အခန်း ၁၇၃ : ဒီကြေးဝါမျက်နှာဖုံးရဲ့ပိုင်ရှင်က မင်းတွေးတောနိုင်တာထက် ပိုအံ့သြစရာကောင်းတယ်
အဘွားအိုက ဆက်ပြောလိုက်သည်။
"အဲဒီ ရှေးဟောင်းကျင့်ကြံသူတွေက သွေးကြာပန်း တာအိုဆရာကို ချုပ်နှောင်နိုင်တဲ့ မိစ္ဆာချုပ်နှောင် မျှော်စင်ကို သန့်စင်ဖို့ အထွတ်အထိပ်လျှို့ဝှက် ပညာရပ်တွေကိုအသုံးပြုခဲ့ကြတယ်... ဒါပေမဲ့ သွေးကြာပန်းတာအိုဆရာက တမင်တကာအဖမ်းခံခဲ့တာလို့တောင် ငါသံသယရှိတယ်"
ချင်းကျောက် ကြောင်အသွားသည်။ "တမင်တကာ..."
"ဟုတ်တယ်" အဘွားအိုက ပြောလိုက်၏။ "ဝိညာဉ် ဖွဲ့စည်းမှုအဆင့် (၁၀)မှာ ရှိတဲ့ ကျင့်ကြံသူတစ်ယောက်တောင် နှစ်သန်းပေါင်းများစွာ အသက်မရှင်နိုင်ဘူး။ ဒါပေမဲ့ သွေးကြာပန်းတာအိုဆရာက အခုအချိန်အထိ အသက်ရှင်နိုင်ဖို့ မိစ္ဆာချုပ်နှောင်မျှော်စင်ရဲ့ ထူးခြားမှုကို ငှားရမ်းချင်လို့ သူ့ကိုယ်သူ တမင်တကာချုပ်နှောင်ခံခဲ့တာပဲ"
"ရှေးဟောင်းခေတ်တုန်းက သွေးကြာပန်းတာအိုဆရာကို ယာယီပုန်းအောင်းသွားအောင် ဖိအားပေးနိုင်တဲ့ စွမ်းအားကြီး ကျင့်ကြံသူတွေ ရှိခဲ့လောက်တယ်။ ဒါကြောင့် သူက သူ့အသက်ကို ကယ်တင်နိုင်ဖို့ သူ့ကိုယ်သူ တမင်တကာ တံဆိပ်ခတ်နှိပ်ခံခဲ့တာ"
"အခုတော့..."
"နှစ်သန်းပေါင်းများစွာ ကုန်လွန်သွားခဲ့ပြီဆိုတော့ အဲဒီ စွမ်းအားကြီး ရှေးဟောင်းကျင့်ကြံသူတွေ သေဆုံးသွားလောက်ပြီ။ ဒါမှမဟုတ် သူတို့က အထက်ကမ္ဘာတစ်ခုဆီ တက်လှမ်းသွားကြလောက်ပြီ။ ပြောရရင် သူတို့က မသေမျိုးကမ္ဘာထဲမှာ တကယ်ရှိမရှိ ငါလည်း မသိဘူး"
သွေးကြာပန်းတာအိုဆရာ၏ပုံရိပ်က သူမစိတ်ထဲတွင် နောက်တစ်ကြိမ် ပြောင်းလဲသွားကြောင်း ချင်းကျောက် ရုတ်တရက်သဘောပေါက်လိုက်သည်။
သူက အသက်ရှင်သန်ရန်အတွက် မည်သည့်အရာကိုမဆို လုပ်ဆောင်မည့် ရှေးဟောင်းမိစ္ဆာတစ်ကောင် ဖြစ်လာခဲ့သည်။ သူဟာ နောက်ထပ်ဘဝတစ်ခုကို ရရှိနိုင်ရန်အတွက် ဝိညာဉ်သန္ဓေသားတစ်ခုကို ဤနေရာတွင် ဖုံးကွယ်ထားခဲ့သည်။
တမင်တကာအချုပ်နှောင်ခံရမည် ဟူသော အကြံအစည်ကိုပင် သူက အကောင်အထည် ဖော်ခဲ့သည်ကိုပင် မြင်တွေ့လိုက်ရသည်...
