အခန်း ၁၈ : ချီစုစည်းမှု အဆင့် ၂သို့ ရောက်ရှိခြင်း

​[အသက် ၁၀ နှစ် - သင်ဟာ မသေမျိုးအဖြစ် တက်လှမ်းခြင်း ဂိုဏ်းသို့ ဝင်ရောက်ခဲ့ပြီး ဂိုဏ်းချုပ်ကြီး၏ ဆက်ခံသူ တပည့် ဖြစ်လာခဲ့ပါသည်။ ဂိုဏ်းထဲတွင် သင်ဟာ ရေပန်းစားသော ပုဂ္ဂိုလ်တစ်ဦး ဖြစ်လာခဲ့ပြီး  သင့်ထက် အသက်ကြီးသော စီနီယာ အစ်ကို၊ အစ်မ များစွာက သင့်ကို မျက်နှာလိုမျက်နှာရ လာလုပ်ကြသည်။ မသေမျိုးကျင့်ကြံသူများဟာ တစ်ခါတစ်ရံတွင် သာမန်လူများနှင့် ဆင်တူကြောင်း သင်ဟာ ခံစားလိုက်ရသည်။]

​[သင့်ဆရာသခင်က မသေမျိုးအဖြစ် တက်လှမ်းခြင်း ဂိုဏ်း၏ ကျင့်စဉ်များကို သင်ကြားပေးခဲ့သည်။ သင့်ဟာ သင့်၏ ကိုယ်ပိုင် ဓားကျင့်စဉ်လောက် မကောင်းကြောင်း သင် ခံစားမိသော်လည်း ဆက်လက် သင်ယူခဲ့သည်။]

​[သင်သည် ကျင့်ကြံခြင်း၌ ကြိုးစားအားထုတ်နေသည်...]

​[သင့် ချီကြောများ အနည်းငယ် ဖောင်းကားလာသည်ကို ခံစားလိုက်ရသော်လည်း ဘေးကင်းစေရန်အတွက် နောက်တစ်ဆင့်သို့ ချက်ချင်း ချိုးဖျက်မဝင်ရောက်သေးပေ။]

​[အသက် ၁၁ နှစ် - သင်ဟာ ကျင့်ကြံရာတွင် အထောက်အကူ ဖြစ်စေရန် ဂိုဏ်းမှ ဆေးလုံး အမြောက်အမြား ရရှိခဲ့သည်။ သို့သော် သင့်၏ အခြေခံအုတ်မြစ်က အားနည်းလွန်းသဖြင့် ဆေးလုံးများ၏ အာနိသင် (၁၀) ရာခိုင်နှုန်းခန့်ကိုသာ သန့်စင်နိုင်ခဲ့သည်။ ၎င်းသည် အလွန် ဖြုန်းတီးရာ ရောက်နေပေသည်။]

​[မသေမျိုးအဖြစ် တက်လှမ်းခြင်း ဂိုဏ်းမှ တပည့်တစ်ဦး အပြင်ထွက် လေ့ကျင့်နေစဉ် မိစ္ဆာကျင့်ကြံသူ တစ်ဦး၏ သတ်ဖြတ်ခြင်းကို ခံလိုက်ရကြောင်း သင် သိလိုက်ရသည်။ ဤကမ္ဘာကြီးက အမှန်တကယ် အန္တရာယ်များကြောင်း သင်ဟာ ခံစားလိုက်ရသည်။]

​[အဆင့်တက်ရန် အခွင့်အလမ်း ရောက်ရှိလာပြီဟု သင် ခံစားလိုက်ရသည်။]

​[သင်သည် အဆင့်တက်ခြင်းကို အောင်မြင်စွာ လုပ်ဆောင်နိုင်ခဲ့ပြီ]

​[သင်သည် ချီစုစည်းမှု အဆင့် (၂) မသေမျိုးကျင့်ကြံသူ တစ်ဦး ဖြစ်လာခဲ့ပါပြီ]

​"ငါ အောင်မြင်ပြီ"

