အခန်း ၁၆၁ : ခုခေတ် လေလွှင့်ကျင့်ကြံသူတွေက ဒီလောက်စွမ်းအားကြီးနေကြပြီလား

​သို့သော် ဝိညာဉ်ဓားဂိုဏ်းမှ ကျွမ်းကျင်သူများ ရောက်ရှိလာပါက သူသည် ဤခေါင်းလောင်းကြီးကို ဆုံးရှုံးရမည်သာမက ဒဏ်ရာများကို ကုသနိုင်မည့် အခွင့်အရေးကိုလည်း ဆုံးရှုံးရပေလိမ့်မည်။ ထို့အပြင် မူလဝိညာဉ်အဆင့်သို့ အဆင့်ချိုးဖျက်မည့် အခွင့်အရေးကိုလည်း ဆုံးရှုံးရမည်ဖြစ်သလို သူ၏ အသက်ကိုလည်း ဆုံးရှုံးရပေမည်။

​အကယ်၍ သူသေချင်သည် ဆိုလျှင်တော့ ဒဏ်ရာများကို ကုသရန်နှင့် မူလဝိညာဉ် အဆင့်သို့ အဆင့်ချိုးဖျက်ရန် လောနေမည် မဟုတ်ပေ။

​စစ်တုချဲက မသေချင်သေးတာကြောင့် အခွင့်ရေးကို စွန့်လွှတ်ကာ ထွက်ပြေးရလေသည်။

​ရွှေအမြုတေ အဆင့် (၆) နှင့် ရွှေအမြုတေ အဆင့် (၁) ကျင့်ကြံသူများ၏ ဝိုင်းရံပိတ်ဆို့မှုအောက်တွင် ရွှေအမြုတေ အဆင့် (၁၀) ရှိသော မိစ္ဆာတစ်ကောင်... ထွက်ပြေးရခြင်းက အနည်းငယ် ရှက်စရာကောင်းနိုင်သော်လည်း ကောင်းကျိုးဆိုးကျိုးများကို ချိန်ဆပြီးနောက် စစ်တုချဲ ပြုလုပ်လိုက်သည့် ဆုံးဖြတ်ချက်ပင် ဖြစ်လေသည်။

​"ဟူး..." ရှူကျစ်ဟွာ ဖြည်းညှင်းစွာ သက်ပြင်းချလိုက်သည်။ ရွှေအမြုတေ အဆင့် (၆) ကျင့်ကြံမှုဖြင့် ရွှေအမြုတေ အဆင့် (၁၀) မိစ္ဆာတစ်ကောင်ကို ရင်ဆိုင်ခဲ့ရခြင်းက သူမအား ဖိအားများစွာ ပေးခဲ့သည်။ အကြိမ်ပေါင်းများစွာပင် သူမ အန္တရာယ်နှင့် ကြုံတွေ့ခဲ့ရသည်။

​အကယ်၍ သူမ မတော်တဆ ဒဏ်ရာရခဲ့ပါက နောက်လှည့်၍ ထွက်ပြေးရုံမှလွဲ၍ အခြားရွေးချယ်စရာ ရှိမည် မဟုတ်ပေ။

​ကံကောင်းစွာပင် သူမ၏ ခန့်မှန်းချက် မှန်ကန်ခဲ့သည်။ ဤမိစ္ဆာ၏ အော်ရာ မတည်ငြိမ်ရသည့် အကြောင်းရင်းမှာ သူ၏ ခန္ဓာကိုယ်ပေါ်ရှိ ဒဏ်ရာများကြောင့် ဖြစ်သည်မှာ သေချာပေသည်။

​သူ့ခန္ဓာကိုယ်ပေါ်ရှိ ဒဏ်ရာများကြောင့် တစ်ဖက်လူက အချိန်ဆွဲရန် မရဲခဲ့ခြင်းဖြစ်ကာ ဆုတ်ခွာရန် ရွေးချယ်ခဲ့လေသည်။

