အခန်း ၁၅၃ : ရှူကျစ်ဟွာ ကူညီခြင်း
ဖူရွှမ်နီဟာ သူမရှေ့က ဒီလျှို့ဝှက်ဆန်းကြယ်တဲ့ အမျိုးသမီးမှာ နက်နဲတဲ့ ကျင့်ကြံမှု ရှိရုံတင် မကပဲ သူမရဲ့ ကိုယ်ပိုင်အမှတ်အသားကလည်း စိတ်ဝင်စားစရာ ကောင်းနေတာကို တွေ့ရှိလိုက်ရသည်။
သူမ စကားအနည်းငယ်ပဲ ပြောရသေးပေမယ့် ဖူရွှမ်နီဟာ သတင်းအချက်အလက် အများအပြား ကြားသိခဲ့ရပြီးပေပြီ။
'သူမ ကိုယ့်ဂိုဏ်းကိုတောင် မကာကွယ်နိုင်ခဲ့ဘူးဆိုတော့....ဖြစ်နိုင်တာက...'
ဒီလူက ဘယ်ဂိုဏ်းကလဲ.... မဟုတ်ဘူး... ဘယ်ဂိုဏ်းက တပည့်က ဒီလောက် ရယ်စရာကောင်းလောက်အောင် သန်မာနိုင်မှာလဲ.....'
'ဖြစ်နိုင်တာက ဂိုဏ်းတစ်ခုရဲ့ အကြီးအကဲ တစ်ယောက်များလား...ဒါမှမဟုတ်... ဂိုဏ်းသခင် တစ်ယောက်များလား..'
ဒါ့အပြင် တစ်ဖက်လူ ပြောခဲ့တဲ့ ဂိုဏ်းက မရှိတော့ဖို့ ဖြစ်နိုင်ချေ များပေသည်။
'နေပါဦး...'
ဖူရွှမ်နီ ရုတ်တရက် တစ်စုံတစ်ရာကို တွေးမိလိုက်ပြီး၊ ချက်ချင်း ကြက်သီးထသွားခဲ့သည်။
'မရှိတော့တဲ့ ဂိုဏ်းတစ်ခု.... ရှူး....မြင့်မြတ်သောနှလုံးသား နန်းတော်များလား....ဒါ မမှန်ဘူး...'
အကယ်၍ တစ်ဖက်လူက မြင့်မြတ်သောနှလုံးသား နန်းတော်က မိစ္ဆာကျင့်ကြံသူ တစ်ယောက် တကယ် ဖြစ်နေရင် သူမ ဘာလို့ အသက်ရှင်နေသေးသည်နည်း။
"မင်း ပိုင်ယီကို လာရှာတာ မဟုတ်လား" ဖူရွှမ်နီ ဘာမှ မပြောရသေးခင် ရှူကျစ်ဟွာ ပြုံးပြီး မေးလိုက်သည်။
ဖူရွှမ်နီ ခဏတာမျှ တိတ်ဆိတ်နေပြီး ခေါင်းငြိမ့်လိုက်၏။ သူမဟာ ကျင့်ကြံသူ ပိုင်ကို လာရှာတာ အမှန်ပင်။
ဒါပေမဲ့... လမ်းမှာ ဒီလို မတော်တဆမှုမျိုး ဖြစ်လာလိမ့်မယ်လို့ သူမ မျှော်လင့်မထားခဲ့ချေ။
"သူ မနေ့ညက ပင်ပန်းသွားလို့ သူ့ကို မနှောင့်ယှက်ပါနဲ့... အကယ်၍ တစ်ခုခု ရှိရင် ငါ့ကို ပြောလို့ ရပါတယ်" ရှူကျစ်ဟွာ ပြုံးပြီး ပြောလိုက်၏။ ဒါက ကျင့်ကြံသူပိုင်နဲ့ ဒီလျှို့ဝှက်ဆန်းကြယ်တဲ့ အမျိုးသမီးကြားက ဆက်ဆံရေး ရိုးရှင်းခြင်း မရှိကြောင်း ဖူရွှမ်နီကို သဘောပေါက်သွားစေခဲ့သည်။
