အခန်း ၁၈၁ : ချင်းကျောက်၏ ဆုလာဘ်များ
ဒီလိုမိစ္ဆာလက်နက် သန့်စင်နည်းမျိုးကို သူဘယ်လိုလုပ် သုံးနိုင်မည်နည်း။
အကယ်၍ သူသာ တစ်ကြိမ်လောက် သုံးလိုက်မိပါက လူသားမျိုးနွယ်ကို သစ္စာဖောက်လိုက်သလိုဖြစ်ကာ လူအားလုံး၏ ပစ်မှတ်ဖြစ်လာလိမ့်မယ်လို့ ပိုင်ယီခံစားလိုက်ရသည်။
ဒီလိုတွေးကြည့်လိုက်တော့ အကောင်းဆုံး ရွေးချယ်မှုက ဆုလာဘ် (၃)ဖြစ်တဲ့ သွေးလိုနီရဲနေသည့် ကြေးပြားစသာ ဖြစ်ပေသည်။ ဒါက အလွန်အဆင့်မြင့်တဲ့ ဝိညာဉ် ကိရိယာတစ်ခုဖြစ်ပြီး အန္တရာယ်တွေကို ကြိုတင်ခန့်မှန်းပေးနိုင်သလို သူ့ရဲ့တိကျမှုကလည်း အလွန် မြင့်မားပေသည်...
ဒီအရာက... ဝိညာဉ်ဓားဂိုဏ်းတို့၊ ကျန်းရှင်းနန်းတော်တို့လို ကျင့်ကြံခြင်းဂိုဏ်းကြီးတွေမှာ ထားရှိရင်တောင် ဂိုဏ်းစောင့်ရတနာအဖြစ် ဆောင်ရွက်နိုင်တဲ့ အရာမျိုးပင်။
သိပ်မကြာခင်မှာပဲ သွေးလိုနီရဲနေသည့် ကြေးပြားစ တစ်ခုဟာ လေထုထဲမှပေါ်ထွက်လာပြီး ထူးဆန်းသော အော်ရာတစ်ခုက ဖြည်းညှင်းစွာပျံ့နှံ့ထွက်ပေါ်လာခဲ့သည်။ အကယ်၍အားနည်းသည့်ကျင့်ကြံသူတစ်ဦးသာ ဤသွေးလိုနီရဲနေသည့်ကြေးပြားစနှင့် မဆင်မခြင်ထိတွေ့မိပါက သူတို့၏ စိတ်အခြေအနေက အလွန် လွယ်ကူစွာ ထိခိုက်ခံစားရနိုင်ပေသည်။
ကံကောင်းစွာဖြင့် ပိုင်ယီ၏ ခွန်အားက အဆင်ပြေသေးပြီး အခြေတည်အဆင့်(၆)ရှိတဲ့ သူ၏ကျင့်ကြံမှုက မဆိုးဘူးဟု သတ်မှတ်၍ရပေသည်။
သူဟာ ချက်ချင်းပင် စိတ်ကိုတည်ငြိမ်အောင်ထားလိုက်ပြီး ဝိညာဉ်ကို ကာကွယ်လိုက်သည်။
ဤထူးဆန်းသည့်အော်ရာ၏ လွှမ်းမိုးမှုကို တားဆီးရင်း သူဟာ ကြေးပြားစကို လက်ထဲတွင် ကိုင်ထားလိုက်ကာ သက်ပြင်းချပြီး ရေရွတ်လိုက်သည်။
"ထင်ထားတဲ့အတိုင်းပဲ အဆင့်မြင့်တဲ့ ဝိညာဉ် လက်နက်တစ်ခုပဲ။ ဒါမှမဟုတ် ပြောရရင် မိစ္ဆာ လက်နက်တစ်ခုလား"
ဤဝိညာဉ်လက်နက်ကို ရရှိပြီးနောက် ၎င်းကိုမည်သို့ အသုံးပြုရမည်ကို ပိုင်ယီသိရှိသွားပေသည်။
ဤကြေးပြားစကို အသုံးပြုရန်ပေးဆပ်ရမည့် တန်ဖိုးတစ်ခုရှိကြောင်းလည်း သူသိလိုက်ရသည်။
ထိုတန်ဖိုးမှာ သက်တမ်းပင်ဖြစ်လေသည်။
တစ်ကြိမ်ဟောကိန်းထုတ်လျှင် ဆယ်နှစ်သက်တမ်း လျော့နည်းသွားပေမည်။
......
