အခန်း ၁၇ : မသေမျိုး ကျင့်ကြံခြင်းဂိုဏ်းသို့ ဝင်ရောက်ခြင်း
ချန်ချန်ရွှယ်ဟာ မသေမျိုးကျင့်ကြံခြင်း သရုပ်ဖော် စနစ်ထဲ၌ ကလေးဘဝ (၉) နှစ်တာ ကာလကို ဖြတ်သန်းခဲ့ရလေသည်။ ဒါပေမဲ့ လက်တွေ့ဘဝမှာ အားလုံးကို စောင့်ကြည့်နေတဲ့ ပိုင်ယီ အတွက်တော့ (၉) မိနစ်လောက်ပဲ ကြာလိုက်တယ်လို့ ခံစားလိုက်ရလေသည်။
(၉) မိနစ် အတွင်းမှာပဲ မသေမျိုးကျင့်ကြံခြင်း သရုပ်ဖော် စနစ်ထဲက ချန်ချန်ရွှယ်ရဲ့ အတွေ့အကြုံ အားလုံးကို တွေ့နေခဲ့ရပေသည်။
ဒီသူတော်စင်မက မသေမျိုးကျင့်ကြံခြင်း ဂိုဏ်းတစ်ခုရဲ့ ရွေးချယ်ခံရလိမ့်မယ်လို့ ပိုင်ယီ ထင်မထားခဲ့ပေ။
တစ်ဖက်က လူကိုယ်တိုင် လာပြီး ချန်ချန်ရွှယ်ကို ဂိုဏ်းထဲ ခေါ်ဖို့ လာခဲ့ကြတာပင်။
ရွှေစစ်ရင် ဘယ်တော့မဆို တောက်ပနေမှာဖြစ်ပြီး လူတွေ သတိထားမိမှာပဲလို့ ပြောရမည်ပင်။
ချန်ချန်ရွှယ်က သူမရဲ့ တတိယအကြိမ် သရုပ်ဖော် စနစ်ထဲမှာ အလွန် အနေအထိုင် ရိုးရှင်းပြီး လူတွေ သတိမထားမိအောင် နေထိုင်ခဲ့လေသည်။ ပုံမှန်အားဖြင့် သူမရဲ့ ထူးခြားတဲ့ ခွန်အားကို ပြင်ပလူတွေရှေ့မှာ ထုတ်မပြခဲ့ချေ။
ဒါပေမဲ့ မသေမျိုးကျင့်ကြံသူတွေကတော့ သူမအား သတိထားမိခဲ့ကြလေသည်။
"ဒါနဲ့ သူ ဒီတစ်ခါ အသက် (၉) နှစ်အထိ အသက်ရှင်ခဲ့တယ်ဆိုတော့ အရင် စံချိန်ကို ချိုးသွားပြီ မဟုတ်လား" ပိုင်ယီ အားလုံးကို သဘောပေါက်လိုက်၏။ "သူမ နောက်ထပ် နှစ်အနည်းငယ်လောက် ဆက်ပြီး တောင့်ခံထားနိုင်မလား မသိဘူး... ဘာပဲဖြစ်ဖြစ် ကြည့်ရတာ သူမက ချီစုစည်းမှု အဆင့် (၂) ကို ရောက်လုနီးပါး ဖြစ်နေပြီပဲ"
"ဒါပေမဲ့ သူမက အဆင့်တက်ချင်တဲ့ စိတ်ကို အစွမ်းကုန် ဖိနှိပ်ထားပုံ ရတယ်... ဘေးကင်းအောင်လို့လား... ဒါမှမဟုတ် သူမရဲ့ အခြေခံအုတ်မြစ် ပိုခိုင်မာအောင် လုပ်နေတာလားပဲ... ကြည့်ရတာ သူမက အသက် (၁၀) နှစ် (၁၁) နှစ်လောက် ရောက်မှ ချီစုစည်းမှု အဆင့် (၂) ကို တက်ဖို့ ရွေးချယ်မယ့် ပုံပဲ"
ချန်ချန်ရွှယ်ဟာ ချီစုစည်းမှု အဆင့် (၂) ရောက်သွားရင် ဘယ်လို ဆုလာဘ်မျိုး ရမလဲဆိုတာ သူ သိချင်နေမိလေသည်။
ပိုင်ယီ သေချာတော့ မသိပေမယ့် မျှော်လင့်နေမိခဲ့သည်။
တခြားသူတွေက သူ့အတွက် အလုပ်ကြိုးစားပေးနေပြီး သူကတော့ ထိုင်ပြီး အသီးအပွင့် ခံစားရတာလောက် ပျော်စရာကောင်းတာ ဘာရှိဦးမည်နည်း။
...
