အခန်း ၁၇၈ : ပျော်ရွှင်နေသည့် ချင်းကျောက်၊ ဇဝေဇဝါဖြစ်နေသည့် အဖွားအိုချင်
ချန်ဖုန်းယင်သည် သူမ၏ ခန့်မှန်းချက်မှာ ရယ်စရာကောင်းလွန်းသည်ဟု မထင်ခဲ့ပေ။
ယင်းအစား သူဟာ ဤကဲ့သို့သော ဖြစ်နိုင်ချေ ရှိမရှိကို လေးလေးနက်နက် စဉ်းစားခဲ့သည်။
ထို့နောက် ချန်ဖုန်းယင်ဟာ ၎င်းအား စုံစမ်းစစ်ဆေးရန် လူများကို အမိန့်ပေးခဲ့သည်။
အကယ်၍ သူတို့ ဘာမှ ရှာမတွေ့ခဲ့လျှင်တောင် အလွန်ဆုံးမှ အချိန်အနည်းငယ်သာ ဆုံးရှုံးသွားပေလိမ့်မည်။
သို့ပေမဲ့ ခေါင်းပြတ်နေသော ယင်ကောင်တစ်ကောင်ကဲ့သို့ ဦးတည်ချက်မဲ့ဖြစ်နေသည်ထက် ပိုကောင်းပေသည်။
သို့သော်… အကယ်၍ သူ ဤလမ်းကြောင်းအတိုင်း ဆက်လက် စုံစမ်းစစ်ဆေးခဲ့လျှင် သူသည် တစ်စုံတစ်ရာကို ရှာတွေ့နိုင်ပေလိမ့်မည်။
ဆိုလိုသည်မှာ ချန်ချန်ရွှယ်၏ ခန့်မှန်းချက်က မှန်ကန်သည်ဟု ဆိုလိုခြင်း ဖြစ်သည်။
နန်းတွင်းအာဏာကို သိမ်းပိုက်လိုသည့် အရင်မင်းဆက်၏ အကြွင်းအကျန်များသည် သူ့ဘေးနားတွင် အမြဲတမ်း ရှိနေခဲ့ကြသည်။
အမှန်တကယ်တော့ သူဟာ ထိုလူများနှင့် အတူ ကြီးပြင်းလာခဲ့ရသည်ဟုပြောရင်တောင် မလွန်ပေ။
ဤအကြောင်းကို တွေးလိုက်မိသည်နှင့်… ချန်ဖုန်းယင် သူ့နှလုံးသားထဲတွင် စိမ့်တက်သွားသည်ဟု ခံစားလိုက်ရသည်။
သူ အလွန်အမင်း ထိတ်လန့်ကြောက်ရွံ့သွားရသည်။
[အသက် ၃၄နှစ် ချန်ချန်ရွှယ် သူ့ကို ပေးခဲ့သော လမ်းကြောင်းအတိုင်း (၂)နှစ်တိတိ စုံစမ်းစစ်ဆေးခဲ့ပြီး ချန်ဖုန်းယင်သည် သဲလွန်စအချို့ကို အမှန်တကယ် ရှာတွေ့ခဲ့သည်။ နန်းတော်အတွင်းရှိ သစ္စာဖောက်တစ်ယောက်၏ ခန္ဓာကိုယ်မှ အရင် မင်းဆက်၏ သွေးစည်းကို သူ ရှာဖွေတွေ့ရှိခဲ့သည်။ ဤသွေးစည်းက အလွန် နက်ရှိုင်းစွာ ဖုံးကွယ်ထားပြီး အလွန်ပါးလွှာနေပြီဖြစ်သော်လည်း ၎င်းက ငြင်းပယ်၍ မရနိုင်သော သက်သေအထောက်အထားလည်း ဖြစ်ပေသည်။]
......