သာမန်လူတစ်ဦးအတွက်ဆိုလျှင် (၅) ကြိမ် (၆) ကြိမ်လောက် ဟောကိန်းထုတ်ရုံဖြင့် သူတို့ကို မြေမြှုပ်ပစ်ရန် လုံလောက်ပေသည်။
သို့သော် ကျင့်ကြံသူတစ်ဦးအတွက်မူ (၁၀) ကြိမ် သို့မဟုတ် ဒါဇင်နှင့်ချီပြီး ဟောကိန်းထုတ်လျှင်ပင် ပြဿနာမရှိပေ။
အထူးသဖြင့် ကျင့်ကြံခြင်း သရုပ်ဖော်စနစ်၏ အခွင့်အာဏာရှိပြီး ရွေးချယ်ခံ(၃)ဦးက သူ့အတွက် အလုပ်လုပ်ပေးနေသော ပိုင်ယီကဲ့သို့ လူတစ်ဦး အတွက်မူ…
ဟောကိန်းထုတ်ရန် ဤအရာကို ဒါဇင်ပေါင်းများစွာ အသုံးပြုခြင်းက သူ့ကို သိပ်ပြီး ထိခိုက်စေမည် မဟုတ်ပေ။
တစ်ချိန်တည်းမှာပင် နောက်ထပ်ဆုလာဘ် (၃)ခုကိုလည်း ပေးအပ်ခဲ့သည်။ ၎င်းတို့မှာ အဆင့်မြင့်ဝိညာဉ် ကျောက်တုံး (၁၀,၀၀၀)၊ ဝိညာဉ်ဝါးမျိုအဆောင်တစ်ခု နှင့်ယန်ပြန်လည်ရရှိခြင်းအသီးတစ်လုံးတို့ပင်။
ပထမတစ်ခုက ပိုင်ယီ၏ ပိုက်ဆံအိတ်ကို ကြွယ်ဝစေနိုင်ပေသည်။ ၎င်းက အဆင့်မြင့်ဝိညာဉ်ကျောက်တုံးမျဖြစ်ကာ အလယ်အလတ် ကျင့်ကြံခြင်းဂိုဏ်းတစ်ခု၏ နှစ်ပေါင်းထောင်ချီ စုဆောင်းထားသည့် ကြွယ်ဝချမ်းသာမှုအားလုံးနှင့် ညီမျှပေသည်။
ဒုတိယတစ်ခုက တိုက်ခိုက်ရေးအဆောင်ဖြစ်ပြီး ရန်သူ သတိမထားမိခင် သေစေနိုင်သည့် တိုက်ခိုက်မှုကို ပေးစွမ်းနိုင်ပေသည်။
၎င်းက ပိုင်ယီကို သူ့အဆင့်ထက်မြင့်သည့် သူများကို လွယ်ကူစွာ တိုက်ခိုက်နိုင်စေလေသည်။
ရွှေအမြုတေအဆင့် (၁)ကို တိုက်ခိုက်မှု တစ်ချက်တည်းဖြင့် သတ်ဖြတ်နိုင်ပေသည်။
ရွှေအမြုတေအဆင့် (၁)ထက် အနည်းငယ် ပိုမြင့်သော ရန်သူဆိုပါက ၎င်းက အသုံးမဝင်တော့ချေ။
နောက်ဆုံးတစ်ခုက အသက်ကယ်ဝိညာဉ်ဆေးဝါး ဖြစ်ပြီး အသက်ရှူနေသေးသရွေ့ ပြန်လည် ရှင်သန်လာနိုင်ပေသည်။
ကိုယ့်အသက်ကို ကယ်တင်ဖို့ပဲဖြစ်ဖြစ် တခြားသူတွေရဲ့ အသက်ကို ကယ်တင်ဖို့ပဲဖြစ်ဖြစ် ၎င်းက အလွန် အသုံးဝင်လေသည်။
ဒီဆုလာဘ်တွေက ကြီးမားတဲ့ ရိတ်သိမ်းမှုတစ်ခုပင်။
…
အခြား တစ်ဖက်တွင်။
[ဤမသေမျိုးကျင့်ကြံခြင်း သရုပ်ဖော်ဘဝတွင် သင်ဟာ တိုင်းပြည်တစ်ခုနှင့် ယှဉ်နိုင်လောက်အောင် ကြွယ်ဝချမ်းသာခြင်း၊ မိစ္ဆာ၏ ရန်သူနှင့် တိုင်းပြည် တည်ငြိမ်စေခြင်းဆိုသည့် အောင်မြင်မှုသုံးခုကို အောင်မြင်စွာ ဖွင့်လှစ်နိုင်ခဲ့ပ့သည်။ သင်သည် ထပ်ဆောင်းဆုလာဘ် သုံးခုကိုရရှိခဲ့ပါသည်။သင်သည် အောက်ပါဆုလာဘ်များကို ရရှိပါသည်]
