အခန်း ၁၆ : သူတော်စင်မ၏ တတိယအကြိမ်မြောက် ဘဝ
နောက်တစ်နေ့တွင် လီမျိုးနွယ်စုမှ တိုက်ရိုက် သွေးသားဆက်ခံသူ လီကျင်းဖူ သေဆုံးသွားသော သတင်းဟာ ချင်းဟယ် ခရိုင်အတွင်း ပျံ့နှံ့မသွားခဲ့ပေ။ မည်သူကမျှ ဒီအကြောင်းကို ပြောဆိုခြင်း မရှိသဖြင့် ဘာမှ မဖြစ်ခဲ့သလိုပင်။
လီမျိုးနွယ်စု အနေနဲ့ သတင်းကို ဖုံးဖိထားချင်တာ သိသာပြီး အကြောင်းပြချက် အများအပြား ရှိနိုင်ပေသည်။
ပထမအချက်က ဒါက ဂုဏ်ယူစရာ ကိစ္စ မဟုတ်ပဲ သတင်းပေါက်ကြားသွားရင် လူတွေက သူတို့ကို ဝိုင်းရယ်ကြပေလိမ့်မည်။
ဒုတိယအချက်က နောက်ထပ် (၂) ရက်နေရင် ချန်မျိုးနွယ် သခင်ကြီးရဲ့ မွေးနေ့ ရောက်တော့မည်ဖြစ်ရာ ဒီအချိန်မှာ ပြဿနာကြီးအောင် လုပ်တာ မသင့်တော်ပေ။
တတိယအချက်က သူတို့ ပိုင်ယီအား ကြောက်နေကြတာပင်။
ပိုင်ယီရဲ့ ဓားထိန်းချုပ်ခြင်း ပညာကို ကြည့်ခြင်းအားဖြင့် သူက အနည်းဆုံး ချီစုစည်းမှု အဆင့် (၅) ရှိမယ်လို့ ယူဆရလေသည်။ ဒါ့အပြင် လူသတ်ဖို့ ဓားထိန်းချုပ်နိုင်တယ် ဆိုကတည်းက သက်ဆိုင်ရာ ဓားထိန်းချုပ်ခြင်း ပညာ ကျမ်းစာအုပ် ရှိကို ရှိရပေမည်။
သာမန် လေလွင့်ကျင့်ကြံသူတွေက တန်ဖိုးရှိတဲ့ ဓားထိန်းချုပ်ခြင်း ပညာကို သင်ယူခွင့် ရဖို့ဆိုတာ မဖြစ်နိုင်သလောက်ပိင။
ဘာပဲဖြစ်ဖြစ် ပိုင်ယီ အနေနဲ့လည်း သူ့ကို ဘယ်သူမှ လာမရှုပ်တာကို ကျေနပ်မိပေသည်။
"တစ်မိနစ်ပဲ လိုတော့တယ်..."
ချန်ချန်ရွှယ်ရဲ့ တတိယအကြိမ် မသေမျိုးကျင့်ကြံခြင်း သရုပ်ဖော် ဘဝ အချိန်စောင့်ဆိုင်းရမှု ပြီးဆုံးဖို့ တစ်မိနစ်ပဲ လိုတော့လေသည်။
ဝိညာဉ်ဓားဂိုဏ်း သူတော်စင်မ ဒီနေ့ အဆင်သင့် ဖြစ်ရဲ့လား သူ မသိပေ။
...
ချန်အိမ်တော်...
