အခန်း ၁၇၇ : အရင်မင်းဆက်မှ အကြွင်းအကျန်များ
"ယခင် မင်းဆက်.."
ချင်းကျောက် သူမ၏ ဖြူဖွေးချောမွတ်သော မေးစေ့လေးကို ကိုင်လိုက်သည်။ ချန်ချန်ရွှယ် သူမကို ပြောပြခဲ့သည့် သတင်းအချက်အလက်များက သူမ၏ ဗဟုသုတမရှိတာကို ပေါ်လွှင်လာစေခဲ့သည်။
ချင်းကျောက် ဇဝေဇဝါဖြင့် မေးလိုက်သည်။
"မဟာဝေမင်းဆက်မတိုင်ခင်က နောက်ဆုံး မင်းဆက်က ဘာမင်းဆက်လဲ"
အတိတ်တုန်းကဆိုရင် သူမသည် သရုပ်ဖော်စနစ်ထဲမှ ကမ္ဘာ့သမိုင်းကြောင်းကို စိတ်မဝင်စားခဲ့ပေ။
အကယ်၍ သူမကို အဂ္ဂိရတ်ပညာ၊ အစီအရင်များ၊ ကျင့်ကြံခြင်း အတွေ့အကြုံများ အကြောင်း ပြောခိုင်းမည် ဆိုလျှင်...
ချင်းကျောက် သေချာပေါက် တစ်ခဏလောက် ပြောပြနိုင်ပေလိမ့်မည်။
သို့သော် သူမကို ယခင်မင်းဆက်အကြောင်း ပြောခိုင်းမည် ဆိုလျှင်တော့ ၎င်းက ဘာလဲဆိုတာကို ချင်းကျောက် လုံးဝ မသိပေ။
သူမ၏ မျက်နှာတွင် ဇဝေဇဝါဖြစ်မှုများဖြင့် ပြည့်နှက်နေခဲ့သည်။
ဇဝေဇဝါဖြစ်နေသည့် ချင်းကျောက်နှင့် ရင်ဆိုင်ရသောအခါ ချန်ချန်ရွှယ်သည် ကူကယ်ရာမဲ့စွာဖြင့် ရှင်းပြလိုက်သည်။
"မဟာဝေမင်းဆက်ရဲ့ နောက်ဆုံးမင်းဆက်ကို မဟာရွှီ မင်းဆက်လို့ ခေါ်တယ်။ အဲဒါ လွန်ခဲ့တဲ့ နှစ်ပေါင်း ထောင်ချီကပေါ့။ အဲဒီတုန်းက မဟာရွှီမင်းဆက်ကို အုပ်စိုးသူ တစ်ယောက်က အုပ်ချုပ်ခဲ့တယ်။ နိုင်ငံခြား တိုင်းပြည်တွေရဲ့ ကျူးကျော်မှုအပြင် တိုင်းပြည်ထဲက ပြည်သူတွေပါ ဒုက္ခရောက်ခဲ့ကြတယ်"
"ပြည်တွင်း ပြည်ပ ပြဿနာတွေ ကြုံတွေ့နေရတဲ့ အခြေအနေအောက်မှာ မဟာရွှီမင်းဆက်ရဲ့ တိုင်းပြည် ကံကြမ္မာကလည်း တစ်နေ့ထက်တစ်နေ့ ကျဆင်းလာခဲ့တယ်။ ရလဒ်အနေနဲ့ တိုင်းပြည်ထဲမှာ သဘာဝ ဘေးအန္တရာယ်တွေ ဆက်တိုက်ဖြစ်ပွားခဲ့ပြီး ပြည်သူတွေ ဝမ်းနည်းကြေကွဲစွာ ငိုကြွေးခဲ့ကြရတယ်။ ဒါ့အပြင် မဟာရွှီမင်းဆက်ရဲ့ တော်ဝင်မိသားစုက လူကြိုက်မများခဲ့ဘူး။ တချို့ ဖြောင့်မတ်ဂိုဏ်းတွေက သူတို့နဲ့ ပတ်သက်ဆက်နွယ်ရမှာကို ရွံရှာခဲ့ကြတယ်"
