အခန်း ၁၅၇ : ရွှေအမြုတေအဆင့် မိစ္ဆာကျင့်ကြံသူ
ဒါမှမဟုတ် ဒီထူးခြားဆန်းကြယ်ပြီး မူမမှန်တဲ့ ဝိညာဉ်လက်နက်ကို အသက်သွင်းဖို့ အထူးနည်းလမ်း တချို့လည်း အသုံးပြုနိုင်တယ်....ဒါပေမဲ့ ဒီလိုနည်းလမ်းမျိုးကို ဘယ်လို လူမျိုးက အသုံးပြုနိုင်မှာလဲ...'
'မြင့်မြတ်သောနှလုံးသား နန်းတော်...'
ဒီစကားလုံး (၃) လုံးက ဘယ်ကနေမှန်း မသိ သူမစိတ်ထဲ ရောက်လာခဲ့သည်။
နောက်ဆုံးတော့ ချန်ချန်ရွှယ်ဟာ သူမရဲ့ မူဝါဒကို လိုက်နာလိုက်သည်။ ထို့အပြင် သူမ တစ်ယောက်တည်းရဲ့ ခွန်အားနဲ့ တစ်ဖက်လူရဲ့ အစီအစဉ်ကို ဘယ်လိုလုပ် နှောင့်ယှက်နိုင်မည်နည်း။
သူတို့ကို မဆင်မခြင်ဝင်တိုက်ခိုက်တာက သူမ အသက်ကို အလဟဿ စွန့်ပစ်လိုက်တာနဲ့ အတူတူပင်။
"အခု လုပ်သင့်တဲ့ အသင့်တော်ဆုံးအလုပ်က ဒီနေရာကနေ ထွက်ခွာသွားဖို့ပဲ... ဒီအဆင့် အန္တရာယ်က ငါ ပါဝင်ပတ်သက်နိုင်တဲ့ အရာ မဟုတ်ဘူး" ချန်ချန်ရွှယ် ရေရွတ်လိုက်ပြီး ခဏတာမျှ တွန့်ဆုတ်နေခဲ့သည်။ ထို့နောက် သူမဟာ ဆက်သွယ်ရေးအဆောင်တစ်ခုကို ထုတ်ယူလိုက်သည်။
"ဒါက ငါ မင်းတို့ကို ကူညီပေးနိုင်တဲ့ တစ်ခုတည်းသော အရာပဲ" ဝိညာဉ်စွမ်းအား အမြောက်အမြား ဆက်သွယ်ရေးအဆောင်ထဲသို့ စီးဝင်သွားပြီး ချန်ချန်ရွှယ်ဟာ ယခုဖြစ်ပျက်နေသည့် သတင်းအချက်အလက်တို့ကို အဲဒီအထဲ ထွင်းထုလိုက်သည်။
ထို့နောက် စိတ်အလို တစ်ခုဖြင့် ဆက်သွယ်ရေးအဆောင်က ဘယ်သူမှ အမီမလိုက်နိုင်လောက်အောင်မြန်ဆန်သည့် အရှိန်အဟုန်ဖြင့် ပျံသန်းထွက်ခွာသွားခဲ့သည်။
ဒီနေရာမှာ ဘာတွေ ဖြစ်ပျက်နေတယ် ဆိုတာကို သူမရဲ့ ဆရာသခင် ဝိညာဉ်ဓားဂိုဏ်းကို ပြောပြလိုက်တာပင်။
ဝိညာဉ်ဓားဂိုဏ်းက လမ်းမှန်ဂိုဏ်းတစ်ခုဖြစ်ရာ အကယ်၍ သူတို့ ဒီလိုကိစ္စမျိုး ကြုံတွေ့ရရင် အထူးသဖြင့် ဝိညာဉ်ဓားဂိုဏ်းနဲ့ သိပ်မဝေးတဲ့ နေရာမှာ ဖြစ်ပျက်နေတာ ဆိုရင် သူတို့ ဒီကိစ္စကို သေချာပေါက် ကိုင်တွယ်ဖြေရှင်းပေလိမ့်မည်။
အကယ်၍ ဝိညာဉ်ဓားဂိုဏ်းက ဒီလိုကိစ္စမျိုးကို လစ်လျူရှုလိုက်ရင် သူတို့က တခြားသော လမ်းမှန်ဂိုဏ်းတွေရဲ့ လှောင်ပြောင်တာ ခံရလောက်ပေသည်။
......
...