​ထွက်ခွာသွားသော မိစ္ဆာကို ကြည့်ပြီး ရှူကျစ်ဟွာ သဘာဝကျစွာပင် လိုက်မဖမ်းနိုင်ခဲ့ပေ။

​ရွှေအမြုတေအဆင့် (၁၀) မိစ္ဆာတစ်ကောင် ထွက်ပြေးချင်နေသည်ကို သူမကဲ့သို့ ရွှေအမြုတေ အဆင့် (၆) ကျင့်ကြံသူ တစ်ဦးက မည်သို့ အမီလိုက်နိုင်မည်နည်း။

​အကယ်၍ သူမ အမီလိုက်နိုင်လျှင်ပင် မည်သို့ ယှဉ်ပြိုင်တိုက်ခိုက်နိုင်မည်နည်း။

​တစ်ဖက်လူနှင့် အချီ ဒါဇင်အနည်းငယ်လောက်သာ ဖလှယ်ခဲ့ရသော်လည်း ရှူကျစ်ဟွာ၏ မျက်နှာသည် အနည်းငယ် ဖြူဖပ်ဖြူရော် ဖြစ်နေပြီး ပင်ပန်းနွမ်းနယ်နေပုံ ပေါက်နေခဲ့သည်။

​ပင်ပန်းနွမ်းနယ်မှုက အလွန် ကြီးမားလှပေသည်။

​ရှူကျစ်ဟွာသည် ဆေးလုံးတစ်လုံးကို မျိုချလိုက်သည်။ သူမဟာ မူလက ရွှေအမြုတေ လူသား ရုပ်သေးရုပ်ကို ပေးရန် ဆေးလုံးတစ်လုံး ထုတ်ယူချင်သော်လည်း ၎င်းက လူသားရုပ်သေးရုပ်တစ်ရုပ် ဖြစ်ကြောင်း ရုတ်တရက် သတိရသွားပြီး ဆေးလုံးကို ပြန်သိမ်းထားလိုက်သည်။

​"တပည့် အကယ်၍ ငါ မမှားဘူးဆိုရင် ဒီခေါင်းလောင်းကြီးက ယန်ချင်းခရိုင်နဲ့ ယွမ်ယင်းခရိုင်က လူတွေရဲ့ ဝိညာဉ်တွေကို စုပ်ယူထားတာပဲ"

​ရှူကျစ်ဟွာ စကားပြောရင်း မြေပြင်ပေါ်သို့ ဆင်းသက်လိုက်သည်။ ထို့နောက် သူမဟာ လက်ကို ပေါ့ပေါ့ပါးပါး ဝှေ့ယမ်းလိုက်ပြီး ခေါင်းလောင်းကြီးကို ကာကွယ်ထားသည့် အစီအရင် အနည်းငယ်ကို ချိုးဖျက်လိုက်သည်။

​တစ်ချိန်တည်းမှာပင် ရွှေအမြုတေ ရုပ်သေးရုပ်သည်လည်း မြေပြင်ပေါ်သို့ ဆင်းသက်လာပြီး သွေးရောင် ခေါင်းလောင်းကြီးကို တည်ငြိမ်စွာ ကြည့်လိုက်လေသည်။

​ဤသည်မှာ အလွန်အဆင့်မြင့်မားသော ဝိညာဉ်လက်နက်တစ်ခု ဖြစ်သည်။

​ဤအချိန်တွင် ကြီးမားသော သွေးရောင် ခေါင်းလောင်းကြီးပေါ်ရှိ အက်ကြောင်းများထဲမှ ဝါးတားတား ဝိညာဉ်များ အများအပြား ထွက်ပေါ်လာနေသည်ကို ရှင်းလင်းစွာ မြင်တွေ့နေရသည်။

​ထိုဝိညာဉ်များကို ဆွဲထုတ်နေသည့် စွမ်းအား တစ်မျိုးမျိုး ရှိနေသကဲ့သို့ပင်။

​ထို့နောက် ဝိညာဉ်များဟာ အရပ်မျက်နှာ အသီးသီးသို့ ပျံသန်းသွားကြသည်။

​ရှူကျစ်ဟွာနှင့် ရွှေအမြုတေ ရုပ်သေးရုပ်တို့ တစ်ယောက်ကို တစ်ယောက် ကြည့်လိုက်ကြပြီး နှစ်ယောက်သား နောက်တစ်ကြိမ် တိုက်ခိုက်လိုက်ကြသည်။ ဤတစ်ကြိမ်တွင် သူတို့၏ ပစ်မှတ်မှာ ဤထူးဆန်းသော ခေါင်းလောင်းကြီးပင် ဖြစ်ပေသည်။

​"ဘုန်း.."