"ကျင့်ကြံခြင်းဂိုဏ်းအများစုရဲ့ ထောက်ခံမှုကို ဆုံးရှုံးပြီးနောက် မဟာရွှီမင်းဆက်ဟာ ဘေးအန္တရာယ်တွေနဲ့ ပြည့်နှက်နေခဲ့တယ်။ လူအများအပြားက ဖောက်ပြန်ပျက်စီးနေတဲ့အုပ်စိုးသူရဲ့ အုပ်ချုပ်မှုကို သည်းမခံနိုင်ကြတော့ဘဲ တော်လှန်ပုန်ကန်ဖို့ ဆုံးဖြတ်ခဲ့ကြတယ်"
"အဲဒီအထဲမှာ မဟာဝေမင်းဆက်ရဲ့ ဘိုးဘေးလည်း ပါဝင်ခဲ့တယ်။ မဟာဝေမင်းဆက်ရဲ့ဘိုးဘေးက တော်လှန်ပုန်ကန်တဲ့အခါ ပထမဆုံးလုပ်ခဲ့တဲ့အရာက ဖောက်ပြန်ပျက်စီးနေတဲ့ အရာရှိ ရာပေါင်းများစွာကို သတ်ပစ်ခဲ့တာပဲ"
"နောက်ဆုံးမှာတော့ သူက တစ်ရှိန်ထိုးတိုးတက်လာပြီး တိုက်ပွဲတွေ ဆက်တိုက်အနိုင်ရကာ ကျင့်ကြံခြင်း ဂိုဏ်းအများအပြားရဲ့ ထောက်ခံမှုကို ရခဲ့တယ်"
"တစ်ချိန်တည်းမှာပဲ သူက ရည်မှန်းချက်ကြီးတဲ့ တစ်သီးပုဂ္ဂလ ကျင့်ကြံသူအမြောက်အမြားကိုလည်း စုစည်းခဲ့တယ်။ နောက်ဆုံးမှာ နှစ်ပေါင်း တစ်ရာကျော် ကြိုးစားအားထုတ်ပြီးတော့ သူက မဟာရွှီမင်းဆက်ကို တစ်ရှိန်ထိုး ဖြုတ်ချနိုင်ခဲ့တယ်"
......
ဒီအချက်ကိုရောက်တော့ ချန်ချန်ရွှယ်က ခေတ္တ ရပ်တန့်သွားပြီးနောက် ဆက်ပြောလိုက်သည်။
"မူလက မဟာဝေမင်းဆက်ရဲ့ ဘိုးဘေးက အနာဂတ်မှာ ပြဿနာတွေ မရှိတော့အောင် မဟာရွှီမင်းဆက်ရဲ့ တော်ဝင်မိသားစုကို မျိုးသုဉ်းသတ်ဖြတ်ချင်ခဲ့တာ။ ဒါပေမဲ့ မဟာရွှီမင်းဆက်ရဲ့ တော်ဝင်မိသားစုက ကြာမြင့်စွာကတည်းက ထွက်ပြေးသွားပြီး ခြေရာလက်ရာ မကျန်ဘဲ ပျောက်ကွယ်သွားလိမ့်မယ်လို့ သူ မျှော်လင့်မထားခဲ့ဘူး"
"ဒီကိစ္စကို မေ့ထားလိုက်ပါတော့။ ဘာပဲဖြစ်ဖြစ် ငါတို့ သူတို့ကို ရှာတောင် မတွေ့နိုင်တာ ဘယ်လိုလုပ် အမြစ်ဖြတ်နိုင်မှာလဲ"
ဒီဇာတ်ကြောင်းကို နားထောင်ပြီးနောက် ချင်းကျောက် နောက်ဆုံးတွင် သဘောပေါက်သွားသည်။
သူမ အံ့သြစွာ မေးလိုက်၏။
"ဒါဆိုရင် အဲဒီတုန်းကထွက်ပြေးသွားတဲ့ ယခင် မင်းဆက်က တော်ဝင်မိသားစုရဲ့ မျိုးဆက်တွေက အခုမှ ပြန်ပေါ်လာကြတာပေါ့... ပြီးတော့ သူတို့က မဟာဝေမင်းဆက်ရဲ့ နန်းတွင်းအာဏာကို ကျူးကျော်လုယူချင်နေကြတာလား"
"ဒါပေမဲ့..."