ထို့နောက်... သွေးကြာပန်းတာအိုဆရာဟာ အသက်ပြန်ရှင်လာရန်အတွက် ဤဝိညာဉ်သန္ဓေသားကိုလည်း အသုံးပြုနိုင်ပေသည်။
ချင်းကျောက် စမ်းသပ်ကြည့်ရန် စိတ်အားထက်သန်နေခဲ့သည်။
"ငါတို့ ဒီအရာကို ဖျက်ဆီးပစ်လို့ ရမလား"
ဝိညာဉ်ဖွဲ့စည်းမှုအဆင့် ကျင့်ကြံသူတစ်ဦး၏ ဝိညာဉ်သန္ဓေသားက သူ၏ခန္ဓာကိုယ်မှ ထွက်ခွာသွားသည်နှင့် တပြိုင်နက် သူ၏ ကိုယ်ပိုင်ခွန်အားက အလွန်အမင်း ကျဆင်းသွားမည်ဟု လျှို့ဝှက်အစောင့်ခေါင်းဆောင် ခုနလေးတင် ပြောခဲ့သည်ကို သူမ မှတ်မိနေလေသည်။
အကယ်၍ ဝိညာဉ်သန္ဓေသားသာ ဖျက်ဆီးခံလိုက်ရပါက တံဆိပ်ခတ်နှိပ်ကို ချိုးဖျက်ထွက်လာသော သွေးကြာပန်းတာအိုဆရာဟာ ဤအကောင်းဆုံးဝှက်ဖဲကို ဆုံးရှုံးသွားပေလိမ့်မည်။
......
၎င်းက သွေးကြာပန်းတာအိုဆရာကို ဝိညာဉ် သန္ဓေသားနှင့် ပေါင်းစပ်၍ မရနိုင်အောင်လည်း ပြုလုပ်နိုင်ပေလိမ့်မည်။
"အဲဒါဆိုရင်... တစ်ဖက်လူရဲ့ ခွန်အားက အများကြီး ကျဆင်းသွားမှာ မဟုတ်လား"
"အဲဒီအခါကျရင် ငါတို့ တစ်ဖက်လူနဲ့ ရင်ဆိုင်ရတဲ့ အခါ... အနိုင်ရဖို့ အခွင့်အရေး ပိုများသွားမှာ မဟုတ်လား"
အဘွားအို ချင်က သူမကို သတိပေးလိုက်၏။
"ကလေးမလေး အဲဒီလို အတွေးမျိုးတွေ မတွေးဖို့ ငါ အကြံပေးချင်တယ်။ ဝိညာဉ်ဖွဲ့စည်းမှုအဆင့် ကျင့်ကြံသူတစ်ယောက်ရဲ့ ဝိညာဉ်သန္ဓေသားက သူ့ရဲ့ရုပ်ပိုင်းဆိုင်ရာခန္ဓာကိုယ်မသေသေးတဲ့အချိန်မှာ အသိစိတ် မရှိတာတော့ မှန်တယ်။ ဒါပေမဲ့ သူ့မှာ ကာကွယ်လိုတဲ့ ဗီဇရှိတယ်။ တစ်ယောက်ယောက်က ဝိညာဉ် သန္ဓေသားကို တိုက်ခိုက်ဖို့ ကြိုးစားတာနဲ့တပြိုင်နက် ဝိညာဉ်သန္ဓေသားက အဲဒီလူတွေကို အတင်းအကျပ် ဖိနှိပ်ပြီး သတ်ပစ်လိမ့်မယ်"
သူမ စကားပြောနေစဉ် အဘွားအိုချင်က ချင်းကျောက်ထံ အသံလွှင့် ဆက်သွယ်ရုံသာမကဘဲ သူမက ဤစကားကို လူအများရှေ့တွင် ပြောလိုက်ခြင်း ဖြစ်သည်။
