အခန်း ၁၇၆ : နောက်ကွယ်မှ လက်မဲကြီး ထွက်ပေါ်လာခြင်း
တစ်ဖက်လူ၏ ရယ်စရာကောင်းသော စကားများက အမှန်တကယ် မှန်ကန်နေလိမ့်မည်ဟု သူ မျှော်လင့်မထားခဲ့ပေ။
မိစ္ဆာချုပ်နှောင်မျှော်စင်၏ တံဆိပ်ခတ်နှိပ်က အမှန်တကယ် လျော့ရဲလာပြီး အတွင်းရှိ ရှေးဟောင်းမိစ္ဆာကြီးက အမှန်တကယ်တံဆိပ်ခတ်နှိပ်ကို ချိုးဖျက်ထွက်လာတော့ပေမည်။
မဟာဝေမင်းဆက်၏ မင်းသမီးတစ်ပါးက သူတို့ မဟာယုမင်းဆက်၏ ကိစ္စရပ်များကို အဘယ်ကြောင့် သိရှိနေရသနည်း ဟူသည့် အကြောင်းကို သူ စဉ်းစားရန် အချိန်မရှိဖြစ်နေခဲ့သည်။
သူ၏ စိတ်ထဲတွင် အတွေးများ ပြည့်နှက်နေခဲ့ပြီး ၎င်းက မကြာမီကျရောက်လာတော့မည့် အကျပ်အတည်းကို မည်သို့ ကိုင်တွယ်ဖြေရှင်းရမလဲဆိုတာပင်။
"မဖြစ်ဘူး.."
ကောင်းကင်ဂိုဏ်း၏ ဂိုဏ်းသခင် သွားကို စေ့ထားလိုက်ပြီး ပြောလိုက်သည်။
"အတွင်းထဲက မိစ္ဆာကို အပြင်ထွက်လာစေလို့မရဘူး... တစ်ဖက်လူက ရှေးဟောင်းခေတ်ကတည်းက တံဆိပ်ခတ်နှိပ် ခံထားရတဲ့ မိစ္ဆာကြီး တစ်ကောင်ပဲ။ ဒါကြောင့် သူ့ရဲ့ ခွန်အားက မှန်းဆလို့ မရနိုင်ဘူး.... ဒါ့အပြင် တစ်ဖက်လူက မိစ္ဆာချုပ်နှောင် မျှော်စင်ရဲ့ တံဆိပ်ခတ်နှိပ်ကို တုန်ခါအောင် လုပ်နိုင်တယ်ဆိုတော့ ဆိုလိုတာက နှစ်သန်းပေါင်းများစွာ တံဆိပ်ခတ်နှိပ်ခံထားရတာတောင် တစ်ဖက်လူရဲ့ ခွန်အားက အများကြီး ဆုတ်ယုတ်သွားတာမျိုး မရှိဘူးဆိုတဲ့ သဘောပဲ"
"တစ်နည်းအားဖြင့် ပြောရရင်... တစ်ဖက်လူရဲ့ ခွန်အားက ဒီလောက် အများကြီး ဆုတ်ယုတ်သွားတာတောင် ကြောက်မက်ဖွယ် ကောင်းနေတုန်းပဲ"
"ဒါကြောင့် ဒီမိစ္ဆာပေါ်လာတာနဲ့ တပြိုင်နက် ကောင်းကင်ဂိုဏ်းအတွက် သေချာပေါက် ဘေးအန္တရာယ် တစ်ခု ဖြစ်လာလိမ့်မယ်"
"ပြီးတောပ အဲဒါက မဟာယုမင်းဆက်အတွက်လည်း ဘေးအန္တရာယ် တစ်ခု ဖြစ်လာလိမ့်မယ်"
"အားလုံးပဲ မိစ္ဆာချုပ်နှောင်မျှော်စင်ရဲ့ တံဆိပ်ခတ်နှိပ်ကို ခိုင်ခံ့အောင် လုပ်ဖို့ ငါ့နောက် လိုက်ခဲ့ကြ... တစ်ချိန်တည်းမှာပဲ တခြားဂိုဏ်းတွေကို ဆက်သွယ်ကြ"
"ပြီးတော့… မဟာယုမင်းဆက်ရဲ့ နန်းတော်ကို ချက်ချင်း ဆက်သွယ်လိုက်"
သူ စကားပြောပြီးသည်နှင့် တပြိုင်နက် မိစ္ဆာချုပ်နှောင်မျှော်စင်ဟာ နောက်တစ်ကြိမ် ပြင်းထန်စွာတုန်ခါသွားပြီး ဖုန်မှုန့် အမြောက်အမြား ကျဆင်းလာကာ အဆောက်အဦး၏ အပိုင်းအစများပင် ကျဆင်းလာခဲ့သည်။
......
