင်နိုင်ခဲ့ပြီး ဖြေရှင်းနိုင်ခဲ့သည်။]
[အိမ်ရှေ့စံမင်းသားကို စွပ်စွဲပြစ်တင်ရန် ထွက်လာသူများလည်း ရှိခဲ့ပြီး သူတို့ဟာ အကြောင်းပြချက် ခိုင်လုံစွာ၊ သက်သေအထောက်အထား ခိုင်လုံစွာဖြင့် ပြောဆိုခဲ့ရာ တစ်ဖက်လူကို စကားမပြောနိုင်အောင်ဖြစ်စေခဲ့သည်။]
[ညီလာခံအတွင်းရှိ ယမ်းငွေ့နံ့ ပြင်းထန်မှုကို လူတိုင်း သိသာထင်ရှားစွာ မြင်တွေ့ခဲ့ကြရသည်။]
[…]
"အရှင်မင်းကြီး"
ညနေခင်း အချိန်တွင်။
ဆံပင်ဖြူနေသည့် မဟာဝေအရာရှိအိုတစ်ဦးသည် မဟာဝေမင်းဆက်၏ ဧကရာဇ်ချန်ဖုန်းယင်နှင့် အတူ ခြေချိတ်ထိုင်ကာ တစ်ဦးကိုတစ်ဦး ကြည့်နေခဲ့ကြသည်။
ဤအရာရှိအိုက မဟာဝေမင်းဆက်အတွက် နှစ်ပေါင်း တစ်ထောင်ကျော် ကြိုးစားလုပ်ဆောင်ပေးခဲ့သူ ဖြစ်ပေသည်။
ထို့ကြောင့် ချန်ဖုန်းယင်ပင်လျှင် သူ့ကိုလေးစားလေသည်။
အရာရှိအိုက ပြောလိုက်သည်။
"အခု နန်းတွင်းမှာ အိမ်ရှေ့စံမင်းသားနဲ့ မင်းသမီးချန်နင်ဆိုပြီး ဂိုဏ်းနှစ်ဂိုဏ်းကွဲနေပါပြီ။ ပထမတစ်ယောက်က နန်းတွင်းမှာ အမြစ်တွယ်နေတဲ့ ဆက်ဆံရေး ရှိပြီး အိမ်ရှေ့စံမင်းသားဆိုတဲ့ ဘွဲ့ထူးကို ရရှိထားပါတယ်။ သူ့မှာ လူအများအပြားရဲ့ ထောက်ခံမှု ရှိပါတယ်"
"ဒုတိယတစ်ယောက်ကတော့ ငယ်ရွယ်ပေမယ့် လျှော့တွက်လို့ မရတဲ့ တက်သစ်စကြယ်ပွင့်တစ်ပွင့်လို့ ယူဆနိုင်ပါတယ်။ သူမက ပိုပြီး ရည်မှန်းချက် ကြီးပါတယ်။ သူမက အမျိုးသမီးတစ်ယောက်ဆိုတာ ထင်ရှားပေမယ့် သူမရဲ့စွမ်းရည်က တခြားဘယ်သူ့ထက်မဆို ပိုပြီး ထူးချွန်ပါတယ်။ သူမက သူမနောက် လိုက်ဖို့ လူတစ်စုကိုလည်း ဆွဲဆောင်ထားနိုင်ပါတယ်"
"နှစ်ဖက်စလုံးကနန်းတွင်းမှာပေါ်တင်တစ်မျိုးလျှို့ဝှက်တစ်မျိုးတိုက်ခိုက်နေကြပါတယ်။နန်းတွင်းအောက်ခြေမှာတော့အခြေအနေကပိုပြီးတင်းမာနေပါတယ်"