[မြောင်းထဲမှ ကြွက်များသည် နောက်ဆုံးတွင် သူတို့၏ အစစ်အမှန်အရောင်များကို ထုတ်ဖော်ပြသလာခဲ့သည်။ သူတို့ ထိတ်လန့်တုန်လှုပ်နေကြစဉ် အခြေအနေ ပြီးဆုံးသွားပြီဖြစ်ကြောင်း သူတို့ သိရှိကြသည်။ သို့သော် သူတို့နှစ်ပေါင်းထောင်ချီ ကြံစည်ခဲ့သည့် အကြံအစည်ကို ဤနေရာတွင် အဆုံးသတ်သွားရန် သူတို့ လိုလားခြင်း မရှိကြသေးပေ။]
[သူတို့မသေဆုံးမီ သူတို့တတ်နိုင်သမျှ အင်အားစု အားလုံးကို စုစည်းခဲ့ပြီး မဟာဝေမင်းဆက်ကို ဖရိုဖရဲ အခြေအနေသို့ ကျဖောက်ရန် ကြိုးစားခဲ့ကြပေသည်။]
[အသက် ၃၆နှစ် အရင်မင်းဆက်၏ အကြွင်းအကျန်များသည် မိစ္ဆာဂိုဏ်းများမှလူများနှင့် အမှန်တကယ် ပူးပေါင်းပြီး မဟာဝေမင်းဆက်၏ မြို့ပေါင်း (၁၀) မြို့ကျော်ကို လူသတ်ပွဲ ဆင်နွှဲရန်လုပ်ဆောင်ခဲ့ကြသည်။ အရပ်သား ပြည်သူ (၁၀)သန်းကျော် အသတ်ခံခဲ့ရသည်။ မဟာဝေမင်းဆက်၏ ကံကြမ္မာသည် ပြင်းထန်စွာ ထိခိုက်ပျက်စီးသွားခဲ့ရသည်။]
[ မဟာဝေဧကရာဇ် ချန်ဖုန်းယင်သည် မဟာဝေ မင်းဆက်၏ နယ်မြေအတွင်း ထွက်ပေါ်လာသည့် မိစ္ဆာဂိုဏ်းအားလုံးကို သုတ်သင်ရှင်းလင်းပစ်ရန် စစ်တပ်ကို အမိန့်ပေးခဲ့သည်]
[ဖြောင့်မတ်ဂိုဏ်းများ၏အကူအညီဖြင့် သူတို့သည် မိစ္ဆာဂိုဏ်း၏ တပည့်အမြောက်အမြားကို သတ်ဖြတ်ခဲ့ကြသည်။]
[...]
လွန်ခဲ့သော နှစ်အနည်းငယ်အတွင်း မဟာဝေ မင်းဆက်၌ ဖြစ်ပျက်ခဲ့သော ပြောင်းလဲမှုအားလုံးကို ချန်ချန်ရွှယ် ပထမဆုံး သိရှိသူ ဖြစ်ပေသည်။ သူမ လက်ထဲရှိ ကျောက်စိမ်းပြားပေါ်တွင် မှတ်တမ်းတင်ထားသော အကြောင်းအရာများကို သူမ ကြည့်လိုက်သည်။
ထို့နောက် တည်ငြိမ်သော မျက်နှာအမူရာဖြင့် ပြောလိုက်သည်။
"ထောင်ချောက်မိနေတဲ့သားရဲတွေလိုဖြစ်နေတဲ့ အရင်မင်းဆက်အကြွင်းအကျန်တွေရဲ့ တိုက်ပွဲက ငါတို့ စိတ်ကူးထားတာထက် ပိုကြီးမားတဲ့ သက်ရောက်မှု ရှိနေတယ်။ နှစ်ပေါင်းထောင်ချီလျှို့ဝှက်ဖွံ့ဖြိုးတိုးတက်လာတော့ သူတို့ရဲ့လက်တံတွေက မဟာဝေမင်းဆက်ရဲ့ ကဏ္ဍတိုင်းကို ရောက်ရှိနေပြီ။ ဒီတစ်ကြိမ် မငြိမ်မသက်မှုက အရင်က မကြုံဖူးလောက်အောင် ဖြစ်နေတယ်"
ဒါပေါ့ ချန်ချန်ရွှယ် ပြောသည့် ယခင်က မကြုံဖူးလောက်အောင် ဆိုသည်မှာ မဟာဝေမင်းဆက် စတင် တည်ထောင်ချိန်ကတည်းက ဟု ဆိုလိုခြင်း ဖြစ်သည်။
အမှန်တကယ်တော့ သူမဟာ အလားတူမငြိမ်မသက်မှုများကို အကြိမ်ပေါင်းများစွာ ကိုယ်တိုင် ကြုံတွေ့ခဲ့ရပြီး ဖြစ်သည်။
ချန်ချန်ရွှယ်ဟာ ဤမျှတည်ငြိမ်နေရခြင်းမှာ သူမ အသားကျနေပြီ ဖြစ်သောကြောင့် ဖြစ်ပေသည်။
မဟာဝေမင်းဆက် ဤကဲ့သို့ ဖရိုဖရဲဖြစ်နေခြင်း အတွက် တုန်လှုပ်စရာ ဘာမှမရှိကြောင်း သူမ ထုတ်ဖော်ပြောကြားလိုက်သည်။
၎င်းကို ပုံမှန်အတိုင်း သဘောထားလိုက်ရုံသာ ဖြစ်ပေသည်။
"ဒါပေမဲ့... ဒီမငြိမ်မသက်မှုတွေ အားလုံးက ဂျောင်ပိတ်ခံလိုက်ရတဲ့သားရဲတစ်ကောင်ရဲ့ သေခါနီး ရုန်းကန်မှု တစ်ခုပါပဲ။ သူတို့ရဲ့ မျက်နှာဖုံး အစစ်အမှန် ကွာကျသွားတဲ့အခါ သူတို့ လျှို့ဝှက်ဆန်းကြယ်မှုတွေကြားမှာ ပုန်းအောင်းလို့ မရတော့ဘူး။ တစ်ချိန်တည်းမှာပဲ ငါတို့လည်း ဒီထက်ပိုပြီး ခံစစ်အနေအထား ဖြစ်နေစရာ မလိုတော့ဘူး"
"အခု ငါတို့ရဲ့အထောက်အထားတွေနဲ့ အခြေအနေတွေ ပြောင်းလဲသွားပြီ။ အခုငါတို့က မုဆိုးတွေပဲ... သူတို့က အမဲလိုက်ခံရသူတွေ ဖြစ်သွားပြီ"
"ခဏကြာရင် ဒီကိစ္စက... အဆုံးသတ် သွားပါလိမ့်မယ်"
"..."
