အခန်း ၁၈၂ : ချင်းကျောက်- အခြေတည်အဆင့်၄သို့ ရောက်ရှိခြင်း
သူမ ပါးစပ်အဟောင်းသား ဖြစ်သွားရသည်။
ရှင်းလင်းချက်ဆုလာဘ်က အပင်တွေအပြင် တခြား သက်ရှိတွေကိုပါ ဆုလာဘ်အဖြစ်ပေးနိုင်ပြီး သူမရဲ့ ဝိုက်တီကို ဆုလာဘ်အဖြစ် ရလိုက်တာကြောင့် ချင်းကျောက် တကယ်ကိုမယုံနိုင်စရာကောင်းတယ်လို့ ခံစားလိုက်ရသည်။
မကြာမီ ရှင်းလင်းချက်ဆုလာဘ်က ရောက်ရှိလာပြီး ဝိညာဉ်စွမ်းအင်အမြောက်အမြားဟာ သူမ၏ခန္ဓာကိုယ်ထဲသို့ တိုးဝင်လာသည့်အခါ ချင်းကျောက် ရုတ်တရက်တစ်စုံတစ်ရာကို သတိရသွားလေသည်။ မနေ့ကမှ သူမညာ အခြေတည်အဆင့် (၂)ကို အဆင့်ချိုးဖျက် ဝင်ရောက်ခဲ့တာကြောင့် သူမအမေရဲ့ စစ်ဆေးမေးမြန်းတာကို ခံခဲ့ရပေသည်။
သူမဟာ သူမအမေအား လှည့်စားနိုင်ဖို့ အစွမ်းကုန် ကြိုးစားခဲ့ရလေသည်။
အခုသူမသာ နောက်တစ်ကြိမ်ထပ်ပြီး အဆင့်တက်သွားပြီ အဆင့်နှစ်ဆင့်တောင်တန်းပြီး တက်သွားတာပါက ဘယ်လိုရှင်းပြရမလဲ မသိတော့ချေ။
ချင်းကျောက် ကြောင်အသွားရသည်။
အကယ်၍ သူမမှာ မူလမသေမျိုးကျင့်ကြံခြင်း ရုပ်ပိုင်းဆိုင်ရာ ခန္ဓာကိုယ်သာရှိခဲ့ရင် သူမအဆင့်တက်ချင်နေတဲ့အရှိန်အဟုန်ကို ဖိနှိပ်ထားလို့ ရနိုင်သေးပေသည်။ ပြီးတော့မှ ဝေးဝေးတစ်နေရာကိုသွားပြီး လျှို့ဝှက်နေရာလေးတစ်ခုလောက်ရှာပြီး အဆင့်တက်လို့ ရလေသည်။
အချိန်အတိုင်းအတာတစ်ခုလောက်ကြာပြီးမှ ဂိုဏ်းကို ပြန်လာခဲ့ရင် အဆင့်တတ်သည်ဆိုတာက ပုံမှန်ကိစ္စဖြစ်သွားပေလိမ့်မည်ဖြစ်သည်။
......
ဒါပေမဲ့ မွေးရာပါဝိညာဉ်ခန္ဓာကိုယ်တစ်ဝက်ကြောင့် ချင်းကျောက် ဖိနှိပ်ထားလို့ မရနိုင်တော့ပဲ အဆင့်တက်ချင်နေတဲ့အရှိန်အဟုန်ကို လုံးဝမထိန်းချုပ်နိုင်တော့ပေ။
"မဖြစ်ဘူး...ငါ ဒီလောက်မြန်မြန် အဆင့်မတက်ချင်သေးဘူး..."
"ခဏလေးစောင့်ပါဦး....ရမလားဟင်...."