​ချန်ချန်ရွှယ်ဟာ မသေမျိုးအဖြစ် တက်လှမ်းခြင်း ဂိုဏ်း၏ ဝိညာဉ်စွမ်းအင် ကြွယ်ဝသော လေ့ကျင့်ရေးကွင်းပြင် တစ်ခုထဲတွင် ရှိနေခဲ့လေသည်။ သူမ၏ အသံထဲမှ စိတ်လှုပ်ရှားမှုနှင့် အံ့သြမှုများကို ဖုံးကွယ်၍ မရနိုင်ပေ။

​သူမဟာ မွေးဖွားလာကတည်းက ကောင်းကင်မြေကြီး ဝိညာဉ်စွမ်းအင်များကို ရှူရှိုက် လေ့ကျင့်ခဲ့ပေသည်။ ယခုနှစ် အသက် (၁၁) နှစ် ရောက်မှသာ ချီစုစည်းမှု အဆင့် (၂) မသေမျိုးကျင့်ကြံသူ တစ်ယောက် ဖြစ်လာခဲ့ခြင်း ဖြစ်၏။

​၎င်းက သူမရဲ့ ပါရမီ ဘယ်လောက် ညံ့ဖျင်းတယ် ဆိုတာ ပြသဖို့ လုံလောက်နပေပြီ။

​အကယ်၍သာ သူမမှာ မွေးရာပါ ပါရမီ ဓားနဲ့ ဓားကျင့်စဉ်သာ မရှိခဲ့ဘူး ဆိုရင် ချီစုစည်းမှု အဆင့် (၁) ကိုတောင် ရောက်နိုင်မှာ မဟုတ်ဘူးလို့ ချန်ချန်ရွှယ် ခံစားမိပေသည်။

​အသက် (၁၁) နှစ် အရွယ်မှာ ချီစုစည်းမှု အဆင့် (၂) ကို ရောက်နိုင်ခဲ့တာ သူမအတွက် တော်တော် ကျေနပ်စရာ ဖြစ်နေပေပြီ။

​အရေးအကြီးဆုံးကတော့ နောက်တစ်ဆင့်ကို တက်လှမ်းဖို့ ကြိုးစားတဲ့အခါ တစ်ကြိမ်တည်းနဲ့ အောင်မြင်ခဲ့ခြင်း ဖြစ်လေသည်။

​ကျရှုံးသွားလို့ ဖြစ်လာမယ့် တန်ပြန်မှုတို့အား စိုးရိမ်စရာ မလိုတော့ပေ။

​နောက်ဆုံးတော့ သူမဟာ ပြီးခဲ့တဲ့ သရုပ်ဖော် ဘဝနှစ်ခုထက် ပိုသတိထားခဲ့ခြင်းပင်။

​ဒါ့အပြင်... ဒီတစ်ခါမှာ သူမဟာ မသေမျိုးကျင့်ကြံခြင်း ဂိုဏ်းတစ်ခုထဲ ဝင်ရောက်ခဲ့ပြီး ကျင့်ကြံခြင်း အရင်းအမြစ် တချို့လည်း ရရှိခဲ့လေသည်။

​ဂိုဏ်းက ပေးတဲ့ ဆေးလုံးတွေရဲ့ အာနိသင်ကို အပြည့်အဝ အသုံးမချနိုင်ခဲ့ရင်တောင် ကောင်းကင်မြေကြီး ဝိညာဉ်စွမ်းအင်တွေကို ဒီအတိုင်း ရှူရှိုက်နေတာထက်တော့ အဆပေါင်းများစွာ သာလွန်နေပါသေးပေသည်။

​"ဟူး" ချန်ချန်ရွှယ် သက်ပြင်းတစ်ချက် ချလိုက်ပြီး စိတ်ထဲက စိတ်လှုပ်ရှားမှုတွေကို မနည်း ထိန်းချုပ်လိုက်ရသည်။

​ဒီအရှိန်အဟုန်က သိပ်ကောင်းတယ်လို့ သူမ ခံစားရလေသည်။

​ဒီအတိုင်းသာ ဆက်သွားရင်...

​ဖြစ်နိုင်တာက...

