အခန်း ၁၇၁ : စက်ရုပ်သားရဲများဖြင့် တိုက်ခိုက်ရခြင်း
ချန်ချန်ရွှယ်နှင့် ချင်းကျောက်တို့၏ ကြိုးစားအားထုတ်မှုများက အလဟဿ မဖြစ်ခဲ့ပေ။ ဧရာမ ကြေးဝါတံခါးကြီး၏ ဗဟိုချက်မဧရိယာတွင် ကြီးမားသော ကျောက်နံရံများ အမြောက်အမြား ရှိနေကြောင်း သူတို့ တွေ့ရှိခဲ့ရသည်။
ထိုကျောက်နံရံများတွင်လည်း ကျင့်ကြံခြင်း နည်းစနစ်များ တစ်ခုပြီး တစ်ခုကို မှတ်တမ်းတင်ထားခဲ့သည်။
အချို့ ကျင့်ကြံခြင်းနည်းစနစ်များကို သွေးကြာပန်း တာအိုဆရာဟု အမည်ရသော ရှေးဟောင်းမိစ္ဆာ ကိုယ်တိုင်ဖန်တီးခဲ့ပြီး အချို့ကျင့်ကြံခြင်းနည်းစနစ်များကိုမူ နည်းလမ်းအမျိုးမျိုးဖြင့် အခြားနေရာများမှ ရရှိခဲ့ခြင်း ဖြစ်သည်။
တစ်လတိတိရှာဖွေပြီးနောက် သူတို့ နောက်ဆုံးတွင် တစ်စုံတစ်ရာကို ရှာတွေ့ခဲ့ကြသည်။ ဧရာမကြေးဝါ တံခါးကြီး၏ ဗဟိုချက်မဧရိယာထဲတွင် ကျင့်ကြံခြင်း နည်းစနစ် ဒါဇင်ပေါင်းများစွာကို သူတို့ အမှန်တကယ် ရှာတွေ့ခဲ့ကြလေသည်။
ထို့အပြင် ကျင့်ကြံခြင်းနည်းစနစ်တစ်ခုချင်းစီက ကျင့်ကြံခြင်းလောကရှိ ဂိုဏ်းတစ်ခု၏ ရတနာဖြစ်ရန် လုံလောက်ပေသည်။
ဤအရာကို ကြည့်ခြင်းအားဖြင့် သွေးကြာပန်းတာအိုဆရာက ရှေးဟောင်းခေတ်၌ သာမန်ပုဂ္ဂိုလ်တစ်ဦး မဟုတ်ကြောင်း မြင်တွေ့နိုင်ပေသည်။
"သတ်ဖြတ်ခြင်းကျမ်းစာ..... ပြီးပြည့်စုံတဲ့ သတ်ဖြတ်ခြင်း ကျမ်းစာပဲ"
ချင်းကျောက် သူမရှေ့ရှိ ပကတိ အတိုင်း ရှိနေသေးသည့် ကျောက်နံရံကို မော့ကြည့်လိုက်၏။ နှစ်သန်းပေါင်းများစွာ အချိန်ကာလ၏ ခြေရာများက ဤကျောက်နံရံကို ဖုံးလွှမ်းထားခဲ့သည်။
သူတို့ တွေ့ရှိခဲ့သော ကျောက်နံရံ အများအပြား အနက် ဤကျောက်နံရံက အပြည့်စုံဆုံး ဖြစ်သည်ဟု ယူဆနိုင်လေသည်။
ချင်းကျောကမ ကျောက်နံရံပေါ်တွင် ထွင်းထုထားသော အကြောင်းအရာကို ကြည့်လိုက်ပြီး ၎င်းက မည်သို့သော ကျင့်ကြံခြင်းနည်းစနစ်မျိုး ဖြစ်ကြောင်း မှတ်မိသွားခဲ့သည်။
ပြီးခဲ့သည့် တစ်ခေါက် သူမ မသေမျိုးကျင့်ကြံခြင်း သရုပ်ဖော်စနစ်ထဲ ဝင်ရောက်ခဲ့စဉ်က ကျင့်ကြံခြင်း နည်းစနစ်တစ်ခုကို သူမ ရရှိခဲ့သည်။
၎င်းကို သတ်ဖြတ်ခြင်း ကျမ်းစာ ဟု ခေါ်လေသည်။
သို့သော် ထိုအချိန်က ဤကျင့်ကြံခြင်း နည်းစနစ်က မပြည့်စုံဘဲ ၎င်း၏အကြောင်းအရာ တစ်စိတ်တစ်ပိုင်းသာ ရှိခဲ့လေသည်။
သို့သော် ယခု... ချင်းကျောက် မြင်တွေ့လိုက်ရသော သတ်ဖြတ်ခြင်းကျမ်းစာက ပြီးပြည့်စုံသော တစ်ခု ဖြစ်ပေသည်။