ကံဆိုးစွာနဲ့ပဲ သူမခန္ဓာကိုယ်ထဲ လှိမ့်ဝင်လာတဲ့ ဝိညာဉ် စွမ်းအင်တွေက သူမ ဘာတွေးနေလဲဆိုတာ နားမလည်ကြချေ။ ထို့အပြင် အခြေတည်အဆင့်ကို ချိုးဖျက်ဝင်ရောက်တဲ့လှုပ်ရှားမှုက သေးငယ်မနေရာ အဆင့်တက်တဲ့ ဂယက်ရိုက်ခတ်မှုက ဂိုဏ်းရဲ့တစ်ဝက်လောက်ထိ အလွန်မြန်ဆန်သည့် အရှိန်နဲ့ ပျံ့နှံ့သွားတာကို ချင်းကျောက်ဟာ ကူကယ်ရာမဲ့စွာဖြင့် ကြည့်နေရုံသာ တတ်နိုင်တော့လေသည်။
ထို့နောက် သူမအခြေတည်အဆင့် (၃)ကို ရောက်ရှိသွားခဲ့သည်။
သို့ပေမဲ့ ၎င်းက မပြီးဆုံးသေးချေ။
ပတ်ဝန်းကျင်က ကောင်းကင်မြေကြီး ဝိညာဉ်စွမ်းအင်တွေညာ နောက်တစ်ကြိမ် လှုပ်ရှားလာပြန်ရာ ကြီးမားတဲ့ ရုန်းရင်းဆန်ခတ်ဖြစ်မှုက နောက်တစ်ကြိမ်ထပ်ဖြစ်လာခဲ့လေသည်။
သူမခန္ဓာကိုယ်ထဲမှာ ရုတ်တရက် 'ဘုန်း'ခနဲဖြစ်သွားပြီး သူမရဲ့ သွေးကြောတွေနဲ့ ဒန်တန်တွေဟာ ဒါဇင်နဲ့ချီ ကျယ်ပြန့်လာပေသည်။
အသက်ရှူချိန်အနည်းငယ် မပြည့်ခင်မှာပဲ သူမဟာ နောက်တစ်ကြိမ်ထပ်ပြီး အဆင့်တက်သွားခဲ့ပြန်၏။။
အခြေတည်အဆင့် (၄).....
"အာ... ဒါက..." သူမဆီ ဦးတည်လာနေတဲ့ ဝိညာဉ် အာရုံခံစားမှုလှိုင်းတွေကို ချင်းကျောက် သိသိသာသာ ခံစားလိုက်ရပေသည်။
ထို့ကြောင့် သူမဟာ ခေါင်းမော့ပြီး သက်ပြင်းချလိုက်ကာ သူမရဲ့ ဦးနှောက်ကို အလျှင်အမြန်အလုပ်လုပ်စေလိုက်၏။
မသေမျိုးကျင့်ကြံခြင်းသရုပ်ဖော်စနစ်ကို ဖော်ထုတ်ရာ မရောက်စေမယ့် ဆင်ခြေအသစ်တစ်ခုရှာဖို့ သူမ ကြံစည်နေခဲ့လေသည်။
…
မသေမျိုးကျင့်ကြံခြင်းသရုပ်ဖော်စနစ်ထဲတွင်။
ချင်းကျောက် လမ်းခုလတ်မှာ အသတ်ခံလိုက်ရတဲ့ သတင်းကို ချန်ချန်ရွှယ်ဟာ မကြာခင်မှာပဲ သိရှိသွားခဲ့သည်။ တစ်စုံတစ်ယောက်က ချင်းကျောက်ကို ပစ်မှတ်ထားလိမ့်မယ်လို့ သူမ မျှော်လင့်မထားခဲ့ချေ။
ယုတ္တိကျကျပြောရရင် အမုန်းတရားကို အများဆုံးဆွဲဆောင်တဲ့သူက သူမဖြစ်သင့်တာ မဟုတ်ပါလော။
ဘာလို့ နောက်ဆုံးကျတော့ ချင်းကျောက်က ဒုက္ခရောက်သွားရသည်နည်း။
"ရွှေအမြုတေကျင့်ကြံသူသုံးဦး..."