ဖူရွှမ်နီ ပြောလိုက်သည် - "ချင်းဟယ် ခရိုင်အနီးအနားက ယန်ချင်းခရိုင်လို့ ခေါ်တဲ့ ခရိုင်တစ်ခုမှာ သွေးထွက်သံယို ကပ်ဘေးတစ်ခု ဖြစ်ခဲ့တယ်...ပြီးတော့ လူအများကြီး သေဆုံးခဲ့တယ်"
"ဒါကို ခရိုင်ရုံးတော်က မိစ္ဆာကျင့်ကြံသူ လက်ချက်လို့ သံသယ ရှိနေတယ်"
"ဒါပေမဲ့... ချင်းဟယ်ခရိုင် ရုံးတော်မှာ လူအင်အား မလုံလောက်လို့ ယန်ချင်းခရိုင်ကို သွားရောက် စုံစမ်းစစ်ဆေးဖို့ ကျင့်ကြံသူပိုင်ကို ဖိတ်ခေါ်ချင်လို့ပါ"
"ဒါပေါ့..." ဖူရွှမ်နီ ထပ်ဖြည့်ပြောလိုက်သည်။ "အကယ်၍ ကျင့်ကြံသူပိုင်က ဒီကိစ္စမှာ မပါဝင်ချင်ဘူး ဆိုရင်လည်း ရပါတယ်"
"ဒါဆိုရင် ကျွန်မ ဒီအတိုင်း ပြန်လိုက်ပါ့မယ်"
"သူ့ကို ခေါ်ဖို့ ကြိုးစားနေတာ အသုံးမဝင်ဘူး .." ရှူကျစ်ဟွာ အရက်သောက်ထားလို့ အနည်းငယ် မူးရစ်နေသည့် သူမ၏ မျက်လုံးများကို ကျဉ်းမြောင်းကာ ပြုံးပြီး ဆက်ပြောလိုက်သည်။ "ဒါပေမဲ့ မိစ္ဆာကျင့်ကြံသူတွေ ပြဿနာ ရှာနေတယ်လို့ မင်း ပြောလိုက်တာလား"
ဖူရွှမ်နီ ခေါင်းငြိမ့်လိုက်သည်။
ရှူကျစ်ဟွာ နက်ရှိုင်းစွာ စဉ်းစားခန်း ဝင်သွားခဲ့သည်။"အကယ်၍ မင်း စိတ်မရှိဘူး ဆိုရင် ငါ့ကို အဲဒီနေရာ လိုက်ပြလို့ ရမလား"
ဖူရွှမ်နီ ကြောင်အသွားခဲ့ရသည်။
သူမ တကယ် မျှော်လင့်မထားခဲ့ချေ။ ၎င်းက ဒီနေ့ အံ့သြစရာ တစ်ခု ရှိလာလိမ့်မယ်လို့ပင်။
ဒီလျှို့ဝှက်ဆန်းကြယ်တဲ့ အမျိုးသမီး အရမ်းသန်မာကြောင်း သူမ သေချာသိပေသည်။ သူမက အနည်းဆုံး အခြေတည်အဆင့် (၅) မှာ ရှိနေနိုင်ပြီး သူမထက် အများကြီး ပိုသန်မာလေသည်။
ဒီလို အခြေအနေမျိုးမှာ အကယ်၍ သူမ လိုက်ပါလာဖို့ ဆန္ဒရှိရင် သူမက သေချာပေါက် စွမ်းအားကြီးတဲ့ အကူအညီတစ်ယောက် ဖြစ်လာလိမ့်ပေလိမ့်မည်။
ဒါပေမဲ့ ဒီလျှို့ဝှက်ဆန်းကြယ်တဲ့ အမျိုးသမီးနဲ့ ပတ်သက်ပြီး သူမမှာ လုံလောက်တဲ့ နားလည်မှု မရှိဘူးလို့ ဖူရွှမ်နီ ခံစားလိုက်ရသည်။
ထို့ကြောင့် ဒါက ဆုံးဖြတ်ချက်ချဖို့ သူမကို ခက်ခဲစေခဲ့သည်။
