အခန်း ၁၄၆ : ဂိုဏ်းသခင်၏ ဇနီးသည်၊ အခြေတည်အဆင့်(၂)

​ယခု၌ ဂိုဏ်းသခင်ရဲ့ ဇနီးသည်တစ်ဦးတည်းသာ ကျန်ရစ်ခဲ့လေသည်။ တစ်နည်းအားဖြင့် ပြောရရင်  သူမက ပိုင်ယီဆရာသခင်ရဲ့ ဇနီးသည်ပင်။

​ဒီဝိညာဉ်ဂိုဏ်းမှာ လက်ရှိ ပိုင်ယီကို အဆင့်မြင့် တိုက်ပွဲဝင် အင်အားတစ်ခု အဖြစ် သတ်မှတ်လို့ ရနေပေပြီ။

​'သေစမ်း...ဒါက ကြေကွဲစရာ ကောင်းလွန်းတယ်...'

​ထွက်မပြေးတဲ့ ကျန်ရှိနေသေးတဲ့ အပြင်စည်း ဂိုဏ်းသားတွေအတွက် ဆိုရင်တော့... သူတို့အိမ်တွေက ဝိညာဉ်ဂိုဏ်းနဲ့ ဝေးလွန်းနေတာကြောင့် ဒါမှမဟုတ် သူတို့ မဆင်မခြင်ပြန်ပြေးရင် အပြန်လမ်းမှာ သေဆုံးသွားဖို့ ဖြစ်နိုင်ချေ များနေကြလို့ပင်။

​ဒါ့အပြင် သူတို့ရဲ့ ကိုယ်ပိုင် ကျင့်ကြံခြင်း အခြေခံအုတ်မြစ်တွေကလည်း သိပ်အသုံးမဝင်ကြပေ။ အကယ်၍ သူတို့ဟာ တခြား ဂိုဏ်းတစ်ခုကို ပြောင်းရွှေ့ချင်ရင်တောင် တခြားသူတွေက သူတို့ကို သဘောကျမှာ မဟုတ်လောက်ပေ။

​သို့သော် ဝိညာဉ်ဂိုဏ်းအပေါ် သစ္စာရှိတဲ့ လူတစ်စုလည်း ရှိနေတယ် ဆိုတာ ငြင်းလို့ မရချေ။

​သူတို့ အရင်တုန်းက ဝိညာဉ် ဂိုဏ်းရဲ့ ကျေးဇူးကို ခံစားခဲ့ရဖူးရာ ဝိညာဉ်ဂိုဏ်းက ဒီလိုအခြေအနေမျိုး ရောက်နေတာတောင် သူတို့ ထွက်မသွားကြပေ။

​၎င်းက ရှားပါးလွန်းပေသည်။

​ဒီနေ့မှာ ပိုင်ယီဟာ ဝိညာဉ်ဂိုဏ်းရဲ့ ဂိုဏ်းသခင် အသစ်နဲ့ တွေ့ဆုံခဲ့သည်။ ၎င်းက သူ့ဆရာသခင်ရဲ့ ဇနီးသည်ပင်။ ဝိညာဉ်ဂိုဏ်းက ခေါင်းဆောင် မရှိဘဲ ဆက်လက် ရပ်တည်ဖို့ ဆိုတာ မဖြစ်နိုင်ရာ ဒီဆရာသခင်ရဲ့ ဇနီးသည်က သဘာဝကျစွာ ဂိုဏ်းသခင် ဖြစ်လာခဲ့သည်။

​သူမက ငယ်ရွယ်ပုံရတဲ့ အမျိုးသမီး တစ်ယောက်ဖြစ်ပြီး အပေါ်ယံ ကြည့်ရင် သူမက ပိုင်ယီနဲ့ ရွယ်တူလောက် ရှိပုံရလေသည်။

​ဒါပေမဲ့ သူမရဲ့ အခြေခံအုတ်မြစ်ထဲက ရင့်ကျက်မှုနဲ့ ဉာဏ်ရည်က တစ်ဖက်လူ သေချာပေါက် မငယ်ရွယ်တော့ကြောင်း ပိုင်ယီကို ပြောပြနေခဲ့ပြီး သူမက အသက် ရာဂဏန်းလောက် ရှိလောက်ပေပြီ။