သူမ ရှိနေခြင်းက လျှို့ဝှက်ချက်တစ်ခု မဟုတ်တော့ပဲ လူတိုင်းက ၎င်းအကြောင်းကို သိရှိကြပေသည်။
အဘွားအိုချင်က သူမဘေးနားရှိ ချန်ချန်ရွှယ်ကို သတိပေးရန် ဤသို့ ပြောလိုက်ခြင်း ဖြစ်၏။ သူမက ချန်ချန်ရွှယ်ကို မဆင်မခြင်မလုပ်ဆောင်ရန် သတိပေးလိုက်ခြင်းပင်။
ဤအချိန်တွင် ချန်ချန်ရွှယ်၏ စိတ်အခြေအနေက အနည်းငယ် လေးလံနေခဲ့သည်။
ထို့ကြောင့်... ပြီးခဲ့သည့် တစ်ခေါက် သူမ မသေမျိုးကျင့်ကြံခြင်း သရုပ်ဖော်စဉ်က မဟာဝေမင်းဆက်ဟာ ထိုသွေးကြာပန်းတာအိုဆရာနှင့် တိုက်ခိုက်ရန် တစ်နိုင်ငံလုံး၏ အင်အားကို အသုံးပြုလုနီးပါး ဖြစ်ခဲ့ရသည်။
ဒါပေမဲ့ သွေးကြာပန်းတာအိုဆရာဟာ အမှန်တကယ်တော့ သူ၏အကောင်းဆုံး အခြေအနေတွင် မရှိခဲ့ဘဲ သူ၏ခွန်အားမှာ အလွန်အမင်းကျဆင်းနေခဲ့ခြင်း ဖြစ်ပေသည်။
တစ်နည်းအားဖြင့်ပြောရလျှင်သစ္စာဖောက်များက ပြဿနာမရှာဘဲ သွေးကြာပန်းတာအိုဆရာကို သတ်ပစ်နိုင်ခဲ့လျှင်ပင်...
သွေးကြာပန်းတာအိုဆရာဟာ ဤဝိညာဉ်သန္ဓေသားမှတစ်ဆင့် အသက်ပြန်ရှင်လာနိုင်ပေလိမ့်မည်။
သူတို့နှစ်ဦးစလုံး ဝိညာဉ်ဖွဲ့စည်းမှုအဆင့်တွင် ရှိနေသော်လည်း နှစ်ဦးကြားရှိ ကွာဟချက်က ဤမျှ ကြီးမားနိုင်မည်ဟု မဟာဝေမင်းဆက်၏ ဝိညာဉ် ဖွဲ့စည်းမှုအဆင့်ကျင့်ကြံသူမျှော်လင့်ထားခဲ့မည် မဟုတ်ပေ။
မဟာဝေမင်းဆက်၏ ဝိညာဉ်ဖွဲ့စည်းမှုအဆင့်ကျင့်ကြံသူက သူ၏ဝိညာဉ်သန္ဓေသားကို သေချာပေါက် ခွဲထုတ်ထားခဲ့ခြင်း မရှိပေ။ ယင်းအစား သူဟာ သွေးကြာပန်းတာအိုဆရာကို သူ၏ ခန္ဓာကိုယ်နှင့် ဝိညာဉ် သန္ဓေသား နှစ်ခုလုံးဖြင့် တိုက်ခိုက်ခဲ့ခြင်း ဖြစ်သည်။
သို့သော် သူဟာ ရှုံးနိမ့်သွားခဲ့ဆဲ ဖြစ်လေသည်။
နှစ်ပေါင်းများစွာ အသက်ရှင်ခဲ့သော ဤကျင့်ကြံသူများဟာ အသက်ကယ်နည်းလမ်းများ ရှိကြရာ ၎င်းက တကယ်ကို မျက်စိပွင့်သွားစေသော အရာပင်ဖြစ်လေသည်။
အကယ်၍ ဧရာမကြေးဝါတံခါးကြီးထဲတွင် ဤဝိညာဉ် သန္ဓေသားကို သူမ ရှာမတွေ့ခဲ့ပါက...