မသေမျိုးကျင့်ကြံခြင်း သရုပ်ဖော် စနစ် အတွင်း၌ ....
ချန်ချန်ရွှယ်ရဲ့ ဖခင်က မသေမျိုးကျင့်ကြံသူတွေပါလို့ အခိုင်အမာ ပြောဆိုနေတဲ့ လူနှစ်ယောက်ကို ကြည့်ပြီး မျက်လုံးထဲမှာ သတိထားမှုတွေ ပြည့်နှက်နေခဲ့လေသည်။ သူ မနေနိုင်ဘဲ မေးလိုက်၏။ "ခင်ဗျားတို့ ပြောတာက ချန်ချန်ရွှယ်မှာ မသေမျိုးကျင့်ကြံဖို့ ပါရမီ အများကြီး ပါလာတယ်... ဒါကြောင့် သူ့ရဲ့ မွေးရာပါ ပါရမီကို စမ်းသပ်ချင်တယ်ပေါ့"
သူ့ရှေ့မှာ ရှိနေတဲ့ လူနှစ်ယောက်က သာမန်လူတွေ ဝတ်ဆင်တဲ့ အဝတ်အစားမျိုး ဝတ်ဆင်ထားပေမယ့် သူတို့ရဲ့ ကိုယ်ရောင်ကိုယ်ဝါက သာမန်လူတွေနဲ့ မတူချေ။
သူတို့က သူတို့ကိုယ်သူတို့ မသေမျိုးအဖြစ် တက်လှမ်းခြင်းဂိုဏ်းက မသေမျိုးကျင့်ကြံသူတွေ ဖြစ်ကြောင်း ပြောဆိုကြပြီး ချန်ချန်ရွှယ် လုပ်ခဲ့တဲ့ ကိစ္စတွေကို ကြားသိခဲ့ရတယ်လို့ ဆိုလေသည်။
ဒါကြောင့် သူတို့ စိတ်ဝင်စားသွားပြီး သိချင်စိတ် ပြင်းပြလာခဲ့ခြင်းပင်။
ဒီလိုနဲ့ ချန်ချန်ရွှယ်ကို ဂိုဏ်းထဲ ဝင်ဖို့ စည်းရုံးသိမ်းသွင်းရန် တောင်အောက် ဆင်းလာကြလေသည်။
ချန်ချန်ရွှယ်ရဲ့ မိခင်ကတော့ သံသယ ဝင်နေခဲ့ကြသည်။ ဘာလို့လဲဆိုတော့ ဒီခေတ်ကြီးထဲမှာ မသေမျိုးကျင့်ကြံသူတွေ အဖြစ် ဟန်ဆောင်ပြီး လိမ်ညာစားသောက်နေတဲ့ လူတွေ အများကြီး ရှိနေလို့ပင်။
မသေမျိုးအဖြစ် တက်လှမ်းခြင်း ဂိုဏ်းကပါလို့ ပြောတဲ့ မသေမျိုးကျင့်ကြံသူ နှစ်ယောက်ရဲ့ သဘောထားက အလွန် ဖော်ရွေခဲ့သည်။
သူတို့ထဲက တစ်ယောက်က ပြုံးပြီး ပြောလိုက်၏။ "ခင်ဗျားတို့ သမီးက အသက် (၉) နှစ်ပဲ ရှိသေးတာ... သူ့အဖေအတွက် လက်စားချေပေးခဲ့သလို ကောင်းကင်ဘုံ ကိုယ်စား တရားမျှတမှုကို ဖော်ဆောင်ပေးခဲ့တယ်... တောင်ပေါ်ဓားပြ ဒါဇင်ပေါင်းများစွာကို သတ်ဖြတ်ခဲ့တယ်.... ဒါက သူ့မှာ ပါရမီ အများကြီး ရှိတယ် ဆိုတာ ပြသဖို့ လုံလောက်နေပါပြီ"
"ကျွန်တော်တို့ မသေမျိုးအဖြစ် တက်လှမ်းခြင်း ဂိုဏ်းရဲ့ ဂိုဏ်းချုပ်ကြီးက ဒီကိစ္စကို ကြားသိသွားပြီး ခင်ဗျားတို့ သမီးမှာ မသေမျိုးကျင့်ကြံဖို့ ပါရမီ ရှိလောက်တယ်လို့ ခံစားလိုက်ရတယ်"
