အခန်း ၁၆၇ : ကြေးဝါတံခါးကြီးရဲ့ ပိုင်ရှင်က ဘယ်သူလဲ....
အေးစက်သော အရိပ်အယောင်တစ်ခု ချန်ဖုန်းယင်၏ တည်ငြိမ်သော မျက်နှာပေါ်တွင် လက်ခနဲပေါ်လာခဲ့သည်။
"ရှာတွေ့တဲ့ လူက ဘယ်သူပဲ ဖြစ်နေပါစေ သူက ကမ္ဘာလောကရဲ့ ငြိမ်းချမ်းရေးကို ဖျက်ဆီးပြီး ပြည်သူတွေကို အန္တရာယ် ပေးဖို့ ရည်ရွယ်နေတာပဲဆိုတော့ သူ့ကို သတ်ရမယ်"
…
အချိန် ကုန်ဆုံးသွားခဲ့လေသည်။
လက်တွေ့ကမ္ဘာတွင် (၁၀) မိနစ်ခန့်သာ ကုန်ဆုံးသွားသော်လည်း မသေမျိုးကျင့်ကြံခြင်း သရုပ်ဖော် စနစ်ထဲတွင် (၁၀) နှစ် ကြာမြင့်သွားပေပြီ။
(၁၀)နှစ်ကြာ ဖွံ့ဖြိုးတိုးတက်လာပြီးနောက် ဧရာမ ကြေးဝါတံခါးကြီးအတွင်းရှိ ကမ္ဘာငယ်နေရာကို အနက်ရှိုင်းဆုံးအပိုင်းအထိ စူးစမ်းရှာဖွေပြီး ဖြစ်အေသည်။
"ဒီနေရာက ဒီလောက်တောင် ကြီးမားတာပဲ..."
ချင်းကျောက်သည်လည်း ချန်ချန်ရွှယ်နှင့် အခြားသူများ နောက်သို့ လိုက်ပါပြီး ဧရာမကြေးဝါတံခါးကြီး၏ အဓိက ဗဟိုချက်မအတွင်းပိုင်းသို့ နက်ရှိုင်းစွာ ဝင်ရောက်လာခဲ့ကြသည်။
လွန်ခဲ့သော (၁၀)နှစ်အတွင်း သူမဟာ ဧရာမကြေးဝါ တံခါးကြီး တစ်ဝိုက် လှည့်လည်သွားလာခဲ့သည်။ အတိတ်တုန်းက နေရာအချို့ကို သူမ ဝင်ရောက်ရန် မရဲခဲ့သော်လည်း ဒီတစ်ကြိမ် သူမဝင်ရောက်ရန် သတ္တိရှိနေခဲ့လေသည်။
အဘယ်ကြောင့်ဆိုသော် အတိတ်တုန်းက သူမ တစ်ယောက်တည်း ဖြစ်သော်လည်း ယခု သူမကို ကာကွယ်ပေးနေသော လူတစ်စု ရှိနေသောကြောင့် ဖြစ်၏။
"ဝိုက်တီ အန္တရာယ်ရှိလား"
ချင်းကျောက် ခေါင်းလှည့်လိုက်ပြီး သူမဘေးနားရှိ နှင်းကဲ့သို့ ဖြူဖွေးသော ထူးခြားဆန်းပြားသည့် သားရဲတစ်ကောင်ကို မေးလိုက်၏။
ဒီတစ်ကြိမ်လည်း သူမဟာ ဝိုက်တီကို ရှာတွေ့ခဲ့ပြီး တူညီသော နည်းလမ်းဟောင်းကို အသုံးပြုကာ ၎င်းကို ယဉ်ပါးအောင် ပြုလုပ်ခဲ့သည်။
ဝိုက်တီက သူမ ပြောသည်ကို နားလည်ပုံရလေသည်။
၎င်းဟာ ပြင်းထန်စွာ ခေါင်းငြိမ့်လိုက်သည်။
ဒါကို မြင်တော့ ချင်းကျောက်၏ မျက်နှာအမူရာကလည်း လေးနက်သွားခဲ့သည်။ အဘယ်ကြောင့်ဆိုသော် ဝိုက်တီ၏ ဤကဲ့သို့သော တုံ့ပြန်မှုမျိုး ပြုလုပ်နေသရွေ့ ရှေ့မှ အန္တရာယ်သည် သေစေနိုင်လောက်ပြီး စိတ်ကူးယဉ်နိုင်စွမ်းထက် ကျော်လွန်နေကြောင်း သူမ သိသောကြောင့် ဖြစ်၏။
