အခန်း ၁၅၅ : မြင့်မြတ်သောနှလုံးသားနန်းတော်မှ လှုပ်ရှားမှု၊ မူလဝိညာဥ်အဆင့်သို့ တက်ရောက်ရန် စတေးခံရမည့် ယဇ်ကောင်များ
"သူတို့ရဲ့ ဝိညာဉ်သုံးပါးနှင့် ဝိညာဉ်ခုနစ်ပါးထဲက တစ်ပါးကို ထူးခြားတဲ့ လျှို့ဝှက် နည်းစနစ် တစ်ခုနဲ့ ဆွဲထုတ်ခံလိုက်ရတာ..." လူတိုင်း ဇဝေဇဝါ ဖြစ်နေစဉ်မှာပဲ အနည်းငယ် ပျင်းရိနေသည့် အသံတစ်ခု ထွက်ပေါ်လာခဲ့သည်။"ငါ့ကို ပိုပြီး သိချင်စိတ် ဖြစ်စေတာက သူတို့က လို့ ဒီလို လုပ်တာလဲ ဆိုတာပဲ"
လူတိုင်း အသံလာရာ လမ်းကြောင်းကို ကြည့်လိုက်ရာ ရှူကျစ်ဟွာက ဝိုင်ဘူးသီးခြောက် တစ်လုံး ကိုင်ထားသည်ကို တွေ့လိုက်ရသည်။ သူမ၏ ခန္ဓာကိုယ်က ဝိညာဉ်ဝိုင်၏ မှိန်ဖျဖျ ရနံ့များဖြင့် ပြည့်နှက်နေခဲ့သည်။
အပြုံးတစ်ခုဖြင့် သူမက ဆက်ပြောလိုက်သည်။ "ဒီလူတွေက အကြောင်းပြချက် မရှိဘဲ အသက်နှုတ်ယူခံလိုက်ရတာ မဟုတ်ဘူး... ဒီလိုလုပ်တဲ့ သူမှာ ရည်ရွယ်ချက်ရှိရမယ်"
"ဒီထူးဆန်းတဲ့ လျှို့ဝှက် နည်းစနစ်ကို အသုံးပြုပြီး သူ့အတွက် အကျိုးရှိမယ့် ကိစ္စတစ်ခုခု ပြီးမြောက်အောင် သူက လုပ်ချင်နေတာ ဖြစ်ရမယ်"
"ဥပမာအားဖြင့်..."
ရှူကျစ်ဟွာဟာ နှစ်ပေါင်းများစွာ အသက်ရှင်လာခဲ့ပြီး မိစ္ဆာတွေ ကမ္ဘာလောကကို ဖျက်ဆီးခဲ့တဲ့ ဥပမာ အများအပြားကို သူမ မြင်ဖူး ကြားဖူးခဲ့လေသည်။
သူမ တစ်စုံတစ်ရာကို တွေးမိပြီးနောက် မှိန်ဖျဖျ ပြောလိုက်၏။"တစ်ဖက်လူက သူ နှစ်ပေါင်းများစွာ အဆင့်မချိုးဖျက်နိုင်ခဲ့တဲ့ အဆင့်တစ်ခုကို ချိုးဖျက်ဖို့ ဒီထူးဆန်းတဲ့ လျှို့ဝှက် နည်းစနစ်ကို အသုံးပြုချင်နေတာပဲ"
"ဒီလောက် ကြီးမားတဲ့ အတိုင်းအတာ ဒီလောက် လက်ဝင်တဲ့ လျှို့ဝှက် နည်းစနစ်ဆိုတော့ ရွှေအမြုတေအဆင့် ကနေ မူလဝိညာဉ်အဆင့်ကို အဆင့်ချိုးဖျက်ဖို့များ ဖြစ်နေမလားပဲ"
ရှူကျစ်ဟွာ၏ စကားတစ်ခွန်းချင်းစီမှ ထုတ်ဖော်လိုက်သည့် သတင်းအချက်အလက်များက လူများကို ကြက်သီးထသွားစေခဲ့သည်။
အထူးသဖြင့် နောက်ဆုံး စကားတစ်ခွန်းပင်...