"ဒါကြောင့် သူက ကျွန်တော်တို့ နှစ်ယောက်ကို တောင်အောက်ဆင်းပြီး ခင်ဗျားတို့ သမီးရဲ့ မွေးရာပါ ပါရမီကို စမ်းသပ်ခိုင်းလိုက်တာပါ"
"တကယ်လို့ ခင်ဗျားတို့ သမီးမှာ မသေမျိုးကျင့်ကြံဖို့ ပါရမီ တကယ် ရှိနေတယ် ဆိုရင် မသေမျိုးအဖြစ် တက်လှမ်းခြင်း ဂိုဏ်းက သူ့ကို ဂိုဏ်းသားအဖြစ် လက်ခံပါလိမ့်မယ်"
"တစ်ချိန်တည်းမှာပဲ ခင်ဗျားတို့ မိသားစုလည်း မသေမျိုးအဖြစ် တက်လှမ်းခြင်း ဂိုဏ်းရဲ့ အကာအကွယ်ကို ရရှိပါလိမ့်မယ်"
သူဟာ ဒီလောက် တည်တည်ငြိမ်ငြိမ် ပြောနေတာကို ကြားတော့ ချန်ချန်ရွှယ်ရဲ့ ဖခင် ခဏလောက် တွန့်ဆုတ်သွားခဲ့သည်။
မသေမျိုးကျင့်ကြံခြင်း....
ဒါက ဘယ်နေရာ ရောက်ရောက် လူတိုင်း တောင့်တတဲ့ အရာတစ်ခုပင်။
ချန်ချန်ရွှယ်ရဲ့ ဖခင်က စစ်မှုထမ်းခဲ့ဖူးပြီး နန်းတွင်းအတွက် နှစ်ပေါင်းများစွာ အမှုထမ်းခဲ့သူ ဖြစ်၏။
ထို့ကြောင့် စစ်တပ်ထဲမှာတုန်းက မသေမျိုးကျင့်ကြံသူ တချို့နဲ့ တွေ့ဆုံခဲ့ဖူးလေသည်။ ထို့အပြင် မသေမျိုးကျင့်ကြံသူတွေရဲ့ ကြောက်မက်ဖွယ်ကောင်းတဲ့ ခွန်အားကိုလည်း သူ သိထားလေသည်။
အကယ်၍ သူ့သမီးသာ မသေမျိုးကျင့်ကြံသူ တစ်ယောက် ဖြစ်လာနိုင်မယ် ဆိုရင် ဒီလို လူသားစားတဲ့ ကမ္ဘာကြီးထဲမှာ ပိုကောင်းမွန်တဲ့ ဘဝတစ်ခု ဖြတ်သန်းနိုင်မည်ပင်။ ရွာထဲမှာ ပုန်းအောင်းနေစရာ မလိုတော့ပဲ နေ့တိုင်း တောင်ပေါ်တက်ပြီး အမဲလိုက် ဒါမှမဟုတ် လယ်လုပ်ပြီး အချိန်ဖြုန်းနေစရာ မလိုတော့ပေ။
"အဖေ... သူတို့က တကယ် မသေမျိုးကျင့်ကြံသူတွေပါ"
သူ့နောက်ကျောဘက်ကနေ ချန်ချန်ရွှယ်ရဲ့ နုနယ်တဲ့ အသံလေး ထွက်ပေါ်လာခဲ့သည်။
မသေမျိုးကျင့်ကြံသူ တစ်ယောက် ဖြစ်တဲ့ ချန်ချန်ရွှယ်ဟာ သူ့ရှေ့မှာ ရှိနေတဲ့ လူနှစ်ယောက်ရဲ့ ခန္ဓာကိုယ်ထဲမှာ ဝိညာဉ်စွမ်းအင် လှုပ်ရှားမှုတွေ ရှိနေတာကို ရှင်းရှင်းလင်းလင်း အာရုံခံမိလေသည်။
ဒါပေမဲ့ ဒီလှုပ်ရှားမှုတွေက သိပ်အားနည်းလွန်းလေသည်။ ဆိုလိုတာက ဒီလူနှစ်ယောက်က သူမလိုပဲ အနည်းဆုံး ချီစုစည်းမှု အဆင့် (၁) လောက်ပဲ ရှိနေတာပင်။
တကယ်တော့...