ချန်ချန်ရွှယ်ဟာ စိတ်ကို ရှင်းလင်းသွားအောင် လေတစ်ချက် ရှူရှိုက်လိုက်၏။
မနေ့ညက သူမ ကောင်းကောင်း အိပ်ချင်ခဲ့ပေမယ့်ဘယ်လိုမှ အိပ်မပျော်ခဲ့ချေ။
ဒီနေ့က သူမအတွက် တတိယအကြိမ် သရုပ်ဖော် စနစ်ထဲ ဝင်ရောက်ခွင့် ရမယ့်နေ့မှန်း သူမ သိနေခဲ့သည်။
အထူးသဖြင့် သူမကို အလစ်ဝင်တိုက်ခိုက်ခဲ့တဲ့ သောက်ကျိုးနည်း မိစ္ဆာသားရဲကို တွေးမိတိုင်း သူမ ဒေါသထွက်နေခဲ့ရလေသည်။
သူမဟာ ဒေါသထွက်လွန်းလို့ အိပ်မပျော်နိုင် ဖြစ်ခဲ့ရတာပင်။
အကယ်၍ သူမသာ နည်းနည်း ပိုသတိထားခဲ့မယ် ဆိုရင် ဒါမှမဟုတ် အဲဒီနေရာမှာ မကျင့်ကြံဘဲ ပိုလုံခြုံတဲ့ နေရာတစ်ခုကို သွားခဲ့မယ် ဆိုရင် အဲဒီ မိစ္ဆာသားရဲရဲ့ အလစ်တိုက်ခိုက်တာကို ခံရမှာ မဟုတ်ပေ။
ဖြစ်နိုင်တာက ဒုတိယအကြိမ် သရုပ်ဖော် ဘဝမှာတင် သူမဟာ ချီစုစည်းမှု အဆင့် (၂)၊ (၃)၊ (၄) လောက်အထိ ရောက်နိုင်ခဲ့မှာဖြစ်ပြီး အခြေတည်အဆင့်ကိုတောင် ရောက်နိုင်လောက်ပေသည်။
ဝမ်းနည်းစရာ ကောင်းတာက... ဒီမျှော်လင့်ချက်တွေ အားလုံးကို အဲဒီ သောက်ကျိုးနည်း မိစ္ဆာသားရဲက ဖျက်ဆီးပစ်လိုက်တာပင်။
တစ်မိနစ်စာ အချိန်စောင့်ဆိုင်းရမှု ကုန်ဆုံးသွားသည့်အခါ ရင်းနှီးနေတဲ့ သတိပေးချက်တစ်ခုဟာ ချန်ချန်ရွှယ်ရဲ့ စိတ်ထဲမှာ ပေါ်လာခဲ့ပြီး တတိယအကြိမ်မြောက် သရုပ်ဖော် စနစ်ထဲ ဝင်ရောက်နိုင်ပြီ ဖြစ်ကြောင်း အသိပေးလာခဲ့သည်။
[မသေမျိုးကျင့်ကြံခြင်း သရုပ်ဖော် စနစ်မှ ကြိုဆိုပါသည်။ တတိယအကြိမ် မသေမျိုးကျင့်ကြံခြင်း သရုပ်ဖော်မှုအား အသက်သွင်းမည်မှာ သေချာပါသလား]
"သေချာတယ်"
တွန့်ဆုတ်နေစရာ ဘာမှ မရှိပပေ။ ချန်ချန်ရွှယ်ဟာ မသေမျိုးကျင့်ကြံခြင်း သရုပ်ဖော် စနစ်ကို အတွေ့အကြုံနဲ့ အကျိုးအမြတ်တွေ ရယူနိုင်တဲ့ လျှို့ဝှက်နယ်မြေတစ်ခုလို သဘောထားလိုက်ပေပြီ။
ထို့နောက် သရုပ်ဖော် စနစ်က သူမကို ရွေးချယ်စရာ နှစ်ခု ထပ်ပေးခဲ့သည်။
ပထမ ရွေးချယ်စရာက ပထမအကြိမ်နှင့် ဒုတိယအကြိမ် သရုပ်ဖော် ဘဝများမှ ပါရမီများကို ဆက်လက် ရယူပြီး မူလ မိသားစုမှာပဲ ပြန်လည် မွေးဖွားခြင်းပင်။ သို့သော် ပါရမီ အသစ်ကို အသက် (၂၀) ပြည့်မှသာ ပြန်လည် ရရှိနိုင်လေသည်။
ဒုတိယ ရွေးချယ်စရာက အားလုံး အစကနေ ပြန်စခြင်းပင်။
ဒီအဆင့်ရောက်တော့ ချန်ချန်ရွှယ်ဟာ စက္ကန့်အနည်းငယ် တွန့်ဆုတ်နေမိပေမယ့် ပထမ ရွေးချယ်စရာကိုပဲ ရွေးချယ်ခဲ့လိုက်သည်။
"တူညီတဲ့ ပါရမီနဲ့ ဂုဏ်သတ္တိတွေပဲ"
ရင်းနှီးနေတဲ့ သတိပေးချက် စာသားကို ကြည့်ပြီး ချန်ချန်ရွှယ် မအံ့သြတော့ပေ။
သူမ ရင်းနှီးနေသလို ကျင့်သားလဲ ရနေပေပြီ။
[ရေတွက်ခြင်း - ၁၀၊ ၉...]