၎င်းက ရွှေအမြုတေရုပ်သေးရုပ်မှလွဲ၍ ရှိနေသည့် လူတိုင်း၏ မျက်နှာများကို အကြီးအကျယ် ပြောင်းလဲသွားစေလေသည်။
ရှူကျစ်ဟွာ ပြောတာတွေက ခန့်မှန်းချက် တစ်ခုသာ ဖြစ်ပေမယ့် လောလောဆယ်မှာ ဒါက ပိုပြီး ယုံကြည်စိတ်ချရတဲ့ ခန့်မှန်းချက် တစ်ခုဖြစ်ကာ မဟုတ်ရင်၊
မိစ္ဆာက ဘာလို့ ဒီလို လုပ်ရမည်နည်း။
ရွှေအမြုတေ အဆင့် ကနေ... မူလဝိညာဉ် အဆင့် ဆီသို့......
"ရှူး..."
ယန်ချင်းခရိုင်ကို မြို့ပျက်ကြီးတစ်ခု ဖြစ်လုနီးပါး ပြုလုပ်ခဲ့တဲ့ သူက တကယ်ပဲ မိစ္ဆာတစ်ကောင် ဖြစ်နေတယ်လို့ ဆိုလိုတာ မဟုတ်ပါလော။
ဒါ့အပြင် ရွှေအမြုတေ အဆင့် (၁၀) မှာ ရှိနေတဲ့ ခြေလှမ်းတစ်ဝက်မူလဝိညာဥ်အဆင့် မိစ္ဆာတစ်ကောင်ပင်။
ယန်ချင်းခရိုင်က လူ (၁) သိန်းကနေ (၂) သိန်းကျော်က တစ်ဖက်လူ မူလဝိညာဉ် အဆင့်ကို အဆင့်ချိုးဖျက်ဖို့ လိုအပ်တဲ့ ယဇ်ကောင်တွေပင်။
အတွေးတစ်ခု ဖူရွှမ်နီ၏ စိတ်ထဲ ဖြတ်သန်းသွားပြီး သူမ၏ မျက်လုံးများ ရုတ်တရက် ပြူးကျယ်သွားစေခဲ့သည်။
"မြင့်မြတ်သောနှလုံးသား နန်းတော်က အဲဒီ မိစ္ဆာကျင့်ကြံသူတွေ ခရိုင်ရုံးတော်ထဲ စိမ့်ဝင်ဖို့ ကြိုးစားခဲ့တာက ရည်ရွယ်ချက်က အတူတူပဲ ဖြစ်နေမလား.... ချင်းဟယ်ခရိုင်တစ်ခုလုံးကို ဖုံးလွှမ်းသွားမယ့် လျှို့ဝှက်နည်းစနစ် တစ်ခုချထားဖို့ ခရိုင် ရုံးတော်ရဲ့ အာဏာကို အသုံးပြုပြီး လျှို့ဝှက်နည်းစနစ်ကို အသက်သွင်းဖို့ အချိန်ကောင်း စောင့်နေကြတာများလား"
"ဒါဆိုရင် ချင်းဟယ်ခရိုင်က လူသိန်းပေါင်းများစွာနဲ့ အားနည်းတဲ့ ကျင့်ကြံသူ တချို့ အပါအဝင်... အားလုံးက နောက်ကွယ်က မိစ္ဆာကြီး အတွက် အစာဖြစ်သွားကြမှာပေါ့"
ဖူရွှမ်နီ သူမ၏ ခန့်မှန်းချက်ကို ဖုံးကွယ်မထားခဲ့ပေ။
ဒီရယ်စရာကောင်းတယ်လို့ ထင်ရတဲ့ ခန့်မှန်းချက်တွေ အတွက် သက်သေအထောက်အထား မရှိတောင် ပြောရပေမည်။
ရှူကျစ်ဟွာ သူမကို ကြည့်လိုက်၏။ သူမ တစ်စုံတစ်ရာကို ဂရုတစိုက် အာရုံခံနေသကဲ့သို့ ဖြစ်နေခဲ့သည်။