နှစ်သန်းပေါင်းများစွာကြာပြီဖြစ်တာကြောင့် မိစ္ဆာချုပ်နှောင်မျှော်စင်ဟာ အချိန်ကာလ၏ တိုက်စားမှုကို ခံနိုင်ရည်မရှိတော့ပေ။
တစ်ချိန်တည်းမှာပင် ကောင်းကင်ဂိုဏ်း၏ ဂိုဏ်းသခင်နှင့် အကြီးအကဲ အများအပြားဟာ ဒေါသများ ပြည့်နှက်နေသည့် ဟိန်းဟောက်သံ တစ်ခုကို ကြားလိိုက်ကြရသည်။
လူများ၏ နှလုံးသားကို တုန်လှုပ်သွားစေသော ထိုဟိန်းဟောက်သံက မိစ္ဆာချုပ်နှောင်မျှော်စင်အတွင်းမှ ထွက်ပေါ်လာခြင်းပင်။
"ဘယ်သူလဲ... ဘယ်သူလဲ.... ငါရဲ့ လျှို့ဝှက်နေရာထဲ ဘယ်သူ ဝင်လာတာလဲကွ"
"ဘယ်သူလဲ"
"သောက်ကျိုးနည်း ငါမင်းတို့ကို အပိုင်းပိုင်း အစစ ဆုတ်ဖြဲပစ်မယ်"
"မင်းတို့ကို အပိုင်းပိုင်း အစစ ဆုတ်ဖြဲပစ်မယ်ကွ....."
"အားးးးး"
အကြောင်းပြချက် တစ်စုံတစ်ရာကြောင့်… ဤဒေါသတကြီး ဟိန်းဟောက်သံထဲတွင် စိတ်ပျက်ဒေါသထွက်မှုအရိပ်အယောင်တစ်ခုပါနေသည်ကို ခံစားလိုက်ကြရသည်။
လူတစ်စုဟာ ထိတ်လန့်ကြောက်ရွံ့နေကြသလို တစ်ယောက်ကို တစ်ယောက် စိတ်ပျက်အားလျော့စွာ မကြည့်ဘဲလည်း မနေနိုင်တော့ပေ။
သူတို့ တစ်ယောက်၏ မျက်လုံးထဲရှိ ဇဝေဇဝါ ဖြစ်မှုများကို တစ်ယောက်က မြင်တွေ့နိုင်ကြလေသည်။
…
[ချန်ချန်ရွှယ်၏ နက်နဲဆန်းကြယ်သည့်မျက်နှာဖုံးသည် သွေးကြာပန်းတာအိုဆရာ၏ မိစ္ဆာသန္ဓေသားကို ဝါးမျိုပစ်လိုက်ရာ မဟာယုမင်းဆက်မှာရှိသည့် သွေးကြာပန်းတာအိုဆရာဟာ ၎င်းကို အာရုံခံမိသွားခဲ့သည်။ ဒေါသထွက်နေသော သွေးကြာပန်းတာအိုဆရာညာ သူ၏မိစ္ဆာသန္ဓေသားကို ဖျက်ဆီးခဲ့သူအား အပိုင်းပိုင်း အစစ ဆုတ်ဖြဲပစ်မည်ဟု ကျိန်ဆိုခဲ့သည်။]
[ဧရာမကြေးဝါတံခါးကြီး၏ ကမ္ဘာငယ်နေရာအတွင်းရှိ အရာအားလုံးကို စူးစမ်းရှာဖွေပြီး ဖြစ်ပြီး တစ်နေရာလေးမျှပင် ချန်လှပ်မထားခဲ့ပေ။]
[နက်နဲဆန်းကြယ်သည့် မျက်နှာဖုံးက ချန်ချန်ရွှယ်ကို တုံ့ပြန်မှုနှင့် အာဟာရဖြည့်တင်းမှုအမြောက်အမြား ပေးစွမ်းခဲ့သည်။ ချန်ချန်ရွှယ်သည် ချက်ချင်းပင် အဆင့်နှစ်ဆင့် အဆင့်ချိုးဖျက် ဝင်ရောက်နိုင်ခဲ့သည်။]
[ချန်ချန်ရွှယ် အခြေတည်အဆင့် (၅)သို့ ရောက်ရှိသွားပြီ ဖြစ်သည်]