ချန်ချန်ရွှယ်ဟာ သူမလက်ထဲက သတင်းအချက်အလက်ကို ကြည့်လိုက်သည်။ ဒါက သူမ ခုလေးတင် လက်ခံရရှိလိုက်တဲ့ သတင်းဖြစ်ပေသည်။
အခြေတည်အဆင့်ကျင့်ကြံသူတစ်ယောက်က တိုက်ဆိုင်စွာနဲ့ ထိုအဖြစ်ပျက်တစ်ခုလုံးကို မျက်မြင်တွေ့ရှိခဲ့တယ်လို့ ဆိုလေသည်။
ထို့ကြောင့်လည်း ချန်ချန်ရွှယ်ညာ သတင်းကို ဒီလောက် မြန်မြန် ရလိုက်တာ ဖြစ်ပေသည်။
ဒါမှမဟုတ်ရင် ပြီးခဲ့တဲ့ တစ်ခေါက်တုန်းကလိုမျိုး ချင်းကျောက် ပျောက်သွားမှန်းသိရဖို့ သူမဟာ လနဲ့ချီ စောင့်ရကောင်း စောင့်ရနိုင်လေသည်။
ဒီမျက်မြင်သက်သေကို ဘာလို့ နှုတ်ပိတ်ဖို့ မကြိုးစားတာလဲဆိုတာကိုတော့ သူမလည်း မသိချေ။
ချင်းကျောက် အသတ်ခံရတဲ့ နေရာအနီးမှာ မသေမျိုးကျင့်ကြံခြင်းဂိုဏ်းတစ်ခုရှိနေပြီး အဲဒီဂိုဏ်းက လူတစ်ယောက်ယောက် ရောက်လာမှာကို ရွှေအမြုတေ အဆင့်ကျင့်ကြံသူသုံးဦးက ကြောက်လန့်သွားတာကြောင့် ဖြစ်နိုင်ပေသည်။
ထို့ကြောင့် ပြဿနာတစ်စုံတစ်ရာမဖြစ်ပွားစေဖို့ အဲဒီ အခြေတည်အဆင့်ကျင့်ကြံသူကို သတ်ဖို့ သူတို့ အချိန်မဖြုန်းခဲ့ကြတာဖြစ်ပေမည်။
ဘာပဲဖြစ်ဖြစ် ချင်းကျောင့်ကတော့ သေဆုံးသွားပေပြီ။
"ချင်းကျောက်ကို သတ်ဖို့ ရွှေအမြုတေအဆင့် ကျင့်ကြံသူသုံးဦးကို စုစည်းအသုံးပြုနိုင်တာ... ငါ မမှားဘူးဆိုရင် နန်းတော်ထဲက တစ်ယောက်ယောက် လုပ်တာဖြစ်ရမယ်"
"အခု လူအများကြီးက ငါ့ကို မျက်စိကျနေကြတယ်.... အထူးသဖြင့် မဟာဝေမင်းဆက်ရဲ့ အိမ်ရှေ့စံမင်းသား... ဒါဆို ငါ့ကြောင့် ချင်းကျောက်က ကြားဖြတ်အသတ်ခံလိုက်ရတာလား.... ငါ့ကြောင့် သူမပါ ရောပြီး ဒုက္ခရောက်သွားတာလား"
ချန်ချန်ရွှယ် မျက်မှောင်ကြုတ်ပြီး ခန့်မှန်းကြည့်သော်လည်း သက်သေအထောက်အထား မရှိဘဲ သူမ ဆုံးဖြတ်ချက်မချနိုင်ပေ။