ထို့နောက်၊ သူမ စဉ်းစားတွေးတောဟန်ဖြင့် ပြောလိုက်သည်။ "ပြောနေစရာ မလိုတော့ဘူး ငါ ဒီခရိုင်ထဲမှာ ကြီးမားတဲ့အစီအရင်တစ်ခုရဲ့ ခြေရာတွေကို အာရုံခံမိတယ်"
"ဒီခြေရာတွေက အရမ်းဖုံးကွယ်ထားတာ... အကယ်၍ သူတို့ အစီအရင် ဖွဲ့စည်းပုံကို အသက်မသွင်းရင် ငါတောင် ရှာတွေ့နိုင်မှာ မဟုတ်ဘူး"
ရှူကျစ်ဟွာ ပြုံးပြီး ပြောလိုက်သည်။ "မင်းရဲ့ ခန့်မှန်းချက်က အမှန်တရားနဲ့ နီးစပ်ကောင်း နီးစပ်နိုင်တယ်"
သူမက ဝိညာဉ်ဝိုင် အတော်များများ သောက်ထားရာ အနည်းငယ် မူးနေပြီး ပြုံးနိုင်သေးလေသည်။
သို့သော် ကျန်လူများက မပြုံးနိုင်ကြတော့ပေ။
အကယ်၍ ဒါကသာ အမှန်ဆိုရင် ယန်ချင်းခရိုင်က ချင်းဟယ်ခရိုင်အတွက် အစားထိုးတစ်ခု ဖြစ်နေတယ်လို့ ဆိုလိုနေခြင်းပင်။
မူလက မိစ္ဆာကျင့်ကြံသူတွေရဲ့ ရည်ရွယ်ချက်က ချင်းဟယ်ခရိုင်က လူသိန်းပေါင်းများစွာကို ယဇ်ကောင်တွေ အဖြစ် အသုံးပြုဖို့ပင်။
နောက်ပိုင်းမှာ အကြောင်းပြချက် အမျိုးမျိုးကြောင့် ချင်းဟယ်ခရိုင်က မိစ္ဆာကျင့်ကြံသူတွေ အကုန် အသတ်ခံလိုက်ရသည်။
ရလဒ်အနေနဲ့... ချင်းဟယ်ခရိုင်မှာ သူတို့ လုပ်ထားတဲ့ ပြင်ဆင်မှုတွေ အကုန်လုံး အလဟဿ ဖြစ်ကုန်ရာ ချင်းဟယ်ခရိုင်အတွက် အစားထိုး တစ်ခု နဲ့ လဲလှယ်ဖို့ အတွက် မိစ္ဆာကျင့်ကြံသူတွေက ယန်ချင်းခရိုင်ကို ပစ်မှတ်ထားခဲ့ကြခြင်းပင်။
ယန်ချင်းခရိုင်မှာ ပိုင်ယီလို ပြောင်းလဲတတ်သည့် ကိန်းရှင်တစ်ခု မရှိပေ။ ယန်ချင်းခရိုင်က တစ်သီးပုဂ္ဂလ ကျင့်ကြံသူတွေ အနေနဲ့ ဆိုရင်လည်း သူတို့က အများဆုံး ချီစုစည်းမှုအဆင့် (၃) သို့မဟုတ် (၄) မှာပဲ ရှိကြရာ တစ်ခုခု မှားယွင်းနေကြောင်း ဘယ်သူမှ သတိပြုမိနိုင်မှာ မဟုတ်ချေ။
တကယ်တော့ ယန်ချင်းခရိုင်ရဲ့ခရိုင် ရုံးတော်တောင် မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေရဲ့ ထိန်းချုပ်မှုကို ခံထားရပြီးသား ဖြစ်နိုင်လေသည်။
အကယ်၍ သူတို့ တစ်ခုခု မှားယွင်းနေကြောင်း တွေ့ရှိရင်တောင် သူတို့ ဒီအသံတွေကို ဖိနှိပ်ထားပြီး သူတို့ရဲ့ စီစဉ်မှုတွေနဲ့ အစီအစဉ်တွေကို စနစ်တကျဆက်လက် လုပ်ဆောင်နိုင်ပေသည်။
"ရှူး..."