ထို့အပြင် ဤကျင့်ကြံခြင်းနည်းစနစ်ကိုလည်း သွေးကြာပန်းတာအိုဆရာ ကိုယ်တိုင်ဖန်တီးခဲ့ကြောင်း ချင်းကျောက်သိရှိခဲ့ရသည်။
စကားတစ်ခွန်းမျှမဆိုဘဲ ချင်းကျောက်ဟာ ကျောက်စိမ်းပြားတစ်ခုကို ထုတ်ယူလိုက်၏။
၎င်းက ပုံရိပ်များကို မှတ်တမ်းတင်နိုင်သည်ပ ကျောက်စိမ်းပြား ဖြစ်ပေသည်။ ချင်းကျောက်ဟာ ကျောက်နံရံပေါ်ရှိ ကမ္ပည်းစာ၏ စကားလုံးတိုင်းကို မှတ်တမ်းတင်လိုက်ပြီးနောက် ကျေနပ်စွာဖြင့် သူမ၏ သိုလှောင်အိတ်ထဲသို့ ထည့်လိုက်၏။
ဒီတစ်ကြိမ် သူမ သွေးကြာပန်းတာအိုဆရာကို ကိုင်တွယ်ဖြေရှင်းနိုင်မည် မဖြေရှင်းနိုင်မည်မှာ အရေးမကြီးတော့ပေ။ အဘယ်ကြောင့်ဆိုသော် ဒီတစ်ကြိမ် မသေမျိုးကျင့်ကြံခြင်း သရုပ်ဖော်စနစ်မှ သူမ ရရှိခဲ့သော အရင်းအမြစ်များက ယခင် မသေမျိုးကျင့်ကြံခြင်း သရုပ်ဖော်မှု အကြိမ်အနည်းငယ် ပေါင်းထားသည်ထက် ပိုမိုများပြားနေသောကြောင့် ဖြစ်ပေသည်။
ထိုရလဒ်ဖြင့် သူမဟာ နေရာတင် အကြောင်းပြချက် မရှိဘဲ သေဆုံးသွားလျှင်ပင်... လက်တွေ့ကမ္ဘာသို့ ပြန်လည်ရောက်ရှိပြီး ဆုလာဘ်များကို တွက်ချက်သည့်အခါ ဆုလာဘ်များက သေချာပေါက် ကောင်းမွန်နေပေလိမ့်မည်။
'ထင်ထားတဲ့ အတိုင်းပဲ ချန်ချန်ရွှယ်နဲ့ ပူးပေါင်းဖို့ သဘောထားကြီးခဲ့တာက ကံကောင်းသွားတာပဲ... ဟူး... ငါ့မှာ လုံလောက်တဲ့ အမြော်အမြင်ရှိနေတာပဲ' လို့ ချင်းကျောက် ရွှင်လန်းစွာနဲ့ ရင်ထဲမှာ တွေးနေတုန်း ရုတ်တရက် ရင်းနှီးတဲ့ အသံတစ်ခုကို ကြားလိုက်ရသည်။
"ဒီဘက်မှာ"
ဤအသံကို ကြားတော့ ချင်းကျောက် အလိုအလျောက် ထိုနေရာသို့ ကြည့်လိုက်ရာ ကြောင်အသွားခဲ့ရသည်။
ကြီးမားသောတိုင်လုံးကြီးတစ်တိုင်ရှေ့တွင် ချန်ချန်ရွှယ် ရပ်နေသည်ကို သူမ မြင်လိုက်ရ၏။ ကြီးမားသော ကျောက်တိုင်ကြီးက မည်မျှမြင့်မားသည်ကို သူမ မသိသော်လည်း အတွင်းရှိအစီအရင်၏ခြေရာအချို့ကို ဝါးတားတား မြင်တွေ့နိုင်သေးလေသည်။
ဤကြီးမားသောကျောက်တိုင်ကြီးကို အစီအရင်တစ်ခုဖြင့် ခိုင်ခံ့အောင် ပြုလုပ်ထားတာကြောင့် နှစ်သန်းပေါင်းများစွာ ကြာပြီးတာတောင် ၎င်းက ပြိုကြမသွားခဲ့ချေ။
ချင်းကျောက်၏ အာရုံစိုက်မှုကို အများဆုံး ဆွဲဆောင်ခဲ့သည့်အရာမှာ ကျောက်တိုင်ကြီး မည်မျှ တုတ်ခိုင်သည် သို့မဟုတ် မည်မျှမြင့်မားလဲမဟုတ်ပေ။
၎င်းက တိုင်လုံးပေါ်ရှိ သေသပ်လှပသော ဖောင်းကြွ ရုပ်တုများပင် ဖြစ်သည်။