​အသက် (၂၀၀) သို့မဟုတ် (၃၀၀) လောက် ရှိနေဖို့ ဆိုတာ မဖြစ်နိုင်တာ မဟုတ်ပေ။

​ဒီအမျိုးသမီး ဂိုဏ်းသခင်က ရွှေအမြုတေ အဆင့်မှာ ရှိနေပြီး သူမရဲ့ ကျင့်ကြံဆင့်က မိစ္ဆာလက်ချက်နဲ့ သေဆုံးသွားတဲ့ ဂိုဏ်းသခင်ဟောင်းနဲ့ အတူတူပင်။

​တစ်ဖက်လူရဲ့ ခွန်အားက အတော်လေး သန်မာလို့သာ သူမ အဲဒီ တိုက်ပွဲကြီးမှာ အသက်ရှင်ကျန်ရစ်ခဲ့ခြင်း ဖြစ်သည်။

​ပိုင်ယီ မှတ်မိတာက သူမ နာမည်က ရှူကျစ်ဟွာပင်။

​ဝိညာဉ်ဂိုဏ်းရဲ့ လက်ရှိ ဂိုဏ်းသခင်က အတော်လေး ပွယောင်းနေတဲ့ အဖြူရောင် ဝတ်ရုံကို ဝတ်ဆင်ထားတာ ပိုင်ယီ တွေ့လိုက်ရ၏။

​"ပိုင်ယီ မင်း ပြန်လည်သက်သာလာပြီလား"

​ရှူကျစ်ဟွာလို့ အမည်ရတဲ့ ဝိညာဉ်ဂိုဏ်းရဲ့ လက်ရှိ ဂိုဏ်းသခင်ရဲ့ လှပတဲ့ မျက်နှာပေါ်မှာ ပင်ပန်းနွမ်းနယ်နေတဲ့ မျက်နှာအမူရာ ရှိနေခဲ့သည်။

​သူမဟာ အတော်လေး ပြန်လည်သက်သာလာပြီ ဖြစ်တဲ့ ပိုင်ယီကို ကြည့်ပြီး အံ့သြနေတဲ့ လေသံနဲ့ ပြောလိုက်၏။ "မင်းရဲ့ ဒဏ်ရာတွေနဲ့ ဝိညာဉ်စွမ်းအား ကုန်ခန်းမှုက ပြင်းထန်တာတောင် မင်းက လဝက်လောက်ပဲ အနားယူလိုက်တာနဲ့ အခု အဆင်ပြေနေပြီလား"

​"ဟင်..." သူမ ရုတ်တရက် တစ်စုံတစ်ရာကို သတိထားမိလိုက်ပြီး သူမရဲ့ လှပတဲ့ မျက်ခုံးတွေကို ဖြည်းညှင်းစွာ မကြုတ်ဘဲ မနေနိုင်တော့ပေ။ "မင်း ဘယ်တုန်းက အခြေတည်အဆင့်ကို အဆင့်ချိုးဖျက် ဝင်ရောက်သွားတာလဲ...  မင်းအရင်တုန်းက ချီစုစည်းမှုအဆင့် (၈) မှာပဲ ရှိသေးတာ မဟုတ်ဘူးလား"

​ဒီရွှေအမြုတေ အဆင့် ဂိုဏ်းသခင်နဲ့ တွေ့ဆုံရတော့  သူ့ကျင့်ကြံမှုကို ဖုံးကွယ်ထားလို့ မရနိုင်မှန်း ပိုင်ယီ သေချာပေါက် သိပေသည်။

​သူ့ရဲ့ အခြေတည်အဆင့် ဆေးလုံးက ချီစုစည်းမှုအဆင့် (၈) ကနေ အခြေတည်အဆင့် အဆင့် (၁) ကို တိုက်ရိုက် အဆင့်ချိုးဖျက် ဝင်ရောက်ခွင့် ပေးခဲ့ရာ ထိုးထွင်းသိမြင်တတ်တဲ့ မျက်လုံးရှိတဲ့ ဘယ်သူမဆို ဒီလိုကျင့်ကြံမှု ပြောင်းလဲခြင်းကို မြင်တွေ့နိုင်လေသည်။