ရေတွက်ခြင်း သုည ရောက်သွားသည့်အခါ ချန်ချန်ရွှယ်ရဲ့ အသိစိတ်ဟာ ရပ်တန့်သွားသလို ခံစားချက်ကို နောက်တစ်ကြိမ် ခံစားလိုက်ရ၏။ ဒီအခိုက်အတန့်မှာ အချိန်ဟာ ရပ်တန့်သွားသလို ဖြစ်ပြီး သူမဟာ ဘာကိုမှ မခံစားရတော့ပေ။
ပြင်ပလောကကို ပြန်လည် အာရုံခံမိတဲ့အခါမှာတော့ ရေနစ်နေသူ တစ်ယောက်လို မွန်းကြပ်တဲ့ ခံစားမှုမျိုး ထပ်ရခဲ့ပြန်သည်။
သူမ မွေးဖွားလာပြီမှန်း ချန်ချန်ရွှယ် သိလိုက်လေသည်။
(၃) ရက်အတွင်းမှာ သူမ အမေဗိုက်ထဲကနေ (၃) ကြိမ်တောင် မွေးဖွားလာခဲ့ပေပြီ။
ထို့ကြောင့် သူမညာ ဒီလုပ်ငန်းစဉ်ကို ရင်းနှီးကျွမ်းဝင်နေခဲ့လေသည်။
[အသက် ၀ နှစ် - သင်ဟာ မသေမျိုးကျင့်ကြံခြင်း ကမ္ဘာတစ်ခုသို့ ဝင်စားခဲ့ပြီး ဆင်းရဲသော မိသားစုတစ်ခုတွင် မွေးဖွားခဲ့ပါသည်။ သင့်မိခင်က သင့်အား ဘိုးဘေးပိုင် ကျောက်စိမ်းဆွဲပြားကို ပေးခဲ့သည်။ သင့် ကံတရားက တိုးတက်လာခဲ့သည်။]
[သင်သည် ဓားကျင့်စဉ် (မပြည့်စုံ) ကို ကျင့်ကြံရန် ကြိုးစားခဲ့သည်။ အကျိုးသက်ရောက်မှု ရှိပုံရလေသည်။]
[သင်ဟာ ဝိညာဉ်စွမ်းအင် တစ်မျှင်ကို အောင်မြင်စွာ သန့်စင်နိုင်ခဲ့ပြီး မသေမျိုးကျင့်ကြံသူ တစ်ယောက်၏ ချီကြောများနှင့် ဒန်ထျန်းကို ဖွင့်လှစ်နိုင်ခဲ့ပါသည်။]
[အသက် ၁ နှစ် - သင်ဟာ ကျင့်ကြံခြင်း၌ ကြိုးစားနေဆဲ ဖြစ်သော်လည်း မည်သူမှ သတိမထားမိအောင် နေထိုင်ခဲ့သည်။]
[ဝံပုလွေငတ် တစ်ကောင် ဒုက္ခပေးရန် တောင်အောက် ဆင်းလာသော်လည်း သင်က တစ်ချက်တည်းနှင့် သတ်ဖြတ်လိုက်ပါသည်။ ထို့ကြောင့် ရွာသားများက အံ့သြတုန်လှုပ်သွားခဲ့ကြသည်။]
[အသက် ၂ နှစ် - သင်ဟာ ပြင်းထန်စွာ ကျင့်ကြံနေဆဲ ဖြစ်သည်။]
[အသက် ၃ နှစ် - သင်ဟာ ဓားရှည်တစ်ချောင်း ဝယ်ပေးရန် ဖခင်ဖြစ်သူကို တောင်းဆိုခဲ့သည်။ ဖခင်ဖြစ်သူဟာ ကျန်ရှိနေသော ငွေကြေးပမာဏကို တွေးပြီး အံကြိတ်ကာ သဘောတူခဲ့သည်။]
[သင်သည် ဓားရှည်ကို စတင် သန့်စင်ပြီး ဓားထိန်းချုပ်ခြင်း ပညာကို လေ့ကျင့်ခဲ့သည်။]
[သင့် ချီကြောများ အနည်းငယ် ဖောင်းကားလာသည်ကို ခံစားလိုက်ရသည်။ အဆင့်တက်ရန် အခွင့်အလမ်း ရောက်လာသလို ဖြစ်သော်လည်း သင် ဖိနှိပ်ထားလိုက်သည်။]
[အသက် ၄ နှစ် - သင်ဟာ ပြင်းထန်စွာ လေ့ကျင့်နေသည်။]
[အဆင့်တက်ရန် အခွင့်အလမ်း ရောက်လာပြီဟု သင် ခံစားလိုက်ရသည်။ ဒီတစ်ခါ သင် မထိန်းချုပ်ထားတော့ဘဲ ချီစုစည်းမှု အဆင့် (၁) သို့ အရှိန်အဟုန်ဖြင့် ဝင်ရောက်လိုက်သည်]