သူတို့က ချီစုစည်းမှု အဆင့် (၁) တောင် မရှိကြသေးချေ။
ဒါပေမဲ့ သူတို့က မသေမျိုးကျင့်ကြံသူတွေ အစစ်အမှန် ဖြစ်ကြောင်း သက်သေပြဖို့ လုံလောက်ကာ လိမ်ညာသူတွေ မဟုတ်ပါပေ။
ဒါ့အပြင် ချန်ချန်ရွှယ်က ဒီ မသေမျိုးအဖြစ် တက်လှမ်းခြင်း ဂိုဏ်းကို ကောင်းကောင်း ရင်းနှီးပေသည်။
၎င်းက သူမ ပထမဆုံးအကြိမ် သရုပ်ဖော်ဘဝတုန်းက သူမရဲ့ မွေးရာပါ ပါရမီကို လာစစ်ဆေးပြီး စိတ်ပျက်လက်ပျက် ပြန်သွားခဲ့တဲ့ ဂိုဏ်းလေ...
အဲဒါ မသေမျိုးအဖြစ် တက်လှမ်းခြင်း ဂိုဏ်းပင်။
သူမ ထင်မထားခဲ့ချေ။ တတိယအကြိမ် သရုပ်ဖော်တဲ့အခါ မသေမျိုးအဖြစ် တက်လှမ်းခြင်း ဂိုဏ်းက သူမရဲ့ တံခါးဝကို ထပ်လာခေါက်လိမ့်မည်ဟုပင်။
ဒါက ပြဇာတ်ဆန်တယ်လို့ သူမ ခံစားလိုက်ရ၏။
"ချန်ချန်ရွှယ်... သမီး... သမီး မသေမျိုးအဖြစ် တက်လှမ်းခြင်း ဂိုဏ်းထဲ ဝင်ပြီး မသေမျိုးကျင့်ကြံသူ ဖြစ်ချင်လား" ချန်ချန်ရွှယ်ရဲ့ ဖခင်က သမီးဖြစ်သူကို ကြည့်ပြီး မေးလိုက်၏။ သူ့လေသံက မိဘတစ်ယောက်ရဲ့ ဂုဏ်သိက္ခာ ပါဝင်ပုံ မရပေ။
တကယ်တော့ လက်ရှိ ချန်မိသားစုရဲ့ ကျောရိုးက ချန်ချန်ရွှယ်ရဲ့ ဖခင် မဟုတ်သလို မိခင်လည်း မဟုတ်ပဲ ချန်ချန်ရွှယ် ဖြစ်လေသည်။
အသက် (၉) နှစ် အရွယ်မှာ သူမဟာ ရင့်ကျက်တဲ့ စိတ်ဓာတ်နဲ့ စွမ်းအားကြီးတဲ့ ခွန်အားကို ပြသခဲ့ပြီး အိမ်ထောင်ဦးစီး နေရာကို အလွယ်တကူ ရယူထားသူ ဖြစ်၏။
တကယ်တော့ ဒီမကောင်းဆိုးဝါးလေးက အိမ်ထောင်ဦးစီးပါပင်။
"ဟုတ်ကဲ့" ချန်ချန်ရွှယ် ခေါင်းညိတ်လိုက်သည်။
ဟုတ်ကဲ့...