[အသက် ၃၇ နှစ် နောက်ထပ်တစ်နှစ်ကုန်ဆုံးသွားပြီး ယခင်မင်းဆက်၏ အကြွင်းအကျန် အမြောက်အမြားကို ဖော်ထုတ်နိုင်ခဲ့သည်။ သူတို့၏အထောက်အထားများက တစ်ခုနှင့် တစ်ခု မတူညီကြပေ။ အချို့မှာ နန်းတော်အတွင်းမှ အရေးကြီးအရာရှိများဖြစ်ကြပြီး အချို့မှာ နိုင်ငံတစ်ဝှမ်းကျော်ကြားသော ချမ်းသာကြွယ်ဝသည့် ကုန်သည်များ ဖြစ်ကြသည်။ အချို့မှာ ထိုဒေသကို နှစ်ပေါင်း ရာချီပိုင်ဆိုင်ထားသော မြေပိုင်ရှင်များဖြစ်ကြပြီး အချို့မှာ ကျင့်ကြံခြင်း ဂိုဏ်းများ၏ ဂိုဏ်းသခင်များပင် ဖြစ်နေခဲ့ကြသည်။]
[တိုတောင်းသော နှစ်အနည်းငယ်အတွင်း မဟာဝေမင်းဆက်တစ်ခုလုံး သတ်ဖြတ်ခြင်းများဖြင့် ပြည့်နှက်နေခဲ့သည်။ ယခင် မင်းဆက်၏ အကြွင်းအကျန်များ သို့မဟုတ် ယခင်မင်းဆက်၏ အကြွင်းအကျန်များနှင့် ပူးပေါင်းကြံစည်သူတစ်သိန်းကျော်တို့ဟာ ခေါင်းဖြတ်သတ်ခံရပြီး သူတို့၏ နေအိမ်များ အသိမ်းခံခဲ့ရသည်။]
[အသက် ၃၉နှစ် ချန်ချန်ရွှယ်သည် အခြေတည်အဆင့် (၇)သို့ အဆင့်ချိုးဖျက် ဝင်ရောက်နိုင်ခဲ့သည်။ ချင်းကျောက်ဟာလည်း အခြေတည်အဆင့် (၅) သို့ အဆင့်ချိုးဖျက် ဝင်ရောက်နိုင်ခဲ့သည်။]
[အသက်၄၀ နှစ်ပေါင်းများစွာ နှိမ်နင်းမှုများနှင့် တည်ငြိမ်မှုထိန်းသိမ်းရေးများ ပြုလုပ်ပြီးနောက် မဟာဝေမင်းဆက်သည် ပြန်လည်စနစ်တကျ ရှိလာခဲ့သည်။]
[ဖြစ်နိုင်တာက ယခင်မင်းဆက်မှ အသက်ရှင်ကျန်ရစ်သူများသည် လုံးဝအမြစ်ဖြတ် သုတ်သင်ခံရခြင်း မရှိသေးခြင်း ဖြစ်နိုင်သည်။ သို့သော် ကျန်ရှိနေသည့် အကြွင်းကျန်ဟာ နောက်ထပ် ကိုယ်ထင်ပြရဲခြင်း မရှိတော့ပေ။]
"ဟား.." ချင်းကျောက် အပြုံးတစ်ခု ထုတ်ဖော်လိုက်ပြီး ပြောလိုက်သည်။ "ဒီနည်းနဲ့ဆိုတော့ မဟာဝေ မင်းဆက်က အနာဂတ်မှာ ဘာမငြိမ်မသက်မှုမှ ရှိတော့မှာ မဟုတ်ဘူး... ဟုတ်တယ်မလား"
သူမ အလွန် ပျော်ရွှင်နေခဲ့သည်။
ရိုးရိုးသားသား ပြောရလျှင် မသေမျိုးကျင့်ကြံခြင်း သရုပ်ဖော် စနစ်ထဲတွင် ဤတစ်ကြိမ်က သူမ ပထမဆုံး အကြိမ် ဤမျှ အကြာကြီး အသက်ရှင်နိုင်ခြင်း ဖြစ်သည်။