တစ်ချိန်တည်းမှာပင်။
ယွမ်ယင်းခရိုင်နှင့် မိုင် (၁၀) ခန့် ကွာဝေးသည့် ဝေဟင်ထက်တွင် ဖူရွှမ်နီဟာ ယွမ်ယင်းခရိုင်ဆီသို့ သူမ၏ ဓားကို စီးပြီး ပျံသန်းလာရင်း သူမ မျက်စိရှေ့တွင် အလင်းတန်း တစ်ခု ဖြတ်သန်းသွားသည်ကို မြင်လိုက်ရသကဲ့သို့ ဖြစ်နေခဲ့သည်။
'ဒါက..ဆက်သွယ်ရေးအဆောင်တစ်ခုလား...'
ဖူရွှမ်နီ ဆက်သွယ်ရေးအဆောင်ကို တစ်ချက်တည်းနှင့် မှတ်မိလိုက်သည်။အဘယ်ကြောင့်ဆိုသော် သူမ ပြီးခဲ့တဲ့ တစ်ခေါက် မသေမျိုးကျင့်ကြံခြင်း သရုပ်ဖော် စနစ်ထဲ ဝင်ရောက်တုန်းက နေမင်းဂိုဏ်းမှ သင်းထောက်တစ်ယောက်က ဆက်သွယ်ရေးအဆောင်တစ်ခုကို အသုံးပြုခဲ့လို့ပင်။
အဲဒါကြောင့်ပဲ ဆက်တိုက်ဖြစ်ရပ်တွေ ဖြစ်ပေါ်ခဲ့ပြီး သူမကို နေမင်းဂိုဏ်းက လိုက်လံဖမ်းဆီးတာ ခံခဲ့ရလေသည်။
အခု ဆက်သွယ်ရေးအဆောင်ကို နောက်တစ်ကြိမ် မြင်ရတော့ ဖူရွှမ်နီရဲ့ ပထမဆုံး တုံ့ပြန်မှုက အဲဒါကို ပစ်ချလိုက်ဖို့ပင်။
ကံကောင်းစွာနဲ့ ဆက်သွယ်ရေးအဆောင်က မြန်လွန်းရာ သူမ ဒီလို တွေးလိုက်မိတဲ့ အချိန်မှာပဲ ဆက်သွယ်ရေးအဆောင်က ခြေရာလက်ရာ မကျန် ပျောက်ကွယ်သွားတာ ကြာခဲ့ပေပြီ။
ဖူရွှမ်နီ ဖြည်းညှင်းစွာ မျက်မှောင်မကြုတ်ဘဲ မနေနိုင်တော့ပေ။
'ဘယ်သူ့ရဲ့ ဆက်သွယ်ရေးအဆောင်လဲ... ဦးတည်ရာ လမ်းကြောင်းကို ကြည့်ရတာ ယွမ်ယင်းခရိုင်ထဲကနေ ပျံထွက်လာပုံ ရတယ် ဖြစ်နိုင်တာက...'
ဖူရွှမ်နီ သူမစိတ်ထဲ ရေရွတ်နေရင်း ရုတ်တရက် ထိတ်လန့်သွားခဲ့သည်။ 'ယွမ်ယင်းခရိုင်ဆီက အရေးပေါ် အကူအညီ တောင်းခံတဲ့ သတင်းစကားများလား'
သူတို့ဟာ တချို့ ယွမ်ယင်းခရိုင်ဆီ အပြေးသွားရတဲ့ အကြောင်းရင်းက ယွမ်ယင်းခရိုင်လည်း ယန်ချင်း ခရိုင်လို အခြေအနေမျိုးနဲ့ အဆုံးသတ်သွားမှာ စိုးရိမ်လို့ပင်။
သူတို့က ချင်းဟယ်ခရိုင်အတွက် အစားထိုး ဖြစ်သွားပေလိမ့်မည်။
လမ်းတစ်လျှောက်လုံးမှာ သူမရဲ့ ယခင် ခန့်မှန်းချက်တွေ အားလုံး မှားယွင်းပါစေလို့ ဖူရွှမ်နီ မျှော်လင့်နေမိခဲ့သည်။ ဒီလိုကြောက်မက်ဖွယ် ကောင်းတဲ့ ကိစ္စမျိုး နောက်တစ်ကြိမ် ဖြစ်ပျက်တာကို မြင်ရမယ့် အစား သူမ အလဟဿ လာရတာကိုပဲ ပိုလိုလားမိလေသည်။
ဒါပေမဲ့ ကိစ္စရပ်တွေက သူမ ဆန္ဒရှိသလို ဖြစ်မလာခဲ့ချေ။
အဲဒီ ဆက်သွယ်ရေးအဆောင်ကို မြင်လိုက်ရတော့ ဖူရွှမ်နီ ဆိုးရွားတဲ့ ကြိုတင်နိမိတ် တစ်ခု ခံစားလိုက်ရသည်။
'ယွမ်ယင်းခရိုင်... တစ်စုံတစ်ရာ ဖြစ်ပျက်နေလောက်ပြီ...'