ချင်းကျောက် မျက်မှောင်ကြုတ်ပြီး ဇဝေဇဝါဖြင့် ပြောလိုက်သည်။
"နှစ်ပေါင်း ထောင်ချီကြာမြင့်သွားပြီ၊ ပြီးတော့ အဲဒီလူတွေ မျိုးဆက် ဘယ်နှဆက်လောက် အစားထိုး ပြောင်းလဲသွားပြီလဲဆိုတာ ဘယ်သူသိမှာလဲ။ အဲဒီ အဘိုးကြီးအများစုက အခုဆို သေလောက်ပြီ မဟုတ်ဘူးလား။ အကယ်၍ သူတို့ အသက်ရှင်ကျန်ရစ်ရင်တောင် အများကြီး ကျန်တော့မှာ မဟုတ်ဘူးလေ"
"ပြီးတော့ သူတို့မှာ ကျန်ရှိတဲ့ အခြေခံအုတ်မြစ်လည်း ရှိမှာ မဟုတ်တော့ဘူးလေ။ ဒီလို အခြေအနေမျိုးမှာ ဘာလို့ တစ်စုံတစ်ယောက်က သူတို့ကို ကူညီပြီး မဟာဝေမင်းဆက်ကို တိုက်ခိုက်ချင်ရတာလဲ... ပြီးတော့ ဘာလို့ အဲဒီကူညီတဲ့လူတွေက မဟာဝေမင်းဆက်ရဲ့ ရာထူးကြီး အရာရှိတွေဖြစ်နေရတာလဲ"
"သူတို့ စွန့်စားရဲတဲ့အထိ ဖြစ်လာအောင် မဟာရွှီ မင်းဆက် တော်ဝင်မိသားစုရဲ့ အကြွင်းအကျန်တွေက ဒီကောင်တွေကို ဘယ်လိုစည်းရုံးထားတာလဲ"
"ပြီးတော့ ဖော်ထုတ်ခံရရင် အိမ်တွေပါ အသိမ်းခံရမယ့် ဒီလိုနိုင်ငံတော်ပုန်ကန်တဲ့ ကိစ္စမျိုးကိုလုပ်ဆောင်ဖို့ ဘာတွေ ပေးထားရမလဲ"
အမှန်တကယ်ပင် ဆင်းရဲမွဲတေနေသည့် ယခင် မင်းဆက်၏ အကြွင်းအကျန်တစ်စုသည် လူအများအပြားကို လျှို့ဝှက်စွာဖြင့် မည်သို့ စည်းရုံးနိုင်မည်နည်း။
အဆက်အသွယ်များပြုလုပ်ရန် သူတို့တွင် မည်သည့် အရင်းအမြစ်များ မရှိသလို မဟာဝေ၏နန်းတွင်း အာဏာကို ဝင်ရောက်စွက်ဖက်ရန် သူတို့တွင် မည်သည့် အခွင့်အရေးမှ မရှိပေ။
ချန်ချန်ရွှယ် ခေါင်းခါလိုက်သည်။ "အဲဒါက လောလောဆယ် ငါ သိထားသမျှပဲ။ အသေးစိတ်ကိုတော့ ငါလည်း မသိဘူး"
"ဖြစ်နိုင်တာက..."