ဤမသေမျိုးကျင့်ကြံခြင်း သရုပ်ဖော်မှုတွင် သွေးကြာပန်းတာအိုဆရာကို သတ်ရန် အခွင့်အရေး ရခဲ့လျှင်ပင်... ၎င်းက အသုံးဝင်မည် မဟုတ်ပေ။
မကြာမီ အချိန်အတွင်း သွေးကြာပန်းတာအိုဆရာက သူမရှေ့တွင် ပြန်လည် ပေါ်လာပေလိမ့်မည်။
သို့သော် ချန်ချန်ရွှယ်ဟာ မိစ္ဆာဝိညာဉ်သန္ဓေသားကို ကြည့်ပြီး ထူးဆန်းသော အတွေးအချို့ မတွေးဘဲ မနေနိုင်တော့ပေ။
သို့ပေမဲ့ အဘွားအိုချင်၏ သတိပေးချက်ကို သူမ နားထောင်ခဲ့သည်။
အဘယ်ကြောင့်ဆိုသော် ဝိညာဉ်ဖွဲ့စည်းမှုအဆင့် မိစ္ဆာ သန္ဓေသားကို ပေါ့ပေါ့ဆဆ မတိုက်ခိုက်ခြင်းက အကောင်းဆုံး ဖြစ်ကာ တစ်ခဏတာ ပေါ့ဆမှုကြောင့် သေဆုံးသွားနိုင်တာကြောင့်ပင်။
သို့သော် ချန်ချန်ရွှယ် ရုတ်တရက်ပြောလိုက်ရာ ထိုစကားများက လူတိုင်းကို ကြောင်အသွားစေခဲ့သည်။
"ငါတို့ မစမ်းသပ်ကြည့်နိုင်တာတော့ မဟုတ်ဘူး။ ဒီဝိညာဉ်သန္ဓေသားကို ဒီမှာထားခဲ့တာက ငါတို့အတွက် မကောင်းဘူး။ ဝိညာဉ်သန္ဓေသားနဲ့ မိစ္ဆာသာ တစ်သားတည်းဖြစ်သွားရင် သွေးကြာပန်းတာအိုဆရာရဲ့ ခွန်အားက ဘယ်အဆင့်ကို ရောက်သွားမလဲ"
"ဝိညာဉ်ဖွဲ့စည်းမှု အဆင့်ရဲ့ အဆင့် (၈) လား။ အဆင့် (၉) လား။ အဆင့် (၁၀)လား.... ဒါမှမဟုတ်... ဒဏ္ဍာရီလာခြေတစ်လှမ်းပေါင်းစည်းခြင်းအဆင့်တောင် ဖြစ်သွားမလား"
ဤစကားကိုကြားတော့ သူမဟာ ချန်ချန်ရွှယ်နှင့် ပထမဆုံးအကြိမ် တွေ့ဆုံဖူးခြင်းဖြစ်သည်ဟု ချင်းကျောက် ခံစားလိုက်ရသည်။
သူမအမြင်တွင် ချန်ချန်ရွှယ်က အလွန်သတိထားတတ်သူဖြစ်ပြီး ချန်ချန်ရွှယ်က သတ္တိနည်းလွန်းသလားဟုတောင် သူမ တွေးမိလောက်အောင်ကို သတိထားတတ်လေသည်။
သို့သော် ယခု၌ ချန်ချန်ရွှယ်၏သတ္တိက သူမတွေးထင်ထားသည်ထက် ပိုမို ကြီးမားနေကြောင်း ချင်းကျောက် သဘောပေါက်သွားသည်။
"ရှူး.."
မဟာဝေလျှို့ဝှက်အစောင့်ခေါင်းဆောင်က အလျင်အမြန် ပြောလိုက်၏။
"မင်းသမီး မဆင်မခြင် မလုပ်ပါနဲ့"
"ငါ မဆင်မခြင် လုပ်နေတာ မဟုတ်ပါဘူး"
ချန်ချန်ရွှယ် ခေါင်းခါလိုက်၏။ သူမ မဆင်မခြင်ပြုမူနေခြင်း မဟုတ်ပေ။ သူမ ဤစကားများကို ပြောရသည့် အကြောင်းရင်းမှာ သူမ သေချာစွာ စဉ်းစားပြီးဖြစ်သောကြောင့် ဖြစ်သည်။
သူမဟာ မိစ္ဆာဝိညာဉ်သန္ဓေသားကို ကြည့်ပြီး ပြောလိုက်သည်။