"မင်း ငါ့ကို ကြောက်နေတာလား" ဖူရွှမ်နီ ဘာတွေးနေလဲ ဆိုတာ ရှူကျစ်ဟွာ မြင်ပုံရပြီး သူမ ပြုံးပြီး မေးလိုက်သည် - "မင်း စိုးရိမ်ပူပန်နေပြီး ဒီကိစ္စကို သိပ်ဂရုစိုက်နေတာ ငါ မြင်နိုင်ပါတယ်.... ဒါ့အပြင် ဒီကိစ္စရဲ့ ပြင်းထန်မှုက မနိမ့်ပါးဘူး"
"အကယ်၍ မင်း ဒီမှာ ဆက်ပြီး တွန့်ဆုတ်နေမယ် ဆိုရင် ယန်ချင်းခရိုင်မှာ ဒီရာဇဝတ်မှု ကျူးလွန်ခဲ့တဲ့ လူသတ်သမား ထွက်ပြေးသွားလောက်ပြီ... မင်းရဲ့ တွန့်ဆုတ်မှုကြောင့် အဲဒီ သဲလွန်စသက်သေအထောက်အထားတွေ ပျောက်ကွယ်သွားလိမ့်မယ်... အဲဒါတွေလည်း ပျောက်ကွယ်သွားလိမ့်မယ်"
အကြီးအကဲတစ်ယောက်က လူငယ်တစ်ယောက်ကို ဆိုဆုံးမနေသလို လေသံမျိုးက ဖူရွှမ်နီကို နေရထိုင်ရ ခက်ခဲစေခြင်း မရှိခဲ့ပေ။
သူမဟာ တစ်အား တွန့်ဆုတ်လွန်းနေကြောင်း သူမလည်း သိပေသည်။ ဒီအချိန်မှာ အရေးအကြီးဆုံး အရာက ပြတ်သားတဲ့ ဆုံးဖြတ်ချက်တစ်ခု ချဖို့ပင်။
ထို့နောက် သူမဟာ အသက်ပြင်းပြင်း ရှူသွင်းလိုက်ပြီး ခေါင်းငြိမ့်လိုက်သည်။
"အကယ်၍ စီနီယာက ခရိုင် ရုံးတော်ကို ကူညီဖို့ ဆန္ဒရှိတယ် ဆိုရင် အဲဒါက အကောင်းဆုံးပါပဲ....ပြီးတော့ စီနီယာ့ နာမည် သိခွင့် ရှိမလား"
"ရှူကျစ်ဟွာ"
'ရှူကျစ်ဟွာ...'
ဖူရွှမ်နီ သူမရဲ့ မှတ်ဉာဏ်တွေကို ရှာဖွေကြည့်ပြီး ဒီနာမည်ကို ဘယ်တုန်းကမှ မကြားဖူးကြောင်း တွေ့ရှိလိုက်ရသည်။
မသေမျိုးကျင့်ကြံခြင်း ကမ္ဘာမှာ လူဦးရေ ဘီလီယံပေါင်းများစွာ ရှိပြီး သူမ ရောက်ရှိနေတဲ့ မဟာယန် မင်းဆက်က မင်းဆက် အများအပြားထဲက တစ်ခုသာ ဖြစ်လေသည်။
ကမ္ဘာပေါ်မှာ မရေမတွက်နိုင်တဲ့ ကျင့်ကြံသူတွေ ရှိကြပြီး ဒီလိုအခြေအနေမျိုးမှာ ကမ္ဘာပေါ်က လူတိုင်းကို သူမ ဘယ်လိုလုပ် သိနိုင်မည်နည်း။
တခြား မင်းဆက်တွေက ကျော်ကြားတဲ့ ပုဂ္ဂိုလ်တွေ မဟာယန် မင်းဆက်ကို ရောက်လာရင်တောင် ဘယ်သူမှ သူတို့နာမည်ကို မသိကြပေ။
ဒီလိုကိစ္စမျိုး မကြာခဏ ဖြစ်ပျက်လေ့ ရှိပြီး ဒါက ပုံမှန်ပင်။
ဒါကြောင့် တွေးနေစရာ မလိုပေ။
ဖူရွှမ်နီဟာ သူမရဲ့ ဓားကို စီးပြီး ထွက်ခွာသွားခဲ့သည်။ သူမဟာ ယန်ချင်းခရိုင်ကို တတ်နိုင်သမျှ အမြန်ဆုံး အပြေးသွားချင်နေခဲ့သည်။