​အသက် (၂၀) မပြည့်ခင် ချီစုစည်းမှု အဆင့် (၃) ကို ရောက်နိုင်လောက်ပေသည်။ မသေမျိုးကျင့်ကြံခြင်း သရုပ်ဖော် စနစ်ထဲမှာ အသက် (၂၀) ကျော်သွားရင်တော့ ချီစုစည်းမှု အဆင့် (၄) ကို ရောက်သွားနိုင်ခြေ ရှိသည်။

​လက်တွေ့ဘဝနဲ့ ယှဉ်လို့ မရဘူး ဆိုတာ ဝန်ခံပေမဲ့ ဒီ ကျင့်ကြံနှုန်းကလည်း သိပ်တော့မဆိုးလှပါချေ။

​၎င်းက အလယ်အလတ် အဆင့်လောက်တော့ ရှိနေသေးပေသည်။

​မသေမျိုးအဖြစ် တက်လှမ်းခြင်း ဂိုဏ်းလို ဂိုဏ်းအသေးစားလေး တစ်ခုမှာတော့ အလယ်အလတ် အဆင့် ကျင့်ကြံနှုန်း ရှိတာ ရှားပါးပြီး လူတွေက သူမကို ကောင်းကင်ဘုံရဲ့ အချစ်တော်တစ်ယောက်လို ဆက်ဆံကြလေသည်။

​ချန်ချန်ရွှယ်က (၁၁) နှစ်ပဲ ရှိသေးပေမယ့် သူမရဲ့ ကျင့်ကြံမှုအဆင့်က ဂိုဏ်းသား အများအပြားကို ကျော်တက်သွားခဲ့ပေပြီ။

​ဘာပဲဖြစ်ဖြစ်... မသေမျိုးအဖြစ် တက်လှမ်းခြင်း ဂိုဏ်းမှာ တစ်နှစ်ပတ်လုံး ချီစုစည်းမှု အဆင့် (၁) မှာပဲ တဝဲလည်လည် ဖြစ်နေတဲ့ ဂိုဏ်းသားတွေ အများကြီး ရှိမှန်း သူမ သိထားလေသည်။

​အကြောင်း အမျိုးမျိုးကြောင့် သူတို့က ဘယ်လိုမှ ချီစုစည်းမှု အဆင့် (၂) ကို မတက်နိုင်ကြချေ။

​"ဓားကျင့်စဉ်ထဲက ထူးခြားတဲ့ ဓားထိန်းချုပ်ခြင်း ပညာက ငါ့ကို ချီစုစည်းမှု အဆင့် (၅) မရောက်ခင်မှာ ရန်သူတွေကို သတ်ဖို့ ဓားထိန်းချုပ်ခွင့် ပေးထားတယ်.... ဒီစွမ်းရည်က ရန်သူတွေကို အလစ်အငိုက် ဖမ်းဖို့ လုံလောက်တယ်.....ဒီနည်းနဲ့ဆိုရင် ချီစုစည်းမှု အဆင့် (၃) မသေမျိုးကျင့်ကြံသူနဲ့ တွေ့ရင်တောင် ငါ ယှဉ်ပြိုင်တိုက်ခိုက်နိုင်မှာ... ချန်ချန်ရွှယ်ဟာ ရေရွတ်လိုက်၏။

​ဒီအတွေးနဲ့အတူ သူမဟာ ချက်ချင်း စိတ်ဓာတ်တက်ကြွလာခဲ့သည်။

​အခုမှ အဆင့်တက်ထားတာမို့ အခြေခံ ခိုင်မာအောင် လုပ်ဖို့ မလိုဘူးဆိုရင် အခုချက်ချင်း ဆက်ပြီး ကျင့်ကြံချင်မိပေမည်။

​သူမဟာ ပိုမြင့်တဲ့ အဆင့်ကို ရောက်အောင် ဆက်လက် ကြိုးစားချင်နေပေသည်။

​...

​"တစ်ကြိမ်ထက် တစ်ကြိမ် ပိုကောင်းလာတာပဲ"

​လက်တွေ့ကမ္ဘာတွင်...