[ဆုလာဘ် ၁ - အခြေတည်အဆင့် (၄)၏ ဝိညာဉ် စွမ်းအင်အားလုံး (ဖြစ်နိုင်တာက သင့်အား ကျင့်ကြံခြင်း အဆင့် နှစ်ဆင့်ကို တစ်ရှိန်ထိုးအဆင့်ချိုးဖျက် ဝင်ရောက်စေနိုင်သည်)]
[ထပ်ဆောင်းဆုလာဘ် ၁ - အဆင့်မြင့် ဝိညာဉ် ကျောက်တုံး (၁,၀၀၀) (ကျန်းရှင်းနန်းတော်၏ နန်းတော်သခင်ပင်လျှင် ဤမျှများပြားသည့် ဝိညာဉ် ကျောက်တုံးပမာဏကို မထုတ်ယူမီ စဉ်းစားရပေလိမ့်မည်)]
[ထပ်ဆောင်းဆုလာဘ် ၂ - လူသားတစ်ဝက် ဘုရင် ခန္ဓာကိုယ်(ချန်ချန်ရွှယ်၏ မသေမျိုးကျင့်ကြံခြင်း ရုပ်ပိုင်းဆိုင်ရာ ခန္ဓာကိုယ်က ဖရိုဖရဲအခြေအနေသို့ ဝင်ရောက်သွားပုံရသည်)]
[ထပ်ဆောင်းဆုလာဘ် ၃ - ဥ တစ်လုံး (ဘာကောင် ပေါက်လာမလဲဆိုတာ ခန့်မှန်းကြည့်ပါ.....)]
"ရှူး...."
ချင်းကျောက် လေအေးတစ်ချက် မရှူသွင်းဘဲမနေနိုင်တော့ပေ။ မသေမျိုးကျင့်ကြံခြင်း သရုပ်ဖော်စနစ်က ပေးအပ်သောဆုလာဘ်များက ရက်ရောလွန်းသဖြင့် အနည်းငယ် အတုအယောင်ဆန်သည်ဟုပင် ခံစားရပြီး သူမထင်ယောင်ထင်မှားဖြစ်နေသည်ဟု ခံစားလိုက်ရသည်။
အောင်မြင်မှုသုံးခုကို ဖွင့်လှစ်နိုင်ခြင်းက သူမအတွက် ပုံမှန်ကိစ္စဟု ချင်းကျောက်ခံစားရပြီ ဘာပဲဖြစ်ဖြစ် သူမဟာ ကိစ္စရပ်များစွာ လုပ်ဆောင်ခဲ့ပေသည်။
ထို့ကြောင့် အောင်မြင်မှုအနည်းငယ်ဖွင့်လှစ်နိုင်တာက မဆန်းချေ။
ပြဿနာက… ဤအောင်မြင်မှုများကို ဖွင့်လှစ်ခြင်းမှ ရရှိသော ထပ်ဆောင်းဆုလာဘ်များက သူမကို လစ်လျူရှု၍မရအောင်ဖြစ်သွားစေခဲ့သည်။
"ငါကျင့်ကြံခြင်း အဆင့်နှစ်ဆင့်ကို အဆင့်ချိုးဖျက် ဝင်ရောက်နိုင်တယ်" ချင်းကျောက် တုန်လှုပ်စွာ ရေရွတ်လိုက်သည်။
သူမဟာ လက်ရှိတွင် အခြေတည်အဆင့် (၂) ၌ ရှိနေပြီး မွေးရာပါဝိညာဉ်ခန္ဓာကိုယ်တစ်ဝက်၏ အထောက်အပံ့ ရှိပေသည်။ ထို့ကြောင့် အခြေတည်အဆင့် (၄) ၏ ဝိညာဉ်စွမ်းအား အားလုံးကို လက်ခံရရှိပြီးနောက် သူမဟာ အမှန်တကယ်ပင် အခြေတည်အဆင့် အဆင့် (၄)သို့ တစ်ရှိန်ထိုး အဆင့်ချိုးဖျက်ဝင်ရောက်နိုင်ပေလိမ့်မည်။
သရုပ်ဖော်စနစ်ထဲတွင် ချန်ချန်ရွှယ်ဟာ လက်တွေ့တွင် အခြေတည်အဆင့် (၃)၌ ရှိကြောင်း ပြောခဲ့သည်ကို ချင်းကျောက် မှတ်မိနေပေသည်။
တစ်နည်းအားဖြင့် ပြောရလျှင်…