ဖောင်းကြွရုပ်တုများပေါ်ရှိ ပုံရိပ်များက တစ်စုံတစ်ရာကို မှတ်တမ်းတင်ထားသကဲ့သို့ ဖြစ်နေသည်ကို ချင်းကျောက် မြင်လိုက်ရသည်။
သူမ လျှောက်သွားပြီး ခေါင်းမော့ကြည့်လိုက်သည်။
ခဏအကြာတွင် ဖောင်းကြွရုပ်တုများပေါ်တွင် ရင်းနှီးသော ပုံရိပ်တစ်စုကို သူမ ရှာတွေ့ခဲ့သည်။ သူတို့က သူမ၏ အိမ်မွေးတိရစ္ဆာန်ဝိုက်တီနှင့် တူညီသည့် နှင်းကဲ့သို့ ဖြူဖွေးသည့် မိစ္ဆာသားရဲတစ်စု ဖြစ်လေသည်... ၎င်းတို့က တောရိုင်းတောင်တန်းများထဲမှ နှင်းကဲ့သို့ ဖြူဖွေးသည့် မင်္ဂလာရှိသော သားရဲတစ်စုနှင့် တူပေသည်။
သို့သော် နောက်ထပ် ဖောင်းကြွရုပ်တုက အခြား မြင်ကွင်း တစ်ခု ဖြစ်လေသည်။
ဝိုက်တီနှင့်ဆင်တူသော မိစ္ဆာသားရဲအားလုံးဟာ အနီရင့်ရောင် သွေးပင်လယ်ထဲတွင် မြှုပ်နှံခံထားကြရသည်။ မိစ္ဆာသားရဲ သားပေါက်လေးတစ်ကောင်သာ ကျန်ရှိတော့လေသည်။ ၎င်းကို သီးသန့် ထုတ်ယူခဲ့ပြီး ဤဘေးအန္တရာယ်မှ ကယ်တင်ခဲ့သည်။
နောက်ဆုံးတွင် မိစ္ဆာသားရဲသောင်းပေါင်းများစွာကို ဝိညာဉ်လက်နက်တစ်ခု အဖြစ် စုစည်းပစ်ခဲ့သည်။
"ဒါက..."
ဝိုက်တီသည် မျိုးသုဉ်းသွားပြီဖြစ်သော မိစ္ဆာသားရဲ တစ်ကောင်ဖြစ်သည်ဟု လူအများအပြား အဘယ်ကြောင့် ထင်မြင်ကြသည်ကို ချင်းကျောက် အကြမ်းဖျင်း နားလည်သွားခဲ့သည်။ ရှေးဟောင်းခေတ်က မျိုးနွယ်စုတစ်ခုလုံး ဤကဲ့သို့သော ဘေးအန္တရာယ်မျိုး ကြုံတွေ့ခဲ့ရခြင်း ဖြစ်ပေသည်။
သီးသန့်ထုတ်ယူခံခဲ့ရပြီး လျှို့ဝှက်နည်းစနစ် တစ်ခုဖြင့် တံဆိပ်ခတ်နှိပ်ခံခဲ့ရသည့် ထိုမိစ္ဆာသားရဲ သားပေါက်လေးက ဝိုက်တီဖြစ်နိုင်ပေသည်။
အဲဒီလူက မိစ္ဆာသားပေါက်လေး တစ်ကောင်ကို ဘယ်လို မွေးမြူရမလဲ ဆိုတာ တကယ် သိနေသည်လော။
သို့သော် မိစ္ဆာသားရဲတွေ သားပေါက်ဖို့ အထီးတစ်ကောင်နဲ့ အမတစ်ကောင် လိုအပ်မည်ဖြစ်ပြီး တစ်ကောင်တည်း ချန်ထားတာက ဘယိလိုလုပ် အသုံးဝင်မည်နည်း။
ချင်းကျောက် ဖောင်းကြွရုပ်တုမှ ပုံရိပ်တစ်ခုကို မြင်လိုက်ရသည်။ ၎င်းက သွေးပင်လယ်အထက်တွင် ရပ်နေသော ပုံရိပ်တစ်ခု ဖြစ်ပေသည်။
"ဒါက သွေးကြာပန်းတာအိုဆရာပဲ"
ဤအချိန်တွင် ချန်ချန်ရွှယ်၏ အသံက ပြန်လည်ထွက်ပေါ်လာခဲ့သည်။ "ဒီပုံရိပ်က ပြာအဖြစ် ပြောင်းလဲသွားရင်တောင် ငါ မှတ်မိနိုင်တယ်"
ချန်ချန်ရွှယ်၏ မျက်နှာတွင် ရှုပ်ထွေးသော အမူအရာ တစ်ခု ရှိနေခဲ့သည်။ ဖောင်းကြွရုပ်တုပေါ်ရှိ ပုံရိပ်ကို သူမ မြင်လိုက်ရသောအခါ (၁၀ဝ) ရာခိုင်နှုန်း သေချာသွားခဲ့သည်...