​နားကွဲလုမတတ် ပေါက်ကွဲသံ တစ်ခု ထွက်ပေါ်လာပြီး  လေလှိုင်းတစ်ခုက ပတ်ဝန်းကျင်ရှိ ကြေမွနေသော ကျောက်တုံးများ အားလုံးကို လွင့်ပါးသွားစေခဲ့သည်။

​ကြီးမားသော သွေးရောင်ခေါင်းလောင်းကြီးသည် ကျယ်လောင်သော အသံဖြင့် ကွဲကြေသွားပြီး မရေမတွက်နိုင်သော ဝိညာဉ်များသည်လည်း ရေလှိုင်းကြီးတစ်ခုကဲ့သို့ ပေါက်ကွဲထွက်လာခဲ့လေသည်။

​ဝိညာဉ် အမြောက်အမြားဟာ ဤအချိန်တွင် ကောင်းကင်ကို ဖုံးကွယ်သွားပြီး နေမင်းကြီးကို ကွယ်လိုက်ရာ ယွမ်ယင်း ခရိုင် တစ်ခုလုံးကို အနည်းငယ် အေးစက်သွားစေခဲ့သည်။

​ထိုဝိညာဉ်များ အားလုံးကို မမြင်နိုင်သော စွမ်းအားတစ်ခုက ဆွဲယူနေပြီး မတူညီသော ဦးတည်ရာများဆီသို့ ပျံသန်းသွားကြသည်။

​သူတို့ ပျံသန်းသွားသော ဦးတည်ရာသည် သဘာဝကျစွာပင် သူတို့၏ ခန္ဓာကိုယ်များ ရှိနေသော ဦးတည်ရာ ဖြစ်သည်။

​သို့သော် လွတ်မြောက်လာပြီး ချက်ချင်း ပျောက်ကွယ်သွားသော ဝိညာဉ် အချို့လည်း ရှိကာ ဤဝိညာဉ်များ၏ ရုပ်ပိုင်းဆိုင်ရာ ခန္ဓာကိုယ်များက သေဆုံးသွားကြပြီ ဖြစ်သည်။

​ဝိညာဉ်များသည်လည်း သူတို့၏ ရုပ်ပိုင်းဆိုင်ရာ ခန္ဓာကိုယ်များ သေဆုံးခြင်းနောက် လိုက်ပါသွားကြပြီး ကောင်းကင်နှင့် မြေကြီးကြားတွင် ပျောက်ကွယ်သွားကြလေသည်။

​အကျပ်အတည်းကို ယာယီ ဖြေရှင်းနိုင်ခဲ့ပေပြီ။

​ထိုအချိန်တွင် ရုတ်တရက် ကြောက်မက်ဖွယ် ကောင်းသော ဝိညာဉ် အာရုံခံစားမှုတစ်ခုက ယွမ်ယင်း ခရိုင် တစ်ခုလုံးကို ဖုံးလွှမ်းသွားခဲ့ပြီး ဤဝိညာဉ် အာရုံခံစားမှုက ရှူကျစ်ဟွာနှင့် ရွှေအမြုတေ ရုပ်သေးရုပ်ကို လေ့လာစောင့်ကြည့်နေသကဲ့သို့ ကွဲကြေနေသော ခေါင်းလောင်းကြီးပေါ်တွင် ခဏတာမျှ ဝဲပျံနေခဲ့သည်။