[သင်သည် ချီစုစည်းမှု အဆင့် (၁) သို့ အောင်မြင်စွာ တက်လှမ်းနိုင်ခဲ့ပြီ]
[သင်ဟာ ချီစုစည်းမှု အဆင့် (၁) မသေမျိုးကျင့်ကြံသူ တစ်ဦး ဖြစ်သွားပါပြီ]
[အသက် ၅ နှစ် - သင်ဟာ လေ့ကျင့်ရန် တောင်ပေါ်သို့ တက်ရောက်ခဲ့သည်။ တောင်ပေါ်တွင် သင့်ကို ယှဉ်နိုင်သော သားရဲကောင် မရှိပေ။ သင်ဟာ အရောင်စုံ ကျားကြီးကို အလွယ်တကူ သတ်ဖြတ်လိုက်သည်။ ၎င်း၏ ဗိုက်ထဲမှ သစ်သားသေတ္တာကို ထုတ်ယူပြီး ကျောက်စိမ်းပြားကို ဖျက်ဆီးပစ်လိုက်သည်။]
[...]
မြေကြီးပေါ်က ကျောက်စိမ်းပြား အပိုင်းအစတွေကို ကြည့်ပြီး ချန်ချန်ရွှယ်ရဲ့ အတွေးတွေ သိပ်မပြောင်းလဲခဲ့ပေ။ သူမ ဒီကျောက်စိမ်းပြားကို ဖျက်ဆီးပစ်ရတာ အကြောင်းအရင်း ရှိပေသည်။ ၎င်းက သူမ တစ်ကိုယ်ကောင်းဆန်လို့ မဟုတ်ချေ။ ထို့အပြင် ဒါက မသေမျိုးကျင့်ကြံခြင်း သရုပ်ဖော် ကမ္ဘာ ဖြစ်တဲ့အတွက် သူမဟာ တစ်ကိုယ်ကောင်းဆန်စရာ အကြောင်း မရှိပေ။
အကြောင်းမှာ ကျောက်စိမ်းပြား ရှိနေခြင်းက မသေမျိုးကျင့်ကြံသူတွေ အတွက် တွန်းလှန်မရနိုင်တဲ့ သွေးဆောင်မှု တစ်ခု ဖြစ်လေသည်။ တကယ်လို့များ ပေါက်ကြားသွားခဲ့ပါက မရေမတွက်နိုင်သည့် မသေမျိုးကျင့်ကြံသူတွေ ရောက်လာကြပေမည်။
ဒီကျောက်စိမ်းပြားကို ရဖို့အတွက် အဲဒီ မသေမျိုးကျင့်ကြံသူတွေ ဘယ်လောက်တောင် သွေးချောင်းစီးအောင် လုပ်ကြမလဲ ဘယ်သူသိနိုင်မည်နည်ူ။
အဲဒီအချိန်ကျရင် ဒီကမ္ဘာက သူမရဲ့ မိဘတွေပါ ရောပါသွားနိုင်ရာ ဒါက ချန်ချန်ရွှယ် မဖြစ်စေချင်တဲ့ ကိစ္စပင်။ သူမဟာ ဒါမျိုး အဖြစ်မခံနိုင်ပေ။
သူမဟာ (၄) နှစ်ပဲ ရှိသေးပေမယ့် ကြွေရုပ်လေး တစ်ရုပ်လို လှပနေလေသည်။ သူမလို ကလေးမလေးက ယခုအချိန်၌ လူကြီးတစ်ယောက်လို မျက်နှာထားမျိုး ရှိနေခဲ့သည်။ ဒါ့အပြင် သူမရှေ့မှာ အရောင်စုံ ကျားသေကောင်ကြီး တစ်ကောင် ရှိနေလေသည်။
ဒီလိုမြင်ကွင်းက တကယ့်ကို သဟဇာတ မဖြစ်လှပေ။
"ဒီဘဝမှာတော့ အနည်းဆုံး အခြေတည်အဆင့်ကို ရောက်အောင် ကျင့်ကြံရမယ်။ အမှားဟောင်းတွေကို ထပ်ကျူးလွန်လို့ မဖြစ်ဘူး" ချန်ချန်ရွှယ် ရေရွတ်လိုက်၏။
ရုတ်တရက် သူမ တစ်ခုခု တွေးမိသွားခဲ့သည်။
"ငါက ဓားကျင့်စဉ် (မပြည့်စုံ) ကို ရှာတွေ့ဖို့အတွက် ဉာဏ်အလင်းပွင့်သော ဆရာသခင်၏ လက်ဆောင် ဆိုတဲ့ ပါရမီကို သုံးစရာ မလိုတော့ဘူး.... ဆိုလိုတာက ဒီမွေးရာပါ ပါရမီက အသုံးမဝင်တော့ဘူး ဆိုတဲ့ သဘောလား ဒါမှမဟုတ် အနာဂတ်မှာ တခြား အသုံးဝင်တာမျိုး ရှိလာဦးမလား..."