​ထို့ကြောင့် ပိုင်ယီဟာ ဆင်ခြေတစ်ခု ကြိုတင်စဉ်းစားထားပြီးသားဖြစ်လေသည်။ "မိစ္ဆာကျင့်ကြံသူတွေနဲ့ တိုက်ပွဲ ဖြစ်နေစဉ် အတွင်း ကျွန်တော် ဉာဏ်အလင်းပွင့်ခဲ့ပုံ ရတယ်... အထူးသဖြင့် ကျွန်တော် သတိမေ့မြောနေတဲ့ အချိန်ကာလ အတွင်း ကျွန်တော့်စိတ်က ပြင်ပအာကာသထဲ လှည့်လည်သွားလာနေပြီး ကမ္ဘာလောကကြီးထဲက အရာခပ်သိမ်းရဲ့ လျှို့ဝှက်ချက်တွေကို ခံစားနေရသလို ဖြစ်ခဲ့တယ်"

​"ကျွန်တော် နိုးလာတဲ့အခါ ကျွန်တော့်ခန္ဓာကိုယ်ထဲက ဝိညာဉ်စွမ်းအင်တွေက ဒီရေလှိုင်းတွေလို တက်လာခဲ့တယ်.. ရက်အနည်းငယ် အတွင်းမှာတင် ကျွန်တော် အဆင့် အနည်းငယ်ကို ဆက်တိုက် ချိုးဖျက်ဝင်ရောက်နိုင်ခဲ့တယ်... ပြီးတော့ လွန်ခဲ့တဲ့ အချိန်ကာလ တစ်ခုတုန်းက ကျွန်တော် အခြေတည်အဆင့် အဆင့် (၁) ကို တစ်ရှိန်ထိုး အဆင့်ချိုးဖျက် ဝင်ရောက်နိုင်ခဲ့တယ်"

​သူ့လေသံက ရိုးသားပုံရပြီး အမှန်တရားတို့ကို ပြောနေသလိုပင်။

​ရှူကျစ်ဟွာ အံ့သြသည့် မျက်နှာအမူရာကို ထုတ်ဖော်ပြသလိုက်၏။ "မင်း... ဉာဏ်အလင်းပွင့်ခဲ့တာလား..."

​ဉာဏ်အလင်းပွင့်ခြင်း.......

​ဒါက မသေမျိုးကျင့်ကြံခြင်း ကမ္ဘာမှာ ရှားပါးပေသည်။

​မသေမျိုးကျင့်ကြံသူ အများအပြားဟာ သူတို့ ဘဝတစ်လျှောက်လုံး ဘယ်တုန်းကမှ ဉာဏ်အလင်း မပွင့်ဖူခဲ့ကြပေ။

​သူမ ကိုယ်တိုင်လည်း အတူတူပင်။

​ပြီးတော့ ထူးကဲတဲ့ ပါရမီနဲ့ ကောင်းမွန်တဲ့ ကံတရား ရှိတဲ့ ကျင့်ကြံသူ တချို့ဟာ သူတို့တစ်ခါ ဉာဏ်အလင်းပွင့်တာနဲ့ ရရှိတဲ့ အကျိုးကျေးဇူးတွေက တခြားကျင့်ကြံသူတွေ မနာလိုနိုင်လောက်အောင်ဖြစ်စေလေသည်။

​ပိုင်ယီလည်း ဒီအချက်ကို ကောင်းကောင်း နားလည်ပေသည်။။

​ဒီလိုဆင်ခြေမျိုးက နည်းနည်း ယုတ္တိမရှိသလိုဖြစ်နေပေမယ့် ရှူကျစ်ဟွာ ဘာလို့ ယုံကြည်သွားလဲ ဆိုတာ သူ မသိချေ။

​သူမ ပိုင်ယီကို ကြည့်တဲ့ အခါ သူက ကြည့်ရတာ သိပ်မျက်စိပသာဒ ဖြစ်စရာ ကောင်းတယ်လို့ ရှင်းပြလို့မရနိုင်လောက်အောင် ခံစားလိုက်ရသည်။

​ပိုင်ယီလို ဖြောင့်မတ်တဲ့ မျက်နှာထားရှိတဲ့ လူငယ်တစ်ယောက်က... လိမ်ညာနိုင်မှာ မဟုတ်ဘူးလို့ သူမ ခံစားလိုက်ရသည်။