​ဝိညာဉ်ဓားဂိုဏ်း သူတော်စင်မ ချန်ချန်ရွှယ်ဟာ နောက်ဆုံးတော့ ချီစုစည်းမှု အဆင့် (၂) ကို ရောက်ရှိသွားတာ မြင်တော့ ပိုင်ယီ စိတ်သက်သာရာရစွာ သက်ပြင်းချလိုက်၏။

​ဆိုလိုတာက အခု ချန်ချန်ရွှယ် ရုတ်တရက် သေဆုံးသွားရင်တောင်... နောက်ပိုင်း ဆုလာဘ်တွေ တွက်ချက်တဲ့အခါ ပြီးခဲ့တဲ့ တစ်ခေါက်ထက် ပိုများပြား ရက်ရောမှာ သေချာလေသည်။

​သူက မည်းမှောင်သော နှလုံးသား ပိုင်ရှင် သူဌေးတစ်ယောက်လို ဖြစ်နေပေမယ့် သရုပ်ဖော် စနစ်ထဲမှာ သေတာက တကယ်သေတာမှ မဟုတ်ပေ။ သူလည်း သရုပ်ဖော် စနစ်ထဲမှာ ဒါဇင်နဲ့ချီ သေဖူးခဲ့ပြီး ဘာပြဿနာမှ မရှိခဲ့သလို စိတ်ပိုင်းဆိုင်ရာ ပြဿနာတောင် မရှိခဲ့ချေ။

​သူ့စိတ်ထဲမှာ အတွေးပေါင်းစုံ ဖြတ်သန်းနေချိန်မှာပဲ မသေမျိုးကျင့်ကြံခြင်း သရုပ်ဖော် စနစ်ရဲ့ သတိပေးချက် စာသားတွေ ဆက်တိုက် ပေါ်လာခဲ့ပြီး  ချန်ချန်ရွှယ်ရဲ့ အတွေ့အကြုံ အမျိုးမျိုးကို မှတ်တမ်းတင် ပြသနေခဲ့သည်။

​[အသက် ၁၂ နှစ် - ချန်ချန်ရွှယ်ဟာ မသေမျိုးအဖြစ် တက်လှမ်းခြင်း ဂိုဏ်း၏ ဂိုဏ်းချုပ်ကြီး ပေးသနားသော ဝိညာဉ်ဓား တစ်ချောင်း ရရှိခဲ့သည်။ ၎င်း၏ အဆင့်အတန်းက သိပ်မမြင့်မားသော်လည်း ဒီလို ဂိုဏ်းအသေးစားလေး အတွက်တော့ ရတနာ တစ်ပါးပါပင်။ ဂိုဏ်းချုပ်ကြီးက သူမကို တန်ဖိုးထားကြောင်း ချန်ချန်ရွှယ်ဟာ ခံစားလိုက်ရပြီး အတော်လေး စိတ်လှုပ်ရှားသွားခဲ့သည်။]

​[မိုင်ပေါင်း တစ်သောင်း ပတ်လည် အတွင်းရှိ အဓိက မသေမျိုးကျင့်ကြံခြင်း ဂိုဏ်းကြီးများဟာ ဆယ်စုနှစ် တစ်ကြိမ် ကျင်းပသော စမ်းသပ်ပြိုင်ပွဲကို ကျင်းပတော့မည် ဖြစ်သည်။ မသေမျိုးအဖြစ် တက်လှမ်းခြင်း ဂိုဏ်း၏ အသက်အငယ်ဆုံး ဆက်ခံသူ တပည့် ဖြစ်သော ချန်ချန်ရွှယ်ဟာ ပြိုင်ပွဲဝင်ခွင့် တစ်နေရာအား ရရှိခဲ့သည်။]

​[ချန်ချန်ရွှယ်ဟာ ကျင့်ကြံခြင်း၌ ကြိုးစားအားထုတ်နေသည်...]