"မင်းသမီး" အရာရှိ တစ်ဦးက လေအေးတစ်ချက် မရှူသွင်းဘဲ မနေနိုင်တော့ပေ။ သူက ဖူရွှမ်နီ၏ ကိုယ်ပိုင်အမှတ်အသား ပေါက်ကြားသွားမှာကို ဂရုမစိုက်တော့ပေ။
သူ စိုးရိမ်တကြီး ပြောလိုက်၏။ "အကယ်၍ ယန်ချင်းခရိုင်က ချင်းဟယ်ခရိုင် အတွက် အစားထိုး တစ်ခု ဆိုရင် ချင်းဟယ်ခရိုင် အတွက် ဒုတိယ အစားထိုး ဖြစ်လာမယ့် ဒုတိယ ခရိုင် တစ်ခု သေချာပေါက် ရှိလိမ့်မယ်"
သူ လျင်မြန်စွာ ထပ်ပြောလိုက်သည်။ "ဘာလို့လဲဆိုတော့ ယန်ချင်းခရိုင်ရဲ့ လူဦးရေက ချင်းဟယ်ခရိုင်လောက် မများပြားလို့ပဲ... မိစ္ဆာက ယဇ်ကောင် ပိုလိုချင်နေတာ... ချင်းဟယ်ခရိုင်ကို အစားထိုးဖို့ သူတို့ အစားထိုးတွေ ပိုလိုအပ်လိမ့်မယ်"
"ဒါကြောင့် အဲ့ဒီမိစ္ဆာ မူလဝိညာဉ်အဆင့်တက်တာကို ငါတို့ တားဆီးရမယ်"
"မဟုတ်ရင်... မရေမတွက်နိုင်တဲ့ လူတွေ သေကုန်လိမ့်မယ်"
ဒီပြည်နယ် အရာရှိတောင် ဒီအချက်ကို တွေးမိမှတော့ ဖူရွှမ်နီလည်း သဘာဝကျစွာ တွေးမိတာပင်။
သို့သော် ပြဿနာက မူလဝိညာဉ် အဆင့်ကို အဆင့်ချိုးဖျက်တော့မယ့် မိစ္ဆာကျင့်ကြံသူကို ဘယ်လို ရှာဖွေမလဲဆိုခြင်းပင်။
ဒီအချိန်မှာ သူတို့ရဲ့ ခန့်မှန်းချက် မှားယွင်းနေမလား ဆိုတာ ဘယ်သူမှ မေးခွန်းထုတ်မှာ မဟုတ်ပေ။
ဒီလောက် လေးနက်တဲ့ ကိစ္စရပ် အတွက် အကယ်၍ သူတို့ရဲ့ ခန့်မှန်းချက် မှားယွင်းရင်တောင် အကျပ်အတည်းကို ရှင်းလင်းဖို့ သူတို့ စစ်ဆေးကြည့်ရပေမည်။
အကယ်၍ (၁) ရာခိုင်နှုန်းပဲ ဖြစ်နိုင်ချေ ရှိရင်တောင် သူတို့ သတိလက်လွတ် နေလို့ မရပေ။
"နေပါဦး..."
ရုတ်တရက် အခြား ပြည်နယ်အစိုးရ အရာရှိတစ်ဦးက အလျင်အမြန် ပြောလိုက်သည်။ "မနေ့က ခရိုင်တစ်ခုမှာ မိစ္ဆာကျင့်ကြံသူ တစ်ယောက်ရဲ့ ခြေရာကို တွေ့ခဲ့တယ် မဟုတ်လား... အဲဒီခရိုင်က ယန်ချင်းခရိုင် မဟုတ်ဘူး... ချင်းဟယ်ခရိုင် အနီးအနားက တခြား ခရိုင်တစ်ခု ဆိုတာ ကျွန်တော် မှတ်မိတယ်..."