"ငါ့မှာ အကြံတစ်ခု ရှိတယ်.... အဲဒါ စမ်းကြည့်ဖို့ တန်တယ်"
သူမ စကားပြောပြီးသည်နှင့်တပြိုင်နက် အလွန် ထူးဆန်းသော အော်ရာတစ်ခုက ချန်ချန်ရွှယ်၏ ခန္ဓာကိုယ်မှ ပျံ့နှံ့ထွက်ပေါ်လာခဲ့သည်။
၎င်းက ထိုနေရာတွင် ရှိနေသူ အားလုံးကို တုန်လှုပ်သွားစေခဲ့သည်။
ရယ်နေသလို ငိုနေသလို ပုံပေါက်နေသည့် ကြေးဝါ သရဲမျက်နှာဖုံးတစ်ခုက ချန်ချန်ရွှယ်၏ လက်ထဲတွင် ပေါ်လာသည်ကို သူတို့ မြင်တွေ့လိုက်ရသည်။
"ဒါက"
ဤအရာကိုမြင်တော့ ချင်းကျောက်၏ စိတ်ထဲတွင် စိတ်ကူးတစ်ခု လက်ခနဲ ဝင်လာပြီး သူမဟာ ချက်ချင်း တုံ့ပြန်လိုက်ပြီး အံ့သြစွာ ပြောလိုက်၏။
"ဒါ အလုပ်ဖြစ်နိုင်လို့လား... အဲဒါက ဝိညာဉ်ဖွဲ့စည်းမှု အဆင့်မိစ္ဆာနော်.... အခြေတည်အဆင့်မိစ္ဆာ ဒါမှမဟုတ် ရွှေအမြုတေအဆင့်မိစ္ဆာ မဟုတ်ဘူး"
ချန်ချန်ရွှယ် ခေါင်းခါလိုက်ပြီး ပြောလိုက်သည်။
"ဒီအရာက ဘယ်လောက်ထူးခြားလဲဆိုတာ မင်း မသိပါဘူး။ ဝိညာဉ်ဖွဲ့စည်းမှုအဆင့်မိစ္ဆာတစ်ကောင်ဆိုတာက ဒီမျက်နှာဖုံးပိုင်ရှင်ရဲ့မျက်လုံးထဲမှာတော့... ပုရွက်ဆိတ် တစ်ကောင်လောက်ပဲ ရှိကောင်း ရှိနိုင်တယ်"
ဤအချိန်တွင် ချန်ချန်ရွှယ်၏ စိတ်ထဲ၌ ပုံရိပ်များ ထွက်ပေါ်လာခဲ့သည်။ ၎င်းတို့က သူမ၏ အိမ်မက်ထဲတွင် မက်ခဲ့သော ပုံရိပ်များ ဖြစ်လေသည်။
အကယ်၍ သူမအိမ်မက်ထဲမှ ပုံရိပ်က နက်နဲဆန်းကြယ်သည့်မျက်နှာဖုံး၏ ပိုင်ရှင် အစစ်အမှန်သာ ဖြစ်ခဲ့မည်ဆိုပါက သာမည ဝိညာဉ်ဖွဲ့စည်းမှုအဆင့် ရှေးဟောင်းမိစ္ဆာတစ်ကောင်ညာ အမှန်တကယ်ပင် ဘာမျှ မဟုတ်တော့ပေ။
ဝိညာဉ်ဖွဲ့စည်းမှုအဆင့် မိစ္ဆာသန္ဓေသားတစ်ခုက ဤနက်နဲဆန်းကြယ်သည့် မျက်နှာဖုံးကို ဖျက်ဆီးနိုင်မည်ဟု ချန်ချန်ရွှယ် မယုံကြည်ပေ။
ဤမသေမျိုးကျင့်ကြံခြင်း သရုပ်ဖော်မှုတွင် ဤသည်မှာ အဘွားအိုချင် နက်နဲဆန်းကြယ်သည့် မျက်နှာဖုံးကို ပထမဆုံး အကြိမ် မြင်တွေ့ဖူးခြင်း ဖြစ်လေသည်။
"ဒီအရာက ဘာလဲ..."
သူမ၏လေသံက ဝိညာဉ်ဖွဲ့စည်းမှုအဆင့် မိစ္ဆာ သန္ဓေသားကို မြင်တွေ့စဉ်ကထက်ပင် ပိုမို တုန်လှုပ်နေခဲ့သည်။
"ဒီအရာက စကြဝဠာရဲ့ တွင်းနက်ကြီးလိုပဲ"
"သူ့ရဲ့ဇာစ်မြစ်ကိုငါမမြင်နိုင်ဘူးပြီးတော့သူ့ရဲ့အရင်းအမြစ်ကိုလည်းငါမမြင်နိုင်ဘူး"