​[ချန်ချန်ရွှယ်ဟာ ဂိုဏ်းချုပ်ကြီးနောက်သို့ လိုက်ပါပြီး မသေမျိုးကျင့်ကြံခြင်း ဂိုဏ်းကြီး တစ်ခုသို့ သွားရောက်ခဲ့သည်။ သူမသည် စမ်းသပ်ပြိုင်ပွဲ ဝင်ရောက် ယှဉ်ပြိုင်ခဲ့ပြီး မသေမျိုးကျင့်ကြံသူ အမျိုးမျိုးကို တွေ့မြင်ခဲ့ရသည်။]

​[စမ်းသပ်ပြိုင်ပွဲ စတင်ခဲ့သည်။ ချန်ချန်ရွှယ်ဟာ မဲနှိုက်ရာ ချီစုစည်းမှု အဆင့် (၃) ကျင့်ကြံသူ တစ်ယောက်နှင့် ယှဉ်ပြိုင်ရမည် ဖြစ်သည်။]

​[သူမ၏ ဓားကျင့်စဉ်ကို ထုတ်ဖော်မပြသလိုသောကြောင့် ချန်ချန်ရွှယ်ဟာ အရှုံးပေးလိုက်သည်။ သူမ တမင်သက်သက် ရှုံးပေးခဲ့သည်ကို မသိရှာသော ဂိုဏ်းချုပ်ကြီးက သူမကို စိတ်မပျက်ဖို့ အားပေးခဲ့သည်။ နောက်ထပ် (၁၀) နှစ်နေမှ ပြန်လာပြိုင်ပေါ့ဟု ပင်။]

​[အသက် ၁၃ နှစ် - ချန်ချန်ရွှယ်တွင် ဂျူနီယာ ညီမလေး တစ်ယောက် တိုးလာခဲ့သည်။ သူတို့ဟာ အသက်အရွယ်ချင်း သိပ်မကွာလှပေ။ ဂိုဏ်းချုပ်ကြီး ကိစ္စတစ်ခုဖြင့် ခရီးဝေး သွားစရာ ရှိသဖြင့် ဤဂျူနီယာ ညီမလေးကို သင်ကြားပြသပေးရန် သူမအာူ တာဝန်ပေးခဲ့သည်။]

​[ချန်ချန်ရွှယ်ဟာ ကျင့်ကြံခြင်း၌ ကြိုးစားအားထုတ်နေခဲ့သည်...]

​[ချန်ချန်ရွှယ်သည် သူမ၏ ဂျူနီယာ ညီမလေးနှင့် ဆက်ဆံရေး ကောင်းမွန်လှသည်။ ထို့အပြင် ဂျူနီယာ ညီမလေး၏ အရိုးတည်ဆောက်ပုံနှင့် အခြေခံအုတ်မြစ်ဟာ အလွန် ကောင်းမွန်ကြောင်း သူမ တွေ့ရှိလိုက်ရသည်။]

​[အသက် ၁၄ နှစ် - သတင်းဆိုး ရောက်လာခဲ့သည်။ မသေမျိုးအဖြစ် တက်လှမ်းခြင်း ဂိုဏ်း၏ ဂိုဏ်းချုပ်ကြီးသည် အပြင်ထွက်နေစဉ် အခြေတည်အဆင့် မိစ္ဆာကျင့်ကြံသူ အများအပြား၏ ချောင်းမြောင်းတိုက်ခိုက်ခြင်းကို ခံရပြီး သေဆုံးသွားခဲ့သည်]

​[...]

​ဒါကို မြင်တော့ တစ်ခုခု မှားယွင်းနေပြီလို့ ပိုင်ယီ ခံစားလိုက်ရသည်။ ကြည့်ရတာ ချန်ချန်ရွှယ်ရဲ့ သရုပ်ဖော် မသေမျိုးကျင့်ကြံသူ ဘဝက မကောင်းတဲ့ ဘက်ကို ဦးတည်နေခဲ့ပေပြီ။

​ဂိုဏ်းချုပ်ကြီးက ဘယ်လောက် ကံဆိုးလိုက်သလဲ ဆိုတာ ထားလိုက်ပါတော့... အပြင်ထွက်တာနဲ့ မိစ္ဆာကျင့်ကြံသူတွေရဲ့ ချောင်းမြောင်းတိုက်ခိုက်တာ ခံလိုက်ရလေသည်။