"အဲဒီဘက်က သတင်းအရ အဲဒီ မိစ္ဆာကျင့်ကြံသူကို နန်းတော်က ဝန်ကြီးနှစ်ယောက်က သတ်ဖြတ်လိုက်တယ်တဲ့... ဒါ့အပြင် အဲဒီခရိုင်ရဲ့ လူဦးရေက ယန်ချင်း ခရိုင်နဲ့ အတူတူလောက် ရှိတယ် ဆိုတာ ကျွန်တော် မှတ်မိတယ်"
"ဒီခရိုင်နှစ်ခုရဲ့ စုပေါင်း လူဦးရေက ချင်းဟယ် ခရိုင်နဲ့ ယှဉ်လို့ မရဘူး"
"ဖြစ်နိုင်တာက မြင့်မြတ်သောနှလုံးသား နန်းတော်က မိစ္ဆာကျင့်ကြံသူရဲ့ နောက်ထပ် ပစ်မှတ်က အဲဒီနေရာ ဖြစ်နေမလား"
ဒါကို ကြားတော့ ဖူရွှမ်နီ ချက်ချင်း ဆုံးဖြတ်ချက် ချလိုက်ပြီး အမိန့် ပေးလိုက်သည်။ "ချက်ချင်း ထွက်ခွာကြမယ်"
"မင်းသမီး ဒါဆိုရင် ယန်ချင်းခရိုင်က လူတွေက..."
ဖူရွှမ်နီ အသံနက်ဖြင့် ပြောလိုက်၏။ "မိစ္ဆာက အဲဒီနေရာကို သူ့ရဲ့ နောက်ထပ် ပစ်မှတ် အဖြစ် မြင်ကောင်း မြင်လိမ့်မယ်.... အကယ်၍ ငါတို့ မြင့်မြတ်သောနှလုံးသား နန်းတော်ရဲ့ အစီအစဉ်ကို ဖျက်ဆီးဖို့ အလျင်အမြန် မသွားရင် ယန်ချင်းခရိုင်က လူတွေကို မကယ်တင်နိုင်ရုံတင် မကဘူး.... အဲဒီခရိုင်က လူတွေကိုလည်း မကယ်တင်နိုင်ဘဲ ဖြစ်သွားလိမ့်မယ်"
"ဒီအခြေအနေမှာ စွန့်လွှတ်မှု တစ်ခု ပြုလုပ်ရမယ်"
ပြည်နယ်က ကျင့်ကြံသူ အများအပြား သူတို့ ရင်ထဲတွင် တုန်လှုပ်ချောက်ချားမှုကို ခံစားလိုက်ရသည်။ သူတို့ဟာ ဖူရွှမ်နီ၏ ပြတ်သားမှုကို ခံစားလိုက်ရပြီး ဘာမှ ထပ်မပြောကြတော့ပေ။
ရှူကျစ်ဟွာ၏ မျက်နှာတွင် အံ့သြမှု အရိပ်အယောင် တစ်ခု ပေါ်လာခဲ့သည်။ ချက်ချင်းပင် သူမဟာ ရွှေအမြုတေ ရုပ်သေးရုပ်ထံ လျှို့ဝှက် အသံလွှဲပြောင်းခြင်း ပေးပို့လိုက်သည်။ "တပည့် ငါ ဒီကောင်မလေးကို အတော်လေး သဘောကျတယ်... သူမမှာ ဦးဆောင်နိုင်စွမ်းရှိတယ်.... မင်း ရွေးချယ်တဲ့ လူတွေက အတော်လေး အထင်ကြီးစရာ ကောင်းတာပဲ မင်းမှာ ကောင်းမွန်တဲ့ အမြင်ရှိတယ်..."
"..."