ချန်ချန်ရွှယ် ဒါကို တွေးမိကာ မျက်မှောင်ကြုတ်လိုက်လေသည်။
[အသက် ၆ နှစ် - ရွာထဲက ဝိညာဉ်စွမ်းအင်က သိပ်ပါးလွှာတယ်လို့ သင် ထင်ပေမယ့် ဘေးကင်းအောင် ဝိညာဉ်စွမ်းအင် ကြွယ်ဝတဲ့ နေရာကို အလျင်စလို မရှာဖွေတော့ပေ။ ထိုအစား ရွာထဲမှာပဲ ဆက်နေပြီး ကျင့်ကြံခြင်းကို အာရုံစိုက်လိုက်သည်။]
[အသက် ၇ နှစ် - သင့်ဖခင်က စီးပွားရေး အသေးစားလေး တစ်ခု လုပ်ရင်း ချမ်းသာလာသော်လည်း တောင်ပေါ် ဓားပြများ၏ အာရုံစိုက်ခြင်းကို ခံလိုက်ရသည်။ သင့်မိသားစု ပိုင်ဆိုင်သော ကုန်ပစ္စည်းများ အလုခံရပြီး သင့်ဖခင် ပြင်းထန်စွာ ဒဏ်ရာရခဲ့သည်။]
[ပြင်းထန်သော သတ်ဖြတ်လိုစိတ်ဖြင့် သင်ဟာ ဓားပြစခန်းသို့ သွားရောက်ပြီး ဓားပြ ဒါဇင်ပေါင်းများစွာကို တစ်ယောက်တည်း သတ်ဖြတ်ခဲ့ရာ နီးစပ်ရာ ဒေသအနှံ့ တုန်လှုပ်သွားစေခဲ့သည်]
[အသက် ၈ နှစ် - သင်သည် ကျင့်ကြံခြင်းကို အာရုံစိုက်နေဆဲ ဖြစ်သည်။]
[အသက် ၉ နှစ် - သင့် ချီကြောများ အနည်းငယ် ဖောင်းကားလာသည်ကို သတိပြုမိလိုက်သည်။ ချီစုစည်းမှု အဆင့် (၂) သို့ တက်လှမ်းရန် အခွင့်အလမ်း ရောက်လာပေပြီ။ ဒါက သင့်ကို အလွန် ပျော်ရွှင်စေခဲ့လေသည်။ ယခင် သရုပ်ဖော် ဘဝက စံချိန်ကို ချိုးဖျက်ဖို့ အခွင့်အရေး ရပေပြီ။ သို့သော် သင့် လက်ရှိ ခံနိုင်ရည်နှင့် ဆိုလျှင် အဆင့်တက်ရန် အလျင်မလိုပေ။]
[သင် ကျင့်ကြံခြင်းကို အာရုံစိုက်နေခဲ့သည်။]
[သင့်အကြောင်းများကို မသေမျိုးကျင့်ကြံခြင်း ဂိုဏ်းတစ်ခုက ကြားသိသွားခဲ့သည်။ ထို့ကြောင့် သင့်အား စည်းရုံးသိမ်းသွင်းရန် တောင်အောက်သို့ လူလွှတ်လိုက်သည်။]