[အသက် ၂၈ နှစ် မမှည့်သေးသော ဝိညာဉ်ဆေးပင်အချို့နှင့် သယ်ယူသွား၍ မရနိုင်သော ကြီးမားသည့် ဝိညာဉ်သွေးကြောတစ်ခုမှလွဲ၍၊ သယ်ယူသွား၍ ရနိုင်သမျှ အရာအားလုံးကို တံမြက်လှည်းသကဲ့သို့ ယူဆောင်သွားကြသည်။]
[အသက် ၂၉ နှစ် ချင်းကျောက်ဟာ အခြေတည်အဆင့် (၄) သို့ အဆင့်ချိုးဖျက် ဝင်ရောက်နိုင်ခဲ့သည်။ ချန်ချန်ရွှယ်က အခြေတည်အဆင့် (၆) သို့ အဆင့်ချိုးဖျက် ဝင်ရောက်နိုင်ခဲ့သည်]
[အသက် ၃၀ ချန်ချန်ရွှယ်ဟာ နန်းတော်သို့ ပြန်လည်ရောက်ရှိလာခဲ့သည်။]
[ချင်းကျောက်လည်း နန်းတော်သို့ ရောက်ရှိလာသည်။]
[…]
မဟာဝေ မင်းဆက်၏ နန်းတော်။
နန်းတော် အတွင်း၌.....
သူ့သမီးကို မတွေ့ရသည်မှာ (၁၀)နှစ်ကျော် ရှိပြီ ဖြစ်ပြီး သူမနှင့် ဆက်သွယ်ရန် ဆက်သွယ်ရေးအဆောင်များကို အသုံးပြုခဲ့ရသည်။ သဘာဝကျစွာပင် ချန်ဖုန်းယင်ဟာ ချန်ချန်ရွှယ်ကို အလွန် လွမ်းဆွတ်နေခဲ့ပေသည်။
ယခု၌ သူ၏ သမီးငယ်လေးကို နောက်တစ်ကြိမ် ပြန်လည် တွေ့မြင်ရပြီ ဖြစ်သည်။
အထူးသဖြင့် အရပ်မြင့်မြင့်နှင့် ကျော့ရှင်းစွာ ရပ်နေသော ချန်ချန်ရွှယ်ကို မြင်တွေ့ရသောအခါ ချန်ဖုန်းယင်ဟာ အလွန်အမင်း စိတ်လှုပ်ရှားသွားသည်။
ချန်ချန်ရွှယ်ဟာ အသက် (၁၄) နှစ်အရွယ်က မဟာဝေမင်းဆက်၏ နန်းတော်မှ ထွက်ခွာသွားခဲ့သည်ကို သူ မှတ်မိနေလေသည်။
ယခု… မဟာဝေ မင်းဆက်၏နန်းတော်သို့ ပြန်လည်ရောက်ရှိလာသော ချန်ချန်ရွှယ်ဟာ အသက် (၃၀) အရွယ်ရှိနေပြီဖြစ်သည်။
မျက်တောင်တစ်ခတ်အတွင်းပင် (၁၀)နှစ်ကျော်က ကုန်လွန်သွားခဲ့ပေပြီ။
(၁၀) နှစ်ကျော်ဆိုသည်မှာ ကျင့်ကြံသူများအတွက် သိပ်ပြီး အဓိပ္ပာယ် မရှိသော်လည်း… ချန်ချန်ရွှယ်ကတော့ အများကြီး ပြောင်းလဲသွားခဲ့သည်။
၎င်းက လူများကို သက်ပြင်းချသွားစေသည်။
"ချန်နင် သမီးက အခြေတည်အဆင့်(၆) ကိုတောင် ရောက်နေပြီလား"
ချန်ချန်ရွှယ်၏ ကျင့်ကြံမှုကို ချန်ဖုန်းယင် သိရှိသွားပြီးနောက် သူ၏မျက်နှာပေါ်ရှိ အံ့သြမှုကို မဖုံးကွယ်နိုင်တော့ပေ။
အသက် (၃၀)အရွယ်တွင် အခြေတည်အဆင့် (၆) ရောက်နေခြင်းက မည်သို့သော ပါရမီမျိုးနည်း။ ၎င်းသည် အမှန်တကယ်ပင် တုန်လှုပ်စရာ ကောင်းလှပေသည်။
ချန်ချန်ရွှယ် ခေါင်းငြိမ့်လိုက်သည်။ သူမ ပွင့်ပွင့်လင်းလင်း ဝန်ခံလိုက်၏။
"ကောင်းတယ်... ကောင်းတယ်..."