ချန်ချန်ရွှယ် ပြောလိုက်သည်။ "ဖြစ်နိုင်တာက မဟာဝေမင်းဆက်ထဲမှာ ပုန်းအောင်းနေတဲ့ အဲဒီ ကြွက်တွေက ယခင်မင်းဆက်ရဲ့ အကြွင်းအကျန်တွေ ကိုယ်တိုင် ဖြစ်နေမလားပဲ"
ချန်ချန်ရွှယ် ၎င်းကို လက်တွေ့ကမ္ဘာနှင့် ချိတ်ဆက်ကြည့်လိုက်သောကြောင့် ဤကဲ့သို့သော ခန့်မှန်းချက်မျိုး ထွက်ပေါ်လာခြင်း ဖြစ်သည်။
လက်တွေ့ကမ္ဘာရှိ နန်းတော်ထဲမှ ကျင့်ကြံသူများက သူမကို မြင့်မြတ်သောနှလုံးသားနန်းတော်မှ မိစ္ဆာ ကျင့်ကြံသူများအကြောင်း ပြောပြဖူးသည်ကို သူမ သတိရလိုက်သည်။
မြင့်မြတ်သောနှလုံးသားနန်းတော်မှ မိစ္ဆာကျင့်ကြံသူများသည် နန်းတော်အတွင်းသို့ စိမ့်ဝင်နေရာယူလိုကြသည်။
ဤနည်းအားဖြင့် အနာဂတ်တွင် သူတို့ကိစ္စရပ်များ လုပ်ဆောင်သည့်အခါ အခြားသူများ၏ မျက်စိနှင့်နားမှ ပုန်းကွယ်ရန် သူတို့အတွက် ပိုမို အဆင်ပြေပေလိမ့်မည်။
ထို့အပြင် မည်သူမျှသဲလွန်စ ရှာမတွေ့နိုင်အောင်လည်း သူတို့ ဖန်တီးထားနိုင်ပေသည်။
ဖြစ်နိုင်တာက...
ယခင် မင်းဆက်၏ အကြွင်းအကျန်များဟာလည်း ဒီလိုမျိုး ဖြစ်နေမလား။
သူမ ဤသို့ ပြောသည်ကို ကြားလိုက်ရသဖြင့် ချင်းကျောက် မျက်လုံးများ ပြူးကျယ်မသွားဘဲ မနေနိုင်တော့ပေ။
"နင် ဆိုလိုတာက အရင်မင်းဆက်ရဲ့ အကြွင်းအကျန်တွေက မဟာဝေမင်းဆက်ထဲ ပြေးဝင်လာပြီး အရာရှိတွေ ဖြစ်လာကြတယ်... ပြီးတော့ ဗဟိုချက်မအဆင့်အထိ တစ်ဆင့်ပြီးတစ်ဆင့် တက်လှမ်းလာကြတယ် ပေါ့လေ... မဟာဝေမင်းဆက်က ပေါင်းပင်တွေနဲ့ အမြစ်တွေကို ရှင်းထုတ်ချင်လို့ အရင်မင်းဆက်ရဲ့ အကြွင်းအကျန်တွေကို ပင်ပင်ပန်းပန်း ရှာဖွေနေပေမယ့် တကယ်တမ်းကျတော့ သူတို့က နှာခေါင်းအောက်မှာတင် ရှိနေကြတာလို့ ဆိုလိုချင်တာလား"
ချန်ချန်ရွှယ် ပြောလိုက်သည်။ "ဒါက ခန့်မှန်းချက် တစ်ခုပါပဲ။ အဲဒါ အမှန် ဟုတ်မဟုတ် ငါလည်း သိပ်မသေချာဘူး"
"ရှူး"
ချင်းကျောက် လေအေးတစ်ချက် ရှူသွင်းလိုက်သည်။
"အကယ်၍ အဲဒါက တကယ်သာ ဟုတ်ခဲ့ရင် လူတွေကို ကျောချမ်းသွားစေနိုင်တာ အမှန်ပဲ"