ဤဆုလာဘ်ကိုလက်ခံရရှိပြီးနောက် လက်တွေ့တွင် သူမ၏ ကျင့်ကြံမှုက ချန်ချန်ရွှယ်ကို ကျော်တက်သွားနိုင်ပေမည်။
ချင်းကျောက် ရုတ်တရက် တက်ကြွသွားပြီး သူမ၏ လှပသော မျက်လုံးများက အခြားသူများကို မျက်စိကွယ်သွားစေနိုင်လောက်သည့် အလင်းရောင်ကို ထုတ်လွှတ်နေသကဲ့သို့ ဖြစ်နေခဲ့သည်။ ဤအချိန်တွင် သူမ ယခင်က မကြုံဖူးလောက်အောင် စိတ်လှုပ်ရှားနေပေသည်။
"ပြီးတော့ အဲဒီ နောက်ထပ် ဆုလာဘ်သုံးခု… စုစုပေါင်း အဆင့်မြင့်ဝိညာဉ် ကျောက်တုံး (၁,၀၀၀)။ မသေမျိုးကျင့်ကြံခြင်းဂိုဏ်းငယ်လေး တချို့ နှစ်ပေါင်း ရာချီစုဆောင်းထားတာတောင် ဒီက ဝိညာဉ် ကျောက်တုံးတွေကို ယှဉ်နိုင်မှာ မဟုတ်ဘူး... ဟုတ်တယ်မလား"
"လူသားတစ်ဝက် ဘုရင်ခန္ဓာကိုယ်.... ချန်ချန်ရွှယ်ရဲ့ မသေမျိုးကျင့်ကြံခြင်း ရုပ်ပိုင်းဆိုင်ရာခန္ဓာကိုယ်.... အာ.... ဒါက… ဘာလို့ သူမရဲ့ မသေမျိုးကျင့်ကြံခြင်း ရုပ်ပိုင်းဆိုင်ရာခန္ဓာကိုယ်က ငါ့ရဲ့ နောက်ဆုံး ဆုလာဘ်ဖြစ်လာရတာလဲ"
"ငါတို့ နှစ်ယောက်အရင်က အတူတူ ပူးပေါင်းလုပ်ဆောင်ခဲ့လို့များလား"
"ဒါ့အပြင် ဒီနောက်ဆုံး ထပ်ဆောင်းဆုလာဘ်က…"
"ဥ တစ်လုံးလား"
"ဒါက…"
ချင်းကျောက်သူမ၏ အာရုံစိုက်မှုကို နောက်ဆုံး ထပ်ဆောင်းဆုလာဘ် အပေါ် ထားလိုက်သည်။
ယုတ္တိကျကျပြောရလျှင် ဥထဲမှ ပေါက်လာနိုင်တာက တိရစ္ဆာန်တစ်မျိုးမျိုး ဖြစ်ရပေမည်.........
ထို့အပြင် မသေမျိုးကျင့်ကြံခြင်း သရုပ်ဖော် စနစ်က ဆုလာဘ်အဖြစ်ပေးသည့် ဥက သာမန်တိရစ္ဆာန် မဖြစ်နိုင်ပေ။
'အဲဒါ မိစ္ဆာသားရဲ ဥတစ်လုံးလား....ခဏလေး...မိစ္ဆာသားရဲဥ...'
မသေမျိုးကျင့်ကြံခြင်း သရုပ်ဖော်စနစ်က ပေးသည့် ဆုလာဘ်က သူမမသေမျိုးကျင့်ကြံခြင်း သရုပ်ဖော်နေစဉ် ထိတွေ့ဆက်ဆံခဲ့ဖူးသောအရာများ သို့မဟုတ် ဖြစ်ရပ်များနှင့် သေချာပေါက် ဆက်စပ်နေမည် ဖြစ်ကြောင်း ချင်းကျောက် သတိရလိုက်သည်။
သူမ မသေမျိုးကျင့်ကြံခြင်း သရုပ်ဖော်နေစဉ် မည်သည့် မိစ္ဆာသားရဲနှင့် ထိတွေ့ဖူးခြင်းမရှိချေ။ မိစ္ဆာသားရဲအသားအချို့ စားသောက်ခဲ့ခြင်းမှလွဲ၍ သူမ ထိတွေ့ဆက်ဆံခဲ့ဖူးသော တစ်ကောင်တည်းသော အသက်ရှင်နေသည့် မိစ္ဆာသားရဲက သူမ၏ အိမ်မွေးတိရစ္ဆာန်ဝိုက်တီပင်။
"ဒါက…"
ချင်းကျောက်ပါးစပ်အဟောင်းသားဖြစ်သွားရသည်။ "ဒီဥကဝိုက်တီဖြစ်နိုင်မလား"