ချန်ဖုန်းယင် ချက်ချင်းပင် အားရပါးရ ရယ်မောလိုက်သည်။
"ငါတို့ မဟာဝေမင်းဆက်ရဲ့ မင်းသမီး ပီသပါပေတယ်၊ ငါ ချန်ဖုန်းယင်ရဲ့ သမီး ပီသပါပေတယ်။ ဒီလို ပါရမီမျိုးက ဂိုဏ်းတွေက အဲဒီ မြင့်မြတ်တဲ့ မိန်းမပျိုတွေကို ကျော်လွန်သွားပြီ၊ လမ်းဘယ်နှစ်လမ်းလောက် ကွာသွားလဲတောင် ဘယ်သူ သိမှာလဲ.... ဟားဟားဟားဟား.."
ဤသို့ ပြောပြီးနောက် သူဟာ ချန်ချန်ရွှယ်၏နောက်ဘက်ရှိ အလွန်လှပသော မိန်းကလေးကို ကြည့်ပြီး အံ့သြစွာ မေးလိုက်၏။
"ဒါက… ချန်နင်ရဲ့ စာထဲမှာ ပါတဲ့ ချင်းကျောက်လား... မိတ်ဆွေငယ်ချင်း"
ဟုတ်ပေသည်။ ဒီတစ်ကြိမ် ချန်ချန်ရွှယ်သည် ချင်းကျောက်ကို ခေါ်ဆောင်လာခဲ့ပြီး ခမည်းတော် ချန်ဖုန်းယင်နှင့် တွေ့ဆုံစေခဲ့သည်။
ဧကရာဇ်တစ်ပါးနှင့် ရင်ဆိုင်ရသော်လည်း ချင်းကျောက်ဟာ အလွန် တည်ငြိမ်နေပြီး အနည်းငယ်မျှပင် စိုးရိမ်ထိတ်လန့်ခြင်း မရှိခဲ့ပေ။
ဘာပဲဖြစ်ဖြစ် ချန်ဖုန်းယင်က မူလဝိညာဉ်အဆင့်၏ အဆင့် (၁၀) တွင်သာ ရှိလေသည်။
သူမက ဝိညာဉ်ဖွဲ့စည်းမှုအဆင့် မိစ္ဆာသန္ဓေသားကိုပင် ကိုယ်တိုင်ကိုယ်ကျ မြင်တွေ့ခဲ့ပြီးပြီဖြစ်ရာ ယခု မူလဝိညာဉ်အဆင့် (၁၀)တွင် ရှိသော ဧကရာဇ် တစ်ပါးနှင့် ရင်ဆိုင်နေရခြင်း ဖြစ်ပေသည်။
ထို့ကြောင့် သူမ ဘယ်လိုလုပ် စိုးရိမ်ထိတ်လန့်နေရမည်နည်း။
ချင်းကျောက်လည်း ခေါင်းငြိမ့်လိုက်သည်။
"အမှန်တကယ်ကို မသေမျိုးတွေကြားက နဂါးနဲ့ ဖီးနစ်ပဲ.."