မင်းရဲ့ အသက်ကို အချိန်မရွေး ယူချင်နေတဲ့ လူတစ်စု ပြီးတ့ မင်းမိသားစုတစ်ခုလုံးရဲ့ အသက်ကို အချိန်မရွေး ယူချင်နေတဲ့ လူတစ်စု... သူတို့က မင်းရဲ့ ဘေးနားမှာ အမြဲရှိနေခဲ့ကြပြီး အပေါ်ယံမှာတော့ မင်းအတွက် အလုပ်လုပ်ပေးနေကြတယ်။
လက်တွေ့မှာတော့ သူတို့က မင်းကို ကိုင်တွယ်ဖြေရှင်းဖို့ အစီအစဉ်တစ်ခုကို ဖြည်းဖြည်းချင်း ရေးဆွဲပြင်ဆင်ဖို့ မင်းရဲ့ အရင်းအမြစ်တွေကို အသုံးပြုနေကြတာ။
၎င်းက တစ်ဖက်လူ မင်းလက်ထဲက ဓားဖြစ်လာဖို့ နည်းလမ်း ရှာကြံနေတာနဲ့ အတူတူပဲ။
သူတို့က သူတို့ကိုယ်သူတို့ ထက်မြက်လာအောင် သွေးဖို့ မင်းရဲ့ ဓားသွေးကျောက်ကိုအသုံးပြုကြတယ် ပြီးတော့ မင်းကို သေစေနိုင်တဲ့ တိုက်ခိုက်မှုပေးဖို့ အခွင့်အရေးကို စောင့်နေချင်ကြတာ......
ချင်ကျောင့်၏ ဆံပင်များ ထောင်ထသွားရသည်။
မဟာဝေမင်းဆက်၏ဧကရာဇ်အပြင် ထိုမင်းသားများ၊ မင်းသမီးများနှင့် ညီတော်နောင်တော်များသည် အခုအချိန်အထိ အသက်ရှင်နိုင်ဖို့ တကယ် မလွယ်ကူခဲ့ဘူးလို့ သူမ ခံစားလိုက်ရသည်။
သူမ ရှေ့ရှိ ချန်ချန်ရွှယ်သည်လည်း အခုအချိန်အထိ အသက်ရှင်နိုင်ဖို့လည်း လွယ်ကူပုံ မရပေ။
ဘာပဲဖြစ်ဖြစ်...
ချန်ချန်ရွှယ်၏ စွမ်းဆောင်ရည်က အလွန်ထူးချွန်လွန်းသဖြင့် သူမသည် ထိုလူများ၏ မျက်စိစပါးမွေး စူးစရာ သေချာပေါက် ဖြစ်လာပေလိမ့်မည်။
အခုအချိန်အထိ လျှို့ဝှက်ပုန်းအောင်းနေသော ထိုလူများက သူမကို မကိုင်တွယ်ရသေးပေ။
ပြောနိုင်သည်မှာ... ချန်ချန်ရွှယ်သည် မသေမျိုးကျင့်ကြံခြင်းသရုပ်ဖော်စနစ်၏ အခွင့်ကောင်းကို ရယူခဲ့ခြင်း ဖြစ်သည်။
သူမတွင် ပြန်လည်စတင်ရန် ရေတွက်၍ မရနိုင်သော အခွင့်အရေးများရှိနေသဖြင့် ချန်ချန်ရွှယ်ကို ရေတွက်၍ မရနိုင်သော ဘေးအန္တရာယ်များမှ ရှောင်တိမ်းနိုင်စေခဲ့သည်။
၎င်းက ချန်ချန်ရွှယ်ကို လက်ဦးမှု ရယူပြီး တိုက်ခိုက်နိုင်စေခဲ့သည်။
ဒါတွေ အားလုံးက သူမ စိတ်ထဲမှ ခန့်မှန်းချက် တစ်ခုသာဖြစ်သော်လည်း ချန်ချန်ရွှယ်ဟာ သူမ၏ ခန့်မှန်းချက်အကြောင်း ချန်ဖုန်းယင်ကို ပြောပြခဲ့သည်။