​ထို့နောက် တစ်စုံတစ်ရာကို ရှာဖွေတွေ့ရှိလိုက်သကဲ့သို့ မြင့်မြတ်သောနှလုံးသားနန်းတော်မှ မိစ္ဆာ ထွက်ပြေးသွားသော ဦးတည်ရာ ဘက်သို့ လိုက်ပါသွားလေသည်။

​နောက်တစ်ခဏတွင် မီတာတစ်သောင်း မြင့်မားသော ကောင်းကင်ယံ၌ အလင်းတန်းတစ်ခု လက်ခနဲ ဖြစ်သွားပြီး ရွှေအမြုတေအဆင့်ကျင့်ကြံမှု ရှိသည့်တိုင် အလင်းတန်း၏ ပျံသန်းရာ လမ်းကြောင်းကို သီသီလေးသာ မြင်နိုင်ခဲ့ပေသည်။

​ဤကြောက်မက်ဖွယ် ဝိညာဉ် အာရုံခံစားမှုကို ခံစားရင်း ရှူကျစ်ဟွာသည် ကြောက်ရွံ့ခြင်း အနည်းငယ်မျှ မရှိခဲ့ပေ။

​ဝိညာဉ် အာရုံခံစားမှုပိုင်ရှင်က မိစ္ဆာကျင့်ကြံသူ တစ်ဦး မဟုတ်ကြောင်း သူမ အာရုံခံစားမိခဲ့သည်။

​"တပည့် ဒါ မင်း ပြောတဲ့ ဝိညာဉ်ဓားဂိုဏ်းက မသေမျိုးကျင့်ကြံသူ မဟုတ်လား။ မူလဝိညာဉ်အဆင့်ကျင့်ကြံသူ တစ်ယောက်ကို ဒီအတိုင်း စေလွှတ်လိုက်တာပဲ... ကြည့်ရတာ ဒီဝိညာဉ်ဓားဂိုဏ်းမှာ အနည်းဆုံး မူလဝိညာဉ် ကျင့်ကြံသူ နှစ်ယောက် သို့မဟုတ် အထက် ရှိပုံရတယ်"

​ရှူကျစ်ဟွာ စိတ်လှုပ်ရှားစွာ သက်ပြင်းချလိုက်၏။

​ရွှေအမြုတေ ရုပ်သေးရုပ်ဟာ စွမ်းအင် အရင်းအမြစ် အနေဖြင့် အလတ်စားဝိညာဉ် ကျောက်တုံးတစ်တုံးကို အစားထိုးလိုက်ပြီး အက်ကွဲနေသော အသံဖြင့် ပြန်ဖြေလိုက်သည်။ "အမှန်ပဲ အဲဒါ ဝိညာဉ်ဓားဂိုဏ်းကပဲ။ ပြီးတော့ ရင်းနှီးနေသလို ဖြစ်နေတဲ့ မူလဝိညာဉ်ကျင့်ကြံသူ တစ်ယောက်ပဲ"

​ရွှေအမြုတေရုပ်သေးရုပ်မှတဆင့် ဝိညာဉ်ဓားဂိုဏ်းမှ မူလဝိညာဉ် ကျင့်ကြံသူသည်... လွန်ခဲ့သည့် ရက်အနည်းငယ်က ရွှေအမြုတေ အဆင့် (၁၀) မိစ္ဆာတစ်ကောင်ကို သတ်ဖြတ်ခဲ့သည့် ဝိညာဉ်ဓားဂိုဏ်း၏ အထွတ်အထိပ် အကြီးအကဲနှင့် တူညီသော လူတစ်ယောက်ဖြစ်ကြောင်း ပိုင်ယီ အာရုံခံစားမိလိုက်သည်။

​ဖြစ်နိုင်သည်မှာ တစ်ဖက်လူက ရွှေအမြုတေ ရုပ်သေးရုပ်ကို မှတ်မိလိုက်သောကြောင့် ယွမ်ယင်း ခရိုင်တွင် မရပ်တန့်ခဲ့ပဲ ထိုအစား ထွက်ပြေးသွားသော မြင့်မြတ်သောနှလုံးသား နန်းတော်မှ မိစ္ဆာကျင့်ကြံသူ နောက်သို့ ချက်ချင်း လိုက်သွားခဲ့ခြင်း ဖြစ်နိုင်ပေသည်။