ပြောရမည်ဆိုပါက ချင်းကျောက်ကို လုပ်ကြံသတ်ဖြတ်ခဲ့တဲ့ လူကတော်တော်ပြတ်သားပြီး သူ လုပ်ဆောင်ပုံက ကြမ်းတမ်းသော်လည်း အားသာချက်ကတော့ ဒီနည်းလမ်းက အလုပ်ဖြစ်တယ်ဆိုတာပင်။
သူတို့ဟာ လူကိုတတ်နိုင်သမျှ အမြန်ဆုံးသတ်ပြီး နေရာကနေ ချက်ချင်း ထွက်ခွာသွားခဲ့ကြသည်။
ဒီလိုအခြေအနေမျိုးမှာ ဘယ်သူလုပ်တာလဲဆိုတာ ရှာမတွေ့နိုင်သလို ဘယ်သူကနောက်ကွယ်က ကြိုးကိုင်သူလဲဆိုတာ ခွဲခြားသတ်မှတ်ဖို့ သက်သေအထောက်အထား မရှိချေ။
"မင်းသမီး ဝမ်းနည်းကြောင်း ပြောကြားပါရစေ"
အသံတစ်ခုက ချန်ချန်ရွှယ်ကို သူမရဲ့ အတွေးတွေထဲကနေ ဆွဲထုတ်လိုက်သည်။
စကားပြောလိုက်တဲ့ သူကဝေ့ရီပင်။
ချန်ဖုန်းယင်က ဝေ့ရီနဲ့ အခြား မဟာဝေလျှို့ဝှက် အစောင့်တပ်ဖွဲ့ရဲ့ ကွပ်ကဲမှုကို ပြန်မရုပ်သိမ်းခဲ့ပေ။ အဲဒီအစား သူတို့ကို ချန်ချန်ရွှယ်ဘေးနားမှာ ဆက်နေခွင့်ပြုခဲ့သည်။
ချင်းကျောက် မေပယ်လ်မြို့တော်ကို ပြန်တဲ့အခါ ကာကွယ်ပေးဖို့ ချန်ချန်ရွှယ်လွှတ်လိုက်တဲ့ ရွှေအမြုတေ အဆင့်ကျင့်ကြံသူကလည်း ဒီလျှို့ဝှက်အစောင့်တွေထဲက တစ်ယောက်ပင်။
သို့ပေမဲ့ ရလဒ်ကတော့ မျှော်လင့်မထားတာ ဖြစ်သွားခဲ့ရသည်။
တစ်စုံတစ်ယောက်က ချင်းကျောက်နဲ့ အဲဒီ ရွှေအမြုတေ လျှို့ဝှက်အစောင့်ကို လုပ်ကြံတိုက်ခိုက်ဖို့ ရွှေအမြုတေကျွမ်းကျင်သူသုံးယောက်ကို စေလွှတ်ခဲ့သည်။
ချန်ချန်ရွှယ် ခေါင်းခါလိုက်၏။ "ဝမ်းနည်းစရာ မလိုပါဘူး။ သူမက ဒီလောက်လွယ်လွယ်နဲ့ သေမှာမဟုတ်ဘူး"
ဝေ့ရီ သူမရဲ့ စကားကြောင့် ဇဝေဇဝါ ဖြစ်သွားရသည်။
'သူမ ဒီလောက်လွယ်လွယ်နဲ့ သေမှာမဟုတ်ဘူး..... ဒါပေမဲ့... အဲဒီ သခင်မလေးချင်းက သေသွားပြီလေ...'
'မင်းသမီးချန်နင်က သိပ်ဝမ်းမနည်းဘူးဆိုတာ ဖြစ်နိုင်ပေမယ့် သူမ ပေါက်ကရတွေပြောနေတာများလား.....'