​မသေမျိုးကျင့်ကြံခြင်း ဂိုဏ်းတစ်ခုက သူတို့ရဲ့ ဂိုဏ်းချုပ်ကြီးကို ဆုံးရှုံးလိုက်ရပြီ ဆိုတာနဲ့ အကွဲကွဲအပြားပြား ဖြစ်ကုန်ကြတော့မှာက ခန့်မှန်းရ သိပ်ခက်တဲ့ ကိစ္စ မဟုတ်ပေ။

​ဂိုဏ်းကြီးက ဖရိုဖရဲ ကာလတစ်ခုထဲ ကျရောက်သွားတော့မယ် ဆိုတာ ပိုင်ယီ သေချာသိ​နေပေသည်။

​ဂိုဏ်းထဲမှာ အတွေ့အကြုံရှိပြီး စွမ်းအားကြီးတဲ့ ကျင့်ကြံသူတွေဟာ ဂိုဏ်းချုပ်နေရာ လုကြတော့မည်ပင်။

​ဒါက မသေမျိုးကျင့်ကြံခြင်း ဂိုဏ်းအတွင်း ပြင်းထန်တဲ့ ပြည်တွင်းစစ်တို့အား ဖြစ်စေကာ ဂိုဏ်းကနေ ခွဲထွက်သွားမယ့် လူတွေတောင် ရှိလာနိုင်ပေသည်။

​ဂိုဏ်းချုပ်ကြီး ဆိုတာ ဂိုဏ်းတစ်ခုလုံးမှာ အသန်မာဆုံး လူတစ်ယောက်ဖြစ်ကာ အခု အသန်မာဆုံး လူ မရှိတော့ဘူး ဆိုတော့... ဒီဂိုဏ်းကို မျက်စိကျနေတဲ့ ငါးဖယ်လေးတွေက တစ်သက်မှာ တစ်ခါရတဲ့ အခွင့်အရေးကို လက်လွှတ်ခံကြမှာ မဟုတ်ချေ။

​အသေးဆုံး ဂိုဏ်းလေး ဖြစ်ရင်တောင်မှ မက်မောတဲ့သူတွေ ရှိကြပေသည်။ မသေမျိုးအဖြစ် တက်လှမ်းခြင်း ဂိုဏ်းက ဂိုဏ်းကြီး တစ်ခု မဟုတ်ပေမယ့်  တော်တော် ကောင်းမွန်တဲ့ တောင်တန်းတစ်ခုကို ပိုင်ဆိုင်ထားပြီး အဲဒီမှာ ဝိညာဉ်စွမ်းအင်တွေ အလွန် ကြွယ်ဝပေသည်။

​မသေမျိုးကျင့်ကြံသူတွေ ကျင့်ကြံဖို့ အလွန် သင့်တော်တဲ့ နေရာဖြစ်တာကြောင့် ဒီတောင်တန်းကို လူတိုင်း မျက်စိကျနေကြမှာပင်။

​နောက်ဆက်တွဲ ဖြစ်ပျက်တာတွေက ပိုင်ယီ မျှော်လင့်ထားတဲ့ အတိုင်းပါပင်။

​ချန်ချန်ရွှယ်က လစ်လပ်သွားပြီလို့ ထင်ထားတဲ့ ဂိုဏ်းချုပ်နေရာက ရှုပ်ထွေးပွေလီလာခဲ့သည်။

​အဓိက တပည့်တစ်ယောက် အနေနဲ့ ချန်ချန်ရွှယ်ရဲ့ အနေအထားက သိပ်အဆင်မပြေ ဖြစ်လာခဲ့ပြီး မလွဲမသွေ ပါဝင်ပတ်သက်လာခဲ့ရသည်။

​သူမက ဂိုဏ်းချုပ်နေရာကို စိတ်မဝင်စားရင်တောင်မှ...

​တခြားသူတွေက အဲဒီလို မထင်ကြပေ။

​...