'သေစမ်း..'
ဒီ မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေ ဘာလို့ ဒီလောက် မြန်မြန် လှုပ်ရှားနေကြတာလဲ...သူတို့က လူတွေကို တုံ့ပြန်ဖို့ အချိန်အလုံအလောက် မပေးကြဘူး...
"စီနီယာလီ၊ စီနီယာရှူ " ဖူရွှမ်နီ ချက်ချင်း ပြောလိုက်သည်။"ယွမ်ယင်းခရိုင်က မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေရဲ့ တိုက်ခိုက်တာ ခံနေရလောက်တယ်... သူတို့ ခရိုင်ထဲက လူတိုင်းရဲ့ ဝိညာဉ်တွေကို စုပ်ယူနေတာ ဖြစ်နိုင်တယ်"
ရွှေအမြုတေရုပ်သေးရုပ် အနည်းငယ် ခေါင်းငြိမ့်လိုက်ပြီး ဖူရွှမ်နီနဲ့ တခြားလူတွေကို ချန်ထားခဲ့လိုက်သည်။ ထို့နောက် ပိုမြန်ဆန်တဲ့ အရှိန်အဟုန်နဲ့ သူဟာ အလင်းတန်းတစ်ခု အဖြစ် ပြောင်းလဲသွားပြီး မျက်တောင်တစ်ခတ် အတွင်း ပျံသန်းထွက်ခွာသွားခဲ့သည်။
ရှူကျစ်ဟွာကလည်း နောက်ကနေ ကပ်လိုက်သွားခဲ့လေသည်။
ဖူရွှမ်နီနဲ့ တခြား အခြေတည်အဆင့် ကျင့်ကြံသူတွေ အတွက် ဆိုရင်တော့ အံ့ကြိတ်ကာ နောက်က လိုက်ဖို့ ဓားကို စီးနင်းရုံသာ တတ်နိုင်ကြပေသည်။
ကံမကောင်းစွာနဲ့ သူတို့ ဓားစီးတဲ့ အရှိန်အဟုန်က ရွှေအမြုတေ အဆင့် ကျင့်ကြံသူ တစ်ယောက်ရဲ့ အရှိန်အဟုန် (၁၀) ပုံ (၁) ပုံကိုတောင် မယှဉ်နိုင်ပေ။..
...
"ဟင်" ရှူကျစ်ဟွာနဲ့ ပိုင်ယီ ထိန်းချုပ်ထားတဲ့ ရွှေအမြုတေ ရုပ်သေးရုပ် မကြာမီ ယွမ်ယင်းခရိုင် အထက် ဝေဟင်ဆီ ရောက်ရှိလာကြသည်။ ရှူကျစ်ဟွာ အောက်ဘက်က မြင်ကွင်းကို ငုံ့ကြည့်လိုက်တဲ့ အခါ သူမရဲ့ လေသံမှာ အံ့သြမှု အနည်းငယ် ပါဝင်နေခဲ့သည်။ "ငါတို့ ခြေတစ်လှမ်း နောက်ကျနေဦးမယ်လို့ မျှော်လင့်မထားခဲ့ဘူး"
သူမ တစ်ယောက်ပြီး တစ်ယောက် သတိမေ့လဲကျနေတဲ့ လူတွေကို ကြည့်လိုက်ပြီး သူမ ဘာတွေးနေလဲ ဆိုတာ ဘယ်သူမှ မသိနိုင်ကြပေ။
သူမ မျက်နှာပေါ်က အမူအရာက အနည်းငယ် ပုံမှန် မဟုတ်သလို ဖြစ်နေပြီး သူမ ကိုယ့်ကိုယ်ကိုယ် အနည်းငယ် ထိန်းချုပ်လိုက်သည်။
သူမရဲ့ လေသံကလည်း ပုံမှန်ထက် အနည်းငယ် နိမ့်ကျနေခဲ့သည်။ "တပည့် မင်း အဲဒီ ထူးဆန်းတဲ့ အသံကို သတိထားမိလား"
သူမ ဒီစကားကို သဘာဝကျစွာ ရွှေအမြုတေ ရုပ်သေးရုပ်ကို ပြောလိုက်ခြင်းပင်။
ရွှေအမြုတေရုပ်သေးရုပ်ရဲ့ နိမ့်ကျပြီး အက်ကွဲနေတဲ့အသံက ဖြည်းညှင်းစွာ ထွက်ပေါ်လာခဲ့သည်။ "ငါ ကြားတယ်... အသံထဲမှာ ထူးဆန်းတဲ့ ဝိညာဉ်စွမ်းအင် အတက်အကျ တစ်ခု ရှိနေတယ်... အသံရဲ့ မူလဇာစ်မြစ်က ယွမ်ယင်းခရိုင်ရဲ့ အလယ်ဗဟို ဖြစ်ပုံရတယ်"