"ထူးဆန်းတဲ့ မိစ္ဆာသားရဲတစ်ကောင်ပဲ"
သူမဘေးနားမှ ချန်ချန်ရွှယ်ဟာ အနည်းငယ် စိတ်လှုပ်ရှားသော လေသံဖြင့်ပြောလိုက်သည်။
ဒါက ဝိုက်တီရဲ့ အံ့ဖွယ်ရာတွေကို သူမ ပထမဆုံး အကြိမ် မြင်တွေ့ဖူးခြင်း မဟုတ်ချေ။
ဤအထူး မိစ္ဆာသားရဲက အန္တရာယ်ကို ကြိုတင်ခန့်မှန်းနိုင်စွမ်း အမှန်တကယ် ရှိပေသည်။
ဤသည်မှာ မွေးရာပါ စွမ်းရည်တစ်ခု ဖြစ်သည်။
ဤအရာက မဟာဝေဧကရာဇ် ချန်ဖုန်းယင်ကို လှည့်စားရန် သူမအသုံးပြုခဲ့သော ဆင်ခြေကို ချန်ချန်ရွှယ် ရုတ်တရက် တွေးမိသွားစေခဲ့ပြီး ၎င်းသည်လည်း ကြိုတင်ခန့်မှန်းခြင်း ပုံစံတစ်မျိုး ဖြစ်လေသည်။
"မင်း ဘာလုပ်ဖို့ ကြိုးစားနေတာလဲ"
ချန်ချန်ရွှယ်၏ အကြည့်ကို သတိပြုမိလိုက်ပြီး ချင်းကျောက် ချက်ချင်း သတိထားစွာ မေးလိုက်သည်။
"ဝိုက်တီက ငါ့နောက်ကို အကြိမ်ပေါင်းများစွာ လိုက်ခဲ့တာ အဲဒါကို လုယူဖို့ စဉ်းတောင် မစဉ်းစားနဲ့.... ငါ အဲဒါကို ခေါ်ထုတ်သွားမှာ"
ချန်ချန်ရွှယ် ခေါင်းခါလိုက်သည်။ ချင်းကျောက်လို ကလေးဆန်တဲ့ မိန်းကလေးတစ်ယောက်နဲ့ သူမဟာ ပြိုင်မပြောချင်ပေ။
ချင်းကျောက်ဟာ သူမကို သတိထားစွာဖြင့် ခဏလောက် ထပ်ကြည့်လိုက်ပြီး ချန်ချန်ရွှယ်ဟာ ဝိုက်တီကို အာရုံစိုက်ခြင်း မရှိတော့ကြောင်း တွေ့ရှိလိုက်ရသည်။
ထိုအခါမှသာ သူမ စိတ်အေးသွားခဲ့ရသည်။
မကြာမီ ချင်းကျောက်ဟာ သူမ၏ အကြည့်ကို ရှေ့သို့ ရွှေ့လိုက်သည်။ ၎င်းက တစ်ဝက်ကျော် ပျက်စီးနေသော အဆောက်အဦး တစ်ခု ဖြစ်ပြီး ပျက်စီးနေသည့် နံရံများနှင့် အပျက်အစီးများကို လူတစ်ယောက်၏ ခန္ဓာကိုယ် အရွယ်အစားနှင့် နှိုင်းယှဉ်ကြည့်လျှင် လူတစ်ယောက် မည်မျှ သေးငယ်ကြောင်း မြင်တွေ့နိုင်လေသည်။
ဧရာမကြေးဝါတံခါးကြီး အတွင်းရှိ နေရာလွတ်က ကြောက်စရာကောင်းလောက်အောင် ကျယ်လောင်ပေသည်။ ၎င်းက ဤကြီးမားသော အဆောက်အဦးကို လွယ်ကူစွာ ထည့်သွင်းထားနိုင်လေသည်။
ဒီအချိန်မှာ သူမက မြင့်မားတဲ့ တောင်ကြီးတစ်လုံးကို မော့ကြည့်နေတဲ့ ပုရွက်ဆိတ်လေး တစ်ကောင်လို့ ချင်ကျောင့် ခံစားလိုက်ရသည်။
ပျက်စီးနေတဲ့ နံရံတစ်ခုတည်းကတင် သူမမျက်လုံးထဲမှာ မြင့်မားတဲ့ ကျောက်တောင်နံရံကြီး တစ်ခုလို ဖြစ်နေခဲ့လေသည်။