​"သူ ထွက်ပြေးလို့ မလွတ်နိုင်တော့ဘူး" ရွှေအမြုတေ လူသား ရုပ်သေးရုပ်က ပြောလိုက်သည်။ "အကယ်၍ ငါတို့သာ ဝင်ရောက်မစွက်ဖက်ခဲ့ရင် သူ မူလဝိညာဉ် အဆင့်ကို အောင်မြင်စွာ အဆင့်ချိုးဖျက်နိုင်ပြီး ဒီနေရာကနေ ထွက်ခွာသွားနိုင်လောက်တယ်။ ကံမကောင်းစွာနဲ့... သူ နေရာမှား ရွေးလိုက်တာပဲ"

​ရှူကျစ်ဟွာ ခေါင်းငြိမ့်လိုက်သည်။ "မူလဝိညာဉ် အဆင့်ကျင့်ကြံသူ တစ်ယောက်ရဲ့ လိုက်လံဖမ်းဆီးတာ ခံနေရတာ... သူ ထွက်ပြေးနိုင်ဖို့ ဆိုတာ မဖြစ်နိုင်ပါဘူး"

​...

​တစ်ချိန်တည်းမှာပင်။

​ချန်ချန်ရွှယ်ဟာလည်း ဝေးလံသော မိုးကုတ်စက်ဝိုင်းဆီသို့ ကြည့်ရန် ခေါင်းမော့လိုက်သည်။ ခုနလေးတင် ရင်းနှီးသော အော်ရာတစ်ခုကို ခံစားလိုက်ရသကဲ့သို့ပင်။ "ဒါ ဂိုဏ်းက စီနီယာ တစ်ယောက်ပဲ။ ကြည့်ရတာ ဆက်သွယ်ရေးအဆောင်က ဂိုဏ်းကို ရောက်သွားပုံ ရတယ်"

​"ဒါက ငါ မကြာသေးမီက လက်ခံခဲ့တဲ့... ဂိုဏ်း တာဝန်ကို တနည်းနည်းနဲ့ ပြီးမြောက်သွားတယ်လို့ သတ်မှတ်လို့ ရမလား"

​ချန်ချန်ရွှယ်၏ မျက်နှာထား အနည်းငယ် ထူးဆန်းနေခဲ့သည်။

​ကြည့်ရသည်မှာ... ဒါက တကယ်ပင် ပြီးမြောက်သွားပြီဟု သတ်မှတ်၍ ရပေသည်။

​မြင့်မြတ်သောနှလုံးသား နန်းတော်မှ မိစ္ဆာကျင့်ကြံသူများကို စုံစမ်းစစ်ဆေးရန် ဝိညာဉ်ဓားဂိုဏ်းတွင် တာဝန်တစ်ခုကို သူမ လက်ခံခဲ့ပြီး ဝိညာဉ်ဓားဂိုဏ်းမှ ယာယီ ထွက်ခွာလာခဲ့ခြင်း ဖြစ်သည်။

​ယခု မြင့်မြတ်သောနှလုံးသား နန်းတော်မှ ရွှေအမြုတေ မိစ္ဆာတစ်ကောင် ထွက်လာပြီ ဖြစ်၍ ဆက်လက် စုံစမ်းစစ်ဆေးနေရန် မလိုအပ်တော့ဟု သတ်မှတ်ရပေမည်။

​အမှန်စင်စစ် ချန်ချန်ရွှယ်တွင် လောလောဆယ် ပြန်သွားရန် စိတ်ကူး တစ်စုံတစ်ရာ မရှိသေးပေ။ အဘယ်ကြောင့်ဆိုသော် သူမ ဝိညာဉ်ဓားဂိုဏ်းသို့ ပြန်ရောက်သောအခါ သူမကို အလွန် စိတ်အနှောင့်အယှက် ဖြစ်စေသည့် နှောင့်ယှက်မှုအချို့ကို ခံစားရမည်ဟု သူမ သိသောကြောင့် ဖြစ်သည်။