ရှူကျစ်ဟွာက ဘယ်ကနေမှန်း မသိ ဝိုင်ဘူးသီးခြောက် တစ်လုံး ထုတ်ယူလိုက်ပြီး တစ်ငုံ သောက်လိုက်ပြီး ဖြည်းညှင်းစွာ ပျံသန်း ထွက်ခွာသွားခဲ့သည်။
အောက်ဘက် ခြံဝင်းထဲ၌။
ပိုင်ယီဟာ အေးအေးလူလူဖြင့် ဝိညာဉ်လက်ဖက်ရည် သောက်နေပြီး ရှူကျစ်ဟွာ သူ့အတွက် လုပ်ပေးခဲ့တဲ့ မုန့်အချို့တွေကို စားနေခဲ့သည်။ ထို့နောက် မိုးကုတ်စက်ဝိုင်းဆီကို တဖြည်းဖြည်း ပျောက်ကွယ်သွားတဲ့ ပုံရိပ် နှစ်ခုကို ကြည့်ပြီး ကိုယ့်ကိုယ်ကိုယ် ရေရွတ်လိုက်၏။"ဒီရွေးချယ်ခံ နံပါတ် (၃)က ဖိအား အများကြီး ခံနေရတာပဲ... သူမက မသေမျိုးကျင့်ကြံခြင်း အတွက် ပြင်ဆင်ဖို့ သူမရဲ့ စွမ်းအင်ကို ခွဲဝေပေးရရုံတင် မကဘူး.... လက်တွေ့ကမ္ဘာက ဒီလို အသေးအဖွဲ ကိစ္စရပ်တွေကိုလည်း ကိုင်တွယ်ဖြေရှင်းနေရသေးတယ်"
ရွေးချယ်ခံ(၃) အနေနဲ့ မသေမျိုးကျင့်ကြံခြင်း သရုပ်ဖော်ဖို့ အချိန် ပိုရှိလာစေရန် လက်တွေ့ကမ္ဘာက ပြဿနာတွေကို တတ်နိုင်သမျှ အမြန်ဆုံး ကိုင်တွယ်ဖြေရှင်းနိုင်ဖို့ ပိုင်ယီ သူမကို အကူအညီ တချို့ သဘာဝကျစွာ ပေးရပေမည်။
ရွှေအမြုတေရုပ်သေးရုပ်က ယန်ချင်းခရိုင် ကိစ္စရပ်တွေမှာ သူမအား ဝင်ရောက်ကူညီဖို့ သဘောတူလိုက်တာ သေချာပေါက် ပိုင်ယီရဲ့ စိတ်ကူးပင်။
သူ တစ်ယောက်တည်းသာ ရွှေအမြုတေရုပ်သေးရုပ်ကို ထိန်းချုပ်နိုင်လေသည်။ ပြီးတော့ ရှူကျစ်ဟွာ ဖူရွှမ်နီနဲ့ တွေ့ဆုံဖို့ ပေါ်လာတာကလည်း သဘာဝကျစွာ ပိုင်ယီရဲ့ စိတ်ကူးဖြစ်ပေသည်။
ရှူကျစ်ဟွာကို ဖူရွှမ်နီနဲ့ တွေ့ဆုံခွင့် ပေးခဲ့တာ သူပင်။
တစ်ချိန်တည်းမှာပင် ပိုင်ယီဟာ ရှူကျစ်ဟွာကို ဒီကိစ္စရပ်အား ကိုင်တွယ်ဖြေရှင်းရာမှာ ဖူရွှမ်နီကို ကူညီခွင့် ပေးခဲ့သည်။
ဒါပေမဲ့ သူမက သိပ်သိသာလွန်းအောင် မကူညီသင့်ပေ။ သင့်လျော်သလောက်ဆိုရင်ကို အဆင်ပြေလေသည်။
အဲဒီအချိန်တုန်းကသူဒီစကားတွေကိုရှူကျစ်ဟွာကိုပြောလိုက်တဲ့အခါရှူကျစ်ဟွာစဉ်းစားတွေးတောဟန်တစ်ခုထုတ်ဖော်ပြသခဲ့ပြီးထို့နောက်တစ်စုံတစ်ရာကိုနားလည်သွားသကဲ့သို့ရုတ်တရက်သဘောပေါက်သွားခဲ့သည်။