ချန်ဖုန်းယင်သည် ချင်းကျောက်၏ ကျင့်ကြံမှုအဆင့်ကို တစ်ချက်တည်းနှင့် မြင်တွေ့နိုင်ပြီး အံ့သြစွာ မရေရွတ်ဘဲ မနေနိုင်တော့ပေ။
"ဒီလောက် ငယ်ရွယ်တဲ့အရွယ်မှာ အခြေတည်အဆင့် (၄)ကို ရောက်နေတာ မဟာဝေမင်းဆက်တစ်ခုလုံးမှာ မိတ်ဆွေငယ်လေးချင်းရဲ့ အံ့အားသင့်စရာ ကောင်းတဲ့ ပါရမီကို ယှဉ်နိုင်မယ့် ကောင်းကင်ဘုံက မျက်နှာသာပေးခံရသူ သိပ်များများစားစား ရှိမှာ မဟုတ်ဘူး"
"ခမည်းတော်"
ဤအချိန်တွင် ချန်ချန်ရွှယ် ပြောလိုက်သည်။
"သမီးတို့ ဧရာမကြေးဝါတံခါးကြီးထဲက ကမ္ဘာငယ်ထဲကနေ အရင်းအမြစ်တွေအားလုံးကို နန်းတော်ထဲ ပြန်ယူလာခဲ့တယ်။ အဲဒါတွေက အခုနန်းတော်ရဲ့ ဘဏ္ဍာတိုက်ထဲမှာ ရှိတယ်။ အကယ်၍ ခမည်းတော် စိတ်ဝင်စားရင် သွားကြည့်လို့ ရပါတယ်"
ချန်ဖုန်းယင် သဘာဝကျစွာ အလွန်စိတ်ဝင်စားသွားသည်။ ထိုကမ္ဘာငယ်နေရာက ရှေးဟောင်းမိစ္ဆာတစ်ကောင်၏နေရာ ဖြစ်ကြောင်းလည်း သူ သိပေသည်။
သူ လက်ဝှေ့ယမ်းပြီး အသံကျယ်ကျယ်ဖြင့် ရယ်မောလိုက်၏။
"ကောင်းပြီလေ... ဒါဆို သွားကြည့်ကြတာပေါ့"
[ချန်ချန်ရွှယ်၊ ချင်းကျောက်နှင့် အခြားသူများ နှစ်ပေါင်းများစွာ ကြိုးစားအားထုတ်ခဲ့ရသည့် အမြတ်အစွန်းများကို မြင်တွေ့ပြီးနောက် ချန်ဖုန်းယင် တုန်လှုပ်သွားရသည်။ မဟာဝေနန်းတော်၏ ဘဏ္ဍာတိုက်တစ်ခုလုံး ပေါင်းထားလျှင်ပင် ဤလူနှစ်ဦး၏ အမြတ်အစွန်းများကို မယှဉ်နိုင်ကြောင်း သူ သဘောပေါက်သွားခဲ့သည်။ မဟာဝေမင်းဆက်၏ ဘဏ္ဍာတိုက်သည် ယခင်က မကြုံဖူးလောက်အောင် ကြွယ်ဝချမ်းသာလာခဲ့သည်]
[ချန်ချန်ရွှယ်၏တောင်းဆိုမှုအရ ချန်ဖုန်းယင်သည် မဟာဝေမင်းဆက်ရှိ ဆင်းရဲသားပြည်သူ အမြောက်အမြားကို ကူညီရန် အရင်းအမြစ် တစ်စိတ်တစ်ပိုင်းကို အသုံးပြုခဲ့သည်။ မဟာဝေမင်းဆက်၏ နိုင်ငံကံကြမ္မာသည် ဖြည်းညှင်းစွာ မြင့်တက်လာခဲ့သည်။]
[အသက်၃၂ နှစ် ပို၍ပင် ကောင်းမွန်သော သတင်းတစ်ခု ရောက်ရှိလာသည်]
[မဟာဝေမင်းဆက်၏ နန်းတွင်းအာဏာကို သိမ်းပိုက်ရန် ကြိုးပမ်းမှု နောက်ကွယ်မှ လက်မည်းကြီးသည် နောက်ဆုံးတွင် မျက်နှာပြင်ပေါ် ပေါ်လာကြောင်း ချန်ချန်ရွှယ် သိရှိလိုက်ရသည်။ နောက်ကွယ်မှ လက်မည်းကြီးသည် ယခင် မင်းဆက်နှင့် အမှန်တကယ် ဆက်စပ်နေခဲ့သည်။ ဆိုလိုသည်မှာ မဟာဝေမင်းဆက်မတိုင်မီက ယခင်မင်းဆက်ပင် ဖြစ်သည်။]
[…]