​ချန်ချန်ရွှယ် ခေါင်းခါလိုက်ပြီး သူမစိတ်ထဲမှ ရှုပ်ထွေးနေသော အတွေးများကို ခါချလိုက်ပြီး ခေါင်းမော့ကာ ကောင်းကင်ပေါ်မှ နေမင်းကြီးကို ကြည့်လိုက်ကာ ကိုယ့်ကိုယ်ကိုယ် ရေရွတ်လိုက်လေသည်။ "နောက်ထပ် နှစ်နာရီလောက် ကြာရင် မသေမျိုးကျင့်ကြံခြင်း သရုပ်ဖော်မှုကို ငါ စတင်နိုင်ပြီ... ဟုတ်တယ်မလား"

​...

​"ဘာလှုပ်ရှားမှုမှ မရှိတော့ဘူးလား"

​အဝေးတစ်နေရာတွင်။

​ပြည်နယ် အရာရှိတစ်ဦးသည် မြင့်မြတ်သောနှလုံးသားနန်းတော်မှ ချီစုစည်းမှု အဆင့် မိစ္ဆာကျင့်ကြံသူ တစ်ဦးကို သတ်ဖြတ်ရန် သွားနေချိန်မှာပဲ အဝေးမှ တိုက်ပွဲ ရပ်တန့်သွားသကဲ့သို့ ဖြစ်နေသည်ကို တွေ့ရှိလိုက်ရသည်။

​ထိုဘက်တွင် ဘာဖြစ်သွားသည်ကို သူ မသိပေ။ "သခင် လီဖေးယုနိုင်သွားတာလား ဒါမှမဟုတ် မြင့်မြတ်သော နှလုံးသား နန်းတော်က အဲဒီ မိစ္ဆာက..."

​သူ တိတ်တဆိတ် တံတွေး မျိုချလိုက်ပြီး ဆက်မပြောရဲတော့ပေ။

​သို့သော် သိပ်မကြာခင်မှာပင် ကောင်းကင်ပေါ်၌ များပြားလှသည့် ဝိညာဉ်များက သူ၏ ရင်ထဲမှ သံသယများကို ဖြေကြားပေးလိုက်လေသည်။

​ဝိညာဉ်တစ်ခုသည် မြေပြင်ပေါ်၌ သတိမေ့နေသော လူငယ်တစ်ယောက်၏ ခန္ဓာကိုယ်ပေါ်သို့ ကျရောက်သွားသည်ကို သူ မျှော်လင့်ချက်မဲ့စွာ ကြည့်နေမိခဲ့သည်။

​ထို့နောက် ဆယ်ကျော်သက် လူငယ်ဟာ တွေဝေစွာဖြင့် နိုးထလာပြီး ပတ်ဝန်းကျင်ကို ဗလာကျင်းသော အကြည့်ဖြင့် ကြည့်လိုက်သည်။

​သူ့ပတ်ဝန်းကျင်က လူတိုင်း ကြမ်းပြင်ပေါ် သတိမေ့လဲကျနေတာ လူငယ် တွေ့လိုက်ရသောအခါ ကြောက်ရွံ့မှုနှင့် ဇဝေဇဝါ ဖြစ်မှုတို့ကြောင့် တောင့်တင်းသွားကာ နားမလည်နိုင်ဖြစ်သွားခဲ့ရပြီး အိမ်မက်မက်နေသည်ဟု ထင်မှတ်လိုက်လေသည်။

​ဒါကို မြင်လိုက်ရသောအခါ ပြည်နယ် အရာရှိ ဝမ်းမြောက်သွားပြီး သက်ပြင်းချလိုက်လေသည်။ သူ၏ ရင်ထဲမှ တုန်လှုပ်မှုကို မဖိနှိပ်နိုင်တော့ဘဲ ရေရွတ်လိုက်၏။ "အခုခေတ် လေလွှင့်ကျင့်ကြံသူတွေက ဒီလောက်တောင် စွမ်းအားကြီးနေကြပြီလား"

​"..."

​...