"ဒီကြီးမားတဲ့ ပုံရိပ်ယောင်အစီအရင်က နှစ်သန်းပေါင်းများစွာ ကြာမြင့်တာတောင် မပျက်စီးဘဲ တည်ရှိနေတယ်.... အစီအရင် တည်ဆောက်ခဲ့တဲ့ သူက အစီအရင်ပညာရပ်မှာ အဆင့်မြင့်လွန်းတယ်"
ရုတ်တရက် အဘွားအိုက ပြောလိုက်သည်။
"ငါတို့ ဒီရှေးဟောင်း ကမ္ဘာငယ်နေရာထဲ ဝင်လာတုန်းက ကမ္ဘာငယ်နေရာရဲ့ အနက်ရှိုင်းဆုံး အပိုင်းကို ငါတို့ မမြင်တွေ့ခဲ့ရဘူး.... ဒီကြီးမားပြီး ပျက်စီးနေတဲ့ အဆောက်အဦး ရှိနေတဲ့ ဒီပုံရိပ်ယောင်အစီအရင်ကို ချိုးဖျက်နိုင်မှ ကြေးဝါတံခါးကြီးအတွင်းက အစစ်အမှန် လျှို့ဝှက်ချက်တွေကို ရှာဖွေတွေ့ရှိနိုင်မှာ"
"အပြင်ဘက်က ဝိညာဉ် ဆေးပင်တွေနဲ့ ဝိညာဉ် သွေးကြောတွေက ဒီရှေးဟောင်းဂူသင်္ချိုင်း နေရာရဲ့ အစစ်အမှန် ဗဟိုချက်မ ဖြစ်ချင်မှ ဖြစ်မှာ... ဒီရှေးဟောင်း ဂူသင်္ချိုင်းနေရာရဲ့ အစစ်အမှန် ဗဟိုချက်မက ဒီနေရာမှာ ရှိလောက်တယ်"
"ပြီးတော့ ဒီပျက်စီးယိုယွင်းနေတဲ့ အဆောက်အဦးဆီကနေ ထွက်ပေါ်နေတဲ့ အံ့အားသင့်စရာ ကောင်းတဲ့ စွမ်းအားတစ်ခုကို ငါ ခံစားလို့ ရနေတယ်"
"ဒီဂူသင်္ချိုင်းနေရာကို နှစ်သန်းပေါင်းများစွာ ကြာအောင် ထိန်းသိမ်းထားနိုင်တာက ဒီအံ့အားသင့်စရာ ကောင်းတဲ့ စွမ်းအားကြောင့်ပဲ"
"အချိန်ကာလကြောင့် လုံးဝ ပျက်စီးမသွားရတဲ့ အကြောင်းရင်းကလည်း အဲဒါကြောင့်ပဲ"
ဒါကို ကြားတော့ ချင်းကျောက် သူမစိတ်ထဲတွင် အဘွားအိုနှင့် ဆက်သွယ်လိုက်ပြီး မေးလိုက်သည်။
"စီနီယာ ဘာကို ဆိုလိုတာလဲ"
အဘွားအို ပြန်ဖြေလိုက်သည်။
"ဒီနေရာက ဒီရှေးဟောင်းဂူသင်္ချိုင်းနေရာပိုင်ရှင်ရဲ့ ကျင့်ကြံခြင်း နေရာ ဖြစ်လောက်တယ်... အပြင်ဘက်ထက် အတွင်းဘက်က ပိုအန္တရာယ် များနိုင်တယ် ပြီးတော့ မူလဝိညာဉ်အဆင့်ကျင့်ကြံသူတွေ ဝင်သွားရင်တောင် အခြေနေကောင်းချင်မှ ကောင်းမှာ"
"ဒါပေမဲ့ အကယ်၍ ငါတို့ ဝင်သွားရင် ဒီရှေးဟောင်း ဂူသင်္ချိုင်းနေရာရဲ့ ပိုင်ရှင်က ဘယ်သူလဲ ဆိုတာ သိနိုင်မယ့် အခွင့်အရေး ရရှိကောင်း ရရှိနိုင်တယ်"
"မှတ်တမ်းတွေမှာ ရေးမှတ်ထားတဲ့ ရှေးဟောင်း ကျင့်ကြံသူတချို့လား ဒါမှမဟုတ် ဧကရာဇ်တန်ခိုးရှင်တစ်ယောက်လား ဆိုတာ ငါ သိချင်မိတယ်"
"..."
...