ဝေ့ရီ စဉ်းစားလို့မရချေ။
ဒီအချိန်မှာ ချန်ချန်ရွှယ် ဆက်ပြောလိုက်သည်။ ဒါပေမဲ့ သူမနဲ့ ချင်းကျောက်က ညီအစ်မအတုယောင်တွေလိုမျိုး သူမရဲ့လေသံမှာ ဝမ်းနည်းမှုလုံးဝမရှိပေ။ တစ်ဖက်လူသေဆုံးသွားတာက သူမကိုဝမ်းနည်းအောင် လုပ်နိုင်ပုံ မရချေ။
"ချင်းကျောက် ဘေးနားက မူလဝိညာဉ်ဝိညာဉ် အပိုင်းအစကို မှတ်မိသေးလား"
ဝေ့ရီ ကြောင်အသွားပြီးခေါင်းငြိမ့်လိုက်သည်။ "မှတ်မိပါတယ်"
ချန်ချန်ရွှယ် ပြောလိုက်သည်။ "သူမ ရှိနေတာကို သိတဲ့သူတွေက ကျွန်မ၊ ချင်းကျောက်၊ ရှင်တို့အားလုံးနဲ့ ခမည်းတော်ပဲရှိတယ်"
သူမ ခဏ ရပ်ပြီး ဆက်ပြောလိုက်သည်။ "ချင်းကျောင့်ကို ကြားဖြတ်တိုက်ခိုက်တဲ့လူတွေက အဘွားအိုချင်ရှိနေတာကို သိချင်မှသိကြမှာ"
ဝေ့ရီ ရုတ်တရက်သဘောပေါက်သွားခဲ့သည်။ ချန်ချန်ရွှယ် သူ့ကိုရှင်းပြနေစရာမလိုတော့ပေ။
သူ ချက်ချင်းပြောလိုက်သည်။ "အဲဒီ နေရာတဝိုက်ကို ရှာဖွေဖို့ ကျွန်တော့်ရဲ့ လက်အောက်ငယ်သားတွေကို အမိန့်ပေးလိုက်ပါ့မယ်"
"ကောင်းပြီ။" ချန်ချန်ရွှယ် ခေါင်းငြိမ့်လိုက်သည်။ "သွားတော့"
"ဟုတ်ကဲ့"
ဝေ့ရီရဲ့ကျောပြင်ကိုကြည့်ပြီး၊ ချန်ချန်ရွှယ် ရေရွတ်လိုက်သည်။ "ချင်းကျောက်ကို သတ်တဲ့လုပ်ရပ်က သိပ်သေသပ်တယ်။ ကံဆိုးတာက ရှင်တို့ တစ်ခုခု လွတ်သွားခဲ့တယ်"
"အခြေတည်အဆင့်ကျင့်ကြံသူ တစ်ယောက်ရဲ့ ဆွဲကြိုးထဲမှာ မူလဝိညာဉ်အဆင့် ဝိညာဉ်အပိုင်းအစတစ်ခုပါနေမယ်လို့ ဘယ်သူက တွေးမိမှာလဲ"
အဘွားအိုချင်ကိုရှာတွေ့သရွေ့ ရွှေအမြုတေကျင့်ကြံသူသုံးဦးရဲ့ အထောက်အထားကို ချန်ချန်ရွှယ် အတည်ပြုနိုင်ပေလိမ့်မည်။
ပြီးရင် အဲဒီရွှေအမြုတေကျင့်ကြံသူသုံးဦးရဲ့ ခြေရာကို လိုက်ပြီး နောက်ကွယ်ကကြိုးကိုင်သူကို သူမရှာတွေ့နိုင်ပေလိမ့်မည်။
ချင်းကျောက်က သူမနဲ့ ပတ်သက်ဆက်နွယ်နေလို့ အသတ်ခံလိုက်ရတာဆိုတာကို ချန်ချန်ရွှယ် သိပေသည်။ တစ်နည်းအားဖြင့်ပြောရရင် ချင်းကျောက် လုပ်ကြံခံရမှုနောက်ကွယ်ကကြိုးကိုင်သူက သူမကို ပစ်မှတ်ထားနေခြင်းပင်။
"မူလက မဟာဝေရဲ့ထီးနန်းကို ကျွန်မ စိတ်မဝင်စားခဲ့ဘူး....ဒါပေမဲ့ ရှင်တို့က လာပြီးကစားချင်မှတော့..."
ချန်ချန်ရွှယ် ရုတ်တရက် ပြုံးလိုက်၏။ "ရှင်တို့ ကျွန်မကို နိုင်အောင်တိုက်နိုင်မလားဆိုတာပေါ် မူတည်တာပေါ့"
"ရှင်တို့မှာက ရှုံးနိမ့်ဖို့ အခွင့်အရေးတစ်ကြိမ်ပဲ ရှိတယ်... ဒါပေမဲ့ ကျွန်မမှာက ရေတွက်လို့မရနိုင်တဲ့ အခွင့်အရေးတွေ ရှိတယ်...."
"..."