​ဒါကို တွေးမိတော့ ရှူကျစ်ဟွာ အပြုံးအရိပ်အယောင် တစ်ခုကို ညှစ်ထုတ်လိုက်ပြီး ခေါင်းငြိမ့်ကာ ပြောလိုက်သည်။ "ဒီတိုက်ပွဲကြီး အပြီးမှာ မင်း ဉာဏ်အလင်းပွင့်နိုင်ခဲ့တာ အခွင့်အလမ်း တစ်ခု ရရှိခဲ့တယ်လို့ သတ်မှတ်လို့ ရတာပေါ့"

​သူမ ရုတ်တရက် သက်ပြင်းချလိုက်၏။ "တကယ်တော့... အကယ်၍ မင်း ဝိညာဉ်ဂိုဏ်းကနေ ထွက်ခွာသွားချင်ရင် ငါ မင်းကို တားမှာ မဟုတ်ပါဘူး"

​"လက်ရှိ ဝိညာဉ်ဂိုဏ်းက အရင်ကနဲ့ မတူတော့ဘူး"

​ဝိညာဉ်ဂိုဏ်းကနေ ထွက်ခွာမည်ဆိုသည့်အတွေးမျိုး ပိုင်ယီမှာ မရှိချေ။ ဒီတစ်ခါ ကျင့်ကြံခြင်း သရုပ်ဖော်မှုရဲ့ ရည်ရွယ်ချက်က တကယ်တော့ ပိုကြာကြာ အသက်ရှင်ဖို့ပင်။

​လက်ရှိ ဝိညာဉ်ဂိုဏ်းက အခြေနေဆိုးတယ်ဆိုပေမဲ့ တစ်ဖက်ကကြည့်ရင်လည်း ဝိညာဉ်ဂိုဏ်းမှာ မက်မောစရာ ဘာမှ မရှိတော့ဘူးဟု ပြောရပေမည်။

​ဝိညာဉ်ဂိုဏ်းအောက်က ဝိညာဉ် သွေးကြောအသေးလေးတစ်ခုတောင် အဲဒီ တိုက်ပွဲကြီးမှာ ပျက်စီးသွားခဲ့ပေပြီ။

​ဒီလို အခြေအနေမျိုးမှာ... အလောဘကြီးဆုံး လူတောင်မှ ဆင်းရဲတဲ့ ဝိညာဉ်ဂိုဏ်းကို လစ်လျူရှုထားပေမည်။

​ဘာပဲဖြစ်ဖြစ် သူတို့ လဲကျနေတုန်း ဝိညာဉ်ဂိုဏ်းကို တိုက်ခိုက်ရတဲ့ ကုန်ကျစရိတ်က သူတို့ ရရှိမယ့် အကျိုးအမြတ်နဲ့ တိုက်ရိုက် အချိုးမကျပဲ အရှုံးတာ များနေပေမည်။

​ပိုင်ယီ ပြန်ဖြေလိုက်သည်။ "ဂိုဏ်းသခင် ဒီတပည့့် ဝိညာဉ်ဂိုဏ်းကနေ ထွက်ခွာမှာ မဟုတ်ပါဘူး"

​ရှူကျစ်ဟွာ ကြောင်အသွားခဲ့ပြီး သူမမျက်နှာပေါ်က အပြုံးက တဖြည်းဖြည်း ပိုသဘာဝကျလာခဲ့သည်။

​"ကောင်းပြီ" သူမ အနည်းငယ် ခေါင်းငြိမ့်ပြီး ပြောလိုက်၏။ "ဒါဆိုရင် ဒီနေ့က စပြီး မင်းက ဝိညာဉ်ဂိုဏ်းရဲ့ စီနီယာ အစ်ကိုကြီးဖြစ်သွားပြီ... တစ်ချိန်တည်းမှာပဲ မင်းက ငါ့ရဲ့ ဆက်ခံသူ တပည့်လည်း ဖြစ်လိမ့်မယ်... အနာဂတ်မှာ ငါ မင်းရဲ့ ကျင့်ကြံမှုကို လမ်းညွှန်ပေးမယ်"

​"အခုက ဝိညာဉ် ဂိုဏ်းကို ပြုပြင်မွမ်းမံဖို့ လိုအပ်နေတယ်... မင်းကို ဒီလေးလံတဲ့ တာဝန်ထမ်းဆောင်စေဖို့ ငါ ဒီကို ခေါ်လိုက်တာ"