ဧရာမကြေးဝါတံခါးကြီး၏ ပိုင်ရှင်က ကောင်းကင်ဂိုဏ်း၏ မိစ္ဆာချုပ်နှောင်မျှော်စင်အတွင်းတွင် တံဆိပ်ခတ်နှိပ်ခံထားရသော မိစ္ဆာပင် ဖြစ်လေသည်။
သူမ သူ့ကို အရင်က မြင်ဖူးခဲ့ပြီး သူတို့က တစ်ထပ်တည်း တူညီနေခဲ့ကြသည်။
[အသက် ၂၂ နှစ်၊ နောက်ထပ် တစ်နှစ်ကုန်ဆုံးသွားခဲ့သည်။ ချန်ချန်ရွှယ်ဟာ ဧရာမကြေးဝါတံခါးကြီး၏ ဗဟိုချက်မဧရိယာတွင် သွေးကြာပန်းတာအိုဆရာနှင့် ပတ်သက်သည့် သတင်းအချက်အလက်တို့ကို ပိုမို ရှာဖွေတွေ့ရှိခဲ့ပြီး ဤရှေးဟောင်း မိစ္ဆာအကြောင်း ပိုမို ကောင်းမွန်စွာ နားလည်နိုင်ခဲ့သည်။]
[အသက် ၂၃ နှစ် သင်ဟာ မတော်တဆ အစီအရင် တစ်ခုကို အသက်သွင်းမိခဲ့သည်။ ချန်ချန်ရွှယ်၊ ချင်းကျောက် နှင့် အခြားသူများဟာ လဝက်ခန့် ပိတ်မိနေပြီးမှ နောက်ဆုံးတွင် အစီအရင်ထဲမှ ချိုးဖျက်ထွက်လာနိုင်ခဲ့သည်။ ရလဒ်အနေဖြင့် လျှို့ဝှက် အစောင့် (၁၀) ဦးကျော် သေဆုံးခဲ့ရသည်။]
[မဟာဝေဧကရာဇ်ချန်ဖုန်းယင်သည် ချန်ချန်ရွှယ်ကို လျှို့ဝှက်အစောင့် (၁၀ဝ) ကျော် ပေးအပ်ခဲ့သော်လည်း ယခုအခါ အယောက် (၅၀)ခန့်သာ ကျန်ရှိတော့ပေသည်။]
[အသက် ၂၄နှစ် ချန်ချန်ရွှယ်နှင့် ချင်းကျောက်တို့ဟာ ဗဟိုချက်မဧရိယာထဲတွင် ရင်းနှီးသော ဝိညာဉ် လက်နက် တစ်ခုကို ရှာဖွေတွေ့ရှိခဲ့ကြသည်။]
[၎င်းမှာ သွေးလိုနီရဲနေသော ကြေးပြားစ တစ်ပြား ဖြစ်သည်]
[သွေးလိုနီရဲနေသော ကြေးပြားစကို စက်ရုပ်သားရဲဒါဇင်ပေါင်းများစွာက စောင့်ကြပ်နေခဲ့ကြသည်။ ချန်ချန်ရွှယ်ဟာ ဤဝိညာဉ်လက်နက်ကို ပြန်လည်ရယူရန် နောက်တစ်ကြိမ်မှ ကြိုးစားရန် စဥ်းစားနေချိန်၌ စက်ရုပ်သားရဲဒါဇင်ပေါင်းများစွာက စတင်၍ တိုက်ခိုက်လာလိမ့်မည်ဟု သူမ မျှော်လင့်မထားခဲ့ပေ။]
[အားအနည်းဆုံးစက်ရုပ်သားရဲကရွှေအမြုတေအဆင့် (၁) တွင်ရှိပြီး၎င်းတို့ကမဟာဝေလျှို့ဝှက်အစောင့်များနှင့်တိုက်ခိုက်နေခဲ့ကြသည်]