သူမဟာ မသေမျိုးကျင့်ကြံခြင်း ဂိုဏ်းတစ်ခုထဲ ဝင်ရောက်ဖို့ ဆုံးဖြတ်လိုက်ပေပြီ။ ဒါက သူမ သေချာ စဉ်းစားပြီးမှ ချမှတ်လိုက်တဲ့ ဆုံးဖြတ်ချက် တစ်ခုဖြစ်ပေသည်။
မသေမျိုးကျင့်ကြံဖို့ အတွက် မရှိမဖြစ် လိုအပ်တဲ့ အရာ (၄) ခု ရှိသည်။ အဲဒါတွေကတော့ ကြွယ်ဝမှု၊ အဖော်၊ ကျင့်စဉ်နဲ့ မြေနေရာတို့ပါပင်။
ကြွယ်ဝမှု - သူမက တောင်ပေါ်ရွာလေး တစ်ရွာထဲမှာ ပုန်းအောင်းနေရပြီး တောင်ပေါ်တက်ပြီး အမဲလိုက်တာကလွဲရင် ပြောပလောက်တဲ့ ဝင်ငွေရလမ်း မရှိပေ။
အဖော် - ပြောစရာတောင် မလိုပဲ သူမမှာ ကျင့်ကြံဖော်မရှိပဲ ဒီဘဝမှာ သူမ (၉) နှစ်လုံးလုံး တစ်ယောက်တည်း ကျင့်ကြံခဲ့ရခြင်းပင်။
ကျင့်စဉ် - ဒါက သူမမှာ ရှိတဲ့ တစ်ခုတည်းသော အရာဖြစ်သည်။
မြေနေရာ - သူမမှာ မြေနေရာ မရှိချေ။
သူမဟာ တည်ငြိမ်စွာနဲ့ ပိုသန်မာချင်တယ် ဆိုရင် ပြီးတော့ ပိုမြင့်တဲ့ အဆင့်ကို ချောချောမွေ့မွေ့ ရောက်ချင်တယ် ဆိုရင် သူမ လုပ်နိုင်တဲ့ တစ်ခုတည်းသော အရာက ဂိုဏ်းတစ်ခုခုထဲ ဝင်ရောက်ပြီး ဂိုဏ်းရဲ့ အရင်းအမြစ်တွေကို အသုံးပြုကာ ကိုယ့်ကိုယ်ကိုယ် ပိုသန်မာအောင် လုပ်ဖို့ပါပဲ ဆိုတာ ချန်ချန်ရွှယ် သိပေသည်။
ဂိုဏ်းတစ်ခုရဲ့ ကျောထောက်နောက်ခံ ရှိထားရင် သူမ ကျင့်ကြံတဲ့အခါ မိစ္ဆာသားရဲတွေရဲ့ အလစ်ဝင်တိုက်ခိုက်တာ ခံရမှာကို ကြောက်စရာ မလိုတော့ချေ။
ဒါ့အပြင် ကျင့်ကြံဖို့အတွက် ဆေးလုံးတွေလည်း ရနိုင်သလို ဝိညာဉ်လက်နက်တွေတောင် ရနိုင်ပေသည်။
မသေမျိုးကျင့်ကြံသူတွေဟာ ပိုမြင့်တဲ့ နေရာကို ရောက်ချင်ရင် အခြေအနေကို အခွင့်ကောင်းယူ တတ်ရပေမည်။
ချန်ချန်ရွှယ်ဟာ ဖခင်ဖြစ်သူရဲ့ နောက်ကနေ ထွက်လာပြီး မသေမျိုးအဖြစ် တက်လှမ်းခြင်း ဂိုဏ်းက ကျင့်ကြံသူ နှစ်ယောက်ကို မော့ကြည့်လိုက်၏။
သူမရဲ့ လေသံနဲ့ မျက်နှာထားက ပုံမှန်မဟုတ်ဘဲ တည်ငြိမ်နေခဲ့သည်။ "ကျွန်မရဲ့ အခြေခံအုတ်မြစ်ကို စစ်ဆေးဖို့ မလိုဘူးလို့ ထင်ပါတယ်။ ဒါနဲ့ဆိုရင် မသေမျိုးအဖြစ် တက်လှမ်းခြင်း ဂိုဏ်းထဲ ဝင်ရောက်ဖို့ လုံလောက်နေပြီ မဟုတ်လား"