သူတို့ နှစ်ယောက် တပြိုင်နက်တည်း ကြားလိုက်ရတဲ့ အသံက သဘာဝကျစွာ ထူးဆန်းတဲ့ ခေါင်းလောင်းသံပင်။
ဒါ့အပြင် ရှူကျစ်ဟွာက တခြားအရာ တစ်ခုကိုလည်း တွေ့ရှိလိုက်ရသည်။ "ယန်ချင်းခရိုင်လိုပဲ အစီအရင်တစ်ခုရဲ့ ခြေရာတွေ ရှိနေတယ်... ဒါက ကြီးမားတဲ့ အစီအရင် တစ်ခုပဲ.... သူ့ရဲ့ တိကျတဲ့ လုပ်ဆောင်ချက်က ဒီထူးဆန်းတဲ့ အသံကို ယွမ်ယင်း ခရိုင် တစ်ခုလုံး ပျံ့နှံ့သွားစေဖို့ ဖြစ်လောက်တယ်"
အကယ်၍ ဒါက ခရိုင်တစ်ခုလုံး ပျံ့နှံ့သွားတဲ့ သာမန် အသံတစ်ခုသာ ဆိုရင် ဒီလောက် ဒုက္ခခံနေစရာ မလိုပေ။
ဒါပေမဲ့ ဒီလိုထူးဆန်းတဲ့ ခေါင်းလောင်းသံမျိုးက သေချာပေါက် ဝေးဝေး ပျံ့နှံ့နိုင်မှာ မဟုတ်ပဲ အထူးနည်းလမ်း တချို့ရဲ့ အကူအညီ လိုအပ်ပေသည်။
ယွမ်ယင်း ခရိုင် တစ်ခုလုံးကို ဖုံးလွှမ်းထားတဲ့ အစီအရင်က ဒီလို အကျိုးသက်ရောက်မှု ရှိဖို့ ဖြစ်နိုင်ချေ များလေသည်။
ရုတ်တရက် ရွှေအမြုတေအဆင့် ရုပ်သေးရုပ်ပဲ ဖြစ်ဖြစ် ရှူကျစ်ဟွာပဲ ဖြစ်ဖြစ် သူတို့ တစ်စုံတစ်ရာကို နောက်တစ်ကြိမ် တွေ့ရှိလိုက်သလိုပင်။ သူတို့၏ မျက်နှာအမူရာတွေက လေးနက်သွားပြီး သူတို့ မျက်လုံးတွေထဲမှာ ကြီးမားသည့် ရန်သူ တစ်ယောက်အပေါ် ထားရှိတဲ့ သတိထားမှုတွေနဲ့ ပြည့်နှက်သွားခဲ့သည်။
"မိစ္ဆာကျင့်ကြံသူ"
ရှူကျစ်ဟွာ ဝိုင်ဘူးသီးခြောက်ကို သူမ သိုလှောင်အိတ်ထဲ ပြန်ထည့်လိုက်သည်။
ထို့အပြင် သူမ မျက်လုံးတွေထဲက မူးနေတဲ့ အကြည့်တွေ လုံးဝ ပျောက်ကွယ်သွားပြီး ထိုအစား ယခင်က မကြုံဖူးလောက်အောင် ကြည်လင်ပြတ်သားမှုတို့ အစားထိုးဝင်ရောက်လာခဲ့လေသည်။
သူမ လေးနက်တဲ့ အသံနဲ့ ပြောလိုက်သည်။ "ဒီလောက် ဝေးကွာတဲ့ နေရာကနေတောင် ငါ သူ့အော်ရာကို ခံစားလို့ ရနေတုန်းပဲ... ပျို့ချင်စရာ ကောင်းတဲ့ အော်ရာတစ်မျိုးပဲ... ကြည့်ရတာ ငါ့ခန့်မှန်းချက် မှန်ကန်ပုံ ရတယ်..... အဲဒါက ရွှေအမြုတေ အဆင့် မိစ္ဆာတစ်ကောင်ပဲ.....တစ်ဖက်လူ ဒီလောက်များတဲ့ လူတွေရဲ့ ဝိညာဉ်တွေကို စုပ်ယူဖို့ ဖြစ်နိုင်ချေ နှစ်ခုပဲ ရှိတယ်"
"သူကမိစ္ဆာလက်နက်တစ်ခုခုသန့်စင်ချင်တာဒါမှမဟုတ်သူကရွှေအမြုတေအဆင့် (၁၀) ကနေမူလဝိညာဉ်အဆင့်ကိုအဆင့်ချိုးဖျက်ချင်တာဖြစ်နိုင်တယ်"