သူမ အသက် (၄၀)အရွယ် အထိ အသက်ရှင်နိုင်ခဲ့သည်။
ထို့အပြင် သူမဟာ ချန်ချန်ရွှယ်နှင့် အတူ ကြေးဝါ တံခါးကြီးထဲမှ အရာအားလုံးနီးပါးကို လုယက်ခဲ့ပြီး သွေးကြာပန်းတာအိုဆရာ၏ ဝိညာဉ်ဖွဲ့စည်းမှုအဆင့် မိစ္ဆာသန္ဓေသားကိုပင် သတ်ဖြတ်နိုင်ခဲ့သည်။
တစ်ချိန်တည်းမှာပင် မဟာဝေတော်ဝင်မိသားစု၏ နန်းတွင်းအာဏာကို ပိုမိုတည်ငြိမ်စေရန် ယခင် မင်းဆက်၏ အကြွင်းအကျန်အမြောက်အမြားကိုလည်း သူမဆွဲထုတ်နိုင်ခဲ့သည်။ နောက်ဆုံးတွင် မေပယ်လ်မြို့တော်ရှိ ချင်းမျိုးနွယ်စုကို လူသူကင်းမဲ့သော ကျွန်းပေါ်သို့ ထွက်ပြေးပြီး အသက်လု ရုန်းကန်ရခြင်းမှလည်း တားဆီးနိုင်ခဲ့သည်။
ဒီတစ်ကြိမ် သူမဟာ အောင်မြင်မှု အနည်းငယ်ကို အသက်မသွင်းနိုင်ခဲ့ပါက မသေမျိုးကျင့်ကြံခြင်း သရုပ်ဖော်စနစ်က မတရားဟု ချင်းကျောက် ခံစားရပေလိမ့်မည်။
"ကလေးမလေး မဟာဝေမင်းဆက်က မငြိမ်မသက် မဖြစ်တော့ဘူး။ မဟာဝေရဲ့ ထီးနန်းက ပိုတည်ငြိမ်လာတယ်။ ဒါပေမဲ့ အဲဒါက မင်းဒီလောက် ပျော်ရွှင်ရတာနဲ့ တန်လို့လား"
ချင်းကျောက် သယ်ဆောင်ထားသော အဘွားအိုချင်သည် ချင်းကျောက်၏ စိတ်အခြေအနေပြောင်းလဲသွားမှုကြောင့် အလွန် ဇဝေဇဝါ ဖြစ်နေရသည်။
ချင်းကျောက် ယခု အလွန်ပျော်ရွှင်နေသည်ကို သူမ မြင်တွေ့နိုင်ပေသည်။
သူမ၏ မှတ်ဉာဏ်ထဲတွင်...
ပြီးခဲ့သည့် တစ်ခေါက် ဒီကလေးမလေး ဒီလောက် ပျော်ရွှင်ခဲ့သည်မှာ ကြေးဝါတံခါးကြီးကို လုယက်ခဲ့စဉ်က ဖြစ်သည်။
ပြဿနာက ဒီကလေးမလေးရဲ့ မျိုးရိုးနာမည်က ချင်းဖြစ်ပြီး သူမရဲ့ မျိုးရိုးနာမည်က ချန်မဟုတ်ပေ။ သူမက မဟာဝေမင်းဆက်ရဲ့ တော်ဝင် မိသားစုက မဟုတ်ချေ။
ထို့ကြောင့် သူမ ဒီလောက် ပျော်ရွှင်နေတာက အဘွားအိုချင်ကို အလွန် ဇဝေဇဝါ ဖြစ်နေစေခဲ့သည်။
"စီနီယာ ရှင်ဒီအကြောင်း မသိပါဘူး။ အတိုချုပ်ပြောရရင် ဒီကမ္ဘာကြီး ပိုအေးချမ်းလေ ကျွန်မက ပိုပြီး အကျိုးရှိလေပဲ။ ကျွန်မ နောက်ထပ် နှစ်အနည်းငယ်လောက် အသက်ရှင်နိုင်သရွေ့ ကျွန်မ ကိုယ့်ကိုယ်ကိုယ် သတ်သေရင်တောင် ကျေနပ်ပြီ"