​"ဝိညာဉ်ဂိုဏ်းကို ယခင် အခြေအနေ အတိုင်း ပြန်ရောက်အောင် လုပ်ဖို့ မလိုပါဘူး... အဆင်ပြေရုံလောက်ဆိုရင် ရပြီ"

​ပိုင်ယီ ပြန်ဖြေလိုက်သည်။ "တပည့် အမိန့်ကို လက်ခံပါတယ်"

​ပိုင်ယီ ထွက်ခွာသွားချိန် သူ့ကျောပြင်ကို ကြည့်ပြီး ရှူကျစ်ဟွာ ဘာကြောင့်မှန်း မသိပေမယ့် သူမ သူ့ကို နောက်ထပ် အကြိမ်အနည်းငယ်လောက် ထပ်ကြည့်ချင်နေမိခဲ့သည်။

​ဒါက... သူမ သူ့ကို ကြည့်လို့ မဝနိုင်သလိုဖြစ်နေခဲ့သည်။

​သူမ မျက်မှောင်ကြုတ်လိုက်ပြီး သူမအကြည့်ကို တခြားနေရာဆီ ပြောင်းလဲဖို့ အပြင်းအထန် ကြိုးစားလိုက်ပြီး သူမ ကိုယ့်ကိုယ်ကိုယ် ရေရွတ်လိုက်၏ "ထူးဆန်းတယ် ဘာလို့ ငါ့နှလုံးသားက ရှုပ်ထွေးနေတာလဲ"

​"ဘာတွေ ဖြစ်နေတာလဲ"

​သူမ ဇဝေဇဝါ ဖြစ်နေခဲ့ရသည်။

​[အသက် ၂၄ နှစ် - သင်ဟာ ဝိညာဉ်ဂိုဏ်း၏ စီနီယာ အစ်ကိုကြီး အောင်မြင်စွာ ဖြစ်လာခဲ့သည်။ သင် နောက်ဆုံးတွင် မသေမျိုးကျင့်ကြံခြင်း သရုပ်ဖော် စနစ်ထဲ၌ တစ်နှစ်ကျော် အသက်ရှင်နေထိုင်နိုင်ခဲ့ပေပြီ။ သင့်စိတ်အခြေအနေက အနည်းငယ် စိတ်လှုပ်ရှားနေခဲ့သည်။]

​[ဝိညာဉ်ဂိုဏ်း၏ ဂိုဏ်းသခင်က သင့်ကို အလွန် နက်ရှိုင်းသော လမ်းညွှန်မှုပေးခဲ့သည်။ သင် သူမထံမှ များစွာ သင်ယူခဲ့ရပြီး ဤသည်မှာ သင့်ကို များစွာ အကျိုးရှိစေခဲ့သည်။]

​[သူမဟာ အလွန်ကောင်းမွန်သည့် ဆရာတစ်ဦး ဖြစ်သည်ဟု သင် ထင်မြင်လာခဲ့သည်။]

​[အသက် ၂၅ နှစ် - သင်ဟာ အပြင်စည်း ဂိုဏ်းသားများ အကြား ကောင်းမွန်သည့် ဂုဏ်သတင်းတစ်ခု တည်ဆောက်နိုင်ခဲ့သည်။ နှစ်နှစ်ကြာ ပြန်လည်တည်ဆောက်ပြီးနောက် ဝိညာဉ်ဂိုဏ်း ပြန်လည် ကောင်းမွန်လာခဲ့သည်။ ယခင်ကကဲ့သို့ ခမ်းနားထည်ဝါခြင်းမရှိသော်လည်း သင့်တင့်လျောက်ပတ်သည့်  အခြေအနေရှိနေဆဲ ဖြစ်သည်။]

​[အသက် ၂၆ နှစ် - မပြည့်စုံသည့် ကောင်းကင်ဝါးမျိုးခြင်း မိစ္ဆာနည်းစနစ်မှတဆင့် မူလစွမ်းအင် အမြောက်အမြားကို သင် စုပ်ယူခဲ့သည်။]

​[သင် အခြေတည်အဆင့် (၂) သို့ စတင် အဆင့်ချိုးဖျက်သည်]

​[အောင်မြင်ပါသည်]

​[...]

​…