သူမ ခန္ဓာကိုယ်ထဲက ဝိညာဉ်စွမ်းအင်တွေကို လှုပ်ရှားလိုက်ရာ ဝိညာဉ်စွမ်းအင် လှုပ်ရှားမှုတွေက ထူးခြားတုန်လှုပ်ဖွယ် ဖြစ်ပေါ်လာပြီး ထိုလူနှစ်ယောက်အား ပါးစပ်အဟောင်းသား ဖြစ်သွားစေခဲ့သည်။
ယခု၌ သူမရဲ့ ကျင့်ကြံမှုကို ဖုံးကွယ်ထားစရာ မလိုတော့ပေ။ ဘာပဲဖြစ်ဖြစ် မသေမျိုးအဖြစ် တက်လှမ်းခြင်း ဂိုဏ်းထဲ ဝင်ရောက်မည်ဖြစ်ရာ ပိုသန်မာတဲ့ လူတွေက သူမရဲ့ ကျင့်ကြံမှုကို တစ်ချက်ကြည့်ရုံနဲ့ မြင်နိုင်မည်ပင်။
ဒါ့အပြင် သူမရဲ့ မွေးရာပါ ပါရမီက သိပ်မကောင်းဘူး ဆိုတာ ချန်ချန်ရွှယ် သိထားလေသည်။
သူမ ကျင့်ကြံနိုင်ရတဲ့ တစ်ခုတည်းသော အကြောင်းရင်းက ဓားကျင့်စဉ်နဲ့ မွေးရာပါ ပါရမီဓား ကြောင့်ပါပင်။
အကယ်၍ သူတို့ကသာ သူမရဲ့ မွေးရာပါ ပါရမီကို စမ်းသပ်လိုက်မယ် ဆိုရင်... သူတို့ လှည့်ပြန်သွားနိုင်လေသည်။
"အို... မင်း... မင်းက ချီစုစည်းမှု အဆင့် ရောက်နေပြီလား" မသေမျိုးအဖြစ် တက်လှမ်းခြင်း ဂိုဏ်းက ကျင့်ကြံသူနှစ်ယောက်ဟာ တံတွေး တိတ်တဆိတ် မျိုချလိုက်မိကြသည်။ သူတို့ ဆယ်စုနှစ်နဲ့ချီ အသက်ရှင်လာတာ အလကား ဖြစ်ခဲ့သည်လို့ ခံစားလိုက်ကြရလေသည်။
[ချီစုစည်းမှု အဆင့် (၁) ရှိသော သင့် ကျင့်ကြံမှုအဆင့်က မသေမျိုးအဖြစ် တက်လှမ်းခြင်း ဂိုဏ်းမှ ကျင့်ကြံသူများကို မှင်သက်သွားစေခဲ့သည်။ သူတို့က သင့်ကို ဂိုဏ်းသို့ ပြန်ခေါ်သွားရန် ဆုံးဖြတ်လိုက်ကြသည်။ သင့်မိဘများက သင့်ကို ခွဲခွာရမည် ဖြစ်သဖြင့် ဝမ်းနည်းနေကြသော်လည်း သင့်ဆုံးဖြတ်ချက်ကို ဝင်မစွက်ဖက်ခဲ့ကြပေ။]
[ခရီးရှည်ကြီး တစ်ခု နှင်ပြီးနောက် မသေမျိုးအဖြစ် တက်လှမ်းခြင်း ဂိုဏ်းသို့ ရောက်ရှိလာခဲ့သည်။ ၎င်းသည် မသေမျိုးကျင့်ကြံခြင်း ဂိုဏ်းအသေးစားလေး တစ်ခုသာ ဖြစ်ကြောင်း တွေ့ရှိလိုက်ရသည်။ ဂိုဏ်းချုပ်ကြီးသည် အခြေတည်အဆင့် (၉) သာ ရှိသေးသည်။]
[ဂိုဏ်းချုပ်ကြီးသည် သင့်ပါရမီကို အလွန် အံ့သြသွားပြီး သင့်ကို ဆက်ခံသူ တပည့်အဖြစ် လက်ခံရန် ဆုံးဖြတ်လိုက်သည်။]
[သင်ဟာ မသေမျိုးအဖြစ် တက်လှမ်းခြင်း ဂိုဏ်းသို့ အောင်မြင်စွာ ဝင်ရောက်နိုင်ခဲ့ပြီ]
...